Ncikombelo Cili Ncomweelede Kusala?

‘ZIKOMBELO ziindene ninzila buyo ziindene zitola kulubazu lomwe. Kayi kuli buyo Leza omwe, sena tabusyi na?’ Imajwi aaya alaambwa abantu banji ibayeeya kuti nokuba kuti cilayandika kapati ikuba acikombelo nkozulilwa, kufwumbwa cikombelo ncasala muntu cili buyo kabotu.

Kakunyina kukalangisya, aaka kaambo kalakonzya kumvwika mbuli kuti kaliluzi mbwaanga cili masimpe kuti kuli buyo Leza omwe Singuzuzyoonse. (Isaya 44:6; Johane 17:3; 1 Ba-Korinto 8:5, 6) Nokuba boobo, tweelede kubikkila maano kukwiindana—nokuba kukazyanya kuliko akati kankamu zinji zyazikombelo zilyaamba kuti zibelekela Leza mwini-mwini. Ziliindene kapati mumilimo, lusyomo, njiisyo alimwi anzyobayandika. Kuli kwiindana kupati kapati cakuti aabo ibanjila cikombelo cimbi cilabayumina ikumvwisya naa kuzumina nzyobayiisya naa nzyobasyoma bamwi.

Nokuba boobo, Jesu wakati: “Leza ngo-Muuya, eno abamukomba balyeelede kumukomba mumuuya amubwini.” (Johane 4:24) Sena kukomba Leza mubwini kulazumizya ikuba atwaambo tunji twiindene kujatikizya mbwabede Leza, makanze aakwe alimwi ambwayanda kuti kakombwa? Sena ncamaano ikusyoma kuti kufwumbwa mbotukonzya kumukomba kunyina mulandu kuli Leza Singuzuzyoonse?

Banakristo Beni-Beni Bamumwaanda Wamyaka Wakusaanguna Abamazubaano

Banakristo bamumwaanda wamyaka wakusaanguna zimwi ziindi bakali kwiindana muzintu zimwi. Mucikozyanyo, kaamba zyabaabo bamu Korinto, imwaapostolo Paulo wakati: “Kwandisikila impuwo yandinywe, nubakwesu, iizwa kubantu ba-Kloe, yakuti kuli inkazyanyo akati kanu. Nkukwaamba kuti, umwi ulaamba kuti, Ime ndi wa-Paulo, aumwi uti, Ime ndi wa-Apolo, aumwi uti, Ime ndi wa-Kefa, aumwi uti, Ime ndi wa-Kristo.”—1 Ba-Korinto 1:11, 12.

Sena kwiindana ooku Paulo wakakubona kuti kuli buyo kabotu? Sena aumwi muntu wakali anzila yakwe iitola kulufwutuko? Naaceya! Paulo wakabacenjezya kuti: “Ndamukumbila, nubakwesu, muzina lya-Mwami Jesu Kristo, kuti mwaambe cintu comwe, kutabi mipampo mipampo akati kanu. Amube alukamantano lwamoyo omwe alwamiyeeyo yomwe.”—1 Ba-Korinto 1:10.

Masimpe, lukamantano mulusyomo talukonzyi kujanwa kwiinda mukusinikizyigwa. Lulajanwa lilikke muntu aumwi nalibonena mbwaabede makani akuzumina eezyo nzyobasyoma bamwi. Aboobo, ikwiiya Jwi lya Leza alimwi akuyandisya kuzibelesya eezyo ziyiigwa nenzila iiyandika mukuba alukamantano  oolo ndwaakaamba Paulo. Sena lukamantano luli boobo lulakonzya kujanwa? Mbotwabona kale, Leza wali kugwasya bantu bakwe kabali nkamu. Sena cilakonzyeka ikuziba nkamu eeyo mazubaano?

Ibububotu Bwakuyanzana Ankamu Iili Kabotu

Sintembauzyo Davida aciindi cimwi wakabuzya kuti: “O Jehova, ngwani uukonzya kusekelezegwa mucilao cako? Ngwani uukonzya kukala mucilundu cako cisalala?” Masimpe eeyi mmibuzyo iipa kuyeeya. Davida wakaingula kuti: “Ngonguwe uuenda cakulondoka akucita bululami, uuamba lusinizyo mumoyo wakwe.” (Intembauzyo 15:1, 2) Iluzibo lwini-lwini lwamu Bbaibbele lulakonzya kumugwasya muntu kuziba cikombelo eeco cizuzikizya nzyayanda Leza. Aboobo, kwiinda mukuyanzana ankamu eeyo, muntu ulakonzya kuba acilongwe ciyumu abantu aabo bakomba Leza mulukamantano alimwi “mumuuya amubwini.”

Bakamboni ba Jehova batondezya kuti cilakonzyeka ikukamantana mulusyomo alimwi amumilimo nomuba munyika ino iitakamantene. Akati kabo kuli bamwi bakali kunjila zikombelo ziindene-indene alimwi bazwa mumisyobo iindene-indene. Bakamboni bamwi bakali baabo batasyomi muli Leza naa batazumini kuti Leza nkwali. Mane ibamwi kunyina nobakali kubikkila maano kumakani aabukombi. Ibantu basiyene-siyene bazwa muzikombelo, bukkale alimwi alusyomo lwiindene-indene balakkomana aluumuno lwabukombi oobo butabonwi munyika mazubaano.

Icipa kuti kube lukamantano luli boobo ndi Jwi lya Leza, Ibbaibbele. Masimpe, Bakamboni ba Jehova balizyi kuti tabakonzyi kusinikizya bamwi kucita zintu nzyobatayandi. Pele balayandisya kuba acoolwe cakukulwaizya bamwi ikwiiya Bbaibbele kucita kuti kusala nkobasala kumakani aabukombi kube kooko kuyeeme antalisyo njumu. Munzila eeyi, ibanji balakonzya kugwasyigwa azilongezyo ziboola kuzwa mukukomba Leza “mumuuya amubwini.”

Mazubaano, ipenzi lyakoongelezyegwa akucegwa azintu zibi lyakomena. Ikusala kuyanzana ankamu iili kabotu kulayandika kapati. Ibbaibbele lyaamba kuti “uuenda abasongo ulasongwaala” akuti “mweenda abamineme, anywebo mulaminama.” (Tusimpi 13:20; 1 Ba-Korinto 15:33) Ikuyanzana abakombi ba Leza beni-beni ndukwabililo. Nkakaambo kaako Ibbaibbele lituyeezya kuti: “Katunga katuyeeyana, katubusyanya-busyanya mukuyandana akucita milimo mibotu. Tutanoonga katuleka kulibunga-bunga, mbuli bamwi mbubaleka, anu kamucenjezyanya twaambo, kamucita obuya lyoonse mbomukubwene kuti buzuba bwa-Kristo buli afwaafwi.” (Ba-Hebrayo 10:24, 25) Eeci ncilongezyo ncobeni ibeenzuma beni-beni, bakwesu bakumuuya alimwi abacizyi nobagwasyanya ikuzuzikizya mikuli yabo kuli Leza.

Ottmar ulakazuminizya aaka kaambo. Nokuba kuti wakakomenena mumukwasyi wa Cikatolika mu Germany, wakacileka kuunka kucikombelo. Upandulula kuti: “Kufwumbwa ndaunka kucikombelo, ndakali kuzwa kandinyina abulangizi buli boonse mbubwenya mbondaunkide.” Nokuba boobo, wakacijisi lusyomo muli Leza. Mpoonya wakayaana a Bakamboni ba Jehova mane wakasinizya kuti mbababelesi ba Leza beni-beni. Wakabona mbociyandika kuyanzana ambabo. Lino waamba kuti: “Ndili musungu mumbunga yaanyika yoonse alimwi ndililiibide mumizeezo amumoyo. Ndilagwasyigwa bucebuce ikutegwa ndijane luzibo lwini-lwini lwamu Bbaibbele. Eeci candigwasya kapati.”

Ikutamba Baabo Bayandaula

Ibantu bazuminana cintu comwe ababelekela antoomwe kabali nkamu balakonzya kuzuzikizya mulimo mupati kapati kwiinda bantu balibelekela aumwi lwakwe. Mucikozyanyo, malailile aa Jesu aakulaya basikwiiya bakwe akali akuti: “Nkaambo kaako kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendamulailila.” (Matayo 28:19, 20) Ino mbuti mulimo mupati boobu mbuukonzya kuzuzikizyigwa kabotu nokwali kuti taakwe busolozi  naa mbunga? Ino mbuti muntu mbwakonzya kutobela malailile aaya aamu Magwalo ikuti naa kabelekela Leza munzila yakwe alikke?

Mwakali, Bakamboni ba Jehova nyika yoonse bakamwaya mabbuku, tubbuku amabroshuwa aamba zya Bbaibbele aasika ku 91,933,280 kubikkilizya amamagazini aasika ku 697,603,247. Munzila eeyi, bakacikonzya kusikila myaanda yatuulunzuma twabantu amulumbe wa Jwi lya Leza mumasi aali 235. Ncobeni oobu mbumboni bulibonya bwakuti imulimo uucitwa ankamu iikamantene ulazwidilila kwiinda mulimo uucitwa aumwi lwakwe alikke.

Kunze lyakumwaya mabbuku aamba zyamu Bbaibbele, Bakamboni ba Jehova baleendelezya ziiyo zya Bbaibbele kakunyina kubbadelesya ikugwasya bantu kumvwisya eeco ncayanda Leza. Mwakali, mweelwe waakati-kati waziiyo zya Bbaibbele uusika ku 5,726,509 zyakeendelezyegwa amvwiki kumuntu aumwi kumugama alimwi amutukamu. Aaya malailile aamu Bbaibbele agwasya tuluunzuma twabantu ikuba antalisyo njumu aawo mpobeelede kuyaama mukusala kwabo caboola kumakani aabukombi. Mwatambwa kwiiya nzyayanda Leza mbubwenya mbozilembedwe mu Bbaibbele. Mwamana mulakonzya kulisalila.—Ba-Efeso 4:13; Ba-Filipi 1:9; 1 Timoteo 6:20; 2 Petro 3:18.

Ikuti kamuyanda kukkomanisya Leza, ikuba acikombelo nkomuzulilwa cilayandika kapati—pele ikutali kufwumbwa nkamu yabukombi. Mweelede kusala cikombelo kwiinda mukubelesya luzibo lwini-lwini lwamu Bbaibbele ikutali munjiisyo zyabantu zinyina abumboni naa nzyobamwaambila bamwi kuti mbolyaamba Bbaibbele. (Tusimpi 16:25) Amwiiye ziyandika mubukombi bwini-bwini. Amuzyeezyanisye azyeezyo nzyomusyoma. Mpoonya amusale camaano.—Deuteronomo 30:19.

[Zifwanikiso izili apeeji 7]

Bakamboni ba Jehova balikamantene munyika iitakamantene