Nkaambo nzi Bakamboni ba Jehova Ncobazumanana Kumuswaya?

IKUZUMANANA kuswaya mumulimo waku ŋanda aŋanda Bakamboni ba Jehova nkobacita, kulizibidwe munyika yoonse. Bantu bambi balakatazyigwa ikaambo Bakamboni ncobazumanana kubaswaya, ikapati ikuti naa musyule bakalitondezyede buyo luyandisisyo lusyoonto mumulumbe wa Bakamboni. Imagwalo obilo akazwa ku Russia alagwasya kupandulula kaambo.

Masha musimbi uujisi myaka iili 19 iwaku Khabarovsk ulazumina ategwa: “Kwaamba masimpe, kaindi Bakamboni ba Jehova ndakali kubaccija mbuli munyama.” Nokuba boobo, naakabala mamagazini masyoonto buyo aakamwaigwa a Bakamboni, wakacinca ciimo cakwe. Masha wakalemba kuti: “Zyoonse nzyondakabala zyakali kukondelezya, pele cipati ncakuti makani aali mukati alapa kuti nyika wiibone bumbi. Asyoonto-syoonto ndakatalika kukabona kaambo bantu ncobaponena.”

Svetlana uuzwa kudolopo lya Ussuriysk imakkilomita aatandila ku 80 kuzwa ku Vladivostok nkwiili kunyika wakalemba kuti: “Ndakatalika lino kubala Ngazi Yamulindizi alimwi a Awake! Mamagazini aaya alayandika kapati muciindi cesu cino. Ndilazikkomanina zibalo zyoonse. Zilakondelezya, zilapa luzibo alimwi akulaya. Ndalumba. Ndalumba kapati akaambo kakuti nkomuli munyika amulimo wanu mubotu alimwi uuyandika ngomucita.”

Bakamboni ba Jehova munyika yoonse balabikkila maano kapati kumubuzyo wamwaapostolo Paulo uukkazika aansi kuyeeya iwakuti: “[Bantu] bamvwe buti nikutakwe sikukambauka?” (Ba-Roma 10:14) Sena tamukonzyi kuyooswiilila kwaciindi cisyoonto buyo Bakamboni baakumuswaya ciindi ciboola? Andinywe mulakonzya kuukkomanina mulumbe uumbulizya uujanika mu Jwi lya Leza Ibbaibbele.