“Lyakandipa Ncindakabulide Mumoyo”

“NDALUMBA ndakatandabala akaambo kacipego cabbuku lya ‘Amubaa Cilongwe a Jehova.’ Lyakandipa ncindakabulide mumoyo, nkokuti kulimvwa kuti ndilayandwa a Jehova. Aboobo lino ndilimvwa kuti ndili munsi lya Jehova alimwi a Mwanaakwe uuyandwa. Ndiyanda kwaambila bantu boonse zili mubbuku eeli alimwi akumupa aumwi muyandwa wangu kkopi.” Oobu mbwaakalimvwa umwi wa Bakamboni ba Jehova kujatikizya ibbuku lipya ilijisi mapeeji aali 320 lyakamwaigwa ku Muswaangano Wacooko wa “Basikwaambilizya Bwami Ibasungu” wamu 2002/03. Atulange-lange zibalo zimwi zyabbuku eeli lipya alimwi akaambo ncilyakamwailwa.

Zibeela Zimwi Izili Mubbuku Lipya

Ino bbuku eeli lipya lijisi nzi? Lilijisi toonse twaambo tuli muzibalo zyobile ziyiigwa mumagazini eeyi alimwi atumbi buya. Ibbuku eeli lilijisi zibalo zili 31 izilampa mbuli cibalo camu Ngazi Yamulindizi ciyiigwa. Amana buyo matalikilo alimwi azibalo zyotatwe zyakusaanguna, ibbuku eeli lyakacimbaulwa muzibeela zili zyone acimwi kacaamba bube bupati bwa Jehova. Cibeela acimwi cilatalika kwiinda mukwaamba ibube oobo mubufwaafwi. Izibalo zisyoonto zitobela zikanana mbuli Jehova mbwatondezya ibube oobo. Cibeela acimwi cilijisi cibalo caamba Jesu. Ino nkaambo nzi? Nkaambo kakuti Jesu wakati: “Oyo uwandibona, wamubona awalo Taata.” (Johane 14:9) Mbwaanga Jesu wakali cikozyanyo ca Jehova cilondokede, ulatupa zikozyanyo zilimvwisya zyabube bwa Leza kwiinda mumilimo yakwe. Cibeela cimwi acimwi cilamaniizya acibalo icituyiisya mbotweelede kumwiiya Jehova mukutondezya bube oobo ibulangwa-langwa. Nolikanana ibube bwa Jehova, ibbuku eeli lipya lilabelesya mabbuku aamu Bbaibbele oonse.

Alimwi ibbuku lya Amubaa Cilongwe a Jehova lilijisi zibeela zilibedelede. Kutalikila mucibalo 2, cibalo acimwi cilijisi kabbokesi kaitwa kuti “Mibuzyo Yakuyeeya Cakuzinzibala.” Imagwalo alimwi amibuzyo ziliko tazili zyakubelesya kwiinduluka zili mucibalo pe. Muciindi caboobo, zibambilidwe kumugwasya ikubelesya Bbaibbele kutegwa muyeeye cakuzinzibala kuli ceeco caambwa. Aboobo inga cabota kuti mwatubala kabotu tupango toonse tuli mu Lugwalo. Amuyeeyesye mubuzyo alimwi amusolekesye kuyeeya mbomunga mwaubelesya. Ikuzinzibala kuyeeya kuli boobo kuyoowujatikizya moyo wanu, ikumugwasya kuba acilongwe cizumanana a Jehova.—Intembauzyo 19:14.

Zifoto azifwanikiso zizekaudwe zili mubbuku lya Amubaa Cilongwe a Jehova zyakamvwuntauzyigwa kabotu-kabotu, alimwi zyakabambilwa kuyiisya akukulwaizya. Zibalo zili 17 zilijisi zifwanikiso apeeji lyoonse izibotu kapati zyamu Bbaibbele.

Ino Nkaambo nzi Ncolyakamwailwa?

Ino nkaambo nzi ibbuku lya Amubaa Cilongwe a Jehova ncolyakamwailwa? Ikaambo kapati nkakuti litugwasye kumuzyiba kabotu Jehova akubamba cilongwe ciyumu a Leza wesu.

Sena kuli ngomuyeeyela uunga wagwasyigwa abbuku lya Amubaa Cilongwe a Jehova? Balakonzya kuba basicikolo mbomwiiya limwi Bbaibbele antela ibakwesu abacizyi batacisungweede. Inywebo buya kumugama, sena mwakalitalika kale kulibala ibbuku eeli lipya? Ikuti kamutana libala, cakufwambaana amujane ciindi cakuti mutalike. Amube aaciindi cakuti muyeeye nzyomwabala. Ibbuku eeli lipya, alimugwasye kuba acilongwe cizumanana a Jehova Leza, ikutegwa mwaambilizye makani mabotu aa Bwami bwakwe calukkomano alimwi cabusungu.