Sena Leza Nguweelede Kupegwa Mulandu Kumapenzi Eesu?

MWANA musimbi mupati wa Marion naakaciswa bulwazi bunyonganya bongo, Marion wakacita ceeco bunji bwesu ncotunga twacita. * Wakapaila kuli Leza kuti amugwasye. Marion waamba kuti: “Kunyina ciindi neekazyingidwe akufwa bukata mbuli lino.” Kumbele, mwanaakwe musimbi wakaindila kuciswa, eelyo Marion wakatalika kumudooneka Leza. Wakabuzya kuti: “Ino nkaambo nzi eeci ncocakali kucitika?” Cakamuzyinga kuti Leza siluyando alimwi uulanganya wakali kukonzya kumulekelezya.

Ikulimvwa kwa Marion kulidumide kapati. Ibantu banji munyika yoonse balimvwa kuti bakalekelezyegwa a Leza ciindi nobakali kuyandika lugwasyo. Naakajaigwa muzyukulu wakwe musankwa, Lisa waamba kuti: “Ndicinyonganizyigwa ‘amibuzyo yakuti, ino nkaambo nzi LEZA ncazilekela kucitika zintu zibi?’ Teensyi kuti ndacilekela limwi buya kumusyoma Leza, pele masimpe ngakuti ilusyomo lwangu talucili luyumu mbuli mbolwakabede.” Mbubwenya buyo, nokwakacitika ntenda iijatikizya mwana muvwanda musankwa umwi, imwanakazi umwi wakati: “Kunyina Leza naakanduumbulizya kujatikizya cakacitika. Kunyina naanditondezya naaceya kuti ulalanganya naa kuti ngusiluzyalo.” Wakayungizya kuti: “Kunyina nondiya kumulekelela Leza.”

Ibamwi balamunyemena Leza nobabona zicitika munyika. Babona zisi muzwide bucete anzala, ibazangalisi akaambo kankondo ibanyina bulangizi, ibana batabaliki ibaba bamucaala nkaambo kabulwazi bwasikalileke (AIDS), alimwi atuulunzuma twabantu bapenzyegwa amalwazi aambi. Nokucitika zintu zili boobu amapenzi aambi, ibanji bapa Leza mulandu nkaambo kakuti ulibonya kuti tabikkili maanu.

Pele kasimpe nkakuti, Leza tajisi mulandu pe kumapenzi aapenzya banamaleya. Masimpe ngakuti, kuli twaambo tusyomeka ncotweelede kusyoma kuti lino-lino Leza uyoowamanizya mapenzi aabantu oonse. Twamulomba kuti mubale cibalo citobela eelyo mulabona kuti Leza ulatulanganya ncobeni.

Bupanduluzi buyungizidwe