Bunakristo Bwakasimpe–Buli Mukuyaambele

MULIMO wa Jesu Kristo wakakomena cakufwambaana munyika mumwaanda wamyaka wakusaanguna. Imulumbe wakwe wakali kukatalusya, kumunikila alimwi akukulwaizya cakuti bantu bakagambwa. Ibanji bakamumvwa kaambaula bakaakkomanina kapati makani aakwe.—Matayo 7:28, 29.

Jesu cakutayoowa wakakaka kujatikizigwa mutwaambo tujatikizya zikombelo alimwi atwacisi twakuciindi naakali kupona, pele wakali kusikilika kubantu boonse. (Matayo 11:25-30) Wakazumina caantangalala kuti kwakali bweendelezi bwamyuuya mibi anyika alimwi wakatondezya kuti wakali kukonzya kwiizunda kwiinda munguzu nzyaakapedwe a Leza. (Matayo 4:2-11, 24; Johane 14:30) Jesu cabusongo wakatondezya kupenga mbokuswaangene acibi alimwi caluyando wakazyibya kuti Bwami bwa Leza mbubukonzya kuleta lwaanguluko lutamani. (Marko 2:1-12; Luka 11:2, 17-23) Cakusalazya wakaugusya mudima wakali kusinkilila bwini mbwabede Usyi kwaciindi cilamfwu, wakazyibya zina lya Leza kuli boonse bayandisya kuba acilongwe anguwe.—Johane 17:6, 26.

Aboobo tacigambyi pe kuti nokuba kuti kwakali kupenzyegwa kapati kuzwa kuli basicikombelo alimwi abasitwaambo twacisi, basikwiiya ba Jesu bakaumwaya mulumbe wakwe wakali kuyandika kapati cakufwambaana. Mumyaka iitandila ku 30 buyo, imbungano zya Banakristo basungu zyakabambwa mu Africa, Asia alimwi a Europe. (Ba-Kolose 1:23) Kasimpe nkaakayiisya Jesu kakamunikila bantu babombe myoyo mu Bulelo bwa Roma boonse.—Ba-Efeso 1:17, 18.

Pele ino mbuti basikwiiya aaba bapya bazwa mubukkale bwiindene-indene kujatikizya mali, zilengwa, kuzyiba myaambo minji alimwi abukombi mbobakali kukonzya kukamantana ‘mulusyomo lomwe,’ mbuli bwakaamba mwaapostolo Paulo? (Ba-Efeso 4:5) Ino ncinzi cakali kuyoobagwasya ‘kwaamba cintu comwe’ lyoonse kutegwa bataandaani? (1 Ba-Korinto 1:10) Akaambo kakwaandaana kupati kuli akati kabaabo balyaamba kuba Banakristo sunu, cilayandika kulanga-langa ncaakayiisya Jesu lwakwe.

Icipa Kuti Banakristo Bakamantane

Jesu naakali kubetekwa a Ponto Pilato, wakacaamba icipa kuti Banakristo kabakamantana. Wakati: “Ncendakazyalilwa, ncendakasikila ansi ano, kuti nkalungulule bwini. Boonse banabwini banoomvwa ijwi lyangu.” (Johane 18:37) Aboobo, ikuzumina zintu nzyaakayiisya Jesu alimwi azyoonse zili mu Jwi lya Leza ndyaakasololela amuuya wakwe Ibbaibbele, kulagwasya kapati ikukamantanya basikwiiya ba Kristo bakasimpe.—1 Ba-Korinto 4:6; 2 Timoteo 3:16, 17.

 Mmasimpe zimwi ziindi basikwiiya ba Jesu bakali kuba amibuzyo naa bakali kwiimpana akati kabo. Ino ncinzi cakali kuyoobagwasya? Jesu wakapandulula kuti: “Asika oyo Muuya wabwini, uzoomweenzya mubwini boonse. Nkaambo takoozoolyaamba mwini, pele uzooamba ezyo nzyati kamvwe, alimwi uzoomuyubulwida zintu iziciza.” (Johane 16:12, 13) Aboobo, muuya uusalala wa Leza wakali kuyoogwasya basikwiiya ba Jesu bakasimpe ikukateelela kabotu kasimpe mbwaakali kuya bukayubununa bucebuce Leza. Alimwi muuya ooyu wakali kuyoozyala micelo mbuli luyando, lukondo alimwi aluumuno, iyakali kuyooleta lukamantano akati kabo.—Incito 15:28; Ba-Galatiya 5:22, 23.

Jesu tanaakazumizya kuti kube kutamvwana naa kuzwangana akati kabasikwiiya bakwe; naa kubazumizya kupandulula Bbaibbele kutegwa babikkilizye zilengwa zyabo naa zyabukombi bwabantu mbobakali kuyaanya. Muciindi caboobo, imasiku aamamanino kali ambabo, wakapaila cakusinizya kuti: “Tabali aba balo mbenkombela, pele abaabo boonse abandisyoma nkaambo kejwi lyabo, kuti boonse babe bamwi, mbuli nduwe Taata mboli mulindime, amebo mulinduwe, kuti abalo mbubonya babe mulindiswe, kuti inyika ikasyome kuti nduwe owakandituma.” (Johane 17:20, 21) Aboobo ikukamantana kwini-kwini mumuuya amubwini ncecakali citondezyo cakali kubapa kuzibwa basikwiiya ba Kristo kuzwa kumatalikilo kusikila sunu. (Johane 4:23, 24) Nokuba boobo, ano mazuba zikombelo tazikamantene pe, pele zilaandeene. Ino nkaambo nzi ncokuli boobo?

Ncozyaandeene Zikombelo

Ibupanduluzi bwamasimpe bujatikizya kwaandaana kwazintu zisyomwa azicitwa akati kabaabo balyaamba kuba Banakristo sunu mbwakuti, tabazyitobeli pe ziyiisyo zya Jesu. Imulembi umwi wakati: “Mbubwena mbuli kaindi, Banakristo bamazuba aano balazizumina zyoonse zili mu Bbaibbele kufwumbwa kuti kazyeendelana anzyobayanda, pele tabazibikkili maanu eezyo ziteendelani azilengwa zyabukombi bwabo.” Eeci Jesu abaapostolo bakwe ncobakaambila limwi kuti nceciyoocitika.

Mucikozyanyo, kwiinda mukusololelwa amuuya, imwaapostolo Paulo wakalembela mulangizinyina Timoteo kuti: “Ciindi cilasika ncobati kaleke kuzumina kufundisya kwinikwini, eno bayoogama kulijanina bafundisi bali mbuli kuyanda kwamyoyo yabo beni, kuti babotelwe kubamvwa. Bayoosinka matwi aabo kumakani menimeni, bakagame kuswiilila zyamankwangwaalizya.” Sena Mbanakristo boonse bakali kuyooyenwa? Peepe. Paulo wakazumanana ulaamba: “Pele yebo kolibamba kuzintu zyoonse, kofwabalika, kosungwaalila milimo yabukambausi, kokondezesya mulimo ngowakapegwa.” (2 Timoteo 4:3-5; Luka 21:8; Incito 20:29, 30; 2 Petro 2:1-3) Timoteo alimwi a Banakristo bambi basyomeka bakalutobela lulayo oolo lwakasololelwa amuuya.

Banakristo Bakasimpe Bacikamantene

Mbubwenya mbuli Timoteo, Banakristo bakasimpe ano mazuba balalibamba kwiinda mukukaka mizeezo yabantunsi akwiinda mukuzumina buyo zyaamba Magwalo kujatikizya njiisyo nzyobasyoma. (Ba-Kolose 2:8; 1 Johane 4:1) Mukwiiya Banakristo bamumwaanda wamyaka wakusaanguna, Bakamboni ba Jehova bali mukusungwaalila mulimo wabo mumasi aayinda ku 230, ikwaambila bantu boonse mulumbe wa Jesu wakusaanguna, alo aali makani mabotu aa Bwami. Amulange-lange nzila zyone ziyandika kapati zyalo zibakamantanya kwiiya Jesu alimwi akutobela Bunakristo bwakasimpe kufwumbwa nkobakkala.

Nzyobasyoma ziyeeme a Jwi lya Leza. (Johane 17:17) Ikujatikizya mbabo, mupaizi waku Belgium wakalemba kuti: “Cintu comwe ncotunga twaiya kuli mbabo [Bakamboni ba Jehova] mbusungu bwabo bwakutobela Jwi lya Leza alimwi abusicamba mukukambauka.”

Basyoma Bwami bwa Leza kuti mbobuyooleta kukatalukwa kumapenzi aali munyika. (Luka 8:1) Mudolopo lya Barranquilla mucisi ca Colombia, Kamboni umwi wakabandika a Antonio iwakali musungu kapati munkamu yatwaambo twacisi. Kamboni kunyina naakatola lubazu munkamu eeyo alimwi kunyina naakali kulombozya muzeezo watwaambo twacisi. Muciindi  caboobo, wakalomba Antonio abacizi bakwe kuti baiye Bbaibbele kakuyina kubbadala. Mukaindi kasyoonto buyo, Antonio wakazyiba kuti Bwami bwa Leza mbobulangizi bolikke bwakali kuyandika kubantu bacete bamu Colombia alimwi amunyika yoonse.

Balalilemeka zina lya Leza. (Matayo 6:9) Bakamboni ba Jehova nobakaswaanganya Maria ciindi cakusaanguna iwakali Katolika musungu ku Australia, wakabazumizya Bakamboni kumutondezya zina lya Leza mu Bbaibbele. Ino wakalimvwa buti? “Nindakalibona zina lya Leza ciindi cakusaanguna mu Bbaibbele, ndakalila. Ndakakulwaizyigwa kapati kuba aluzibo lwakuti ndakali kukonzya kulibelesya izina lya Leza limugemi.” Maria wakazumanana kwiiya Bbaibbele alimwi cakali ciindi cakusaanguna mubuumi bwakwe kumuziba mbwabede Jehova alimwi wakakonzya kubamba cilongwe ciyumu anguwe.

Balikamantene akaambo kaluyando. (Johane 13:34, 35) Icibeela camuteende uutegwa The Ladysmith-Chemainus Chronicle, caku Canada cakaamba kuti: “Kufwumbwa naa mujisi lusyomo lwabukombi nzi, nokuba kuti tamusyomi, muleelede kubalumbaizya Bakamboni ba Jehova ibali 4,500 ibakabeleka masikati amasiku kwansondo acisela insodo yamana, nibakali kuyaka Ŋanda Yakucitila Miswaangano Mipati mu Cassidy iila busena bupati busika ku 2,300m² . . . Ikucita mulimo uuli boobu cakukondwa kakunyina kukazyanya naa kuyanda kulemekwa ncitondezyo ca Bunakristo bwakasimpe.”

Aboobo mulakonzya kububona bumboni. Nokuba kuti basikwiiya bukombi bwamu Kristendomu, bamamisyinali alimwi abaabo baunka kuzikombelo bazumanana kukatazyigwa apenzi lilangilwa lyakukazyanya muzikombelo zyabo, Bunakristo bwakasimpe buli mukuyaambele nyika yoonse. Masimpe, Banakristo bakasimpe bali mukuubeleka mulimo ngobapedwe wakukambauka akuyiisya Jwi lya Leza. (Matayo 24:14; 28:19, 20) Ikuti naa muli akati kabaabo “balila akutongela” akaambo kazintu zisesemya zicitika sunu alimwi naa mulapengana akaambo kakutakamantana kuli akati kazikombelo zya Kristendomu, twamutamba kuti mubasangane Bakamboni ba Jehova mukukomba Leza Jehova wakasimpe uuli aalikke mu lukamantano lwa Bunakristo.—Ezekiele 9:4; Isaya 2:2-4.