Ikupa Kumukkomanisya Leza

JESU abasikwiiya bakwe bakali kulya cakulya cabudodoodo ku Betaniya abalongwe babo, balo ibakali kubikkilizya a Mariya, Marta alimwi a Lazaro wakabusyidwe mazuba masyoonto buyo aakaindide. Eelyo Mariya naakatila nsazi yamafwuta aadula kumaulu kwa Jesu, Judase Iskariote wakanyema kapati akwaamba mbwaakali kuyeeya ati, “Ino mafuta aya aba anzi naataulwa mpondo izili kumi [ayelene amali avwolwa kwamwaka], kuti mali apegwe bacete?” Mpoonya abamwi bakatalika kutongooka.—Johane 12:1-6; Marko 14:3-5.

Nokuba boobo, Jesu wakavwiila kuti: “Amumuleke. . . . Wandimanina mulimo mubotu. Ikuti bacete muli abo lyoonse, alimwi ciindi coonse ncimuyanda kubacitila cintu cibotu mulakonzya, pele mebo tamuli ambebo lyoonse pe.” (Marko 14:6-9) Beendelezi bazikombelo ba Juda bakali kuyiisya kuti kusanga tiikwakali buyo kubotu pe, pele kwakali kugwasya mukulekelela zibi. Pele, Jesu wakacisalazya kwaamba kuti, ikupa kumukkomanisya Leza takwiimini buyo akupa zipego kubacete.

Ikulanga-langa mubufwaafwi mbuli mbungano ya Banakristo bakusaanguna mboyakali kupa, kulatondezya nzila zibotu mbuli mbotukonzya kubikkila maano, eelyo akukkomanisya Leza kwiinda mukupa. Alimwi kuyootondezya inzila iini-ini yakupa iigwasya.

‘Amupe Zipego Zyaluzyalo’

Muziindi zinji Jesu wakakulwaizya basikwiiya bakwe ‘kupa zipego zyaluzyalo.’ (Luka 12:33) Nokuba boobo, Jesu wakacenjezya kumakani aakulemeka basikupa muciindi cakulemeka Leza. Jesu wakati, “ciindi ncoabila bantu zipo utasibi impeta kubusyu bwako mbuli mbubacita basikuupaupa ameso muzikombelo amumigwagwa, kuti batembaulwe kubantu.” (Matayo 6:1-4) Kwiinda mukubelesya lulayo oolu, Ibanakristo bakusaanguna kunyina nobakali kulitondezya mbuli bwakali kucita beendelezi bazikombelo bamumazuba aayo, pele bakasala kugwasya bapengede kwiinda mukubabelekela antela akubapa zipego cakubagama buya.

Mucikozyano, kuli Luka 8:1-3 twaambilwa kuti Mariya Magadalene, Johana, Susana alimwi abantu bamwi bakali kubelesya ‘imbono zyabo’ cakutaupaupa ameso mukubelekela Jesu abaapostolo bakwe. Nokuba kuti aaba baalumi tiibakacetaala, bakali lusiide lubono lwabo loonse  akubikkila maano oonse kumulimo. (Matayo 4:18-22; Luka 5:27, 28) Kwiinda mukubagwasya kuti bamanizye mulimo ngobakapegwa a Leza, bamakaintu aaba bakatembaula Leza. Alimwi Leza wakakuzumina kupa kwabo kwaluzyalo kwiinda mukupa kuti kulembwe mu Bbaibbele ikutegwa mazyalani aakumbele akabale.—Tusimpi 19:17; Ba-Hebrayo 6:10.

Dorika ngumwi wabanakazi “[bakazwide] milimo mibotu, aluzyalo ndwaakali kucita.” Wakali kusuma zyakusama zyabamukabafwu bakapengede ibakali kukkala mumunzi wa Jopa wakali munsi aalwizi. Kufwumbwa naa milembo njaakali kusumya wakali kuula buya naa wakali kusuma buyo, tatuzi pe. Pele, milimo yakwe mibotu yakapa kuti bantu mbaakagwasya bamuyande alimwi a Leza walo calubomba wakamupa bulumbu bwakulisungula kwakwe.—Incito 9:36-41.

Makanze Mabotu Alayandika Kapati

Ino ncinzi cakabakulwaizya bantu aaba kuti kabapa? Tiilwakali lubomba buyo lwakabapa kuti babe amuzeezo wakulombozya kugwasya. Bakalizyi kuti ooyu wakali mukuli wabo abuzuba wakugwasya bacete, bali mumapenzi, baciswa alimwi amakatazyo aamwi. (Tusimpi 3:27, 28; Jakobo 2:15, 16) Ooku nkokupa kumukkomanisya Leza. Ikapati lubomba luyeeme akukulwaizyigwa aluyando lwini-lwini kuli Leza alimwi akuyanda ikwiiya lubomba abube bwakwe bwabwaabi.—Matayo 5:44, 45; Jakobo 1:17.

Imwaapostolo Paulo wakakanana inzila eeyi iyandika kapati yakupa naakati: “Oyo uujisi imbono zyaansi ano, nekubaboobo naabona mweenzinyina uubulide [tamufwidi] luzyalo lwakwe, ino luyando lwa-Leza lulakala buti mulinguwe?” (1 Johane 3:17) Ibwiinguzi mulibuzyi kale. Iluyando lwa Leza lukulwaizya bantu kuti babe baabi. Leza ulabayanda alimwi ulabapa bulumbu aabo ibamwiiya kwiinda mukutondezya muuya wabwaabi. (Tusimpi 22:9; 2 Ba-Korinto 9:6-11) Sena mazubaano tulabubona bwaabi buli boobu? Atulange-lange cakacitika ino-ino mumbungano imwi ya Bakamboni ba Jehova.

Iŋanda yamwanakazi umwi Munakristo uucembeede yakali kuyandika kubambulula kapati. Wakali kukkala alikke alimwi kunyina wamumukwasyi wakali kumugwasya. Kwamyaka minji, ŋanda yakwe lyoonse momwakali kucitilwa miswaangano ya Banakristo, alimwi kanjikanji wakali kubatamba boonse kuti balye cakulya ncaajika aabo bakali kuyanda. (Incito 16:14, 15, 40) Akaambo kapenzi eeli ndyaakajisi, bamumbungano bakayeeya kuti bamugwasye. Ibamwi bakasanga mali, eelyo bamwi bakalyaaba kubeleka. Mumazuba aakumamanino aansondo masyoonto, basikugwasilizya bakayaka ciluli cipya, cisambilo, kusyingulula, kupenta alimwi akubamba mwakubikkila mbale muncikini. Ikupa tiikwakagwasya buyo mwanakazi ooyu pe, pele kwakakamantanya mbungano alimwi eeci cakabakkomanisya basimukobonyina ikuti ncikozyano cakupa ca Banakristo bakasimpe.

Kuli nzila zinjaanji umwi aumwi mwakonzya  kugwasya bantu. Tulakonzya kujana ciindi cakuba abamucaala. Sena tulakonzya kumuulila zintu naa kumusumina zisani mukamufwu uucembeede ngotuzyi? Sena tulakonzya kumujikila cakulya muntu naa kumupa mali uubulide? Tulakonzya kugwasya nokuba kuti tatuli bavwubi. Imwaapostolo Paulo wakalemba kuti: “Ncibotu kuti muntu asungwaale kupa mbuli buvubi bwakwe mbwajisi, takonzyi kupa ncatajisi pe.” (2 Ba-Korinto 8:12) Nokuba boobo, sena ikupa kuli boobo kwakugaminina nkokupa kulikke Leza nkwalongezya? Peepe.

Ino Mbuti Kujatikizya Kugwasya Munzila Mpati?

Zimwi ziindi ikusanga kucitwa amuntu aumwi takuli buyo nkokuyandika pe. Mubwini, Jesu alimwi abaapostolo bakwe bakazumanana kuyobola mali aakugwasya bacete alimwi bakali kuzumina mali ngobakali kupegwa kubantu mbobakali kuswaanganya mumulimo wabo. (Johane 12:6; 13:29) Mbubwenya buyo, imbungano zyamumwaanda wamyaka wakusaanguna zyakali kusanga mali ciindi nokwali kuyandika akubagwasya kapati babulide.—Incito 2:44, 45; 6:1-3; 1 Timoteo 5:9, 10.

Ibubambe buli boobu bwakacitika kauyanda kusika mwaka wa 55 C.E. Imbungano zyamu Judaya zyakacetaala, antela akaambo kanzala ilunzya kasuko yakabanjilide musyule. Imwaapostolo Paulo lyoonse iwakali kubalanganya bacete, wakalomba lugwasyo kumbungano zyakali kulamfwu kusikila ku Makedoniya. Paulo wakabwezelela zyakusanga mwini alimwi akubelesya baalumi basyomeka kuti bazitole. (1 Ba-Korinto 16:1-4; Ba-Galatiya 2:10) Naba nguwe alimwi abaabo bakajatikizyidwe, tiibakabbadalwa kumulimo ooyu.—2 Ba-Korinto 8:20, 21.

Mazubaano Bakamboni ba Jehova abalo balilibambide kugwasya iciindi nokwacitika intenda. Mucikozyanyo, mumwaka wa 2001 imainza, kwakali guwo amvwula mpati cakunga meenda akapaya ku Houston, Texas mu U.S.A. Imaanda ali 723 aa Bakamboni akanyonyooka aasyoonto, kakuli manji akanyonyooka kapati. Icakufwambaana, kkomitii yakugwasilizya nokwacitika ntenda yakabambwa yabaalu Banakristo beelela ikuti ilange-lange ziyandika kumuntu aumwi, alimwi akwaabanya mali kuti bagwasye Bakamboni kuliyumya mubukkale oobo alimwi akubambulula maandaabo. Basikulisungula bakazwa mumbungano zyakali munsi-munsi bakalyaaba kubeleka milimo yoonse. Kamboni uumwi wakalumba kapati kulugwasyo oolo. Eelyo naakapegwa mali kuzwa kukkampani ibbaddelela zyakanyonyooka kuti abambuluzye ŋanda yakwe, imali aaya wakaasanga kuti akagwasye bantu babulide.

Nokuba boobo, ikujatikizya izipego zipegwa babulide, tweelede kucenjela ambunga zinji zilomba lugwasyo. Imbunga zimwi zisowa mali  manji ikupa beendelezi naa ikucita milimo yakujana mali aayandika ikupa lugwasyo cakuti bajana buyo mali masyoonto aakucita mulimo uuyandika. Ibbuku lya Tusimpi 14:15 lyaamba kuti: “Uuongelezeka ulazuminina makani oonse, pele muntu uucenjede ulayeeya kabotu kweenda kwakwe.” Aboobo ncabusongo kutulanga-langa twaambo ootu.

Ikupa Kwalo Kugwasya Kapati

Kuli kupa kumwi ikuyandika kapati ikwiinda kooko kucitwa ambunga zigwasya bapengede. Jesu wakakwaamba ooku ciindi imweendelezi imwana-mwana naakabuzya ncaakeelede kucita kutegwa abe abuumi butamani. Jesu wakamwaambila kuti: “Koya ukauzye imbono zyako, ukaabile bacete, nkabela uzoojana buvubi kujulu, lino uboole kuzootobela ndime.” (Matayo 19:16-22) Amubone kuti Jesu tanaakaamba buyo kuti, ‘Waabile bacete, eelyo ulaba aabuumi.’ Muciindi caboobo, wakayungizya kuti, “Uboole kuzootobela ndime.” Nokuba kuti imilimo iicitwa ambunga eezi ilalumbaizyigwa akugwasya, pele ikuba sikwiiya Munakristo kulabikkilizya zintu azimbi.

Imulimo wa Jesu mupati wakali wakugwasya bantu kumuuya. Nocakalondelela ciindi cakwe cakufwa, Jesu wakaambila Pilato kuti: “Ncendakazyalilwa, ncendakasikila ansi ano, kuti nkalungulule bwini.” (Johane 18:37) Nokuba kuti ngowakali kumbele mukugwasya bacete, kuponya baciswa alimwi akubasanina bakafwide nzala, imulimo mupati wa Jesu wakali wakuyiisya basikwiiya bakwe kukambauka. (Matayo 10:7, 8) Camasimpe, imalailile amwi aakumamanino ngaakabapa, wakati: ‘Kamuya mukabayiisye bantu bamisyobo yoonse kuti babe basikwiiya.’—Matayo 28:19, 20.

Ee, ibukambausi tabukaamani mapenzi oonse aali munyika. Pele, ikukambauka makani mabotu aa Bwami bwa Leza kubantu bamisyobo yoonse kulamupa bulemu Leza, nkaambo ikukambauka kuzuzikizya makanze aa Leza alimwi kuletela zilongezyo zitamani kuli baabo bazumina mulumbe wa Leza kuti bagwasyigwe kukabe kutamani. (Johane 17:3; 1 Timoteo 2:3, 4) Sena inga tamukonzyi kuyoobaswiilila Bakamboni ba Jehova baakumuswaya alimwi? Bayooletelezya acipego cakumuuya. Alimwi balizyi kuti eeyi nenzila mbotu njobakonzya kumugwasya.

[Zifwanikiso izili apeeji 6]

Kuli nzila zinji motukonzya kutondezya kuti tulabalanganya bantu

[Cifwanikiso icili apeeji 7]

Ikukambauka makani mabotu kwesu kulamukkomanisya Leza alimwi kuletela zilongezyo zitamani