Kuumbulizya Ibali Mumapenzi

IBAALUMI abamakaintu bansiku basyomeka nobakali kunjila mumapenzi, bakali kulomba busolozi kuli Leza cakusinizya. Nokuba boobo, bakabweza ntaamu yakucesya mapenzi, mbuli kwiinda mukubaccija camaano basikudyaaminina. Mucikozyanyo, kusyoma Jehova kubikkilizya akusolekesya kwakwe zyakapa kuti Davida aliyumye mumapenzi aakwe. Ino mbuti swebo sunu?

Ikuti naa mwasikilwa mapenzi, kweelede kuti mulabweza ntaamo kutegwa mulimane penzi. Mucikozyanyo, ikuti kamutalembedwe mulimo, sena tamusoleki kuyandaula mulimo mubotu kutegwa mukonzye kujana nzyomuyanda amukwasyi wanu? (1 Timoteo 5:8) Antela ikuti naa mwaciswa, sena tamukonzyi kuyanda busilisi bubotu? Cilakondelezya kujana kuti Jesu walo iwakajisi nguzu kuzwa kuli Leza izyakukonzya kuponya malwazi woonse wakazuminizya kuti ‘uucisidwe nguuyandaula musilisi.’ (Matayo 9:12) Nokuba boobo, mapenzi aanu ambweni taakonzyi kumana lyoonse; mulakonzya kuyandika kuti muzumanane kuliyumya kwaciindi cili mbocibede.

Sena tamukonzyi kumwaambila makani aaya Jehova mumupailo? Mucikozyanyo, kusyoma Jehova alimwi akupaila nomuyandaula mulimo ziyoogwasya kutegwa mutazumini mulimo uukazyanya anjiisyo zya Bbaibbele. Alimwi ‘tatukaleesyegwi kulusyomo’ abulyatu naa kuyandisya mali. (1 Timoteo 6:10) Masimpe, notusala zintu zijatikizya mulimo naa mukwasy i antela kulibilika zyabuumi, tulakonzya kutobela kukulwaizya kwa Davida kwakuti: “Bika makani aako oonse mumaanza aa-Jehova, lino ulakutabilila; lyoonse takooyoozuminina baluleme kuwida mumapenzi.”—Intembauzyo 55:22.

Ikupaila camoyo woonse akwalo kuyootugwasya ikuba amizeezo iili kabotu ikutegwa penzi lyesu litaindilili kutukopa. Mbwaanga wakali Munakristo mwini-mwini, mwaapostolo Paulo wakalemba kuti: “Muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza.” Ino muunzila nzi mupailo uzwa mumoyo mbuukonzya kutuumbulizya? “Luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo  Jesu.” (Ba-Filipi 4:6, 7) Luumuno lwa Leza ‘lulainda miyeeyo yoonse yabantu.’ Aboobo, lulakonzya kutuyumya notupenzyegwa amizeezo. ‘Luyooyaminina myoyo yesu amiyeeyo yesu,’ eelyo luyootugwasya kuleka kucita zintu cakubindaana alimwi citali cabusongo calo cikonzya kuyungizya buyo penzi.

Mupailo ulakonzya kugwasya kapati kutegwa zintu zyeende kabotu. Mwaapostolo Paulo naakali muntolongo ku Roma, cakulibombya wakalomba Banakristonyina kuti kabamupailila. Nkaambo nzi Paulo ncaakalombela boobu? Wakabalembela kuti: “Ndamwaambilizya kucita bobuya, kuti nkafwaambaane kuboozegwa kulindinywe.” (Ba-Hebrayo 13:19) Munzila imwi inga twaamba kuti, Paulo wakalizi kuti ikumvwa mipailo kwa Jehova lyoonse kuzwa kubakombinyina kulakonzya kugwasya kutegwa aangununwe cakufwambaana.—Filimona 22.

Sena mupailo ulakonzya kupa kuti penzi lyesu licince? Inzya ulakonzya. Pele, tweelede kuyeeya kuti Jehova Leza ulakonzya kwiingula mipailo yesu munzila njotutayeeyi. Paulo wakabupailila ‘bumvwa mumubili’ mbwaakajisi kwaziindi zinji, ambweni lyakali penzi lyakumubili. Muciindi cakubugusya bumvwa, Leza wakaambila Paulo kuti: “Lulakuzulila luzyalo lwangu, nkaambo inguzu zyangu zilaswiililika loko mukati kabukompami.”—2 Ba-Korinto 12:7-9.

Aboobo, penzi lyesu ambweni inga talimani ndilyonya pe. Nokuba boobo, tunoojisi ciindi cakusinizya kuti tusyoma Taateesu wakujulu. (Jakobo 1:2-4) Amusyome kuti nokuba kuti Jehova Leza takonzyi kuligusya penzi, “ulamupa nzila yamatijilo, kuti mukakonzye kuvwunwa.” (1 Bakolinti 10:13, Ci) Nkakaambo kaako Jehova ncategwa “Leza siluumbulizyo loonse. Nguwe uutuumbulizya mumapenzi esu oonse.” (2 Ba-Korinto 1:3, 4) Leza ulakonzya kutupa ncotuyanda kutegwa tuliyumye alimwi tulijisi bulangizi bwabuumi butamani.

Ijwi lya Leza Bbaibbele lisyomezya kuti Jehova “uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.” (Ciyubunuzyo 21:3, 4) Sena kwaamba zyanyika iitakwe mapenzi cimvwika kuti ncintu citakonzyeki? Cilakonzya kumvwika boobo ikuti naa mwakazibila kukkala mumapenzi. Pele, Leza usyomezya kuti ikuyoowa alimwi amapenzi tazicinooliko alimwi makanze aakwe ayoozwidilila ncobeni.—Isaya 55:10, 11.

[Cifwanikiso icili apeeji 9]

Kuzwa kukuusa wakatalusyigwa