Ibasulidwe Kakunyina Kaambo
Ibasulidwe Kakunyina Kaambo
“Bakandisula neentakwe kaambo.”—JOHANE 15:25.
1, 2. (a) Ino nkaambo nzi bamwi ncobanyongana Banakristo nobatukilwa, pele ino nkaambo nzi makani aali boobo ncaatatugambyi? (b) Ino mbupanduluzi nzi bwabbala lyakuti “kusula” mbotutiilange-lange mucibalo eeci? (Amubone bupanduluzi buyungizidwe.)
BAKAMBONI BA JEHOVA balasoleka kupona kweelana anjiisyo zili mu Jwi lya Leza. Nkakaambo kaako balijisi mpuwo mbotu muzisi zinji. Nokuba boobo, ziindi zimwi balasampaulwa. Mucikozyanyo, mubelesi umwi wamumfwulumende mudolopo lya St. Petersburg ku Russia wakaamba kuti: “Bakamboni ba Jehova bakali kwaambwa kuti nkakamu kabazangi kamaseseke ikajaya bana alimwi akulijaya.” Pele naakabeleka a Bakamboni ba Jehova kububambe bujatikizya muswaangano wacooko wamasi, mubelesi ngomunya ooyu wakaamba kuti: “Lino ndabaziba kabotu, mbantu baseka-seka . . . Mbaasiluumuno, balibombede alimwi balayandana kapati.” Wakayungizya kuti: “Tandikazi kaambo ikapa kuti bantu kabatwaambila makani aakubeja kujatikizya mbabo.”—1 Petro 3:16.
2 Babelesi ba Leza tabakukkomanini kubejelezyegwa kuti mbaasimucita zibi, pele tabagambwi ibantu nobabatamikizya. Jesu wakabacenjezya boobu batobeli bakwe: “Na inyika yamusula, mulizi kuti yali kundisulide kale. . . . Nkokuti lizyulile ijwi ililembedwe mumulao wabo lyakuti, Bakandisula neentakwe kaambo.” * (Johane 15:18-20, 25; Intembauzyo 35:19; 69:4) Kumatalikilo wakali baambilide basikwiiya bakwe kuti: “Kuti mwiniŋanda bamwaantikizya bati, Nduwe Belzebule, abalo basiŋanda bakwe bazooinda kubaantikizya mbubonya obo.” (Matayo 10:25) Banakristo balizi kuti kuliyumya mukusampaulwa kuli boobo ncibeela “[ca]cisamu cakupenzyezya” ncobakazumina nobakaba batobeli ba Kristo.—Matayo 16:24, NW.
3. Ino mbuti bakombi bakasimpe mbobapenzyegwa?
3 Ikupenzyegwa kwabakombi bakasimpe kwakatalika kaindi. Kwakatalikila kuli “Abele mululami.” (Matayo 23:34, 35) Tiikwageme buyo kucitika kuziindi zimwi. Jesu wakaamba kuti, batobeli bakwe bakali ‘kuzoosulwa kubantu boonse’ akaambo kazina lyakwe. (Matayo 10:22) Kunze lyaboobo, mwaapostolo Paulo wakalemba kuti babelesi ba Leza boonse kubikkilizya aumwi wesu baleelede kukulangila kupenzyegwa. (2 Timoteo 3:12) Ino nkaambo nzi kaletelezya zeezyi?
Ikuzwida Lusulo Lunyina Kaambo
4. Ino mbuti Ibbaibbele mbolyaamba ikuzwa lusulo lunyina kaambo?
4 Ijwi lya Leza lyaamba kuti kuzwa kumatalikilo kuli wakalutalisya buya lusulo uutabonwi. Amuyeeye buyo mbwaakajaigwa calunya mulombwana wakusaanguna uusyomeka utegwa Abele. Ibbaibbele lyaamba kuti Kaini wakajaya munyina “wakali wa-Mubi” Saatani Diabolosi. (1 Johane 3:12) Kaini wakayungwa a Saatani, aboobo Diabolosi wakamubelesya kuti azuzikizye makanze aakwe mabyaabi. Alimwi Ibbaibbele lilaamba kujatikizya makanze aa Saatani aalunya mukulwana Jobu alimwi a Jesu Kristo. (Jobu 1:12; 2:6, 7; Johane 8:37, 44; 13:27) Ibbuku lya Ciyubunuzyo lilasalazya kabotu-kabotu ikwaamba kuzwa kupenzyegwa kwabatobeli ba Jesu. Lyaamba kuti: “Diabolosi ulawaala bamwi banu muntolongo, kuti mukasunkwe.” (Ciyubunuzyo 2:10) Inzya, ikusulwa kakunyina kaambo kwabantu ba Leza kuzwa kuli Saatani.
5. Ino ncinzi cipa kuti Saatani kasula bakombi bakasimpe?
5 Ino ncinzi cipa kuti Saatani abasule bakombi bakasimpe? Mumakanze aakwe aatondezya kulisumpula kutaambiki, Saatani walwana “Mwami mupati uutamani” Jehova Leza. (1 Timoteo 1:17; 3:6) Waamba kuti Leza ulaciindilizya kukasya bantu zintu mubulelo bwakwe alimwi akuti kunyina uubelekela Jehova cakuliyandila buya, pele bantu balabeleka akaambo kakuyanda kujana zintu. Saatani waamba kuti ikuti naa wapegwa ciindi cakusunka bantu, ulakonzya kubalesya kubelekela Leza boonse. (Matalikilo 3:1-6; Jobu 1:6-12; 2:1-7) Nabejelezya Jehova kuti ngusikudyaaminina, mubeji alimwi asikwaalilwa, Saatani uyanda kulibikka lwakwe kuti abe mweendelezi uujisi nguzu mbuli zya Jehova zyakweendelezya kujulu aanyika. Aboobo, ikulombozya kukombwa nkokupa kuti kanyemena babelesi ba Leza.—Matayo 4:8, 9.
6. (a) Ino mbuti swebo kutugama mbotujatikizyidwe mukaambo kabweendelezi bwa Jehova? (b) Ino mbuti kukamvwisya kaambo aaka mbokukonzya kutugwasya kuzumanana kuba alusyomo? (Amubone kabbokesi apeeji 12.)
6 Sena mwabona kaambo aaka mbokabujatikizya buumi bwanu? Mbwaanga muli babelesi ba Jehova, mweelede kuti mwabona kuti nokuba kuti kucita kuyanda kwa Leza kuyandika kusolekesya, impindu iijanika mukucita boobo nimpati kapati. Pele ino mbuti ikuti naa bukkale bwanu bwayuma, nokuba kumuletela macise buya ikutegwa muzumanane kutobela milawo alimwi anjiisyo zya Jehova? Alimwi ino mbuti kuti kakuboneka kuti kunyina mpindu njomuli mukujana? Sena inga mwakosola kuti tacili cibotu kubelekela Jehova? Antela sena luyando ndomujisi kuli Jehova alimwi akulumba bube bwakwe bubotu kapati lulakonzya kumukulwaizya kuzumanana kweenda munzila zyakwe zyoonse? (Deuteronomo 10:12, 13) Kwiinda mukuzumizya Saatani kuti atuletele mapenzi aali mbwaabede, Jehova wapa coolwe kuli umwi aumwi wesu kuti tupe bwiinguzi kukulwana kwa Saatani.—Tusimpi 27:11.
“[Bantu] Nibazoomutukila”
7. Ino ninzila nzi Diabolosi njabelesya nasola kutugusya kuli Jehova?
7 Lino atulange-lange cakusitikila nzila imwi yabucenjezu Saatani njabelesya nasola kusinizya majwi aakwe aakutamikizya, nkokuti mbwabubelesya bubeji bwakwe. Jesu wakaamba Saatani kuti “ngowisi wababeja.” (Johane 8:44) Izina limupandulula lyakuti Diabolosi lyaamba “Sikubejelezya.” Lilamuzibya kuti ngosikubejelezya Leza mupati, ijwi lyakwe bbotu alimwi azina lyakwe lisalala. Diabolosi ubelesya mpyata akubejelezya nasola kulwana bweendelezi bwa Jehova alimwi ulazibelesya nzila eezi nabejelezya babelesi ba Leza basyomeka. Kwiinda mukusampaula Bakamboni, ulakonzya kucita kuti masunko aindilile kubakatazya kuliyumya.
8. Ino mbuti Saatani mbwaakasampaula Jobu, alimwi ino ncinzi cakacitika?
8 Amulange-lange zyakacitikila Jobu, uujisi zina lipandulula kuti “Uusulidwe.” Kunze lyakupa kuti zintu nzyaakajisi zyinyonyooke abana bakwe bafwe kubikkilizya akutapona kabotu, Saatani wakapa kuti Jobu aboneke kuti wakali sizinyonyoono walo iwakali kusubulwa a Leza. Nokuba kuti wakali kulemekwa kapati, Jobu wakatalika kusampaulwa. Bakamusampaula nobaba basazinyina buya alimwi abalongwe bakwe. (Jobu 19:13-19; 29:1, 2, 7-11) Kunze lyaboobo, kwiinda mukubelesya basikuumbulizya balicengeezya buyo, Saatani wakayanda kuti ‘amupwaye-pwaye Jobu amajwi.’ Kusaanguna wakamubejelezya kuti wakacita cibi cipati alimwi akumugama buya kumwaamba kuti ngusimucita zibi. (Jobu 4:6-9; 19:2; 22:5-10) Elo kaka eeci ceelede kuti cakamuusisya Jobu!
9. Ino mbuti Jesu mbwaakacitwa kuti aboneke mbuli sizinyonyoono?
9 Mbwaanga ngowakali kubusumpula kapati bweendelezi bwa Jehova, Mwanaa Leza wakaba ngomuntu wiinda kusulwa a Saatani. Jesu naakaboola anyika, Saatani wakayanda kunyonganya bukkale bwakwe bwakumuuya mbuli mbwaakacita kuli Jobu. Wakacita kuti Jesu alibonye mbuli kuti ngusizibi. (Isaya 53:2-4; Johane 9:24) Bantu bakamwaamba kuti ngucakolwa, ngusindya alimwi akuti ‘ujisi daimona.’ (Matayo 11:18, 19; Johane 7:20; 8:48; 10:20) Wakatamikizyigwa kuti wakamutukila Leza. (Matayo 9:2, 3; 26:63-66; Johane 10:33-36) Eeci cakamupenzya mumoyo Jesu nkaambo wakalizi kuti cakali kutondezya ciimo cibi kuli Bawisi. (Luka 22:41-44) Kumane boobo, Jesu wakakankaminwa kali mbuli mujayi mubyaabi kapati. (Matayo 27:38-44) Ikutegwa azumanane kusyomeka cakulondoka, Jesu wakaliyumya kapati ‘kukusulaikwa abantu basizinyonyoono.’—Bahibulu 12:2, 3, Ci.
10. Ino mbuti bananike baceede mbobaindilide kulwanwa a Saatani mazubaano?
10 Mazubaano, batobeli ba Kristo bananike basyeede abalo basulwa kapati a Diabolosi. Saatani upandululwa kuti “[ngu]sikubejelezya [banyina Kristo] . . . , nguwe [uubabejelezya] kuli-Leza wesu lyoonse isikati amasiku.” (Ciyubunuzyo 12:9, 10) Kuzwa ciindi naakalosyegwa kuzwa kujulu akujalilwa anyika, Saatani wasoleka canguzu kubabisya banyina Kristo ikutegwa baboneke mbuli bantu batali kabotu. (1 Ba-Korinto 4:13) Muzisi zimwi, babejelezyegwa kuti nkakamu kabazangi kayoosya, mbubwenya mbuli Banakristo bamumwaanda wamyaka wakusaanguna mbobakali kwiitwa. (Incito 24:5, 14; 28:22) Mbubwenya mbuli mbotwakabona kumatalikilo, bali kubejelezyegwa kwiinda mutwaambo tutaluzi. Pele, “nikuba kuciindi cakulemekwa nikuba kuciindi cakuubaansigwa, nikuba kuciindi campuwo imbi nikuba kuciindi campuwo imbotu,” banyina Kristo bananike kabagwasyilizyigwa abeenzinyina iba “mbelele zimwi,” cakulibombya basoleka ‘kubamba milazyo ya Leza akujata bumboni bwa Jesu Kristo.’—2 Ba-Korinto 6:8; Johane 10:16; Ciyubunuzyo 12:17.
11, 12. (a) Ino ncinzi cilangilwa kuti ncecipa kuti Banakristo kabasampaulwa? (b) Ino muunzila nzi Munakristo mbwakonzya kupenga kakunyina akaambo kulusyomo lwakwe?
11 Pele, takuli kuti masampu woonse aasikila babelesi ba Leza alaboola akaambo “kabululami” pe. (Matayo 5:10) Imapenzi amwi alaboola akaambo kakutalondoka kwesu. Kunyina bulumbu pe ciindi ‘nomuumwa akaambo kakubisya nokuba kuti mwaliyumya.’ Pele “kulalumbika” ikuti Munakristo ‘waliyumya mumapenzi akuyeeya Leza, nokuba kuti wapenzegwa aatamweelede’ kumeso aa Jehova. (1 Petro 2:19, 20) Ino muubukkale buli buti eeci mocikonzya kucitika?
12 Ibamwi bapenzyegwa kapati akaambo kakuti baakaka kutola lubazu muzilengwa zijatikizya dilwe izitali zyamumagwalo. (Deuteronomo 14:1) Bakamboni bakubusi balafwubaazyigwa lyoonse akaambo kakutobela zyeelelo zyakulilemeka izya Jehova. (1 Petro 4:4) Ibazyali Banakristo bamwi balatamikizyigwa kuti “mbantu batabikkili maano” naa “basikupenzya” akaambo kakuti tabazumini busilisi bubikkilizya kubikka bulowa bana babo. (Incito 15:29) Banakristo basulwa abasazinyina alimwi abasimukobonyina akaambo buyo kakuba babelesi ba Jehova. (Matayo 10:34-37) Boonse aaba batobela cikozyanyo cakasiya basinsimi alimwi a Jesu kumugama icakupenzyegwa kakunyina akaambo.—Matayo 5:11, 12; Jakobo 5:10; 1 Petro 2:21.
Ikuliyumya Muciindi Cakusampaulwa
13. Ino ncinzi cikonzya kutugwasya kutegwa tutazungaani kumuuya notusampaulwa?
13 Ikuti twasampaulwa kapati akaambo kalusyomo lwesu, tulakonzya kutyompwa mbuli bwakacita musinsimi Jeremiya, eelyo tulakonzya kucileka kubelekela Leza. (Jeremiya 20:7-9) Ino ncinzi cikonzya kutugwasya kutazungaana kumuuya? Amubone zintu mbwazibona Jehova. Aabo ibazumanana kusyomeka mumasunko ubabona kuti mbabasikuzunda ikutali basikuzundwa pe. (Ba-Roma 8:37) Amusole kuyeeya baabo ibakasumpula bweendelezi bwa Jehova nokuba kuti bakali mubukkale bubyaabi kapati Diabolosi mbwaakabaletela, nkokuti balombwana abamakaintu mbuli Abele, Jobu, Mariya banyina Jesu alimwi abamwi bantu bansiku basyomeka kubikkilizya ababelesima bamazubaano. (Ba-Hebrayo 11:35-37; 12:1) Amuzinzibale kuyeeya mbobakasyomeka. Inkamu eeyi impati yabasyomeka ilatwiita kuti twiisangane acibumbili ciimina basikuzunda nobapegwa bulumbu icabaabo bazunda nyika kwiinda mulusyomo lwabo.—1 Johane 5:4.
14. Ino mbuti mupailo uupailwa camoyo woonse mbuukonzya kutuyumya ikutegwa tuzumanane kusyomeka?
14 Ikuti ‘miyeeyo minji iikatazya naa yaata mumoyo wesu,’ tulakonzya kumusikila Jehova mumupailo, eelyo uyootuumbulizya akutuyumya. (Intembauzyo 50:15; 94:19) Uyootupa busongo mbotuyandika ikutegwa tukonzye kuzunda masukusyo akutugwasya kubikkila maano kapati kukaambo kabweendelezi bwa Jehova kalo ikapa kuti babelesi bakwe kabasulwa. (Jakobo 1:5) Jehova ulakonzya kutupa “luumuno lwa-Leza lwiinda miyeeyo yoonse.” (Ba-Filipi 4:6, 7) Iluumuno oolu lupegwa a Leza lutupa kuti tusitikile akuba basicamba notupenzyegwa kapati kutegwa tutadooneki naa kuyoowa. Kwiinda mukubelesya muuya wakwe, Jehova ulakonzya kutugwasya mulizyeezyo nzyazumizya kuti zitucitikile.—1 Ba-Korinto 10:13.
15. Ino ncinzi cikonzya kutugwasya kuleka kunyema notupenzyegwa?
15 Ino ncinzi cikonzya kupa kuti tutabanyemeni aabo ibatusula kakunyina kaambo? Amuyeeye kuti basinkondoma bapati ngu Saatani alimwi amadaimona. (Ba-Efeso 6:12) Nokuba kuti bantu bamwi balatupenzya acaali, ibunji bwabaabo ibakazya bantu ba Leza balacita oobo cakutaziba naa kwiinda mukuyungwa abantu bambi. (Daniele 6:4-16; 1 Timoteo 1:12, 13) Jehova uyanda kuti “bantu boonse” bajane coolwe ‘cakufwutuka akuba aluzibo lwalusinizyo.’ (1 Timoteo 2:4) Masimpe, ibamwi ibakali kutukazya kaindi sunu mbakwesu Banakristo akaambo kakuti bakali kulangilila mbotulilemeka kabotu. (1 Petro 2:12) Kunze lyaboobo, tulakonzya kwiiya ciiyo kuzwa kuli Josefa mwana wa Jakobo. Nokuba kuti Josefa wakapenga kapati akaambo kabanyina bamumada aambi, kunyina naakaba acikoto kumoyo kuli mbabo. Nkaambo nzi? Nkaambo wakaziba kuti Jehova wakalijatikizyidwe mumakani aayo, ikucita bubambe ikutegwa azuzikizye makanze aakwe. (Matalikilo 45:4-8) Jehova ulakonzya kuzumizya kufwumbwa kupenzyegwa ikukonzya kutusikila ikutegwa zina lyakwe lilemekwe.—1 Petro 4:16.
16, 17. Ino nkaambo nzi ncotuteelede kunyongana kapati akaambo kakuti basikukazya balasoleka kulesya mulimo wakukambauka?
16 Tatweelede kupenga kapati ikuti naa kwaciindi cili mbocibede basikukazya baboneka mbuli kuti bazwidilila kulesya makani mabotu. Jehova lino uli mukuzungaanya zisi kwiinda mubukambausi bwanyika yoonse buli mukucitwa alimwi izintu ziyandisi zili mukuboola. (Hagai 2:7) Kristo Jesu Mweembezi Mubotu wakaamba kuti: “Imbelele zyangu zilamvwa ijwi lyangu, ndilizizi, zilandicilila. Ndazipa buumi ubutamani, . . . Takukwe uuyoozikwempa mujanza lyangu.” (Johane 10:27-29) Ibangelo basalala abalo balijatikizyidwe mukutebula kupati kwakumuuya. (Matayo 13:39, 41; Ciyubunuzyo 14:6, 7) Aboobo, kunyina makani aamba basikukazya naa ncobakonzya kucita icikonzya kusinkilila makanze aa Leza pe.—Isaya 54:17; Incito 5:38, 39.
17 Ziindi zinji nzyobacita basikukazya zilabajokela lwabo. Mumunzi umwi wamu Afulika, Bakamboni ba Jehova bakatamikizyigwa zintu zibyaabi alimwi akubaamba kuti bakomba Diabolosi. Akaambo kaceeci, lyoonse Bakamboni bamuswaya, Grace wakali kuyuba kunze aaŋanda yakwe mane baunka. Buzuba bumwi, mufwundisi wakucikombelo cakwe wakanyamuna bbuku lyesu limwi mujulu akwaambila baabo bakajanika kuti tabeelede kulibala akaambo kakuti lilakonzya kubapa kuleka nzyobasyoma. Eeci cakapa kuti Grace abe aluyandisisyo kapati. Ciindi cimbi Bakamboni nobakasika, muciindi cakuyuba, wakabandika ambabo alimwi wakazumina kupegwa ibbuku. Iciiyo ca Bbaibbele cakatalisyigwa, eelyo mu 1996 wakabbapatizyigwa. Lino Grace uli mukubelesya ciindi cakwe ikuyandaula bamwi ibalangilwa kuti bakaambilwa zyakubeja kujatikizya Bakamboni ba Jehova.
Amuluyumye Lusyomo Lwanu Lino
18. Ino nkaambo nzi ncokuyandika kuyumya lusyomo lwesu masunko aakatazya kaatanasika, alimwi ino mbuti mbotukonzya kucita boobo?
18 Mbwaanga Saatani ulakonzya kutulwana kufwumbwa ciindi, cilayandika kapati kuyumya lusyomo lwesu lino. Ino mbuti mbotunga twacita oobo? Imakani aakazwa kucisi kwalo bantu ba Jehova nkobakali kupenzyegwa akati: “Cintu comwe calibonya antangalala: Aabo ibabikkila maano kuzintu zyakumuuya akutondezya kulumba kukasimpe kamu Bbaibbele tabajisi penzi mukuliyumya nobasikilwa musunko. Pele aabo ibatajaniki kumiswaangano ‘muziindi zibotu,’ ibataunki lyoonse mumulimo wamumuunda alimwi ibatongooka mutuntu tusyoonto buyo balazundwa musunko ‘mupati’ noubasikila.” (2 Timoteo 4:2) Ikuti naa kuli mbazu momuyandika kubambulula, amusoleke kucita oobo cakufwambaana.—Intembauzyo 119:60.
19. Ino kusyomeka kwababelesi ba Leza ciindi nobapenzyegwa kakunyina kaambo kuzuzikizya nzi?
19 Ikusyomeka kwabakombi bakasimpe nobapenzyegwa alusulo lwa Saatani mbumboni bulibonya ameso bwabululami, kweelela alimwi akululama kwabweendelezi bwa Jehova. Ikusyomeka kwabo kulamukkomanisya Leza. Nokuba kuti bantu balakonzya kubasampaula, ooyo uujisi bulemu bwiinda nyika ajulu “taakwe [nausa] insoni yakwaambwa kuti ngo-Leza wabo.” Masimpe, kujatikizya bantu aaba boonse basyomeka, cililuzi kwaamba kuti “Inyika teeyakabeelede.”—Ba-Hebrayo 11:16, 38.
Bupanduluzi buyungizidwe
^ munc. 2 Mumagwalo, ibbala lyakuti “kusula” lilijisi bupanduluzi bunji. Muzibalo zimwi, lyaamba kuyanda asyoonto buyo. (Deuteronomo 21:15, 16) “Kusula” alimwi kulakonzya kutondezya kutaciyanda naaceya cintu eeco pele kakunyina muzeezo wakucinyonyoona pe, pele kucitantamuka buyo akaambo kakusesemwa ancico. Nokuba boobo, ibbala lyakuti “kusula” alimwi lilakonzya kupandulula businkondo, kuzumanana kucimwa, ziindi zinji kusangene amizeezo yakuyanda kucinyonyoona. Oobu mbobupanduluzi bwabbala ibulangwa-langwa mucibalo eeci.
Sena Inga Mwapandulula?
• Ino ncinzi ciletelezya kusulwa kakunyina kaambo kwabakombi bakasimpe?
• Ino mbuti Saatani mbwaakabelesya kusampaula ikutegwa anyonganye lusyomo lwa Jobu alimwi a Jesu?
• Ino mbuti Jehova mbwatuyumya ikutegwa twiime cakutazungaana natulwana Saatani?
[Mibuzyo yaciiyo]
Kabbokesi/[Cifwanikiso icili apeeji 12]
Bakakaziba Kaambo Keni
Umwi wa Bakamboni ba Jehova ku Ukraine ooko mulimo wakukambauka Bwami nkowakali kasyidwe kwamyaka iinda ku 50 wakaamba kuti: “Ibukkale mobakabede Bakamboni ba Jehova tabweelede kulangwa buyo mbuli bantu bamwi mbobatubona. . . . Ibunji bwababelesi bakali kucita buyo mulimo wabo. Noyakacinca mfwulumende, babelesi bakacinca nzyobakali kusyoma, pele swebo kunyina notwakacinca pe. Twakazyiba kuti ikwini kwakali kuzwa mapenzi eesu kwakali kwaambwa mu Bbaibbele.”
“Tiitwakali kulibona kuti twakali buyo bantu batakwe mulandu bapenzyegwa abalombwana basikudyaaminina. Icakatugwasya kuliyumya kwakali kukamvwisya kapati kaambo kakabuka mumuunda wa Edeni, ikakuti Leza nguweelede kulela. . . . Twakaba kulubazu lwakaambo aako kakajatikizyidwe ikutali buyo akaambo kakuliyandila kwabantu, pele alimwi akaambo kabweendelezi bwakoonse-koonse. Twakakamvwisya kapati ikaambo keni kakajatikizyidwe. Eeci cakapa kuti tuyume mulusyomo nomuba mubukkale bukatazya kapati.”
Cifwanikiso
Victor Poppvych, wakaangwa mu 1970
[Cifwanikiso icili apeeji 9]
Ino nguni wakali kupa kuti Jesu asampaulwe?
[Zifwanikiso izili apeeji 11]
Jobu, Mariya alimwi ababelesi ba Leza bamazubaano, mbuli Stanley Jones babusumpula bweendelezi bwa Jehova