Mibuzyo Yabasikubala

Ino caamba nzi ikuba “abuumi mulinguwe mwini”?

Ibbaibbele lyaamba kuti Jesu Kristo ulijisi “buumi mulinguwe mwini” alimwi abasikumutobela balijisi ‘buumi mulimbabo.’ (Johane 5:26; 6:53) Nokuba boobo, aaya magwalo obile taakozyenye pe.

Jesu wakati: “Mbubonya Taata mbwajisi buumi mulinguwe mwini, awalo Mwana wakamupa mbubonya, kuti abe abuumi mulinguwe mwini.” Katanaamba kaambo aaka kalibedelede, Jesu wakati: “Ncobeni ndamwaambila kasimpe, Oyo uumvwa ijwi lyangu, akumusyoma uwakandituma, uli abuumi ubutamani . . . Ciindi cilasika, ncencico cino, abafwide nobayoomvwa ijwi lya-Mwana a-Leza, abalo abalimvwa bayoopona.” Aawa Jesu wakali kwaamba nguzu zikankamanisya zyaakapegwa kuzwa kuli Wisi—inguzu zyakupa bantu kuti babe acilongwe cibotu a Leza. Ikuyungizya waawo, Jesu ulakonzya kubusya bantu bafwide akubapa buumi. Kuli Jesu, kuba “abuumi mulinguwe” caamba kuti wakapegwa nguzu eezyi. Mbubonya mbuli Wisi, Mwana awalo ulijisi ‘mulinguwe cipego cabuumi.’ (Johane 5:24-26) Ino mbuti basikumutobela bakwe?

Kakwiindide ciindi citandila kumwaka, Jesu wakaambila bakali kumuswiilila kuti: “Ncobeni ndamwaambila kasimpe, mwatalya mubili wa-Mwana a-Muntu, mwatanywa bulowa bwakwe, tamukwe buumi mulindinywe. Oyo uulya mubili wangu, akunywa bulowa bwangu uli abuumi ubutamani, alimwi ndiyoomubusya kubuzuba bwakumamanino.” (Johane 6:53, 54) Aawa Jesu wakeelanya ikuba “[a]buumi mulindinywe” kukuba “abuumi ubutamani.” Itwaambo tukozyenye akakuti ikuba “[a]buumi mulindinywe” tulajanika mu Magwalo aambi aa Cigiliki. Izikozyanyo zyobile motujanika twaambo zyeezyi: “Amube amunyo mulindinywe” alimwi akakuti “kabatambula mumibili yabo beni cilumbo ceelede.” (Marko 9:50; Ba-Roma 1:27) Muciimo cili boobu, itwaambo ootu tatwaambi inguzu zyakupa bamwi munyo naa kupa muntu uumwi cilumbo. Muciindi caboobo, oobu mbuumi buzwide. Aboobo, ikaambo kakuti ikuba “[a]buumi mulindinywe” kakabelesyegwa kuli Johane 6:53 kaamba kuba abuumi bwini-bwini.

Naakali kwaamba kuti basikumutobela balijisi buumi mulimbabo, Jesu wakali kwaamba mubili wakwe alimwi abulowa bwakwe. Kumbele Imulalilo wa Mwami nowakatalisyigwa, Jesu alimwi wakaamba kujatikizya mubili alimwi abulowa bwakwe. Wakaambila basikumutobela aabo bamucizuminano cipya kuti balye citondezyo cacinkwa citakwe bumena alimwi awaini. Sena eeci caamba kuti balikke bananike Banakristo ibali mucizuminano cipya a Jehova Leza mbabanjila mubuumi bwini-bwini oobo? Peepe. Ikucitika kwatwaambo ootu tobile kuliindene amwaka omwe. Aabo ibakamvwa majwi aa Jesu aalembedwe kuli Johane 6:53, 54, tiibakazyi zyakusekelela pobwe lyaamwaka azitondezyo ziiminina mubili wa Kristo alimwi abulowa.

Ikweelana abbuku lya Johane caandaano 6, ikusaanguna Jesu wakeelanya mubili wakwe amana, wakati: ‘Bamauso bakalya Mana munkanda,  pele bakafwa. Njeeyi nsima iizwa kujulu, ikuti muntu wiilya takooyoofwa pe. Ndime nsima yabuumi iyakazwa kujulu, naa muntu wiilya nsima eeyi unooli muumi lyoonse.’ Imubili wa Jesu alimwi abulowa bwakwe, bwakalijisi nguzu kwiinda mana kwaagama. Munzila nzi? Munzila yakuti, imubili wakwe wakuupa “kuti inyika ibe abuumi,” ikupa buumi butamani kuti bukonzyeke. * Aboobo, ikaambo kakuti mube “[a]buumi mulindinywe” kali kubbuku lya Johane 6:53 kaamba boonse aabo bayootambula buumi butamani kujulu naa anyika.—Johane 6:48-51.

Ino ndilili basikumutobela ba Kristo nobatambula buumi mulimbabo naa kuba abuumi bwini-bwini? Kubananike ibayooba basikulelanyina mu Bwami, eeci cilacitika ciindi nobabusyigwa kuya kujulu kabali zilenge zitafwiki. (1 Ba-Korinto 15:52, 53; 1 Johane 3:2) ‘Imbelele zimwi’ zya Jesu ziyooba abuumi bwini-bwini kumamanino aa Bulelo bwakwe bwa Myaka iili Cuulu. Kuciindi eeco banooli basunkwa, basyomeka alimwi akubonwa kuti mbalulami kukabe kutamani munyika ya Paradaiso.—Johane 10:16; Ciyubunuzyo 20:5, 7-10.

Bupanduluzi buyungizidwe

[Zifwanikiso izili apeeji 9]

Banakristo boonse bakasimpe balakonzya kuba ‘abuumi mulimbabo’