Amulemeke Leza “Camulomo Omwe”
Amulemeke Leza “Camulomo Omwe”
“Camulomo omwe mulemeke Leza wisi Mwami wesu Jesu Kristo.”—Ba-roma 15:6.
1. Ino nciiyo nzi cijatikizya kumanizya kwiimpana kwambozilangwa zintu ncaakaambila basyominyina Paulo?
TEENSYI Banakristo boonse ibasala naa ibayanda zintu zikozyenye. Nokuba boobo, Banakristo boonse beelede kweendela antoomwe mumugwagwa uusololela kubuumi. Sena eeco cilakonzyeka? Inzya cilakonzyeka ikuti tiitwalekela kwiimpana kusyoonto ikuba mapenzi mapati. Eeci nceciiyo mwaapostolo Paulo ncaakayiisya basyominyina mumwaanda wamyaka wakusaanguna. Ino wakakapandulula buti kaambo aaka kayandika? Alimwi ino mbuti mbotunga twabelesya lulayo lwakwe lwakasololelwa amuuya sunu?
Mboluyandika Lukamantano lwa Bunakristo
2. Mbuti Paulo mbwaakakankaizya mboluyandika lukamantano?
2 Paulo wakalizyi kuti lukamantano lwa Bunakristo lulayandika, aboobo wakapa lulayo lubotu lwakugwasya Banakristo ikuzumanana kukkazikilana myoyo muluyando. (Ba-Efeso 4:1-3; Ba-Kolose 3:12-14) Nokuba boobo, naakamana kutalisya mbungano zinji alimwi akuswaya zimwi kwamyaka yiinda ku 20, wakazyiba kuti ikuba alukamantano lyoonse ncintu cikatazya zimwi ziindi. (1 Ba-Korinto 1:11-13; Ba-Galatiya 2:11-14) Aboobo wakakulwaizya basyominyina bakali kukkala mu Roma kuti: “Leza wabukakatilo abukombelezyo amupe . . . kuti camoyo omwe acamulomo omwe mulemeke Leza wisi Mwami wesu Jesu Kristo.” (Ba-Roma 15:5, 6) Sunu, aswebo tweelede kumulemeka Jehova Leza “camulomo omwe” katuli nkamu yabantu bakwe iikamantene. Ino tucita buti mumakani aaya?
3, 4. (a) Ino nkwiindana kuli buti mukukomezyegwa nkobakajisi Banakristo ibakali mu Roma? (b) Mbuti Banakristo mu Roma mbobakali kunga babelekela Jehova “camulomo omwe”?
3 Ibanakristo banji mu Roma bakali balongwe ba Paulo beni-beni. (Ba-Roma 16:3-16) Nokuba kuti mbobakakomezyegwa bwakaliindene, Paulo wakabazumina ibanyina boonse kabali ‘bayandwa ba Leza.’ Wakalemba kuti: “Ndalumba Leza wangu kuli-Jesu Kristo nkaambo kandinywe nyoonse, nkaambo kakuti lusyomo lwanu lulaambwa munyika yoonse.” Cakutadooneka, ba Roma bakali zikozyanyo zibotu munzila zinji. (Ba-Roma 1:7, 8; 15:14) Pele alimwi basimbungano bamwi bakali kuzilanga munzila yiimpene zintu zimwi. Mbwaanga Banakristo sunu bazwa mubukkale bwiindene-indene azilengwa, ikwiiya lulayo lwa Paulo lwakasololelwa amuuya kujatikizya mbokweendelezyegwa kwiimpana kwamizeezo inga kwatugwasya kwaambaula “camulomo omwe.”
4 Mu Roma kwakali basyomi ba Juda a Bamasi. (Ba-Roma 4:1; 11:13) Banakristo ba Juda bamwi kulibonya kuti tiibakazileka zilengwa zimwi nzyobakali kutobela mubweendelezi bwa Mulawo wa Musa, nokuba kuti bakeelede kuzyiba kuti izilengwa eezyo tiizyakali kuyandika kutegwa muntu afwutuke. Kulubazu lumwi, ibali mbobabede akati ka Banakristo ba Juda bakazumina kuti cipaizyo ca Kristo cakabaangulula kukusinkililwa nkobakajisi kabatanaba Banakristo. Akaambo kaceeci, bakacinca zilengwa zyabo zimwi. (Ba-Galatiya 4:8-11) Nokuba boobo, mbubwenya Paulo mbwaakaamba, boonse buyo bakali ‘bayandwa ba Leza.’ Boonse bakali kukonzya kutembaula Leza “camulomo omwe” ikuti nobakazumanana kulangana munzila yeelede. Sunu tulakonzya katwiindene mbotuzilanga zintu zimwi, aboobo tweelede kubikkila maanu kapati mbwaipandulula Paulo njiisyo eeyo iiyandika.—Ba-Roma 15:4.
“Amusamausyanye”
5, 6. Ino nkaambo nzi ncokwakali kwiindana kwamizeezo mumbungano yaku Roma?
5 Mulugwalo ndwaakalembela ba Roma, Paulo waamba kwiindana mumizeezo kwakaliko. Ulemba kuti: “Muntu umwi ulasyoma kuti ulakonzya kulya kufumbwa cintu. Pele umwi uutanasima mulusyomo ulya buyo cisyu amicelo.” Ino nkaambo nzi ncocakali boobo? Mubweendelezi bwa Mulawo wa Musa, kulya nyama yangulube kwakali kukasyigwa. (Baloma 14:2, Ci; Levitiko 11:7) Pele Mulawo ooyo tiiwakacili kubeleka naakafwa Jesu. (Ba-Efeso 2:15) Mpoonya nokwakainda myaka yotatwe acisela kuzwa ciindi naakafwa Jesu, imungelo wakaambila mwaapostolo Petro kuti kweelana ambwazilanga zintu Leza, kunyina cilyo ceelede kubonwa kuti cilisofweede. (Incito 11:7-12) Akaambo kazyeezyi, Banakristo ba Juda bamwi balakonzya kuti bakayeeya kuti inga balya nyama yangulube naa zyakulya zimbi izyakakasyidwe mubweendelezi bwa Mulawo.
6 Nokuba boobo, imuzeezo ulikke wakulya zyakali kukasyigwa musyule weelede kuti wakabacima Banakristo ba Juda bamwi. Ibantu bakali kulimvwa boobo balakonzya kuti bakafwumpulwa kubona Banakristonyina ba Juda kabalya zyakulya eezyo. Kunze lyaboobo, Banakristo bamwi Bamasi, ibakanyina milawo iibalesya kulya zimwi balakonzya kuti bakagambwa kuti inga kwaba muntu uukonzya kukazyanya kujatikizya zyakulya. Ee, kunyina nocakalubide kuli umwi kuliimya zilyo zimwi kufwumbwa kuti tanaakali kusumpula muzeezo wakuti kucita boobo kwakali kuyandika kutegwa muntu afwutuke. Nokuba boobo, ikwiindana kwamizeezo kwakali kukonzya kutalisya mazwanga mumbungano. Ibanakristo baku Roma bakali kuyandika kucenjela kuti ikwiimpana kuli boobo kutabalesyi kulemeka Leza “camulomo omwe.”
7. Ino nkwiindana nzi kwamizeezo kwakaliko kujatikizya kubamba buzuba bwaalubazu amvwiki?
7 Paulo wapa cikozyanyo cabili: “Muntu umwi ulayeeya kuti buzuba bumwi buli kabotu kukomba Leza kwiinda bumwi. Pele umwi ulayeeya kuti mazuba oonse aleelene buyo.” (Baloma 14:5a, Ci) Mubweendelezi bwa Mulawo wa Musa, kunyina mulimo wakeelede kucitwa mu Sabata. Nokuba kweenda kwakali kucitwa buyo nokwakali cintu capenzya ncobeni. (Kulonga 20:8-10; Matayo 24:20; Incito 1:12) Pele Mulawo nowakamanizyigwa, azyalo izyakali kukasyigwa zyakamana. Nokuba boobo, Banakristo bamwi ba Juda balakonzya bakalibilika kubeleka mulimo uuli woonse naa kweenda musinzo mulamfwu mubuzuba mbobakali kubona kuti bulasalala musyule. Neliba leelyo kabali Banakristo kale, balakonzya bakali kubikka buzuba bwaciloba ambali kutegwa bacite buyo zintu zyakumuuya nokuba kuti kuli Leza imulawo wakubamba Sabata tiiwakacili kubeleka. Sena bakalubizya kucita boobo? Peepe, kufwumbwa kuti tiibakakankaizya kuti Leza wakali kuyanda kuti mulawo wakubamba Sabata kuutobelwa. Aboobo kwiinda mukubikkila maanu kumanjezeezya aabanyina Banakristo, Paulo wakalemba kuti: “Muntu amuntu acite mbuli mbwayeeya mumoyo wakwe.”—Baloma 14:5b, Ci.
8. Nokuba kuti bakeelede kubikkila maanu kumanjezeezya aabamwi, ino ncinzi ncobatakeelede kucita Banakristo baku Roma?
8 Nokuba kuti wakali kukulwaizya ibanyina ikubakkazikila moyo aabo ibakajisi penzi mumakani aajatikizya manjezeezya, Paulo wakabaambila cakusinizya kuti bakalubizya aabo ibakali kusoleka kusinikizya basyominyina ikulibombya ku Mulawo wa Musa ikutegwa bafwutulwe. Mucikozyanyo, kuma 61 C.E., Paulo wakalemba bbuku lya Ba-Hebrayo, ilugwalo lwakajisi makani mapati ku Banakristo ba Juda ilupandulula kabotu-kabotu kuti ikulibombya ku Mulawo wa Musa tiikwakali kugwasya pe nkaambo Banakristo bakajisi bulangizi busumpukide ibuyeeme acipaizyo cacinunuzyo ca Jesu.—Ba-Galatiya 5:1-12; Tito 1:10, 11; Ba-Hebrayo 10:1-17.
9, 10. Ino ncinzi Banakristo ncobateelede kucita? Amupandulule.
9 Mbubwenya mbotwabona, Paulo wakulwaizya kuti ikwiindana kwazintu zisalwa takweelede kunyonganya lukamantano kufwumbwa kuti kakutajatikizyi kuunduluzya njiisyo zisalede zya Banakristo. Aboobo Paulo wabuzya Banakristo batasimide kuti: “Webo ubetekelanzi munyoko?” Alimwi wabuzya basimide (ambweni aabo bakajisi manjezeezya aakali kubazumizya kulya zyakulya zimwi zyakali kukasyigwa mubweendelezi bwa Mulawo naa ibakali kunga bacita milimo imwi yakumubili mu Sabata) kuti: “Webo usampaulilanzi munyoko?” (Ba-Roma 14:10) Kweelana a Paulo, Banakristo batasimide tabeelede kubona ibanyina bazilanga munzila iimbi zintu kuti balilubizyide. Alimwi Banakristo basimide abalo tabeelede kusampaula baabo batasimide mumbazu zimwi. Boonse beelede kwiilemeka mizeezo yabamwi iili kabotu alimwi ‘akutaliyeeya cakulisumpula kwiinda mbukweelede.’—Ba-Roma 12:3, 18.
10 Ikuzilanga munzila yeelede zintu Paulo wakakupandulula boobu: “Oyo uulya atasampauli mweenzinyina uutalyi, alakwe oyo uutalyi atabeteki uulya, nkaambo Leza ulimusamauzizye.” Alimwi kumbele waamba kuti: ‘Kristo awalo wakatusamausya kubulemu bwa Leza.’ Mbwaanga ibasimide abakompeme balatambulika kuli Leza a Kristo, aswebo tweelede kubazumina bantu baindene-indene alimwi ‘akusamausyanya.’ (Ba-Roma 14:3; 15:7) Ino nguni uunga waakaka makani aaya kaluzi?
Luyando Lwabukwesu Lupa Lukamantano Sunu
11. Ino mbukkale buli buti bulibedelede bwakaliko kuciindi ca Paulo?
11 Mulugwalo ndwaakalembela ba Roma, Paulo wakali kwaamba bukkale bulibedelede. Jehova wakazwide aakumanizya cizuminano cimwi akutalisya cipya. Bamwi cakabakatazya kucinca. Ibukkale bwini buli boobo tabuko sunu, pele imakani aakozyenye alakonzya kaacitika zimwi ziindi.
12, 13. Ino muubukkale buli buti Banakristo sunu mobanga batondezya kuti balaabikkila maanu manjezeezya aabanyina?
12 Mucikozyanyo, imwanakazi Munakristo ambweni wakali wacikombelo cimwi cikankaizya nsamino akulibamba kutajatikizyi tuntu-tuntu tweebesya. Naazumina kasimpe, inga camuyumina kucinca muzeezo wakuti tacikasyigwi kusama kabotu kweelana azicitika naa kubelesya twakulibotya-botya cakutaciindizya. Mbwaanga kunyina njiisyo ya Bbaibbele iijatikizyidwe, inga tiicayandika kuti umwi asole kuzula mwanakazi ooyo Munakristo ikucita ncaatamuzumizyi manjezeezya aakwe. Aciindi ncimunya, ulizyi kuti kunyina nanga watongooka mwanakazi Munakristo uujisi manjezeezya aamuzumizya kubelesya zintu eezyo.
13 Amulange-lange cikozyanyo acimbi. Imwaalumi Munakristo ulakonzya wakakomenena mubusena ibukoko mobwatakali kuzumizyigwa kunyugwa. Naajana luzibo lwakasimpe, waiya ncolyaamba Bbaibbele kuti bukoko ncipego kuzwa kuli Leza alimwi inga bwanyugwa cakutaciindizya. (Intembauzyo 104:15) Wakacizumina ncolyaamba. Nokuba boobo, akaambo kambwaakakomena, ulombozya kulilesya cakumaninina kubukoko boonse, pele kunyina nabatongooka aabo banywa cakutaciindizya. Aboobo ubelesya majwi aa Paulo aakuti: “Atutobele zintu zileta luumuno azintu zyakuyakana.”—Ba-Roma 14:19.
14. Ino muubukkale buli buti Banakristo mobanga babelesya bupanduluzi bwini bwalulayo lwa Paulo kuba Roma?
14 Ibukkale bumbi buyanda kubelesya bupanduluzi bwini bwalulayo lwa Paulo ndwaakalembela ba Roma. Imbungano ya Banakristo ijisi bantu banji alimwi baliindene muzintu nzyobakkomanina. Aboobo balakonzya kusala zintu ziindene-indene—mucikozyanyo muzyakusama akulibamba. Ee, Ibbaibbele lilijisi njiisyo zisalala nzyobeelede kutobela Banakristo basyomeka boonse. Kunyina akati kesu weelede kusama zyakusama naa kubamba masusu munzila iitali kabotu, iitapi bulemu naa iinga yatutondezya kuti tujisi tumpenda tumwi twanyika. (1 Johane 2:15-17) Banakristo balizyi kuti ciindi coonse neliba leelyo nobalyookezya, mbabelesi ibaiminina Mwami Wakujulu Aansi. (Isaya 43:10; Johane 17:16; 1 Timoteo 2:9, 10) Nokuba boobo, mumbazu zinji kuli zintu zinji zili kabotu nzyobanga basala Banakristo. *
Mutabafwumpuli Bamwi
15. Ndiilili Munakristo nanga waliimya kucita zintu nzyaangulukide kucita ikutegwa agwasye ibanyina?
15 Kuli njiisyo iiyandika yamamanino njatupa Paulo mululayo lwakwe ku Banakristo baku Roma. Zimwi ziindi, Munakristo uusimide ulakonzya kusala kutacita cimwi citalubide. Nkaambo nzi? Nkaambo kakuzyiba kuti, ikuti naa wacicita ulakonzya kubisizya bamwi. Notusala boobo, ino ncinzi ncotweelede kucita? Paulo waamba kuti: “Ncintu cibotu kuliimya kulya nyama, nikuba kunywa imbote, nikuba kucintu cimwi cili buti cikonzya kufumpuzya munyoko nikuba kumulebya nikuba kumukompamya.” (Ba-Roma 14:14, 20, 21) Aboobo, “swebo tubayumu tuleelede kuyumuna matenda aabaabo batali bayumu, tatweelede kulikondezya tubeni pe. Umwi aumwi akati kesu akondezye mweenzinyina kukumucitila cibotu cakuyakana.” (Ba-Roma 15:1, 2) Eelyo Munakristoma natalimvwi kabotu akaambo kamanjezeezya aakwe kujatikizya zintu nzyotucita, iluyando lwabunyina luyootukulwaizya kulanganya mbwalimvwa akutupa kuleka kucita zintu zibafwumpula bamwi. Icikozyanyo caceeci inga caba cakunywa zikola. Munakristo ulazumizyigwa kunywa bukoko cakutaciindizya. Pele ikuti kucita boobo kakufwumpula mweenzinyina, takazumanani kunywa akaambo kakuti ulaangulukide.
16. Ino mbuti mbotunga twatondezya kuti tulababikkila maanu aabo ibakkala mucilawo cesu?
16 Injiisyo eeyi alimwi ilakonzya kubelesyegwa muzintu nzyotucita izitajatikizyi mbungano ya Bunakristo. Mucikozyanyo, tulakonzya katukkala mubusena imuli cikombelo cidumide iciyiisya basicikombelo ikubona buzuba bumwi mumvwiki kuti mbwakulyookezya. Akaambo kaceeci, ikutegwa tutafwumpuli basimukoboma naa kusinkilila mulimo wesu wakukambauka, tatukaciti cintu cimwi mubuzuba oobo iciyoofwumpula basimukoboma. Mubukkale bumbi, Imunakristo muvwubi ulakonzya kulonga akuyoobelekela kubusena buyandika lugwasyo ikuli bantu bacete. Inga wayanda kubabikkila maanu basimukobonyina bapya kwiinda mukusama zisani zitaduli naa ikupona buumi buuba-uba nokuba kuti ulijisi mali aanga amupa kukkala kabotu.
17. Ino nkaambo nzi ncociyandika kubabikkila maanu bamwi muzintu nzyotusala kucita?
17 Sena ncintu ciyandika ikulangila baabo ‘basimide’ ikucinca boobo? Amulange-lange cikozyanyo eeci: Notweenzya mootokala mumugwagwa twabona bana beenda cakutabikkila maanu munsi-munsi amugwagwa. Sena tuyoozumanana kweenzya mootokala cakubalisya kweelana amakkilomita aazumizyidwe mubusena oobo akaambo kakuti tulazumizyigwa amulawo? Peepe, tweenzya asyoonto-syoonto kutegwa kutabi mwana uucitikilwa ntenda. Zimwi ziindi, ikulisungula kucinca kulayandika mukuyanzana kwesu abasyomima naa bambi. Tulakonzya katucita cimwi citatuumyi musako. Kunyina njiisyo zyamu Bbaibbele izyuunduluzyigwa. Nokuba boobo, ikuti naa inga twabisizya bamwi naa aabo batasimide, iluyando lwa Bunakristo lweelede kutukulwaizya kucita zintu cakucenjela. (Ba-Roma 14:13, 15) Ikubona kuti lukamantano lwazumanana alimwi akusumpula ziyandika zya Bwami nzintu ziyandika kapati kwiinda kuyuminina kucita nzyotweelede.
18, 19. (a) Ino mbuti mbotutobela cikozyanyo ca Jesu notubabikkila maanu bamwi? (b) Mmuumakani aali toonse motucita calukamantano, alimwi ino ncinzi citiibandikwe mucibalo citobela?
18 Tutobela cikozyanyo ciinda kubota notucita boobo. Paulo waamba kuti: “Kristo alakwe teewakalikondezya mwini, pele mbuli mbukulembedwe kuti, Insyolauko zyabaabo bakasyolauka nduwe zyakandiwida mebo.” Jesu wakalisungula kwaaba buumi bwakwe kulindiswe. Mmasimpe aswebo tweelede kulisungula kuliimya zintu zimwi nzyotukonzya ikuti kucita boobo kakugwasya “batali bayumu” ikulemeka Leza calukamantano andiswe. Mmasimpe, ikulisungula kuliimya zimwi alimwi akuba bantu babikkila maanu ku Banakristo batasimide naa kulisungula kutacita zintu zitatuumyi musako—kutondezya ‘mbwaakabede Jesu Kristo.’—Ba-Roma 15:1-5.
19 Nokuba kuti mbotuzilanga zintu izitajatikizyi njiisyo zyamu Magwalo inga kakwiindene-indene, caboola kumakani aabukombi, tucita zintu calukamantano. (1 Ba-Korinto 1:10) Ilukamantano luli boobo lulabonwa, mucikozyanyo kujatikizya mbotucita kuli baabo ibakazya bukombi bwakasimpe. Ijwi lya Leza lyaamba basikukazya aabo kuti mbeenzu akutucenjezya kuti tweelede kulicenjelelela “ijwi lyabeenzu.” (Johane 10:5) Ino mbuti mbotunga twabazyiba beenzu aabo? Ino tweelede kubeendelezya buti? Imibuzyo eeyi ilabandikwa mucibalo citobela.
Bupanduluzi buyungizidwe
^ munc. 14 Ibana basyoonto beendelezyegwa anzyobayanda bazyali babo mumakani aazyakusama.
Ino Inga Mwaingula Buti?
• Ino nkaambo nzi ikwiindana kwambwazilanga zintu aumwi ncokuteelede kunyonganya lukamantano?
• Ino nkaambo nzi to Banakristo ncotweelede kubikkilana maanu caluyando?
• Ino ninzila nzi zimwi motunga twabelesya lulayo lwa Paulo lwalukamantano sunu, alimwi ino ncinzi ciyootukulwaizya kucita boobo?
[Mibuzyo yaciiyo]
[Cifwanikiso icili apeeji 24]
Ilulayo lwa Paulo ilujatikizya lukamantano lwakali kuyandika mumbungano
[Cifwanikiso icili apeeji 25]
Banakristo balikamantene nokuba kuti bakakomezyegwa munzila ziindene-indene