Bacete Balaindila Kucetaala

“Kunyina ciinga cabantu cikonzya kusumpuka akukkomana, ikuti kacijisi bantu banji bapengede alimwi batyompedwe.”

HAAZIBWENE Adam Smith nguwakaamba makani aayo mumwaanda wamyaka wa 18. Ibantu banji balazumina kuti ibwini bwamakani ngaakaamba bulalibonya kapati sunu kwiinda lyoonse. Ilwiindano lwalibonya kapati akati kabavwubi abacete. Mucisi ca Philippines, cibeela catatu camweelwe wabantu bajana buyo mali aataindi ku K5,000 abuzuba. Kanjikanji mali aayo mumasi aavwubide alakonzya kubelekelwa buyo mumaminiti. The United Nations Human Development Report 2002 yaamba kuti “5 pasenti yabantu bavwubide kapati munyika bajisi mali aainda ku 114 kuvwula kwiinda 5 pasenti yabantu bacete kapati.”

Nokuba kuti bamwi bapona kabotu kapati, ibanji bakkala mutwaanda tutayakidwe kabotu mumasena aatazumizyidwe kufwumbwa nkobakonzya. Ibambi coolwe cili boobo tabacijisi pe; bakkala mumbali amugwagwa, ambweni kabajisi buyo cipepa naa kasaka kakuyala ansi. Ibanji bazwa nkasaalo buya kutegwa bacikonzye kupona munzila iili yoonse njobakonzya—kubwezelela kubusena busowelwa zintu, kunyamunina bantu zintu zilemu, naa kubwezelela mabbodela azintu zimwi zikonzya kubelesyegwa alimwi kuti basambale.

Ikuteelana akati kabavwubi abacete takuli buyo mumasi aacisumpuka pe. Mboobu mboyaamba World Bank: “Zilawo mukkala bantu bapengede zilidumide mumasi oonse.” Kuzwa kucisi citasumpukide ca Bangladesh kusikila kucisi cisumpukide ca United States, tacikwe makani ambwazwidilide muntu umwi, kuli baabo ibacipengela cakulya naa kujana akoona. The New York Times yakazubulula lipooti yamu 2001 U.S. Census Bureau iitondezya kuti ilwaandaano luliko akati kabavwubi abacete mu United States lwazumanana kukomena. Yakaamba kuti: “Cibeela casanu camweelwa wabantu mucisi eeci ibavwubide kapati bakatambula 50 pasenti yamali aakula zintu zyamuŋanda mumwaka wamu 2001 . . . Cibeela casanu cabacete kapati bakatambula 3.5 pasenti.” Izintu mbozibede oobo ambweni akwiindilila buya kubija mumasi manji aambi. Makani akaambwa aba World Bank atondezya kuti 57 pasenti wamweelwe wabantu munyika bajana buyo mali aataindilili ku K10,000 abuzuba.

Icakabija kwiinda ncakuti, mu 2002 ibanji cakabanyonganya kumvwa makani aabeendelezi ibakavwuba akaambo kakubelesya  nzila zitaluzi. Nokuba kuti kunyina cibyaabi cakacitwa cacigaminina, ibanji bayeeya kuti beendelezi bamakkapani aaba, kweelana ambokwakaambwa mumagazini iitegwa Fortune, “bakali kwiindilila kuvwuba.” Ikulanga zintu zili mukucitika munyika, bamwi baleezeezya kujatikizya ibunji bwamali aatazyibidwe nkwaazwa, aabalilwa kutuulunzuma tulimbotubede twamadola ngobajisi bamwi, mbwaakajanwa kakuli bantu banji mbacete.

Sena Bucete Bunooliko Lyoonse?

Ooko takuli kwaamba kuti kunyina naba omwe uuli mukusoleka kumana bukkale bweetezya bwabacete. Ibeendelezi bamfwulumende ibankutwe alimwi ambunga zigwasilizya basoleka kubikka nzila zyakumana bucete. Pele, zintu zyazumanana kutyompya. Human Development Report 2002 yaamba kuti “masi manji aliceteede kwamyaka iinda ku 10, 20 alimwi muzisi zimwi ilainda ku 30,” nokuba kuti bantu banji basoleka canguzu kusumpula zintu.

Sena eeci cipa bantu bacete kubula bulangizi? Twamulomba kubala cibalo citobela kuti mulange-lange busongo bumwi ibugwasya ibukonzya kugwasya lino alimwi anzila zimwi zigwasya nzimwatali kuyeeyela.