“Amubone! Ngooyu Leza Wesu”
“Amubone! Ngooyu Leza Wesu”
Imakani aabandikwa muzibalo eezi zyobilo azwa mubbuku lyakuti Amubaa Cilongwe a Jehova, ilyakamwaigwa kumuswaangano wacooko munyika yoonse mu 2002/03.—Amubone cibalo cakuti “Lyakandipa Ncindakabulide Mumoyo” apeeji 29.
“Amubone! Ngooyu Leza wesu. Twali kumulindila kuti atufutule. Ngooyu Jehova.”—ISAYA 25:9.
1, 2. (a) Ino Jehova wakamwiita buti sinsinku Abrahamu, alimwi ino eeci inga catupa kweezyeezya nzi? (b) Ino mbuti Ibbaibbele mbolitusyomezya kuti ikubamba cilongwe a Leza cilakonzyeka?
‘MULONGWAANGU.’ Oobu Jehova Imulengi wajulu anyika mbwaakamwiita sinsiku Abrahamu. (Isaya 41:8) Amuyeeyele buyo, imuntunsi ikuya kuba acilongwe a Mweendelezi wakoonse-koonse! Mulakonzya kweezyeeya ikuti, ‘sena ndilakonzya ikuba acilongwe cibotu boobu a Leza?’
2 Ibbaibbele lilasyomezya kuti cilongwe cili boobu a Leza cilakonzyeka. Abrahamu wakazumizyigwa ikuba acilongwe cili boobu nkaambo “wakasyoma Leza.” (Jakobo 2:23) Asunu mbubwenya, ‘bantu baluleme mbobajisi lumvwano’ a Jehova. (Tusimpi 3:32) Ibbuku lya Jakobo 4:8 litukulwaizya kuti: “Amuswenenene kuli-Leza, elyo alakwe ulamuswenenena.” Kakunyina kudooneka, ikuti naa twabweza ntaamo yakuswenena kuli Jehova, awalo ulatuswenena. Masimpe, uyooswenenena kulindiswe. Pele sena majwi aaya aakasololelwa amuuya apandulula kuti, ibantu basizibi batalondokede balakonzya kutalika kucita boobo? Peepe. Icilongwe a Jehova cilakonzyeka akaambo kakuti Leza siluyando wakabweza ntaamo zyobilo ziyandika kapati.—Intembauzyo 25:14.
3. Ino ninzila nzi nzyobilo Jehova nzyaabweza ikucita kuti cikonzyeke kuba acilongwe anguwe?
3 Ikusaanguna, Jehova wakacita bubambe bwakuti Jesu ‘aabe buumi bwakwe, bube cinunuzyo cabanji.’ (Matayo 20:28) Icipaizyo cacinunuzyo cilapa kuti cikonzyeke kubamba cilongwe a Leza. Ibbaibbele lyaamba kuti: “Swebo tulamuyanda nkaambo nguwakasaanguna kuyanda ndiswe.” (1 Johane 4:19) Inzya, mbwaanga Leza “nguwaksaanguna kuyanda ndiswe,” wakabamba ntalisyo yakuti tube acilongwe anguwe. Icabili, Jehova wakaliyubununa kulindiswe. Kufwumbwa cilongwe ncotubamba, ikukamantana kwesu kuyeeme akumuzyiba kabotu muntu ooyo, kumulombozya alimwi akubikkila maano kubube bwakwe bulibonya kapati. Amuyeeye buyo eeci ncocipandulula. Nikwali kuti Jehova Leza ulisisidwe, katakonzyi kuzyibwa, notwatali kulangilwa kubamba cilongwe anguwe. Pele, muciindi cakulisisa, Jehova uyanda kuti tumuzyibe. (Isaya 45:19) Kwiinda mu Jwi lyakwe Bbaibbele, ulaliyubununa munzila nzyotukonzya kusinizya, ikutali buyo kuti ulatuyanda, pele uyanda kuti tumuzyibe alimwi akumuyanda kali Taateesu wakujulu.
4. Ino tuyoolimvwa buti kujatikizya Jehova mbotuyaabubuzyiba kabotu bube bwakwe?
4 Sena kuli ciindi nomwakabwene kale mwana katondekela beenzinyina bawisi cakusinizya alimwi cakukkomana akwaambwa kuti, “Baya mbabataata?” Ibakombi ba Leza balijisi kaambo kabotu ncobeelede kulimvwa munzila iili boobo kuli Jehova. Ibbaibbele lilasinsima iciindi bantu basyomeka nobayooamba kuti: “Mubone! Ngooyu Leza wesu.” (Isaya 25:8, 9) Mbotuyaabumvwisya bube bwa Jehova, tunooyaabulimvwa kuti tulijisi Bataata bainda kubota alimwi Imulongwe ncobeni. Ibube bwa Jehova bulatupa twaambo tunji twakubambila cilongwe anguwe. Aboobo atulange-lange Ibbaibbele mboliyubununa bube bwa Jehova bupati, nkokuti nguzu, bululami, busongo alimwi aluyando. Mucibalo eeci, tuyoobandika bube botatwe bwakusaanguna.
‘Ulijisi Nguzu Kapati’
5. Ino nkaambo nzi ncoceelela kwiita Jehova alikke kuti “Singuzuzyoonse,” alimwi ino mbuti mbwabelesya nguzu zyakwe zipati?
5 Jehova ‘ulijisi nguzu kapati.’ (Jobu 37:23) Ibbuku lya Jeremiya 10:6 lyaamba kuti: “O Jehova. Nduwe mupati, azina lyako lili anguzu.” Kwiindana azilenge zimwi, inguzu zya Jehova tazimani. Akaambo kaceeci, walo alikke nguuyitwa kuti “Singuzuzyoonse.” (Ciyubunuzyo 15:3) Jehova ulazibelesya nguzu zyakwe zipati mukulenga, mukunyonyoona, mukukwabilila alimwi amukupilusya. Amubone zikozyanyo zyobilo buyo izyakulenga alimwi akukwabilila.
6, 7. Ino zuba lijisi nguzu zili buti, alimwi ino nkasimpe nzi kayandika kapati nkolisinizya?
6 Ikuti mwaimikila anze ciindi cacilimo, ino ncinzi ncomumvwa alukanda lwanu? Tee nkukasaala kwazuba. Masimpe, muli mukumvwa zyakacitwa anguzu zya Jehova zyakulenga. Ino zuba lijisi nguzu zinji buti? Akati kandilyo eeni lilapya kusika ku 15,000,0000C. Ikuti mwabweza kabeela kaniini kali mbuli mutwe wakapini kuzwa akati kazuba akukabikka anyika, kunyina nomunga mwafwutuka ikuti kamwiimvwi musinzo wamakkilomita aali 140 kuzwa akabeela aako kaniini loko ikupya kwalo! Mukavwaluvwalu kamwi akamwi, izuba ligwisya nguzu zyeelene azeezyo zilibonya nokubboloka myaanda-myaanda yatuulunzuma twamabbomba aanyukkiliya. Nokuba boobo, inyika ilalizinguluka ibbibi lyamulilo lipya kapati ligambya eeli mumusinzo weelede. Ikuti nyika noyali kweendela afwaafwi azuba, imaanzi oonse aali anyika naaliyuminide; ikuti noyali kweendela kulamfwu azuba, maanzi oonse naali caanda. Ikuti noyali muciimo cimwi akati kazeezyi, anyika nokunyina cintu cipona pe.
7 Nokuba kuti buumi bwabo buyeeme azuba, ibantu banji tababikkili maano pe. Aboobo tabacizi izuba ncolikonzya kutuyiisya. Ibbuku lya Intembauzyo 74:16 lyaamba boobu kujatikizya Jehova: “Nduwe wakabika izuba anyenyeezi.” Inzya, izuba lilamupa bulemu Jehova “iwakalenga ijulu anyika.” (Intembauzyo 146:6) Nokuba boobo, ncimwi azilenge zinji kapati izituyiisya nguzu zya Jehova zipati. Mbotuyaabwiiya inguzu zya Jehova zyakulenga, tuyootalika kumulemeka kapati.
8, 9. (a) Ino ncikozyanyo nzi caambidwe icitutondezya kuti Jehova ulilisungude kukwabilila alimwi akulanganya bakombi bakwe? (b) Ino mbuti beembezi bamumazuba aakali kulembwa Bbaibbele mbobakali kulanganya mbelele, alimwi ino eeci cituyiisya nzi kujatikizya Mweembezi wesu Mupati?
8 Alimwi Jehova ulabelesya nguzu zyakwe ikukwabilila babelesi bakwe alimwi akubalanganya. Ibbaibbele lilabelesya zikozyanyo cakusalazya izipandulula zisyomezyo zya Jehova zyakukwabilila. Mucikonzyanyo, amubone mubbuku lya Isaya 40:11. Mubbuku eeli, Jehova ulikozyanyisya kumweembezi, eelyo bantu bakwe kumbelele. Tubala kuti: “Ulalela butanga bwakwe mbuli mweembeli, Ulabunganya twana akuboko kwakwe, ulatukumbatila akaango kakwe, azyalo zinyonsya ulazyeenzya kabotu.” Sena mulakonzya kubona cipandululwa mukapango aaka?
9 Ibanyama bamwi mbuli mbelele tabakonzyi kulikwabilila. Ibeembezi bamumazuba aakali kulembwa Bbaibbele, bakeelede kuba basungu ikutegwa bakwabilile mbelele kuli baumpe, basuntwe abasyuumbwa. (1 Samuele 17:34-36; Johane 10:10-13) Pele kuli ciindi ikukwabilila mbelele nokwakali kuyandika kubomba. Mucikozyanyo, ikuti naa mbelele yazyala, ino mbuti mweembezi mbwaakali kukonzya kukwabilila kana kazyalwa? Wakali kukanyamuna lwakwe ambweni kwamazuba aali mbwaabede “akaango kakwe,” nkokuti munkomwe yacisani cakucamba. Pele ino mbuti kana kambelele mbokakali kukonzya kunjila munkomwe iili akaango kakwe? Ikana ambweni kakali kuunka kumweembezi akulicuuzya kumweendo wakwe. Pele mweembezi ngowakali kooka akukanyamuna akukabikka munkomwe iili akaango kakwe yakukakwabilila. Elo kaka cikozyanyo eeci cakulisungula ca Mweembezi wesu Mupati cakuyanda kukwabilila babelesi bakwe ncibotu!
10. Ino ndukwabililo nzi Jehova ndwapa sunu, alimwi nkaambo nzi lukwabililo oolo ncoluyandika kapati?
10 Jehova tanaakasyomezya buyo ikukwabilila pe. Muciindi cakali kulembwa Ibbaibbele, wakatondezya nzila zyakwe zyamaleele ikuti ulakonzya “kuvuna bamukomba kumasukusyo.” (2 Petro 2:9) Ino mbuti mazubaano? Tulizyi kuti sunu tabelesyi nguzu zyakwe kutegwa atuvwune kumapenzi woonse. Nokuba boobo, ulapa cintu ciyandika kapati, nkokuti lukwabililo lwakumuuya. Leza wesu siluyando ulatukwabilila kuzintu zikonzya kutunyonyoona kumuuya kwiinda mukutupa nzyotuyandika, ikutegwa tuliyumye kumasukusyo alimwi akuzumanana kubaa cilongwe cibotu anguwe. Mucikozyanyo, ibbuku lya Luka 11:13 lyaamba kuti: “Nywebo, nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Uusalala abakumbila kulinguwe?” Inguzu eezi ziinda kukomena zilakonzya kutugwasya kulwana masukusyo naa mapenzi aatusikila. (2 Ba-Korinto 4:7) Jehova uli mukucita bubambe bwakuti tutaponi buyo kwamyaka misyoonto pe, pele kukabe kutamani. Ikuti katujisi bulangizi oobu mumizeezo, imapenzi aatusikila mubweende oobu tuyakwaabona kuti “maubauba aakaindi kaniini.” (2 Ba-Korinto 4:17) Sena tatukonzyi kuswenena kuli Leza walo kwiinda muluyando uubelesya nguzu zyakwe kutegwa atugwasye?
“Jehova Ulayandisya Bululami”
11, 12. (a) Ino nkaambo nzi bululami bwa Jehova ncobutukwelela kulinguwe? (b) Ino ncinzi Davida ncaakaamba kujatikizya bululami bwa Jehova, alimwi mbuti majwi aaya aakasololelwa amuuya mbwaatukkazika moyo?
11 Jehova ulacita zintu zibotu alimwi ulacita oobo cakusitikila kakunyina kusalulula. Ibululami bwa Leza tabuli bwakutabikkila maano naa bwalunya ibukonzya kutuyoosya pe, pele mbube ibutukulwaizya kuswenena kuli Jehova. Ibbaibbele lilapandulula cakusalazya ibube bwakwe ibukkazika moyo. Atulange-lange nzila zyotatwe Jehova mbwatondezya bululami bwakwe.
12 Kusaanguna, bululami bwa Jehova bumupa kusyomeka kubabelesi bakwe. Sintembauzyo Davida kumugama wakalumba bube bwa Jehova bwabululami. Kwiinda muzintu zyakamucitikila alimwi akwiiya nzila zya Leza, ino ncinzi Davida ncaakajana? Wakaamba kuti: “Nkaambo Jehova ulayandisya bululami, tasi[y]i basalali bakwe. Baluleme bayoobambwa lyoonse.” (Intembauzyo 37:28) Elo kaka cisyomezyo eeci cilakkazyika moyo! Leza wesu kunyina nayoobalekelezya aabo ibasyomeka kulinguwe. Aboobo tweelede kusyoma cilongwe cesu alimwi akulanganya kwakwe kwaluyando. Ibululami bwakwe mbobusinizya makani aaya.—Tusimpi 2:7, 8.
13. Ino mbuti kubikkila maano kwa Jehova kubantu bapengede mbokwakatondezyegwa mu Mulawo ngwaakapa bana Israyeli?
13 Icabili, ibululami bwa Leza bulabikkila maano kuli nzyobayandika ibapengede. Ikubikkila maano kwa Jehova kubantu bapengede, kulalibonya mu Mulawo ngwaakapa bana Israyeli. Mucikozyanyo, Imulawo wakapa bubambe ikutegwa cikonzyeke kulanganya bamucaala abamukabafwu. (Deuteronomo 24:17-21) Mbwaanga wakalizyi zyamapenzi akali kukonzya kusikila mikwasyi iili boobo, Jehova mwini wakaba ngouwisi Uubeteka alimwi Uubakwabilila. (Deuteronomo 10:17, 18) Wakabacenjezya bana Israyeli ikuti naa batalika kupenzya bamakaintu abana batakwabilidwe, uyoomvwa banoolila. Kweelana ambuli mbokulembedwe kubbuku lya Kulonga 22:22-24 waamba kuti: “Bukali bwangu bulabuka.” Nokuba kuti bukali tabuli bube bwa Leza budumide, ulakalala munzila iiluzi akaambo kamilimo iicitwa munzila iitali yabululami, ikapati ikuti naa aabo bapenzyegwa kabatakwabilidwe.—Intembauzyo 103:6.
14. Ino ncinzi icisinizya kuti Jehova tasalululi?
14 Icatatu, kubbuku lya Deuteronomo 10:17 Ibbaibbele litusyomezya kuti Jehova ‘talangi ziimo zyabantu alimwi tatambuli makulo.’ Kwiindana abantunsi banji ibajisi nguzu naa bweendelezi, Jehova tayungwi alubono naa ciwa camuntu. Tasulaiki musyobo naa kusalulula pe. Icisinizya kuti masimpe talangi ciimo camuntu ncakuti: Icoolwe cakuba bakombi bakwe, abulangizi bwakuyoopona buumi butamani tacipedwe buyo kubantu basyoonto basalidwe pe. Muciindi caboobo, Incito 10:34, 35 yaamba kuti: “Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.” Muntu woonse ulaangulukide ikujana bulangizi oobu kufwumbwa naa uli buti, ngwamubala nzi naa cisi. Sena oobu tabuli mbobululami bwiinda kubota? Masimpe, ikumvwisya bululami bwa Jehova kulakonzya kutupa kubamba cilongwe anguwe.
“Ha! Muli Bulondo Buteeli Mubusongo bwa-Leza!”
15. Ino busongo ncinzi, alimwi ino mbuti Jehova mbwabutondezya?
15 Mwaapostolo Paulo wakagambwa kweelana ambokulembedwe ku Ba-Roma 11:33 kuti: “Ha! muli bulondo buteeli mubusongo bwa-Leza!” Inzya, mbotuyaabuyeeya zibeela zinji izyabusongo bwa Jehova, tulakonzya kutalika kumuyoowa kapati. Pele ino mbuti mbotukonzya kubupandulula bube oobu? Ikutegwa busongo bube, nkusanganizya luzibo, bupampu alimwi akumvwisya. Kwiinda mukubelesya luzibo lwakwe lunji alimwi akumvwisya zintu nkwajisi, Jehova lyoonse ulasala zintu zibotu akuzicita kwiinda mukubelesya nzila mbotu iijanika.
16, 17. Ino mbuti zilenge zya Jehova mbozisinizya busongo bwakwe bunji? Amupe cikozyanyo.
16 Ino nzitondezyo nzi zigaminina izyabusongo bwa Jehova ibunji? Intembauzyo 104:24 yaamba kuti: “O Jehova, milimo yako yavula! Zyoonse wakazicita mubusongo bwako! Nyika ilizwide zilenge zyako.” Masimpe, mbotuyaabwiiya izintu Jehova nzyaakabamba, tunooyaabugambwa busongo bwakwe. Amubone kuti ibasayaansi baiya zintu zinji kwiinda mukwiiya zilenge zya Jehova. Kuli milimo iili mukucitika iitwa kuti biomimetics (ikwiiya zintu zimwi zipya mbozibambwa kuzwa kuzilenge) yakusola kutobelezya mbozibambidwe zilengwaleza.
17 Mucikozyanyo, ambweni mwakalangilila kale mbuli luubilili mbolubede kubota. Inzya, lulibambidwe munzila iigambya. Intali zyaluubilili zimwi zilibonya mbuli kuti tazili ziyumu, ziyumu kwiinda lubulo alimwi antali zijanika mucisani cikwaba ntobolo. Ino eeci cipandulula nzi? Amuyeeyele buyo, ikuti naa iluubilili lwakomezyegwa mbuli kanyandi kabelesyegwa kuzuba nswi, lulakonzya kuyuma cakuti indeke yuuluka inga yaangila. Inzya, Jehova wakazibamba zintu zili boobu zyoonse “mubusongo.”
18. Ino mbuti busongo bwa Jehova mbobulibonya kwiinda mukubelesya bantu kuti balembe Jwi lyakwe, Ibbaibbele?
18 Icitondezyo ciinda kukomena cabusongo bwa Jehova cilakonzya kujanika mu Jwi lyakwe Ibbaibbele. Ilulayo lwabusongo lujanika mu Bbaibbele lulatutondezya mbuli mbotukonzya kupona kabotu. (Isaya 48:17) Pele ibusongo bwa Jehova bwiinda bulalibonya amunzila Ibbaibbele mbolyakalembwa. Munzila nzi? Mubusongo bwakwe Jehova wakasala kuti bantunsi balembe Jwi lyakwe. Nikwali kuti wakabelesya bangelo kuti balembe Jwi lyakwe lyakasololelwa amuuya, sena Bbaibbele nolyali kukondelezya mbubonya mbolibede lino? Masimpe, ibangelo nobakapandulula Jehova munzila iisumpukide kapati njobamubikka alimwi nobakatondezya mbuli mbobamukomba. Pele sena nitwali kukonzya kuzyiba kweelana ambozimubona zilenge zyamuuya zilondokede, izijisi luzibo alimwi anguzu ziinda kulamfwu aali zyesu?—Ba-Hebrayo 2:6, 7.
19. Ino ncikozyanyo nzi icitondezya kuti ikubelesya bantu kulemba Bbaibbele cakapa kuti kalikkomanisya?
19 Ikubelesya bantunsi kulemba Bbaibbele kupa kuti kalikondelezya kapati. Ibakalilemba bakali bantu ibali mbulindiswe. Akaambo kakuti tiibakalondokede, bakali kusikilwa masukusyo mbuli eesu. Ziindi zimwi bakali kulemba mbobakali kulimvwa alimwi amapenzi ngobakasikilwa. (2 Ba-Korinto 12:7-10) Aboobo bakalemba mabala ibangelo ngobatakali kukonzya kubelesya. Mucikozyanyo, amubone imajwi Davida ngaakabelesya aalembedwe ku Intembauzyo 51. Kweelana amabala aatondezya wakaimba ntembauzyo eeyo, atondezya kuti Davida wakaanza ntembauzyo eeyi naakamana kucita cibi cipati. Wakaamba zyakali mumoyo wakwe ikutondezya kuusa kwakwe kupati akulomba kulekelelwa a Leza. Tupango 2 a 3 twaamba kuti: “Undisalazye kumilandu yangu, akundisalazya kuzibi zyangu. Nkaambo ndaziba milandu yangu, azibi zyangu zili kumeso aangu lyoonse.” Amubone mukapango 5 ategwa: “Ncobeni ndakazyalwa mumilandu, amuzibi bama mobakandiminta.” Kapango 17 kalayungizya kuti: “Cipaizyo ncayanda Leza muuya uutyokede; moyo uupengede akweempwa tokuusampauli, O Leza.” Sena mulakonzya kubona mbuli mulembi mbwaakapengede? Nguni uukonzya kwaamba majwi aali boobu kunze kwamuntu uutalondokede?
20, 21. (a) Ino nkaambo nzi ncotukonzya kwaamba kuti nokuba kuti Jehova wakabelesya balembi bantunsi, Ibbaibbele licijisi busongo bwa Jehova? (b) Ino ncinzi ciyoobandikwa mucibalo citobela?
20 Kwiinda mukubelesya bantu batalondokede ibali boobu, Jehova wakatupa cini-cini ncotuyandika, nkokuti imalembe ‘aakasololelwa amuuya,’ pele aajisi kulimvwa kwabantunsi. (2 Timoteo 3:16) Masimpe, ibalembi aabo bakali kusololelwa amuuya uusalala. Nkakaambo kaako bakalemba busongo bwa Leza kutali bwabo. Ibusongo oobu bulayandika kapati. Bulisumpukide kapati cakunga Leza caluyando utukulwaizya kuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.” (Tusimpi 3:5, 6) Kwiinda mukutobela lulayo oolu lwabusongo, tuyoobamba cilongwe a Leza wesu musongo lyoonse.
21 Ibube bwiinda kukondelezya kubube bwa Leza boonse, nduyando. Mucibalo citobela, tuyoobandika mbuli Jehova mbwaakatondezya luyando.
Sena Muciyeeyede?
• Ino nintaamo nzi Jehova nzyaakabweza ikutegwa cituubile kubamba cilongwe anguwe?
• Ino nzikozyanyo nzi zitondezya inguzu zya Jehova zyakulenga alimwi azyakukwabilila?
• Ino muunzila nzi Jehova mbwacita bululami bwakwe?
• Ino mbuti busongo bwa Jehova mbobulibonya muzilenge alimwi amu Bbaibbele?
[Mibuzyo yaciiyo]
[Cifwanikiso icili apeeji 20]
Mbubwenya mbuli Mweembezi Uunyamuna kana kambelele akaango kakwe, Jehova cakubomba ulalanganya mbelele zyakwe
[Cifwanikiso icili apeeji 22]
Ibusongo bwa Jehova bulalibonya kwiinda munzila Ibbaibbele mbolyakalembwa