Jehova Ulizwide Luse
Jehova Ulizwide Luse
“Jehova . . . ulizwide luse.”—INTEMBAUZYO 145:8.
1. Ino ndupati buti luyando lwa Leza?
“LEZA nduluyando.” (1 Johane 4:8) Kaambo aako kakkazika moyo kasinizya kuti Jehova weendelezya munzila yaluyando. Ee, nobaba bantu batamumvwidi balagwasyigwa kuzuba amvwula nzyapa caluyando. (Matayo 5:44, 45) Akaambo kaluyando Leza ndwajisi kubantunsi, nobaba basinkondonyina balakonzya kweempwa, kuba kulubazu lwakwe akujana buumi butamani. (Johane 3:16) Pele lino-lino, Jehova uyoobanyonyoona basizibi batalangilwi kucinca kutegwa bantu ibamuyanda bakabe abuumi butamani munyika mpya yabululami.—Intembauzyo 37:9-11, 29; 2 Petro 3:13.
2. Ino ncibeela cili cilibedelede caluyando Jehova ncatondezya kuli baabo ibalyaabide kulinguwe?
2 Jehova ulatondezya luyando kubakombi bakwe beni-beni munzila iitaliboteli alimwi iitamani. Luyando luli boobo lulapandululwa abbala lya Chihebrayo lisanduludwe kuti “luse,” naa “luzyalo.” Mwami Davida wa Israyeli yansiku wakalumba kapati kuluse lwa Leza. Akaambo kazintu zyakamucitikila alimwi akuzinzibala kuyeeya nkwaakali kucita kujatikizya Leza mbwaakabeendelezya bamwi, Davida wakali kukonzya kwiimba calusyomo kuti: “Jehova . . . ulizwide luse.”—Intembauzyo 145:8.
Ikuziba Bantu ba Leza Basyomeka
3, 4. (a) Mbuti Intembauzyo 145 mboitugwasya kuziba bantu ba Jehova basyomeka? (b) Ino mbuti bantu ba Leza basyomeka ‘mbobamulongezya’?
3 Kujatikizya Jehova Leza, Hana, banyina musinsimi Samuele bakati: “Ulakwabilila buumi bwabantu bakwe basyomeka.” (1 Samuyele 2:9, BT) Ino mbaani “bantu bakwe basyomeka”? Mwami Davida ulaingula. Naakamana kutembaula bube bwa Jehova butaliboteli, wakati: “[Bantu bako basyomeka] bayookulongezya.” (Intembauzyo 145:10) Ino mbuti bantu mbobakonzya kulongezya Leza? Balacita oobo ikapati kwiinda mukumutembaula naa kumulumba.
4 Bantu ba Jehova basyomeka balakonzya kwaambwa kuti mbabaabo ibabelesya milomo yabo ikumutembaula. Nobalya misalo alimwi anobali kumiswaangano ya Banakristo, ino kaambo nzi kapati nkobabandika? Cakutadooneka, makani aa Bwami bwa Jehova. Bantu ba Leza basyomeka bajisi majwi aakozyenye aa Davida, wakaimba kuti: “Bayooluula bulemu bwabwami bwako [bwa Jehova]; bayookanana inguzu zyako.”—Intembauzyo 145:11.
5. Ino mbuti mbotuziba kuti Jehova ulaswiilila ciindi bantu bakwe basyomeka nobamutembaula?
5 Sena Jehova ulaswiilila ciindi bantu bakwe basyomeka nobamutembaula? Inzya, ulaswiilila nzyobaamba. Mubusinsimi bwaamba bukombi bwakasimpe mumazuba eesu, Malaki wakalemba kuti: “Mpawo abo ibakali kuyoowa Jehova bakali kwaambaula umwi aumwi kumweenzinyina, nkabela Jehova wakaswiilila, wakamvwa, nkabela ibbuku lyakwiibalusya lyakalembwa kulinguwe nkaambo kabaabo ibakali kuyoowa Jehova akuyeeya izina lyakwe.” (Malaki 3:16) Cilamukkomanisya kapati Jehova ciindi bantu bakwe basyomeka nobamutembaula, aboobo ulabayeeya.
6. Mulimo uuli uutugwasya kuziba bantu ba Leza basyomeka?
6 Alimwi babelesi ba Jehova basyomeka balakonzya kuzibwa kwiinda mubusicamba bwabo akubweza ntaamu kukanana abantu ibatali bakombi ba Leza mwini-mwini. Masimpe, bantu ba Leza basyomeka “baziby[a] bana ba-Adamu maleele aakwe, abulemu bwabupati bwabwami bwakwe.” (Intembauzyo 145:12) Sena mulajana ciindi akucibelesya kabotu kwaambila batasyomi kujatikizya bwami bwa Jehova? Ikwiimpana amfwulumende zyabantu ziyoonyonyoonwa lino-lino, bwami bwakwe bunooliko lyoonse. (1 Timoteo 1:17) Cilayandika kapati kuti bantu bafwambaane kwiiya zya bwami bwa Jehova bunooliko lyoonse alimwi akuba kulubazu lwambubo. Davida wakaimba kuti: “Bwami bwako mbwami buteeli; bweendelezi bwako mbwamazyalani amazyalani.”—Intembauzyo 145:13.
7, 8. Ncinzi cakacitika mu 1914, alimwi mbumboni buli butondezya kuti Leza ulimukweendelezya kwiinda mu Bwami bwa Mwanaakwe?
7 Kutalikila mu 1914, kwakaba kaambo kambi ikakulwaizya kwaamba zyabwami bwa Jehova. Mumwaka ooyo, Leza wakakkazikizya Bwami bwakujulu bwabu Mesiya akubikka Jesu Kristo, Mwana wa Davida kuba Mwami. Aboobo Jehova wakazuzikizya cisyomezyo cakwe kuti bwami bwa Davida buyookkazikizyigwa kukabe kutamani.—2 Samuele 7:12, 13; Luka 1:32, 33.
8 Bumboni butondezya kuti Jehova ulimukweendelezya kwiinda mu Bwami bwa Mwanaakwe, Jesu Kristo, bulalibonya mukuzuzikizyigwa kuzumanana kucitika kwa citondezyo cakubako kwa Jesu. Icibeela cilibonya kapati cacitondezyo eeco mulimo Jesu ngwaakasinsima wakali kuyoocitwa abantu ba Leza boonse ibasyomeka naakati: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Matayo 24:3-14) Akaambo kakuti bantu ba Leza basyomeka bali mukuzuzikizya businsimi oobo cabusungu, baalumi, banakazi abana ibainda kutuulunzuma tuli cisambomwi bali mukuubeleka mulimo ooyu uutaliboteli alimwi uutakaindulukwi limbi. Lino-lino bayoonyonyoonwa boonse ibakazya Bwami bwa Jehova.—Ciyubunuzyo 11:15, 18.
Zilongezyo Zijanwa Kubweendelezi bwa Jehova
9, 10. Nkwiindana kuli buti kuliko akati ka Jehova abeendelezi bantunsi?
9 Ikuti katuli Banakristo balyaabide, cilongwe cesu a Mwami Mupati Jehova cituletela zilongezyo zinji. (Intembauzyo 71:5; 116:12) Mucikozyanyo, akaambo kakuti tulamuyoowa Leza akucita bululami, ulatutambula alimwi kumuuya tulaba acilongwe cibotu anguwe. (Incito 10:34, 35; Jakobo 4:8) Mukwiimpana, beendelezi bantunsi kanji-kanji bayanzana buyo abantu balaampuwo, mbuli beendelezi basikalumamba, basimakwebo bavwubide kapati, naa basimisobano badumide. Kweelana amuteende wamu Africa wiitwa kuti Sowetan, nkumenkume imwi mumfwulumende mboobu mboyakaamba kujatikizya masena muli bucete kapati mucisi cakwe: “Ndabona ikaambo ibunji bwesu ncotutayandili kuunka kumasena aayo. Nkakuti tuyanda kuluba kuti bukkale buli boobo nkobuli. Cinyonganya manjezyeezya eesu alimwi tatulimvwi kwaanguluka akaambo kamyootokala iidulula kapati njotweenzya.”
10 Mubwini, ibeendelezi bamwi bantunsi balibikkilide maano kubukkale bwa balelwa babo. Pele nobaba beendelezi babotu tababazi balelwa babo umwi aumwi kumugama. Masimpe, tulakonzya kubuzya: Sena kuli mweendelezi uubalanganya kapati balelwa bakwe boonse cakuti ulafwambaana kugwasya umwi aumwi muciindi camapenzi? Inzya, nkwali. Davida wakalemba kuti: “Jehova ulatabilila boonse bawa, ulabusya boonse bawizuka.”—Intembauzyo 145:14.
11. Ino masukusyo aali abacitikila bantu ba Leza basyomeka, alimwi ndugwasyo luli buti ndobajisi?
11 Masukusyo manji amapenzi zilabacitikila bantu ba Jehova Leza basyomeka akaambo kakutalondoka alimwi akuba munyika iili mubweendelezi bwa Saatani, ‘muntu mubi.’ (1 Johane 5:19; Intembauzyo 34:19) Banakristo balapenzyegwa. Ibamwi baciswa malwazi aataponi naa balafwidwa. Aabona, kulubizya kwabantu ba Jehova basyomeka kulakonzya kubapa ‘kuwizuka’ kwiinda mukutyompokelwa. Pele kufwumbwa masukusyo aabasikila, Jehova lyoonse ulilibambilide kubaumbulizya akuyumya umwi aumwi kumuuya. Mwami Jesu Kristo awalo ulaaluyandisyo luli boobo kubalelwa bakwe basyomeka.—Intembauzyo 72:12-14.
Cakulya Cibotu Aciindi Ceelede
12, 13. Mbuti Jehova mbwaabila nzyobayandika “baumi boonse”?
12 Akaambo kaluse lwakwe lupati, Jehova ulabaabila zyoonse nzyobayandika babelesi bakwe. Eeci cibikkilizya kubaabila cakulya cibotu. Mwami Davida wakalemba kuti: “Meso aaboonse alalangilila nduwe [Jehova]; ulabapa zilyo zyabo kuciindi ceelede. Ulafumbatula ijanza lyako, ulakutya kusukama kwabaumi boonse.” (Intembauzyo 145:15, 16) Nociba ciindi camapenzi, Jehova ulakonzya kucita bubambe kutegwa bantu bakwe basyomeka bajane ‘zilyo zyabuzuba.’—Luka 11:3; 12:29, 30.
13 Davida wakaamba kuti “baumi boonse” balakuta. Eeci cilabikkilizya abanyama. Ikuti nizyatali zisamu abwizu bunji zijanika munyika amumilonga alimwi azilenge zyamumaanzi, bayuni abanyama baanyika nobatali kujana muya kuti kabayoya naa zilyo zyakulya. (Intembauzyo 104:14) Pele, Jehova ulasinizya kuti zyoonse nzyobayandika zyazuzikizyigwa.
14, 15. Mbuti cakulya cakumuuya mbocili mukupegwa mazubaano?
14 Ikwiindana abanyama, bantu bayandika zintu zyakumuuya. (Matayo 5:3) Jehova ulaabila munzila mbotu zintu zyakumuuya nzyobayandika bantu bakwe basyomeka. Katanafwa, Jesu wakasyomezya kuti “muzike musyomesi uucenjede” wakali kuyooabila batobeli ba Jesu ‘zilyo zyakumuuya kuciindi ceelede’. (Matayo 24:45) Ibasyeede akati kaba 144,000 ibananike mbabali cibeela caciinga camuzike sunu. Kwiinda muli mbabo, masimpe Jehova ulaabila cakulya cakumuuya cinji.
15 Mucikozyanyo, ibantu ba Jehova banji bagwasyigwa kapati kubusanduluzi bupya alimwi buluzi bwa Bbaibbele mumwaambo wabo. Elo kaka Ibbaibbele lya New World Translation of the Holy Scriptures lyaba cilongezyo citaliboteli! Kuyungizya waawo, mabbuku manji aakugwasya kwiiya Bbaibbele azumanana kumwaigwa mumyaambo iinda ku 300. Cakulya cakumuuya coonse eeci cali cilongezyo kubakombi bakasimpe munyika yoonse. Ino nguni weelede kutembaulwa kumilimo yoonse eeyi? Ngu Jehova Leza. Kwiinda muluse lwakwe, wapa kuti cikonzyeke kuciinga camuzike kwaabila ‘zilyo kuciindi ceelede.’ Kwiinda mububambe buli boobo, “kusukama kwabaumi boonse” muparadaiso yakumuuya yamazubaano kulazuzikizyigwa. Elo mbobakkomana kaka babelesi ba Jehova kubulangizi bwakuyoobona lino-lino nyika yasandulwa akuba paradaiso ncobeni!—Luka 23:42, 43.
16, 17. (a) Ino nzikozyanyo zili ziliko zyacakulya cakumuuya cakapegwa muciindi ceelede? (b) Ino mbuti Intembauzyo 145 mboitondezya mbobalimvwa bantu ba Leza basyomeka kujatikizya kaambo kapati kakatalisyigwa a Saatani?
16 Amulange-lange cikozyanyo cibotu kapati cacakulya cakumuuya cakapegwa muciindi ceelede. Mu 1939, Nkondo Yanyika Yabili yakatalika mu Europe. Mumwaka ooyo, Ngazi Yamulindizi yamu November 1 yakajisi cibalo cakuti “Kutatola Lubazu Mutwaambo Twacisi.” Akaambo kamakani aasalede aakapegwa, Bakamboni ba Jehova munyika yoonse bakabona mbociyandika kutatola lubazu mutwaambo twamasi aakali kulwana. Eeci cakapa kuti mfwulumende kumbazu zyoonse zyobile zikalale munkondo eeyo yakatola myaka iili cisambomwi. Pele nokuba kuti mulimo wabo wakalesyegwa alimwi bakapenzyegwa, bantu ba Leza basyomeka bakazumanana kukambauka makani mabotu aa Bwami. Kutalikila mu 1939 kusikila mu 1946, bakalongezyegwa kwiinda mukuyungizyika amweelwe wa 157 pasenti. Kuyungizya waawo, makani aabo aakulwaizya aatondezya kusyomeka kwabo azumanana kugwasya bantu kuziba bukombi bwakasimpe.—Isaya 2:2-4.
17 Cakulya cakumuuya ncapa Jehova tacili buyo caaciindi ceelede pele cilakkazika moyo kapati. Ciindi masi naakajisi bubi kulwana lya Nkondo Yanyika Yabili, bantu ba Jehova bakagwasyigwa kubikkila maano kucintu cipati kapati kwiinda lufwutuko lwabo. Jehova wakabagwasya kumvwisya kuti kaambo kapati kajatikizya bubumbo boonse nkakweelela kwa Jehova kuba mweendelezi wakoonse koonse. Masimpe cilakkomanisya kapati kuziba kuti kwiinda mukusyomeka kwabo, Kamboni wa Jehova umwi aumwi wakalijisi kabeela kali mbokabede mukulemeka bweendelezi bwa Jehova amukusinizya kuti Diabolosi mmubeji. (Tusimpi 27:11) Ikwiindana aa Saatani, uubejelezya Jehova akusampula bweendelezi bwakwe, babelesi ba Jehova basyomeka balazumanana kwaambilizya caantangalala kuti: “Jehova uliluleme munzila zyakwe zyoonse.”—Intembauzyo 145:17.
18. Ino ncikozyanyo cili caino-ino cacakulya cakumuuya caaciindi ceelede alimwi cikkazika moyo kapati?
18 Cikozyanyo cimbi cacakulya cakumuuya caaciindi ceelede alimwi cibotu ndibbuku lya Amubaa Cilongwe a Jehova, lyakamwaigwa a Miswaangano Yacooko minji ya “Basikwaambilizya Bwami Ibasungu” yakacitwa munyika yoonse mu 2002/03. Ibbuku eeli lyakaabilwa a “muzike musyomesi uucenjede” akumwaigwa a Bakamboni ba Jehova, libandika kapati ibube butaliboteli bwa Jehova Leza, kubikkilizya abube bwaambidwe ku Intembauzyo 145. Eeli bbuku litaliboteli masimpe liyoobagwasya kapati bantu ba Leza basyomeka kuba acilongwe cibotu anguwe.
Ecino Nceciindi Cakuswena Kuli Jehova
19. Nceecili ciindi ciyandika kapati iciyaabuswena, alimwi ncinzi ncotukonzya kucita?
19 Ciindi cini-cini mukubamba kaambo kabweendelezi bwa Jehova ciyaabuswena. Kweelana ambokusinsimidwe kubbuku lya Ezekieli caandaano 38, Saatani lino-lino uyoomanizya lubazu lwakwe kali “Gogo wakunyika ya-Magogo.” Eeci ciyoobikkilizya kulwana bantu ba Jehova munyika yoonse. Kuyooba kusoleka kupati kwa Saatani kuti amane lusyomo lwabantu ba Leza basyomeka. Ikwiinda mbocalibede lyoonse, bakombi ba Jehova bayooyandika kwiita azina lyakwe camoyo woonse, nokuba kulilila lugwasyo buya. Sena kuyoowa Leza alimwi aluyando ndobajisi kulinguwe ziyooba zyabuyo? Peepe nkaambo Intembauzyo 145 yaamba kuti: “Jehova uli kufwaafwi kuliboonse bamwiita, boonse bamwiita calusinizyo. Bamuyoowa, ulabacitila mbobayanda; ulaswiilila cililo cabo akubafutula. Jehova ulabamba boonse bamuyandisya, pele basizibi boonse ulabanyonyoona.”—Intembauzyo 145:18-20.
20. Ino mbuti majwi aali kubbuku lya Intembauzyo 145:18-20 mbwaaya kuba aamasimpe kumbele?
20 Ciyookondelezya kapati kuba balongwe beni-beni ba Jehova akulibonena nguzu zyakwe zyakuvwuna aakunyonyoona basizibi boonse. Aciindi cikatazyide eeco, cilaafwaafwi kusika Jehova uyooswiilila buyo aabo “boonse bamwiita calusinizyo.” Takabaswiilili pe basikuupaupa ameso. Ijwi lya Leza lilatondezya kabotu-kabotu kuti basizibi ibalikulindila kusikila ciindi camana nobaya bayite azina lya Leza tiibali kumvwugwa pe.—Tusimpi 1:28, 29; Mika 3:4; Luka 13:24, 25.
21. Ino mbuti bantu ba Jehova basyomeka mbobatondezya kuti balakkomana kubelesya zina lya Leza?
21 Cilayandika kapati sunu kwiinda mbocalibede lyoonse kulibaabo ibayoowa Jehova “[ku]mwiita calusinizyo.” Ibantu bakwe basyomeka balakkomana kulibelesya zina lyakwe mumipailo yabo alimwi amubwiinguzi kumiswaangano yabo. Balalibelesya zina lya Leza nomuba mumibandi yabo. Alimwi cabusicamba balaambilizya zina lya Jehova mumulimo wabo wakubuleya.—Ba-Roma 10:10, 13-15.
22. Ino nkaambo nzi ncociyandika kapati kuzumanana kukazya mizeezo akulombozya kudumide munyika?
22 Ikutegwa tuzumanane kujana zilongezyo ziboola akaambo kacilongwe cesu cibotu a Jehova Leza, cilayandika kapati kuti tuzumanane kuzikazya zintu zinyonyoona kumuuya mbuli kuyandisya buvwubi, kulikondelezya kutali kabotu, kwaalilwa kulekelela bamwi, naa kutababikkila maano ibabulide. (1 Johane 2:15-17; 3:15-17) Ikuti bukkale oobu tiibwalulamikwa, milimo eeyi atumpenda zilakonzya kusololela kukucita cibi cipati alimwi akutakkomaninwa a Jehova. (1 Johane 2:1, 2; 3:6) Ncabusongo kuyeeya lyoonse kuti Jehova uyoozumanana kutondezya luse kulindiswe lilikke eelyo notuzumanana kusyomeka kulinguwe.—2 Samuele 22:26.
23. Ino mbukkale bwakumbele buli buti butaliboteli mbobalindila bantu ba Leza boonse basyomeka?
23 Aboobo atuzumanane kubikkila maano kubukkale butaliboteli kumbele oobo mbobalangila bantu ba Jehova boonse basyomeka. Kwiinda mukucita boobo, tulaba abulangizi bubotu bwakuyoobikkilizyigwa akati kabaabo ibayootembaula, kulongezya alimwi akulumba Jehova “mazuba oonse” alimwi “lyoonse alyoonse.” (Intembauzyo 145:1, 2) Aboobo ‘atuliyobole muluyando lwa Leza cakulangilila buumi butamani.’ (Juda 20, 21) Mbotuzumanana kugwasyigwa abube butaliboteli bwa Taateesu wakujulu, kubikkilizya luse lwakwe lunji ndwatondezya kulibaabo ibamuyanda, majwi eesu lyoonse aabe mbuli yaayo ngaakaamba Davida mumajwi aamamanino ku Intembauzyo 145: “Mulomo wangu ulaamba intembauzyo zya-Jehova; bantu boonse balumbe izina lyakwe lisalala lyoonse alyoonse.”
Ino Inga Mwaingula Buti?
• Mbuti ibbuku lya Intembauzyo 145 mbolitugwasya kuziba bantu ba Leza basyomeka?
• Ino mbuti Jehova ‘mbwakutya kusukama kwabaumi boonse’?
• Nkaambo nzi ncotweelede kuswenenena kuli Jehova?
[Mibuzyo yaciiyo]
[Cifwanikiso icili apeeji 9]
Bantu ba Jehova basyomeka balakkomana kubandika milimo yakwe mipati
[Cifwanikiso icili apeeji 10]
Babelesi ba Jehova cabusicamba balabagwasya batasyomi kwiiya bulemu bwabwami bwakwe
[Cifwanikiso icili apeeji 11]
Jehova ulaabila zyakulya ‘kuzintu zyoonse zyuumi’
[Kulumba]
Banyama: Parque de la Naturaleza de Cabárceno
[Cifwanikiso icili apeeji 12]
Jehova ulapa nguzu abusolozi kubantu bakwe basyomeka ibalomba lugwasyo lwakwe mumupailo