Babelesi ba Jehova Balijisi Bulangizi Bwini-Bwini
Babelesi ba Jehova Balijisi Bulangizi Bwini-Bwini
“Inkamu iisyeede ya-Jakobo iyooba akati kamisyobo minji yabantu mbuli lume luzwa kuli-Jehova . . . lutalindili muntu.”—MIKA 5:7.
1. Ino mbuti ba Israyeli bakumuuya mbobali basikukatalusya?
JEHOVA ngo Mulengi mupati wamvwula alimwi amume. Tacigwasyi pe kulangila kubantu kuti babambe mvwula naa mume. Mika wakalemba kuti: “Inkamu iisyeede ya-Jakobo iyooba akati kamisyobo minji yabantu mbuli lume luzwa kuli-Jehova, mbuli lunywanywa lutalindili muntu nikuba kwiimina bantu baansi.” (Mika 5:7) Ino sunu “inkamu iisyeede ya-Jakobo” mbaani? Mbana Israyeli bakumuuya bamucaala, “ba-Israyeli ba-Leza.” (Ba-Galatiya 6:16) ‘Kubantu banji’ baanyika, bali mbuli “lume luzwa kuli-Jehova” lukatalusya alimwi ‘alunywaanywa lubukulusya bwizu.’ Inzya, Banakristo bananike mazubaano batumidwe a Leza kuti bakatalusye bantu. Mbwaanga mbaasikwaambilizya Bwami, Jehova uli mukubabelesya kwaambila bantu mulumbe wabulangizi bwini-bwini.
2. Ino nkaambo nzi ncotujisi bulangizi bwini-bwini nokuba kuti tupona munyika iizwide mapenzi?
2 Tacigambyi pe ikuti inyika eeyi inyina bulangizi bwini-bwini. Kuli kutasitikila kwamakani aamapolitikisi, kutalilemeka, milandu, kuyuma kwabukkale, milimo yazigwebenga ankondo. Zintu zili boobu tulazilangila munyika yeendelezyegwa a Diabolosi Saatani. (1 Johane 5:19) Ibantu banji baliyoowede kujatikizya mbokuyooba kumbele. Nokuba boobo, mbotuli bakombi ba Jehova, tatuyoowi nkaambo tulijisi bulangizi bubotu bwakumbele. Mbulangizi bwini-bwini nkaambo buzwa mu Jwi lya Leza. Tulamusyoma Jehova a Jwi lyakwe nkaambo nzyaamba zilacitika lyoonse.
3. (a) Ino nkaambo nzi Jehova ncaakali kuyandila kubabukila bana Israyeli alimwi a Juda? (b) Ino nkaambo nzi majwi aa Mika ncaakonzya kubeleka asunu?
3 Ibusinsimi bwakasololelwa amuuya wa Leza ibwa Mika, butuyumya kweenda muzina lya Jehova alimwi bulatupa ntalisyo yabulangizi bwini-bwini. Mumwaanda wamyaka walusele B.C.E., Mika naakasinsima, bantu bacizuminano a Leza bakalaandanizyidwe mumisyobo yobilo, nkokuti Israyeli a Juda alimwi boonse tiibakali kubikkila maano kucizuminano ca Leza. Icakatobela bakatalika kutalilemeka, kuzangila bukombi alimwi akuyandisya lubono kapati. Aboobo, Jehova wakacenjezya kuti wakali kuyanda kubabukila. Masimpe kuti kucenjezya kwa Leza kwakagamikidwe kubantu bakali kupona a Mika. Nokuba boobo, ibukkale bwasunu bulikozyenyi kapati abwakuciindi cakali kupona Mika, cakunga majwi aakwe alakonzya kubeleka asunu. Makani aaya alalibonya mbotuyaabulanga-langa makani mapati aali muzyaandaano zili ciloba zyabbuku lya Mika.
Ikulanga-Langa Zili Mubbuku lya Mika Ncokuyubununa
4. Ino makani nzi aali mubbuku lya Mika caandaano 1 kusikila ku 3?
4 Lino atulange-lange zili mubbuku lya Mika mubufwaafwi. Mucaandaano ca 1, Jehova watondezya kuzanga kwa Israyeli a Juda. Akaambo kakuzanga kwabo, Israyeli uyoonyonyoonwa alimwi cisubulo ca Juda ciyoosika nokuba kumulyango wa Jerusalemu. Icaandaano ca 2 ciyubununa makani aakuti, ibantu bavwubi basinguzu bakali kudyaaminina bakompeme ibakanyina ubagwasya. Pele, kuli cisyomezyo cizwa kuli Leza. Bantu ba Leza bayooyobololwa. Caandaano ca 3 caambilizya makani aa Jehova aakukalalila beendelezi bazisi alimwi abasinsimi bamubisizya. Beendelezi bali mukusotoka mulawo wabululami abasinsimi bali mukubeja. Nokuba kuti zintu zili boobu, Mika wayumizyigwa amuuya uusalala ikwaambilizya lubeta lwa Jehova luboola.
5. Ino ncinzi ncolyaamba bbuku lya Mika caandaano 4 a 5?
5 Caandaano ca 4 cisinsima kuti kumazuba aakumamanino, bantu bamumasi oonse bayoowunka kucilundu caŋanda ya Jehova cisumpwidwe ikutegwa bakayiisyigwe anguwe. Pele kabatana kucita boobo, Juda uyootolwa mubuzike ku Babuloni, pele Jehova uyoomuvwuna. Caandaano ca 5 citondezya kuti, Mesiya wakali kuyoozyalilwa ku Betelehemu ku Juda. Wakali kuyooyembela bantu bakwe cakuzwidilila akubavwuna kumasi aabadyaaminina.
6, 7. Ino ntwaambo nzi tupedwe muzyaandaano 6 a 7 izyabusinsimi bwa Mika?
6 Kucaandaano 6 cabbuku lya Mika, kuli makani aamilandu Jehova njaakapa bantu bakwe aali mbuli makani aalubeteko. Ino ncinzi Jehova ncaakacita icakapa kuti bantu bakwe bazange? Kunyina pe. Imasimpe ngakuti, nzyayanda kuti bantu bacite zilakonzya kutobelwa amuntu uuli woonse. Uyanda kuti bakombi kabacita bululami, luzyalo akulibombya nobeenda anguwe. Muciindi cakucita boobo, Israyeli a Juda batobela nzila yabuzangi, aboobo bakali kuyoosubulwa.
7 Mucaandaano ca 7 cabusinsimi bwakwe, Mika wasulaika bantu mbocipona limwi akaambo kabubi bwabo. Nokuba boobo, kunyina naatyompwa pe, nkaambo ukanzide ‘kulindila’ Jehova. (Mika 7:7) Ibbuku lyamanizyigwa amakani aasinizya kuti Jehova uyoobafwida luse bantu bakwe. Imakani aakaindi atondezya kuti bulangizi oobu bwakazuzikizyigwa. Mu 537 B.C.E., eelyo cisubulo Jehova ncaakapede bantu bakwe nocakamana, muluse lwakwe wakabapilusya kunyika yabo ibakasyeede.
8. Ino mbuti mbomukonzya kwaamba zili mubbuku lya Mika mubufwaafwi?
8 Elo taaliboteli kaka makani Jehova ngaayubununa kwiinda muli Mika! Ibbuku eeli ilyakalembwa munguzu zyamuuya lijisi zikozyanyo zyakucenjezya zijatikizya mbwabeendelezya Leza aabo balitaminina kumubelekela, pele batasyomeki. Lilasinsima zintu zicitika sunu. Alimwi lipa lulayo lwa Leza lujatikizya mbotweelede kulilemeka muziindi eezi zikatazya ikutegwa ibulangizi bwesu buyume.
Mwami Wakoonse-Koonse Waambaula
9. Kweelana abbuku lya Mika 1:2, ino ncinzi Jehova ncaakali kuyanda kucita?
9 Lino atulilange-lange kabotu bbuku lya Mika. Kubbuku lya Mika 1:2 tubala kuti: “Amuswiilile numisyobo yoonse. Teelela, O nyika azyoonse zili mumo. Mwami Jehova abe simulandunyoko. Mwami aambe makani kuzwa kuntempele yakwe iisalala.” Cakutadooneka, imajwi aayo naakamunjila mumoyo ikuti nomwakali kupona kuciindi ca Mika. Ncobeni, alatunjila asunu akaambo kakuti Jehova waambawida mutempele yakwe iisalala alimwi taambili buyo Israyeli a Juda pe, pele waambila bantu boonse kufwumbwa nkobabede. Kuciindi ca Mika, bantu tiibakamubikkila maanu Mwami Mupati Jehova kwaciindi cilamfwu kapati. Pele eeco cakali kuyoocinca ino-ino. Jehova wakalikanzide kubweza ntaamu.
10. Ino nkaambo nzi imajwi aali kubbuku lya Mika 1:2 ncaayandika kapati kulindiswe?
10 Ncimwi buyo amazubaano. Ibbuku lya Ciyubunuzyo 14:18-20 litondezya kuti, Jehova alimwi uli mukwaambaula kuzwa mutempele yakwe iisalala. Lino-lino Jehova uyoobweza ntaamu, eelyo kuyoocitika zintu zipati iziyoogambya bantu boonse alimwi. Lweendo luno, ‘cikama camusaansa mubi wanyika yoonse’ ciyoowaalwa mudindi lipati lyakusinina ilyabukali bwa Jehova kusikila bukanyonyoonwe cakumaninina bweende bwazintu bwa Saatani.
11. Ino majwi aali kubbuku lya Mika 1:3, 4 aamba nzi?
11 Amuswiilile ncayakucita Jehova. Bbuku lya Mika 1:3, 4 lyaamba kuti: “Amubone! Jehova ulapola kuzwa kucikalilo cakwe, ulaseluka kuzoolyataula amasena aasumpukide aanyika. Zilundu zilayaaya munsi lyakwe, amimpata ilaanduka. Zilaba mbuli bunzuka buumpwa amulilo, ambuli maanzi [aakunka ampoompo].” Sena Jehova uyoozwa ncobeni kubusena bwakwe bwakujulu akupwayaula malundu amimpata ya Nyika Yakasyomezyegwa? Peepe. Tayandiki kucita boobo buya pe. Uyakwiile kubikkila maanu kuzintu zicitika munyika ikutegwa kuyanda kwakwe kuzwidilile. Alimwi kayi taili nyika yini iiya kunyonyoonwa pe, pele mbantu bakkala anyika ibayoocitikilwa zintu zyaambwa. Eelyo Jehova aakubweza ntaamu, iziyoocitika zinooyoosya kubantu batasyomi—ciyooba mbuli kuti malundu ayaaya mbuli bunzuka alimwi amimpata yaandulwa amuzuzumo wanyika.
12, 13. Kweelana alugwalo lwa 2 Petro 3:10-12, ino ncinzi cipa kuti bulangizi bwesu kabuliko lyoonse?
12 Imajwi aabusinsimi aalembedwe kuli Mika 1:3, 4, alakonzya kumuyeezya businsimi bwakasololelwaa muuya wa Leza abumbi ibusinsima zintu zyamapenzi ziyoocitika munyika. Kweelana a 2 Petro 3:10, imwaapostolo Petro wakalemba kuti: “Buzuba bwa-Jehova bulasika mbubonya mbwasika mubbi. Kulimbubo ijulu liyooindilila acamuzunzumina mupati, tunyenyeezi tuyooyaka akubomboloka, ayalo nyika iyootentwa azicitwa kulinjiyo.” Mbubwenya mbuli businsimi bwa Mika, imajwi aa Petro kunyina naamba ziyoocitikila ijulu lini anyika pe. Zyaamba mapenzi mapati aayoosikila bweende oobu bwanyika mbyaabi.
13 Nokuba kuti kulangilwa lunyonyooko luli boobo, Banakristo balakonzya kubaa lusyomo mubukkale bwakumbele, mbubwenya bwakacita Mika. Munzila nzi? Kwiinda mukutobela lulayo luli mutupango twalugwalo lwa Petro tutobela. Petro wakakankamuka ulaamba: “Muleelede kuba bantu bali buti mukweenda munzila iisalala amukulemeka Leza! Mucilangila akuyandisya buzuba bwakusika kwa-Leza.” (2 Petro 3:11, 12) Ibulangizi bwesu mubukkale bwakumbele buyoosinizyigwa ikuti naa twabaa moyo uumvwa alimwi akubona kuti bukkale bwesu bulasalala abuumi bwesu mbwakukomba Leza. Ikutegwa bulangizi bwesu kabuliko, alimwi tweelede kuyeeya kuti buzuba bwa Jehova buyoosika ncobeni.
14. Ino nkaambo nzi Israyeli alimwi Juda ncobakali kuyandika kusubula?
14 Jehova ulakapandulula kaambo bantu bakwe bansiku ncobakayandika kusubulwa. Bbuku lya Mika 1:5 lyaamba kuti: “Nkaambo kamilandu ya-Jakobo azibi zyaluzubo lwa-Israyeli. Ncinzi milandu ya-Jakobo? Sa teensi Samariya? Azipaililo zya-Juda nzinzi? Sa tazyeensi Jerusalemu”? Israyeli alimwi a Juda bakali kupona akaambo ka Jehova. Pele bamuzangila, alimwi ikuzanga kwabo kwasika mane amuminzi yabo mipati, Samariya a Jerusalemu.
Micito Mibyaabi Yavwula
15, 16. Ino mbaakali kupona limwi Mika bakalijisi milandu yamicito nzi?
15 Icikozyanyo cabubi bwabantu bakuciindi ca Mika cilaambwa cakusalazya kuli Mika 2:1, 2 kuti: “Maawe kulibaabo bayeeya bubi akucita zibi nibalede amalo aabo. Buce buyo balacicita, nkaambo maanza aabo alacikonzya. Baleemuzya myuunda akwiisaala, amaanda balaatola. Balapenzya mwaalumi aciinga cakwe, balakataazya muntu ambono zyakwe.”
16 Ibantu balyatu tabooni pe masiku kabayeeya buyo mbobanga babanyanga myuunda amaanda basimukobonyina. Mbobwaceda buyo, balafwambaana kucita makanze aabo. Kunyina nobakali kunga bacita milimo eeyo mibyaabi ikuti nobakayeeya cizuminano ca Jehova. Imulawo wa Musa ulijisi malailile aakukwabilila bacete. Kweelanaa mulawo ooyu, kunyina mukwasyi wakeelede kunyangilwa limwi imbono nzyowakakona. Pele kubantu aaba balyatu, eeco icaamba mulawo tabacibikkili maanu pe. Balaawunduluzya majwi aali kuli Levitiko 19:18 aamba kuti: “Yanda mweenzinyoko mbubonya mboliyanda omwini.”
17. Ino ncinzi cinga cacitikila baabo balyaamba kuti babelekela Leza nobabikka zintu zyakumubili kumbele mubuumi bwabo?
17 Eeci citondezya cinga cacitika eelyo bantu balyaamba kuti babelekela Leza nobaleka kubikkila maanu kumbaakani zyakumuuya akutalika kubikka zintu zyakumubili kumbele. Paulo wakacenjezya Banakristo bakuciindi cakwe kuti: “Abo bayandisya kuvuba balawida mukutepaulwa amukuteegwa amuzisusi zibi zinji zyabufubafuba zibisizya buumi akubbizya bantu mukunyonyauka amukusweeka.” (1 Timoteo 6:9) Eelyo muntu nabikkila maanu kapati kukuvwuba mubuumi bwakwe, mubwini ukomba leza wakubeja—nkokuti Lubono. Ooyo leza wakubeja kunyina napa bulangizi bwini-bwini bwabuumi bwakumbele.—Matayo 6:24.
18. Ino ncinzi cakali kulangilwa kucitikila baabo ibayandisya lubono mumazuba aa Mika?
18 Ibanji kuciindi ca Mika bakaiya ciiyo eeci cakuti kusyoma zintu zyakumubili nkwabuyo ikwiinda mukucitikilwa mapenzi mapati. Kweelana a Mika 2:4, Jehova waamba kuti: “Mubuzuba obo kulaba cikozyano caambwa ndinywe, akulila cililo cakupenga. Balati, Kusaalwa ncobeni twasaalwa. Imbono zyabantu bangu zyatolwa. Maawe! Wandinyanga. Myuunda yesu yaabilwa basicinguni.” Inzya, aabo ibakabba maanda amyuunda bayoonyanzyigwa zikono zyamikwasyi yabo. Bayootandilwa kunyika yakule, alimwi imbono zyabo ziyoobwezyegwa abantu “basicinguni” naa bantu bamasi. Ibulangizi boonse bwakuba abukkale buli kabotu kumbele, tabunoociliko pe.
19, 20. Ino ncinzi cakacitikila ba Juda bakasyoma muli Jehova?
19 Pele ibulangizi bwabaabo ibasyoma Jehova buyoozwidilila. Jehova ulasyomeka kuzizuminano zyakwe kuli Abrahamu a Davida, alimwi ulijisi luse kuli baabo ibamuyanda mbuli Mika akuusa akaambo kakuzanduka kwabeenzinyina Mika kuzwa kuli Leza. Kubantu baluleme, kuyooba kubukulusyigwa muciindi ncabikkide Leza.
20 Eeco cakacitika mu 537 B.C.E., Babuloni nowakawa abasyeede akati kaba Juda nobakapiluka kwabo. Kuciindi eeco, imajwi aa Mika 2:12 akazuzikizyigwa kwaciindi cakusaanguna. Jehova waamba kuti: “Kubunganya njoomubunganya nyoonse nubana ba-Jakobo. Kuyobolola njooyobolola ibasyeede baba-Israyeli. Njoobabika antoomwe mbuli imbelele zyaku-Bozira. Mbuli butanga buli akati kamacelelo aabo, bayoopyopyongana nkaambo kakuvula kwabantu.” Elo ngusiluyando kaka Jehova! Naakamana kubasubula bantu bakwe, wakazumizya basyeede akati kabo ikupilukila kwabo akuyoomubelekela munyika njaakapede bamawisi.
Kweelana Kapati Amumazuba Eesu
21. Ino mbuti bukkale bwasunu mbobukozyenyi abwamumazuba aa Mika?
21 Notwalanga-langa zyaandaano zyobile zyakusaanguna izyabbuku lya Mika, sena mwabona zintu mbozyeelene azicitwa sunu? Mbubwenya buyo mbuli kuciindi ca Mika, ibantu banji sunu balyaamba kuti babelekela Leza. Pele mbubwenya mbuli Juda alimwi a Israyeli, balaandeene alimwi mane balalwana akati kabo. Ibunji bwabavwubi mu Kristendomu, badyaaminina bacete. Beendelezi bazikombelo baindila buya kulekela micito mibyaabi, kakuli ilasulaikwa mu Bbaibbele. Anu Kristendomu ncayooyoonyonyoonwa ino-ino antoomwe a “Babuloni Mupati” ibulelo bwanyika yoonse bwabukombi bwakubeja! (Ciyubunuzyo 18:1-5) Nokuba boobo, kwiinda mukutobela cikozyanyo cakuciindi ca Mika, Jehova ulijisi babelesi basyomeka ibasyeede anyika.
22. Ino ninkamu nzi zyobilo zijisi bulangizi mu Bwami bwa Leza?
22 Mu 1919, Banakristo bananike basyomeka bakalyaandaanya cakumaninina kuli Kristendomu akutalika kwaambilizya makani mabotu aa Bwami kumasi oonse. (Matayo 24:14) Cakusaanguna ncobakacita, nkuyobolola basyeede iba Israyeli bakumuuya. Kumane boobo, bakatalika kuyobolola “mbelele zimwi.” Inkamu eezi zyobile zyakaba “itanga lyomwe asikweembela omwe.” (Johane 10:16) Nokuba kuti lino babelekela Leza mumasi aali 234, ibakombi aaba boonse basyomeka bali “antoomwe.” Alimwi kusikila lino, icaanda cambelele ‘cazula bantu,’ nkokuti ibaalumi, banakazi alimwi abana. Ibulangizi bwabo tabuyeeme aabweende bwazintu oobu pe, pele buyeeme a Bwami bwa Leza bwalo ino-ino ibuyoosololela kuparadaiso anyika.
23. Ino nkaambo nzi ncomusinizyide kuti bulangizi bwanu mbwabwini?
23 Ikujatikizya bakombi ba Jehova basyomeka, ikapango kamamanino kabbuku lya Mika caandaano 2 kaamba kuti: “Mwami wabo wabazulwida, a-Jehova uli kunembo lyabo.” Sena mulibona kuti muli akati kabantu aabo bali mukweenda cakuzunda, kamutobela Mwami wanu Jesu Kristo alimwi a Jehova lwakwe kali kumbele? Ikuti kacili boobo, mulakonzya kusinizya kuti mulalangilwa kuzunda. Ibulangizi bwanu mbwabwini. Eeci ciyoolibonya kapati mbotuyaabulanga-langa businsimi bwa Mika abumwi.
Ino Inga Mwaingula Buti?
• Mumazuba aa Mika, ino nkaambo nzi Jehova ncaakabwezela ntaamo kuli Juda alimwi a Israyeli?
• Ino ncinzi cikonzya kucitika ikuti naa aabo ibalyaamba kuti bakomba Leza babikka lubono kumbele mubuumi bwabo?
• Notwamana kulanga-langa bbuku lya Mika caandaano 1 a 2, ino nkaambo nzi ncomusinizyide kuti bulangizi bwanu mbwabwini?
[Mibuzyo yaciiyo]
[Cifwanikiso icili apeeji 6]
Ibusinsimi bwa Mika bulakonzya kutuyumya kumuuya
[Zifwanikiso izili apeeji 7]
Mbubwenya mbuli ba Juda bamucaala mu 537 B.C.E., ba Israyeli bakumuuya alimwi abeenzinyina balatola ambele bukombi bwakasimpe