Amwiime Nji Akubona Lufwutuko Lwa Jehova!
Amwiime Nji Akubona Lufwutuko Lwa Jehova!
‘Amwiime buyo mumindando yanu, mubone lufwutuko lwa Jehova.’—2 Makani 20:17.
1, 2. Ino nkaambo nzi inkondo ya “Gogo wakunyika ya-Magogo” ncoiyoosya kapati kwiinda ntenda yazigwebenga iili mumasi oonse?
MILIMO yazigwebenga ilapandululwa abantu bamwi kuti nkulwana bantu bali munyika yoonse kubikkilizya alusumpuko. Kalalibonya kaambo kapa kuti ntenda eeyi ibikkilwe maano kapati. Kuli kulwana kumwi kukatazyide kapati kwalo bantu banji munyika nkobabikkila buyo maano asyoonto naa kutakubikkilida limwi buya. Ino nkulwana kuli buti?
2 Nkulwana kwa “Gogo wakunyika ya-Magogo,” Ibbaibbele nkolyaamba kubbuku lya Ezekieli caandaano 38. Sena nkuciindilizya ikwaamba kuti kulwana ooku kulainda antenda yazigwebenga iili mumasi oonse? Takuli kuciindilizya pe, nkaambo nkondo ya Gogo tailwani buyo mfwulumende zyabantu pe. Nkondo yakwe ilwana mfwulumende ya Leza yakujulu! Nokuba boobo, ikwiindana abantu ibatakonzyi kuzunda kwiinda mukubelesya zilwanyo zyabo, Imulengi ulilibambide kulwana munkondo ya Gogo iiminya.
Ikulwana Mfwulumende ya Leza
3. Ino ncinzi baleli bamunyika ncobaambilwa kucita kutalikila mu 1914, alimwi ino bakacita buti?
3 Imazwanga akati ka Mwami wa Leza uulela lino alimwi abweende bwa Saatani bubyaabi ali mukuyaambele kuzwa ciindi Bwami bwa Leza nobwakakkazikizyigwa kujulu mu 1914. Ciindi eeco, bami bantunsi bakazyibisyigwa kuti beelede kulibombya ku Muleli, Leza ngwaakasala. Pele bakakaka kucita boobo, mbubwenya mbuli mbokwakasinsimwa kuti: “Bami baansi balalibamba, abalo beendelezi balalayana, kukulwisya Jehova amunanike wakwe. Bati, Atudunsule zyaanzyo zyabo, tusowe inkole zyabo kuzwa kulindiswe.” (Intembauzyo 2:1-3) Ikukaka bulelo bwa Bwami kakunyina kudooneka, kuyoomanina munkondo ya Gogo waku Magogo.
4, 5. Ino mbuti bantu mbobakonzya kulwana mfwulumende iitalibonyi iya Leza?
4 Tulakonzya kweezyeezya mbuli bantunsi mbobakonzya kulwana mfwulumende yakujulu iitalibonyi. Ibbaibbele liyubununa kuti, imfwulumende eeyi ijisi bantu ibali “zyuulu zili mwaanda amakumi one azine” kubikkilizya a “Mwanambelele” Jesu Kristo. (Ciyubunuzyo 14:1, 3; Johane 1:29) Akaambo kakuti mbakujulu, imfwulumende mpya yaambwa kuti “ijulu ipya” kakuli balelwa baanyika cakweelela baitwa kuti “nyika impya.” (Isaya 65:17; 2 Petro 3:13) Ibunji bwabalelinyina Jesu ibali 144,000 bakamanizya kale buumi bwabo bwaanyika kabasyomeka. Aboobo bakazuminizyigwa kuti baleelela kupegwa milimo mipya kujulu.
5 Nokuba boobo, bamucaala basyoonto akati kabali 144,000 bacili anyika. Kubantu bainda ku 15,000,000 bakajanika ku Mulalilo wa Mwami mu 2002, ibali buyo 8,760 bakatondezya bulangizi bwabo bwakuti bakasalwa kuti bakabelekele kujulu. Kufwumbwa uulisungula kulwana ibaceede akati kabaleli ba Bwami, mubwini uli mukulwana Bwami bwa Leza.—Ciyubunuzyo 12:17.
Imwami Wazunda
6. Ino Jehova a Kristo bakubona buti kukazyigwa kwabantu ba Leza?
6 Jehova mbwayoocita akaambo kakukazya Bwami bwakwe bukkazikizidwe kwakasinsimwa kuti: “Oyo uukede kujulu ulaseka. Mwami ulabawela. Lino ulabaambila cabukali, ulabapenzya mulunyemo lwakwe. Waamba kuti, Ndime ndakazika mwami wangu Acilundu cisalala ca-Zioni.” (Intembauzyo 2:4-6) Lino casika ciindi cakuti Kristo kwiinda mukusololelwa a Jehova, atalike “kuya buzunda akuzunda.” (Ciyubunuzyo 6:2) Ino mbuti Jehova mbwakubona kukazyigwa kwabantu bakwe muciindi eeci cakuzunda kwamamanino? Ukubona kuti nkukazya nguwe a Mwami wakwe uulela. Jehova waamba kuti: “Uumuguma ulaguma imboni yaliso lya[ngu].” (Zekariya 2:8) Jesu wakaamba cakukankaizya kuti ulabikkila maano kuzintu bantu nzyobacitila alimwi anzyobatacitili banyina bananike kuti bacitila nguwe naa kutazicitila nguwe.—Matayo 25:40, 45.
7. Ino nkaambo nzi iba “nkamu impati” iipanduludwe ku Ciyubunuzyo 7:9 ncobakalalilwa a Gogo?
7 Masimpe, aabo ibakulwaizya bananike baceede abalo bayookalalilwa a Gogo. Ibantu aabo balangilwa kuyooba ba “nyika impya” mba “nkamu impati” ibakaitwa kuzwa “kuzisi zyoonse akumisyobo yoonse akumikowa yoonse akumyaambo yoonse.” (Ciyubunuzyo 7:9) Baambwa kuti “baliimvwi kunembo lyacuuno cabwami akunembo lya-Mwanambelele, balisamide zikobela zituba.” Balazuminwa a Leza alimwi a Jesu Kristo kuti mbantu babotu. Kabajisi ‘malala mumaanza aabo,’ balamusumpula Jehova kuti ngomweendelezi Wakoonse-koonse weelede, uujisi bulelo bwiimininwa akulela kwa Mwami wakwe uukkede acuuno, Jesu Kristo “Mwanaambelele.”—Johane 1:29, 36.
8. Ino kulwana kwa Gogo kuyoopa kuti Kristo acite nzi, alimwi ino ncinzi ciyootobela?
8 Kulwana kwa Gogo kuyoopa kuti Mwami wa Leza uukkede acuuno abweze ntaamo kwiinda mukubusya nkondo ya Harmagedoni. (Ciyubunuzyo 16:14, 16) Aabo ibayookaka kuzuminizya bweendelezi bwa Jehova bayoonyonyoonwa. Pele aabo ibayooliyumya mumapenzi akaambo kakusyomeka ku Bwami bwa Leza, bayookatalukwa kukabe kutamani. Kujatikizya makani aaya, imwaapostolo Paulo wakalemba kuti: “Aya alatondezya kubeteka kwa-Leza kululeme, uuyanda kuti mukeelezegwe mbuli beeledwe Bwami bwa-Leza mbomupengela, nkaambo kakuti kumeso aa-Leza kuliluleme kubweedezya mapenzi kulibaabo abamupenzya, pele nywebo nomupenzegwa uyoomupa kulyookezya, antoomwe aswebo, kuciindi cakuyubunuka kwa-Mwami Jesu kuzwa kujulu. Uyooyubunuka antoomwe abaangelo bakwe basinguzu, abbalabala lyamulilo, nkabela uyoobwedezya muliyano kulibaabo abatamuzi Leza akutaswiilila Makani Mabotu aa-Mwami wesu Jesu.”—2 Ba-Tesalonika 1:5-8.
9, 10. (a) Ino mbuti Jehova mbwaakapa iba Juda ikuzunda basinkondonyina basinguzu? (b) Ino ncinzi Banakristo sunu ncobeelede kuzumanana kucita?
9 Muciindi camapenzi mapati aayo aboola aayoomanina munkondo ya Harmagedoni, Kristo uyoobumanizya bubi boonse. Ibatobeli bakwe tabakayandiki kuti abalo balwane pe, mbubwenya mbocakabede ku Bwami bwa Juda bwamisyobo yobilo mumyaka iili 2,900 yainda. Inkondo yakali ya Jehova, eelyo wakapa kuti bazunde. Tubala kuti: “Jehova wakabusya basikuyuba kuti balwisye bana ba-Amoni aba-Moabu abana bacilundu ca-Seiri ibakeza kulwisya ba-Juda, nkabela bakazundwa. Nkaambo bana ba-Amoni aba-Moabu bakabuka kukulwisya basikukala kucilundu ca-Seiri, babanyonyoona akubamaninina, alimwi nibakamana kunyonyoona bantu ba-Seiri, bakagwasya umwi aumwi kujaya mweenzinyina. Elyo ba-Juda nibakasika kucilangilo cakunkanda, bakalanga kumakamu aabantu, elyo bakabona mitunta buyo iilede ansi. Katakwe naba omwe iwakaloboka.”—2 Makani 20:22-24.
10 Cakacitika mbubwenya Jehova mbwaakasinsima kuti: “Tamukooyoolwana munkondo.” (2 Makani 20:17) Eeci ncikonzyano ku Banakristo cakuti bakatobele Jesu Kristo ‘anoyaabuzunda.’ Pele lino balazumanana kulwana bubi kabatabelesyi zilwanyo zini buya pe, pele zyakumuuya. Aboobo ‘babuzunda bubi akucita bubotu.’—Ba-Roma 6:13; 12:17-21; 13:12; 2 Ba-Korinto 10:3-5.
Ino Nguni Unooli Kumbele Mukulwana kwa Gogo?
11. (a) Ino nimbunga nzi zyabantu Gogo nzyayoobelesya kulwana? (b) Ino ncinzi cijatikizyidwe mukupakamana kumuuya?
11 Gogo waku Magogo uzibidwe kuti ngu Saatani Diabolosi uuli mucibeela caansi kapati kuzwa mu 1914. Mbwaanga ncilenge camuuya, takonzyi kulwana cigaminina pe, pele uyoobelesya mbunga zyabantunsi ikutegwa bamubelekele. Ino mbunga zyabantu mbaani? Ibbaibbele talitwaambili makani oonse, pele lilatwaambila zitondezyo zimwi zikonzya kutugwasya ikuzizyiba. Izintu munyika mboziyaabucitika ikuzuzikizya businsimi bwa Bbaibbele, tunooyaabuzizyiba kabotu-kabotu. Bantu ba Jehova tabayandi kuyeeyela buya pe, pele balipakamene kumuuya, kabazyi mbuli mapolitikisi alimwi abukombi mbozyeelela mukuzuzikizyigwa kwabusinsimi bwa Bbaibbele.
12, 13. Ino mbuti musinsimi Daniele mbwaakasinsima kulwanwa kwabantu ba Leza kwamamanino?
12 Musinsimi Daniele wakasalazya zyakulwana bantu ba Leza kwamamanino naakalemba kuti: “Elyo [mwami wakunyika] uyooinka cabukali bupati kuyoonyonyoona akumanisya bantu banji. Nkabela uyooyaka zilao zyakwe zyabwami akatikati kalwizi acilundu cilemu cisalala.”—Daniele 11:44, 45.
13 Muciindi cakali kulembwa Bbaibbele, “lwizi” lwakali kwaamba Lwizi Lupati naa lwa Mediterrean kakuli “cilundu cilemu cisalala” cakali kwiiminina Zioni calo Jehova ncaakaamba kujatikizya ncico kuti: “Ndime ndakazika mwami wangu Acilundu cisalala ca-Zioni.” (Intembauzyo 2:6; Joshua 1:4) Aboobo, munzila yakumuuya inyika iili “akatikati kalwizi acilundu cilemu cisalala” ciiminina mulimo wakumuuya uuzwidilide wa Banakristo bananike. Bakazwa akati kalwizi lwabantu batantamukide kuli Leza alimwi balangila kuyoolela a Jesu Kristo mu Bwami bwakujulu. Kakunyina kudooneka, babelesi ba Leza bananike kubikkilizya abeenzinyina basyomeka ibankamu mpati, mbabayoolwanwa amwami wakunyika aakutalika kulwana ciyoosya mukuzuzikizya businsimi bwa Bbaibbele.—Isaya 57:20; Ba-Hebrayo 12:22; Ciyubunuzyo 14:1.
Ino Babelesi ba Leza Bayoocita Buti?
14. Ino nzintu nzi zyotatwe bantu ba Leza nzyobayoocita baakulwanwa?
14 Ino ncinzi babelesi ba Leza ncobayoolangilwa kucita baakulwanwa? Alimwi mbowakacita musyobo wa Leza mumazuba aa Josafati, ncecikozyano cibotu. Amubone kuti ibantu aabo bakalaililwa kucita zintu zyotatwe eezi: (1) kuba mumindando, (2) ikwiima buyo (3) akubona lufwutuko lwa Jehova. Ino mbuti bantu ba Leza sunu mbobayoocita boobu?—2 Makani 20:17.
15. Ino ikuba mumindando caamba nzi kuli Bakamboni ba Jehova?
15 Ikuba mumindando: Kakunyina kuzungaana, bantu ba Leza bayoozumanana kuba kulubazu lwa Bwami bwa Leza cabusungu. Bayoozumanana kuba mubusena bwa Bunakristo ibwakutatola lubazu mutwaambo twacisi. ‘Banookakatide akutazungaana’ mumulimo wabo cakusyomeka kuli Jehova, alimwi bayoozumanana kutembaula Jehova caantangalala akaambo kaluzyalo lwakwe. (1 Ba-Korinto 15:58; Intembauzyo 118:28, 29) Kwiina mapenzi aasunu naa aali kumbele aayoobatantamuna kuzwa mubusena bwabo buzuminidwe a Leza.
16. Mmunzila nzi babelesi ba Jehova mmobayooyima buyo?
16 Ikwiima buyo: Babelesi ba Jehova tabakasoli kulifwutula lwabo beni, pele bayoobikka lusyomo lwabo loonse muli Jehova. Walo alikke nguujisi nguzu zyakukonzya kufwutula babelesi bakwe kumapenzi aamunyika alimwi ulisyomezyede kuti uyoocita oobo. (Isaya 43:10, 11; 54:15; Malilo 3:26) Ikusyoma muli Jehova kulabikkilizya akusyoma nzila iilibonya ameso njaabelesya kwamyaka iinda ku 100 ikuzuzikizya makanze aakwe. Lweendo luno, Banakristo bakasimpe bayooyandika kusyoma bakombinyina ibakazumizyigwa a Jehova a Mwami uulela kuti basololele. Baalumi aaba basyomeka mbabayoosololela bantu ba Leza. Ikutabikkila maano kubusolozi bwabo kulakonzya kuleta mapenzi mapati.—Matayo 24:45-47; Ba-Hebrayo 13:7, 17.
17. Ino nkaambo nzi babelesi ba Jehova basyomeka ncobayoobona lufwutuko lwa Jehova?
17 Kubona lufwutuko lwa Jehova: Lufwutuko ndoluyooba bulumbu bwabaabo boonse ibanooli mumasena aalusyomo lwa Bunakristo alimwi ibasyoma kuti Jehova ulakonzya kubafwutula. Kusikila kumamanino, bayooambilizya kusika kwabuzuba bwalubeta lwa Jehova kusikila mpobagolela. Zilenge zyoonse zyeelede kuzyiba kuti Jehova ngo Leza wakasimpe alimwi akuti ulijisi babelesi basyomeka anyika. Kunyina nolilampa nokuyooba kukazyanya kuzumanana kumakani aakweelela kwabweendelezi bwa Jehova.—Ezekieli 33:33; 36:23.
18, 19. (a) Ino mbuti lwiimbo lwakuzunda luli ku Kulonga caandaano 15, mbolutondezya mbobayoolimvwa aabo ibayoofwutuka munkondo ya Gogo? (b) Ino ncinzi ceelede kucitwa abantu ba Leza lino?
18 Bantu ba Leza bayoonjila munyika mpya kabajisi nguzu zipya, kabalisungude kwiimba lwiimbo lwakuzunda mbubwenya mbuli bwakacita bana Israyeli bansiku nobakafwutulwa ku Lwizi Lusalala. Ikulumba Jehova lyoonse akaambo kalukwabililo, umwi aumwi naa caantoomwe bayooinduluka majwi aansiku aakuti: “Ndaimbila Jehova, nkaambo ulisumpukide loko; . . . Jehova ngusilumamba, Jehova ndizina lyakwe. . . . Ijanza lyako lyalulyo, O Jehova, ndidemu kunguzu; ijanza lyako ndendilyo, O Jehova, ndilityolaula basinkondonyoko. Mubulemu bwako bupati ulazunda basikukulwisya. Ulatuma bukali bwako, lino bulabatenta mbuli zisiko. . . . Ulabaleta, ulabasimpika kucilundu calukono lwako, busena mbobambide kuti bube cikalilo cako, Cikombelo, O Mwami, maanza aako ncaakacita. Jehova ngunooendelezya lyoonse alyoonse.”—Kulonga 15:1-19.
19 Lino mbwaanga bulangizi bwakuyoopona buumi butamani bwalibonya kabotu kwiinda musyule, eeci nceciindi cibotu kubabelesi ba Leza cakutondezya kukomba Jehova kwabo alimwi akubukulusya makanze aabo aakumubelekela kali Mwami wabo kukabe kutamani.—1 Makani 29:11-13.
Sena Inga Mwapandulula?
• Ino nkaambo nzi Gogo ncayoobalwanina bananike alimwi ambelele zimwi?
• Ino mbuti bantu ba Leza mbobayooyima buyo mumindando?
• Ino ncaamba nzi ikwiima buyo?
• Ino mbuti bantu ba Leza mbobayoobona lufwutuko lwa Jehova?
[Mibuzyo yaciiyo]
[Cifwanikiso icili apeeji 28]
Jehova wakamupa kuzunda Josafati abantu bakwe, balo kakunyina kutola lubazu mukulwana
[Cifwanikiso icili apeeji 30]
Bananike alimwi ambelele zimwi balatola lubazu mukusumpula bweendelezi bwa Jehova
[Cifwanikiso icili apeeji 31]
Mbubwenya mbuli ba Israyeli bansiku, bantu ba Leza ino-ino bayooyimba lwiimbo lwakuzunda