Sena Muleelede Kuba a Cikombelo Nkomuzulilwa?

‘TANDEELEDE kunjila cikombelo cili coonse naa kuunka kucikombelo buya ikutegwa ndisyome muli Leza pe!’ Oobu bantu banji mbobalimvwa kumakani aakunjila cikombelo naa mbunga yabukombi iili yoonse. Ibamwi baamba kuti balalimvwa kuti baswena kuli Leza ciindi nobabona zilengwaleza zili aanze kwiinda ciindi nobajanika kumiswaangano yabukombi. Mazubaano, imuzeezo uudumide ngwakuti ikuyanzana ankamu yabukombi naa cikombelo takuyandiki ikutegwa muntu asyome Leza.

Nokuba boobo, ibamwi cakusinizya bayeeya bumbi. Balakazya akwaamba kuti ikuba wacikombelo cimwi akujanika zilayandika, alimwi akuti muntu kayanda kuzuminwa a Leza. Aboobo, kuyanzana abukombi kulayandika kapati kumuntu aumwi ikutali buyo akaambo kabaabo ibayanda kuzyiba mweelwe wabajanika naa twaambo tumbi tujatikizya zikombelo pe. Aboobo, mbwaanga cilongwe cesu a Leza cilijatikizyidwe, sena tacikonzyi kugwasya kuvwuntauzya akubona mbwaabona makani aaya Leza? Aboobo, ino ncinzi ncotukonzya kwiiya kuzwa mu Jwi lyakwe Ibbaibbele kujatikizya kaambo aaka?

Leza Mbwaakabeendelezya Bantu Lyansiku

Lino kwainda myaka iitandila ku 4,400 kuzwa ciindi kupaya kwamaanzi kuyoosya nokwakacitika munyika yoonse. Cintu cili boobo tacilubiki pe, alimwi bantu munyika yoonse balaana zyaano zijatikizya nkuko mumakani aabo aansiku. Nokuba kuti zyaano eezi ziliindene, zilijisi zibeela moziswaangene, kubikkilizya amakani aakuti bantu abanyama basyoonto buyo mbabakafwutuka.

Sena aabo bakafwutuka ku Kupaya kwamaanzi bakali buyo bantu bakaba acoolwe cakufwutuka lunyonyooko oolo? Icibalo ca Bbaibbele citondezya kuti takuli boobo pe. Ikaambo kapati nkakuti Leza kunyina naakazibya muntu umwi aumwi kujatikizya Kupaya kwamaanzi kwakali kuboola. Muciindi caboobo, wakaambila Nowa, walo iwakacenjezya mbaakali kupona limwi kujatikizya  Zambangulwe lyakali kuboola.—Matalikilo 6:13-16; 2 Petro 2:5.

Ikufwutuka kwakayeeme akukamantana ankamu eeyi alimwi akulisungula kutobela busolozi Leza mbwaakapa kuli Nowa. Nobaba banyama bakali mubwato ibakafwutuka ku Kupaya kwamaanzi bakafwutuka akaambo kakuba mukabunga aaka. Malailile aagaminide akapegwa kuli Nowa ikutegwa acite bubambe bwakufwutusya banyama.—Matalikilo 6:17–7:8.

Nokwakainda myaanda yamyaka iili mbwiibede, luzubo lwa Nowa kumwanaakwe musankwa uutegwa Semu lwakanjila mubuzike ku Egepita. Pele, makanze aa Leza akali akubagusya mubuzike akubatola kunyika eeyo njaakasyomezyede Abrahamu syaanyinakulu. Alimwi awaawa, makani aaya kunyina naakayubununwa kumuntu umwi aumwi, pele akayubununwa buyo kuli baabo bakasalwa kuti babe basolozi babo, nkokuti Musa amunyina Aroni. (Kulonga 3:7-10; 4:27-31) Aaba ibakali bazike nobakazwa ku Egepita kaili nkamu, bakapegwa Mulawo a Leza aa Cilundu ca Sinai akubacita kuti ube musyobo wa Israyeli.—Kulonga 19:1-6.

Ikufwutuka kwakakonzyeka kumuna Israyeli umwi aumwi akaambo buyo kakuti bakali kuyanzana ankamu yakakkazikizigwa a Leza akutobela busolozi bwabasololi bankamu eeyi. Mane kwakabambwa bubambe bwakuti bamwi bana Egepita bayanzane ankamu eeyi kakunyina kudooneka yakazuminidwe a Leza. Bana Israyeli nobakazwa mu Egepita, bantu aaba bakabatobela. Aboobo bakaba abulangizi bwakutambula zileleko zya Leza.—Kulonga 12:37, 38.

Eelyo mumwaanda wamyaka wakusaanguna, Jesu wakatalika mulimo wakwe wakukambauka akubunganya bantu kuti babe basikwiiya bakwe. Wakali kubeendelezya kaili nkamu, nokuba kuti alimwi wakababikkila maano bantu kweelana aumwi mbwaakali kuyandika. Kuba apostolo bakwe bali 11, Jesu wakaamba kuti: “Nywebo ndinywe mwandiiminina mumapenzi aangu, eno ndamubika bwami mbubonya Taata mbwaakandibika.” (Luka 22:28, 29) Kumbele, muuya uusalala wa Leza wakasikila basikwiiya nobakali bungene kaili nkamu.—Incito 2:1-4.

Zikozyanyo eezi zilatondezya kabotu-kabotu ikuti kaindi Leza lyoonse wakali kweendelezya bantu bakwe kaili nkamu. Mbantu basyoonto buyo Leza mbaakali kweendelezya cigaminina nkokuti Nowa, Musa, Jesu abamwi. Aaba mbambabo mbaakali kubelesya kuti baambile nkamu yabantu bakali yanzeene kapati. Kunyina kaambo kakonzya kupa kusyoma kuti Leza ulabeendelezya babelesi bakwe munzila iindene sunu. Pele, makani aaya abusya mubuzyo aumbi wakuti: Sena kwiide kuyanzana ankamu yabukombi iili yoonse kulizulide? Tulaulanga-langa mubuzyo ooyu uyandika kapati mucibalo citobela.

[Cifwanikiso icili apeeji 4]

Kuzwa kaindi Leza wali kweendelezya bantu bakwe kaili nkamu