Kuyubununa Cinyama Abulembo Bwaco

SENA mulakukkomanina kupandulula makani aakatazya? Ikutegwa mucite boobo, mujana nzila zimugwasya kwaapandulula. Mu Jwi lyakwe ndyaakasololela, Leza ulapa nzila ziyandika kujatikizya mweelwe wa 666, izina, antela bulembo bwacinyama cilembedwe ku Ciyubunuzyo caandaano 13.

Mucibalo eeci, tulalanga-langa nzila zipati zyone zigwasya kupandulula, nkokuti nzila ziyooyubununa bupanduluzi bwa bulembo bwacinyama. Tulalanga-langa (1) mbwaasalwa zimwi ziindi mazina aamu Bbaibbele, (2) ncocipandulula cinyama eeco, (3) ncocaamba kuti 666 “mweelwe wamuntu,” alimwi (4) namba 6 ncoyiiminina akaambo ncoyiindulukwa ziindi zyotatwe nkokuti, 600 kusanganya 60 kusanganya 6, naa 666.—Ciyubunuzyo 13:18.

Mazina aamu Bbaibbele, Taali Aakuzibya Buyo

Ikanji-kanji mazina aamu Bbaibbele ajisi bupanduluzi bumwi bulibedelede, ikapati naa akapegwa a Leza. Mucikozyanyo, akaambo kakuti Abramu wakali kuzooba wisi wamasi oonse, Leza wakacinca zina lya Abramu wansiku kuba Abrahamu, ilyaamba kuti “Wisi Wabanji.” (Matalikilo 17:5) Leza wakaambila Josefa a Mariya kuulika mwana wa Mariya wakali kuyoozyalwa kuti ngu Jesu, ilyaamba kuti “Jehova Ndolufwutuko.” (Matayo 1:21; Luka 1:31) Kweendelana azina eelyo ilijisi bupanduluzi bupati, kwiinda mumulimo wa Jesu alufwu lwacipaizyo, Jehova wakapa kuti lukonzyeke lufwutuko lwesu.—Johane 3:16.

Cakweelela, zina ilya 666 lyakapegwa a Leza lyeelede kwiiminina eeco Leza ncabona kuti mbube bulibonya kapati mucinyama. Masimpe, kutegwa tubumvwisye bube oobo, tweelede kuciziba cinyama eeci kucigama alimwi akwiiya micito yaco.

Cinyama Cayubununwa

Ibbuku lyamu Bbaibbele lya Daniele lilayubununa makani manji aamba ncozipandulula zinyama zyacikozyano. Caandaano ca 7 cijisi bupanduluzi buzwide makani bwa “banyama bapati bone,” mulavwu, masekese, siluwe amunyama uuyoosya uujisi menyo mapati aalubulo. (Daniele 7:2-7) Daniele utwaambila kuti banyama aaba baiminina “bami,” naa mami aatwaambo twacisi aalela cakutobelana mumalelo mapati.—Daniele 7:17, 23.

Kujatikizya cinyama cilembedwe ku Ciyubunuzyo 13:1, 2, The Interpreter’s Dictionary of the Bible yaamba kuti cinyama eeci “cilijisi bube boonse bwazinyama zyone zili kucilengaano ca Daniele . . . Cakweelela, cinyama eeci citaanzi [cilembedwe ku Ciyubunuzyo] ciiminina mami oonse aatwaambo twacisi aakazyanya a Leza munyika.” Kaambo aaka kalasinizyigwa ku Ciyubunuzyo 13:7, kujatikizya cinyama ikwaambidwe kuti: “[C]akapegwa bwami bwakweendelezya misyobo yoonse amikowa yoonse amyaambo yoonse amasi oonse.” *

Ino nkaambo nzi Bbaibbele ncolibelesya zinyama kwiiminina bulelo bwabantu? Kuli twaambo tobile. Kakusaanguna, nkaambo kampuwo yakutila bulowa mbuli banyama ooko mfwulumende nkozyali kucita mumyaanda yamyaka minji yainda. Basikwiiya makani aakaindi ba Will a Ariel  Durant bakalemba kuti: “Nkondo ncintu cimwi cali kucitika lyoonse mubukkale bwabantu alimwi kunyina noyaceya-ceya nokuba kuti kwaba lusumpuko abweendelezi bwamfwulumende bantu mobaangulukide kulisalila muleli.” Cili masimpe kuti “muntu [we]endelezya muntunyina kukumubisizya”! (Mukambausi 8:9) Kaambo kabili nkakuti “Simwaaba [Saatani wakacipa cinyama] inguzu zyakwe acuuno cakwe abwami bunji.” (Ciyubunuzyo 12:9; 13:2) Mbubwena buyo, bulelo bwabantu bwakatalisyigwa a Diabolosi, aboobo butondezya bube bwakwe bwabunyama abwabusimwaaba.—Johane 8:44; Ba-Efeso 6:12.

Pele eeci tacaambi kuti muleli muntunsi woonse uleendelezyegwa cacigaminina a Saatani. Mubwini, munzila imwi, imfwulumende zyabantu zilabeleka mbuli “mulanda wa-Leza,” kupa kuti zintu kazyeenda kabotu mubukkale bwabantu, buyo-buyo mwali kunovwulide manyongwe. Alimwi beendelezi bamwi balukwabilila lwaanguluko lwabantu, kubikkilizya alwaanguluko lwabukombi bwakasimpe, eeco Saatani ncatayandi. (Ba-Roma 13:3, 4; Ezara 7:11-27; Incito 13:7) Nokuba boobo, akaambo kakuyungwa a Saatani, kunyina muntu naa mbunga yabantu yakonzya kuleta luumuno lutamani alimwi akuliiba kubantu. *—Johane 12:31.

“Mweelwe Wamuntu”

Inzila yatatu iigwasya kumvwisya ncoyaamba 666 nkaambo kakuti yiitwa kuti “mweelwe wamuntu.” Kaambo aaka takakonzyi kwaamba muntu omwe pe, nkaambo Saatani nguujisi nguzu aacinyama eeci, ikutali muntu umwi pe. (Luka 4:5, 6; 1 Johane 5:19; Ciyubunuzyo 13:2, 18) Pele akaambo kakuti cinyama cijisi “mweelwe wamuntu,” naa bulembo, citondezya kuti ncintunsi, tacili muuya naa daimona, akuti citondezya bube bumwi bwabantu. Ino inga bwaba bube buli oobu? Ibbaibbele lilaingula kuti: “Boonse [bantu] babisya akulela kubulemu bwa-Leza.” (Ba-Roma 3:23) Aboobo ikubaa “mweelwe wamuntu” kwacinyama kutondezya kuti mfwulumende zitondezya bube bubyaabi bwabantu, oobo butondezyegwa acibi alimwi akutalondoka.

Makani aansiku alasinizya kuti aaya mmasimpe. Henry Kissinger, iwakali kulanganya makani aamumasi ku U.S. wakati: “Lusumpuko loonse lwali kucitika tiilwali kuzumanana pe. Makani aasinku mmakani aakusolekesya kwatakazwidilila, aakulombozya kwatakazuzikizyigwa . . . Aboobo, mbuli sikuluula makani aansiku, muntu weelede kuzumina buyo kuti tacikonzyeki kweeleba ntenda.” Ikwaamba mbwaabede ncobeni makani nkwaakacita Kissinger kusinizya kululama kwakakasimpe kajanika mu Bbaibbele kakuti: “Muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.”—Jeremiya 10:23.

Mbwaanga lino twaciziba cinyama akubona mbwacibona Leza, lino tulakonzya kulanga-langa  cibeela camamanino camakani aaya aakatazya, nkokuti inamba 6 alimwi akaambo ncoyiindulukwa kulembwa ziindi zyotatwe, nkokuti 666 naa 600 kusanganya 60 akusanganya 6.

Nkaambo nzi Namba 6 Ncoyiindulukwa Ziindi Zyotatwe?

Mu Magwalo, manamba amwi kuli ncaayiminina. Mucikozyanyo, namba 7, kanji-kanji ilabelesyegwa kwiiminina cintu cizulide, naa cilondokede mumeso aa Leza. Mucikozyanyo, nsondo ya Leza yakulenga ijisi ‘mazuba’ aali ciloba, naa ciindi cilimbocibede cizumanana, oomo Leza mwaakamanizya kuzuzikizya makanze aakwe aakulenga kujatikizya nyika. (Matalikilo 1:3–2:3) “Majwi” aa Leza ali mbuli nsiliva “iisalazigwa ziindi zili musanu azibili,” nkokuti alasalala cakulondoka. (Intembauzyo 12:6; Tusimpi 30:5, 6) Sicinsenda Naamani wakaambilwa kusamba ziindi zili ciloba mu Mulonga wa Jordano aboobo wakapona cakumaninina.—2 Bami 5:10, 14.

Mucisambomwi kubulide komwe kutegwa ibe ciloba. Sena eeci tacili citondezyo ceelela cacintu citalondokede, naa cijisi kampenda mumeso aa Leza? Masimpe, mbocibede oobu. (1 Makani 20:6, 7) Kuyungizya waawo, kulemba 6 ziindi zyotatwe, kuti 666, kulakukankaizya kapati kutalondoka ooko. Alimwi cisinizya kuti kaambo aaka kaliluzi ncakuti 666 “mweelwe wamuntu,” kweelana ambotwaamba kale. Aboobo, micito yacinyama kuzwa kaindi, “mweelwe wamuntu” ngocijisi alimwi amweelwe 666 kuugama zyoonse zitondezya kaambo katadoonekwi, nkokuti kulezya kupati alimwi akwaalilwa mumeso aa Jehova.

Ibupanduluzi ibutondezya kwaalilwa kwacinyama butuyeezya cakaambwa kujatikizya Mwami Belisazara wa Babuloni wansiku. Kwiinda muli Daniele, Jehova wakaambila muleli ooyo kuti: “Wapimwa muzipimyo, wabula bulemu bweelede.” Masiku ngaonya aayo Belisazara wakajaigwa, alimwi Bulelo bwa Babuloni bwakajisi nguzu kapati bwakazundwa. (Daniele 5:27, 30) Mbubwenya buyo, lubeteko lwa Leza kujatikizya cinyama catwaambo twacisi abaabo bajisi bulembo bwaco citondezya mamanino aacinyama eeco abaabo bali kulubazu lwaco. Nokuba boobo, mukaambo aaka Leza takagusyi buyo bweende bomwe bwatwaambo twacisi, pele zibeela-beela zyoonse zyabulelo bwabantu. (Daniele 2:44; Ciyubunuzyo 19:19, 20) Aboobo cilayandika kapati kuti tubutantamuke bulembo bujazya bwacinyama!

Bulembo Bwapandululwa

Mbolyamanina buyo kuyubununa mweelwe wa 666, ibbuku lya Ciyubunuzyo lyaamba basikutobela Mwanaambele, Jesu Kristo, bali 144,000 ibajisi zina lyakwe azina lya Wisi, Jehova, lilembedwe ankumu zyabo. Aaya mazina azibya baajisi kuti bali kulubazu lwa Jehova a Mwanaakwe, aabo mbobacitila bumboni cakukondwa. Ncimwi buyo, aabo bajisi bulembo bwacinyama balatondezya caantangalala kuti balalibombya kucinyama.  Aboobo, tacikwe makani naa bulembo buli kujanza lyalulyo naa ankumu, kwaamba munzila yacikozyanyo, ncitondezyo cizibizya uubujisi kuti ukomba bweende bwazintu oobu bwamunyika ibuli mbuli cinyama. Aabo bajisi bulembo bapa “Kaisara” zintu zyeelede kupegwa Leza. (Luka 20:25; Ciyubunuzyo 13:4, 8; 14:1) Ino mbuti mbobacita oobo? Balacita oobo kwiinda mukuzilemeka kapati mfwulumende, zikozyanyo zyazyo alimwi abasikalumamba bazyo basinguzu, eezyo nzyobasyoma kuti ziyooleta lufwutuko. Kufwumbwa kukomba nkobacita kuli Leza wakasimpe nkwaamulomo buyo.

Mukwiimpana, Ibbaibbele litukulwaizya kuti: “Mutasyomi bami, na muntu waansi uutagwasyi. Muuya wakwe wazwa, ulabweeda kubulongo; mubuzuba obo mbubonya makanze aakwe oonse alamana.” (Intembauzyo 146:3, 4) Aabo batobela lulayo oolo lwabusongo, tabatyompwi pe mfwulumende nozyaalilwa kuzuzikizya nzyobasyomezya naa ciindi beendelezi bayandwa kapati nobasweekelwa zyuuno zyabo zyaatala.—Tusimpi 1:33.

Eeci tacaambi kuti Banakristo beni-beni bakkala buyo kakunyina kucita cimwi cintu kujatikizya mapenzi aabantu. Muciindi caboobo, balakambauka caantangalala mfwulumende yomwe iiyoomanizya mapenzi aabantu, nkokuti Bwami bwa Leza, oobo mbobaiminina.—Matayo 24:14.

Bwami bwa Leza—Bulangizi Bulikke Bwabantu

Naakali aanyika, mutwe wamakani mubukambausi bwa Jesu wakali Bwami bwa Leza. (Luka 4:43) Mumupailo wakwe wacikozyanyo, zimwi ziindi wiitwa kuti Mupailo wa Mwami, Jesu wakayiisya basikumutobela bakwe kupailila Bwami oobo kuti buboole, aluyando lwa Leza kuti lucitwe aano anyika. (Matayo 6:9, 10) Bwami nimfwulumende iiyoolela munyika yoonse, ikutali kuzwa mudolopo limwi lipati anyika, pele kuzwa kujulu. Aboobo, Jesu wakabwiita kuti “Bwami bwakujulu.”—Matayo 11:12.

Ino nguni weelela kuba Mwami wa Bwami oobo kunze lya Jesu Kristo, ooyo wakabafwida balelwa bakwe bakumbele? (Isaya 9:6, 7; Johane 3:16) Lino-lino Muleli ooyu uulondokede, aciindi eecino uuli ncilenge camuuya cilaanguzu, uyoowaala cinyama, bami baco abasikalumamba baco “muziba lyamulilo uuyakisya asulufa,” citondezyo cakunyonyoonwa cakumaninina. Pele tacili buyo ceeco cilikke pe. Alimwi Jesu uuyoogwisya Saatani, icintu eeco ncatakonzyi kucita muntu uuli woonse.—Ciyubunuzyo 11:15; 19:16, 19-21; 20:2, 10.

Bwami bwa Leza buyooleta luumuno kubalelwa boonse bamvwa. (Intembauzyo 37:11, 29; 46:8, 9) Nokuba kuusa, kuciswa alimwi alufwu tazikooyoobako. Elo kaka tabuliboteli bulangizi mbobajisi aabo bazumanana kubutantamuka bulembo bwacinyama!—Ciyubunuzyo 21:3, 4.

Bupanduluzi buyungizidwe

Kabbokesi kali apeeji 5]

Nzila Zigwasya Kuziba Ncoyaamba 666

1. Mazina aamu Bbaibbele kanji-kanji ayubununa zimwi zintu kujatikizya bube abukkale bwamuntu uujisi zina eelyo, mbuli kuli Abrahamu, Jesu abamwi buyo banji. Mbubwenya buyo, mweelwe wacinyama wiiminina bube bwaco.

2. Mubbuku lyamu Bbaibbele lya Daniele, zinyama ziindene-indene ziiminina mami aabantu naa bulelo bwakali kutobelana. Cinyama cijisi bube bwiindene-indene cilembedwe ku Ciyubunuzyo 13:1, 2 ciiminina mfwulumende zyamunyika yoonse, izigwasilizyigwa alimwi akweendelezyegwa a Saatani.

3. Ikubaa “mweelwe wamuntu” kwacinyama kutondezya kuti ncintunsi, talili daimona pe. Aboobo, citondezya kwaalilwa kwabantunsi ikuboola akaambo kacibi akutalondoka.

4. Mumeso aa Leza, namba 6 yaamba kutalondoka, mbwaanga ilalezya kunamba 7 eeyo mu Bbaibbele yiiminina kuzulila naa kulondoka. Ibulembo bwa 666 bukankaizya kulezya ooko kwiinda mukwiinduluka namba eeyo ziindi zyotatwe.

[Zifwanikiso izili apeeji 6]

Bulelo bwabantu bwaalilwa, aboobo balaimininwa kabotu amweelwe wa 666

[Kulumba]

Mwana uulaa nzala: Cifoto ca UNITED NATIONS cakafotolwa a F. GRIFFING

[Zifwanikiso izili apeeji 7]

Jesu Kristo uyooleta bulelo bulondokede kunyika