“Leza Nduluyando”
“Leza Nduluyando”
“Oyu uutayandi tamuzi Leza, nkaambo Leza nduluyando.”—1 JOHANE 4:8.
1-3. (a) Ino nkaambo nzi Ibbaibbele nkolyaamba kujatikizya bube bwa Jehova bwaluyando, alimwi ino muunzila nzi kaambo aaka mokali kaalubazu? (b) Ino nkaambo nzi Ibbaibbele ncolyaambila kuti “Leza nduluyando”?
IBUBE bwa Jehova boonse mbubotu, bulilondokede alimwi bulakkomanisya. Pele ibube bukwelelezya kubube boonse, nduyando. Kunyina cimbi citupa kuti tuswenene kuli Jehova kwiinda luyando. Cilakkomanisya ikujana kuti luyando alimwi mbube ibudumide. Ino tuzyiba buti oobo?
2 Ibbaibbele lilaamba cintu cimwi caluyando calo ncolitaambi kubube bumwi bwa Jehova budumide kapati. Imagwalo kunyina naamba kuti Leza ninguzu naa kuti mbululami nokuba kwaamba kuti mbusongo. Ibube oobu ubujisi buya alimwi boonse botatwe nkobuzwa. Ikujatikizya luyando, icintu cimwi cipati cilaambwa kubbuku lya 1 Johane 4:8 kuti: “Leza nduluyando.” Inzya, iluyando ncintu cipati kapati mubube bwa Jehova. Mbwabede buya walo nduyando. Munzila imwi tulakonzya kwaamba kuti: Inguzu zya Jehova zimupa kuti kacita zintu. Ibululami abusongo bwakwe nzyezimusololela muzintu nzyacita. Pele, iluyando lwa Jehova lumukulwaizya kucita zintu. Alimwi iluyando lwakwe lyoonse lulatondezyegwa nabelesya bube bumbi.
3 Ziindi zinji kwaambwa kuti Jehova ndoluyando lukozyanyisyigwa amuntu. Aboobo, ikuti katuyanda kwiiya kujatikizya luyando, tweelede kwiiya zya Jehova. Lino atulange-lange zibeela zimwi zyaluyando lwa Jehova luteeli.
Imulimo Mupati Wakacitwa Akaambo Kaluyando
4, 5. (a) Ino mulimo nzi mupati wakacitwa akaambo kaluyando uutalubiki? (b) Ino nkaambo nzi ncotukonzya kwaamba kuti Jehova a Mwanaakwe balikamantene acaanzyo caluyando ciyumu kapati?
4 Jehova wakatondezya luyando munzila zinji kapati, pele kuli nzila yomwe iidumide kuli zyoonse. Ino ninzila nzi eeyo? Nkutuma Mwanaakwe kuti azikupenge akutufwida. Tulakonzya kwaamba cakwaanguluka kuti, ooku nkokutondezya luyando kutalubiki. Ino nkaambo nzi ncotukonzya kwaambila boobo?
5 Ibbaibbele Jesu limwaamba kuti “mutaanzi kuzyalwa kuzilenge zyoonse.” (Ba-Kolose 1:15) Mukayeeye buyo kaambo aaka, Imwanaa Jehova wakali kupona ijulu anyika nzyotubona kazitanaba. Ino Bawisi a Mwana bakakkala kwaciindi cilamfwu buti antoomwe? Ibasayaansi bamwi beezyeezya kuti ijulu anyika zyakabambwa myaka iili 13,000,000,000 yainda. Nokuba kuti kweezyeezya ooku inga kakuluzi, takukonzyi kweelana aciindi cakapona Mwana wa Jehova mutaanzi pe! Ino ncinzi ncaakacita kwamyaka yoonse eeyi njaakapona? Imwana wakali kubeleka a Bawisi kali “mubelesi uucibwene.” (Tusimpi 8:30, NW; Johane 1:3) Jehova a Mwanaakwe bakabelekela antoomwe ikutegwa balenge zintu zimbi. Elo kaka bakalijisi ciindi cakukkomana! Ino nguni wesu lino uukonzya kumvwisya inguzu zyalukamantano lwakaliko kwaciindi cilamfwu boobu? Cakutadooneka, Jehova Leza a Mwanaakwe balikamantene acaanzyo caluyando ciyumu.
6. Ino Jehova wakalimvwa buti ciindi Mwanaakwe Jesu naakabbapatizyigwa?
6 Pele Jehova wakatuma Mwanaakwe anyika kuti azikuzyalwe mbuli mwanaa muntunsi. Ikucita boobo cakali kwaamba kuti Jehova tanaakali kukonzya kuyanzana a Mwanaakwe uuyandwa kwamyaka iili makumi otatwe kujulu. Akaambo kakumuyandisya kapati, Jehova wakali kulanga kali kujulu Jesu naakali kukomena kuti abe muntu ulondokede. Naakakkwanya myaka iitandila ku 30, Jesu wakabbapatizyigwa. Aciindi eeco Bawisi bakaambaula kuzwa kujulu ategwa: “Ngooyu mwanaangu uuyandika ngunkondelwa.” (Matayo 3:17) Bawisi kakunyina kudooneka, bakakondwa ikubona kuti Jesu wakacita zyoonse zyakasinsimwa cakusyomeka kubikkilizya anzyaakatumwa kucita.—Johane 5:36; 17:4.
7, 8. (a) Ino ncinzi Jesu ncaakacitikilwa mu Nisani 14, 33 C.E., alimwi ino mbuti mbobakalimvwa Bawisi bakujulu? (b) Ino nkaambo nzi Jehova ncaakalekela Mwanaakwe kuti apenge akufwa?
7 Pele ino mbuti Jehova mbwaakalimvwa mu Nisani 14, 33 C.E., Jesu naakaabwa alimwi akujatwa ankamo yabantu banyemede? Ino wakalimvwa buti ciindi Jesu naakali kufwubaazyigwa, kuswidwa mate alimwi akuumwa mfwaindi? Mbuti mbwaakalimvwa ciindi Jesu naakali kukwabbaulwa akuyubbulwa kusule? Mbuti mbwaakalimvwa ciindi Jesu naakakankaminwa ampikili kumaanza akumaulu acisamu akumuleka kali acisamu bantu nobali mukumutukila? Ino mbuti Bawisi mbobakalimvwa Imwanaabo uuyanda naakali kubalilila akaambo kakucisa? Ino mbuti Jehova mbwaakalimvwa Jesu naakafwa, nkokuti Mwanaakwe uuyanda naakaleka kupona kwaciindi cakusaanguna kuzwa lyakalengwa zintu zyoonse?—Matayo 26:14-16, 46, 47, 56, 59, 67; 27:26, 38-44, 46; Johane 19:1.
8 Mbwaanga Jehova kuli mbwalimvwa, ikupengana mumoyo nkwaakamvwa akaambo kalufwu lwa Mwanaakwe kwakali kupati cakunga tatukonzyi kukupandulula. Icikonzya kupandululwa makanze akapa kuti Jehova azumizye cintu cili boobo kucitika. Ino nkaambo nzi Bawisi ncobakalekela cintu cikonzya kubapenzya boobu? Jehova ulayubununa cintu cimwi cibotu kulindiswe kubbuku lya Johane 3:16, ikapango ka Bbaibbele kayandika kapati cakunga kaitwa kuti kabeela kaniini kajisi Makani Mabotu oonse. Kaamba kuti: “Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” Aboobo, makanze aa Leza lwakali luyando. Kwiina luyando lwiinda waawa lwakatondezyegwa kale.
Jehova Mbwatusyomezya Luyando Lwakwe
9. Ino ncinzi Saatani ncayanda kuti tusyome kujatikizya mbuli Jehova mbwatubona, pele ino ncinzi Jehova ncatusyomezya?
9 Nokuba boobo, imubuzyo mupati uubuka ngwakuti: Sena Leza ulamuyanda umwi aumwi wesu? Ibamwi balakonzya kuzumina kuti Leza ulabayanda bantu caantoomwe, kweelana abbuku lya Johane 3:16 mbolyaamba. Pele balimvwa kuti ‘Leza takonzyi kundiyanda mebo kundigama.’ Ikaambo nkakuti Saatani Diabolosi uliyandide kutupa kusyoma kuti Jehova tatuyandi nokuba kutubikkila maano. Pele, kufwumbwa naa tulibikka muciimo nzi cakuti Leza tatuyandi, Jehova utusyomezya kuti umwi aumwi wababelesi bakwe basyomeka ulamubikkila maano.
10, 11. Ino mbuti cikozyanyo ca Jesu catuyuni mbocitondezya kuti Jehova ulatubikkila maano?
10 Mucikozyanyo, amulange-lange majwi akaamba Jesu kubbuku lya Matayo 10:29-31. Naakali kukozyanyisya basikwiiya bakwe mbobayandika, Jesu wakati: “Sa tuyuni tobile tatuulwi kobili? nekubaboobo taakwe nikaba komwe akati kantuto kawida ansi atazumina Usowanu. Anywebo aalo masusu aali amitwe yanu alibalidwe oonse. Nkaambo kaako mutayoowi, mulayandika kwiinda tuyuni tunji.” Amuyeeye buyo imajwi aayo mbwaakabagwasya baswiilizi ba Jesu bamumwaanda wamyaka wakusaanguna!
11 Mumazuba akali kupona Jesu, ituyuni ncecintu cakaccipide kapati kubayuni bakali kusambalilwa kuligwa. Nkaambo kkobbili lyomwe litakwe bulemu lyakali kuulwa tuyuni tobilo. Pele Jesu kumbele wakazooamba kuti, ikweelana abbuku lya Luka 12:6, 7, ikuti naa muntu wabelesya makobbili obilo, tanaakali kupegwa tuyuni tone pe, pele wakali kupegwa tosanwe. Ikayuni aaka kamwi kakali kuyungizyigwa nkaambo tiikakajisi muulo pe. Ambweni tuyuni ooto tiitwakajisi mulimo mumeso aabantu pe, pele ino mbuti mulengi mbwaakali kutubona? Jesu wakati: “Taakwe nekaba komwe [nokaba kaako kayungizyigwa] kalubidwe kuli-Leza.” Lino tulakonzya kubona kaambo Jesu nkaakali kwaamba. Mbwaanga Jehova ulabikkila maano kukayuni komwe, sena imuntu tayandiki kwiinda waawo? Kweelana ambwaakaamba Jesu, Jehova ulituzyi kabotu cakutumaninizya. Nkaambo naaba masusu aakumitwe yesu, alibalidwe.
12. Ino nkaambo nzi ncotukonzya kuba masimpe kuti Jesu wakaamba makani aamvwika ciindi naakaamba kuti masusu aakumitwe yesu alibalidwe?
12 Ibamwi balakonzya kuyeeya kuti Jesu wakaciindilizya naakali kwaamba makani aaya. Amuyeeye buyo makani aabubuke. Jehova ulituzyi kabotu-kabotu cakunga ulakonzya kutulengulula. Ulatubikkila maano kapati cakunga ulizi mbotubede boonse kubikkilizya abupango-pango bupilingene amizeezo njotwakajisi kwamyaka ili mbwiibede alimwi aluzibo. Ikuzyiba mweelwe wamasusu ngotujisi, alo aabalilwa ku 100,000, cilakonzya kuba cintu cuuba-uba kapati kuti twacikozyanya amakani aaya. Elo kaka majwi aa Jesu alatusyomezya cakusinizya kuti Jehova ulamulanganya umwi aumwi wesu!
13. Ino mbuti cakacitika ku Mwami Josafati mbocitondezya kuti Jehova ulayandaula bubotu nokuba kuti tatulondokede?
13 Ibbaibbele lilaamba cintu acimbi icitusyomezya kuti Jehova ulatuyanda. Ulayandaula alimwi akubikkila maano kububotu bwesu. Amubone cikozyanyo ca Mwami mubotu Josafati. Imwami naakacita zintu cabufwubafwuba, imusinsimi wa Jehova wakamwaambila kuti: “Nkaambo kamakani ayo, bukali bwakusikila kuzwa kuli-Jehova.” Elo kaka makani aaya akali kumana mate mukanwa! Pele mulumbe wa Jehova tiiwakamana mpoonya aawo pe. Wakazumanana kuti: “Nekubaboobo zintu zimwi zibotu muzili mulinduwe.” (2 Makani 19:1-3) Aboobo, ibukali bwa Jehova tiibwakamusinkila kubona “zintu zimwi zibotu” izya Josafati. Sena tacikkaziki moyo ikuzyiba kuti Leza ulayandaula bubotu mulindiswe nokuba kuti tatulondokede?
Leza Ulilibambide “Kujatila”
14. Ikuti naa twabisya, ino mukuli nzi uutulemena, alimwi ino mbuti mbotukonzya kujatilwa a Jehova?
14 Ikuti naa twabisya, ikutyompwa, nsoni alimwi akuusa nzyotumvwa zilakonzya kutupa kuyeeya kuti tatukonzyi kweelela kubelekela Jehova. Pele amuyeeye kuti Jehova “ulafwamba kujatila.” (Intembauzyo 86:5) Inzya, ikuti naa tweempwa zibi zyesu akusolekesya kutegwa tutaziinduluki, tulakonzya kulekelelwa a Jehova. Amubone mbuli Ibbaibbele mbolipandulula cibeela eeci cibotu caluyando lwa Jehova.
15. Ino zibi zyesu Jehova uzitola kulamfwu buti natulekelela?
15 Sintembauzyo Davida wakabelesya kaambo kambi kalimvwisya kabotu ikupandulula mbwalekelela Jehova naakati: “Mbuli kujwe mbukuli kule kuzwa kumbo, mbuboobu mbwaalampya insotoko zyesu kuzwa kulindiswe.” (Intembauzyo 103:12) Ino kujwe nkulamfwu buti akumbo? Munzila imwi, imusinzo wakujwe kuzwa kumbo lyoonse mulamfwu kapati cakuti tatukonzyi kweezyeezya; imbazu eezyi zyobile kunyina nozinga zyaswaangana pe. Sikwiiya zya Bbaibbele umwi waamba kuti, ikaambo aaka kaamba kuti “nkulamfwu kapati; tatukonzyi kuuwezyeezya musinzo ooyo pe.” Imajwi aa Davida aakasololelwaa muuya wa Leza atwaambila kuti Jehova nalekelela, ulabikka zibi zyesu kule kapati andiswe nkotutakonzyi kweezyeezya.
16. Jehova natulekelela, ino nkaambo nzi ncotukonzya kusinizya kuti utubona kuti tulasalala lino?
16 Sena kuli nomwakasolede kugwisya kabala katombe kamwi kuzwa acisani cituba? Ambweni nokuba kuti mwakasoleka kapati kusikila mpomugolela kukagwisya, ikabala aako kakacili kulibonya. Amubone mbwapandulula nguzu nzyajisi Jehova izyakulekelela naamba kuti: “Nokuba kuti zibi zyanu zyasalala pyu mbuli nkandamalowa, ziyootuba buu mbuli caanda, nikuba kuti kazisalalisya mbuli musila, ziyootuba mbuli lukobo.” (Isaya 1:18, NW) Ibbala lyakuti “nkandamalowa” lyaamba musyobo uusubila kapati. * ‘Zisani zisalalisya’ zyakali zeezyo zyakanyikidwe mumusyobo uusalala pyu. Kunyina mukusoleka kwesu tobeni notunga twakonzya kugwisya kabala kacibi. Pele Jehova ulakonzya kugwisya zibi zili mbuli nkandamalowa ambuli zisani zisalalisya akuzitubya mbuli lukobo naa buluba. Eelyo Jehova natulekelela zibi zyesu, tatweelede kuyeeya kuti tunoocijisi kabala kazibi eezyo kusikila mane tukafwe.
17. Ino mbuti Jehova mbwasowela zibi zyesu kusule lyakwe?
17 Mulwiimbo lwakulumba ilunjila mumoyo ndwaakaimba Hezekiya naakafwutulwa kubulwazi bujaya, wakaambila Jehova kuti: “Zibi zyangu zyoonse wazisowela kusule lyako.” (Isaya 38:17) Aawa Jehova waambwa kuti ulabweza zibi zyasikubisya weempwa akuzisowela kusule lyakwe ooko nkwataziboni limbi nokuba kuzibikkila maanu alimwi. Ikweelanaa bbuku limwi, imuzeezo waambwa aawa ulakonzya kwaambwa kuti: “Wapa kuti [zibi zyangu] zibe mbuli kuti tiizyakacitikide.” Eeci masimpe cilakatalusya, sena tabusyi na?
18. Ino mbuti musinsimi Mika mbwatondezya kuti Jehova nagusya zibi ulazimaninizya?
18 Mucisyomezyo cakuboozyegwa, imusinsimi Mika wakatondezya lusyomo lwakwe lwakuti Jehova wakali kuyoobalekelela bantu bakwe bakeempwa naakati: “Nguni Leza uuli mbuli nduwe . . . [oo]lekelela milandu yabantu bako basyeede? . . . Azibi zyesu zyoonse ulazisowa [mumpisi] lyalwizi.” (Mika 7:18, 19) Amweezeezye ncaakali kwaamba majwi aayo kuli baabo ibakali kupona kuciindi cakali kulembwa Bbaibbele. Sena kwakacili bulangizi buli boonse bwakucijana cintu casowelwa “[mumpisi] lyalwizi”? Aboobo majwi aa Mika atondezya kuti Jehova nalekelela, ulazyigwisya cakumaninina zibi zyesu.
“Moyo Waluzyalo wa-Leza Wesu”
19, 20. (a) Ino ibbala lya Chihebrayo lisanduludwe kuti “tondezya luse” naa kuti “koba alubomba” lyaamba nzi? (b) Ino mbuti Ibbaibbele mbolibelesya mbwalimvwa mutumbu kumwanaakwe ikutegwa lituyiisye luzyalo lwa Jehova?
19 IIuzyalo ncibeela acimbi caluyando lwa Jehova. Ino luzyalo ncinzi? Mu Bbaibbele, ibbala lyakuti luzyalo liliswaangene kapati alyakuti aluse. Imabala manji aamu Chihebrayo alimwi aamu Chigiliki alijisi bupanduluzi bulaafwaafwi abbala lyakuti luzyalo. Mucikozyanyo, icciti lya Chihebrayo lyakuti ra cham’ ziindi zinji lyaambwa kuti “tondezya luse” naa kuti “koba alubomba.” Ibbala eeli lya Chihebrayo, Jehova ndyabelesya lwakwe liliswaangene abbala lyakuti “cizyalilo” alimwi lilakonzya kupandululwa kuti “luzyalo lwamutumbu.”
20 Ibbaibbele libelesya mbwalimvwa mutumbu kumwanaakwe ikutuyiisya ncolwaamba luzyalo lwa Jehova. Kuli Isaya 49:15 tubala kuti: “Ma! Sa mwanakazi ulaluba mwanaakwe uucinyonka? Sa ulaleka kufwida mwana ngwazyede luzyalo [ra·chamʹ]? Aba ambweni balaluba, pele mebo nsikonzya kukuluba uwe pe.” Tacikonzyeki pe kuyeeyela kuti mutumbu inga waluba kusanina akulanganya mwanaakwe uucinyonka. Kayi mwana muvwanda unyina nguzu zyakuligwasyilizya alikke; imasiku amasikati mwana uyandika kulanganizyigwa abanyina. Pele mukubula coolwe, ibazyali banji mbayamba kapati kwaambisya ‘muziindi eezino zikatazya’ eelyo bantu nobali “basilunya.” (2 Timoti 3:1, 3, Ci) Jehova waamba kuti, “pele mebo nsikonzya kukuluba uwe pe.” Imoyo waluzyalo wa Jehova kubabelesi bakwe ulijisi nguzu kapati ziinda aluzyalo lukonzya kuyeeyelwa, nkokuti iluzyalo mutumbu ndwafwida mwanaakwe muvwanda.
21, 22. Ino bana Israyeli bakali mubukkale buli buti mu Egepita yansiku, alimwi mbuti Jehova mbwaakacita kukulila kwabo?
21 Ino mbuti Jehova mbubwenya mbuli muzyali siluyando mbwatondezya luzyalo? Ibube bulalibonya kabotu kwiinda munzila mbwaakacitila bana Israyeli bansiku. Kusikila kumamanino kwamwaanda wamyaka wa 16 B.C.E., ibana Israyeli banji bakali mubuzike ku Egepita kwalo nkobakali kutundululwa citaambiki. (Kulonga 1:11, 14) Akaambo kamapenzi ngobakajisi, bana Israyeli bakalilila Jehova. Ino Leza siluzyalo wakacita buti?
22 Akamunjila mumoyo Jehova makani aaya. Wakati: “Ncobeni ndibwene mapenzi aabantu bangu bali mu-Egepita. Ndimvwide mbubalila . . . Ndizi buusu bwabo mbobubede.” (Kulonga 3:7) Jehova tanaakaide kwaalanga buyo mapenzi aabantu bakwe alimwi akumvwa kulila kwabo kakunyina kubeetelela. Jehova ngu Leza silweetelelo. Nkokuti ikumvwa kucisa nkobalimvwa bamwi ikuswaangene kapati aluzyalo. Nokuba boobo, Jehova tanaakabeetelela buyo bantu bakwe; wakakulwaizyigwa kubweza ntaamu yakubagwasya. Ibbuku lya Isaya 63:9 lyaamba kuti: “Muluyando lwakwe amukweetela kwakwe wakabanununa.” “Ajanza lyanguzu,” Jehova wakabanununa bana Israyeli kuzwa mu Egepita. (Deuteronomo 4:34, NW) Kuzwa waawo, wakabapa cakulya munzila yamaleele alimwi akubanjizya munyika yabo mbotu iizyala micelo.
23. (a) Ino mbuti imajwi aasintembauzyo mbwaatusyomezya kuti Jehova ulamubikkila maano kapati umwi aumwi wesu? (b) Ino muunzila nzi Jehova mwatugwasya?
23 Jehova tafwidi buyo luzyalo kubantu bakwe nobali munkamo pe. Leza wesu siluyando ulamubikkila maanu umwi aumwi kumugama. Tulakonzya kusinizya kuti ulikuzyi kabotu-kabotu ikupenga kuli koonse nkotupenga. Sintembauzyo Davida wakalemba kuti: “Meso aa-Jehova alalangisya baluleme, amatwi aakwe alaswiilila kukwiila kwabo. Jehova uli afwaafwi kubawizukide mumoyo, ulafutula batete myuuya.” (Intembauzyo 34:15, 18) Ino mbuti Jehova mbwagwasya muntu umwi aumwi? Tagusyi cituletela mapenzi buya pe. Pele wacita bubambe bunji kapati kuli baabo ibamulilila kuti abagwasye. Ijwi lyakwe Ibbaibbele lilapa lulayo lukonzya kugwasya kapati. Mumbungano, wakabikka balangizi ibeelela kumuuya, ibasoleka kutondezya luzyalo nobagwasya bamwi. (Jakobo 5:14, 15) Mbwali ‘nguuswiilila mupailo,’ Jehova ulapa ‘bakumbila muuya uusalala.’ (Intembauzyo 65:2; Luka 11:13) Ibubambe oobu boonse butondezya “moyo waluzyalo wa-Leza wesu.”—Luka 1:78.
24. Ino mbuti mbomuyoocita kuluyando lwa Jehova?
24 Sena tacikkomanisyi ikuyeeya luyando lwa Taateesu wakujulu? Mucibalo cainda twakayeezyegwa kuti Jehova ulatondezya nguzu, bululami alimwi abusongo munzila yaluyando kutegwa tugwasyigwe. Mucibalo eeci twabona kuti Jehova wakatondezya kale luyando cigaminina kubantu alimwi akuli umwi aumwi wesu munzila yaalubazu. Aboobo, umwi aumwi wesu inga cagwasya kuti walibuzya kuti, ‘Ino ndilacita buti kuluyando lwa Jehova?’ Amubweze ntaamo kwiinda mukumuyanda amoyo wanu woonse, mizeezo, buumi alimwi anguzu. (Marko 12:29, 30) Mbomupona buzuba abuzuba amutondezye kuti mulalombozya camoyo woonse kuti kamuyaabuswena kuli Jehova. Alimwi Jehova, Leza siluyando aaswenenene kulindinywe kukabe kutamani.—Jakobo 4:8.
Bupanduluzi buyungizidwe
^ munc. 16 Sikwiiya umwi waamba kuti musyobo wankandamalowa wakali “musyobo uutazwi naa uutakonzyi kucincigwa pe. Imume, ikuugwa, kucapa nokuba kukkala kwaciindi cilamfwu, tiizyakali kukonzya kuugwisya pe.”
Sena Muciyeeyede?
• Ino tuzyiba buti kuti luyando mbobube bupati bwa Jehova bwiinda?
• Ino nkaambo nzi ncokukonzya kwaambwa kuti ikutuma Mwanaakwe Jehova nkwaakacita kuti azikupenge akutufwida nkutondezya luyando cakwiinda?
• Ino mbuti Jehova mbwatusyomezya kuti ulamuyanda umwi aumwi wesu?
• Ino muunzila nzi iilibonya caantangalala Ibbaibbele mbolipandulula kujatila kwa Jehova?
[Mibuzyo yaciiyo]
[Cifwanikiso icili apeeji 24]
“Leza . . wakapa mwanaakwe simuzyalwa alike”
[Cifwanikiso icili apeeji 25]
“Mulayandika kwiinda tuyuni tunji”
[Kulumba]
© J. Heidecker/VIREO
[Cifwanikiso icili apeeji 26]
Imutumbu mbwalimvwa kumwanaakwe, bulakonzya kutuyiisya kapati kujatizya luzyalo lwa Jehova