Ino Nkaambo nzi Ncotweelede Kupaila Cakutaleka?
Ino Nkaambo nzi Ncotweelede Kupaila Cakutaleka?
“Amukombe cakutaleka. Amube amyoyo iilumba kuzintu zyoonse.”—1 Ba-tesalonika 5:17, 18.
1, 2. Ino mbuti Daniele mbwaakatondezya kuti wakali kucibikkila maano icoolwe camupailo, alimwi ino cakacijatikizya buti cilongwe cakwe a Leza?
MUSINSIMI Daniele wakajisi cilengwa cakupaila kuli Leza ziindi zyotatwe abuzuba. Wakali kufwugama kupaila ampulungwido yakaanda kakwe kamujulu kakali kubbazu lyamunzi wa Jerusalemu. (1 Bami 8:46-49; Daniele 6:10) Nociba ciindi mulawo wabeendelezi nowakakasya kugamika mipailo kumbi kunze lyaku mwami Dariyo mu Medi, Daniele kunyina naakazungaana naaceya. Kufwumbwa naa cakali kumubikka muntenda naa pe, mulombwana ooyu wakajisi cilengwa cakupaila, wakali kupaila kuli Jehova cakutaleka.
2 Ino mbuti Jehova mbwaakamubona Daniele? Imungelo Gabriyeli naakaboola kuzi kwiingula umwi wamipailo ya Daniele, imungelo wakapandulula musinsimi ooyu kuti “muntu uuyandwa loko.” (Daniele 9:20-23) Mubusinsimi bwa Ezekieli, Jehova wakaamba Daniele kuti mulombwana uusyomeka. (Ezekieli 14:14, 20) Kakunyina kudooneka, mipailo ya Daniele mubuumi bwakwe yakapa kuti cilongwe cakwe a Leza ciyume, ikasimpe naba Dariyo nkaakazi.—Daniele 6:16.
3. Kweelana mbokwatondezyegwa kuzwa kuli cakacitikila misyinali umwi, ino mbuti mupailo mboukonzya kutugwasya kuzumanana kusyomeka?
3 Alimwi ikupaila lyoonse kulakonzya kutugwasya kuliyumya mumasukusyo aakatazyide. Mucikozyanyo, amulange-lange zyakacitikila misyinali Harold King ku China walo wakaangwa myaka iili musanu muntolongo kali alikke buyo. Kujatikizya cakamucitikila eeci, Mukwesu King wakaamba kuti: “Ndilakonzya kuzandulwa kubantuma, pele kunyina uukonzya kundizandula kuli Leza. . . . Caantangalala buya kumuntu woonse wakali kwiinda kuntolongo ooko nkondakabede, ndakali kufwugama muntolongo eeyo ziindi zyotatwe abuzuba akupaila cakumvwika, kandiyeeya Daniele iwaambwa mu Bbaibbele. . . . Cakali kuboneka kuti muziindi eezyo muuya wa Leza wakali kusololela mizeezo yangu kumakani aagwasya alimwi wakali kunditontomeka. Elo kaka mupailo wakandipa nguzu zyakumuuya alimwi akunduumbulizya!
4. Ino mmibuzyo nzi iijatikizya mupailo njotutiilange-lange mucibalo eeci?
4 Ibbaibbele lyaamba kuti: “Amukombe cakutaleka. Amube amyoyo iilumba kuzintu zyoonse.” (1 Ba-Tesalonika 5:17, 18) Kweelana alulayo oolu, atulange-lange mibuzyo eeyi iitobela. Ino ntwaambo nzi ntotujisi tutupa kubikkila maano kumipailo yesu? Ino ntwaambo nzi ntotujisi itwakusikila Jehova mumupailo cakutaleka? Ino ncinzi ncotukonzya kucita ikuti naa tulimvwa kuti tatweeleli kupaila kuli Leza akaambo kakulubizya kwesu?
Amubambe Cilongwe Kwiinda Mumupailo
5. Ino mbulongwe buli buti bulibedelede imupailo mboutugwasya kuba ambubo?
5 Sena mulayanda kuti Jehova amubone mbuli mulongwe wakwe? Jehova mbwaakamwaamba oobo sinsiku Abrahamu. (Isaya 41:8; Jakobo 2:23) Jehova uyanda kuti tube acilongwe cili boobo anguwe. Mubwini ututamba kuti tubambe cilongwe anguwe. (Jakobo 4:8) Sena kutambwa kuli boobu takweelede kutupa kuyeeyesya bubambe bulibedelede bwamupailo? Cilakatazya kapati kupangana kutegwa mwaambaule naa kubamba cilongwe ankumekume yamumfwulumende. Pele, Mulengi wabubumbo boonse utukulwaizya kumusikila cakwaanguluka mumupailo kufwumbwa ciindi ncotuyanda kucita boobo. (Intembauzyo 37:5) Mipailo yesu yalyoonse ilatugwasya kuyumya cilongwe a Jehova.
6. Ino cikozyanyo ca Jesu cituyiisya nzi kujatikizya mbuli mbokuyandika “kukomba cakutaleka”?
6 Nokuba boobo, elo ncuuba-uba kaka kuubya-ubya mupailo! Ikusola kumana makatazyo aabuzuba abuzuba mubuumi kulakonzya kutupa kuti tucileke kubikkila maano kukujana ciindi cakuti tupaile kuli Leza. Jesu wakakulwaizya basikwiiya bakwe “kuzumanana kupaila,” alimwi walo mbwaakacita oobo. (Matayo 26:41, NW) Nokuba kuti lyoonse wakajisi bubi kuzwa mafwumofwumo mane masiku, wakajana ciindi cakwaambaula kuli Bawisi bakujulu. Ziindi zimwi, Jesu wakali ‘kubuka kubucedo’ kutegwa apaile. (Marko 1:35) Ziindi zimwi, wakali kuunka kubusena busisikide kumazuba ikutegwa akapaile kuli Jehova. (Matayo 14:23) Jesu lyoonse wakali kujana ciindi cakupaila, andiswe tweelede kucita mbubwenya.—1 Petro 2:21.
7. Ino mbukkale buli buti ibweelede kutukulwaizya kupaila kuli Taateesu wakujulu abuzuba?
7 Iziindi izinji zyakupaila cakaumuumu zilajanika abuzuba, mbuli notusikilwa mapenzi, notusunkwa alimwi anotuyanda kusala. (Ba-Efeso 6:18) Notuyanda kusololelwa a Leza mumbazu zyoonse zyabuumi, icilongwe cesu masimpe ciyooyuma kapati. Ikuti naa bantu bobilo bamvwana basikilwa mapenzi, sena cilongwe ncobajisi taciyumi kapati? (Tusimpi 17:17) Icilongwe a Jehova ncotujisi cilayuma kapati notuyaama kuli Jehova akubona mbwatugwasya.—2 Makani 14:11.
8. Kwiinda mucikozyanyo ca Nehemiya, Jesu a Hana, ino ncinzi ncotwiiya kubulamfwu bwamipailo njotulipailila?
8 Elo kaka tulikkomenyi kujana kuti Leza tanaakabikka mpotweelede kugolela kupaila naa ziindi zyeelede kupaila! Nehemiya cakufwambaana wakapaila cakaumuumu katanalomba ncaakali kuyanda kumwami waku Persia. (Nehemiya 2:4, 5) Awalo Jesu wakapaila mupailo mufwaafwi naakali kulomba Jehova kuti amupe nguzu zyakubusya Lazaro kulufwu. (Johane 11:41, 42) Hana walo ‘wakapaila kwaciindi cilamfwu kuli Jehova’ naakali kwaamba zyakali mumoyo wakwe. (1 Samuele 1:12, 15, 16) Imipailo njotulipailila ilakonzya kuti kiili mifwaafwi naa milamfwu kweelana ancotuyanda naa bukkale mbotubede.
9. Ino nkaambo nzi mipailo ncoyeelede kubikkilizya kulumbaizya akulumba zyoonse Jehova nzyaakatucitila?
9 Mipailo minji mu Bbaibbele itondezya kulumba camoyo woonse akaambo kabusena busumpukide bwa Jehova amilimo yakwe iigambya. (Kulonga 15:1-19; 1 Makani 16:7-36; Intembauzyo 145) Mucilengaano, imwaapostolo Johane wakabona baalu ibali 24, imweelwe wa Banakristo bananike uuzulide mubusena bwakujulu kabatembaula Jehova kuti: “Nduwe uuelede, O Mwami, kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.” (Ciyubunuzyo 4:10, 11) Andiswe tulijisi kaambo kakumutembauda Mulengi lyoonse. Elo kaka bazyali balalumba imwanaabo nabalumba camoyo woonse akaambo kacintu cimwi ncobamucitila! Ikuyeeyesya iluse lwa Jehova alimwi akutondezya kulumba camoyo woonse akaambo kaluse oolo, ninzila imwi mbotu yakulomya mipailo yesu.
Ino Nkaambo nzi Ncokuyandika “Kukomba Cakutaleka”?
10. Ino mupailo ujisi mulimo nzi mukuyumya lusyomo lwesu?
10 Ikupaila lyoonse kulagwasya kulusyomo lwesu. Jesu naakamana kutondezya mbuli mbokuyandika ‘kukomba lyoonse akutalengaana,’ wakabuzya kuti: “Mwana a-Muntu aakuboola, sena uzoojana lusyomo ansi?” (Luka 18:1-8) Imipailo iipailwa cakusinizya alimwi camoyo woonse ilayumya lusyomo. Sinsiku Abrahamu naakacembala, pele kaciyandika kuti azyale mwana, wakaapailila makani aayo kuli Leza. Mukwiingula, Jehova cakusaanguna wakamwaambila kuti alange kujulu akubala nyenyezi ikuti naa wakali kukonzya. Eelyo Leza wakasyomezya Abrahamu kuti: “Mbubonya obo mbuluyooba lunyungu lwako.” Ino ncinzi cakatobela? Abrahamu “lusyomo lwakwe lwakeelezegwa mbuli bululami.” (Matalikilo 15:5, 6) Ikuti naa tulaamba zili mumoyo wesu kuli Jehova, kuzumina zisyomezyo zyakwe zili mu Bbaibbele alimwi akuzitobela, uyooluyumya lusyomo lwesu.
11. Ino mbuti mupailo mboukonzya kutugwasya kumana mapenzi?
11 Imupailo alimwi ulakonzya kutugwasya kulwana mapenzi. Sena buumi bwesu bwabuzuba abuzuba bulakatazya? Sena bukkale bwesu mbuyumu cakuti inga tamukonzyi kuliyumya? Ibbaibbele litwaambila kuti: “Bika makani aako oonse mumaanza aa-Jehova, lino ulakutabilila; lyoonse takooyoozuminina baluleme kuwida mumapenzi.” (Intembauzyo 55:22) Ikuti naa twasikilwa buyumuyumu mukusala, tulakonzya kwiiya cikozyanyo ca Jesu. Wakabucesya kapaila alikke naakali kuyanda kusala baapostolo bakwe ibali 12. (Luka 6:12-16) Alimwi masiku aayo katanafwa, Jesu wakapaila kapati cakunga “nkasaalo yakwe yakaba mbuli ma[d]osi aabulowa aalondaukila ansi.” (Luka 22:44) Ino ncinzi cakatobela? “Wakamvwigwa nkaambo wakali kuyoowa Leza.” (Ba-Hebrayo 5:7) Ikupaila kwesu cakuzumanana acakutaleka kuyootugwasya kuliyumya mubukkale buyumu alimwi amumasukusyo aakatazya.
12. Ino mbuti nzila yakusikila Jehova mumupailo mboitondezya kuti Jehova ulamuyanda umwi aumwi wesu?
12 Ikaambo akambi ikeelede kutupa kubamba cilongwe a Jehova kwiinda mumupailo nkakuti, awalo ulakonzya kubamba cilongwe andiswe. (Jakobo 4:8) Notwaamba zili mumoyo wesu kuli Jehova mumupailo, sena tatulimvwi kuti uliyandide kutugwasya nzyotuyanda akutulanganya kabotu? Swebo kutugama tulatambula luyando lwa Leza. Jehova kunyina naakapa mukuli kuli umbi iwakuswiilila mipailo yoonse iipailwa ababelesi bakwe kulinguwe kali ngo Wisi wabo wakujulu. (Intembauzyo 66:19, 20; Luka 11:2) Utwaambila kuti ‘nzyotulibilika zyoonse tuzibikke mumaanza aakwe nkaambo nguutulanganya.’—1 Petro 5:6, 7.
13, 14. Ino ntwaambo nzi ntotujisi tutupa kupaila cakutaleka?
13 Imupailo ulakonzya kutugwasya kuba basungu kapati mumulimo wakubuleya akutuyumya bantu nobatabikkili maano naa kukazyigwa nokukonzya kutupa kuti tulombozye kucileka. (Incito 4:23-31) Alimwi mupailo ulakonzya kutukwabilila “mumeneeno aa-Diabolosi.” (Ba-Efeso 6:11, 17, 18) Notusola kuliyumya mumasukusyo aabuzuba, tulakonzya kulomba Leza lyoonse kuti atuyumye. Imupailo wacikozyanyo wa Jesu ulabikkilizya akulomba Jehova kuti “[a]tuvune kumubi” Saatani Diabolosi.—Matayo 6:13.
14 Ikuti naa twazumanana kupailila lugwasyo lwakuti tucileke kulombozya kucita zibi, tulakonzya kulubona lugwasyo lwa Jehova. Tulijisi cisyomezyo eeci: “Leza wasyomeka, ikuti takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo, kuti mukabe alukolelo.” (1 Ba-Korinto 10:13) Mwaapostolo Paulo kumugama wakalibonena Jehova mbwagwasya mubukkale bwiindene-indene. Wakaamba kuti: “Zintu zyoonse buyo ndazikonzya nkaambo kanguzu nzimpedwe kuli-Kristo.”—Ba-Filipi 4:13; 2 Ba-Korinto 11:23-29.
Kamupaila Lyoonse Nokuba Kuti Mulalubizya
15. Ino ncinzi cikonzya kucitika ikuti kulilemeka kwesu tiikweendelana azyeelelo zya Leza?
15 Ikutegwa mipailo yesu imvwugwe kabotu, tatweelede kukaka lulayo luzwa mu Jwi lya Leza. Mwaapostolo Johane wakalemba kuti: “Coonse ncitukumbila kulinguwe tulacitambula, nkaambo tulabamba milazyo yakwe akucita ezyo zintu zibotezya kumeso aakwe.” (1 Johane 3:22) Pele, ino ncinzi cikonzya kucitika ikuti kulilemeka kwesu tiikweendelana azyeelelo zya Leza? Ba Adamu a Eva bakayuba nobakamana kubisya mumuunda wa Edeni. Andiswe tulakonzya kulombozya kuyuba “kumeso aa-Jehova” akucileka kupaila. (Matalikilo 3:8) Mulangizi weendeenda uujisi luzibo Klaus wakaamba kuti: “Ndabona kuti intaamu iitaluzi ziindi zinji iibwezegwa abaabo ibaleya kuli Jehova ambunga yakwe njakucileka kupaila.” (Ba-Hebrayo 2:1) Oobu mbwaakacita José Ángel. Uluula kuti: “Kwamyaka iitandila kulusele, tiindakali kupaila-paila kuli Jehova pe. Ndakali kulimvwa kuti tandeeleli kwaambaula anguwe pe, nokuba kuti ndakacili kumubona kuti ngo Taata wakujulu.”
16, 17. Amupe zikozyanyo mbuli mipailo yalyoonse mboikonzya kutugwasya kuzunda kukompama kumuuya.
16 Ibamwi balakonzya kulimvwa kuti tabeeleli kupaila akaambo kakukompama kumuuya naa akaambo kakupilukila kucibi alimwi. Pele, eeci nceciindi cibotu cakububelesya bubambe bwakupaila. Jona wakauccija mulimo ngwaakapedwe. Pele, ‘ciindi Jona naakapengede wakapaila kuli Jehova, eelyo wakamuvwiila. Naakali mwida lyanswi Jona wakoongolola, eelyo Jehova wakaswiilila jwi lyakwe.’ (Jona 2:2) Jona wakapaila, eelyo Jehova wakavwiila mupailo wakwe alimwi Jona wakapona kumuuya.
17 Awalo José Ángel wakapaila cakusinizya kulomba lugwasyo. Ulayeeya ategwa: “Ndakaamba zyakali mumoyo wangu akulomba kulekelelwa kuli Leza. Eelyo wakandigwasya. Tandisyomi kuti nindakajokela mukasimpe nikwatali lugwasyo lwamupailo. Lino ndilapaila lyoonse abuzuba alimwi ndilaciyandisya ciindi eeci cakupaila.” Lyoonse tweelede kwaanguluka kwaambila Leza zyakulubizya kwesu alimwi akulomba kulekelelwa anguwe cakulibombya. Mwami Davida naakalyaambilila zibi zyakwe, Jehova wakamulekelela. (Intembauzyo 32:3-5) Jehova uyanda kutugwasya, ikutali kutusulaika pe. (1 Johane 3:19, 20) Alimwi, imipailo yabaalu bamumbungano ilakonzya kutugwasya kumuuya nkaambo ilijisi “nguzu zinji loko.”—Jakobo 5:13-16.
18. Ino ndusinizyo nzi babelesi ba Leza ndobakonzya kuba andulo kufwumbwa naa balubizyide buti?
18 Sena kuli wisi uukonzya kukaka ciindi mwanaakwe musankwa cakulibombya naaboola kulinguwe kuzyikulomba lugwasyo alimwi alulayo naalubizya? Cikozyanyo camwana mutaka citondezya kuti, kufwumbwa naa tulubizyide buti, Taateesu wakujulu ulakkomana kuti naa twapilukila kulinguwe. (Luka 15:21, 22, 32) Jehova ulabakulwaizya boonse ibalubizya kuti bamwiite, “nkaambo nguuinda kulekelela.” (Isaya 55:6, 7) Nokuba kuti Davida wakacita zibi zinji zipati, wakapaila kuli Jehova kuti: “Cenjeka kutwi kwako kucikombyo cangu, O Leza; utayubi kukukumbila kwangu.” Alimwi wakati: “[Mangolezya] acifumofumo asikati njootongauka akutongela, lino [Jehova] uyooswiilila ijwi lyangu.” (Intembauzyo 55:1, 17) Elo kaka makani aaya alakatalusya!
19. Ino nkaambo nzi ncotuteelede kwaamba kuti imipailo ilibonya mbuli kuti tayiingulwi ncitondezyo cakutazuminwa a Leza?
19 Ino mbuti ikuti ncotupailila katutakonzyi kucitambula cakufwambaana? Aboobo, tweelede kubona kuti ncotulomba cileendelana akuyanda kwa Jehova alimwi calombwa kwiinda muzina lya Jesu. (Johane 16:23; 1 Johane 5:14) Sikwiiya Jakobo wakaamba Banakristo bamwi ibatakaingudwa mipailo yabo nkaambo ‘kukumbila kwabo tiikwakali kwamuciyanza cibotu.’ (Jakobo 4:3) Alimwi tatweelede kufwambaana kwaamba kuti imipailo iilibonya mbuli kuti tayiingulwi, ncitondezyo cakutazuminwa a Leza pe. Ziindi zimwi Jehova ulakonzya kuzumizya bakombi bakwe kupaila kwaciindi cili mbocibede katanaingula. Jesu wakati: “Amukumbile [cakuzumanana, eelyo] mulapegwa.” (Matayo 7:7) Aboobo, tuleelede “kujatisya kukomba.”—Ba-Roma 12:12.
Kamupaila Lyoonse
20, 21. (a) Ino nkaambo nzi ncotweelede kupaila cakutaleka “kumazuba [aaya] aakumamanino”? (b) Ino ncinzi ncotukonzya kutambula ikuti abuzuba katumusikila Jehova kucuuno cakwe caluzyalo?
20 Makatazyo alimwi amapenzi ayaabuvwula “kumazuba aakumamanino” aaya, aatondezyegwa a “ziindi zikataazya.” (2 Timoteo 3:1) Alimwi masukusyo alakonzya kutukopa mumizeezo. Nokuba boobo, mipailo yesu iipailwa cakutaleka iyootugwasya kweendela munzila yakumuuya nokuba kuti kuli mapenzi aazumanana, masunko alimwi akutyompwa. Mipailo njotupaila abuzuba kuli Jehova iyootupa nguzu nzyotuyandika.
21 Jehova ‘Sikuswiilila mupailo’ kunyina najisi bubi cakuti takonzyi kuswiilila mipailo yesu. (Intembauzyo 65:2) Tatweelede kujata bubi cakunga twaleka akupaila kulinguwe. Icilongwe cesu a Leza ncecintu ciyandika kapati ncotujisi. Tutacuubyi-ubyi pe. “Nkaambo kaako, atuswene cakutayoowa kucuuno caluzyalo, kuti tukatambule lweetelelo akujana luzyalo lutugwasya muciindi ncotubula.”—Ba-Hebrayo 4:16.
Ino Inga Mwaingula Buti?
• Ino ncinzi ncotukonzya kwiiya kuzwa kuli Daniele kujatikizya mbouyandika mupailo?
• Ino mbuti mbotukonzya kuyumya cilongwe cesu a Jehova?
• Ino nkaambo nzi ncotweelede kupaila cakutaleka?
• Ino nkaambo nzi ikulimvwa kuteelela ncokuteelede kutupa kuti tuleke kupaila kuli Jehova?
[Mibuzyo yaciiyo]
[Cifwanikiso icili apeeji 16]
Nehemiya wakapaila mupailo mufwaafwi cakaumuumu katanaamba makani aakwe kumwami
[Cifwanikiso icili apeeji 17]
Hana ‘wakapaila mupailo mulamfwu kuli Jehova’
[Zifwanikiso izili apeeji 18]
Jesu wakabucesya kapaila naakali kuyanda kusala baapostolo bakwe bali 12
[Zifwanikiso izili apeeji 20]
Ciindi cakupaila cilajanika mubuzuba boonse