Jehova, ‘Mmaccijilo Eesu Muziindi Zyamapenzi’

“Lufutuko lwabaluleme lulazwa kuli-Jehova; ngonguwe macijilo aabo kuciindi camapenzi.”—INTEMBAUZYO 37:39.

1, 2. (a) Ino ncinzi Jesu ncaakapailila basikwiiya bakwe? (b) Ino ncinzi Leza ncayanda kujatikizya bantu bakwe?

JEHOVA ngusinguzu zyoonse. Ulijisi nguzu zyakukwabilila bakombi bakwe basyomeka munzila yoonse njayanda. Ulakonzya kubaandaanya bantu bakwe cacigaminina kuzwa kunyika akubabika mubusena bukwabilidwe alimwi imuli luumuno. Pele kujatikizya basikwiiya bakwe, Jesu wakapaila boobu kuli Bawisi bakujulu: “Nsikumbili kuti ubagwisye munyika, pele kuti ubavune kulooyo mubi.”—Johane 17:15.

² Jehova wasala kuti atatugusyi “munyika.” Pele uyanda kuti tukkale akati kabantu bali munyika ikutegwa twaambilizye mulumbe uupa bulangizi alimwi uumbulizya kubantu. (Ba-Roma 10:13-15) Pesi kweelana ancowakali kupandulula mupailo wa Jesu, ikukkala munyika eeyi tuli atuba ‘kumubi.’ Ibantu bataswiilili alimwi amyuuya mibi zileta mapenzi, alimwi abalo Banakristo tabacingilidwe pe kumapenzi.—1 Petro 5:9.

3. Ino ncinzi ncobasikilwa nobaba bakombi ba Jehova basyomeka, pele ino nduumbulizyo nzi ndotujana mu Jwi lya Leza?

³ Notuli mumasukusyo aali boobo, kutyompwa kulalangilwa ziindi zimwi. (Tusimpi 24:10) Ibbaibbele lilijisi zibalo zinji kapati zyaamba bantu basyomeka ibakali kusikilwa mapenzi. Sintembauzyo wakaamba kuti: “Mapenzi aamululami manji loko, pele  Jehova ulamuvuna kuli oonse buyo.” (Intembauzyo 34:19) Inzya, zintu zibi zilabacitikila nobaba bantu ‘balulami.’ Mbubwenya mbuli sintembauzyo Davida, ziindi zimwi mane tulakonzya ‘kufwa cinwe akutyolauka.’ (Intembauzyo 38:8) Pele cilakatalusya ikuziba kuti “Jehova uli afwaafwi kubawizukide mumoyo, ulafutula batete myuuya.”—Intembauzyo 34:18; 94:19.

4, 5. (a) Kweelana abbuku lya Tusimpi 18:10, ino ncinzi ncotweelede kucita ikutegwa tukwabililwe a Leza? (b) Ino ninzila nzi zigaminide nzyotweelede kutobela ikutegwa tugwasyigwe a Leza?

⁴ Kweelana amupailo wa Jesu, Jehova masimpe uli mukutweembela. ‘Ngamaccijilo eesu muziindi zyamapenzi.’ (Intembauzyo 37:39) Ibbuku lya Tusimpi libelesya majwi aakozyene nolyaamba kuti: “Izina lya Jehova ningazi injumu; mululami ulacijila kulinjiyo, aboobo ulafutuka.” (Tusimpi 18:10) Ilugwalo oolu luyubununa kasimpe kayandika kapati kajatikizya mbuli Jehova mbwazibikkila maano zilenge zyakwe. Leza ulabakwabilila kapati ibaluleme bamuyandaula, mbuli kuti tulundukila kungazi njumu kuti tukayubile nkuko.

⁵ Notusikilwa mapenzi aakatazya, ino mbuti mbotukonzya kulundukila kuli Jehova kuti tukwabililwe? Atulange-lange nzila zyotatwe nzyotukonzya kutobela ikutegwa tugwasyigwe a Jehova. Yakusaanguna tweelede kumusikila Taateesu wakujulu mumupailo. Yabili tweelede kucita zintu kweelana amuuya wakwe uusalala. Eelyo yatatu, tweelede kulibombya kububambe bwa Jehova kwiinda mukuyanzana a Banakristoma ibakonzya kucesya mapenzi eesu.

Inguzu Zyamupailo

6. Ino mbuti Banakristo mbobaubona mupailo?

⁶ Bahaazibwene mumakani aabuponi bwabantu baamba kuti mupailo ulakonzya kulesya kutyompwa naa bukata. Nokuba kuti kuumuna kwakaindi kasyoonto kamucita mbuli kuti mupaila buya kulakonzya kucesya bukata, akwalo kusabila kwazilengwaleza zimwi naa kukandwa kusyule. Banakristo bakasimpe mupailo tabawuubyi-ubyi kwiinda mukuubona mbuli kuti ninzila buyo yakulikatalusya mumizeezo pe. Mupailo tuubona kuba nzila yabulemu kapati yakukanana a Mulengi. Mupailo ulabikkilizya akulyaaba kwesu alusyomo muli Leza. Masimpe, imupailo ncibeela cabukombi bwesu.

7. Ino cipandulula nzi ikupaila katusyomede, alimwi mbuti mipailo iili boobo mboigwasya kutegwa tuliyumye mumapenzi?

⁷ Notupaila tweelede kulimvwa kuti tulijisi lusyomo muli Jehova. Mwaapostolo Johane wakalemba kuti: “Lino kaanzambwene nkitujisi kubusyu bwakwe nkaaka kakuti, na twakumbila kufumbwa cintu cili buti cili mbuli makanze aakwe, ulatumvwa.” (1 Johane 5:14) Jehova, Imupati Kwiinda, iwakasimpe alikke alimwi Leza singuzuzyoonse ulabikkila maano kapati kumipailo yamoyo woonse yabakombi bakwe. Ikuziba buyo kuti Leza wesu siluyando ulatumvwa notumwaambila nzyotulibilika amapenzi eesu cilaumbulizya.—Ba-Filipi 4:6.

8. Ino nkaambo nzi Banakristo basyomeka ncobateelede kufwa nsoni naa kulimvwa kuti tabeeleli ciindi nobasikila Jehova mumupailo?

⁸ Banakristo basyomeka tabeelede kuba ansoni naa kulimvwa kuteelela antela kubula lusyomo nobasikila Jehova mumupailo. Masimpe, ikuti naa twatyompwa akaambo kacintu ncotwacita naa mapenzi atuvwulila, ikusikila Jehova mumupailo cilakatazya. Muziindi zili boobo tweelede kuyeeya kuti Jehova “bapengede bakwe [ulabafwida] luzyalo” alimwi “[ulaumbulizya] abo bakatede mumyoyo.” (Isaya 49:13; 2 Ba-Korinto 7:6) Ikapati ciindi notuli mukupenga nceciindi notweelede kusikila Taateesu wakujulu kali maccijilo eesu.

9. Ino lusyomo lujisi mulimo nzi notusikila Leza mumupailo?

⁹ Ikutegwa tugwasyigwe ncobeni acoolwe cakupaila, tweelede kuba alusyomo lwini-lwini. Ibbaibbele lyaamba kuti “muntu uuswena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula.” (Ba-Hebrayo 11:6) Ilusyomo takuli buyo kusyoma kuti “Leza mpali.” Ilusyomo lwini-lwini lulabikkilizya akusyoma kapati muzintu nzyakonzya kucita Leza alimwi akuti ulikanzide kutupa bulumbu akaambo kakumuswiilila. “Meso aa-Jehova ali kubaluleme, amatwi aakwe alijukide kukukomba kwabo.” (1 Petro 3:12) Ikuziba  lyoonse kuti Jehova ulatubikkila maano kapati cipa kuti mipailo yesu kiijisi bupanduluzi.

10. Ino mipailo yesu yeelede kupailwa buti ikutegwa tutambule lugwasyo lwakumuuya kuzwa kuli Jehova?

¹⁰ Jehova ulaiswiilila mipailo yesu noipailwa amoyo woonse. Sintembauzyo wakalemba kuti: “Ndakwiila amoyo wangu woonse; undivwiile, O Jehova.” (Intembauzyo 119:145) Kwiindana amipailo yakwiinduluka buya iicitwa muzikombelo zinji, mipailo yesu taili yakwiinzya buyo mulawo iipailwa amyoyo yobilo pe. Notupaila kuli Jehova ‘camoyo woonse,’ imajwi eesu alijisi twaambo alimwi amulimo. Twamana kupaila camoyo woonse, tulatalika kukatalukwa kwalo ikuboola akaambo kakubikka “[makatazyo eesu] mumaanza aa-Jehova.” Kweelana a Bbaibbele mbolisyomezya, ‘uyootutabilila.’—Intembauzyo 55:22; 1 Petro 5:6, 7.

Muuya wa Leza Ngomugwasyi Wesu

11. Ino ninzila nzi yomwe Jehova mbwatwiingula ‘notuzumanana kukumbila’ lugwasyo kulinguwe?

¹¹ Jehova tali buyo Sikuswiilila mipailo, pele alimwi Ngomwiinguzi. (Intembauzyo 65:2) Davida wakalemba kuti: “Mubuzuba bwakupenga kwangu ndakukwiilila, nkaambo ulandivuwa.” (Intembauzyo 86:7) Nkakaambo kaako, Jesu wakakulwaizya basikwiiya bakwe kuti’ [kamuzumanana] kukumbila’ lugwasyo lwa Jehova nkaambo “Usowanu uuli kujulu” uyoobapa “Muuya Uusalala abakumbila kulinguwe.” (Luka 11:9-13) Inzya, nguzu zya Leza zibeleka ngomugwasyi naa sikuumbulizya bantu bakwe.—Johane 14:16.

12. Ino mbuti muuya wa Leza mboukonzya kutugwasya imapenzi naaboneka kuti ayanda kutuzunda?

¹² Nociba ciindi notwasikilwa masukusyo, muuya wa Leza uyootupa “nguzu zigambya.” (2 Ba-Korinto 4:7) Mwaapostolo Paulo walo iwakaliyumya mubukkale bukatazya, calusyomo wakati: “Zintu zyoonse buyo ndazikonzya nkaambo kanguzu nzimpedwe kuli-Kristo.” (Ba-Filipi 4:13) Mbubwenya buyo, Banakristo banji mazubaano balakatalusyigwa munzila yakumuuya akujana nguzu alimwi amipailo yabo iilaingulwa. Ziindi zinji, imapenzi aakatazya taaboneki kuyuma ikuti naa twagwasyigwa amuuya wa Leza. Akaambo kanguzu zizwa kuli Leza, tulakonzya kwaamba mbuli mwaapostolo kuti: “Lyoonse buyo tulilemedwe, nekubaboobo tatuna kumanikililwa. Tulizingidwe nekubaboobo tatuna kuzingisigwa. Tulipenzedwe, nekubaboobo tatusiilidwe. Tuliwisizidwe ansi, nekubaboobo tatuna kulobelela.”—2 Ba-Korinto 4:8, 9.

13, 14. (a) Ino mbuti Jehova mbwali maccijilo eesu kwiinda mu Jwi lyakwe lilembedwe? (b) Ino mbuti kubelesya njiisyo zyamu Bbaibbele mbokwamugwasya nywebo kumugama?

¹³ Muuya uusalala alimwi ngowakasololela akuyobola Jwi lya Leza lilembedwe ikutegwa tugwasyigwe. Ino mbuti Jehova mbwaasinizya kuba maccijilo eesu muziindi zyamapenzi kwiinda mu Jwi lyakwe? Inzila imwi nkwiinda mukutupa busongo bugwasya alimwi amaano.  (Tusimpi 3:21-24) Ibbaibbele lilayiisya mizeezo yesu alimwi lilatugwasya ikuyeeya kabotu. (Ba-Roma 12:1) Kwiinda mukubala akuliyiisya Jwi lya Leza kubikkilizya akulibelesya, tulakonzya kuba “amiyeeyo iyakaiisigwa kusala cibotu ecibi.” (Ba-Hebrayo 5:14) Nywebo kumugama mulakonzya kubona mbuli njiisyo zyamu Bbaibbele mbozyamugwasya kusala camaano nomuli mumapenzi. Ibbaibbele lilatupa maano aakonzya kutugwasya kujana nzila zigwasya zyakumana mapenzi aakatazya.—Tusimpi 1:4.

¹⁴ Ijwi lya Leza lilatupa cintu acimbi nkotukonzya kujana nguzu—ibulangizi bwalufwutuko. (Ba-Roma 15:4) Ibbaibbele litwaambila kuti zintu zibi tazikazumanani kucitika kukabe kutamani pe. Kufwumbwa mapenzi aatusikila ngakaindi buyo kaniini. (2 Ba-Korinto 4:16-18) Tulijisi “lulangilo lwabuumi butamani mbwaakasyomezya kale-kale Leza uutabeji.” (Taitasi 1:2, Ci) Ikuti naa tulabukkomanina bulangizi akuyeeya lyoonse zyakumbele kukondelezya nkwaasyomezya Jehova, tulakonzya kuliyumya mumapenzi.—Ba-Roma 12:12; 1 Ba-Tesalonika 1:3.

Imbungano—Icitondezyo Caluyando lwa Leza

15. Ino mbuti Banakristo mbobanga bagwasyanya?

¹⁵ Ibubambe abumbi mbotujisi buzwa kuli Jehova ibukonzya kutugwasya muciindi camapenzi nkuyanzana kuliko mumbungano ya Banakristo. Ibbaibbele lyaamba kuti: “Muzwalani ulayandisya kuziindi zyoonse, alimwi munyina wazyalilwa mapenzi.” (Tusimpi 17:17) Ijwi lya Leza likulwaizya boonse ibali mumbungano kuti kabalemekana akuyandana. (Ba-Roma 12:10) Mwaapostolo Paulo wakalemba kuti: “Muntu teelede kuyandaula kuligwasya mwini buyo. Umwi aumwi uleelede kuyandaula kugwasya mweenzinyina.” (1 Ba-Korinto 10:24) Ikuba amizeezo iili boobo kulakonzya kutugwasya kubikkila maano kuzintu ibamwi nzyobayanda muciindi cakubikkila maano kumasukusyo eesu. Ciindi notulyaaba kugwasya bamwi, tatubagwasyi buyo pe, pele alimwi tulajana lukkomano alimwi akukkalwa moyo calo cipa kuti zituminya zyuubaube.—Incito 20:35.

16. Ino mbuti Munakristo umwi aumwi mbwakonzya kukulwaizya?

¹⁶ Balombwana alimwi abamakaintu basimide kumuuya balakonzya kugwasya kapati mukuyumya bamwi. Ikutegwa bacite oobo, balacita kuti kabasikilika alimwi akujanika. (2 Ba-Korinto 6:11-13) Imbungano ilagwasyigwa kapati ikuti boonse kabajana ciindi cakulumbaizya bakubusi, kugwasya basyomi bapya alimwi akukulwaizya baabo batyompedwe. (Ba-Roma 15:7) Iluyando lwabunyina alimwi luyoogwasya kuleka muuya wakutasyomana. Tatweelede kubinda kwaamba kuti mapenzi aasikila umwi ncitondezyo cakukompama kumuuya. Cakweelela Paulo wakakulwaizya Banakristo kuti “mubaumbulizye batyompedwe mumyoyo.” (1 Ba-Tesalonika  5:14) Ibbaibbele litondezya kuti nobaba Banakristo basyomeka balasikilwa mapenzi.—Incito 14:15.

17. Ino ncoolwe nzi ncotujisi cakuyumya bunyina bwesu bwa Bunakristo?

¹⁷ Miswaangano ya Bunakristo ilapa coolwe cibotu cakuti tuumbulizyanye alimwi akukulwaizyanya. (Ba-Hebrayo 10:24, 25) Ikuyanzana ooku kucitwa caluyando takucitilwi buyo kumiswaangano yambungano kulikke pe. Muciindi caboobo, bantu ba Leza alimwi balajana ciindi cakuyanzana kabotu muziindi zimbi. Ikuti naa kwasika bukkale bukatazya, tunoolilibambilide kugwasyanya nkaambo tujisi kale cilongwe ciyumu. Mwaapostolo Paulo wakalemba kuti: “Kutabi mipampo kumubili pele . . . zizo zyoonse zigwasyanye. Lino kuti caciswa cizo cimwi, zilaciswa zizonyina zyoonse azyalo. Alimwi kuti cizo cimwi calemekwa, zizonyina zyoonse zilakondwa aco.”—1 Ba-Korinto 12:25, 26.

18. Ino nkampenda nzi nkotweelede kuleka ciindi notutyompedwe?

¹⁸ Ziindi zimwi tulakonzya kuti katutyompedwe kapati cakuti tatukonzyi kukukkomanina kuyanzana a Banakristoma. Tweelede kucileka kulimvwa boobo ikutegwa tutaliimyi luumbulizyo alimwi alugwasyo ndobakonzya kutupa basyomima. Ibbaibbele litucenjezya kuti: “Uulipambukanya ulayandaula zisusi zyakwe mwini, ulasowa kubeteka koonse kubotu.” (Tusimpi 18:1) Ibakwesu alimwi abacizi ncitondezyo cakuti Leza ulatulanganya. Ikuti naa twabuzumina bubambe oobu bwaluyando, tuyookatalusyigwa muziindi zyamapenzi.

Amube Amizeezo Iili Kabotu

19, 20. Ino mbuti Magwalo mbwaatugwasya kuleka kuyeeya mizeezo mibyaabi?

¹⁹ Ikuti naa twatyompwa alimwi akuusa, ncuuba ikuba amizeezo iityompya. Mucikozyanyo, ikuti naa kwacitika mapenzi, ibamwi balakonzya kutalika kudooneka mbobabikkila maano kuzintu zyakumuuya alimwi akuyeeya kuti imapenzi aabasikila ncitondezyo cakuti Leza tabazuminide pe. Pele amuyeeye kuti Jehova kunyina nasunka muntu “kucibi” pe. (Jakobo 1:13) Ibbaibbele lyaamba kuti: “[Leza] tapenzyi bantu kacami nikuba kubausya insoni.” (Malilo 3:33) Muciindi caboobo, Jehova ulausa kapati bantu bakwe nobapenga.—Isaya 63:8, 9; Zekariya 2:8.

²⁰ Jehova ngu “Taateesu siluzyalo, Leza siluumbulizyo loonse.” (2 Ba-Korinto 1:3) Ulatulanganya alimwi uyootusumpula muciindi ceelede. (1 Petro 5:6, 7) Ikuyeeya lyoonse mbuli Leza mbwatuyanda kuyootugwasya kuzumanana kuba abukkale bubotu nokuba kukkomana buya. Jakobo wakalemba kuti: “Bakwesu, amuyeeye kuti ncoolwe cipati na mwasikilwa masukusyo aamisyobo misyobo.” (Jakobo 1:2) Nkaambo nzi? Wiingula kuti: “Nkaambo na wabonwa kuti muyumu, ulapegwa musini wabuumi, ngwaakasyomezya Mwami kulibaabo bamuyanda.”—Jakobo 1:12.

21. Kufwumbwa naa mapenzi nzi aatusikila, ino ncisyomezyo nzi Leza ncapa kuli baabo ibasyomeka kulinguwe?

²¹ Mbubwenya mbuli Jesu mbwaakacenjezya, munyika tuyoosikilwa mapenzi. (Johane 16:33) Pele Ibbaibbele lisyomezya kuti “mapenzi naaba mapakasyo naaba mafwabi niiba inzala niciba cintanda nibuba bulowe” tazikonzyi kutwaandaanya kuluyando lwa Jehova akuluyando lwa Mwanaakwe. (Ba-Roma 8:35, 39) Elo cilaumbulizya kaka ikuziba kuti mapenzi woonse aatusikila ngakaindi buyo kasyoonto! Kwaciindi cino, notulindila mamanino aamapenzi aabantu, Taateesu siluyando Jehova ulatweembela. Ikuti naa twaunka kulinguwe ikutegwa atukwabilile, uyooba “mayubilo aabapenzegwa, mayubilo kuziindi zyamapenzi.”—Intembauzyo 9:9.

Ino Ncinzi Ncotwaiya?

• Ino ncinzi Banakristo ncobeelede kulangila nobacili munyika eeyi mbyaabi?

• Ino mbuti mupailo uupailwa amoyo woonse mboukonzya kutuyumya notuli mumasukusyo?

• Ino muuya wa Leza mmugwasyi buti?

• Ino ncinzi ncotukonzya kucita ikutegwa tugwasyanye?

[Mibuzyo yaciiyo]

[Cifwanikiso icili apeeji 15]

Tuleelede kuyandaula Jehova mbuli kuti tuccijila kungazi njumu

[Zifwanikiso izili apeeji 16]

Ibasimide kumuuya balasola kujana ciindi cakulumbaizya alimwi akukulwaizya bamwi