Luumbulizyo Kuli Baabo Bayandika Lugwasyo

IBBAIBBELE talili bbuku lyaamba mbobalilemeka bantu. Nokuba boobo, lilatuumbulizya akutugwasya kubuyanda buumi nokuba kuti tulaba amapenzi. Mubwini, Magwalo aamba kuti: “Muntu uuzyedwe kumukaintu ulaputa mazuba mace kazwide bupenzi.’’ (Jobu 14:1) Kutalondoka kwesu kulijatikizidwe mumasunko aamwi. Pele ino nguni mwini-mwini wapa kuti bantu kabapenga?

Ibbaibbele lyaamba muntu ooyo kuti muuya mubi wiitwa kuti Saatani Diabolosi. Nguuleta mapenzi manji aanyonganya alimwi “nguuena bantu boonse baansi.” Pele alimwi Bbaibbele litwaambila kuti ciindi cakwe cilaafwaafwi kumana. (Ciyubunuzyo 12:9, 12) Lino-lino mapenzi oonse Saatani ngaakaleta kubantu bamunyika ayoomana Leza aakubweza ntaamu. Kweelana ancolyaamba Bbaibbele, inyika mpya yabululami njaakasyomezya Leza iyoomanizya kutyompwa koonse.—2 Petro 3:13.

Cilaumbulizya kapati kaka ikuzyiba kuti kupenga kwabantu nkwakaindi buyo kaniini! Mu Bwami bwa Leza bwakujulu bweendelezyegwa a Jesu Kristo, lusalululo akupenga ziyoomana. Ikwaamba Mwami ngwaakasala Leza, Imagwalo aamba kuti: “Nkaambo ulavuna bacete nibakwiila, abalo bapengede abaabo babula mugwasyi. Bacete abatengwana ulabafwida luzyalo; buumi bwabacete ulabufutula. Ulanununa buumi bwabo kulupenzyo: Bulowa bwabo bulayandika mumeso aakwe.”—Intembauzyo 72:12-14.

Kuzuzikizyigwa kwamajwi aaya aabusinsimi kuli afwaafwi. Tuyookonzya kubaa buumi butamani anyika muparadaiso mubukkale bubotu. (Luka 23:43; Johane 17:3) Iluzibo lwamu Magwalo lwazisyomezyo zyuumbulizya lupa bulangizi kuli baabo boonse ibayandika lugwasyo.

Nkotwakajana cifwanikiso icili apeeji 32]

Mwana musimbi uutyompedwe:Cifwoto ILO/J. Maillard