Twaambo Tupati-Pati Kuzwa Mubbuku lya Myeelwe
Ijwi lya Jehova Lili Abuumi
Twaambo Tupati-Pati Kuzwa Mubbuku lya Myeelwe
NOBAKALONGA kuzwa ku Egepita, bana Israyeli bakaba cisi. Nobakacikonzya ndilyonya kunjila mu Nyika Yakasyomezyegwa, pele tiibakanjila pe. Muciindi caboobo, bakaingaila kwamyaka iitandila kumakumi one “munkanda impati iiyoosya.” (Deuteronomo 8:15) Nkaambo nzi? Icibalo camakani aali mubbuku lyamu Bbaibbele lya Myeelwe cilatwaambila zyakacitika. Imakani aaya ayelede kutupa kubona mbociyandika kapati ikumvwida Jehova Leza akulemeka baabo bamwiiminina.
Ibbuku lya Myeelwe lyakalembwa a Musa kali munkanda amu Magezi naa Zibanda zyamu Moabu alimwi lyakatola myaka iili 38 amyezi 9—kuzwa mu 1512 B.C.E. kusikila mu 1473 B.C.E. (Myeelwe 1:1; Deuteronomo 1:3) Izina lyabbuku lyakazwa kukubalwa kwabana Israyeli kobile, ikwakaandeene amyaka iili 38. (Zyaandaano 1-4, 26) Imakani aali mumo ali muzibeela zyotatwe. Cibeela cakusaanguna ciluula zintu zyakacitika a Cilundu ca Sinai. Icabili cijatikizya zyakacitika ibana Israyeli nobakali kwiingaila munkanda. Alimwi camamanino caamba zintu zyakacitika mu Magezi aa Moabu. Nomubala makani aaya, inga mwayanda kulibuzya kuti: ‘Ino zintu eezyi zyakacitika zindiyiisya nzi? Sena kuli njiisyo izili mubbuku eeli izinga zyandigwasya sunu?’
ACILUNDU CA SINAI
Ikubala kwakusaanguna akati kakubala kobile kwacitika bana Israyeli kabali munsi a Cilundu ca Sinai. Ibaalumi ibajisi myaka iili 20 akuya kumbele kunze buyo lyaba Levi balasika ku 603,550. Ikubalwa ooku kulangilwa kuti kwacitwa amakanze aajatikizya mulimo wabusikalumamba. Ibali munkambi yoonse kubikkilizya abanakazi, bana alimwi aba Levi balangilwa kuti balainda kutuulunzuma totatwe.
Ikubala nokwamana, ibana Israyeli bapegwa malailile kujatikizya mbobeelede kweenda, ibupanduluzi bwamilimo yaba Levi yamutente lyakuswaanganina, milawo yakupambula baciswa amilawo iijatikizya milandu yakufwidilana bbivwe alimwi azikonke zicitwa aba Naziri. Caandaano 7 cijisi makani aajatikizya zituuzyo zicitwa abasilutwe bamikowa kujatikizya kutalisyigwa kwacipaililo, mpoonya caandaano 9 cibandika pobwe lya Pasika. Inkamu eeyo alimwi yapegwa malailile aambobeelede kubungana akumwaika.
Mibuzyo Yamu Magwalo Iingulwa:
2:1, 2—Ino “ndembela” ooko nzubo zyotatwe nkozyakali kuyooyakila zilabba munkanda zyakali cinzi? Ibbaibbele kunyina nolizipandulula ndembela eezyi. Nokuba boobo, kunyina nozyakali kubonwa kuti nzitondezyo zyakusetekana naa kulemekwa mubukombi. Indembela zyakajisi mulimo wakugwasya muntu aumwi kuzyiba busena bwakwe munkambi.
5:27—Ino ncinzi caambwa ‘akumwaika kwacibelo’ camukaintu uujisi mulandu wabumambi? Ibbala lyakuti “cibelo” aawa libelesyedwe kwaamba zizyo zibelesyegwa mukuzyala. ‘Ikumwaika’ kwaco kupa muzeezo wakubula mulimo kwazizyo eezyi ikutegwa kumita kakutacikonzyeki.
Ziiyo Kulindiswe:
6:1-7. Iba Naziri bakeelede kuliimya waini azyakunywa zyoonse zikola. Bakeelede kusuwa masusu aabo—icitondezyo cakulibombya kuli Jehova, mbubwenya banakazi mbobakeelede kulibombya kubalumi babo naa bamawisi. Ba Naziri bakeelede kusalala lyoonse kwiinda mukutaguma mutumba uli woonse, nouba wamusazinyina. Babelesi baciindi coonse sunu balatondezya muuya wakulyaaba caboola kukuliimya akulibombya kuli Jehova abubambe bwakwe. Ibubambe bumwi bujatikizya kulongela kucisi cili kule, ikunga kwakatazya nokuba kutakonzyeka kupiluka kumunzi kumalila nokufwa umwi wamumukwasyi.
8:25, 26. Ikutegwa baalumi beelela ncobeni babikkwe amulimo uucitwa aba Levi, alimwi kwiinda mukubikkila maanu kuciimo cabo, ibakacembeede bakalaililwa kuti kabacileka kubeleka mulimo uuminya bakomena. Nokuba boobo, bakali kukonzya kulisungula kugwasya ba Levi bambi. Nokuba kuti kunyina kucileka mulimo wakuba sikwaambilizya wa Bwami sunu, injiisyo yamulawo ooyu iyiisya ciiyo ciyandika kapati. Ikuti akaambo kakucembaala Munakristo umwi tacicikonzyi kubeleka milimo imwi, ulakonzya kujatikizyigwa mumilimo imwi njakonzya kubeleka.
KUBUSENA ABUSENA MUNKANDA
Ikkumbi ilili atente nolyaululuka, bana Israyeli batalika lweendo luyoobasisya kumagezi aa Moabu kwainda myaka iili 38 amwezi omwe naa yobile. Inga camugwasya ikutobelezya lweendo lwabo amaapu apeeji 9 mubroshua lya ‘Atubone Nyika Mbotu,’ ilyakamwaigwa a Bakamboni ba Jehova.
Kabali munzila kuya ku Kadesi, Munkanda ya Parana, batongooka ziindi zyotatwe. Ikwakusaanguna kwalesyegwa eelyo Jehova naalosya mulilo waumpa bamwi. Mpoonya bana Israyeli balilauka kuti bayanda nyama, eelyo Jehova watuma bakancele. Ikwatatu nkutongooka kwacitwa a Miriamu a Aroni nkobatongooka Musa calo capa kuti Miriamu abe acinsenda kwaciindi cisyoonto.
Kabakkede ku Kadesi, Musa watuma baalumi bali 12 kuyootwela Nyika Yakasyomezyegwa. Bapiluka nokwainda mazuba aali 40. Nobasyoma makani aakubeja aaluulwa abali kkumi akati kabasikutwela, ibantu bayanda kumupwaya mabwe Musa, Aroni alimwi abasikutwela basyomeka ba Joshua a Kalebe. Jehova wakanza kutumina zilwazi, pele Musa wamukombelezya eelyo Leza waamba kuti bayooba basikwiingaila munkanda kwamyaka iili 40—kusikila leelyo aabo bakabalidwe musyule nobayoomana kufwa.
Jehova wapa malailile aambi. Kora abambi bamuzangila Musa a Aroni, pele basikuzanga banyonyoonwa amulilo naa kumenwa anyika yaanduka. Ibuzuba bwatobela inkamu yabantu yoonse yaŋuŋuna kutongooka Musa a Aroni. Akaambo kakuŋuŋuna ooku, ibali 14,700 bafwa alunyonyooko lwazwa kuli Jehova. Ikutegwa azyibye bantu kuti wamusala kuba mupaizi mupati, Leza wapa kuti musako wa Aroni usyuuke. Mpoonya Jehova wapa milawo iimbi iijatikizya milimo yaba Levi alimwi aijatikizya kusalazyigwa kwabantu. Ikubelesya mulota waŋombe mbwizi iisalala kwiiminina kusalazyigwa mucituuzyo ca Jesu.—Ba-Hebrayo 9:13, 14.
Ibana Israyeli bapilukila ku Kadesi ooko nkwaafwida Miriamu. Inkamu yabantu alimwi yatongooka Musa a Aroni. Ino nkaambo nzi nkobatongookela? Nkubula maanzi. Akaambo kakuti Musa a Aroni bakakilwa kusalazya zina lya Jehova nobabapa meenda munzila yamaleele, bakasyigwa kunjila mu Nyika Yakasyomezyegwa. Bana Israyeli bazwa ku Kadesi, mpoonya Aroni wafwa a Cilundu ca Hori. Nobazinguluka Edomu, bana Israyeli balema kapati eelyo batalika kunyontaukila Leza a Musa. Jehova watuma nzoka zikali kutegwa abasubule. Musa alimwi wanjilila, eelyo Leza wamulailila kupanga nzoka yamukuba akwiianzika akasamu kutegwa aabo ibalumwa kabapona kwiinda mukwiilanga. Inzoka yamukuba yiiminina kukankaminwa kwa Jesu Kristo kutegwa tugwasyigwe kukabe kutamani. (Johane 3:14, 15) Bana Israyeli bazunda Bami baba Amori ba Sihoni a Ogi akukona nyika zyabo.
Mibuzyo Yamu Magwalo Iingulwa:
12:1—Nkaambo nzi Miriamu a Aroni ncobakamutongooka Musa? Ikaambo kapati kakabapa kutongooka kalibonya kuti nkulombozya bweendelezi nkwaakajisi Miriamu. Eelyo mukaintu wa Musa Zipora naakamusangana alimwi munkanda, kulangilwa kuti Miriamu wakalibilika kuti tanaakacili kunoobonwa mbuli mwanakazi wakali kusololela munkambi.—Kulonga 18:1-5.
12:9-11—Ino nkaambo nzi ncokwakaciswa buyo Miriamu cinsenda? Kulangilwa kuti nguwakatalisya makani aakutongooka akuzula Aroni kuti amusangane. Aroni wakatondezya ciimo cibotu kwiinda mukwaamba cibi cakwe.
21:14, 15—Ino bbuku lyaambwa waawa cakali cinzi? Imagwalo aamba mabbuku manji-manji aakabelesyegwa abalembi ba Bbaibbele kuzubulula twaambo. (Joshua 10:12, 13; 1 Bami 11:41; 14:19, 29) “Bbuku lyankondo zya-Jehova” lyakali limwi lyamabbuku aayo. Lyakajisi makani aankondo zyakalwanwa abantu ba Jehova.
Ziiyo Kulindiswe:
11:27-29. Musa ncikozyanyo cibotu kapati cambotweelede kulimvwa eelyo bamwi nobapegwa mikuli mumulimo wa Jehova. Muciindi cakulijanina mpuwo cakunyonokela bamwi, Musa wakakkomana eelyo Elidadi a Medadi nobakatalika kusinsima.
12:2, 9, 10; 16:1-3, 12-14, 31-35, 41, 46-50. Jehova uyanda kuti bakombi bakwe kababulemeka bweendelezi mbwabikkide.
14:24. Inzila iiyandika yakukazya kuyungwa anyika kucita cibi nkuba ‘amuuya wiimpene,’ naa ciimo. Weelede kuba wooyo wiimpene awanyika.
15:37-41. Imoombe uulibedelede wazikobela zyabana Israyeli wakali wakubayeezya kuti bakali bantu baandaanizyidwe kukukomba Leza akukutobela milawo yakwe. Sena aswebo tatweelede kupona kweelana azyeelelo zya Leza alimwi akubonwa kuti tuliimpene anyika?
MUMAGEZI AA MOABU
Ibana Israyeli nobabungana mumagezi aacimpayuma caku Moabu, bana Moabu babayoowa kapati. Aboobo Mwami wa Moabu Balaki watuma Balamu kuti abasinganye bana Israyeli. Pele Jehova wasinikizya Balamu kuti abalongezye. Mpoonya banakazi bana Moabu abana Midyani babelesyegwa koongelezya baalumi bana Israyeli kucita bwaamu akukomba mituni. Akaambo kazeezyi, Jehova wanyonyoona basizibi ibali 24,000. Ilunyonyooko oolo lwamana eelyo Pinehasi naatondezya kuti takonzyi kulekela kukazyanya a Jehova kuti kuzumanane.
Ikubala kwabili kwatondezya kuti kunyina baalumi ibakabalwa mukubala kwakusaanguna ibacili baumi, ccita buyo Joshua a Kalebe. Joshua wapegwa mukuli wakuba sikulya zina wa Musa. Bana Israyeli batambula malailile kujatikizya zituuzyo ziindene-indene alimwi amalailile aajatikizya zikonke. Alimwi bana Israyeli bapilusya bubi kubana Midyani. Rubeni, Gadi alimwi acisela camukowa wa Manase bakkala kujwe kwa Mulonga wa Jordano. Bana Israyeli bapegwa malailile mbobeelede kucita bazabuka Mulonga wa Jordano akukona nyika. Imigaano yanyika yazyibisyigwa kabotu-kabotu. Icikono cakali kuyoocitwa kwiinda mucisolo. Ba Levi bapegwa minzi iili 48, iili 6 akati kayeeyi mminzi yamayubilo.
Mibuzyo Yamu Magwalo Iingulwa:
22:20-22—Ino nkaambo nzi Jehova ncaakamunyemena Balamu? Jehova wakaambilide musinsimi Balamu kuti tanaakeelede kusinganya bana Israyeli. (Myeelwe 22:12) Pele musinsimi wakaunka abaalumi ba Balaki kajisi makanze aakusinganya bana Israyeli. Balamu wakali kuyanda kukkomanisya mwami wa Moabu akutambula bulumbu kulinguwe. (2 Petro 2:15, 16; Juda 11) Neliba leelyo Balamu naakasinikizyigwa kubalongezya muciindi cakubasinganya bana Israyeli, wakayanda kukkomaninwa amwami kwiinda mukupa muzeezo wakuti banakazi bakomba Baala babelesyegwe koongelezya baalumi bana Israyeli. (Myeelwe 31:15, 16) Aboobo, cakapa kuti Leza amukalalile Balamu nkaambo kabulyatu bwamusinsimi ooyu butaambiki.
30:6-8—Sena mwaalumi Munakristo ulakonzya kumanizya zikonke zyamukaintu wakwe? Ikujatikizya zikonke, lino Jehova weendelezya bakombi bakwe cakaanzambwene. Mucikozyanyo, ikulyaaba kuli Jehova ncikonke cimugaminide aumwi. (Ba-Galatiya 6:5) Imulumi kunyina najisi nguzu zyakumanizya cikonke cili boobo. Pele imukaintu tayelede kucita cikonke cikazyanya acaamba Jwi lya Leza naa milimo njayelede kucitila mulumi wakwe.
Ziiyo Kulindiswe:
25:11. Elo taciliboteli kaka cikozyanyo cakusungwaalila bukombi bwa Jehova ncaakatusiila Pinehasi! Sena ikuyandisya kuti mbungano kiisalala lyoonse takweelede kutukulwaizya kwaambila baalu Banakristo kujatikizya kutalilemeka koonse nkotuzyi?
35:9-29. Imakani aakuti imuntu wakajaya mweenzinyina cakutamubikkilila wakeelede kupola akutijila kumunzi wamayubilo kwaciindi cili mbocibede atuyiisya kuti buumi bulisetekene akuti tweelede kubulemeka.
35:33. Inyika yasofwaazyigwa abulowa bwabantu batakwe mulandu bwatilwa ilakonzya kumanizyilwa mulandu abulowa bwabaabo babutila. Elo cileelela kaka kuti Jehova uyoobanyonyoona bantu babi inyika kiitana kusandulwa kuba paradaiso!—Tusimpi 2:21, 22; Daniele 2:44.
Ijwi lya Leza Lili Anguzu
Tweelede kumulemeka Jehova alimwi abaabo bapedwe mikuli akati kabantu bakwe. Ibbuku lya Myeelwe lilakakankaizya kapati kaambo aaka. Elo nciiyo ciyandika kapati cakubona kuti luumuno alukamantano zyazumanana mumbungano sunu!
Izintu zyakacitika iziluulwa mubbuku lya Myeelwe zitondezya mbocitakatazyi kubisya caboola kukutongooka, bwaamu alimwi akukomba mituni kuli baabo ibatabikkili maanu kuzintu zyakumuuya. Izikozyanyo zimwi alimwi aziiyo zili mubbuku eeli lyamu Bbaibbele zilakonzya kubelesyegwa kubandika zibeela zijatikizya ziyandika zyambungano lya Muswaangano wa Mulimo mumbungano zya Bakamboni ba Jehova. Mmasimpe, “ijwi lya-Leza lili abuumi, lili anguzu” mubuumi bwesu.—Ba-Hebrayo 4:12.
[Cifwanikiso icili apeeji 31]
Kwiinda mukkumbi lyamaleele lyakali atente lyakubunganina, Jehova wakeendelezya kubungana akumwaika kwankambi yabana Israyeli
[Zifwanikiso izili apeeji 32]
Tweelede kumuvmwida Jehova alimwi uyanda kuti katubalemeka bamwiiminina