Bupati Bwa Jehova Tabumvwigwi
Bupati Bwa Jehova Tabumvwigwi
“Jehova mupati, uleelede kutembaulwa loko; bupati bwakwe tabumvwigwi.”—INTEMBAUZYO 145:3.
1, 2. Ino Davida wakali muntu uuli buti, alimwi wakali kulibona buti alyeezyanya a Leza?
MULEMBI wa Intembauzyo 145 ngumwi wabantu bazyibidwe kapati mumakani aakaindi. Naakali mulombe, wakalwana amubbabbani ooyo ngwaakajaya. Alimwi kali mwami silumamba, sintembauzyo ooyu wakazunda basinkondonyina banji. Izina lyakwe ngu Davida, alimwi wakali mwami wabili mu Israyeli yansiku. Impuwo ya Davida yakazumanana nociba ciindi naakafwa, cakuti noliba sunu bantu banji kuli makani ngobazyi aajatikizya nguwe.
2 Nokuba kuti Davida wakazwidilila, wakali muntu uulicesya. Kaamba Jehova, wakaimba kuti: “Nembona majulu aako, milimo yaminwe yako, mwezi anyenyeezi nzowakalenga! Ino muntu ncinzi nowamwiibaluka? Amwana amuntu ncinzi, nomuswaya?” (Intembauzyo 8:3, 4) Muciindi cakuyeeya kuti wakali mupati, Davida wakagamika bulemu kuli Jehova kuti ngowakamuvwuna kuli basinkondonyina boonse. Alimwi kujatikizya Leza wakati: “Wandipa intobo yalufwutuko lwako. Kulibombya kwako kwandisumpula.” (2 Samuele 22:1, 2, 36) Jehova ulatondezya kulicesya kwiinda mukubafwida luse basizibi, alimwi Davida wakalumba kuluzyalo oolu lwa Leza.
‘Njootembaula Leza Mwami’
3. (a) Ino nguni Davida ngwaakali kubona kuba mwami wa Israyeli? (b) Ino nkulombozya kuli buti Davida nkwaakajisi kwakutembaula Jehova?
3 Nokuba kuti Davida wakali mwami wakabikkidwe a Leza, wakali kubona Jehova kuba Mwami wini-wini wa Israyeli. Davida wakati: “Bwami mbobwako, O Jehova, alimwi nduwe nosumpwidwe mbuli simutwe waboonse.” (1 Makani 29:11) Masimpe Davida wakalijisi bulemu kapati kuli Leza mbwali Muleli! Wakaimba kuti: “Njookutembaula, O Leza Mwami wangu; njoolumba izina lyako lyoonse alyoonse. Mazuba oonse njookulumba; njootembaula izina lyako lyoonse alyoonse.” (Intembauzyo 145:1, 2) Kwakali kulombozya kwa Davida ikutembaula Jehova Leza buzuba boonse mane kukabe kutamani.
4. Ibbuku lya Intembauzyo 145 liyubununa twaambo nzi twakubeja?
4 Ibbuku lya Intembauzyo 145 lilijisi bwiinguzi buzwide kukutaminina kwa Saatani kuti Leza muleli uuliyanda uutapi zilenge zyakwe lwaanguluko. (Matalikilo 3:1-5) Alimwi intembauzyo eeyi ilayubununa bubeji bwa Saatani bwakuti aabo ibamvwida Leza balacita oobo akaambo buyo kabubotu mbobajana kulinguwe, ikutali kuti balamuyanda Leza. (Jobu 1:9-11; 2:4, 5) Mbuli Davida, Banakristo beni-beni mazubaano balimukupa bwiinguzi kububeji bwa Saatani. Balalumba kubulangizi bwabo bwabuumi butamani mubulelo bwa Bwami nkaambo balombozya kutembaula Jehova kukabe kutamani. Banji bakatalika kale kucita oobo kwiinda mukutondezya lusyomo mucinunuzyo cacipaizyo ca Jesu akwiinda mukumubelekela Jehova cakulibombya akaambo kaluyando ndobajisi kabali bakombi bakwe balyaabide akubbapatizyigwa.—Ba-Roma 5:8; 1 Johane 5:3.
5, 6. Ino nzyoolwe nzi ziliko zyakulumba akutembaula Jehova?
5 Amuyeeye buyo zyoolwe zinji nzyotujisi zyakulumba akutembaula Jehova katuli babelesi bakwe. Tulakonzya kucita oobo mumupailo eelyo naatunjila mumoyo makani aamwi ngotwabala mu Jwi lyakwe, Ibbaibbele. Ikumutembaula cakubotelwa alimwi akulumba zilakonzya kutondezyegwa notwakulwaizyigwa anzila Leza njeendelezya bantu bakwe naa notwakkomana kapati akaambo kacibeela cimwi cabubumbo bwakwe butaliboteli kapati. Alimwi tulamutembaula Jehova Leza notubandika makanze aakwe abasyomima kumiswaangano ya Bunakristo naa notubandika ambabo kumbi buyo. Alimwi buya, ‘milimo mibotu’ yoonse iicitwa kububotu bwa Bwami bwa Leza ilamutembaula Jehova.—Matayo 5:16.
6 Zikozyanyo zyalino-lino zyamilimo eeyo mibotu zibikkilizya kuyaka maanda manji bantu ba Jehova mobakombela mumasi imuli bucete kapati. Bunji bwamilimo eeyi yabelekwa kwiinda mulugwasyo lwamali aazwa kubasyomima mumasi aambi. Banakristo bamwi balapa lugwasyo kwiinda mukulyaaba kuunka kumasena aaya kutegwa bakatole lubazu mukuyaka Maanda aa Bwami. Alimwi mulimo mupati wiinda milimo mibotu yoonse ngwakutembaula Jehova kwiinda mukukambauka makani mabotu aa Bwami bwakwe. (Matayo 24:14) Kweelana ambotutondezya tupango tumbi ku Intembauzyo 145, Davida wakabulumba kapati bweendelezi bwa Leza alimwi wakatembaula bwami Bwakwe. (Intembauzyo 145:11, 12) Sena andinywe mulabulumba bweendelezi bwa Leza bwaluyando? Alimwi sena lyoonse mulabaambila bamwi zya Bwami bwakwe?
Zikozyanyo Zitondezya Bupati bwa Leza
7. Amupe kaambo kapati kakulwaizya kutembaula Jehova.
7 Ibbuku lya Intembauzyo 145:3 lilapa kaambo kapati katukulwaizya kutembaula Jehova. Davida waimba kuti: “Jehova mupati, uleelede kutembaulwa loko; bupati bwakwe tabumvwigwi.” Bupati bwa Jehova tabugoli. Tabukonzyi kumvwigwa kabotu-kabotu, kuzibwa antela kweelekwa abantu. Pele lino tulagwasyigwa kwiinda mukulanga-langa zikozyanyo zitondezya bupati bwa Jehova butamvwigwi.
8. Ino ncinzi ncoliyubununa julu kujatikizya bupati alimwi anguzu zya Jehova?
8 Amusole kuyeeya ciindi cimwi nomwakazwa muŋanda yanu akuya anze eelyo kakunyina mwezi wakali kubala alimwi nomwakalanga mujulu masiku kakunyina makumbi. Sena tiimwakagambwa kubona nyenyeezi zitalivwulili mumudima mujulu? Sena tiimwakakulwaizyigwa kutembaula Jehova akaambo kabupati bwakwe mukulenga zintu zyoonse eezyo zyamujulu? Pele, nzyomwakabona kakali kabeela buyo kasyoonto kamweelwe woonse wanyenyeezi zili mumulalabungu oomo nyika moibede. Kuyungizya waawo, kweezyeezyegwa kuti kuli myaanda yatuulunzuma twiinda kumwaanda twamilalabungu, alimwi milalabungu buyo yotatwe iikonzya kubonwa kakunyina kubelesya muncini wakubonya zintu zili kule. Masimpe, nyenyeezi alimwi amilalabungu iitabaliki zijanika mujulu litalikomeneni zipa bumboni bwanguzu zyakulenga zya Jehova alimwi abupati butamvwigwi.—Isaya 40:26.
9, 10. (a) Ino nimbazu zili zyabupati bwa Jehova zyakatondezyegwa kujatikizya Jesu Kristo? (b) Ino bubuke bwa Jesu bweelede kulujatikizya buti lusyomo lwesu?
9 Amulange-lange mbazu zimwi zyabupati bwa Jehova, eezyo zijatikizya Jesu Kristo. Bupati bwa Jehova bwakalibonya mukulenga Mwanaakwe alimwi akumubelesya kwamyaka iitabaliki kali “mufuzi” Wakwe. (Tusimpi 8:22-31, BT) Luyando lwa Jehova lupati lwakatondezyegwa naakapa Mwanaakwe simuzyalwa alikke kuba cipaizyo cacinunuzyo kubantu. (Matayo 20:28; Johane 3:16; 1 Johane 2:1, 2) Alimwi cintu ncobatakonzyi kumvwisya kapati bantu cijatikizya mubili wamuuya wabulemu alimwi uutafwi ooyo Jehova ngwaakapa Jesu naakabusyigwa.—1 Petro 3:18.
10 Bubuke bwa Jesu bwakali kujatikizya zintu zinji zikondelezya zyabupati bwa Jehova butamvwigwi. Cakutadooneka, Leza wakamuyeezya Jesu milimo yakajatikizyidwe mukulenga zintu zitalibonyi azilibonya. (Ba-Kolose 1:15, 16) Eezyi zibikkilizya zilenge zimwi zyamuuya, ijulu anyika alimwi azintu zyuumi zyoonse zilibonya munyika yesu. Kunze aakuyeezya Mwanaakwe makani oonse aakacitika kaindi aajatikizya buumi bwakujulu aanyika mbwaakalibonena, Jehova wakamuyeezya Jesu zintu nzyaakabona kali muntu uulondokede. Masimpe bupati bwa Jehova butamvwigwi bulalibonya mububuke bwa Jesu. Kuyungizya waawo, mulimo mupati ooyo upa cisyomezyo cakuti bubuke bwabantu bamwi bulakonzyeka. Weelede kuyumya lusyomo lwesu kuti Leza ulakonzya kubabusya bantu banji bafwide aabo mbayeeyede mumiyeeyo yakwe iilondokede.—Johane 5:28, 29; Incito 17:31.
Milimo Mibotu Alimwi Mipati
11. Ino mulimo mupati uuli wa Jehova wakatalika lya Pentekoste mu 33 C.E.?
11 Kuzwa naakabusyigwa Jesu, Jehova wacita milimo iimbi mipati alimwi mibotu. (Intembauzyo 40:5) Lya Pentekoste mu 33 C.E., Jehova wakatalisya musyobo mupya, “ba-Israyeli ba-Leza,” wakabambidwe abasikwiiya ba Kristo ibakananikwa amuuya uusalala. (Ba-Galatiya 6:16) Munzila iigambya, musyobo mupya ooyu wakumuuya wakasakana kumasena oonse kwakali bantu munyika aciindi eeco. Nokuba kuti kwakaba luleyo lwakasololela kukutalisyigwa kwa Kristendomu nobakamana kufwa baapostolo ba Jesu, Jehova wakazumanana kucita milimo mibotu kutegwa asinizye kuzuzikizyigwa kwamakanze aakwe.
12. Ino kujanika kwa Bbaibbele mumyaambo mipati-pati iikananwa munyika kusinizya nzi?
12 Mucikozyanyo, Ibbaibbele lyoonse mbolibede lyakayobolwa alimwi akusandululwa mumyaambo mipati-pati iikananwa munyika mazubaano. Ikusandulula Bbaibbele kanji-kanji kwakali kucitwa mubukkale buyumu alimwi kakuli kukongwa kujaigwa ababelesi ba Saatani. Ikwaamba masimpe, ikusandulula Bbaibbele mumyaambo iinda ku 2,000 nokwatakakonzyeka nikwatakali kuyanda kwa Jehova Leza, ooyo bupati bwakwe butamvwigwi!
13. Kuzwa mu 1914, ino mbuti bupati bwa Jehova mbobwatondezyegwa kujatikizya makanze aakwe aa Bwami?
13 Ibupati bwa Jehova bwakalibonya mumakanze aakwe aajatikizya Bwami. Mucikozyanyo, mumwaka wa 1914, wakabika Mwanaakwe, Jesu Kristo, kuba Mwami wakujulu. Kwiinde buyo ciindi cisyoonto, Jesu wakabweza ntaamu yakulwana Saatani amadaimona aakwe. Bakagwisigwa kujulu akutandilwa anyika, aawo mpobalindilila kuwaalwa mumulindi uutagoli. (Ciyubunuzyo 12:9-12; 20:1-3) Kuzwa leelyo, basikutobela Jesu bananike bali kupenzegwa citaambiki. Pele, Jehova wabayumya muciindi eeci cakubako kutalibonyi kwa Kristo.—Matayo 24:3; Ciyubunuzyo 12:17.
14. Ino mulimo mubotu uuli buti Jehova ngwaakacita mu 1919, alimwi eeci cakazuzikizya nzi?
14 Mumwaka wa 1919, Jehova wakacita aumbi mulimo mubotu wakatondezya bupati bwakwe. Basikutobela Jesu bananike, aabo bakafwide kumuuya, bakabukulusigwa. (Ciyubunuzyo 11:3-11) Myaka yakatobela kuzwa ciindi eeco, bananike cabusungu bali kukambauka makani mabotu aa Bwami bukkazikizyidwe kujulu. Ibambi bananike babungikwa kutegwa uzulile mweelwe wa 144,000. (Ciyubunuzyo 14:1-3) Alimwi kwiinda muli basikutobela Kristo bananike, Jehova wakabika ntalisyo ya “nyika impya,” iciinga cabantu baluleme. (Ciyubunuzyo 21:1) Pele ino ncinzi ciyoocitika “[ku]nyika impya” bananike basyomeka boonse baakuunka kujulu?
15. Ino mulimo uuli Banakristo bananike ngobali kusololela, alimwi ncinzi catobela?
15 Mu 1935, mumagazini iili mbuli yeeyi yamu August 1 a August 15 kwakali zibalo zipati zyakali kubandika “nkamu impati” yaambidwe ku Ciyubunuzyo caandaano 7. Banakristo bananike bakatalika kuyandaula akubaleta muciinga cabo aaba bakombinyina kuzwa kumasi oonse, misyobo, mikowa alimwi amilaka yoonse. Eeyi “nkamu impati” iyoofwutuka “mapenzi ayo mapati” aalangilwa lino-lino, kabajisi bulangizi bwa buumi butamani mu Paradaiso kabali balelwa bayoopona lyoonse ba “nyika impya.” (Ciyubunuzyo 7:9-14) Akaambo kakukambauka Bwami alimwi akusololela mumulimo wakugwasya bantu kuba basikwiiya nkobacita Banakristo bananike, bantu bainda kutuulunzuma tuli cisambomwi balijisi bulangizi bwabuumi butamani muparadaiso anyika. Ino nguni weelede kutembaulwa akaambo kakuyaambele kuli boobo nokuba kuti kuli kukazyigwa kuzwa kuli Saatani anyika yakwe iisofweede? (1 Johane 5:19) Alikke Jehova nguukonzya kucita zintu zyoonse eezi, kwiinda mukubelesya muuya wakwe uusalala.—Isaya 60:22; Zekariya 4:6.
Bulemu Bupati Abwami bwa Jehova
16. Ino nkaambo nzi bantu ncobatakonzyi kulibonena ameso ‘bulemu bupati abwami bwa Jehova’?
16 Kufwumbwa naa milimo iili buti, “milimo mibotu” alimwi “mipati” ya Jehova tiikooyoolubwa pe. Davida wakalemba kuti: “Izyalani limwi liyooluula milimo yako kulilimwi, akukanana maleele aako aagambya. Bulemu bupati bwabwami bwako, amilimo yako iigambya, zyoonse nooziyeeya. Bantu bayookanana inguzu zyancito zyako ziyoosya; ambebo njooluula bupati bwako.” (Intembauzyo 145:4-6) Pele, ino makani manji aali buti Davida ngaakali kunga waziba kujatikizya bulemu bupati bwa Jehova, mbwaanga “Leza ngo-Muuya” aboobo talibonyi kubantu?—Johane 1:18; 4:24.
17, 18. Ino mbuti Davida mbwaakali kunga wabumvwisya kapati ‘bulemu bupati bwa Jehova’?
17 Nokuba kuti tanaakali kukonzya kumubona Leza, kwakali nzila Davida mbwaakali kukonzya kuyungizya kulumba kwakwe kubulemu bwa Jehova. Mucikozyanyo, wakali kukonzya kubala makani mu Magwalo aatondezya milimo mipati ya Leza, mbuli kunyonyoonwa kwabantu babyaabi kwiinda mu zambangulwe lyanyika yoonse. Cakutadooneka, Davida wakamvwa baleza bakubeja babana Egepita mbobakasampaulwa eelyo Leza naakaangulula bana Israyeli kuzwa mubuzike mu Egepita. Zintu eezyo zisinizya bulemu mbwajisi Jehova ambwali mupati.
18 Cakutadooneka Davida wakabumvwisya kapati bulemu bwa Leza ikutali buyo kwiinda mukubala Magwalo pele akwiinda mukuzinzibala kuyeeya nzyaakali kubala. Mucikozyanyo, weelede kuti wakali kuzinzibala kuyeeya cakacitika Jehova naakapa bana Israyeli Mulawo. Kwakali kudilima, andabo, kkumbi lisiya mbi alimwi akulila kwamweembo mukali. Cilundu ca Sinai cakali kuzungaana akusuka busi. Kababungene munsi lya cilundu, bana Israyeli mane bakamvwa “milao iili ikumi” kuzwa mukati kamulilo alimwi akkumbi eelyo Jehova naakali kukanana ambabo kwiinda mumungelo wakali kumwiiminina. (Deuteronomo 4:32-36; 5:22-24; 10:4; Kulonga 19:16-20; Incito 7:38, 53) Eezyo zyakali zitondezyo zipati zyabulemu bwa Jehova. Ibayandisya Jwi lya Leza aabo ibazinzibala kuyeeya zibalo eezi beelede kukulwaizyigwa ‘abulemu bupati bwa Jehova.’ Masimpe, sunu tulijisi Ibbaibbele lyoonse mbolizulwa, ilijisi zilengano zisiyene-siyene zikondelezya eezyo zitupa kuti tukulwaizyigwe abupati bwa Jehova.—Ezekiele 1:26-28; Daniele 7:9, 10; Ciyubunuzyo, caandaano 4.
19. Ino ncinzi ciyootugwasya kubumvwisya kapati bulemu bwa Jehova?
19 Inzila aimbi Davida mbwaakali kunga wabumvwisya kapati bulemu bwa Leza nkwiinda mukwiiya milawo Leza njaakapa bana Israyeli. (Deuteronomo 17:18-20; Intembauzyo 19:7-11) Ikutobela milawo ya Jehova kwakapa kuti bana Israyeli balemekwe akubaandaanya kuzwa kubantu boonse bambi. (Deuteronomo 4:6-8) Mbubwenya mbocakabede kuli Davida, ikubala Magwalo lyoonse, kuzinzibala kuyeeya nzyotubala alimwi akwiiya cabusungu kuyootugwasya kubumvwisya kapati bulemu bwa Jehova.
Bube bwa Leza Bulatondezya Bupati Bwakwe!
20, 21. (a) Intembauzyo 145:7-9 isumpula bupati bwa Jehova kweelana abube buli? (b) Ino bube bwa Leza bwaambidwe aawa bubajatikizya buti boonse ibamuyanda?
20 Mbuli mbotwabona, tupango twakusaanguna tuli cisambomwi ku Intembauzyo 145 tutupa twaambo tubotu ncotweelede kutembaula Jehova akaambo kazintu ziswaangene abupati bwakwe butamvwigwi. Tupango 7 kusikila ku 9 tusumpula bupati bwa Jehova kwiinda mukwaamba bube bwakwe bubotu. Davida wakaimba kuti: “Bayookankaizya impuwo yabubotu bwako bupati; bayooimbila bululami bwako cakukondwa. Jehova ngusibuuya, ngusiluzyalo; ulamuka kukalala, ulizwide luse. Jehova mubotu kuliboonse; luzyalo lwakwe lulimwaikide kuzilenge zyakwe zyoonse.”
21 Aawa Davida wasaanguna kunomoona bubotu bwa Jehova alimwi abululami, ibube oobo Saatani Diabolosi mbwaakazumbauzya. Ino bube oobu bubajatikizya buti boonse ibamuyanda Leza alimwi akulibombya kubweendelezi bwakwe? Bubotu bwa Jehova ambweendelezya cabululami bupa kukondwa kupati kubakombi bakwe cakunga tabaleki kumutembaula. Kuyungizya waawo, bubotu bwa Jehova bulasika “kuliboonse.” Kulangilwa kuti eeci ciyoobagwasya banji kusanduka akuba bakombi ba Leza wakasimpe kacitanamana ciindi.—Incito 14:15-17.
22. Ino Jehova ubeendelezya buti babelesi bakwe?
22 Alimwi Davida wakalumba bube Leza mwini mbwaakaamba ciindi ‘naakainda kubusyu bwa Musa, kaamba kati, Jehova! Jehova! Leza siluzyalo asibuuya uutafwambi kukalala, uuzwide luse alusyomo.’ (Kulonga 34:6) Aboobo, Davida wakali kukonzya kwaambilizya kuti: “Jehova ngusibuuya, ngusiluzyalo; ulamuka kukalala, ulizwide luse.” Nokuba kuti Jehova mupati kapati, ulabalemeka babelesi bakwe bantunsi kwiinda mukubeendelezya cabuuya. Ulizwide luzyalo, uulibambilide kulekelela basizibi beempwa kwiinda mucipaizyo cacinunuzyo ca Jesu. Alimwi Jehova ulamuka kukalala, nkaambo ulabapa babelesi bakwe coolwe cakuzunda tumpenda ooto tukonzya kubapa kwaalilwa kunjila munyika yakwe mpya yabululami.—2 Petro 3:9, 13, 14.
23. Ino mbube buli butaliboteli mbotutiilange-lange mucibalo citobela?
23 Davida ulumbaizya luse naa luzyalo lwa Leza. Mubwini, tupango twacaala ku Intembauzyo 145 tulatondezya Jehova mbwatondezya bube oobu ambuli babelesi bakwe basyomeka mbobalimvwa kujatikizya luse lwakwe. Twaambo ootu tulabandikwa mucibalo citobela.
Ino Inga Mwaingula Buti?
• Ino nzyoolwe zili buti ziliko zyakutembaula Jehova “mazuba oonse”?
• Ino nzikozyanyo zili ziliko zitondezya kuti bupati bwa Jehova tabumvwigwi?
• Mbuti mbotunga twayaambele mukumvwisya kapati bulemu bwa Jehova?
[Mibuzyo yaciiyo]
[Cifwanikiso icili apeeji 3]
Milalabungu kujulu ipa bumboni bwa bupati bwa Jehova
[Kulumba]
Zyakazumizyigwa aba Anglo-Australian Observatory, bakafwotola mba David Malin
[Cifwanikiso icili apeeji 5]
Ino mbuti bupati bwa Jehova mbobwatondezyegwa kujatikizya Jesu Kristo?
[Cifwanikiso icili apeeji 6]
Bana Israyeli nobakatambula Mulawo a Cilundu ca Sinai, bakalibonena bulemu bwa Jehova