Amusyome Jehova Cakumaninina Muziindi Zyamapenzi
Amusyome Jehova Cakumaninina Muziindi Zyamapenzi
“Leza macijilo esu anguzu zyesu, mugwasyi loko mumapenzi.”—INTEMBAUZYO 46:1.
1, 2. (a) Ino ncikozyanyo nzi citondezya kuti ikwaamba buyo amulomo kuti tusyoma Leza takuzulide? (b) Ino nkaambo nzi ncotuyandika kucita zinji muciindi cakwiide kwaamba buyo amulomo kuti tusyoma Jehova?
IKWAAMBA buyo kuti tusyoma Leza kuliindene kapati akukutondezya kwiinda mumilimo yesu. Mucikozyanyo, imajwi aakuti “Tusyoma Leza” alajanika kuzwa kaindi amali aapepa aalubulo aaku U.S. * Mu 1956, Inkamu iibamba twaambo ku U.S. yakabikka mulawo wakuti majwi aakuti “Tusyoma Leza” ngamajwi aatondezya makanze aacisi ca United States. Kwiindana amakanze aaya, ibantu banji, kutali buyo mucisi eeci, pele munyika yoonse mbwiizulwa babikkila kapati maano kumali alimwi akulubono muciindi ca Leza.—Luka 12:16-21.
2 Mbotuli Banakristo bakasimpe, tatweelede kwaamba buyo aamulomo kuti tusyoma Jehova pe, tweelede kucita. Mbubonya mbuli “lusyomo lwaanzeene amilimo [mbolu]fwide,” mbubonya buyo kutaminina kuti tusyoma Leza akwalo takugwasyi ikuti naa kakutatondezyegwi amilimo. (Jakobo 2:26) Mucibalo cainda twaiya kuti ikusyoma Jehova kulalibonya ciindi notupaila kulinguwe, notuyandaula busolozi mu Jwi lyakwe alimwi anotulangila kumbunga yakwe kuti itusololele. Lino atulange-lange mbotukonzya kubweza ntaamo eezi zyotatwe muciindi camapenzi.
Notwazwa Mulimo naa Imali Ngotuvwola Naali Masyoonto
3. Ino mbuyumuyumu nzi babelesi ba Jehova mbobasikilwa ‘muziindi eezi zikatazya,’ alimwi ino mbuti mbotuzi kuti Leza ulilibambilide kutugwasya?
3 Mumazuba aya ‘aamuziindi zikatazya,’ swebo Tobanakristo ibukkale bulatuyumina mbubwenya mbuli bantu bamwi. (2 Timoteo 3:1) Aboobo, ziindi zimwi tulakonzya kujana kuti mulimo wesu wamana. Ambweni tulakonzya kubula cakucita cakunga nzila ilikke nkubeleka mawoola manji akaambo kakuceya kwamali ngotuvwola. Mubukkale buli boobu, cilakonzya kutukatazya ‘kujana ziyandika kumukwasyi wesu.’ (1 Timoteo 5:8) Sena Leza wesu Mupatikampatila ulilibambilide kutugwasya muziindi zili boobu? Inzya. Pele, Jehova tatukwabilili kubuyumuyumu boonse mubuumi mubweende bwazintu oobu. Nokuba boobo, ikuti naa katusyoma nguwe, imajwi aali kubbuku lya Intembauzyo 46:1 ayoobeleka kulindiswe aakuti: “Leza macijilo esu anguzu zyesu, mugwasyi loko mumapenzi.” Pele ino mbuti mbotukonzya kutondezya kuti tusyoma Jehova cakumaniina muziindi notutajisi mali?
4. Ciindi notwasikilwa penzi lyamali, ino ncinzi ncotukonzya kupailila, alimwi ino mbuti Jehova mbwaingula kumipailo iili boobo?
4 Inzila imwi mbotukonzya kutondezya kuti tusyoma Jehova nkwiinda mukumusikila mumupailo. Pele ino ncinzi ncotukonzya kupailila? Ikuti naa twasikilwa penzi lyamali, tulakonzya kuyandika busongo bugwasya muciindi eeci kwiinda lyoonse. Aboobo, mweelede kubupailila. Ijwi lya Jehova litusyomezya kuti: “Na nkwali akati kanu uubula busongo, akumbile kuli-Leza, uubaabila boonse cabuuya acakutatongauka, nkabela ulabupegwa.” (Jakobo 1:5) Inzya, amumulombe busongo Jehova, nkokuti ikukonzya kulubelesya kabotu luzibo, kumvwisya alimwi abupampu ikutegwa mukosole kabotu alimwi akusala kuluzi. Taateesu wakujulu siluyando usyomezya kuti uyooswiilila mipailo iili boobo. Ulilibambilide kululamika nzila yabaabo basyoma nguwe camoyo woonse.—Intembauzyo 65:2; Tusimpi 3:5, 6.
5, 6. (a) Ino nkaambo nzi ncotweelede kulanga ku Jwi lya Leza ikuti litugwasye kulwana bukkale bwakubula mali? (b) Ino ncinzi ncotukonzya kucita kutegwa tucesye kulibilika notwamaninwa mulimo?
5 Ikuyandaula busolozi mu Jwi lya Leza ninzila aimbi yakutondezya kuti tusyoma Jehova. Iziibalusyo zyakwe zyabusongo izijanika mu Bbaibbele zilasinizya kuti ‘zilasyomeka.’ (Intembauzyo 93:5) Nokuba kuti lyakamana kulembwa myaka iili 1,900 musyule oomu, ibbuku eeli lyakasololelwa amuuya lilijisi lulayo lusyomeka alimwi abusongo ibukonzya kutugwasya kuliyumya kapati mubukkale bwakubula mali. Amulange-lange zikonzyanyo zyamu Bbaibbele izyabusongo.
6 Mwami musongo Solomoni wakakabona kaambo aaka mumazuba aansiku: “Iŋonzi zyasimilimo zilalweela nekuba kuti ulalya cinji na ciniini, pele kukutisya kwamuvubi takumuzumizyi koona.” (Mukambausi 5:12) Kuyandika mali ikutegwa tuzibambuluzye, tuzibambe kabotu akuzicingilila zintu nzyotujisi. Aboobo, notwazwa mulimo tulakonzya kujana ciindi cakulingula buumi bwesu mbotupona, ikusola kwiindanya zintu ziyandika kapati kuzintu zitayandiki kapati. Ikutegwa tucesye kulibilika, ikucinca buumi kulakonzya kugwasya. Mucikozyanyo, sena tulakonzya kuubya-ubya bukkale bwesu ambweni kwiinda mukulongela muŋanda iniini naa kuleka kubelesya zintu zyakumubili zitayandiki kapati?—Matayo 6:22.
7, 8. (a) Ino mbuti Jesu mbwaakatondezya kuti ulizi kuti bantu batalondokede bajisi cilengwa cakulibilika zintu zyakumubili? (Amubone bupanduluzi buyungizidwe.) (b) Ino ndulayo nzi lugwasya Jesu ndwaakapa lujatikizya mbuli mbotukonzya kuleka kulibilika?
7 Mumulumbe wakwe waa Cilundu, Jesu wakalaya kuti: “Mutalibiliki kubuumi bwanu, kuti, Tukalyenzi? Tukanywenzi? nikuba kumibili yanu kuti, Tukasamenzi?” * (Matayo 6:25) Jesu wakalizi kuti bantu batalondokede ncobabikkila maano kapati mubuumi bwabo nkujana zintu ziyandika. Pele ino mbuti mbotukonzya ‘kuleka kulibilika’ zintu eezyo? Jesu wakati: “Amusaangune kuyandaula Bwami.” Kufwumbwa naa mapenzi nzi ngotujisi, tweelede kuzumanana kumulumba Jehova mubuumi bwesu. Ikuti naa twacita oobo, zintu nzyotuyandika abuzuba ‘ziyooyungizigwa’ kulindiswe a Taateesu wakujulu. Uyootupa nzyotuyandika kutegwa tuzumanane kupona munzila imwi.—Matayo 6:33.
8 Jesu wakayungizya lulayo oolu alumwi lwakuti: “Mutalibilikili zyajunza, nkaambo bwajunza bulalibilikila bwini.” (Matayo 6:34) Tacigwasyi pe ikutalika kulibilika kakunyina kaambo kujatikizya zilangilwa kucitika juunza. Sikwiiya umwi wakaamba kuti: “Mbokubede kumbele takuli mbuli mbotuyeeya kuti mbokuyooba pe.” Ikutobela lulayo lwa Bbaibbele cakulibombya ilwakubikka zintu ziyandika ambele alimwi akupona munzila iili boobo kulakonzya kugwasya kuleka kulibilika.—1 Petro 5:6, 7.
9. Notwasikilwa penzi lyamali, ino ndugwasyo nzi ndotukonzya kujana mumabbuku aa “muzike musyomesi uucenjede”?
9 Notwasikilwa penzi lyamali, tulakonzya kutondezya kuti tulasyoma Jehova kwiinda mukulanga mumabbuku aa “muzike musyomesi uucenjede” kutegwa atugwasye. (Matayo 24:45) Kwaziindi zinji imagazini ya Galamukani! ilijisi zibalo zijisi twaambo tugwasya anzila zyakumanina buyumuyumu bwakujana mali. Icibalo cakuti “Mutachotsedwa Ntchito Kodi Mankhwala Ake Nchiyani?” cijanika mu Galamukani! yamu August 8, 1991, cakabandauka nzila zili lusele izyakagwasya bantu banji kusitikila mubukkale bwakubula mali akukatazyigwa mumizeezo milimo noyamana. * Pele, imalailile ali boobu ayelede kweendelana akwaalanga kabotu mali mbuli mbwaayandika. Makani aaya akabandikwa mucibalo cakuti “Chinachake Chofunika Koposa Ndalama” icakali mumagazini njimunya.—Mukambausi 7:12.
Notujisi Penzi Lyakuciswa-Ciswa
10. Ino mbuti cikozyanyo ca Mwami Davida mbocitondezya kuti cilagwasya kusyoma Jehova notucisidwe kapati?
10 Sena cilakonzyeka kusyoma Jehova notwaciswa bulwazi bukatazyide? Inzya. Jehova ulabafwida luse aabo ibaciswa akati kabantu bakwe. Kunze lyaboobo, ulilibambilide kugwasya. Mucikozyanyo, amulange-lange zya Mwami Davida. Kweelede kuti wakalicisidwe kapati naakalemba mbuli Leza mbwacitila muntu uululeme uucisidwe. Wakaamba kuti: “Jehova ulamutabilila naaciswa abulo; mukuciswa kwakwe ulaponya malwazi aakwe oonse.” (Intembauzyo 41:1, 3, 7, 8) Ikusyoma Leza kwa Davida kwakazumanana kuyuma, limwi mwami wakapona. Pele ino mbuti mbotukonzya kutondezya kuti tusyoma Leza notujisi penzi lyakuciswa-ciswa?
11. Notwatalika kuciswa, ino ncinzi ncotukonzya kulomba kuli Taateesu wakujulu?
11 Ciindi notwaciswa kapati, inzila imwi yakutondezyela kuti kusyoma Jehova nkwiinda mukumulomba mumupailo ikuti atugwasye kuliyumya. Tulakonzya kumulomba kuti atugwasye kubelesya “maanu abusongo” ikutegwa tukonzye kupona kweelana abukkale mbotukonzya. (Tusimpi 3:21) Alimwi tulakonzya kumulomba kuti atugwasye kukkazika moyo alimwi akuliyumya mumalwazi aayo. Kunze lyaboobo, tulakonzya kuyanda kulomba Jehova kuti atuyumye-yumye, atupe nguzu zyakukonzya kuzumanana kusyomeka kulinguwe alimwi akuti tutanyongani kuli coonse cikonzya kucitika. (Ba-Filipi 4:13) Ikuzumanana kusyomeka kuli Leza kulayandika kapati kwiinda kubamba buumi bwasunu. Ikuti naa twazumanana kusyomeka, Sikupa Bulumbu Mupati uyootupa buumi bulondokede ibutamani alimwi akupona kabotu.—Ba-Hebrayo 11:6.
12. Ino ninjiisyo nzi zyamu Magwalo zikonzya kutugwasya kusala camaano caboola kumakani aabusilisi?
12 Ikusyoma Jehova kwesu alimwi kutukulwizya kuyandaula busolozi bugwasya kuzwa mu Jwi lyakwe Ibbaibbele. Injiisyo zijanika mu Magwalo zilakonzya kutugwasya kusala kabotu caboola kumakani aakusilikwa. Mucikozyanyo, ikuziba kuti lilakasya makani ajatikizya “bulozi,” tweelede kukaka kusonda naa nzila zyakusilikwa zijatikizya makani aabulozi. (Ba-Galatiya 5:19-21; Deuteronomo 18:10-12) Nceeci cikozyanyo acimbi cizwa mu Bbaibbele icabusongo bugwasya: “Uuongelezeka ulazumina makani oonse, pele muntu uucenjede ulayeeya kabotu kweenda kwakwe.” (Tusimpi 14:15) Aboobo, notulanga-langa zyabusilisi kucibbadela, tweelede kucenjela mukuziba makani aasyomeka muciindi cakwiide ‘kuzumina makani oonse.’ ‘Ikulijata’ kuli boobu kulakonzya kutugwasya kulanga-langa mizeezo yesu kabotu-kabotu akusala kwiinda muluzibo ndotujisi.—Taitasi 2:12, Ci.
13, 14. (a) Ino nzibalo nzi zijatikizya makani aabuponi izyakamwaigwa mumagazini aa Galamukani! alimwi a Ngazi Yamulindizi? (Amubone kabbokesi kali apeeji 31.) (b) Ino ndulayo nzi lujatikizya makani aakulanganya malwazi aakatazyide lwakapegwa mu Galamukani! yamu February 8, 2001?
13 Alimwi tulakonzya kutondezya kuti tusyoma Jehova kwiinda mukuyandaula mumabbuku aamuzike musyomesi. Imamagazini aa Ngazi Yamulindizi a Galamukani! ciindi aciindi alijisi zibalo zijisi makani aajatikizya mapenzi aakutapona kabotu amwi alimwi amalwazi aindene-indene. * Ziindi zimwi, mamagazini aaya alijisi zibalo zyakalembwa abantu ibakakonzya kuliyumya cakuzwidilila zibeela zyamubili kazitabeleki kabotu, mukuciswa amubulema bumwi. Kunze lyaboobo, zibalo zimwi zyapa nzila zyamu Magwalo kubikkilizya alulayo lugwasya lujatikizya mbuli mbomukonzya kupona amalwazi aataponi.
14 Mucikozyanyo, Galamukani! ya February 8, 2001, yakalijisi zibalo zinji zijisi mutwe wakuti “Muumbulizya Baciswa.” Izibalo zyakapa njiisyo zyamu Bbaibbele kubikkilizya amakani aajanika mukubuzya-buzya bantu bamwi ibajisi luzibo balo ibakapona amalwazi aapa kulemana kwamyaka minji. Icibalo cakuti “Ino Mbuti Mbomukonzya Kupona Cakuzwidilila Nokuba Kuti Mulaciswa?” cakapa lulayo oolu: Amubuzibe kabotu kusikila mpomukonzya bulwazi bwanu. (Tusimpi 24:5) Amulibikkile mbaakani zigwasya kubikkilizya ambaakani zyakugwasya bamwi, pele amuzibe kuti ambweni inga tamukonzyi kusika ambaakani nzyobakonzya kusika bamwi. (Incito 20:35; Ba-Galatiya 6:4) Mutani kulizanduli. (Tusimpi 18:1) Ciindi bamwi nobamuswaya, amubasangalizye. (Tusimpi 17:22) Kunze lyaboobo, amube acilongwe ciyumu a Jehova alimwi akukamantana ambungano. (Nahumu 1:7; Ba-Roma 1:11, 12) Sena tatulumbi busolozi busyomeka Jehova mbwapa kwiinda mumbungano yakwe?
Ikukompama Kwakumubili Nokwazumanana
15. Ino mbuti mwaapostolo Paulo mbwaakakonzya kuzunda nkondo yakulwana kukompama kwamubili uutalondokede, alimwi ino ncisinizyo nzi ncotukonzya kuba ancico?
15 Mwaapostolo Paulo wakalemba kuti: “Munyama yangu tamukali cintu niciba cimwi cibotu.” (Ba-Roma 7:18) Paulo wakalizi kwiinda muli zyakamucitikila mbocikatazya kulwana kulombozya alimwi akukompama kwamubili uutalondokede. Nokuba boobo, Paulo alimwi wakalisinizyide kuti ulakonzya kuzunda. (1 Ba-Korinto 9:26, 27) Munzila nzi? Kwiinda mukusyoma Jehova cakumaniina. Nkakaambo kaako Paulo ncaakaambila kuti: “Maawe! ndi muntu uusampaukide ncobeni! Ino nguni uukonzya kundivuna kumubili oyu walufu? Ngu-Leza. Ndamulumba kuli-Jesu Kristo Mwami wesu!” (Ba-Roma 7:24, 25) Ino mbuti kujatikizya ndiswe? Andiswe tulijisi nkondo yakulwana kukompama kwamubili. Mbotuyaabulwana kukompama kuli boobo, cilakonzya kuba cuuba-uba kucileka kusyoma akuyeeya kuti kunyina notunga twazunda pe. Pele Jehova uyootugwasya ikuti naa mbubwenya mbuli Paulo twasyoma nguwe cakumaniina ikutali kusyoma nguzu zyesu pe.
16. Ikuti naa kukompama kwazumanana, ino ncinzi ncotweelede kupailila, alimwi ino ncinzi ncotweelede kucita ikuti naa twaciinduluka alimwi cintu eeco?
16 Ikuti naa kukompama kwamubili kwazumanana, tulakonzya kutondezya kuti tusyoma Jehova kwiinda mukupaila kulinguwe. Tweelede kulomba muuya uusalala kuli Jehova kutegwa utugwasye. (Luka 11:9-13) Tulakonzya kulomba kulyeendelezya kukugama buya, kwalo kuli ncibeela camicelo yamuuya wa Leza. (Ba-Galatiya 5:22, 23) Ino ncinzi ncotukonzya kucita ikuti naa twaciinduluka alimwi cintu eeco citukatazya kakuli twakali cilekede? Tatweelede kuleka kuliyumya pe. Tutakatali kupaila cakulibombya kuli Leza wesu siluse ikulomba kulekelelwa alimwi alugwasyo. Jehova kunyina nayoofwutatila moyo “uupengede” akaambo kakulemenwa amanjezeezya aakuusa. (Intembauzyo 51:17) Ikuti naa twamukomba cakusinizya amoyo uuside, Jehova uyootugwasya kulwana masunko.—Ba-Filipi 4:6, 7.
17. (a) Ino nkaambo nzi ncocigwasya kuyeeyesya mbuli Jehova mbwalimvwa kukukompama kumwi nkotuli mukulwana? (b) Ino magwalo nzi ngotweelede kubikka mumutwe ikuti naa tuli mukulwana penzi lyakufwambaana kukalala? kweendelezya mulaka? ikulwana cilengwa cakuyandisya kulikondelezya kutali kabotu?
17 Alimwi tulakonzya kutondezya kuti tusyoma Jehova kwiinda mukuyandaula lugwasyo kuzwa mu Jwi lyakwe. Kwiinda mukubelesya kkonkodansi ya Bbaibbele naa Mulongo wa Mitwe iilembwa amwaka mu Ngazi Yamulindizi yamu December kumamanino, tulakonzya kuyandaula bwiinguzu kumubuzyo wakuti, ‘Ino mbuti Jehova mbwalimvwa kukompama nkondili mukulwana?’ Ikuyeeya zyambwalimvwa Jehova mumakani aayo kulakonzya kuyumya kulombozya kwesu kwakuyanda kumukkomanisya. Aboobo, tulakonzya kulimvwa mbwalimvwa walo, ikusula cintu ncasulide. (Intembauzyo 97:10) Ibamwi cabagwasya kubikka mumutwe magwalo aagaminide kwaamba zyakukompama nkobali mukulwana. Sena tuli mukulwana penzi lyakufwambaana kukalala? Tulakonzya kwaabikka mumutwe magwalo mbuli Tusimpi 14:17 alimwi a Ba-Efeso 4:31. Sena cilatukatazya kweendelezya mulaka wesu? Tulakonzya kwaabikka mumutwe magwalo mbuli Tusimpi 12:18 alimwi a Ba-Efeso 4:29. Sena tujisi cilengwa cakuyandisya kulikondelezya kutali kabotu? Tulakonzya kuyeeya magwalo mbuli Ba-Efeso 5:3 alimwi a Ba-Kolose 3:5.
18. Ino nkaambo nzi ncotuteelede kuyoowa kusampuka kuti kutulesye kulomba baalu kuti batugwasye kuzunda kukompama kwesu?
18 Ikuyandaula lugwasyo kuzwa kubaalu basalidwe amuuya mumbungano ninzila aimbi yakutondezya kuti tusyoma Jehova. (Incito 20:28) Kayi, ‘zipego kubantu’ eezi mbubambe buzwa kuli Jehova kwiinda muli Kristo bwakukwabilila akulanganya mbelele zyakwe. (Ba-Efeso 4:7, 8, 11-14) Masimpe, tacikonzyi kuuba-uba kulomba lugwasyo kujatikizya kukompama kwesu. Cilakonzya kulibonya kuti cilasampuzya, kuyoowa kuti ambweni baalu bayootubona kuti tatuyandiki pe. Pele, kakunyina kudooneka baalumi aaba basimide kumuuya bayootupa bulemu akaambo kabusicamba bwakulomba lugwasyo. Kunze lyaboobo, ibaalu balasoleka kutondezya ibube bwa Jehova neendelezya butanga. Ilulayo amalailile aakatalusya aazwa mu Jwi lya Leza zilakonzya kuti nzyezintu nzyotuyanda ikuyumya makanze eesu aakuzunda kukompama kwesu.—Jakobo 5:14-16.
19. (a) Ino muunzila nzi Saatani mbwayanda kubelesya kubula mpindu kwabuumi bwamunyika eeyi? (b) Ino kusyoma cibikkilizya nzi, alimwi ino ncinzi ncotweelede kukanza?
19 Mutalubi kuti Saatani ulizi kuti ciindi cakwe ciceede ncifwaafwi kapati. (Ciyubunuzyo 12:12) Uyanda kubelesya kubula mpindu kwabuumi munyika iino ikutegwa atutyompye akupa kuti tuleke. Atusinizye kumajwi aalembedwe ku Ba-Roma 8:35-39 aakuti: “Nguni uukonzya kutwaandaanya kuluyando lwa-Kristo? Sa mapenzi naaba mapakasyo naaba mafwabi niiba inzala niciba cintanda nibuba bulowe niliba isumo? . . . Pele mumakani aya oonse tulazunda cakwiinda nkaambo kayooyo uutuyanda. Nkaambo ndisinizye kuti taakwe cintu, niluba lufu nibuba buumi, nibaba baangelo nibaba basibwami nibaba basinguzu, naaba makani aasunu naaba makani aaciza, niziba zintu zyakujulu niziba zyakunsi, niziba zilenge zimwi zyoonse, taakwe cintu niciba cimwi cikonzya kutwaandaanya kuluyando lwa-Leza lwamuli-Kristo Jesu Mwami wesu.” Elo kaka majwi aaya alatondezya kusyoma Jehova! Nokuba boobo, kusyoma kuli boobu takuli kulimvwa buyo pe. Muciindi caboobo, nkusyoma kubikkilizya akusala cabusongo nkotucita abuzuba. Aboobo atukanze kapati kusyoma Jehova cakumaniina muciindi camapenzi.
Bupanduluzi buyungizidwe
^ munc. 1 Mulugwalo lwakalembelwa babelekela kubusena kubambilwa mali aalubulo amendulu ku U.S. lwamu November 20, 1861, Mulembi Ulanganya Mali uutegwa Salmon P. Chase wakalemba kuti: “Kunyina cisi cikonzya kuyuma kakunyina kugwasyigwa a Leza naa kukwabililwa, ccita kuti wacikwabilila walo. Ilusyomo lwabantu besu muli Leza lweelede kwaambilizyigwa aamali aacisi aalubulo.” Akaambo kaboobo, imakanze aajisi majwi aakuti “Tusyoma Leza” akatalika kulibonya aamali aalubulo aaku U.S. mu 1864.
^ munc. 7 Ikulibilika kuli mukupandululwa aawa kwaambwa kuti “nkuyoowa kapati cakunga lukkomano loonse mubuumi lwamana.” Ikwaamba kuti mutalibiliki cipandulula kuti tatweelede kutalika kulibilika. Nokuba boobo, buvwuntauzyi bumwi bwaamba kuti: “Icciti lyamu Chigiliki lyaamba cintu cicitika lino, ikupandulula malailile aakulesya cintu catalika kale kucitika.”
^ munc. 9 Itwaambo tuli lusele ntootu: (1) Mutakopani; (2) kamuyeeya kuti mulakonzya kuzwidilila; (3) kamulibambide kubeleka kufwumbwa mulimo; (4) kamupona azintu nzyomujisi, ikutali kukozyanyisya bukkale bwabamwi; (5) amukucenjelele kukweleta zintu; (6) imukwasyi amuukamantanye; (7) amulilemeke mbomulilemeka; eelyo (8) amuyeeye mbuli mbomweelede kubbadalila zintu ziyandika kapati.
^ munc. 13 Imamagazini aaya aabandika zyamu Bbaibbele taasalili muntu naa kukulwaizya busilisi bweelede, nkaambo eeci ncakulisalila muntu nceelede kucita. Muciindi caboobo, zibalo zibandika malwazi aamwi kwaagama buya naa kutabeleka kabotu kwazibeela zyamubili zimwi, zizibya buyo babali mbuli malwazi aayo mpaateene kuzibwa.
Sena Muciyeeyede?
• Notwasikilwa bukkale buyumu, ino muunzila nzi mbotukonzya kutondezya kuti tulasyoma muli Jehova?
• Ino mbuti mbotukonzya kutondezya kuti tusyoma Leza notujisi penzi lyakuciswa-ciswa?
• Ikuti naa kukompama kwakumubili kwazumanana, mbuti mbotukonzya kutondezya kuti camasimpe tusyoma Jehova?
[Mibuzyo yaciiyo]
Kabbokesi kali apeeji 31]
Sena Mulazyiyeeya Zibalo eezi?
Eelyo notutyompedwe kapati akaambo kakuciswa, cilayandika kapati ikubala zyabukkale bwabantu bamwi ikumvwa mbuli mbobaliyumya mumacise abulema mbobajisi. Izibalo eezi zitobela zili akati kazibalo zyakamwaigwa mumagazini aa Ngazi Yamulindizi.
“Nobacetaala Mbavwubi Ibuti?” Eeci cibalo cizwa mu Ngazi Yamulindizi yamu October 1, 1997 apeeji 3. Icaamba Micheal waku Nigeria.
“Ibbuku Lyabusongo Ilijisi Mulumbe Wasunu.” Eeci cibalo cizwa mu Ngazi Yamulindizi yamu April 1, 1999 apeeji 3. Icaamba Tomoe mbwaakagwasyigwa ciindi naakatyompedwe.
“Ikuba Mukamufwu Mbokwabajatikizya Bamakaintu Bobile.” Eeci cibalo cizwa mu Ngazi Yamulindizi yamu May 1, 2001 apeeji 3. Citupa zikozyano zyobile, ica Sandra a Elaine.
“Ikugwasya Bamukabafwu Kumanizya Mapenzi Aabo.” Eeci cibalo cizwa mu Ngazi Yamulindizi yamu May 1, 2001 apeeji 4. Cijisi zikozyanyo zyamu Bbaibbele zya Banakristo bamukabafwu.
“Bakaliyumya Kubumvwa Mumubili.” Eeci cibalo cizwa mu Ngazi Yamulindizi yamu April 1, 2002 apeeji 8.
“Luumbulizyo Kuli Baabo Ibali Mumapenzi.” Eeci cibalo cizwa mu Ngazi Yamulindizi yamu January 1, 2003 apeeji 4.
“Sena Ncobeni Mulasyoma mu Makani Mabotu?” Eeci cibalo cizwa mu Ngazi Yamulindizi yamu February 1, 2003 apeeji 6. Citondezya zikozyanyo zyamu Bbaibbele zyabantu bakatyompedwe, alimwi cilapa nzila ikonzya kutugwasya kuliyumya.
“Ndakazijana Zyoonse Nzyondakali Kuyandaula.” Eeci cibalo cizwa mu Ngazi Yamulindizi yamu March 1, 2003 apeeji 32. Caamba lugwalo lwakazwa ku France.
“Loida Watalika Kwaambaula.” Eeci cibalo cizwa mu Galamukani! yamu May 8, 2000. Cijatikizya bulwazi bwa cerebral palsy (kutabeleka kabotu kwabongo).
[Cifwanikiso icili apeeji 29]
Notwamaninwa milimo, cilakonzya kugwasya kulanga-langa buumi mbotupona
[Cifwanikiso icili apeeji 30]
Makani aajatikizya Loida atondezya kuti kusyoma Jehova kulagwasya kuliyumya (Amubone kabbokesi apeeji 31)
[Cifwanikiso icili apeeji 32]
Tatweelede kuyoowa kusampuka notulomba lugwasyo kutegwa tuzunde kukompama kwesu