Amuyume Kutegwa Muzunde Mukusiyana Kusololela Kubuumi

IKUTI MULI mulweendo lwamulwizi muli guwo, ino mbwato buli buti mbomunga mwayanda kubelesya? Sena inga mwabelesya bwato buniini naa bupati bubambidwe kabotu? Cakutadooneka, mulakonzya kubelesya bwato bupati nkaambo bulakonzya kwiinda nomuba mumayuwe aatalikomeneni.

Mbotuyaabwiinda muguwo eeli amuzintu zimwi zikonzya kuletela ntenda mubweende oobu bwazintu, tulakonzya kulimvwa kuti tatukwabilidwe pe. Mucikozyano, zimwi ziindi ibakubusi balakonzya kunyongana akubona kuti tabakwabilidwe akaambo kamizeezo alimwi amicito mibyaabi iili munyika eeyi. Ibantu ibakaba Banakristo caino-ino, balakonzya kutalika kudooneka. Nobaba baabo bayumu ibasyomeka mumulimo wa Leza kwamyaka minji, balakonzya kuti kabali mumusunko akaambo kakuti zyobalangila tazina zuzikizyigwa pe.

Ikulimvwa kuli boobo takuli kupya pe. Babelesi ba Jehova basyomeka mbuli Musa, Jobu alimwi a Davida tiibakakkalikene muziindi zimwi. (Myeelwe 11:14, 15; Jobu 3:1-4; Intembauzyo 55:4) Pele, ibuumi bwabo bwakali kutondezya kuliyumya kwabo kwakulyaaba kuli Jehova. Icikozyanyo cabo cibotu cilatukulwaizya kuti tuyume, pele Saatani Diabolosi uyanda kuti atuleesye kukusiyana kusololela kubuumi butamani. (Luka 22:31) Aboobo, ino mbuti mbotunga twazumanana katuli “bayumu mulusyomo”? (1 Petro 5:9) Alimwi, ino mbuti mbotukonzya kuyumya-yumya basyomima?

Jehova Uyanda Kuti Tuyume

Ikuti katusyomeka kuli Jehova, unootugwasya lyoonse kuti tuzumanane cakutazungaana. Sintembauzyo Davida wakasikilwa makatazyo manji, pele wakalijisi bulangizi muli Leza, aboobo wakaimba kuti: “[Jehova] wakandigwisya mudindi lyalunyonyooko, mumatope aabutinti, waimika maulu aangu [amwala], wandisimya kukweenda kwangu.”—Intembauzyo 40:2.

Jehova ulatuyumya-yumya kuti ‘tulwane lumamba lubotu lwalusyomo’ kutegwa ‘tujatisye buumi butagoli.’ (1 Timoteo 6:12) Alimwi ulapa nzila mbuli mbotunga twazumanana kutazungaana akuzunda munkondo yesu yakumuuya. Imwaapostolo Paulo wakakulwaizya Banakristo kuti “[ba]yume mu-Mwami amunguzu zyakwe impati,” alimwi ‘akusama zilwanyo zyoonse zya Leza, kuti bakonzye kwiima mumeneeno aa Diabolosi.’ (Ba-Efeso 6:10-17) Pele ino ncinzi cikonzya kutupa kuti tutakkalikani? Alimwi ino mbuti mbotukonzya kulikwabilila kuzintu ziletela ntenda?

Amuzicenjelele Zintu Zipa Kutakkalikana

Ncabusongo ikuyeeya kaambo kapati kakuti: Izintu nzyotusala kucita zilakonzya kukujatikizya kukkalikana kwesu kwa Bunakristo munzila mbotu naa mbyaabi. Bakubusi balijisi zyakusala  zinji mbuli imulimo ngobayoocita, ikuba alwiiyo lwaatala alimwi akukwata naa kukwatwa. Bapati balakonzya kusala kuti naa baunke kubusena bumbi antela kujana mulimo aumbi. Tulijisi zyakusala abuzuba zijatikizya mbotweelede kubelesya ciindi alimwi atwaambo tumwi tunji. Ino ncinzi ciyootugwasya kusala cabusongo akuya ambele cakukkalikana mbotuli babelesi ba Leza? Munakristo umwi wabeleka kwaciindi cilamfwu wakati: “Ndilalomba lugwasyo kuli Jehova nondiyanda kusala. Ndisyoma kuti ncintu ciyandika kapati kuzumina alimwi akubelesya ilulayo lujanwa mu Bbaibbele, kumiswaangano ya Bunakristo, kubaalu alimwi amumabbuku aamba zya Bbaibbele.

Notusala zintu, tweelede kulibuzya kuti: ‘Kwainda myaka ili musanu naa ili kkumi kuzwa sunu, sena ndinookkomene akusala nkondacita sunu naa kuyoondiletela kuusa? Sena ndilasola kubona kuti ikusala kwangu takukandipi kutakkalikana kumuuya, pele kuyoopa kuti ndiyaambele kumuuya?’—Ba-Filipi 3:16.

Ibamwi babbapatizyidwe tabakkalikenyi mubuumi akaambo kakuzundwa amasunko, naa kulilekelela cakunga batalika kukanza kutyola milawo ya Leza. Ibamwi bagusyigwa mumbungano akaambo kakuteempwa zibi zyabo babeleka canguzu kutegwa bapilusigwe, eelyo bapilusigwa balagusyigwa alimwi kwainda ciindi cili mbocibede akaambo kacibi nciconya. Sena caamba kuti tiibakapaila kulomba busolozi bwa Leza ikuti ‘basesemwe bubi akukakatila kububotu’? (Ba-Roma 12:9; Intembauzyo 97:10) Toonse tweelede ‘kuzumanana kweenda munzila iluzi.’ (Ba-Hebrayo 12:13) Aboobo atulange-lange twaambo tumwi tupati-pati tukonzya kutupa kuzumanana kukkalikana kumuuya.

Amuzumanane Kuyuma Kwiinda Mukucita Milimo ya Bunakristo

Inzila imwi mbotunga twazumanana mukusiyana kusololela kubuumi, nkujata bubi mumulimo wa Bwami wakukambauka. Masimpe, mulimo wesu wa Bunakristo ncintu cigwasya kugamika myoyo alimwi amizeezo yesu kukucita kuyanda lwa Leza akubikkila maano kubulumbu bwabuumi butamani. Kujatikizya makani aaya, Paulo wakakulwaizya bana Korinto kuti: “Bakwesu bayandika, amuyume mutazungaani pe, amubikke myoyo yanu lyoonse kumilimo ya Mwami nkaambo mulizi kuti milimo yanu yamu Mwami tiili yabuyo pe.” (1 Bakolinti 15:58, Ci) ‘Ikuyuma’ caamba ‘ikukakatila mucintu cimwi.’ ‘Ikutazungaana’ kulakonzya kupandululwa kuti ‘nkwiima nji.’ Aboobo ikujata bubi mumulimo kulakonzya kutupa kukkalikana mubukkale bwesu bwa Bunakristo. Ikugwasya bantu kuti bamuzyibe Jehova kutupa kuti tube abuumi buli aampindu alimwi bukkomanisya.—Incito 20:35.

Pauline Munakristo wabeleka mumilimo wabumisyinali kwamyaka iinda ku 30 alimwi amilimo iimbi yaciindi coonse yakukambauka, wakati: “Imulimo ulakwabilila akaambo kakuti ikukambaukila bantu kundipa kuti ndilimvwe kuti ndilikajisi kasimpe.” Ikusinizya kuli boobo alimwi kulakonzya kuboola akaambo kakutola lubazu lyoonse mumulimo imwi ya Bunakristo, mbuli kujanika kumiswaangano kukukomba akuliyiisya Bbaibbele cabunkutwe.

Ikukkalikana Kwiinda Mukuyanda Babunyina

Ikuba mumbunga yabakombi bakasimpe munyika yoonse kulakonzya kutupa kuti tube bantu bakkalikene. Elo kaka ncilongezyo ikuyanzana ababunyina bajisi luyando munyika yoonse! (1 Petro 2:17) Alimwi tulakonzya kugwasya basyomima kuti bakkalikane.

Atulange-lange milimo iigwasya yamwaalumi uululeme Jobu. Naba sikuumbulizya wakubeja Elifazi wakazumina kuti: “Majwi aako akajata bantu kuti batawi, batuntuma wakabapa inguzu.” (Jobu 4:4) Sena tulabagwasya bantu? Umwi aumwi wesu ulijisi mukuli wakugwasya bakwesu abacizyi kumuuya ikutegwa baliyumye mumulimo wa Leza. Eelyo notuli antoomwe abakwesu abacizyi, tulakonzya kuba amuuya ooyu: “Amuyumye maboko mateteete, aalo mazwi aakankama amwaape inguzu.” (Isaya 35:3) Aboobo, sena inga tamukonzyi kuba ambaakani yakuyumya-yumya akukulwaizya Munakristonyoko omwe naa bobile kufwumbwa ciindi ncomwayaanina? (Ba-Hebrayo 10:24, 25) Imajwi aakulwaizya alimwi aakubalumba akaambo kakuzumanana kusoleka kumukkomanisya Jehova alakonzya  kubagwasya kuti bayume kabajisi bulangizi akuzunda mukusiyana kusololela kubuumi.

Ibaalu Banakristo balakonzya kucita kabotu kwiinda mukukulwaizya bapya. Eeci cilakonzya kukonzyeka kwiinda mukupa nzila zigwasya, lulayo lwamu Magwalo alimwi akubeleka ambabo mumulimo wamumuunda. Imwaapostolo Paulo lyoonse wakali kujana ciindi cakukulwaizya bantu. Wakali bazimbide Banakristo baku Roma kutegwa abayumye-yumye kumuuya. (Ba-Roma 1:11) Ibanyina abacizyi baku Filipi mbaakali kuyandisya wakababona kuti ‘ndukondo amusini wakwe’ alimwi wakabakulwaizya kuti ‘baime nji mu Mwamwi.’ (Ba-Filipi 4:1) Naakamvwa buyumu-yumu bwabanyina baku Tesalonika, Paulo wakatuma Timoteo kuti ‘akabayumye akubakombelezya kuti kutabi uuzungaana kumapenzi aaya.’—1 Ba-Tesalonika 3:1-3.

Imwaapostolo Paulo a Petro bakazumina akubalumbaizya bakombinyina akaambo kakusoleka canguzu. (Ba-Kolose 2:5; 1 Ba-Tesalonika 3:7, 8; 2 Petro 1:12) Atuswe mbubona, tutagami kulanga kulubizya kwabakwesu pe, pele atulange bube bubotu mbobajisi akuzwidilila kwabo mukuzumanana kuyuma alimwi akulemeka Jehova.

Ikuti katujisi muzeezo uutaluzi naa kuciindilizya muzintu zyotucita, tuyoopa kuti bamwi bakakilwe kuzumanana kwiima mulusyomo. Elo kaka cileelela kuyeeya kuti bakwesu ‘balikatede akumwaika’ mubweende oobu bwazintu! (Matayo 9:36) Mumbungano ya Banakristo, beelede kulangila kuumbulizyigwa alimwi akukatalusigwa. Aboobo toonse, atucite kusikila mpotugolela mukuyaka basyomima alimwi akubagwasya kuzumanana kuyuma.

Ibamwi zimwi ziindi balakonzya kutupenzya kabayanda kuti tuleke kuyuma. Sena tulakonzya kuya ansi mukubelekela Jehova akaambo katwaambo tutaluzi alimwi akutalanganizyigwa kabotu? Tutalekeli muntu uulya maila kuti atulesye kuyuma.—2 Petro 3:17.

Izisyomezyo zya Leza Zilatugwasya Kukkalikana

Izisyomezyo zya Jehova zyabubotu bwakumbele mubweendelezi bwa Bwami, zitupa bulangizi bukonzya kutugwasya kuzumanana kuyuma. (Ba-Hebrayo 6:19) Alimwi ikusinizya kuti lyoonse Leza ulazuzikizya zisyomezyo zyakwe kulatukulwaizya ‘kulangila akukakatila mulusyomo.’ (1 Ba-Korinto 16:13; Ba-Hebrayo 3:6) Ikuboneka kumuka kwakuzuzikizyigwa kwazisyomezyo zimwi zya Leza, kulakonzya kusunka lusyomo lwesu. Aboobo cilayandika kapati kubikkila maano kuti tutacengwi anjiisyo zyakubeja akuleka bulangizi bwesu.—Ba-Kolose 1:23; Ba-Hebrayo 13:9.

Icikozyanyo citaluzi cabana Israyeli bakanyonyooka akaambo kakubula lusyomo muzisyomezyo zya Jehova, ceelede kuba ncenjezyo kulindiswe. (Intembauzyo 78:37) Muciindi cakuti tube mbuli mbabo, atube bayumu, ikubelekela Leza katujisi amuzeezo wakubindaana mumazuba aaya aakumamanino. Imwaalu umwi uujisi luzyibo wakati, “abuzuba ndibona mbuli kuti ibuzuba bupati bwa Jehova buyoosika juunza.”—Joeli 1:15.

Masimpe, ibuzuba bupati bwa Jehova bulaafwaafwi. Nokuba boobo, kunyina ncotweelede kuyoowa kufwumbwa kuti katuli munsi lya Leza. Ikuti twazitobela zyeelelo zyakwe ziluleme alimwi akuzumanana kuyuma, tulakonzya kuzwidilila mukusiyana kusololela kubuumi butamani!—Tusimpi 11:19; 1 Timoteo 6:12, 17-19.

[Cifwanikiso icili apeeji 21]

Sena mulabagwasya Banakristonyoko kusikila mpomugolela kutegwa bazumanane kuyuma?

Nkotwakajana cifwanikiso icili apeeji 19]

The Complete Encyclopedia of Illustration/J. G. Heck