Leza Ncobeni Ulamulanganya

CILEELELA kulomba lugwasyo kuli Leza eelyo notuli mumapenzi. Kayi “ngusinguzu loko; busongo bwakwe tabubaliki.” (Intembauzyo 147:5) Nguuyelela kabotu kutugwasya kuliyumya mukweendelezya mapenzi eesu. Kunze lyaboobo, Ibbaibbele litulomba kuti ‘tutuule myoyo yesu’ kulinguwe. (Intembauzyo 62:8) Ikuti kacili boobo, ino nkaambo nzi bantu banji ncobalimvwa kuti Leza tayiinguli mipailo yabo? Sena eeco caamba kuti talanganyi?

Muciindi cakufwambaana kupa Leza mulandu akaambo kakuti ulibonya kuti tanaabweza ntaamu, amuyeeye ciindi nomwakacili bana. Ibazyali banu nobatakazumina ndilyonya kumupa kufwumbwa ncomwakali kuyanda, sena mwakabaamba kuti tabamuyandi? Ibana banji mbobaamba oobo. Pele nomwakakomena, mwakazyiba kuti luyando lulatondezyegwa munzila zinjaanji akuti ikuzumina kucitila mwana kufwumbwa ncayanda mubwini teensyi luyando pe.

Mbubwenya buyo, ikuti Jehova katayiinguli lyoonse mipailo yesu kweelana ambotulombozya, tacaambi kuti tatubikkili maanu. Masimpe ngakuti Leza ulatondezya mbwatulanganya toonse munzila zinjaanji.

“Mulinguwe Motupona”

Cakusaanguna, nkaambo ka Leza ‘ncotuponena akweenda akubawo.’ (Incito 17:28) Mmasimpe, ikutupa buumi kutondezya kulanganya kwaluyando nkwacita kulindiswe!

Kunze lyaboobo, Jehova ulatupa nzyotuyandika kutegwa katuli baumi. Tubala kuti: “Ulamenekela iŋombe bwizu, azisyu zigwasya bantu, kuti kujanwe zilyo muvu.” (Intembauzyo 104:14) Masimpe ngakuti, nzinji Mulengi wesu nzyacita kunze buyo lyakutupa zintu ziyandika kutegwa katupona. Cabuuya ulatupa “imvula eziindi zyazilyo izizwa kujulu, wazuzya myoyo [yesu] kulya akubotelwa.”—Incito 14:17.

Nokuba boobo, ibamwi balakonzya kuyeeya kuti, ‘Ikuti Leza katuyanda kapati, ino nkaambo nzi ncatulekelede kupenga?’ Sena mulibuzyi bwiinguzi kumubuzyo ooyu?

Sena Leza Nguuyelede Kupegwa Mulandu?

Ibunji bwamapenzi aabanamaleya ngakuliletela beni. Mucikozyanyo, micito ikonzya kuletela ntenda ilizyibidwe kabotu. Nokuba boobo, bantu balacita bwaamu, balanywa bukoko cakwiindilizya akubelesya misamu iimbi munzila iteelede, balafweba tombwe, balajatikizyigwa muzisobano ziletela ntenda, balaciindizya kubalisya myootokala azimwi-zimwi. Ikuti bukkale buletela ntenda buli boobu bwabapa kupenga bantu, ino nguni weelede kupegwa mulandu? Sena ngu Leza naa ngooyo uucita zintu cabufwubafwuba? Jwi lya Leza ilyakasololelwa amuuya wakwe lyaamba kuti: “Mutalubi, Leza tacapwi. Kufumbwa ncabyala muntu, ulatebula eco nciconya.”—Ba-Galatiya 6:7.

Kunze lyakulipenzya beni, bantunsi bunji bwaziindi balapenzyanya. Icisi nocilwa nkondo, mmasimpe tali Leza weelede kupegwa mulandu kujatikizya mapenzi aacitika. Eelyo cigwebenga nocilwana sicisinyina, sena ngu Leza weelede kupegwa mulandu kumapenzi naa lufwu lucitika? Peepe! Eelyo muleli silunya napenzya akusubula alimwi akujaya baabo mbeendelezya, sena tweelede kupa Leza mulandu? Ooko inga kwaba kutayeeya kabotu.—Mukambausi 8:9.

Pele ino mbuti kujatikizya tuulunzuma twabantu ibacete cakuzwa munzila naa ibafwa nzala? Sena ngu Leza weelede kupegwa mulandu? Peepe. Inyika yesu ilapa zyakulya zinji kapati zikonzya kukkwana bantu boonse. (Intembauzyo 10:2, 3; 145:16) Nkwaabanya kutacitwi kabotu kwazintu zinji nzyapa Leza ikupa kuti kakuli nzala iilunzya kasuko abucete mumasena manji.  Alimwi ikuliyanda kwabantunsi kwapa kuti penzi eeli lizumanane.

Ipenzi Lini Mpolibede

Pele ino nguni weelede kupegwa mulandu eelyo umwi naciswa naa kufwa akaambo kakucembaala? Sena inga camugambya ikuzyiba kuti nokuba kumapenzi aaya tali Leza weelede kupegwa mulandu? Leza tanaakalenga muntu kuti kapenga akaambo kakucembaala alimwi akuti kafwa.

Banabubili bakusaanguna, ba Adamu a Eva nobakabikkwa mumuunda wa Edeni, Jehova wakabapa bulangizi bwabuumi butamani muparadaiso anyika. Nokuba boobo, wakali kuyanda kuti inyika izyule bantu bakali kuyoocikkomanina ncobakatambwide. Aboobo wakacita kuti bukkale bwabo bwakumbele buyaame akucita cintu cimwi. Ba Adamu a Eva bakali kuyoopona mu Paradaiso lilikke ikuti nobakazumanana kumumvwida Mulengi wabo siluyando.—Matalikilo 2:17; 3:2, 3, 17-23.

Mukubula coolwe, ba Adamu a Eva bakazanga. Eva wakasala kumvwida cakaamba Saatani Diabolosi. Wakamucenga alimwi mubwini wakaamba kuti Leza wakali kumwiima cintu cimwi cibotu. Aboobo wakatalika bukkale bwakulyeendelezya mwini akusoleka ‘kuba mbuli Leza, uuzyi bubotu abubi mbobubede.’ Awalo Adamu wakamusangana mukuzanga.—Matalikilo 3:5, 6.

Nobakabisya boobu, ba Adamu a Eva bakalitondezya kuti tiibakeelede kupona kukabe kutamani. Bakatalika kucitikilwa zintu zibi ziboola akaambo kacibi. Inguzu zyabo abuzumi zyakatalika kuyaabumana, eelyo kumbele bakafwa. (Matalikilo 5:5) Pele ibuzangi bwabo bwakaleta mapenzi aambi mapati kwiinda waawo. Tucipenga nkaambo kacibi caba Adamu a Eva. Imwaapostolo Paulo wakalemba kuti: “Cibi mbucakanjila munyika kumaanza aamuntu omwe buyo [Adamu], alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya.” (Ba-Roma 5:12) Ee, akaambo kabuzangi bwaba Adamu a Eva, icibi alufwu zyakatambukila bantu boonse mbuli bulwazi bujaya.

Ibumboni Buzula Kapati Bwakuti Leza Ulatulanganya

Sena eeco caamba kuti bantu mbaakalenga Leza lino bakabijila limwi? Peepe, alimwi lino twasika kubumboni buzula kapati  bwakuti Leza ulatulanganya. Cakulyaaba kapati, Leza wakapa nzila yakufwutula banamaleya kucibi alufwu. Imuulo wakufwutuzya wakali buumi bwa Jesu bulondokede, mbwaakapa cakulisungula kutegwa tugwasyigwe. (Ba-Roma 3:24) Aboobo imwaapostolo Johane wakalemba kuti: “Obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Akaambo kanzila eeyi yaluyando lulibedelede, alimwi tulijisi bulangizi bwakupona kukabe kutamani. Paulo wakalembela bana Roma kuti: “Kubululami bwamuntu omwe kulazida bantu boonse lululamiko lwabuumi.”—Ba-Roma 5:18.

Tulakonzya kusinizya kuti kuciindi ncabikkide Leza, takukabi limbi kupenga naa lufwu a Nyika eeyi. Muciindi caboobo, ibukkale bwakasinsimwa mubbuku lya Ciyubunuzyo mbobunooliko koonse-koonse. Mbwakuti: “Amubone, bukalo bwa-Leza mpobuli akati kabantu, uzookala akati kabo. Bazooba bantu bakwe, alakwe Leza mwini uzookala kulimbabo, azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.” (Ciyubunuzyo 21:3, 4) Mulakonzya kwaamba kuti, ‘Ndinoofwide kale zyaakucitika zintu eezyo.’ Pele imasimpe ngakuti eeco inga calangilwa. Alimwi nokuba kuti mwafwa, Leza ulakonzya kumubusya kubafwu. (Johane 5:28, 29) Aayo ngamakanze ngajisi kulindiswe Leza alimwi eezyi nzyeziyoocitika. Elo nkubeja kapati kaka ikwaamba kuti Leza tabalanganyi banamaleya!

“Amuswenenene Kuli-Leza”

Cilaumbulizya ikuzyiba kuti Leza watalisya bubambe bwakwaamanizyila limwi mapenzi aabantunsi mane kukabe kutamani. Pele ino mbuti lino? Ino ncinzi ncotunga twacita ikuti twafwidwa muyandwa naa ikuti mwaneesu waciswa? Tacinasika ciindi ncabikkide Leza cakugusya malwazi alufwu. Ibbaibbele litondezya kuti tweelede kulindila kutegwa eezyo zikamanizyigwe. Pele Leza tanaatulekelezya pe. Sikwiiya Jakobo wakati: “Amuswenenene kuli-Leza, elyo alakwe ulamuswenenena.” (Jakobo 4:8) Inzya, Mulengi wesu utulomba kuti tube acilongwe ciyumu anguwe, eelyo ibacita boobo kunyina nobakakilwa kuzyiba kuti ulabagwasya nomuba mubukkale bukatazya kapati.

Ino mbuti mbotuswenenena kuli Leza? Mwami Davida wakabuzya mubuzyo uukozyenye izyuulu zyamyaka zitandila kuli zyotatwe musyule naakati: “O Jehova, . . . ngwani uukonzya kukala mucilundu cako cisalala?” (Intembauzyo 15:1) Davida wakawiingula mubuzyo wakwe naakazumanana kwaamba kuti: “Ngonguwe uuenda cakulondoka akucita bululami, uuamba lusinizyo mumoyo wakwe, uutalengeleli alulimi lwakwe, uutabisizyi mweenzinyina nikuba kubusya lusampaulo kulisikamukowanyina.” (Intembauzyo 15:2, 3) Atwaambe kuti, Jehova ulabatambula aabo ibatobela bukkale oobo ba Adamu a Eva mbobakakaka. Mmulongwe kuli baabo ibacita kuyanda kwakwe.—Deuteronomo 6:24, 25; 1 Johane 5:3.

Mbuti mbotunga twacita kuyanda kwa Leza? Tweelede kwiiya eeco citegwa “ncibotu akutambulika kuli-Leza Mufutuli wesu” akusala kucitobela. (1 Timoteo 2:3) Eeci cilabikkilizya akujana luzibo lwini-lwini lwa Jwi lya Leza, Ibbaibbele. (Johane 17:3; 2 Timoteo 3:16, 17) Cijatikizya zinji kutali kulibala buyo caatala-tala Bbaibbele. Tweelede kwiiya ba Juda bamumwaanda wamyaka wakusaanguna baku Bereya ibakamumvwa Paulo kakambauka. Ikujatikizya mbabo, tubala kuti: “Bakatambula makani emyoyo ilibambide kabotu, balalingaula Magwalo mazuba oonse, kubona kuti na zintu ezi mbozibede.”—Incito 17:11.

Mbubwenya buyo asunu, ikwiiya Bbaibbele cakusitikila kuyumya lusyomo ndotujisi muli Leza alimwi kutugwasya kuba acilongwe ciyumu anguwe. (Ba-Hebrayo 11:6) Alimwi kutugwasya kuteelela kabotu Jehova mbweendelezya banamaleya—ikutali kubagwasya buyo muciindi cisyoonto pele ikapati kwaciindi coonse aabo boonse ibalitondezya kuti baleelela.

Amulange-lange nzyobakaamba Banakristo bali mbobabede ibajisi cilongwe ciyumu a Leza. Danielle uujisi myaka iili 16 waamba kuti: “Ndilamuyanda kapati Jehova alimwi nzinji  nzyaandicitila ncondeelede kumulumba. Wakandipa bazyali basiluyando ibamuyanda ncobeni alimwi ibandiyiisya kweelana acaamba Jwi lyakwe.” Munakristo umwi ku Uruguay wakalemba kuti: “Ndilikkomene kapati mumoyo, alimwi ndikulwaizyigwa kumulumba Jehova nkaambo kaluzyalo lwakwe alimwi acilongwe ncendijisi anguwe.” Nobaba bana basyoonto Leza ulabatambula. Gabriela uujisi myaka iili ciloba wakati: “Ndilamuyanda Leza kwiinda cintu cimbi cili coonse munyika yoonse! Ndilijisi Bbaibbele lindigeme. Ndilacikkomanina ikwiiya mbwabede Leza a Mwanaakwe.”

Sunu, ituulunzuma twabantu nyika yoonse balazuminizyanya camoyo woonse asintembauzyo iwakati: “Mebo, kulandibotela kuswena kuli-Leza.” (Intembauzyo 73:28) Bagwasyigwa kuliyumya mumapenzi aabacitikila lino, alimwi balijisi bulangizi businizizye bwakupona kukabe kutamani mu Paradaiso anyika. (1 Timoteo 4:8) Ino mulekela nzi kwaacita kuba makanze aanu ‘kuswenenena kuli Leza’? Cakusinizya tusyomezyegwa kuti: “Tali kule kuluumwi [a]umwi wesu.” (Incito 17:27) Inzya, Leza ulamulanganya ncobeni!

[Zifwanikiso izili apeeji 5]

Ikutulanganya kwa Jehova kulalibonya munzila zinjaanji

[Cifwanikiso icili apeeji 7]

Nobaba bana basyoonto balakonzya kuba acilongwe a Leza

[Zifwanikiso izili apeeji 7]

Sunu Jehova ulatugwasya kuliyumya. Kuciindi ceelede, uyoogusya malwazi alufwu