“Omwami, Utwiisye Kukomba”

“Umwi wabasikwiiya bakwe wakamwaambila kuti, Omwami, utwiisye kukomba.”—LUKA 11:1.

1. Ino nkaambo nzi umwi wabasikwiiya ba Jesu ncaakalombela Jesu kuti abayiisye mbokupailwa?

ACIINDI cimwi mu 32 C.E., sikwiiya umwi wa Jesu wakali kulangilila Jesu naakali kupaila. Ooyu sikwiiya kunyina naakamvwa Jesu ncaakali kwaamba kuli Bausyi akaambo kakuti ambweni wakali mupailo wakaumuumu. Nokuba boobo, Jesu naakamanizya kupaila, sikwiiya wakati kulinguwe: “Omwami, utwiisye kukomba.” (Luka 11:1) Ino ncinzi cakakulwaizya kulomba kuyiisyigwa kupaila ooku? Kupaila cakali cibeela cakali kucitwa lyoonse mubuumi bwaba Juda amubukombi. Imagwalo aa Chihebrayo alijisi mipailo minji mubbuku lya Intembauzyo alimwi amumabbuku aambi. Aboobo sikwiiya ooyu tanaakali kulomba kuyiisyigwa cintu ncaatakazyi pe naa cintu ncaatakalina buzuba wacita. Cakutadooneka, wakaliizyi mipailo yakwiizya buyo mulawo yabeendelezi babukombi bwaci Juda. Pele lino wakamulangilila Jesu kapaila, alimwi kulibonya kuti wakabona lwiindano lupati lwakaliko akati kamipailo yakulilulamika yabamayi alimwi anzila Jesu mbwaakapaila.—Matayo 6:5-8.

2. (a) Ino ncinzi citondezya kuti Jesu tanaakayanda kuti katwiinduluka mupailo wacikozyanyo bbala abbala? (b) Ino nkaambo nzi ncotuyandisya kuzyiba mbokupailwa?

² Kakwiindide myezi iitandila ku 18, mu Mulumbe wakwe waa Cilundu, Jesu wakabapa basikwiiya bakwe cikozyanyo ncobakeelede kutobela mumipailo yabo. (Matayo 6:9-13) Kulibonya kuti, sikwiiya ooyu tanaakaliko aciindi eeco. Aboobo Jesu calubomba wakatwiinduluka twaambo tupati-pati tuli mumupailo wacikozyanyo ooyo. Kulibonya kuti kunyina naakainduluka mupailo ibbala abbala, ikutondezya kuti tanaakali kupa mupailo weelede kupetwa buya, kukunyina kuyeeya ncowaamba. (Luka 11:1-4) Mbubonya mbuli sikwiiya uutaambidwe zina, atuswe tuyanda kuyiisyigwa mbokupailwa ikutegwa mipailo yesu itupe kuswenenena kuli Jehova. Aboobo atulange-lange cibalo coonse camupailo wacikozyanyo, cakalembwa amwaapostolo Matayo. Cilijisi zintu zili ciloba izyeelede kulombwa. Zyotatwe zijatikizya makanze aa Leza kakuli zyone zijatikizya zintu nzyotuyandika kumubili alimwi akumuuya. Mucibalo eeci, tulalanga-langa zintu zyotatwe zyakusaanguna izyeelede kulombwa.

Taata Siluyando

3, 4. Ino ncinzi caambwa notwiita Jehova kuti “Taateesu”?

³ Ikuzwa kumatalikilo, Jesu wakatondezya kuti mipailo yesu yeelede kutondezya cilongwe cini-cini pele munzila yabulemu kuli Jehova. Kakanana ikapati kuli basikwiiya bakwe bakabungene munsi lyakwe atala acilundu, Jesu wakabaambila kuti kabaamba Jehova kuti “Taateesu ooli kujulu.” (Matayo 6:9) Ikweelana asikwiiya umwi, kufwumbwa naa Jesu wakakanana munzila yakazyibidwe kapati mu Chihebrayo naa Chiaramu, ibbala ndyaakabelesya abusena bwa “Taateesu” lyaamba mbuli mwana mbwakonzya kwiita bausyi caluyando. Ikwiita Jehova kuti “Taateesu,” citondezya luyando akumvwana  nkotujisi anguwe.

⁴ Alimwi kwiinda mukwaamba kuti “Taateesu,” tulazumina kuti tuli cibeela camukwasyi mupati wabaalumi abanakazi ibamuzyi Jehova kuti ngo Sikupa Buumi. (Isaya 64:8; Incito 17:24, 28) Ibanakristo bananikidwe amuuya balakonzya kubwezyegwa kuba “bana ba-Leza” alimwi kulinguwe balakonzya ‘koompolola kuti Abba, Ta.’ (Ba-Roma 8:14, 15) Tuulunzuma tuli mbotubede twabantu, twabasangana akuba beenzinyina basyomeka. Aaba bakalyaaba kuli Jehova akukutondezya kulyaaba ooku kwiinda mukubbapatizyigwa mumeenda. Eezyi “mbelele zimwi,” azyalo zilakonzya kumusikila Jehova muzina lya Jesu alimwi akumwiita kuti “Taateesu.” (Johane 10:16; 14:6) Tulakonzya kumusikila Taateesu wakujulu lyoonse mumupailo, ikumutembaula akumulumba akaambo kazintu zibotu zyoonse nzyaakatucitila akumwaambila zintu nzyotulibilikide katusyomede kuti ulatulanganya.—Ba-Filipi 4:6, 7; 1 Petro 5:6, 7.

Ikuyanda Zina lya Jehova

5. Ino nkulomba nzi kwakusaanguna kuli mumupailo wacikozyanyo, alimwi nkaambo nzi ncokweelede?

⁵ Ikulomba kwakusaanguna kutondezya cintu ceelede kubikkwa mubusena butaanzi. Nkwakuti: “Alilemekwe izina lyako.” (Matayo 6:9) Masimpe, ikusalazyigwa kwa zina lya Jehova ncintu ciyandika kapati kulindiswe akaambo kakuti tulamuyanda alimwi tulabijilwa kubona masampu oonse aabikkwa aazina lyakwe. Ikuzanga kwa Saatani alimwi akoongelezya banabukwetene bakusaanguna kuti bazangile Jehova Leza, kwakamubisizya izina lyakwe Leza kwiinda mukudooneka Leza mbwaakali kubucita bweendelezi bwakwe bwakoonse-koonse. (Matalikilo 3:1-6) Kuyungizya waawo, kuzwa ciindi cabuzangi bwakusaanguna, izina lya Jehova lyasampaulwa kwiinda mumicito yuusisya alimwi akuyiisya kwabaabo balitaminina kuti balamwiiminina.

6. Ino ncinzi ncotutakaciti ikuti katupailila izina lya Jehova kuti lisalazyigwe?

⁶ Imupailo wesu uujatikizya kusalazyigwa kwazina lya Jehova utondezya kulubazu nkotubede mukaambo kabweendelezi bwakoonse-koonse. Tulamugwasyilizya kapati Jehova akaambo kakuti nguuyelede kweendelezya nyika ajulu. Jehova uyanda kuti julu anyika zikkalwe abangelo alimwi abantu aabo cakulisungula acakukondwa ibalibombya kubweendelezi bwakwe bululeme akaambo kakuti balamuyanda akuyanda coonse ciimininwa azina lyakwe. (1 Makani 29:10-13; Intembauzyo 8:1; 148:13) Iluyando ndotujisi kuzina lya Jehova luyootugwasya kutacita cintu cili coonse cinga caleta masampu kuzina lyakwe lisalala. (Ezekieli 36:20, 21; Ba-Roma 2:21-24) Mbwaanga luumuno lwazilenge zyakujulu aanyika luyeeme akusalazyigwa kwazina lya Jehova alimwi akulibombya kubulelo bwakwe katukulwaizyigwa aluyando, imupailo wesu wa “alilemekwe izina lyako” utondezya lusyomo lwesu kuti makanze aa Jehova ayoozuzikizyigwa kutegwa akalumbaizyigwe.—Ezekieli 38:23.

 Ibwami Mbotupailila

7, 8. (a) Ino Mbwami nzi Jesu mbwaakatuyiisya kupailila? (b) Ino ncinzi ncotwiiya kujatikizya Bwami oobu kubbuku lya Daniele a Ciyubunuzyo?

⁷ Ikulomba kwabili mumupailo wacikozyanyo nkwakuti: “Abuze Bwami bwako.” (Matayo 6:10) Ooku kulomba kulikozyene akwamatalikilo. Jehova uyoobelesya Bwami bwabu Mesiya, nkokuti mfwulumende yakwe yakujulu, mwalo Mwanaakwe, Jesu Kristo mwali Mwami uubikkidwe mumulawo, mukusalazya izina lyakwe lisalala. (Intembauzyo 2:1-9) Ibusinsimi bwa Daniele bwaamba Bwami bwabu Mesiya kuti ‘ndibbwe’ lyakakolomonwa kuzwa ‘kucilundu.’ (Daniele 2:34, 35, 44, 45) Imulundu wiiminina bweendelezi bwa Jehova bwakoonse-koonse. Aboobo Bwami bwiimininwa abbwe caamba inzila mpya yabulelo bwa Jehova bwakoonse koonse. Mubusinsimi oobu, ibbwe kumane ‘lyaba idundu ipati lyazuzya nyika yoonse.’ Eeci citondezya kuti Bwami bwabu Mesiya buyooiminina nguzu zya Leza izipati zyakweendelezya nyika.

⁸ Mbayoolela limwi Kristo mumfwulumende eeyi ya Bwami mba 144,000, ‘ibakanununwa akati kabantu’ ikuti bakalele anguwe kabali bami abapaizi. (Ciyubunuzyo 5:9, 10; 14:1-4; 20:6) Daniele ubaamba kuti “basalali ba-Sijulu wamajulu,” aabo antoomwe a Kristo Mweendelezi wabo batambula ‘bwami abweendelezi abupati bwazisi zyoonse zyaansi. Bwami bwabo mbwami buteeli, nkabela misyobo yoonse iyoobalemeka akubamanina milimo.’ (Daniele 7:13, 14, 18, 27) Oobu mbupanduluzi bweelela imfwulumende yakujulu eeyo Kristo njaakayiisya basikumutobela bakwe kupailila.

Nkaambo nzi Ncotucipailila Bwami Kuti Buboole?

9. Ino nkaambo ncociceelela kupailila Bwami bwa Leza kuti buboole?

⁹ Mumupailo wacikozyanyo, Kristo wakatuyiisya kupailila Bwami bwa Leza kuti buboole. Ikuzuzikizyigwa kwabusinsimi bwamu Bbaibbele, kutondezya kuti Bwami bwabu Mesiya bwakakkazikizyigwa kujulu mu 1914. * Aboobo, sena ciceelela kulindiswe kupailila Bwami kuti “buze”? Ee. Nkaambo kakuti mubusinsimi bwa Daniele, Bwami bwabu Mesiya bwiimininwa abbwe, buli mukulwana amfwulumende zyamapolitikisi zyabantunsi, zyalo ziimininwa acikozyanyo cipati kapati. Ibbwe liyoocipwaya cikozyanyo eeco cakuti ciyooba buyo lusuko. Ibusinsimi bwa Daniele bwaamba kuti: “Bwami buyoopwayaula akumanisya mami aya oonse, alimwi bwalo buyooima nji kukabe kutamani.”—Daniele 2:44.

10. Ino nkaambo nzi ncotulombozya kuti Bwami bwa Leza buboole?

¹⁰ Tulombozya kuyoobona Bwami bwa Leza nobuyoonyonyoona bweende bubyaabi bwazintu bwa Saatani, nkaambo eeci ciyooamba kusalazya zina lya Jehova lisalala alimwi akugusya boonse bakazya bweendelezi bwa Leza. Tulapaila camoyo woonse kuti: “Abuze Bwami bwako,” alimwi antoomwe amwaapostolo Johane, tulati: “Ameni! Koboola ncobeni, Mwami Jesu.” (Ciyubunuzyo 22:20) Masimpe buya, Jesu kaboola kuzoosalazya izina lya Jehova alimwi akusumpula bulelo Bwakwe. Eeci ciyoopa kuti majwi aa sintembauzyo azuzikizyigwe aakuti: “Bazibe kuti nduwe olike oojisi izina lya-Jehova, nduwe Mupatikampatila  atala anyika yoonse.”—Intembauzyo 83:18.

“Alucitwe Luyando Lwako”

11, 12. (a) Ino ncinzi ncotulomba notupailila kuyanda kwa Leza kuti ‘kucitwe, ansi aano mbubonya mbuli kujulu’? (b) Ino ncinzi acimbi icaambwa notupailila kuyanda kwa Jehova kuti kucitwe?

¹¹ Jesu alimwi wakayiisya basikwiiya bwakwe kupaila kuti: “Alucitwe luyando lwako, ansi ano mbubonya mbuli kujulu.” (Matayo 6:10) Ijulu anyika zyakalengwa akaambo kakuyanda kwa Jehova. Izilenge zyakujulu zilaanguzu ziloompolola kuti: “Nduwe uuelede, O Mwami, kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.” (Ciyubunuzyo 4:11) Jehova ulijisi makanze kujatikizya “zintu zyamujulu niziba zintu zyaansi.” (Ba-Efeso 1:8-10) Ikwiinda mukupaila kuti ikuyanda kwa Leza kucitike, mubwini tulomba Jehova kuti azuzikizye makanze aakwe. Ikuyungizya waawo, tutondezya kuti tulombozya kuyoobona kuyanda kwa Leza nokuyoozuzikizyigwa kujulu aanyika.

¹² Alimwi kwiinda mumupailo ooyu, tutondezya kuti tulilisungude ikweendelanya bukkale bwesu kweelana akuyanda kwa Jehova. Jesu wakati: “Icakulya cangu nkucita luyando lwayooyo uwakandituma, akulondola milimo yakwe.” (Johane 4:34) Mbubonya mbuli Jesu, mbotuli Banakristo balyaabide, tulakkomana kucita kuyanda kwa Leza. Iluyando ndotujisi kuli Jehova aku Mwanaakwe kulatukulwaizya ikupona buumi bwesu ikutali “muzisusi zyanyama pele mumakanze aa-Leza.” (1 Petro 4:1, 2; 2 Ba-Korinto 5:14, 15) Tulasoleka canguzu kutacita zintu nzyotuzyi kuti tazyeendelani akuyanda kwa Jehova. (1 Ba-Tesalonika 4:3-5) Ikwiinda mukujana ciindi cakubala Bbaibbele akwiiya, tuyoozumanana “kumvwisya mbulubede luyando lwa-Mwami [Jehova],” calo cibikkilizya kutola lubazu cabusungu mukukambauka “aya Makani Mabotu aa-Bwami.”—Ba-Efeso 5:15-17; Matayo 24:14.

Ikuyanda kwa Jehova Kujulu

13. Ino mbuti kuyanda kwa Leza mbokwakali kucitwa Saatani katanazanga?

¹³ Ikuyanda kwa Jehova kwali kucitwa kujulu ikaindi nociba ciindi icilenge camuuya cakwe cimwi kacitana kuzanga akuba Saatani. Ibbuku lya Tusimpi lyaamba Mwanaa Leza kuba busongo bwaambwa mbuli muntu. Litondezya kuti kwamyaka iitabaliki, Mwanaa Leza simuzyalwa alikke wakali “kusekelela lyoonse kubusyu bwakwe,” kakkomene kucita luyando lwa Wisi. Mukuya kwaciindi, wakaba “mufuzi” mukulenga zintu zyoonse “zyamujulu azyaansi, zintu zibonwa azitabonwi.” (Tusimpi 8:22-31, BT; Ba-Kolose 1:15-17) Jehova wakamubelesya Jesu kuba Ijwi, naa Mwaambilizi wakwe.—Johane 1:1-3.

14. Ino ncinzi ncotukonzya kwiiya ku Intembauzyo 103 kujatikizya bangelo mbobazuzikizya kuyanda kwa Jehova kujulu?

¹⁴ Sintembauzyo utondezya kuti bweendelezi bwa Jehova bwakoonse koonse bulisumpukide kapati kwiinda zilenge zyoonse akuti bangelo banji balaswiilila kululayo amalailile aakwe. Mboobu mbotubala: “Jehova ulikazikide cuuno cakwe cabwami mujulu, nkabela bwami bwakwe buleendelezya [koonse-koonse]. Amulumbe Jehova nobaangelo bakwe, inywe nobasintaze basinguzu nomucita mbwaamba, akuswiilila ijwi lyamajwi aakwe. Amulumbe Jehova, nomakamu aakwe nyoonse, inywe nomumubelekela milimo akucita ncayanda. Amulumbe Jehova, nozilenge zyakwe zyoonse, koonse koonse nkwaendelezya.”—Intembauzyo 103:19-22.

15. Ino mbuti kuyanda kwa Leza kujulu mbokwakajatikizyigwa Jesu naakapegwa bweendelezi bwa Bwami?

¹⁵ Nociba ciindi naakazanga, Saatani wakacili kukonzya kuunka kujulu kweelana ambokutondezyedwe kubbuku lya Jobu. (Jobu 1:6-12; 2:1-7) Nokuba boobo, ibbuku lya Ciyubunuzyo lyakasinsima kuti ciyoosika ciindi Saatani alimwi amadaimona aakwe nobayootandwa kuzwa kujulu. Eeci cakacitika Jesu Kristo mbwaakapedwa buyo Bwami bwakweendelezya mu 1914. Ikuzwa leelyo, kunyina busena bwabazangi aabo kujulu pe. Bakasowelwa ansi mucilawo caanyika. (Ciyubunuzyo 12:7-12) Kunyina  uukazya bweendelezi bwa Jehova wakali kukonzya kumvwigwa kujulu pe. Alikke majwi aakali kumvwugwa ngakutembaula “Mwanambelele” Kristo Jesu, alimwi aatondezya kulibombya kuli Jehova. (Ciyubunuzyo 4:9-11) Masimpe ikuyanda kwa Jehova kuli mukucitwa kujulu.

Ikuyanda kwa Jehova Kujatikizya Nyika

16. Ino mbuti mupailo wacikozyanyo mbouteendelani anjiisyo ya Kristendomu kujatikizya bulangizi bwabantu?

¹⁶ Izikombelo zya Kristendomu taziibikkilizyi nyika mumakanze aa Leza. Baamba kuti boonse bantu babotu bayooinka kujulu. Pele Jesu wakatuyiisya kupaila kuti: “Abuze Bwami bwako, alucitwe luyando lwako, ansi ano mbubonya mbuli kujulu.” (Matayo 6:10) Sena inga caambwa kuti kuyanda kwa Jehova kuli mukuzuzikizyigwa mubbazu zinji sunu munyika imuli kulwana, kutalulama, kuciswa, alimwi alufwu? Peepe. Aboobo camoyo woonse tweelede kupailila kuyanda kwa Leza kuti kucitwe ansi aano kweelana acisyomezyo ncaakalemba mwaapostolo Petro kuti: “Tulangila ijulu ipya [imfwulumende yabu Mesiya yeendelezyegwa a Kristo] anyika impya [iciinga cabantu balulami], mbubonya mbuli mbwaakatusyomezya. Mulinzizyo momukala bululami.”—2 Petro 3:13.

17. Ino makanze nzi Jehova ngajisi kunyika?

¹⁷ Jehova wakajisi makanze naakalenga nyika. Wakasololela imusinsimi Isaya kulemba kuti: “Mbuboobu mbwaamba Jehova iwakalenga ijulu. (Ngonguwe Leza. Ngonguwe iwakabumba nyika akwiipanga akwiimika. Teewakailenga kuti ibe yalupilingano pe, wakaibumba kuti ikalwe bantu.) Ndime Jehova. Taakwe umbi.” (Isaya 45:18) Leza wakabikka banabukwetene bakusaanguna mumuunda waparadaiso akubalailila kuti: “Amuzyalisye, muvule muzuzye nyika akwiibombya.” (Matalikilo 1:27, 28; 2:15) Cakutadooneka, imakanze aa Mulengi ngakuti inyika ikkalwe abantu balulami aabo balibombya cakukkomana kubweendelezi bwa Jehova alimwi akupona kukabe kutamani mu Paradaiso njaakasyomezya Kristo.—Intembauzyo 37:11, 29; Luka 23:43.

18, 19. (a) Ino ncinzi ceelede kucitwa kuyanda kwa Leza kakutana kuzuzikizyigwa cakumaninina anyika? (b) Ino nzibeela zili zyamupailo wacikozyanyo wa Jesu ziyoolangwa-langwa mucibalo citobela?

¹⁸ Ikuyanda kwa Jehova ikujatikizya nyika takukonzyi kuzuzikizyigwa munzila iizwide eelyo niicikkedwe abaalumi abanakazi ibakaka ibulelo bwakwe. Kwiinda mukubelesya nkamu zyamyuuya zilaanguzu zyeendelezyegwa a Kristo, Leza ‘uyoobanyonyoona abo banyonyoona nyika.’ Ibweende bwazintu boonse bubyaabi bwa Saatani, antoomwe abukombi bwambubo bwakubeja, bumpelenge mumapolitikisi, bulyato akutasyomeka mumakwebo alimwi amanyongwe aaletwa abasikalumamba, zyoonse ziyoomana kukabe kutamani. (Ciyubunuzyo 11:18; 18:21; 19:1, 2, 11-18) Ibulelo bwa Jehova buyoosumpulwa alimwi izina lyakwe liyoosalazyigwa. Zyoonse eezyi tulazipailila notwaamba kuti: “Taateesu ooli kujulu, alilemekwe izina lyako, abuze Bwami bwako, alucitwe luyando lwako ansi ano mbubonya mbuli kujulu.”—Matayo 6:9, 10.

¹⁹ Nokuba boobo, mumupailo wakwe wacikozyanyo, Jesu wakatondezya kuti alimwi tulakonzya kupailila zintu zitujatikizya tobeni. Izibeela eezyi zyamalailile aakwe kujatikizya mupailo ziyoolangwa-langwa mucibalo citobela.

Bupanduluzi buyungizidwe

Ikwiinduluka

• Ino nkaambo nzi ncoceelela kulindiswe ikwiita Jehova kuti “Taateesu”?

• Ino nkaambo nzi kapati ncotweelede kupailila izina lya Jehova kuti lisalazyigwe?

• Ino nkaambo nzi ncotupailila Bwami bwa Leza kuti buboole?

• Ino ncinzi icaambwa eelyo notupailila ikuyanda kwa Leza kuti kucitwe anyika mbubonya mbokucitwa kujulu?

[Mibuzyo yaciiyo]

[Cifwanikiso icili apeeji 19]

Imipailo ya Jesu yakaliindene kapati amipailo yaba Farisi yakulibona kuti baliluleme kwiinda bamwi

[Cifwanikiso icili apeeji 20]

Banakristo bapailila Bwami bwa Leza kuti buboole, izina lyakwe lisalazyigwe alimwi akuti ikuyanda kwakwe kucitwe