“Beleka Kabotu Milimo Yako Yoonse”

“Beleka kabotu milimo yako yoonse.”—2 TIMOTI 4:5, Ci.

1, 2. Nokuba kuti Banakristo boonse mbakambausi, ino ncinzi ciyandika kubaalu cizwa mu Magwalo?

SENA muli basikwaambilizya Bwami? Ikuti naa mboobo, amumulumbe Jehova Leza akaambo kacoolwe cibotu boobu. Sena muli umwi wabaalu mumbungano? Eeco ncoolwe acimbi cizwa kuli Jehova. Pele tatweelede kuluba kuti ilwiiyo lwakucikolo cakumubili naa kupasaula kukanana tazili nzezitupa kuti tweelele kutola lubazu mumulimo naa ikuba mulangizi mumbungano. Jehova nguupa kuti tweelele kucita mulimo alimwi nkaambo kakuti baalumi bamwi akati kesu balazuzikizya zyeelelo zyamu Magwalo zigaminide iziyandika, calo cipa kuti babe acoolwe cakubeleka kabali balangizi.—2 Ba-Korinto 3:5, 6; 1 Timoteo 3:1-7.

² Banakristo boonse balyaabide balacita mulimo wabakambausi, pele ikapati baalu beelede kutondezya cikozyanyo cibotu mumulimo. Ibaalu “bajisi mulimo wakukambauka awakufundisya” balalangililwa a Leza alimwi a Kristo kubikkilizya a Bakamboninyina ba Jehova. (1 Timoteo 5:17; Ba-Efeso 5:23; Ba-Hebrayo 6:10-12) Ciindi coonse, mwaalu mbwayiisya bweelede kuti kabugwasya baswiilizi kumuuya nkaambo mwaapostolo Paulo wakaambila mulangizi Timoteo kuti: “Ciindi cilasika ncobati kaleke kuzumina kufundisya kwinikwini, eno bayoogama kulijanina bafundisi bali mbuli kuyanda kwamyoyo yabo beni, kuti babotelwe kubamvwa. Bayoosinka matwi aabo kumakani menimeni, bakagame kuswiilila zyamankwangwaalizya. Pele yebo kolibamba kuzintu zyoonse, kofwabalika, kosungwaalila milimo yabukambausi, kokondezesya mulimo ngowakapegwa.”—2 Timoteo 4:3-5.

3. Ino ncinzi ciyandika kucitwa kutegwa ziyiisyo zyakubeja zitanyonganyi ibukkale bwakumuuya ibwambungano?

³ Ikutegwa abone kuti ziyiisyo zyakubeja tazinyonganyi bukkale bwakumuuya ibwambungano, mulangizi weelede kutobela lulayo lwa Paulo lwakuti: “Yebo kolibamba lyoonse, . . . akubeleka kabotu milimo yako yoonse.” (2 Timoti 4:5, Ci) Masimpe, imwaalu weelede ‘kubeleka kabotu milimo yakwe.’ Weelede kwiibeleka cakumaniina, munzila mbotu naa kusikila mpagolela. Imwaalu uubeleka kabotu milimo yakwe ulabikkila maano kumikuli yakwe yoonse kakunyina kuubyaubya mukuli umwi naa kutaubeleka kabotu. Mwaalumi uucita boobu ulasyomeka nomuba mutuntu tuniini.—Luka 12:48; 16:10.

4. Ino ncinzi cikonzya kutugwasya kuubeleka kabotu mulimo?

⁴ Kuubeleka kabotu mulimo takuyandiki ciindi cinji buya lyoonse pe, pele ciyanda kucibelesya kabotu. Kukkalikana mukucita zintu lyoonse kulakonzya kugwasya Banakristo boonse kuubeleka mulimo. Ikutegwa atole ciindi cilamfwu mumulimo wamumuunda, imwaalu uyandika kuzibamba kabotu zintu kutegwa autobele kabotu mulongo alimwi akuziba nzyeelede kupa bambi kuti babeleke ambwakonzya kucita boobo. (Ba-Hebrayo 13:17) Lyoonse buyo, mwaalu uulemekwa ulacita cibeela cakwe, mbubwenya mbuli Nehemiya iwakatola lubazu mukuyaka bulambo bwa Jerusalemu. (Nehemiya 5:16) Alimwi boonse babelesi ba Jehova beelede kutola lubazu lyoonse mumulimo wakukambauka Bwami.—1 Ba-Korinto 9:16-18.

5. Ino tweelede kulimvwa buti kujatikizya mulimo?

⁵ Elo kaka tulijisi mulimo uukomanisya katuli basikwaambilizya Bwami bwakujulu bwakakkazikizigwa! Masimpe tulacibikkila maano coolwe ncotujisi cakutola lubazu mukukambauka makani mabotu munyika yoonse mamanino kaatanaakusika. (Matayo 24:14) Nokuba kuti tatulondokede, tulakonzya kukulwaizyigwa amajwi  aa Paulo aakuti: “Cintu eci ciyandisi [mulimo] tulicijisi munongo zyabulongo, kukutondezya kuti ezi inguzu zigambya zilazwa kuli-Leza, tazizwi kulindiswe tubeni pe.” (2 Ba-Korinto 4:7) Masimpe, tulakonzya kubeleka kabotu mulimo, pele nkwiinda buyo munguzu abusongo bupegwa a Leza.—1 Ba-Korinto 1:26-31.

Ikutondezya Bulemu bwa Leza

6. Ino ndwiindano nzi lwakaba akati kaba Israyeli bakumubili abakumuuya?

⁶ Kaamba Banakristo bananike, Paulo wakaamba kuti Leza “watuzulizizya milimo yamulongo mupya.” Mwaapostolo waindanya mulongo mupya wakabambwa kuba Israyeli bakumuuya kwiinda muli Jesu Kristo a Mulawo wacizuminano wakaindi kuba Israyeli bakumubili kwiinda muli Musa. Paulo uyungizya kuti Musa wakaselemuka Mulundu wa Sinai kajisi mabwe aalembedwe Milawo iili Kkumi, ibusyu bwakwe kabumweka cakunga bana Israyeli tiibakali kukonzya kumulangisisya pe. Nokuba boobo, nokwakainda ciindi, cintu cimwi cipati cakacitika nkaambo “mizeezo yabo yakanyongana, NW” alimwi myoyo yabo yakabija. Pele, nobakapilukila kuli Jehova akumukomba camoyo woonse, myoyo yabo yakaloma. Kumane boobo naakali kwaamba mulimo uupedwe kuli baabo ibali mumulongo mupya, Paulo waamba kuti: “Toonse mbutuli amasyu mavumbulule, tuli mbuli ciboniboni, tulabonya bulemu bwa-Leza.” (2 Ba-Korinto 3:6-8, 14-18; Kulonga 34:29-35) “Mbelele zimwi” zya Jesu sunu azyalo zilijisi coolwe cakutondezya bulemu bwa Jehova.—Johane 10:16.

7. Ino mbuti bantu mbobakonzya kutondezya bulemu bwa Leza?

⁷ Ino mbuti bantu basizibi mbobakonzya kutondezya bulemu bwa Leza kakuli kunyina muntu ukonzya kubona busyu bwakwe akupona? (Kulonga 33:20) Tweelede kuyeeya kuti kunze lyakuti Jehova ulijisi bulemu, kuli makanze aakwe aabulemu aakutondezya bweendelezi bwakwe kwiinda mu Bwami bwakwe. Ikasimpe kaswaangene a Bwami kajatikizya “milimo mipati ya-Leza” yakatalika kwaambilizyigwa abaabo ibakatililwa muuya uusalala ilya Pentekoste 33 C.E. (Incito 2:11) Kwiinda mukusololelwa amuuya, bakali kukonzya kuubeleka kabotu mulimo ngobakapedwe.—Incito 1:8.

8. Ino ncinzi Paulo ncaakakanzide kucita kujatikizya mulimo?

⁸ Paulo wakali kanzide kutazumizya cintu cimwi kumusinkila kubeleka kabotu mulimo wakwe. Wakalemba kuti: “Mbuli mbutujisi eyi milimo njitwapegwa nkaambo kalweetelelo lwa-Leza, tatulengaani mumyoyo. Tulisowede makani, aasisidwe aausya bweeme. Tatweendi cabupyungi pe, nikuba kubisizya lusinizyo lwamakani aa-Leza, anukuti tulaamba lusinizyo antangalala, aboobo tulalilubulula kumanjezeezya aabantu boonse kubusyu bwa-Leza.” (2 Ba-Korinto 4:1, 2) Kwiinda muli ceeco Paulo ncaakati “eyi milimo,” kasimpe kalalibonya alimwi imumuni ulamweka kusikila kule.

9, 10. Ino cikonzyeka buti kutondezya bulemu bwa Jehova?

⁹ Kujatikizya Ikuzwa mumuni wini awakumuuya, Paulo wakalemba kuti: “Leza wakaamba kuti, Mumuni ulamunikila mudima, nkabela nguwenya Leza wakamunika mumyoyo  yesu kukumunikila bantu akubazibya mbububede bulemu bwa-Leza buboneka mubusyu bwa-Kristo.” (2 Ba-Korinto 4:6; Matalikilo 1:2-5) Mbwaanga twakapegwa coolwe cipati cakuba babelesi ba Leza, atusalale ikutegwa tukonzye kutondezya bulemu bwa Jehova mbubwenya mbuli cimbonimboni.

¹⁰ Ibantu bali mumudima kumuuya tabakonzyi kubona bulemu bwa Jehova naa mbobutondezyedwe kuzwa muli Jesu Kristo, Musa Mupati. Pele swebo mbotuli babelesi ba Jehova, tulatambula mumuni kuzwa mu Magwalo alimwi akuutondezya kubantu bamwi. Ikutegwa aabo ibali mumudima wakumuuya lino baccije lunyonyooko, bayandika mumuni kuzwa kuli Leza. Aboobo, cakukondwa kapati alimwi cabusungu, tulaaswiilila malailile aa Leza akumunika mumudima ikutegwa Jehova apegwe bulemu.

Mumuni Wanu Aumunike Kuziiyo zya Bbaibbele Zyaaŋanda

11. Ino ncinzi Jesu ncaakaamba kujatikizya kumwesya mumuni, alimwi ino ninzila nzi imwi mbotukonzya kucita boobu mumulimo wesu?

¹¹ Jesu wakabaambila boobu batobeli bakwe: “Ndinywe mumuni wanyika. Munzi uuyakidwe atala acilundu tuukonzyi kusiswa. Alimwi bantu nibamunika ilampi tabalibiki munsi lyalusuwo, pe, balalibika acibikilo kuti limunikile boonse bali muŋanda. Mbubonya obo mumuni wanu umunike kunembo lyabantu, kuti babone milimo yanu mibotu, balemeke Usowanu uuli kujulu.” (Matayo 5:14-16) Ikulilemeka kwesu kubotu kulakonzya kupa kuti ibamwi balemeke Leza. (1 Petro 2:12) Alimwi imbazu ziindene-indene zyamulimo wesu wabukambausi zitupa zyoolwe zinji zyakucita kuti mumuni wesu umunike. Makanze eesu amwi mapati ngakutondezya mumuni wakumuuya kuzwa mu Jwi lya Leza kwiinda mukusololela ziiyo zya Bbaibbele zyaaŋanda cabusungu. Eeyi njenzila iiyandika kapati yakubeleka kabotu mulimo wesu. Ino ninzila nzi izikonzya kutugwasya kusololela kabotu ziiyo zya Bbaibbele izinjila mumyoyo yabaabo ibayandaula kasimpe?

12. Ino mbuti mupailo mbouswaangene akusololela ziiyo zya Bbaibbele?

¹² Ikupaila kuli Jehova mumakani aakusololela ziiyo zya Bbaibbele kutondezya kuti tulayandisisya kusololela ziiyo zya Bbaibbele. Alimwi citondezya kuti tulabona mbociyandika ikugwasya bantu kujana luzibo lwa Leza. (Ezekiele 33:7-9) Jehova uyooivwiila masimpe mipailo yesu akukulongezya kusolekesya kwesu mumulimo. (1 Johane 5:14, 15) Pele tatupailili buyo kuti tujane muntu ngotunooyiisya Bbaibbele aŋanda pe. Twatalisya ciiyo, ikupaila akuzinzibala kuyeeya kujatikizya nzyayandika zimugaminina ooyo ngotwiiya limwi Ibbaibbele kuyootugwasya kusololela cibeela cimwi acimwi cabusungu.—Ba-Roma 12:12.

13. Ino ncinzi cikonzya kutugwasya kusololela ziiyo zya Bbaibbele zyaaŋanda cabusungu?

¹³ Ikutegwa tusololele ciiyo ca Bbaibbele cabusungu, tweelede kulibambila kabotu cibeela cimwi acimwi. Ikuti naa tulimvwa kuti tatucibwene kabotu kusololela, cilakonzya kugwasya kulangilila mbuli mulangizi wa Ciiyo Cabbuku Cambungano mbwasololela ciiyo cansondo imwi aimwi. Ziindi zimwi, tulakonzya kweenda abasikumwaya ibazwidilila kabotu mukusololela ziiyo zya Bbaibbele. Pele, iciimo alimwi anzila zyakuyiisya zya Jesu Kristo zilayandika kapati kuti tuzilange-lange.

14. Ino mbuti mbotukonzya kwaamba makani aakonzya kumunjila mumoyo sikwiiya Bbaibbele?

¹⁴ Jesu wakali kukukkomanina kucita kuyanda kwa Bausyi bakujulu alimwi akwaambila bamwi kujatikizya Leza. (Intembauzyo 40:8) Wakali mubombe alimwi wakazwidilila kwaamba makani aakabanjila mumoyo, aabo ibakali kumuswiilila. (Matayo 11:28-30) Aboobo, atusolekesye kwaamba makani aakonzya kubanjila mumoyo mbotuyiisya Bbaibbele. Ikutegwa tucite oobo, tuyandika kulibambila muciiyo cimwi acimwi katubikkilide maano kubukkale bwasikwiiya ooyo. Mucikozyanyo, ikuti naa muntu ooyo tazumini zyaamba Bbaibbele, tulakonzya kuyanda kumuzula kuti Bbaibbele ndyakasimpe. Ikuti kakuli boobo, cakutadooneka tweelede kubala magwalo manji alimwi akwaapandulula.

 Amubagwasye Basikwiiya Ikuzimvwisya Zikozyanyo

15, 16. (a) Ino mbuti mbotukonzya kugwasya sikwiiya uutamvwisyi cikozyanyo icibelesyedwe mu Bbaibbele? (b) Ino ncinzi ncotukonzya kucita ikuti naa ibbuku lyesu lyabelesya cikozyanyo icikatazya kumvwa kuli sikwiiya Bbaibbele?

¹⁵ Sikwiiya Bbaibbele ulakonzya kuti katazizi kabotu zikozyanyo zimwi zibelesyedwe mu Magwalo. Mucikozyanyo, ambweni takonzyi kumvwisya Jesu ncaakali kupandulula naakaamba zyakubikka lampi acibikkilo. (Marko 4:21, 22) Jesu wakali kwaamba lampi lyakaindi lyakali kubelesya mafwuta ilyakajisi katambo kayaka. Ilampi lili boobu lyakali kubikkwa acibikkilo cimwi ikutegwa likonzye kumunika moonse muŋanda. Ikuvwuntauzya mubbuku lya Insight on the Scriptures mumutwe wakuti “Lamp” [Lampi] alimwi awakuti “Lampstand” [Cibikkilo calampi] kulakonzya kuyandika kutegwa musalazye cikozyanyo ca Jesu. * Elo kaka cilakkomanisya kuunka kuli sikwiiya Bbaibbele katujisi bupanduluzi mbwakonzya kumvwisya alimwi akukkomanina!

¹⁶ Ibbuku libelesyegwa kwiiya Bbaibbele lilakonzya kubelesya cikozyanyo cikonzya kumuyumina kumvwisya sikwiiya. Amujane ciindi cibotu cakucipandulula naa kubelesya cikozyanyo cimbi cikonzya kupandulula kaambo nkamunya. Ambweni ibbuku likankaizya kuti ikuba amweenzinyoko wamulukwatano uli kabotu alimwi akweendelana zilayandika mulukwatano. Ikukozyanisya makani aaya, kulakonzya kwaambwa mwaalumi ulyuumbwa naa uuli akampeelwa. Walekezya maanza kukampeelwa kali mujulu kasyoma uumbi muntu kuti amukwabe. Cikozyanyo acimbi ncakuti, kuboneka kuti mbokuyandika ikuba amweenzinyoko uli kabotu alimwi akweendelana kulakonzya kukozyanyizigwa ababelesi mbobabelekela antoomwe kwiinda mukutambikizyanya mabbokesi kuli umwi nobalongolola zintu mubwato.

17. Ino ncinzi ncotukonzya kwiiya kuli Jesu kujatikizya zikozyanyo?

¹⁷ Kuyandika kulibambilida limwi ikutegwa tubelesye cikozyanyo cimbi. Pele, eeyo njenzila mbotukonzya kutondezya kuti tulamuyanda sikwiiya Bbaibbele. Jesu wakabelesya zikozyanyo izitakatazyi ikutegwa asalazye makani. Mulumbe wakwe waa Cilundu ulapa zikozyanyo zyamakani aaya alimwi Ibbaibbele litondezya kuti kuyiisya kwakwe kwakali kubagwasya kapati baswiilizi. (Matayo 5:1–7:29) Jesu cakukkazika moyo wakali kuzipandulula zintu nkaambo wakali kubayandisya bantu.—Matayo 16:5-12.

18. Ino ncinzi ciyandika kumagwalo aatazubuludwe aali mumabbuku eesu?

¹⁸ Ikubayanda bamwi kuyootukulwaizya ‘kubandika ambabo kuzwa mu Magwalo.’ (Incito 17:2, 3) Eeci ciyandika kuliyiisya cakusinizya alimwi akupaila kubikkilizya akwaabelesya kabotu mabbuku aaliko aazwa ‘kumubanzi uusyomekede.’ (Luka 12:42-44) Mucikozyanyo, ibbuku lya Luzibo Lutola Kubuumi Butamani lilazubulula magwalo manji. * Akaambo kakuceya kwabusena, imanji taazubuludwe. Nomucita ciiyo ca Bbaibbele, cilayandika kapati ikubala akwaapandulula magwalo amwi aatazubuludwe. Kayi kuyiisya kwesu kuyeeme a Jwi lya Leza alimwi lilijisi nguzu kapati. (Ba-Hebrayo 4:12) Amulibale Bbaibbele muciiyo coonse, akwaabelesya kapati magwalo aajanika mumincali. Amumugwasye sikwiiya ikubona ncolyaamba Bbaibbele kujatikizya makani amwi naa nzila imwi ibwezegwa. Amusoleke kumutondezya mbwatiigwasyigwe akaambo kakuswiilila Leza.—Isaya 48:17, 18.

 Amubuzye Mibuzyo Iipa Kukala Ansi Akuyeeya

19, 20. (a) Ino nkaambo nzi ncotweelede kubuzya mibuzyo iijatikizya mbwazibona zintu muntu ciindi notusololela ciiyo ca Bbaibbele caaŋanda? (b) Ino ncinzi cikonzya kucitwa ikuti naa makani amwi ayandika kwaalanga-langa alimwi?

¹⁹ Jesu mbwakali kubabuzya mibuzyo bantu cabusongo cakabagwasya kuti kabayeeya kapati. (Matayo 17:24-27) Ikuti twabuzya mubuzyo uutali wakumufwubaazya sikwiiya Bbaibbele kujatikizya mbwazibona zintu, ibwiinguzi bwakwe bulakonzya kuyubununa mbwayeeya kujatikizya makani amwi. Tulakonzya kujana kuti ucijisi mizeezo iitali yamumagwalo. Mucikozyanyo, ulakonzya kuti kasyoma mu Butatu. Mucibalo 3, ibbuku lya Luzibo litondezya kuti ibbala lyakuti “Butatu” talijaniki mu Bbaibbele pe. Ibbuku eeli lilazubulula akutondezya magwalo aatondezya kuti Jehova ulaandeene a Jesu alimwi akuti muuya uusalala ninguzu nzyabelesya Leza, tali muntu pe. Ikubala alimwi akuzibandika zibalo eezi zyamu Bbaibbele kulakonzya kugwasya kusalazya kaambo. Pele ino mbuti kuti azimbi kaziciyandika? Ambweni mwaakumanizya ciiyo ciindi ciboola, iciindi cibotu inga cabelesyegwa kubandika makani aaya kweelana ambwaapanduludwe mubbuku limbi lya Bakamboni ba Jehova, mbuli broshuwa yakuti Kodi Muyenera Kuukhulupirira Utatu. Eelyo tulakonzya kuyoozumanana aciiyo mubbuku lya Luzibo.

²⁰ Amuyeeye buyo ikuti bwiinguzi bwasikwiiya kweelana ambwazibona zintu bwamugambya naa bwamutyompya. Ikuti naa kufweba naa makani aambi aayandika kubikkila maano alijatikizyidwe, tulakonzya kulomba kuti tuzumanane aciiyo, eelyo makani aayo tulaabandika akale. Ikuziba kuti sikwiiya ucifweba kulakonzya kutupa kuti tujane makani aalembedwe aakonzya kumugwasya kuyaambele kumuuya. Notusoleka kwaamba makani aakonzya kumunjila mumoyo sikwiiya, tulakonzya kupailila kuti Jehova amugwasye kuyaambele kumuuya.

21. Ino ncinzi cikonzya kucitika ikuti naa nzila zyesu zyakuyiisya zyeendelana azini zyayandika sikwiiya Bbaibbele?

²¹ Kwiinda mukulibambila kabotu alimwi amulugwasyo lwa Jehova, kakunyina kudooneka tuyoocikonzya kucita kuti nzila nzyotuyiisya zyeelane anzyayandika zini sikwiiya Bbaibbele. Iciindi mbociyaabuya, tulakonzya kumugwasya kuti amuyande kapati Leza. Alimwi tulakonzya kuzwidilila mukukomezya bulemu alimwi akulumba mbunga ya Jehova. Elo kaka cilakkomanisya ikuti naa sikwiiya Bbaibbele wazumina kuti ‘Leza nkwali akati kesu’! (1 Ba-Korinto 14:24, 25) Aboobo, atusololele ziiyo zya Bbaibbele cabusungu akucita mbuli mbotukonzya ikugwasya bantu kuba basikwiiya ba Jesu.

Icintu Ciyandika Kapati Iceelede Kukkomaninwa

22, 23. Ino ncinzi ciyandika kutegwa tuubeleke kabotu mulimo wesu?

²² Ikutegwa tuubeleke kabotu mulimo, tweelede kusyoma nguzu Leza nzyapa. Kaamba zyamulimo, Paulo wakabalembela boobu Banakristonyina bananike: “Cintu eci ciyandisi tulicijisi munongo zyabulongo, kukutondezya kuti ezi inguzu zigambya zilazwa kuli-Leza, tazizwi kulindiswe tubeni pe.”—2 Ba-Korinto 4:7.

²³ Kufwumbwa naa tuli bananike naa “mbelele zimwi,” tuli mbuli zilongo zikomoka buyo. (Johane 10:16) Pele, Jehova ulakonzya kutupa nguzu nzyotuyandika ikutegwa tuzuzikizye milimo yesu kufwumbwa naa kuli mapenzi nzi aatusikila. (Johane 16:13; Ba-Filipi 4:13) Aboobo, atusyome Jehova cakumaniina, kuukkomanina mulimo uuyandika kapati alimwi akuubeleka kabotu mulimo wesu.

Bupanduluzi buyungizidwe

Ino Inga Mwaingula Buti?

• Ino ncinzi baalu ncobakonzya kucita ikutegwa baubeleke kabotu mulimo wabo?

• Ino mbuti mbotukonzya kuyaambele mukuba basungu muziiyo zyesu zya Bbaibbele?

• Ino ncinzi ncomuyoocita ikuti naa sikwiiya Bbaibbele tanaacimvwisya cikozyanyo antela uyandika makani aambi mumutwe umwi?

[Mibuzyo yaciiyo]

[Cifwanikiso icili apeeji 18]

Baalu Banakristo balayiisya mumbungano alimwi akuyiisya basyominyina mumulimo

[Cifwanikiso icili apeeji 20]

Ikusololela ziiyo zya Bbaibbele cabusungu njenzila imwi mbotumunika