Amuutantamuke Muuya Wanyika Iili Mukucinca

“Iswe, muuya ngututambwide teensi muuya waansi ano pe, ngu-Muuya uuzwa kuli-Leza.”—1 BA-KORINTO 2:12.

1. Muunzila nzi Eva mwaakeenwa?

“INZOKA njiyakandoongelezya.” (Matalikilo 3:13) Kwiinda mumajwi masyoonto aayo, mwanakazi wakusaanguna Eva, wakasola kupandulula cakamupa kuzangila Jehova Leza. Ncaakaamba cakali masimpe, nokuba kuti tiicakamwaangulula kukulubizya kwakwe. Kumbele, mwaapostolo Paulo wakasololelwa kulemba kuti: “[Eva] nguwakeenwa.” (1 Timoteo 2:14) Wakeenwa kuti asyome kuti ikuzanga, kwiinda mukulya mucelo wakakasyidwe, kwakali kuyoomujanya mpindu akumupa kuba mbuli Leza. Alimwi wakeenwa kujatikizya muntu wini-wini wakamucenga. Tanaakaziba kuti nzoka cakali buyo caambawido ca Saatani Diabolosi.—Matalikilo 3:1-6.

2. (a) Ino mbuti Saatani mbweena bantu sunu? (b) Ino “muuya waansi ano” ncinzi, alimwi mmibuzyo nzi njotutiilange-lange lino?

² Kuzwa ciindi ca Adamu a Eva, Saatani wazumanana kweena bantu. Mubwini, ngonguwe “nguuena bantu boonse baansi.” (Ciyubunuzyo 12:9) Inzila zyakwe zyabucenjezu tazicincide. Nokuba kuti tabelesyi nzoka iini kwiigama, wazumanana kulisisa. Kwiinda mukubelesya zyakulikondelezya, sikapepele anzila zimwi, Saatani ulabeena bantu kusyoma kuti tabayandiki antela tabagwasyigwi abusolozi bwa Leza bwaluyando. Ikusolekesya kwa Diabolosi kwalweeno ikwazumanana kwapa bantu koonse-koonse kuba amuuya wakuzangila milawo yamu Bbaibbele alimwi anjiisyo. Eeci Ibbaibbele licaamba kuti “muuya waansi ano.” (1 Ba-Korinto 2:12) Muuya ooyu ulazijatikizya kapati nzyobasyoma, mbobazilanga zintu alimwi akulilemeka kwabaabo ibatamuzi Leza. Ino mbuti muuya ooyo mboutondezyegwa alimwi mbuti mbotukonzya kukutantamuka kuyungwa kwawo ikunyonyoona? Atubone.

Ikulilemeka Kwayaansi

3. Nkaambo nzi “muuya waansi” ncowaindila kulibonya mazubaano?

³ Mazubaano, “muuya waansi” waindilila kulibonya. (2 Timoteo 3:1-5) Cakutadooneka, mulibwene kuti kulilemeka kwayaansi. Magwalo alapandulula ncocili boobo. Nobwakakkazyikisyigwa Bwami bwa Leza mumwaka wa 1914, kwakabuka nkondo mujulu. Saatani amadaimonaakwe bakazundwa akusowelwa munyika. Kanyemede kapati, Saatani wazumanana kusolekesya mukuleta lweeno munyika yoonse. (Ciyubunuzyo 12:1-9, 12, 17) Munzila iili yoonse njakonzya, ulikanzide ‘kuti kwakonzyeka ikubeena nobaba basale.’ (Matayo 24:24) Mbotuli bantu ba Leza, ndiswe mbayandide kapati. Ulasolekesya kutulesya kubikkila maano kuzintu zyakumuuya kutegwa Jehova aleke kutukkomanina akuti tusweekelwe bulangizi bwabuumi butamani.

4. Ino babelesi ba Jehova balibona buti Bbaibbele, alimwi ino nyika yalo ilibona buti?

⁴ Saatani ulasola kunyansya Bbaibbele, ibbuku liyandisi lituyiisya zya Mulengi wesu siluyando. Babelesi ba Jehova balaliyanda akulibikkila maano Bbaibbele. Tulizi kuti ndi Jwi lya Leza lyakasololelwa amuuya uusalala, talili majwi aabantu. (1 Ba-Tesalonika 2:13; 2 Timoteo 3:16) Pele nyika ya Saatani iyanda kuti katuyeeya munzila iimpene. Mucikozyanyo, majwi aamatalikilo mubbuku lisampaula Bbaibbele aamba kuti: “Kunyina ‘cisetekene’ kujatikizya Bbaibbele, alimwi talili ‘jwi lya Leza.’ Tiilyakalembwa abasaante bakasololelwa a Leza, pele abapaizi bakali kuliyandawida mpuwo.” Aabo basyoma majwi aali boobo balakonzya kucengwa kapati kuyeeya munzila iilubide kuti balaangulukide kukomba Leza munzila iili yoonse iibakkomanisya, antela kutamukombela limwi buya.—Tusimpi 14:12.

5. (a) Ino ncinzi ncaakaamba mulembi wamabbuku umwi kujatikizya bukombi bubelesya Bbaibbele? (b) Ino mbuti mizeezo imwi iidumide munyika mboyiimpene ancolyaamba Bbaibbele? (Amubikkilizye akabbokesi kali apeeji litobela.)

 ⁵ Kulwana Bbaibbele cacigaminina amunzila iitagaminide, kubikkilizya akuupaupa ameso mubukombi kwabaabo balyaamba kulitobela, kwapa kuti kukaka bukombi kuyaambele, kubikkilizya abukombi bubelesya Bbaibbele. Muli sikapepele akubantu bayiide kapati, bukombi buli mukulwanwa. Mulembi wamabbuku umwi waamba kuti: “Bukombi bwaci Juda a Bunakristo ibudumide mubukkale bwabantu bulangwa munzila iitali kabotu. Bubonwa kuti mbukkale bukulukulu; alimwi ibutaciyandiki ibusinkilila kujuka mumizeezo alimwi akuyaambele mumakani aasayaansi. Mumyaka yalino-lino, ikulimvwa boobu kwapa kuti bantu kabasampaula akukazya kapati caantangalala.” Kukazya ooku kanji-kanji kuzwa kuli baabo ibatasyomi kuti Leza nkwali alimwi ‘ibayeeya miyeeyo yabuyo.’—Ba-Roma 1:20-22.

6. Ino nyika yiibona buti micito yakoonana eeyo Leza njatayandi?

⁶ Aboobo, tacigambyi pe kuti bantu bazumanana kuleya kuzyeelelo zya Leza zyakulilemeka. Mucikozyanyo, Ibbaibbele lipandulula koonana kwabaalumi balikke kuti “milimo iitondwa.” (Ba-Roma 1:26, 27) Alimwi lyaamba kuti aabo bacita bwaamu abumambe tabakanjili mu Bwami bwa Leza. (1 Ba-Korinto 6:9) Nokuba boobo, mumasi manji micito eeyo yakoonana taibonwi buyo kuti ililuzi pele ipandululwa kuti ilakondelezya mumabbuku, mamagazini, nyimbo, mabbasikopo alimwi aacipekupeku. Aabo baamba cabusicamba kukazya micito iili boobo babonwa kuti tabayeeyi kapati, bajisi mizeezo iilubide akuti balisyaalide kapati mukuyeeya kwamazubaano. Muciindi cakubona zyeelelo zya Leza kuba citondezyo cakubikkila maano caluyando nkwajisi, inyika izibona kuti nzisinkilizyo kulwaanguluko lwamuntu alimwi akuzwidilila.—Tusimpi 17:15; Juda 4.

7. Mmibuzyo nzi njotweelede kulibuzya?

⁷ Mbotuli munyika iiyaambele mukukazya Leza, ncabusongo kulindiswe kubona mbotuzilanga zintu azyeelelo. Ciindi aciindi, tweelede kupaila camoyo woonse alimwi akulilingula cakubikkila maano kutegwa tusinizye kuti tatuli mukuleya asyoonto-syoonto kuzwa kumizeezo ya Leza azyeelelo zyakwe. Mucikozyanyo, tulakonzya kulibuzya kuti: ‘Sena ndilakukkomanina kubandika makani ngondakali kukonzya kutantamuka myaka yainda? Sena ndatalika kwiizumina micito Leza njasulide? Sena ndaba acilengwa cakutabikkila maano kapati kuzintu zyakumuuya kwiinda mbondakali kucita kaindi? Sena bukkale bwangu bulatondezya kuti ndibikka Bwami bwa Leza mubusena butaanzi?’ (Matayo 6:33) Kulanga-langa zintu kuli boobo, kuyootugwasya kutantamuka muuya wanyika.

‘Mutasweeki’

8. Mbuti umwi mbwakonzya kusweeka kuzwa kuli Jehova?

⁸ Ku Banakristonyina, imwaapostolo Paulo  wakalemba kuti: “Ncotweelede kuswiililisya kapati kuli zeezyo nzyotwakamvwa, kuti ambweni inga twasweeka.” (Bahibulu 2:1, Ci) Ibwato bwasweeka tabusiki nkobuya pe. Ikuti sikweenzya bwato katabikkili maano kuguwo amayuwe, bwato bwakwe bulakonzya kwiindilila acito cili kabotu akuyoouma abbwe lili kunkomwe. Mbubwenya buyo, ikuti katutabikkili maano kukasimpe kayandisi kali mu Jwi lya Leza, tulakonzya kuleya kuzwa kuli Jehova akusweeka kumuuya mbuli bwato bwaloba. Ikunjila muntenda iili boobo, inga kacitaambi kukakakila limwi buya kasimpe. Mubwini, tabali banji ibamukaka Jehova mpoonya-mpoonya alimwi bacita acaali. Kanji-kanji, balajatikizyigwa asyoonto-syoonto muzintu zimwi zibasinkilila kukubikkila maano ku Jwi lya Leza. Cakutaziba, balatalika kubisya. Mbubwenya mbuli sikweenzya bwato woona, bantu bali boobo tabasinsimuki kusikila limwi kwaba kumuka.

9. Muunzila nzi Jehova mwaakalongezya Solomoni?

⁹ Amulange-lange buumi bwa Solomoni. Jehova wakamubikka kuba mwami wa Israyeli. Leza wakazumizya Solomoni kuyaka tempele alimwi akumusololela kulemba zibeela zimwi zya Bbaibbele. Jehova wakakanana anguwe ziindi zyobile akumupa buvwubi, mpuwo alimwi abweendelezi bwaluumuno. Kwiinda zyoonse, Jehova wakamulongezya Solomoni abusongo bunji. Ibbaibbele lyaamba kuti: “Leza wakapa Solomoni busongo abucenjezu loko loko, amoyo uuzwide twaambo tunji mbuli musee wakunkomwe yalwizi. Busongo bwa-Solomoni bwakali kwiinda busongo bwabantu boonse bakujwe abusongo boonse bwaba-Egepita.” (1 Bami 4:21, 29, 30; 11:9) Masimpe, umwi ulakonzya kuyeeya kuti, ikuti naa kuli muntu wakali kulangilwa kuzumanana kusyomeka kuli Leza, ngu Solomoni. Pele, Solomoni wakaloba mululeyo. Ino cakacitika buti eeci?

10. Ino mbusolozi nzi mbwaakaalilwa kutobela Solomoni, alimwi ino ncinzi cakatobela?

¹⁰ Solomoni wakaluuzi kabotu alimwi akuuteelelesya Mulawo wa Leza. Cakutadooneka naakabikkila maano kapati kumalailile aakapedwe aabo ibakali kuba bami mu Israyeli. Akati kamalailile aayo kwakali kulailila kwakuti: “[Mwami] teelede kulivuzizya banakazi, kuti moyo wakwe utaleyi munzila.” (Deuteronomo 17:14, 17) Nokuba kuti kwakali mulawo ooyo uusalede, Solomoni wakaba abanakazi ibali myaanda iili ciloba alimwi abasimamambe ibali myaanda yotatwe. Ibunji bwabanakazi aaba bakali kukomba baleza bakubeja. Tatuzi pe kaambo Solomoni ncaakakwatila banakazi banji boobo alimwi tatuzi ncaatakabona kuti kucita boobo tiikwakaluzi. Ncotuzi ncakuti wakaalilwa kutobela busolozi busalede bwa Leza. Icakatobela nciceeco ncaakacenjezyede kabotu-kabotu Jehova kuti ciyoocitika. Tubala kuti: “Banakazi bakwe [Solomoni] . . . bakapambula moyo wakwe kumizimu myeenzu.” (1 Bami 11:3, 4) Buce-buce, pele munzila iisinizyide, busongo bwa Leza mbwaakajisi bwakamana. Wakasweeka. Mukuya kwaciindi, kulombozya kwa Solomoni kwakukkomanisya banakazi bakwe batakali kukomba Leza kwakasinkilila kulombozya kwakwe kwakumvwida akukkomanisya Leza. Cilausisya eeci, nkaambo Solomoni ngonguwe musyule wakalembede majwi  aaya aakuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.”—Tusimpi 27:11.

Muuya Wanyika Ulaanguzu

11. Ino mbuti zintu nzyotubikka mumizeezo yesu mbozikujatikizya kuyeeya kwesu?

¹¹ Cikozyanyo ca Solomoni cituyiisya kuti cililubide kuyeeya kuti akaambo kakuti tulikazyi kasimpe, kuyunga kwanyika takukonzyi kutujatikizya. Mbubwenya mbuli cakulya cakumubili mbociujatikizya mubili wesu, nzyotubikka mumizeezo yesu zili mbuli cakulya alimwi zilakujatikizya kuyeeya kwesu. Nzyotubikka mumizeezo yesu zyeendelezya kuyeeya kwesu ambotuzilanga zintu. Mbwaanga balizi kuti aaka kaambo kaliluzi, basimakkampani basowa mali manji amwaka kwaambilizya makwebo aabo. Ibazwidilila mukwaambilizya makwebo babelesya majwi akoongelezya alimwi azifwanikiso kuti zikwelelezye sikuula ikulombozya akuyandisya kuba azintu eezyo. Alimwi basikwaambilizya balizi kuti kubona buyo cakwaambilizya ciindi comwe naa zyobile ikanji-kanji takukazuli bantu kufwambaana kuzyuula zintu. Pele ikulangilila cintu ciindi aciindi kwaciindi cilamfwu kupa basikuula kucibikkila maano kapati cintu eeco. Ikwaambilizya makwebo kulazwidilila kapati. Nikwatali boobo, nokutakwe uubelesya mali mukwaambilizya ooku. Kulakuyunga kapati kuyeeya kwabantu ambobazilanga zintu.

12. (a) Ino mbuti Saatani mbwayunga kuyeeya kwabantu? (b) Ncinzi citondezya kuti Banakristo balakonzya kuyungwa?

¹² Mbubwenya mbuli sikwaambilizya makwebo, Saatani ucita mizeezo yakwe kulibonya kuti ilakondelezya, kazyi kuti mukuya kwaciindi ulakonzya kubazula bantu kuyeeya mbwayeeya. Kwiinda muzyakulikondelezya anzila zimwi, Saatani weena bantu kusyoma kuti bubotu mbubi akuti bubi mbubotu. (Isaya 5:20) Nobaba Banakristo bakasimpe bazundwa akwaambilizya kwa Saatani kwamakani aakubeja. Ibbaibbele licenjezya kuti: “Muuya waamba ncobeni kuti kuciindi ciciza bamwi bayookuzwa kulusyomo, bakagame kumvwa myuuya yakweena amafundisyo aabadaimona, nkaambo kakuupaupa ameso kwabantu baamba twakubeja, bali amyoyo iyakalembwa mbuli mbwiilemba insimbi ipya.”—1 Timoteo 4:1, 2; Jeremiya 6:15.

13. Ino kweenda abamineme ncinzi, alimwi ino mbuti aabo mbotuyanzana limwi mbobatujatikizya?

¹³ Toonse tulakonzya kuyungwa amuuya wanyika. Iguwo amayuwe aabweende bwa Saatani zilaanguzu kapati. Cabusongo Ibbaibbele litucenjezya kuti: “Mutalyeeni. Mweenda abamineme, anywebo mulaminama.” (1 Ba-Korinto 15:33) Kweenda abamineme kulakonzya kujatikizya kufwumbwa cintu naa muntu, nomuba mumbungano, uutondezya muuya wanyika. Ikuti tuyeeya kuti kuyanzana kubyaabi takukonzyi kutunyonyoona, nkokuti alimwi inga twaamba kuti kuyanzana kubotu takukonzyi kutugwasya pe. Elo kaka inga kwaba kulubila ooko! Ibbaibbele lilapandulula cakusalazya noliti: “Uuenda abasongo ulasongwaala, pele muzwalani wabafubafuba ulabisizigwa.”—Tusimpi 13:20.

14. Ino muunzila nzi motukonzya kutantamuka muuya wanyika?

¹⁴ Ikutegwa tutantamuke muuya wanyika, tweelede kuyanzana abantu basongo, aabo ibabelekela Jehova. Tweelede kuzuzya mizeezo yesu azintu ziyaka lusyomo lwesu. Imwaapostolo Paulo wakalemba kuti: “Kufumbwa zintu zisinizye, kufumbwa zintu zilemekeka, kufumbwa zintu ziluleme, kufumbwa zintu zisalala, kufumbwa zintu ziyandika, kufumbwa zintu zili ampuwo imbotu, na kuli ciyanza niciba cimwi cibotu nanka cintu niciba cimwi citembaulika, amuziyeeyesye zintu ezi.” (Ba-Filipi 4:8) Mbotuli bantu bakalengwa anguzu zyakulisalila cibotu acibi, tulakonzya kusala zintu nzyotweelede kuyeeyesya. Lyoonse  atusale zintu iziyootupa kuba balongwe ba Jehova.

Muuya wa Leza Ulaanguzu Kapati

15. Ino Banakristo mu Korinto yansiku bakaindene buti abantu bambi bamumunzi ooyo?

¹⁵ Kwiindana abaabo ibeenwa amuuya wanyika, Banakristo bakasimpe basololelwa amuuya uusalala wa Leza. Mbakumbungano yaku Korinto Paulo mbaakalembela kuti: “Iswe, muuya ngututambwide teensi muuya waansi ano pe, ngu-Muuya uuzwa kuli-Leza, kuti tumvwisye zintu nzitwapegwa caluzyalo lwa-Leza.” (1 Ba-Korinto 2:12) Korinto yansiku wakali munzi wakazingulukidwe amuuya wanyika. Ibantu banji bamumunzi ooyu bakali babyaabi kapati cakunga ikaambo kakuti “kulilemeka mbuli bana Korinto” cakali kwaamba “kutalilemeka.” Saatani wakoofwaazyide mizeezo yabantu. Aboobo, tiibakateelelesya antela kutateelelela limwi buya naaceya zya Leza wakasimpe. (2 Ba-Korinto 4:4) Pele kwiinda mumuuya wakwe uusalala, Jehova wakajalula meso aabana Korinto bamwi, akubagwasya kutambula luzibo lwakasimpe. Muuya wakwe wakabakulwaizya akubasololela kucita kucinca kupati mubuumi bwabo kutegwa bazuminwe anguwe akutambula zilongezyo zyakwe. (1 Ba-Korinto 6:9-11) Nokuba kuti muuya wanyika wakali anguzu, muuya wa Jehova wakali anguzu kapati.

16. Mbuti mbotunga twatambula akuzumanana kuba amuuya wa Leza?

¹⁶ Asunu mbocibede. Muuya uusalala wa Jehova nguulaanguzu kwiinda yoonse mububumbo, alimwi ulaupa cabuuya acabwaabi kubantu boonse ibaulomba calusyomo. (Luka 11:13) Pele ikutegwa tube amuuya wa Leza, nzinji nzyotweelede kucita kunze buyo lyakutantamuka muuya wanyika. Alimwi tweelede kwiiya lyoonse akutobela Jwi lya Leza mubuumi bwesu kutegwa muuya wesu, nkokuti miyeeyo yesu, yeendelane akuyeeya kwakwe. Ikuti twacita oobo, Jehova uyootuyumya kulwana bucenjezu boonse Saatani mbwakonzya kubelesya kutunyonyoona kumuuya.

17. Muunzila nzi cakacitikila Loti mbocikonzya kutuyumya?

¹⁷ Nokuba kuti Banakristo tabali banyika, bali munyika. (Johane 17:11, 16) Kunyina akati kesu uukonzya kuutantamuka cakumaninina muuya wanyika, akaambo kakuti tulakonzya kubeleka antela kukkala abaabo ibatamuyandi Leza anzila zyakwe. Sena tulimvwa mbuli Loti, iwakali “kukataazigwa,” nokuba kupenzyegwa buya amilimo mibi yabantu bamu Sodoma mmwaakali kukkala? (2 Petro 2:7, 8) Ikuti kakuli boobo, tulakonzya kuyumizyigwa. Jehova wakamukwabilila akumuvwuna Loti, alimwi ulakonzya kucita mbubonya oobo kulindiswe. Taateesu siluyando ulibubwene alimwi ulibuzi bukkale bwesu, alimwi ulakonzya kutupa lugwasyo anguzu nzyotuyandika kutegwa tuzumanane kusima kumuuya. (Intembauzyo 33:18, 19) Ikuti twayaama aali nguwe, kumusyoma alimwi akumulilila, uyootugwasya kutantamuka muuya wanyika, tacikwe makani ambobuli buyumu bukkale motubede.—Isaya 41:10.

18. Ino nkaambo nzi ncotweelede kucibikkila maano kapati cilongwe cesu a Jehova?

¹⁸ Munyika iizandukide kuzwa kuli Leza alimwi yeenedwe a Saatani, swebo mbotuli bantu ba Jehova tulilongezyedwe aluzibo lwakasimpe. Aboobo tuli akukondwa aluumuno inyika njozitajisi. (Isaya 57:20, 21; Ba-Galatiya 5:22) Tulakkomana akaambo kabulangizi butaliboteli bwabuumi butamani mu Paradaiso, moutanooliko muuya wanyika eeyi iiyanda kumana. Aboobo atucibikkile maano kapati cilongwe cesu citaliboteli a Leza akupakamana kubambulula kufwumbwa kampenda kapa kuleya kumuuya. Atuzumanane kuswenenena kuli Jehova, aboobo uyootugwasya kutantamuka muuya wanyika.—Jakobo 4:7, 8.

Sena Inga Mwapandulula?

• Muunzila zili Saatani mwaacenga akuleesya bantu?

• Ino mbuti mbotukonzya kukutantamuka kuleya kuzwa kuli Jehova?

• Ino ncinzi citondezya kuti muuya wanyika ulaanguzu?

• Ino mbuti mbotunga twatambula akuzumanana kuba amuuya uuzwa kuli Leza?

[Mibuzyo yaciiyo]

[Ccaati iili apeeji 24]

KWIIMPANA KULIKO AKATI KABUSONGO BWANYIKA ABUSONGO BWA LEZA

Kasimpe takazulide, bantu balalipangila kasimpe kabo.

“Ijwi [lya Leza] mbobwini.”—Johane 17:17.

Ikutegwa mwaandaanye cibotu acibi, amusyome moyo wanu.

“Moyo wamuntu uleena kwiinda zintu zyoonse, ulijisi bulwazi bukaka kupona.”—Jeremiya 17:9.

Amucite ncomulombozya.

“Muntu ulaya bweenda, pele tabwene kweenzya intaamu zyakwe.”—Jeremiya 10:23.

Buvwubi ngomusemu walukkomano.

“Kuyandisya lubono ngomuyanda wabubi boonse.”—1 Timoteo 6:10.

[Cifwanikiso icili apeeji 23]

Solomoni wakaleya kubukombi bwakasimpe akutalika kukomba baleza bakubeja