“Muzike Musyomesi” Wazwidilila Mumusunko!
“Muzike Musyomesi” Wazwidilila Mumusunko!
“Casika ciindi calubeteko, nkabela lulatalika kuciinga ca-Leza.”—1 PETRO 4:17.
1. Ino ncinzi Jesu ncaakajana naakamulingula “muzike”?
LYA Pentekoste mu 33 C.E., Jesu wakasala “muzike” wakwaabila cakulya aaciindi ceelede kuli “basiŋanda” bakwe. Mu 1914, Jesu wakabikkwa kuba Mwami, aboobo muciindi cisyoonto kwakaba kumulingula “muzike” ooyo. Muzibeela zinji kapati, wakajana kuti “muzike” wakali “musyomesi uucenjede.” Aboobo, wakamusala kulanganya “zintu zyoonse nzyajisi.” (Matayo 24:45-47) Pele, alimwi kuli umbi muzike mubi, ooyo watakali kusyomeka alimwi watakacenjede.
“Oyo Muzike Mubi”
2, 3. Nkuukuli “oyo muzike mubi” nkwaakazwa, alimwi cakacitika buti eeco?
2 Jesu wakakanana zyamuzike mubi mbwaakamanina buyo kubandika “muzike musyomesi uucenjede.” Wakati: “Kuti oyo muzike mubi ulaamba mumoyo wakwe kuti, Mwami wangu wamuka, nkabela ulasaanguna kuuma bazikenyina akulya akunywa aabo bakolwi, lino mwami wamuzike oyo uzoosika mubuzuba mbwatalangili akuciindi ncatezi, nkabela [uuyoomusubula acisubulo cipati, NW] akumwaabila mbuli mbubaabilwa basikuupaupa ameso. Oko kuyooba kulila akuluma ntwino.” (Matayo 24:48-51) Ikaambo kakuti “oyo muzike mubi” katupa kubikkila maano kumajwi aa Jesu aakusaanguna aa muzike musyomesi uucenjede. Masimpe, “muzike mubi” wakazwa muciinga camuzike musyomesi. * Munzila nzi?
3 Kautanasika mwaka wa 1914, ibanji bacibeela caciinga camuzike musyomesi bakajisi bulangizi bupati bwakuswaangana a Sibwiinga kujulu mumwaka ooyo, pele bulangizi bwabo tiibwakazuzikizyigwa pe. Akaambo kaceeci atwaambo tumbi twakacitika, ibanji bakatyompwa alimwi ibasyoonto bakabijilwa buya. Bamwi akati kabo bakatalika “kuuma” ibakali banyina kwiinda mumajwi alimwi akuyanzana “[a]bakolwi,” tukamu twabukombi bwa Kristendomu.—Isaya 28:1-3; 32:6.
4. Ino Jesu wakamucita buti “muzike mubi” alimwi abaabo boonse batondezya muuya uukozyenye?
4 Aaba bakali Banakristo kaindi bakazoozibwa kuti “muzike mubi,” alimwi Jesu wakabasubula “cisubulo cipati.” Munzila nzi? Wakabakaka alimwi bakasweekelwa bulangizi bwabo bwakujulu. Pele, tiibakanyonyoonwa ndilyonya. Cakusaanguna bakeelede kusikilwa ciindi cakulila akuluma ntwino “mumudima waanze” lyambungano ya Bunakristo. (Matayo 8:12) Kuzwa kumazuba aamatalikilo aayo, bananike bambi basyoonto batondezya muuya mubyaabi uuli boobo, akulitondezya kuba kulubazu lwa “muzike mubi.” Bamwi iba “mbelele zimwi” baiya ikutasyomeka kwabo. (Johane 10:16) Basinkondonyina ba Kristo boonse bali boobo balalijana “mumudima waanze” wakumuuya.
5. Ino muzike musyomesi uucenjede wakalimvwa buti, kwiindana “[a]muzike mubi”?
5 Pele, muzike musyomesi uucenjede wakasunkwa masunko aakozyenye ayaayo akasunkwa “muzike mubi.” Muciindi cakubijilwa, bakalulamikwa. (2 Ba-Korinto 13:11) Luyando lwabo kuli Jehova akubanyina lwakayumizyigwa. Aboobo, kuzwa leelyo bali “ngomusemu, alimwi ncecisiko calusinizyo” muciindi eeci cikataazya “kumazuba aakumamanino.”—1 Timoteo 3:15; 2 Timoteo 3:1.
Basimbi Basongo Abafwuba-fwuba
6. (a) Ino mbuti Jesu mbwaakakupandulula kucenjela kwaciinga cakwe camuzike musyomesi? (b) Kautanasika mwaka wa 1914, ino mmulumbe nzi Banakristo bananike ngobakakambauka?
6 Naakamana kukanana zya “oyo muzike mubi,” Jesu wakapa zikozyano zyobile ikutondezya ikaambo Banakristo bananike bamwi ncobakali kuyoosyomeka akucenjela kakuli bamwi pe. * Ikutegwa apandulule kucenjela, wakati: “Bwami bwakujulu buzookozyanisigwa abasimbi bali ikumi ibakabweza malampi aabo kuti baye kuyoocinga si[bwiing]a. Nkabela bosanwe akati kabo kabali basongo, bamwi bosanwe kabali bafubafuba. Nkaambo abo bafubafuba nibakabweza malampi aabo teebakabweza mafuta, pele basongo bakabweza mafuta munsazi zyabo antoomwe amalampi aabo.” (Matayo 25:1-4) Basimbi bali kkumi batuyeezya Banakristo bananike kautanasika mwaka wa 1914. Bakajana kuti sibwiinga, Jesu Kristo, wakali afwaafwi kulibonya. Aboobo, ‘bakaya’ kuyoomucinga, kabakambauka cabusicamba kuti “ciindi cabamasi” ciyoomana mu 1914.—Luka 21:24.
7. Ino ndiilili alimwi nkaambo nzi Banakristo bananike ‘ncobakoona,’ munzila yacikozyanyo?
7 Bakaliluzi. Ciindi cabamasi cakamana mu 1914, alimwi Bwami bwa Leza kwiinda muli Kristo Jesu bwakatalika kubeleka. Pele cakacitika cakutalibonya kujulu. Anyika, bantu bakatalika kupenga “mapenzi” aakasinsimwa. (Ciyubunuzyo 12:10, 12) Ciindi cakusunkwa cakatobela. Kakunyina kuzimvwisya kabotu zintu, Banakristo bananike bakayeeya kuti ‘sibwiinga wamuka kusika.’ Kabanyongene alimwi akukazyigwa kuzwa kunyika, bakajoka munsi akucileka kukambauka kubuleya. Mbuli basimbi mucikozyano, kwaamba munzila yakumuuya ‘bakafwukula akoona,’ mbubwenya mbuli Banakristo batasyomeki mbobakacita nobakamana kufwa baapostolo.—Matayo 25:5; Ciyubunuzyo 11:7, 8; 12:17.
8. Ino ncinzi cakapa koongolola kuti: “Amulange, ngooyu si[bwiing]a!” alimwi cakali ciindi cakuti nzi ku Banakristo bananike?
8 Mpoona mu 1919 cimwi cintu catali kulangilwa cakacitika. Tubala kuti: “Nkabela akati kamasiku kwakamvwigwa loongololo lwakuti, Amulange, ngooyu si[bwiing]a! amuzwe mukamucinge. Lino abo basimbi boonse bakabuka akubamba malampi aabo.” (Matayo 25:6, 7) Aciindi nokwakalibonya kuti takucikwe bulangizi, nceciindi nokwakamvwigwa koongolola kwakuti amulange! Mu 1918, Jesu, “mutumwa wacizuminano,” wakaboola kutempele lyakumuuya lya Jehova kuzoolingula akusalazya mbungano ya Leza. (Malaki 3:1) Lino, Banakristo bananike bakali kuyandika kuzwa akuyoomucinga mulubuwa lwaanyika lwa tempele eelyo. Cakali ciindi kulimbabo ‘cakumunika.’—Isaya 60:1; Ba-Filipi 2:14, 15.
9, 10. Mu 1919, ino nkaambo nzi Banakristo bamwi ncobakali “basongo” alimwi bamwi “bafubafuba”?
9 Pele amulindile! Mucikozyano, bamwi basimbi bakajisi penzi. Jesu wazumanana: “Elyo bafubafuba bakaambila basongo kuti, Amutwaabile mafuta aanu, nkaambo malampi esu azima.” (Matayo 25:8) Kakunyina mafwuta, malampi taakonzyi kumunika pe. Aboobo mafwuta aamumalampi atuyeezya Jwi lya Leza lyakasimpe alimwi amuuya wakwe uusalala, uupa bakombi bakasimpe nguzu zyakumunika mumuni. (Intembauzyo 119:130; Daniele 5:14) Kautanasika mwaka wa 1919, Banakristo bananike bacenjede bakayandaula cabusungu kuti babone makanze Leza ngaakajisi kulimbabo, nokuba kuti kwaciindi cilimbocibede bakali kompeme. Aboobo, nobakaitwa kuti bamunike mumuni wabo, bakalilibambilide.—2 Timoteo 4:2; Ba-Hebrayo 10:24, 25.
10 Pele, bananike bamwi teebakalibambilide kulyaaba antela kubeleka canguzu, nokuba kuti bakali kulombozya kapati kuba a Sibwiinga. Aboobo nocakasika ciindi cakusungwaala mukukambauka makani mabotu, teebakalibambilide pe. (Matayo 24:14) Mane bakasola buya kubatyompya beenzinyina bakasungweede, aboobo cakali mbuli kuti babalomba mafwuta. Mucikozyano ca Jesu, ino basimbi basongo aaba bakaingula buti? Bakati: “Ambweni taakoozulila aswebo anywebo. Kamuya kubasambazi, mulyuulile nubeni.” (Matayo 25:9) Mbubwena buyo, Banakristo bananike basyomeka mu 1919 bakakaka kucita kufwumbwa cintu cakali kuyoobamanina nguzu zyakumunika mumuni. Aboobo, bakazwidilila mukusunkwa.
11. Ino ncinzi cakacitika kubasimbi bafwubafwuba?
11 Jesu wamanizya kuti: “Lino [basimbi bafwufwuba] nibakacili kukuula, si[bwiing]a wakasika. Mpawo abo ibakalibambilide bakanjila awe mupobwe, nkabela mulyango wakajalwa. Lino musule abo basimbi bamwi bakasika abalo, bati, Mwami, Mwami, tujulile. Pele wakavuwa kuti, Ncobeni ndamwaambila kuti nsimuzi. Nkaambo kaako amulangile, nkaambo tamuzi buzuba niciba ciindi.” (Matayo 25:10-12) Ee, bamwi teebakalibambilide kuboola kwa Sibwiinga. Aboobo, teebakazwidilila mukusunkwa alimwi bakasweekelwa coolwe cakujanika kupobwe lyabwiinga kujulu. Elo kaka cakabija kapati!
Cikozyano Camatalenta
12. (a) Ino ncinzi Jesu ncaakabelesya ikupandulula kusyomeka? (b) Ino nguni muntu ooyo wakaya “kucisi cimwi”?
12 Naakamana kupandulula makani aakucenjela, Jesu wakazumanana kubandika aakusyomeka. Wakati: “Kulikozyene amuntu iwakaamba kuya kucisi cimwi, elyo wakaita bazike bakwe, wakabaabila imbono zyakwe. Umwi wakamupa matalenta osanwe, umwi obile, aumwi lyomwe. Umwi aumwi wakapegwa mbuli inguzu zyakwe. Mpawo wakainka.” (Matayo 25:14, 15) Muntu waambwa mucikozyano ngu Jesu kumugama, ooyo “wakainka” ciindi naakatanta kujulu mumwaka wa 33 C.E. Pele katanaunka, Jesu wakapa basikwiiya bakwe basyomeka “zintu zyoonse nzyajisi.” Munzila nzi?
13. Ino mbuti Jesu mbwaakabamba muunda mupati wamulimo alimwi akuzumizya “bazike” bakwe kubelesya matalenta?
13 Naakali mumulimo wakwe anyika, Jesu wakatalika kubamba muunda mupati wamulimo kwiinda mukukambauka makani mabotu aa Bwami munyika ya Israyeli yoonse. (Matayo 9:35-38) Katana “kuya kucisi cimwi,” wakapa muunda ooyo kuli basikwiiya bakwe basyomeka, kaamba kuti: “Nkaambo kaako kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila.” (Matayo 28:18-20) Kwiinda mumajwi aaya, Jesu wakazumizya “bazike” bakwe kubelesya matalenta kusikila akaboole, “umwi aumwi wakapegwa mbuli inguzu zyakwe.”
14. Nkaambo nzi boonse ncobatakali kulangilwa kucita mulimo weelene?
14 Kaambo aako katondezya kuti tabali boonse Banakristo mumwaanda wamyaka wakusaanguna bakajisi bukkale anguzu zyeelene. Bamwi mbuli Paulo a Timoteo, bakalaangulukide kuba aciindi cinji cakutola lubazu mumulimo wakukambauka akuyiisya. Ibukkale bwabamwi bulakonzya kuti bwakabalesya kuba baangulukide kapati kutola lubazu. Mucikozyano, Banakristo bamwi bakali bazike, ibamwi bakali kuciswa-ciswa, bakalicembeede, naa bakajisi mikuli yamumukwasyi. Masimpe, tabali basikwiiya boonse bakeelede kulanganya mikuli imwi mumbungano. Bananike banakazi abaalumi bamwi tiibakali kuyiisya mumbungano. (1 Ba-Korinto 14:34; 1 Timoteo 3:1; Jakobo 3:1) Pele, kufwumbwa mubukkale mobakabede, basikwiiya ba Kristo boonse ibananike, baalumi abanakazi, bakapegwa mulimo wakubeleka, kuzibelesya kabotu zyoolwe abukkale bwabo mumulimo wa Bunakristo. Abalo beenzinyina bamazubaano balacita mbubonya.
Ciindi Cakulingulwa Catalika!
15, 16. (a) Ndiilili notwakeelede kubambwa twaambo? (b) Ino nzyoolwe nzi zyamulimo ‘zyakubelesya matalenta’ zyakapegwa kubantu basyomeka?
15 Cikozyano cilazumanana: “Lino nicakaba ciindi cilamfu mwami wabazike abo wakasika, wabalingula.” (Matayo 25:19) Mu 1914, masimpe kakwiindide ciindi cilamfwu kuzwa mu 33 C.E., kubako kwabwami bwa Kristo Jesu kwakatalika. Kwiinde myaka yotatwe acisela, mu 1918, wakaboola kutempele lya Leza lyakumuuya akuzuzikizya majwi aa Petro aakuti: “Casika ciindi calubeteko, nkabela lulatalikila kuciinga ca-Leza.” (1 Petro 4:17; Malaki 3:1) Cakali ciindi cakubamba twaambo.
16 Ino mbuti bazike, ibanyina Jesu bananike, mbobakaabelesya “matalenta” aa Mwami? Kuzwa mu 33 C.E. kuyakumbele, kubikkilizya amyaka yakasololela ku 1914, ibanji bakali kubeleka canguzu ‘mukubelesya matalenta’ Jesu ngaakabapa. (Matayo 25:16) Nociba ciindi cankondo yanyika yakusaanguna, bakatondezya luyandisyo lunji lwakubelekela Mwami. Lino, cakali kweelela kupa bantu basyomeka zyoolwe ‘zyakubelesya matalenta.’ Mamanino aabweende bwazintu oobu akasika. Makani mabotu akaleelede kukambaukwa munyika yoonse. ‘Ikutebula munyika’ kwakeelede kucitwa. (Ciyubunuzyo 14:6, 7, 14-16) Ibantu bamamanino ibaciinga camaila bakeelede kujanwa alimwi “inkamu impati” yambelele zimwi yakeelede kuyobololwa.—Ciyubunuzyo 7:9; Matayo 13:24-30.
17. Ino mbuti Banakristo bananike basyomeka ‘mbobanjila mubusekelezi bwa mwami wabo’?
17 Ciindi cakutebula nciindi cikondelezya. (Intembauzyo 126:6) Aboobo cileelela kuti, mu 1919 ciindi Jesu naakapa banyina bananike basyomeka mikuli iiyungizyidwe, wakati: “Wakasyomeka kuzintu zice, ndakukazika kuti ube azintu zinji, njila mubusekelezi bwamwami wako.” (Matayo 25:21, 23) Kuyungizya waawo, kukondwa kwa Mwami mbwali Mwami mupya uubikkidwe mu Bwami bwa Leza nkupati kwiinda mbotukuyeeyela. (Intembauzyo 45:1, 2, 6, 7) Ciinga camuzike musyomesi balajana lukkomano oolo kwiinda mukumwiiminina Mwami alimwi akuyungizya zintu zyakwe anyika. (2 Ba-Korinto 5:20) Ikukkomana kwabo kulalibonya mumajwi aabusinsimi aali kubbuku lya Isaya 61:10: “Kusekelela njoosekelela muli-Jehova, amoyo wangu uyookondwa muli-Leza wangu, nkaambo wandisamika zyakusama zyalufutuko.”
18. Ino nkaambo nzi bamwi ncobakaalilwa kuzwidilila mukulingulwa, alimwi ncinzi cakatobela?
18 Cuusisya ncakuti, bamwi teebakazwidilila mumusunko. Tubala kuti: “Oyo iwakatambwide italenta lyomwe wakasika, wakati, Mwami, ndakuziba kuti uli muntu muyumu, ulatebula nkotabyala akubunganya nkotaminza, nkabela ndakayoowa, ndakaya kuyoosisa munyika italenta lyako. Langa, ndeeli lyako!” (Matayo 25:24, 25) Mbubwena buyo, Banakristo bananike bamwi teebakatola lubazu ‘mukubelesya matalenta.’ Kautanasika mwaka wa 1914, teebakasungwaala kwaambila bamwi bulangizi bwabo, alimwi teebakayanda kutalika mu 1919. Ino Jesu wakacita buti akaambo kabusicinguni kwabo? Wakabanyanga mikuli yabo yoonse. ‘Bakasowelwa mumudima waanze, ooko nkobakali kuyoolila akuluma ntwino.’—Matayo 25:28, 30.
Ikulingula Kwazumanana
19. Ino muunzila nzi ikulingula mbokuzumanana, alimwi ncinzi Banakristo bananike ncobakanzide kucita?
19 Mubwini, ibunji bwabaabo ibakali kuyooba bazike ba Kristo bananikidwe muciindi camamanino teebakali kubelekela Jehova ciindi Jesu naakatalika kulingula mu 1918. Sena bakaindwa coolwe eeci cakulingula? Peepe. Ikulingula kwakatalika buyo mu 1918/19, eelyo muzike musyomesi uucenjede kakali kakamu nokakazwidilila mumusunko. Munakristo munanike umwi aumwi ulazumanana kulingulwa kusikila nokuyoomana kugwalwa. (Ciyubunuzyo 7:1-3) Mbwaanga balizi oobu, banyina Kristo bananike balikanzide kuzumanana ‘kubelesya matalenta’ cakusyomeka. Balikanzide kuba bacenjede, akubamba mafwuta manji kutegwa mumuni umunikisye. Balizi kuti umwi aumwi aakusyomeka kusikila kulufwu, Jesu uyoomutambula kujulu.—Matayo 24:13; Johane 14:2-4; 1 Ba-Korinto 15:50, 51.
20. (a) Ino ncinzi bambelele zimwi ncobakanzide kucita sunu? (b) Ncinzi Banakristo bananike ncobazi?
20 Inkamu mpati yambelele zimwi yabaiya banyina ibananike. Balizi kuti luzibo lwabo lwamakanze aa Leza luleta mukuli mupati. (Ezekiele 3:17-21) Aboobo, kwiinda mulugwasyo lwa Jwi lya Jehova amuuya uusalala, abalo balabamba mafwuta aabo manji kwiinda mukwiiya akuswaangana. Alimwi balamunika mumuni wabo, ikutola lubazu mumulimo wakukambauka akuyiisya. Aboobo, ‘balabelesya matalenta’ antoomwe abanyina bananike. Pele, Banakristo bananike balizi kabotu kuti matalenta akapegwa kulimbabo. Baleelede kupa bwiinguzi kujatikizya zintu zya Mwami anyika nzyobakapegwa kulanganya. Nokuba kuti mweelwe wabo musyoonto, tabakonzyi kulekela mulimo wabo kunkamu mpati. Kabakayeeyede kaambo aaka, muzike musyomesi uucenjede wazumanana kusololela mukulanganya mulimo wa Mwami, akulumba kapati kulugwasyo ndobapegwa kunkamu mpati. Aaba balizi mukuli wabanyina bananike alimwi bacibona kuti ncoolwe cipati kubeleka mubusolozi bwabo.
21. Ino nkukulwaizya kuli ikubeleka ku Banakristo boonse kutalikila kautanasika mwaka wa 1919 mane kusikila sunu?
21 Aboobo, nokuba kuti zikozyano zyobile eezi zilatuzibya zintu zyakacitika mu 1919, naa nowakainda-inda buyo, njiisyo zili muzikozyano eezi zilabeleka ku Banakristo boonse bakasimpe mumazuba aakumamanino. Munzila eeyi, nokuba kuti kukulwaizya nkwaakapa Jesu kumamanino aacikozyano cabasimbi bali kkumi kulabeleka ikapati ku Banakristo bananike kautanasika mwaka wa 1919, njiisyo iiliko icibeleka ku Munakristo umwi aumwi. Toonse atutobele majwi aa Jesu aakuti: “Nkaambo kaako amulangile, nkaambo tamuzi buzuba niciba ciindi.”—Matayo 25:13.
Bupanduluzi buyungizidwe
^ munc. 2 Munzila iikozyenye, nobakamana kufwa baapostolo, “baumpe babutambo” bakazwa kuciinga cabaalu Banakristo bananike.—Incito 20:29, 30.
^ munc. 6 Kujatikizya mubandi aumbi wacikozyano ca Jesu, amubone bbuku lyamu Chichewa lyakuti Chisungiko cha Padziko Lonse mu Ulamuliro wa “Kalonga wa Mtendere,” lyakamwaigwa a Bakamboni ba Jehova, cibalo 5 a 6.
Sena Inga Mwapandulula?
• Ndiilili Jesu naakalingula batobeli bakwe, alimwi ncinzi ncaakajana?
• Ino nkaambo nzi Banakristo bananike bamwi ncobakaba amuuya mbuli wa “oyo muzike mubi”?
• Ino mbuti mbotunga twatondezya kuti tulicenjede kumuuya?
• Ikwiiya banyina Jesu bananike ibasyomeka, ino muunzila nzi mbotunga twazumanana ‘kubelesya matalenta’?
[Mibuzyo yaciiyo]
Kabbokesi kali apeeji 29]
INO JESU UBOOLA LILI?
Kubbuku lya Matayo caandaano 24 alimwi a 25, Jesu waambwa kuti ‘ulaboola’ munzila ziindene. Tayandiki kuti anyamuke buya ikutegwa ‘aboole’ pe. Pele, ‘ulaboola’ mukuti uyoobikkila maano kubantu naa kuli basikwiiya bakwe, ikapati ikutegwa ababeteke. Aboobo, mu 1914 ‘wakaboola’ kutegwa atalike kubako kali Mwami uubikkidwe acuuno. (Matayo 16:28; 17:1; Incito 1:11) Mu 1918, ‘wakaboola’ kali mutumwa wacizuminano akutalika kubeteka baabo ibakali kulyaamba kuti babelekela Jehova. (Malaki 3:1-3; 1 Petro 4:17) Ilya Harmagedoni, ‘uyooboola’ kutegwa azikubeteke basinkondonyina a Jehova.—Ciyubunuzyo 19:11-16.
Ikuboola (ikusika) ikwaambwa ziindi zinji kubbuku lya Matayo 24:29-44 alimwi a 25:31-46 kupandulula ilya “mapenzi mapati.” (Ciyubunuzyo 7:14) Munzila imwi, ikuboola ikwaambwa ziindi zinji kubbuku lya Matayo 24:45 kusikila ku 25:30 kujatikizya kubeteka baabo ibakali kulitamikizya kuti mbaasikwiiya kuzwa mu 1918 kuyakumbele. Mucikozyanyo, tacikonzyi kugwasya kwaamba kuti, ikupa bulumbu muzike musyomesi, ikubetekwa kwabasimbi bafwubafwuba alimwi akubetekwa kwamuzike mutolo iwakasisa talenta lya Simalelo kuyoocitika Jesu ‘aakuboola’ ilyamapenzi mapati. Eeci inga capandulula kuti bunji bwabananike bayoojanika kuti tabasyomeki aciindi eeco, aboobo kuyooyandika babalida masena. Nokuba boobo, ibbuku lya Ciyubunuzyo 7:3 litondezya kuti bazike ba Jesu bananike ‘banoogwedwe’ kale ciindi eeco.
[Cifwanikiso icili apeeji 27]
“Muzike mubi” tanaakapegwa zilongezyo mu 1919
[Cifwanikiso icili apeeji 28]
Basimbi basongo bakalilibambilide sibwiinga naakasika
[Cifwanikiso icili apeeji 30]
Bazike basyomeka ‘bakaabelesya matalenta’
Muzike mutolo tanaakacita boobo
[Zifwanikiso izili apeeji 31]
Bananike aba “inkamu impati” bazumanana kumunika mumuni wabo