Ibapenzyegwa Akaambo Kabululami

“Bali acoolwe abo bapenzegwa nkaambo kabululami.”—MATAYO 5:10.

1. Ino nkaambo nzi Jesu ncaakali kumbele lya Ponto Pilato, alimwi ino ncinzi Jesu ncaakaamba?

“NCENDAKAZYALILWA, ncendakasikila ansi ano, kuti nkalungulule bwini.” (Johane 18:37) Jesu naakaamba majwi aaya wakali kumbele lya Ponto Pilato, Imweendelezi muna Roma iwaku Judaya. Jesu tanaakali kokuya akaambo kakuliyandila naa kutambwa buya a Pilato pe. Muciindi caboobo, wakali kokuya akaambo kakuti basololi babukombi iba Juda bakamutamikizya mulandu weelede lufwu.—Johane 18:29-31.

2. Ino nintaamo nzi Jesu njaakabweza, alimwi ino yakasololela kunzi?

² Jesu wakalizi kabotu buya kuti Pilato wakalijisi nguzu zyakumwaangununa naa kumujaya. (Johane 19:10) Pele eeci Jesu tiicakamulesya kwaambila Pilato cabusicamba izya Bwami. Nokuba kuti Jesu wakali muntenda, wakajana ciindi cakupa bumboni kumubelesi wamfwulumende mupati mubusena oobo. Nokuba kuti wakapa bumboni oobo, Jesu wakasulaikwa akujayigwa. Wakafwa lufwu lwakupenzyegwa kali sikufwida lusyomo lwakwe acisamu cakupenzyenzya.—Matayo 27:24-26; Marko 15:15; Luka 23:24, 25; Johane 19:13-16.

Ngukamboni naa Ngusikufwida Lusyomo Lwakwe?

3. Ino ncinzi mabala aakuti ‘sikufwida lusyomo’ ncaakali kupandulula mumazuba aakali kulembwa Bbaibbele, pele ino ncinzi ncaapandulula sunu?

³ Kubantu banji sunu, muntu ufwida lusyomo lwakwe bamuyeeyela kuti weelene buyo asikuciindilizya mukusyoma. Ibantu balisungula kufwida lusyomo lwabo, ikapati lusyomo lwabukombi, ziindi zinji bayeeyelwa kuti nzigwebenga naa kuti bapa bantu kulibilika. Nokuba boobo, imabala akuti sikufwida lusyomo lwakwe azwa kubbala lya Chigiliki lya kuti mar’tys, mumazuba aakali kulembwa Bbaibbele lyakali kupandulula “kamboni,” imuntu waamba makani aa Leza, ambweni iwaambila nkuta kasimpe kazintu nzyasyoma. Kumbele bantu nobakakonzya kuziba kuti mabala aaya apandulula “muntu uufwa akaambo kakucita bumboni,” naa uucita bumboni kwiinda mukufwa.

4. Ino mbuti Jesu mbwaakali sikufwida lusyomo mubupanduluzi bwamabala aaya bwakumatalikilo?

⁴ Jesu wakali sikufwida lusyomo mubupanduluzi bwamabala aaya bwakumatalikilo. Kweelana ambwaakaambila Pilato, wakaboolela kuti “alungulule bwini.” Bukamboni bwakwe bwakapa  kuti bantu bacite zintu munzila ziindene-indene. Bantu bamwi akabanjila makani ngobakamvwa, eelyo bakamusyoma Jesu. (Johane 2:23; 8:30) Ibunji bwabaabo ibakali munkamo abasololi bacikombelo kubagama buya abalo kuli mbobakacita, pele bakacita oobo munzila iitagwasyi. Jesu wakabaambila boobu ibanyina batasyomi: “Inyika tiikonzya kumusula, pele mebo ilindisulide, nkaambo ndiilingulula kuti milimo yayo mibi.” (Johane 7:7) Akaambo kakucita bumboni kubwini, Jesu wakasulaikwa abeendelezi bacisi, calo cakapa kuti ajaigwe. Masimpe, wakali “kamboni uusyomeka (marʹtys).”—Ciyubunuzyo 3:14.

“Muyoosulwa Kubantu Boonse”

5. Kumatalikilo kwamulimo wakwe, ino ncinzi Jesu ncaakaamba kujatikizya kupenzyegwa?

⁵ Jesu tali ngowakapenzyegwa kapati alikke pe, pele wakabacenjezyela limwi basikumutobela ikuti abalo bayoopenzyegwa mbubonya. Kumatalikilo aamulimo wakwe, Jesu wakaambila baswiilizi mu Mulumbe wakwe waa Cilundu kuti: “Bali acoolwe abo bapenzegwa nkaambo kabululami, nkaambo Bwami bwakujulu mbubwabo. Inywe muli acoolwe nibazoomutukila akumupenzya akumutamikizya zintu zibi zyoonse zyakubeja nkaambo kandime. Amukondwe akusekelela, nkaambo bulumbu bwanu bwakujulu mbupati.”—Matayo 5:10-12.

6. Ino nkucenjezya kuli buti Jesu nkwaakapa naakatuma baapostolo ibali 12?

⁶ Kumbele, Jesu naakatuma baapostolo bakwe ibali 12 wakabaambila kuti: “Mukacenjele bantu, nkaambo bayoomwaaba kumbeta impati, nkabela muzikombelo zyabo bayoomukwipaula. Alimwi muyootolwa kubusyu bwabeendelezi ababami nkaambo kandime, cikabe citondezyo kulimbabo akubamasi.” Pele beendelezi babukombi tabali balikke ibakali kulangilwa kupenzya basikwiiya pe. Alimwi Jesu wakati: “Munyina uyooaba munyina kulufu, alakwe wisi uyooaba mwana, abalo bana bayoosandukila bazyali babo kuti babajaye. Nkabela muyoosulwa kubantu boonse nkaambo kazina lyangu, nekubaboobo oyo uukakatila kusikila kumamanino uyoofutuka.” (Matayo 10:17, 18, 21, 22) Makani aansiku aamba zyakupenzyegwa kwa Banakristo bamumwaanda wamyaka wakusaanguna alasinizya kuzuzikizyigwa kwamajwi aaya.

Imakani Aakuliyumya Cakusyomeka

7. Ino ncinzi cakapa kuti Stefano abe sikufwida lusyomo lwakwe?

⁷ Kakwiindide ciindi cisyoonto Jesu kafwide, Stefano ngowakaba Munakristo wakusaanguna kufwa akaambo kakucita bumboni kubwini. “[Wakazwide] luzyalo enguzu, wakali kucita ziyoosya ezitondezyo zipati akati kabantu.” Basinkondonyina basicikombelo “teebakali enguzu kukazya busongo a-Muuya ngwaambya.” (Incito 6:8, 10) Akaambo kamunyono, bakamukwela-kwela Stefano akumutola kumbele lya Nkuta Mpati yaba Juda kwalo nkwaakajana basikumutamikizya, eelyo wakapa bumboni bulimvwisya kapati. Nokuba boobo, kumamanino basinkondonyina bakamujaya Stefano kamboni uusyomeka.—Incito 7:59, 60.

8. Ino mbuti basikwiiya bamu Jerusalemu mbobakacita akaambo kakupenzyegwa kwakabasikila naakajaigwa Stefano?

⁸ Naakajaigwa Stefano, “imbungano yamu-Jerusalemu yakatalika kupenzegwa kapati, boonse bakamwaikila muzisi zya-Judaya a-Samariya.” (Incito 8:1) Sena kupenzyegwa kwakapa kuti kukambauka kwa Banakristo kwiime? Peepe, kayi cibalo caamba kuti “bakamwaika bakeendeenda baya bukambauka makani.” (Incito 8:4) Beelede kuti bakalimvwa mbuli mwaapostolo Petro mbwaakalimvwide kumatalikilo naakati: “Tuleelede kumvwa Leza kwiinda bantu.” (Incito 5:29) Nokuba kuti kwakali kupenzyegwa, basikwiiya aaba basyomeka alimwi basungu bakazumanana mumulimo wakucita bumboni kubwini, kabazi kuti kucita boobu kwakali kukonzya kubayungizyila mapenzi.—Incito 11:19-21.

9. Ino nkupenzyegwa kuli buti kwakazumanana kusikila basikutobela ba Jesu?

⁹ Masimpe, buyumuyumu bwakazumanana kakunyina kuyozya-yozya. Kusaanguna, tujana kuti Saulo, imulombwana wakeebelela cakukkomana Stefano naakapwaigwa mabwe, “mbwaakacifundilide kupenzya akujaya basikwiiya ba-Mwami, wakainka kumupaizi mupati kuyoomukumbila  magwalo aakuya kuzikombelo zyaku-Damasko, kuti aakujana benzila eyi, nobaba baalumi nobaba bakaintu, abalete ku-Jerusalemu balaangidwe.” (Incito 9:1, 2) Eelyo kutandila mumwaka wa 44 C.E., “Heroda mwami wakabika maanza kupenzya bamwi bembungano. Wakajaya Jakobo eceba, mwanaakwabo Johane.”—Incito 12:1, 2.

10. Ino mmakani nzi aakupenzyegwa ngotujana mubbuku lya Incito alya Ciyubunuzyo?

¹⁰ Zibeela zimwi zyabbuku lya Incito zijisi makani aamba zyamasukusyo, kwaangwa akupenzyegwa kwakaliyumya bantu basyomeka, mbuli Paulo. Paulo wakali sikupenzya kaindi, pele wakasanduka akuba mwaapostolo alimwi kuboneka kuti wakajaigwa akaambo kalusyomo lwakwe a Mwami muna Roma Nero kuma 65 C.E. (2 Ba-Korinto 11:23-27; 2 Timoteo 4:6-8) Kunze lyaboobo, mubbuku lya Ciyubunuzyo ilyakalembwa kumamanino kwamwaanda wamyaka wakusaanguna, tujana kuti mudaala mwaapostolo Johane wakatolwa kali mwaange kunsumbu ya Patmo “nkaambo kamakani aa-Leza abumboni bwa-Jesu.” Ibbuku lya Ciyubunuzyo lyaamba izya “Antipa kamboni wangu musyomesi, iwakajayigwa” ku Pergamo.—Ciyubunuzyo 1:9; 2:13.

11. Ino mbuti bukkale bwa Banakristo bakusaanguna mbobwakazuzikizya majwi aa Jesu aamba zyakupenzyegwa?

¹¹ Zyoonse eezi zyakali kuzuzikizya majwi aa Jesu ngaakaambila basikwiiya bakwe kuti: “Kuti bakandipenzya mebo, bayoomupenzya anywebo.” (Johane 15:20) Banakristo bakusaanguna basyomeka bakalilibambilide kusikilwa musunko muyumu, lufwu lwakupenzyegwa, kuwaalwa mubanyama naa nzila imbi yakupenzya. Bakalilibambilide kucitikilwa zili boobu kutegwa bazuzikizye mulimo ngobakapegwa ku Mwami Jesu Kristo wakuti: “Muyooba bakamboni bangu muno mu-Jerusalemu, amu-Judaya moonse, amu-Samariya, mane kusikila kumamanino aanyika.”—Incito 1:8.

12. Ino nkaambo nzi kupenzyegwa kwa Banakristo ncaatali buyo makani aansiku?

¹² Ikuti naa kuli uuyeeya kuti kupenzyegwa calunya kwabatobeli ba Jesu kwakacitika buyo lyansiku, ulilubilide kapati. Paulo iwakaliyumya mubuyumuyumu bwakamusikila wakalemba kuti: “Boonse abo bayanda kupona cakululama muli-Kristo Jesu mbobayoopenzegwa.” (2 Timoteo 3:12) Kujatikizya zyakupenzyegwa, Petro waamba kuti: “Nciconya eco ncimwakaitilwa, nkaambo Kristo alakwe wakamucisilwa, wakamusiila cibonesyo, kuti mukatobele mumikondo yakwe.” (1 Petro 2:21) Kusikila “kumazuba aakumamanino” aaya aabweende bwazintu, bantu ba Jehova bazumanana kusulwa alimwi baba basinkondonyina abantu. (2 Timoteo 3:1) Munyika yoonse, mumasi muli mfwulumende zyalunya alimwi azyakulisalila buya mweendelezi, Bakamboni ba Jehova bapenzyegwa ziindi zimwi, umwi aumwi kumugama naa kabali antoomwe.

Ino Nkaambo nzi Ncobasulilwa Akupenzyegwa?

13. Ino ncinzi babelesi ba Jehova bamumazuba aasunu ncobeelede kuziba kumakani aakupenzyegwa?

¹³ Nokuba kuti bunji bwesu sunu tulaangulukide kukambauka akuswaangana caluumuno, tuleelede kukutobela kuyeezya kwa Bbaibbele kwakuti “ziyanza zyaansi ano [zilacinca].” (1 Ba-Korinto 7:31) Zintu zilacinca mukulaba kwaliso cakuti, ikuti naa tatulibambilide mumizeezo naa kumuuya, tulakonzya kutyompwa kufwambaana. Aboobo, ino ncinzi ncotukonzya kucita ikutegwa tulikwabilile? Inzila mbotu yakulikwabilila njakuyeeya ikaambo Banakristo bayandisya luumuno alimwi ibatobela milawo ncobasulilwa akupenzyegwa.

14. Ino ncinzi Petro ncaakaamba kujatikizya kaambo Banakristo ncobakali kupenzyelwa?

¹⁴ Mwaapostolo Petro wakakaamba kaambo mulugwalo lwakusaanguna ndwaakalemba kuma 62-64 C.E., Banakristo mu Bulelo bwa Roma moonse nobakali kusukusigwa akupenzyegwa. Wakati: “Nomuyandwa mutagambi aamasukusyo aayaka mbuli mulilo aamusikila kuti musukusigwe nga[w]o. Mutayeeyi kuti mwasikilwa cintu ceenzu.” Ikupandulula ncaakali kuyeeya, Petro wakazumanana ategwa: “Tacili cibotu kuti umwi wanu wapenzegwa nkaambo kabujayi na kubba na kucita zibi, nanka nkaambo kakuti ngusindimi zyobile, pele  na ulapenzegwa nkaambo kabunakristo bwakwe, eci tacili cintu cakumufwisya bweeme, pe, ncintu nceelede kulumba Leza.” Petro wakatondezya kuti tiibakali kupenzyegwa akaambo kamilandu pe, pele akaambo kakuti bakali Banakristo. Nikwali kuti abalo ‘bakali kweenda ambabo mukuya buvwuzya butaka,’ mbuli bwakali kucita bantu bamwi, nibakali kuyandwa ambabo. Pele balo bakapenzyegwa nkaambo bakali kusoleka kuzuzikizya mulimo wabo kabali batobeli ba Kristo. Mbozibede zintu asunu ku Banakristo bakasimpe.—1 Petro 4:4, 12, 15, 16.

15. Ino nkwiindana kuli buti kulibonya munzila mbobalangwa Bakamboni ba Jehova sunu?

¹⁵ Mumasena manji aamunyika, Bakamboni ba Jehova balalumbaizyigwa abanamaleya akaambo kalukamantano ndobatondezya kumiswaangano yacooko, mumilimo yakuyaka, kusyomeka abunkutwe, icikozyanyo cabo cibotu cakulilemeka, buumi bwamukwasyi alimwi mane akaambo kakulibonya kabotu ambobabalemeka bantu. * Pele, nocakalembwa cibalo eeci, mulimo wabo wakali lesyedwe naa kukasyigwa mumasi aataleli ku 28. Kunze lyaboobo, bunji bwa Bakamboni balapenzyegwa cacigaminina buya alimwi akusowekelwa zintu akaambo kalusyomo lwabo. Ino nkaambo nzi ncobapenzyelwa kakuli bajisi cikozyanyo cibotu cakulilemeka? Alimwi, ino kaambo nzi Leza ncakuzumizyila?

16. Ino nkaambo nzi kapati kapa kuti Leza azumizye bantu bakwe kuti kabapenzyegwa?

¹⁶ Cakusaanguna, tuleelede kuyeeya majwi aali ku Tusimpi 27:11 aakuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.” Masimpe, nkaambo kamakani aakaindi aajatikizya bweendelezi bwakoonse-koonse. Nokuba kuti kuli makani manji aasinizya apegwa abaabo boonse ibakasyomeka kuli Jehova kwamyaanda-myaanda yamyaka, Saatani kunyina nalekede kusampaula Jehova mbubwenya  mbwaakacita mumazuba aa Jobu imulombwana uululeme. (Jobu 1:9-11; 2:4, 5) Kakunyina kudooneka, Saatani wayaambele kapati mukusoleka kwakwe kwamamanino kwakuyanda kuzuzikizya makanze aakwe, nkaambo lino Bwami bwa Leza bulikkazikizyidwe kabotu-kabotu, kabujisi abalelwa basyomeka alimwi abaiminizi munyika yoonse. Sena bantu aaba bayoozumanana kusyomeka kuli Leza kufwumbwa naa kuli buyumuyumu nzi bukonzya kubasikila? Ooyu ngomubuzyo mubelesi umwi aumwi wa Jehova ngweelede kulivwiilila.—Ciyubunuzyo 12:12, 17.

17. Ino ncinzi Jesu ncaakali kupandulula naakaamba kuti “kuyooba bukamboni kulindinywe”?

¹⁷ Nakali kwaambila basikwiiya bakwe izintu zyakeelede kucitika ‘kumamanino aaciindi,’ Jesu wakatondezya kaambo akamwi Jehova ncazumizyila kuti babelesi bakwe kabapenzyegwa. Wakabaambila kuti: “[Bayoo]musisya kubami akubeendelezi nkaambo kazina lyangu. Kuyooba bukamboni kulindinywe.” (Matayo 24:3, 9; Luka 21:12, 13) Jesu lwakwe wakacita bumboni kumbele lya Heroda a Ponto Pilato. Awalo mwaapostolo Paulo wakatolwa “kubami akubeendelezi.” Kwiinda mukulaililwa a Jesu Kristo, Paulo wakayanda kupa bumboni kumuleli mupati wamumazuba aayo naakaamba kuti: “Ndalisisya kuli Kaisara.” (Incito 23:11; 25:8-12) Ncimwi buyo amazubaano, ibukkale bukatazya ziindi zinji bwapa kuti bukamboni bukonzye kupegwa kubabelesi bapati-pati alimwi akubuleya. *

18, 19. (a) Ino mbuti kuliyumya mumasukusyo mbokutugwasya? (b) Ino mmibuzyo nzi iiyoolangwa-langwa mucibalo citobela?

¹⁸ Kunze lyaboobo, kuliyumya mumasukusyo amukupenzyegwa kulakonzya kutugwasya swebo kutugama. Munzila nzi? Sikwiiya Jakobo wakabayeezya Banakristonyina kuti: “Bakwesu, amuyeeye kuti ncoolwe cipati na mwasikilwa masukusyo aamisyobo misyobo, nkaambo mulizi kuti kusukusigwa kwalusyomo lwanu nkokuleta lukakatilo.” Inzya, kupenzyegwa kulakonzya kulomya lusyomo lwesu akutugwasya kuti tuliyumye. Nkakaambo kaako tatukanduki pe naa kusola kujana nzila zitali zyamu Magwalo zyakukuleya. Muciindi caboobo, tutobela lulayo lwa Jakobo: “Lukakatilo alukalondole mulimo walo woonse, kuti mube balondosi akuba aciimo cizulide cakutabula cintu.”—Jakobo 1:2-4.

¹⁹ Nokuba kuti Jwi lya Leza lilatugwasya kumvwisya ikaambo babelesi ba Leza basyomeka ncobapenzyelwa alimwi akaambo Jehova ncakuzumizyila, eeci tacaambi kuti kupenzyegwa inga kwauba-uba pe. Ino ncinzi cikonzya kutuyumya kutegwa tukonzye kukuzunda? Ino ncinzi ncotweelede kucita ikuti naa twatalika kupenzyegwa? Tuyakwaabandika makani aaya aayandika kapati mucibalo citobela.

Bupanduluzi buyungizidwe

Sena Inga Mwapandulula?

• Ino mbuti Jesu mbwaakali sikufwida lusyomo lwakwe kweelana abupanduluzi bwamabala aaya bwakumatalikilo?

• Ino kupenzyegwa kwakabajatikizya buti Banakristo bamumwaanda wamyaka wakusaanguna?

• Kweelana ambwaakapandulula Petro, nkaambo nzi Banakristo bakusaanguna ncobakali kupenzyelwa?

• Ino ntwaambo nzi tupa kuti Jehova azumizye kuti babelesi bakwe kabapenzyegwa?

[Mibuzyo yaciiyo]

[Zifwanikiso izili apeeji 24, 25]

Banakristo bamumwaanda wamyaka wakusaanguna bakapenzyegwa, ikutali akaambo kakuti bakabisya, pele akaambo kakuti bakali Banakristo

PAULO

JAKOBO

JOHANE

ANTIPA