Bamakaintu Bakakkomanisya Jehova

“Jehova akupe coolwe nkaambo kamilimo yako, ukatambule bulumbu buzulide kuzwa kumaanza aa-Jehova.”—RUTE 2:12.

1, 2. Ino mbuti mbotukonzya kugwasyigwa kwiinda mukuzinzibala kuyeeya zikozyanyo zyamu Bbaibbele izyabamakaintu ibakakkomanisya Jehova?

IKUYOOWA Leza kwakapa kuti bamakaintu bobilo baunduluzye zyakaamba Farao. Ilusyomo lwakapa kuti mukaintu sibwaamu abikke buumi bwakwe muntenda ikutegwa akwabilile bana Israyeli bobilo basikutwela. Nokwakabuka mapenzi, maano alimwi akulibombya zyakapa kuti mukaintu afwutule bantu banji akulesya munanike wa Jehova kuti abe amulandu wakutila bulowa. Ikusyoma Jehova Leza kubikkilizya akusamausya zyakapa kuti mutumbu mukamufwu asombe musinsimi wa Leza icakulya cakwe camamanino. Eezi nzezikozyanyo zimwi zyamu Magwalo zyabamakaintu ibakakkomanisya Jehova.

² Jehova mbwaakali kubabona bamakaintu aaba abulumbu mbwaakabapa zitondezya kuti cimukkomanisya kapati mbube bwakumuuya, bwalo ibuyandika kapati kwiinda kuba musankwa naa musimbi. Mazubaano, ikubikka ambele zintu zyakumuuya cilakatazya kapati akaambo kakuti bantu bajisi bubi kuyandaula zintu zyakumubili mbuli zyakusama alubono. Pele kubikka ambele zintu zyakumuuya cilakonzyeka kweelana ambuli bamakaintu banji ibayoowa Leza ibali ncecibeela cipati cabantu ba Leza sunu mbobatondezya. Bamakaintu aaba baiya lusyomo, kubelesya maano, kusamausya abube bubotu kapati bwakatondezyegwa abamakaintu bayoowa Leza baambwa mu Bbaibbele. Masimpe, abalo Banakristo baalumi balayanda kwiiya bube bwakatondezyegwa abamakaintu bansiku ibajisi cikozyanyo cibotu. Ikutegwa tutondezye mbotukonzya kucita boobo cakumaninina, atwaalange-lange makani oonse aali muzibalo zyamu Bbaibbele aamba bamakaintu ibaambwa kumatalikilo.—Ba-Roma 15:4; Jakobo 4:8.

Bamakaintu Bakaunduluzya Zyakaamba Farao

3, 4. (a) Ino nkaambo nzi ba Sifra a Puwa ncobatakaswiilida malailile aa Farao aakuti bana bavwanda basankwa babana Israyeli boonse kabajaigwa? (b) Ino Jehova wakabapa buti bulumbu basikutumbusya bobilo akaambo kabusicamba alimwi akuyoowa Leza kwabo?

³ Mulubeta lwakacitilwa ku Nuremberg mu Germany noyakamana nkondo Yanyika Yabili, ibunji bwabaabo ibakajaninwa mulandu mupati akaambo kakujaya bantu banji, bakasoleka kulitamizya kuti bakacita oobo akaambo kakuti bakali kutobela buyo malailile ngobakapedwe. Lino amukozyanisye bantu aaba kuli bamakaintu bana Israyeli bobilo basikutumbusya, nkokuti Sifra a Puwa, ibakali kupona mu Egepita yansiku mubulelo bwa Farao silunya uutaambidwe zina. Akaambo kakuyoowa mbobakali kuyaabuvwula bana Hebrayo, Farao ooyu wakaambila basikutumbusya bobilo kuti kabajaya bana bavwanda babana Hebrayo basankwa. Ino bamakaintu aaba bakacita buti kumalailile aaya mabyaabi? “Teebakacita mwami wa-Egepita mbwaakabalailila, bakali kufutusya balombe.” Ino ncinzi cakapa kuti bamakaintu aaba batayoowi muntunsi? Nkaambo kakuti “bakayoowa Leza.”—Kulonga 1:15, 17; Matalikilo 9:6.

⁴ Masimpe, basikutumbusya aaba bakayubila muli Jehova, eelyo wakaba “ntobo” yabo, wakabakwabilila kubukali bwa Farao. (2 Samuele 22:31; Kulonga 1:18-20) Pele, bulumbu bwabo kuzwa kuli Jehova tiibwakamanina waawa pe. Wakabapa bulumbu ba Sifra a Puwa kwiinda mukupa kuti babe amikwasyi iibagemi. Mane wakabalemeka bamakaintu aaba kwiinda mukupa kuti mazinaabo amilimo yabo zilembwe mu Jwi lyakwe lyakasololelwa amuuya kutegwa zikabalwe amazyalani aakumbele, kakuli izina lya Farao ooyo taliciyeeyegwi  naaceya.—Kulonga 1:21; 1 Samuele 2:30b; Tusimpi 10:7.

5. Ino mbuti bamakaintu Banakristo basunu mbobatondezya ciimo cikozyenyi aca Sifra a Puwa, alimwi ino mbuti Jehova mbwabapa bulumbu?

⁵ Sena sunu kuli bamakaintu ibali mbuli Sifra a Puwa? Inzya buya nkobali! Amwaka, bamakaintu banji ibali boobo cakutayoowa balakambauka mulumbe wamu Bbaibbele uufwutula muzisi ‘malailile aamwami’ mwaakasya kucita boobo. Eelyo balalibikka muntenda. (Ba-Hebrayo 11:23; Incito 5:28, 29) Akaambo kaluyando ndobajisi kuli Jehova akuli basimukobonyina, bamakaintu aaba basicamba kunyina ngobazumizya kubalesya kwaambila bamwi makani mabotu aa Bwami bwa Leza. Aboobo, bunji bwabamakaintu Banakristo balakazyigwa akupenzyegwa. (Marko 12:30, 31; 13:9-13) Mbubwenya mbuli Sifra a Puwa, Jehova uliizi kapati milimo yabamakaintu aaba bali kabotu alimwi ibasicamba. Aboobo uyootondezya kuti ulabayanda kwiinda mukwaayobola mazina aabo “mubbuku [lyakwe] lyabuumi,” ikuti naa baliyumya cakusyomeka kusikila kumamanino.—Ba-Filipi 4:3; Matayo 24:13.

Iwakali Sibwaamu Wakkomanisya Jehova

6, 7. (a) Ino ncinzi Rahabu ncaakazi kujatikizya Jehova abantu bakwe, alimwi ino mbuti luzibo oolu mbolwakamujatikizya? (b) Ino mbuti Rahabu mbwalemekwa mu Jwi lya Leza?

⁶ Mumwaka wa 1473 B.C.E., kwakali mukaintu uujisi zina lya Rahabu iwakali kukkala mumunzi wa Jeriko waba Kanana. Kakunyina kudooneka, Rahabu wakalijisi luzibo kapati mumakani aaya. Basikutwela bana Israyeli bobilo nobakayubila muŋanda yakwe, wakakonzya kuluula makani woonse aagaminide aa Kulonga kwabana Israyeli kuzwa ku Egepita munzila yamaleele, nokuba kuti eeci cakali citikide myaka iili 40 musyule! Alimwi wakalaazi kabotu makani akazwide kucitika aajatikizya bana Israyeli mbobakazunda Bami ba Amori ba Sihoni a Ogi. Amubone kuziba makani aaya mbokwakamujatikizya Rahabu. Mboobu mbwaakabaambila basikutwela: “Ndizi kuti Jehova wamupa nyika, . . . nkaambo Jehova Leza wanu ngu-Leza wakujulu awaansi ano.” (Joshua 2:1, 9-11) Masimpe, Rahabu nzyaakaiya kujatikizya Jehova alimwi amilimo njaakacitila bana Israyeli zyakapa moyo wakwe kuti uzumine, eelyo wakamusyoma Jehova.—Ba-Roma 10:10.

⁷ Ilusyomo lwa Rahabu lwakapa kuti abweze ntaamo. Wakabatambula basikutwela bana Israyeli “akubakazika kabotu muŋanda yakwe.” Alimwi wakaatobela malailile aabo aakufwutukila bana Israyeli nobakalwana munzi  wa Jeriko. (Ba-Hebrayo 11:31; Joshua 2:18-21) Tacidoonekwi buya kuti milimo ya Rahabu akaambo kalusyomo lwakwe yakamukkomanisya Jehova, nkaambo wakaambila sikwiiya Munakristo Jakobo kwiinda mumuuya kuti izina lyakwe alibikke munsi-munsi alya Abrahamu mulongwe wa Leza kacili citondezyo cakuti Banakristo baiye. Jakobo wakalemba kuti: “Mbubonya obo alakwe Rahab[u] sibwaamu sa teewakalulamikwa kumilimo awo naakasamausya batumwa akubapilula kunzila imbi?”—Jakobo 2:25.

8. Ino mbuti Jehova mbwaakamulongezya Rahabu akaambo kalusyomo akuswiilila kwakwe?

⁸ Jehova wakamupa bulumbu Rahabu munzila zinji kapati. Ikusaanguna, wakamufwutula camaleele abaabo ibakayubila muŋanda yakwe, nkokuti “luzubo lwawisi, aboonse mbaakali abo.” Eelyo wakabazumizya aaba kuti bakkale “akati kaba-Israyeli,” akulelwa mbuli bantu banyezi.” (Joshua 2:13; 6:22-25; Levitiko 19:33, 34) Pele tacili cilikke eeci pe. Alimwi Jehova wakamulemeka Rahabu kwiinda mukupa kuti abe umwi wabamakaapanyina Jesu Kristo. Ooku kwakali kutondezya luzyalo kapati kumukaintu muna Kanana iwakali kukomba mituni kaindi. *—Intembauzyo 130:3, 4.

9. Ino mbuti mbwaakalimvwa Jehova kuli Rahabu akuli bamakaintu bamwi Banakristo bamumwaanda wamyaka wakusaanguna mbokukulwaizya bamakaintu bamwi sunu?

⁹ Mbubwenya mbuli bwakacita Rahabu, bamakaintu bamwi Banakristo, kuzwa mumwaanda wamyaka wakusaanguna kusikila sunu, babuleka bukkale bubyaabi ikutegwa bamukkomanisye Leza. (1 Ba-Korinto 6:9-11) Kakunyina kudooneka, ibamwi bakakomenena mubukkale bweelene abwamu Kanana yansiku mwalo kutalilemeka mokwakadumide, mane buya bakali kukubona kuti mbwiikkalwa nyika. Pele, bakacinca bukkale bwabo akaambo kakukulwaizyigwa alusyomo luyeeme aluzibo lwini-lwini lwamu Magwalo. (Ba-Roma 10:17) Aboobo kujatikizya bamakaintu aaba, tulakonzya kwaamba kuti ‘Leza tausi insoni yakwaambwa kuti ngo Leza wabo.’ (Ba-Hebrayo 11:16) Masimpe eeci ncoolwe!

Imukaintu Wakalongezyegwa Akaambo Kamaano

10, 11. Ino mbukkale buli buti ibujatikizya Nabala a Davida ibwakapa kuti Abigayeli abweze ntaamo?

¹⁰ Bamakaintu banji bansiku bakaabelesya maano munzila mbotu, calo cakabapa kuti bayandike kapati kubantu ba Jehova. Umwi wabamakaintu aaba ngu Abigayeli, imukaintu wa Nabala muna Israyeli umwi uuvwubide kapati wakajisi cibeela canyika cimwi. Ikubelesya maano kwa Abigayeli kwakafwutula bantu alimwi wakalesya Davida, iwakali kuzooba mwami wa Israyeli kuti atabi amulandu wakutila bulowa. Tulakonzya kucibala cibalo cijatikizya Abigayeli icilembedwe kubbuku lya 1 Samuele caandaano 25.

¹¹ Kumatalikilo kwamakani aaya, Davida abatobeli bakwe baliyakide zivwuka afwaafwi amatanga aambelele aa Nabala, alo ngobakwabilila masikati amasiku kakunyina kubbadalwa akaambo kaluzyalo ndobajisi kumunyina muna Israyeli Nabala. Izyakulya zya Davida nozyaceya, watuma balombwana ibali 10 kuti bakalinge cakulya kuli Nabala. Eeci nceciindi cakuti Nabala alumbe akulemeka Davida munanike wa Jehova. Pele Nabala  wacita cintu ciindene aceeci. Akaambo kabukali, wamutukila Davida akubapilusya balombwana aaba cinkwamaanza. Davida naamvwa makani aaya, wabunganya balombwana bajisi zilwanyo ibali 400 akutalika kweenda kuti akapilusye cizyole kuli Nabala. Abigayeli naaziba kuti mulumaakwe zintu wazyeendelezya calunya, wabweza ntaamo cakufwambaana akucita camaano kutegwa akkomanisye Davida kwiinda mukumubambila cakulya akaambo kabwaabi bwakwe. Eelyo wacitola lwakwe kuli Davida.—Tupango 2-20.

12, 13. (a) Ino mbuti Abigayeli mbwaakabelesya maano alimwi akusyomeka kuli Jehova akumunanike wakwe? (b) Ino ncinzi Abigayeli ncaakacita naakapilukila kuŋanda, alimwi ino zintu zyakamweendela buti?

¹² Abigayeli nobaswaangana a Davida, ikulomba cakulibombya kuti afwidwe luse kwatondezya bulemu bupati mbwajisi kumunanike wa Jehova. Wakati: “Jehova ulayakila mwami wangu iŋanda iimvwi nji, nkaambo mwami ulalwana inkondo zya-Jehova,” akuyungizya kuti Jehova uyoolailila kuti Davida abe ngomusololeli wa Israyeli. (Tupango 28-30) Alimwi, Abigayeli wakatondezya busicamba buli mbobubede kwiinda mukwaambila Davida kuti, ikuti naa atalyeendelezyi mukujolela kwakwe, kuyoomuletela mulandu wakutila bulowa. (Tupango 26, 31) Davida wagwasyigwa kuti ayeeye kabotu akaambo kakulibombya, bulemu alimwi akuyeeya kabotu kwa Abigayeli. Waamba kuti: “Alumbwe Jehova Leza wa-Israyeli! Nguwe wakutuma sunu kuzoondicinga. Bulumbwe busongo bwako, ayebo omwini ulumbwe, nkaambo nduwe wandikasya sunu kutila bulowa.”—Tupango 32, 33.

¹³ Naajokela kuŋanda, cabusicamba Abigayeli uyanda kuti amuzibye mulumaakwe zyacipego ncaapa Davida. Nokuba boobo, wamujana ‘kakoledwe kapati.’ Aboobo walindila kutegwa akololokwe, mpoonya amwaambile. Ino Nabala wacita buti? Wagonkelwa cakunga waba mbuli muntu uuciswa bulwazi bwakulebukilwa mubili. Nokwainda mazuba aali 10, wajaigwa anguzu zya Leza. Davida naaziba kuti Nabala wafwa, watalika kukanazya Abigayeli, walo kakunyina kudooneka ngwalombozya akulemeka kapati. Abigayeli wamuzumina Davida.—Tupango 34-42.

Sena Mulakonzya Kuba Mbuli Abigayeli?

14. Ino mbube nzi ibwa Abigayeli mbotukonzya kulombozya ikusumpula kapati?

¹⁴ Sena kuli bube mbomwabona muli Abigayeli nywebo nobaalumi kubikkilizya abamakaintu mbomuyanda kuti mubusumpule kapati? Ambweni mulombozya kucita zintu camaano nokwasika mapenzi. Antela muyandika kwaambaula cakubomba alimwi cabulemu ikuti naa bantu mbomuli limwi banyema kapati. Ikuti kakuli boobo, sena tamukonzyi kwaapailila makani aaya kuli Jehova? Usyomezya kuti uyoopa busongo, bupampu alimwi akuyeeya kabotu kuli baabo boonse ‘ibakumbila calusyomo.’—Jakobo 1:5, 6; Tusimpi 2:1-6, 10, 11.

15. Ino muubukkale buli buti ikapati bamakaintu Banakristo mobayandika kutondezya bube bwakatondezya Abigayeli?

¹⁵ Ibube bubotu boobu bulayandika kapati kumukaintu uukwetwe kumulumi uutasyomi walo uutabikkili maano kapati naa utatobeli buya njiisyo zyamu Bbaibbele. Ambweni ulanywa cakuzwa munzila. Tulangila kuti ibaalumi bali boobu bayoocinca bukkale bwabo. Ibanji mbubacita oobo, iziindi zinji akaambo kakuti bamakaintu babo mbabombe, balijisi bulemu kapati alimwi balalilemeka kabotu.—1 Petro 3:1, 2, 4.

16. Kufwumbwa naa bukkale buli buti kuŋanda, ino mbuti mucizi Munakristo mbwanga watondezya kuti ulabikkila maano kucilongwe ncajisi kuli Jehova kwiinda zintu zyoonse?

¹⁶ Kufwumbwa naa ndipenzi nzi ndyomujisi kuŋanda, muleelede kuyeeya kuti Jehova lyoonse nkwali kutegwa amugwasye. (1 Petro 3:12) Aboobo amusoleke kuyuma kumuuya. Amupailile busongo akukkazika moyo. Ee, amubambe cilongwe a Jehova kwiinda mukuliyiisya Bbaibbele, kupaila, kuzinzibala kuyeeya alimwi akuyanzana a Banakristoma lyoonse. Iluyando Abigayeli ndwaakajisi kuli Leza alimwi aciimo cakwe kumubelesi wakwe munanike tiicakanyonganizyigwa ambwaakali kuzibona zintu zyakumuuya mulumaakwe pe. Wakacita zintu akaambo kanjiisyo ziluleme. Nomuba mumukwasyi imulumi mwajisi citondezyo cibotu kali mubelesi wa Leza, imukaintu Munakristo weelede kuyeeya kuti uyandika kuzumanana kubeleka canguzu kutegwa  akonzye kusima kumuuya. Masimpe, mulumi ulijisi mukuli wamu Magwalo wakumugwasya kumuuya akumubili, pele uyandika kuyuma kutegwa akalijanine “lufutuko lwa[kwe] cakuyoowa acakuzyangama.”—Ba-Filipi 2:12; 1 Timoteo 5:8.

Mukaintu Wakatambula “Cilumbo Camutumwa wa Leza”

17, 18. (a) Ino mmusunko nzi walusyomo uulibedelede wakasikila mukamufwu waku Zarefati? (b) Ino mukamufwu wakacita buti kukulomba kwa Eliya, alimwi ino mbuti Jehova mbwaakamupa bulumbu?

¹⁷ Jehova mbwaakamucitila mukamufwu mucete mumazuba aamusinsimi Eliya citondezya kuti ulabayandisya kapati aabo ibatola ambele bukombi bwakasimpe kwiinda mukulyaaba akupa lubono lwabo. Akaambo kaciyumayuma cakatola ciindi cilamfwu mumazuba akali kupona Eliya, inzala yakabakola bantu banji, kubikkilizya amukamufwu amwanaakwe musankwa ibakali kukkala ku Zarefati. Ciindi nokwakacaala buyo cakulya camamanino, kwakabbuka mweenzu, imusinsimi Eliya. Wakalomba cintu catakali kuyeeyelwa pe. Nokuba kuti wakalizi penzi lyamukaintu ooyu, wakamulomba kuti amujikile “kasima kasyoonto” abelesye tusu atufwuta twamamanino. Pele wakayungizya kuti: “Nkaambo mbuboobu mbwaamba Jehova Leza wa-Israyeli. Cinkuli cabusu tacikooyoomana, ayalo insazi yamafuta taikooyooyuminina, mane kusikila kubuzuba obo Jehova mbwati wisye imvula anyika.”—1 Bami 17:8-14.

¹⁸ Ino nywebo nomwakacita buti kukulomba ooko kukatazyide? Mukamufwu waku Zarefati kakunyina kudooneka naakaziba kuti Eliya mmusinsimi wa Jehova, “wakaakucita mbubonya mbuli Eliya mbwaakalailila.” Ino Jehova wakacita buti akaambo kakusamausya kwakwe? Wakapa cakulya munzila yamaleele kumukaintu amwanaakwe akuli Eliya muciindi eeco caciyumayuma. (1 Bami 17:15, 16) Masimpe, Jehova wakapa mukamufwu waku Zarefati “cilumbo camutumwa wa Leza,” nokuba kuti tanaakali muna Israyeli. (Mateyo 10:41, Ci) Imwanaa Leza awalo wakamulumbaizya mukamufwu ooyu naakamwaamba kali cikozyanyo cibotu kumbele lyabantu batasyomi ibamumunzi wakwe wa Nazareta.—Luka 4:24-26.

19. Ino muunzila nzi bamakaintu banji Banakristo sunu mobatondezya muuya wamukamufwu waku Zarefati, alimwi ino mbuti Jehova mbwalimvwa kulimbabo?

¹⁹ Mazubaano, bamakaintu banji Banakristo balatondezya muuya uuli mbuli wamukamufwu waku Zarefati. Mucikozyanyo, ansondo ibacizi baabi Banakristo, ibunji bwabo mbacete alimwi balijisi mikwasyi yakulanganya, balabasamausya balangizi beendeenda abamakaintu babo. Ibamwi balalya cakulya antoomwe ababelesi ibali mumulimo waciindi coonse, balagwasya bapengede naa kulyaaba buya lwabo munzila imwi nokuba kupa lubono lwabo mukutola ambele mulimo wa Bwami. (Luka 21:4) Sena Jehova ulakubikkila maano kulyaaba ooku? Inzya! “Leza tali sikampenda, takonzya kuluba  milimo yanu akuyanda nkomwatondezya nkaambo kezina lyakwe, mbomwakabelekela basalala, asunu mucibabelekela.”—Ba-Hebrayo 6:10.

20. Ino ncinzi ciyoolangwa-langwa mucibalo citobela?

²⁰ Mumwaanda wamyaka wakusaanguna, bamakaintu banji bayoowa Leza bakalijisi coolwe cakukutaukila Jesu abaapostolo bakwe. Mucibalo citobela, tuyoobandika mbuli bamakaintu aaba mbobakakkomanisya Jehova, alimwi tuyoolanga-langa cikozyanyo cabamakaintu basunu balo ibabelekela Jehova camoyo woonse, nomuba mubukkale bukatazya.

Bupanduluzi buyungizidwe

Kwiinduluka

• Ino mbuti bamakaintu aaba mbobakakkomanisya Jehova?

• Sifra a Puwa

• Rahabu

• Abigayeli

• Mukamufwu waku Zarefati

• Ino mbuti kuzinzibala kuyeeya zikozyanyo zyabamakaintu aaba mbokukonzya kutugwasya swebo kutugama? Amupe cikozyanyo.

[Mibuzyo yaciiyo]

[Zifwanikiso izili apeeji 23]

Bamakaintu banji ibasyomeka bamubelekela Leza nokuba kuti ‘mulawo wamwami ulakasya’

[Cifwanikiso icili apeeji 24]

Ino nkaambo nzi Rahabu ncali cikozyanyo cibotu camuntu uujisi lusyomo?

[Cifwanikiso icili apeeji 24]

Ino mbube nzi bwakatondezyegwa a Abigayeli mbomuyanda kuti mwiiye?

[Cifwanikiso icili apeeji 26]

Bamakaintu banji Banakristo sunu balatondezya muuya wakatondezyegwa amukamufwu waku Zarefati