Kristo Ulaambaula Kumbungano
Kristo Ulaambaula Kumbungano
“Ngaaya makani ngaamba oyo uujata inyenyeezi zili musanu azibili mujanza lakwe lyalulyo.”—CIYUBUNUZYO 2:1.
1, 2. Ino nkaambo nzi Kristo ncaakaambila mbungano zili ciloba zyaku Asia Minor ncotuciyandisya?
IMWANA wa Jehova simuzyalwa alikke, Jesu Kristo Ngomweendelezi wambungano ya Bunakristo. Ikutegwa imbungano yabasikumutobela bananike kiisalala, Kristo ulayeendelezya kwiinda mukwiilumbaizya akwiilulamika. (Ba-Efeso 5:21-27) Kuli zikonzyanyo zyamakani aaya ku Ciyubunuzyo caandano 2 a 3, kwalo nkotujana mulumbe waluyando wa Jesu uuyandika kapati wakagamikwa kumbungano zyamu Asia Minor zili ciloba.
2 Kataninga swiilila majwi aa Jesu kumbungano zili ciloba, imwaapostolo Johane wakapegwa cilengano ca “buzuba bwa-Mwami.” (Ciyubunuzyo 1:10) “Buzuba” oobo bwakatalika ciindi Bwami bwabu Mesiya nobwakabikkwa mu 1914. Aboobo, Kristo ncaakaamba kumbungano eezi cilayandika kapati mumazuba aano aakumamanino. Ikukulwaizya kwakwe alulayo lwakwe kulatugwasya kucikonzya kukkala kabotu muziindi eezi zikatazya.—2 Timoteo 3:1-5.
3. Ino “inyenyeezi,” “baangelo” alimwi “azibikilo zyamalampi” zyacikozyanyo mwaapostolo Johane nzyaakabona ziiminina nzi?
3 Johane wakabona Jesu Kristo iwakasumpulwa walo “uujata inyenyeezi zili musanu azibili mujanza lakwe lyalulyo” alimwi “uuenda akati kazibikilo zyamalampi zili musanu azibili zyangolida” naa mbungano. “Inyenyeezi” “mbobaangelo bambungano zili musanu azibili.” (Ciyubunuzyo 1:20; 2:1) Ziindi zimwi nyenyeezi ziiminina bangelo, pele Jesu takonzyi kubelesya muntunsi ikuti alembe mulumbe uujatikizya zilenge zyamuuya. Aboobo, cilagwasya kwaamba kuti “inyenyeezi” eezi ziiminina balangizi bananike naa tubunga twabaalu. Ibbala lyakuti “baangelo” lyaamba mulimo ngobajisi kabali batumwa. Akaambo kakuti mbunga ya Leza yakomena, “mubanzi uuzi uusyomeka” alimwi wasala baalumi beelela akati ‘kambelele zimwi’ zya Jesu kuti babe balangizi.—Luka 12:42-44; Johane 10:16.
4. Ino mbuti baalu mbobagwasyigwa akaambo kakubikkila maano kumakani Kristo ngali mukwaambila mbungano?
4 “Inyenyeezi” zili mujanza lya Jesu lyalulyo, nkokuti munguzu zyakwe, mubweendelezi, zilayandwa alimwi akukwabililwa. Aboobo, zili akaambo kulinguwe. Kwiinda mukutobela majwi ngaakaambila mbungano aimwi akati kazili ciloba, ibaalu basunu balabona mbobakonzya kucita mubukkale bukozyenyi. Masimpe, Banakristo boonse baleelede kumuswiilila Mwana a Leza. (Marko 9:7) Aboobo, ncinzi ncotukonzya kwiiya kwiinda mukubikkila maano Kristo nali mukwaambaula kumbungano?
Ku Mungelo Waku Efeso
5. Ino munzi wa Efeso wakali buti?
5 Jesu wakailumbaizya akwiisinsa mbungano yaku Efeso. (Amubale Ciyubunuzyo 2:1-7) Itempele iitalikomeneni yaleza mukaintu uutegwa Diana, yakaliyakidwe mubusena oobu bwakajisi lubono lunji amakwebo kubikkilizya abukombi kumbo kwankomwe yaku Asia Minor. Nokuba kuti mu Efeso kwakazwide kutalilemeka, bukombi bwakubeja akucita masalamuzi, Leza wakaulongezya mulimo wamwaapostolo Paulo kubikkilizya abambi mumunzi ooyu.—Incito caandaano 19.
6. Ino mbuti Banakristo basyomeka sunu mbobakozyenye abaabo ibakali mu Efeso?
6 Kristo wakailumbaizya mbungano yaku Efeso ategwa: “Ndizi milimo yako mbwiibede, amapakasyo aako, akukakatila kwako. Ndizi moyo wako mbuutakonzyi kubotelwa babi, ambuwakabasoleka aba balyaamba kuti mbaapostolo, nekubaboobo tabali baapostolo, aboobo wabajana kuti mbabeji.” Mazubaano, mbungano zyabatobeli ba Jesu beni-beni zilijisi mpuwo yamilimo mibotu, bunkutwe alimwi akuliyumya. Tababalekeleli ibakwesu basikuupaupa ameso ibayanda kubonwa mbuli kuti mbaapostolo. (2 Ba-Korinto 11:13, 26) Mbubwenya mbuli bana Efeso, Banakristo basyomeka sunu ‘tababotelwi abantu babi.’ Aboobo, ikutegwa bukombi bwa Jehova buzumanane kusalala akuti imbungano ikwabililwe, tabayanzani abasiluleyo bateempwi.—Ba-Galatiya 2:4, 5; 2 Johane 8-11.
7, 8. Ino ndipenzi nzi pati lyakali mumbungano yaku Efeso, alimwi ino mbuti mbotukonzya kululamika bukkale buli boobo?
7 Pele, Banakristo baku Efeso bakalijisi penzi pati. Jesu wakati, “mulandu umwi ngunjisi kulinduwe ngooyu, wakuti wakaleka luyando lwako lwakusaanguna.” Ibakali mumbungano bakali kuyandika kubusya luyando ndobakajisi kuli Jehova kumatalikilo. (Marko 12:28-30; Ba-Efeso 2:4; 5:1, 2) Andiswe tweelede kucenjela kutegwa tutamaninwi luyando ndotwakajisi kuli Leza kumatalikilo. (3 Johane 3) Pele ino mbuti kuti zintu zili mbuli kuyandisya lubono naa kulikondelezya zyaba nzyezintu zili kumbele mubuumi bwanu? (1 Timoteo 4:8; 6:9, 10) Nkokuti tweelede kuyuma kupailila kuti Leza atugwasye kuti kulombozya ooku kubwezelwe busena aluyando lupati kuli Jehova alimwi akulumba zyoonse walo a Mwanaakwe nzyobakatucitila.—1 Johane 4:10, 16.
8 Kristo wakabakulwaizya boobu bana Efeso: “Yeeya kuzwa nkowakawida, uempwe akucita milimo yako yakusaanguna.” Ino kuti tiibacita eeci? Jesu wakati: “Kwataba boobo, nzooboola kulinduwe cakufwambaana, nkagwisye cibikilo celampi lyako kuzwa kubusena bwaco.” Ikuti naa mbelele zyoonse zyaluba luyando lwazyo lwakumatalikilo, “cibikilo celampi” naa mbungano inga yamwaika. Katuli Banakristo basungu, atubeleke canguzu ikutegwa mbungano izumanane kumunika kumuuya.—Matayo 5:14-16.
9. Ino tukamu tubyaabi tweelede kubonwa buti?
9 Bana Efeso balalumbaizyigwa kapati nkaambo bakaliisulide “milimo yaba-Nikolai.” Kunyina pe cizyibidwe kujatikizya nkozyakazwa njiisyo alimwi amilimo yakakamu aaka, kunze lyaceeco caambidwe mu Ciyubunuzyo. Mbwaanga Jesu wakakasya kutobela bantu, tweelede kuzumanana kusula tukamu tubyaabi mbubwenya mbobakacita Banakristo baku Efeso.—Matayo 23:10.
10. Ino ncinzi ciyoocitikila baabo ibaswiilila muuya ncowaamba?
10 Kristo wakati: “Oyo uujisi matwi, aswiilile Muuya ncaambila imbungano.” Jesu naakali anyika, wakali kwaamba zintu akaambo kamuuya uusalala wa Leza. (Isaya 61:1; Luka 4:16-21) Aboobo tweelede kubikkila maano kuli zyeezyo Leza nzyali mukwaamba muli Jesu kwiinda mumuuya uusalala. Kwiinda mukulaililwa amuuya, Jesu wakasyomezya kuti: “Oyo uuzunda njoomupa kulya kumusamu wabuumi uuli mukati ka-Paradaiso wa-Leza.” Kubananike aabo ibaswiilila muuya ncowaamba, cipandulula kuyooba abuumi butafwi kujulu mu “Paradaiso wa-Leza” nkokoti kuba a Jehova. “Inkamu impati” yabaabo abalo baswiilila muuya ncowaamba bayookkomana muparadaiso anyika nkobayoonywa “[mu]mulonga wamaanzi aabuumi,” alimwi bayoosilikwa ‘amatu aacisamu’ cili mumbali lyamulonga ooyo.—Ciyubunuzyo 7:9; 22:1, 2; Luka 23:43.
11. Ino mbuti mbotukonzya kuyaambele mukuyanda Jehova?
11 Iluyando lwabana Efeso lwakumatalikilo lwakamana, pele ino ikuti naa ibukkale buli boobu bwatalika mumbungano sunu? Umwi aumwi wesu ayaambele kuyanda Jehova kwiinda mukwaambaula kujatikizya nzila zyakwe zyaluyando. Tulakonzya kutondezya kulumba kuluyando Leza ndwaakatondezya mukupa Mwanakwe uuyandwa kali cinunuzyo. (Johane 3:16; Ba-Roma 5:8) Ikuti naa kwayandika, tulakonzya kwaamba luyando lwa Leza mubwiinguzi bwesu amuzibeela zimwi zyamapulogilamu kumiswaangano. Tulakonzya kutondezya luyando lwesu kuli Jehova kwiinda mukutembaula zina lyakwe mumulimo wa Bunakristo. (Intembauzyo 145:10-13) Masimpe, imajwi eesu alimwi amilimo ilakonzya kugwasya kapati mukubusya akuyumya luyando lwambungano lwakumatalikilo.
Ku Mungelo Waku Smurna
12. Ino ncinzi makani aansiku ncaamba kujatikizya Smurna abukombi bwakali kucitika mumo?
12 Imbungano yaku Smurna yakalumbaizyigwa a Kristo “mutaanzi amusyaalizi oyo iwakafwide, pele alimwi uliponede” kwiinda mububuke. (Amubale Ciyubunuzyo 2:8-11.) Smurna (sunu iitegwa Izmir Turkey) yakayakidwe kunkomwe yakumbo ya Asia Minor. Ba Giliki mbabakali kukkala mumunzi, pele ibana Lydia bakaunyonyoona munzi ooyu kuma 580 B.C.E. Ibakalya zina lya Alexander Mupati mbobakayakulula munzi ooyu mubusena bumbi. Wakaba cibeela cacooko ca Roma caku Asia alimwi cakali sumpukide mumakani aamakwebo akuba ampuwo mumakani aamayake mabotu. Itempele ya Tiberiyo Kaisara yakapa kuti bube busena bwakukombela mwami. Ibakombi bakali kuumpa tununkilizyo tusyoonto akwaamba kuti, “Kaisara Mmwami.” Ibanakristo kunyina nobakali kucita oobo pe, nkaambo kuli mbabo “Jesu ngu-Mwami.” Aboobo bakapenzyegwa kapati.—Ba-Roma 10:9.
13. Nokuba kuti bakali bacete kumubili, ino mbuti Banakristo baku Smurna mbobakali bavwubi?
13 Kunze lyakupenzyegwa, Banakristo mu Smurna bakaliyumya mubucete amapenzi aakubula mali nkaambo tiibakali kutola lubazu mukukomba bami. Ibabelesi ba Jehova basunu abalo balasikilwa masukusyo aakozyenyi. (Ciyubunuzyo 13:16, 17) Nokuba kuti mbacete kuzintu zyakumubili, aabo ibali mbuli Banakristo baku Smurna mbavwubi kumuuya alimwi eeci nceciyandika kapati.—Tusimpi 10:22; 3 Johane 2.
14, 15. Ino nduumbulizyo nzi ibananike ndobakonzya kujana mu Ciyubunuzyo 2:10?
14 Ibunji bwaba Juda bakali “imbungano ya-Saatani” nkaambo bakali kutobela zilengwa zitali mumagwalo, bakamukaka Mwana a Leza alimwi bakali kusampaula batobeli bakwe bananike. (Ba-Roma 2:28, 29) Elo kaka bananike balakonzya kujana luumbulizyo mumajwi aa Jesu aatobela! Waamba kuti: “Mutayoowi zintu ezyo nzimuti penzegwe. Amubone, Diabolosi ulawaala bamwi banu muntolongo, kuti mukasunkwe, elyo muyooba mumapenzi mazuba aali ikumi. Kosyomeka mane do kusikila kulufu, lino njookupa musini wabuumi.”—Ciyubunuzyo 2:8-11.
15 Jesu kunyina naakayoowa kufwa akaambo kakusumpula bweendelezi bwa Jehova. (Ba-Filipi 2:5-8) Nokuba kuti Saatani uli mukubalwana bananike basyeede, tabayoowi zintu zikonzya kubacitikila kabali antoomwe, nkokuti mapenzi, kwaangwa naa kujaigwa munzila yalunya. (Ciyubunuzyo 12:17) Bayooba basikuzunda nyika. Muciindi camusini wamaluba-luba aaneta aasamwa abaabo ibazunda muzisobano zyabantu batakombi Leza, Kristo usyomezya bananike bayoobusyigwa kuti bayoopegwa “munsini wa-buumi” kabali zilenge zitafwi kujulu. Bwabotaace bulumbu mboobu!
16. Ikuti naa tuli mumbungano mbuli yeeyo yakali ku Smurna, ino nkuukaambo kali nkotweelede kubikkila maano?
16 Kufwumbwa naa bulangizi bwesu mbwakujulu naa mbwaansi, ino mbuti ikuti katuyanzana ambungano iili mbuli yaku Smurna? Nkokuti tuyandika kugwasyanya abasyomima ikubikkila maano kukaambo kapati ikapa kuti Leza kazumizya kupenga—ikaambo kabweendelezi bwakoonse-koonse. Kamboni wa Jehova uusyomeka woonse uli mukusinizya kuti Saatani mubeji alimwi utondezya ibantu bapenzyegwa kuti balakonzya kuzumanana kuba kulubazu lwa Leza lwakuti Ngomweendelezi Wakoonse-koonse. (Tusimpi 27:11) Atubakulwaizye Banakristo bamwi kuti baliyumye mukupenzyegwa ikutegwa bakonzye kuzumanana “[ku]mubelekela cakutayoowa, akweenda cabusalali abululami, mazuba aabuumi bwesu boonse” ambweni kukabe kutamani buya.—Luka 1:68, 69, 74, 75, Ci.
Ku Mungelo Waku Pergamo
17, 18. Ino Pergamo bwakali busena bwakali kucitilwa bukombi buli buti, alimwi ncinzi cakali kukonzya kucitika akaambo kakukaka kutola lubazu mukukomba mituni?
17 Imbungano yaku Pergamo yakalumbaizyigwa alimwi akululamikwa. (Amubale Ciyubunuzyo 2:12-17) Imunzi wa Pergamo wakayakidwe kulubazu lwakunyika imakkilomita aali 80 kuzwa ku Smurna. Mumunzi ooyu kwakali zikombelo zyakubeja. Basikwiiya nyenyeezi ba Kasidi kuboneka kuti bakaccijila nkuko kuzwa ku Babuloni. Ibantu baciswa bakali kuguumukila ku Pergamo kutempele iijisi mpuwo kapati yaleza wakubeja sikusilika alimwi simisamu uutegwa Asclepius. Akaambo katempele lyakali kukombelwa Kaisara Agusto lyakali mumo, Pergamo wakali kwiitwa kuti “busena bupati bwakukombela mwami mubweendelezi bwabwami butaanzi.”—Encyclopædia Britannica, 1959, Volume 17, peeji 507.
18 Mu Pergamo kwakali cipaililo cakaabidwe kuli Zusi. Alimwi munzi ooyu mbobwakali busena bwakali kusololelwa amuuya wa Diabolosi wakukomba bantunsi. Nkakaambo kaako imbungano yakooko yakaambwa kuti yakali kubusena “cuuno ca-Sataani” nkocakabede. Ikukaka kukomba mwami muntunsi cakali cilijazyo kuli baabo ibakali kusumpula bweendelezi bwa Jehova. Inyika icikkede munguzu zya Diabolosi alimwi azikozyanyo zyacisi mazuba aano zyaba mituni. (1 Johane 5:19) Kuzwa mumwaanda wamyaka wakusaanguna kusikila sunu, Banakristo banji basyomeka bajaigwa mbubwenya mbuli yooyo Kristo ngwaakaamba kuti “Antipa kamboni wangu musyomesi, iwakajayigwa akati kanu.” Jehova Leza alimwi a Jesu Kristo balabayeeya babelesi basyomeka ibali boobo.—1 Johane 5:21.
19. Ino ncinzi Balamu ncaakacita, alimwi ino ncinzi Banakristo boonse ncobeelede kucenjelela?
19 Kristo alimwi wakaamba zya “lwiiyo lwa-Balamu.” Ibulyatu bwakuyanda kujana zintu zyakumubili, imusinsimi mubeji Balamu wakasoleka kusinganya bana Israyeli. Leza naakacinca kusinganya kwakwe kuba cilongezyo, Balamu wakabelekela aamwi a Mwami muna Moabu Balaki akuboongelezya bana Israyeli banji mukukomba mituni amukutalilemeka kwiinda mukoonana. Ibaalu Banakristo beelede kuyuma mukucita bululami mbuli bwakali Pinehasi walo iwakalesya milimo ya Balamu. (Myeelwe 22:1–25:15; 2 Petro 2:15, 16; Juda 11) Mubwini, Banakristo boonse beelede kukucenjelela kukomba mituni alimwi akutalilemeka kwiinda mukoonana kuti kutanjili mumbungano.—Juda 3, 4.
20. Ikuti naa Munakristo watalika kuyeeya zyabusiluleyo, ino ncinzi nceelede kucita?
20 Imbungano yaku Pergamo yakali mumapenzi mapati nkaambo yakalekela baabo “batobela lwiiyo [lwakabunga kamaseseke] lwaba-Nikolai.” Kristo wakaambila mbungano kuti: “Empwa. Kwataba boobo nzookuboolela cakufwambaana, nkabalwanye ipanga lyakumulomo wangu.” Basitubunga twamaseseke bayanda kuti banyonganye Banakristo kumuuya alimwi aabo ibayandisya tukamo-kamo tabakanjili mu Bwami bwa Leza. (Ba-Roma 16:17, 18; 1 Ba-Korinto 1:10; Ba-Galatiya 5:19-21) Ikuti naa Munakristo watalika kuyeeya zyabusiluleyo alimwi uyanda kuti atalike kuzyimwaya, weelede kutobela kucenjezya kwa Kristo. Ikutegwa alivwune kukunyonyooka, weelede kweempwa akuyandaula lugwasyo lwakumuuya kuzwa kubaalu bali mumbungano. (Jakobo 5:13-18) Ikubweza ntaamo cakufwambaana kulayandika kapati nkaambo Jesu ulaboola cakufwambaana kuzyikubeteka.
21, 22. Ino mbaani ibalya “mana aasisidwe,” alimwi ino aiminina nzi?
21 Banakristo bananike ibasyomeka kubikkilizya abeenzinyina, tabeelede kuluyoowa lubeta luboola pe. Izilongezyo zilindila baabo ibatobela lulayo lupegwa a Jesu kwiinda mubusolozi bwamuuya uusalala wa Leza. Mucikozyanyo, bananike ibazunda nyika bayootambwa kuti bakalye “mana aasisidwe” alimwi bayoopegwa “ibbwe lituba” ilijisi “izina ipya.”
22 Leza wakabapa bana Israyeli imana kutegwa balye mulweendo lwabo lwamyaka iili 40 munkanda. “Mana” aamwi akali kuyobolwa munkomeki yangolida yakali mukati kabbokesi lyacizuminano lyakasisidwe mu Busena Busalalisya bwatente lyakubunganina, mwalo mumuni wamaleele nkowakali kutondezya kuti Jehova nkwali. (Kulonga 16:14, 15, 23, 26, 33; 26:34; Ba-Hebrayo 9:3, 4) Kunyina muntu iwakali kuzumizyigwa kulya mana aaya aasisidwe pe. Nobabusyigwa, batobeli ba Jesu bananike balaba amibili iitafwi, ikwiiminina kulya “mana aasisidwe.”—1 Ba-Korinto 15:53-57.
23. Ino “ibbwe lituba” alimwi a “zina ipya” ziiminina nzi?
23 Ibbwe lisiya lyakali kwiiminina kusinganyizyigwa munkuta yaku Roma, kakuli lituba lyakali kwiiminina kubula mulandu. Ikubapa “ibbwe lituba” Jesu nkwacita ku Banakristo bananike, citondezya kuti ubabona kuba bantu banyina milandu alimwi basalala. Mbwaanga bana Roma alimwi bakali kubelesya mabwe kupa amulyango nobayanda kunjila muzisobano zimwi, “ibbwe lutuba” lilakonzya kwiiminina kuzumizyigwa kwabananike kuunka kujulu Mwanaambelele aakukwata. (Ciyubunuzyo 19:7-9) Kakunyina kudooneka, “izina ipya” iiminina coolwe cakukamantana a Jesu kabali balelinyina mu Bwami bwakujulu. Zyoonse eezi zilabakulwaizya bananike ambobayanzana limwi mumulimo wa Jehova ibajisi bulangizi bwakuyoopona anyika muparadaiso.
24. Ino tweelede kucita buti kujatikizya basiluleyo?
24 Cilayandika ikuyeeya kuti mbungano yaku Pergamo yakali muntenda kuli basiluleyo. Ikuti naa ibukkale buli boobu bwatalika kunyonganya mbungano kumuuya njomuyanzana limwi, atubatantamuke basiluleyo akuzumanana kweenda mukasimpe. (Johane 8:32, 44; 3 Johane 4) Mbwaanga bamayi babeji alimwi abantu buyo balangilwa kuba basiluleyo, balakonzya kunyonganya mbungano, aboobo tweelede kubatantamuka basiluleyo akutalekela makani aatagwasyi kutusinkila kuswiilila kasimpe.—Ba-Galatiya 5:7-12; 2 Johane 8-11.
25. Ino milumbe ya Kristo iitiibandikwe mucibalo citobela njakumbungano nzi?
25 Elo kaka alapa kukkala ansi akuyeeya imajwi aakulumbaizya alimwi alulayo, Jesu Kristo wakasumpulwa ngaakaambila mbungano zyotatwe akati kambungano zili ciloba zyaku Asia Minor ngotwalanga-langa! Mbwaakali kusololelwa amuuya uusalala, alimwi wakalijisi makani manji aakwaambila mbungano zyone zyacaala. Imilumbe eeyo yakali kuya ku Tuataira, Sarde, Filadelfia alimwi a Laodikeya ilabandikwa mucibalo citobela.
Ino Inga Mwaingula Buti?
• Ino nkaambo nzi ncotweelede kubikkila maano kuli ceeco Kristo ncaambila mbungano?
• Ino mbuti mbotukonzya kugwasya mukubusya luyando lwambungano lwakumatalikilo?
• Ino nkaambo nzi ncocikonzya kwaambwa kuti Banakristo bakali bacete ku Smurna bakalivwubide kapati?
• Notulanga bukkale bwakali mumbungano yaku Pergamo, ino kuyeeya kwabasiluleyo tweelede kukubona buti?
[Mibuzyo yaciiyo]
Maapu iili apeeji 8]
(Kutegwa mubone bwini mbwaakkede mabala, amubone bbuku lini)
GREECE
ASIA MINOR
Efeso
Smurna
Pergamo
Tuataira
Sarde
Filadelfia
Laodekeya
[Cifwanikiso icili apeeji 10]
“Inkamu impati” iyookondwa muparadaiso anyika
[Zifwanikiso izili apeeji 11]
Banakristo bapenzyegwa mbabasikuzunda nyika