Cibotu Acibi Mbuti Mbomweelede Kusala?

INO nguni uujisi nguzu zyakubikka zyeelelo zyakusala cibotu acibi? Ooyu mubuzyo wakabuzyigwa nibakatalika kupona bantu. Kweelana a Bbaibbele mubbuku lya Matalikilo, Leza wakasala musamu wakali kukomena mumuunda wa Edeni kuti ube “musamu wakuziba bubotu abubi.” (Matalikilo 2:9) Leza wakalailila banabukwetene bakusaanguna kuti batalyi micelo kumusamu ooyu. Nokuba boobo, sinkondonyina a Leza, Sataani Diabolosi wakaamba kuti, ikuti naa balya mucelo wamusamu ooyu ‘meso aabo ayoojuka’ alimwi ‘bayooba mbuli Leza, bayooziba bubotu abubi mbububede.’—Matalikilo 2:16, 17; 3:1, 5; Ciyubunuzyo 12:9.

Adamu a Eva bakeelede kusala kutobela zyeelelo zya Leza kujatikizya cibotu acibi naa kutobela mizeezo yabo beni. (Matalikilo 3:6) Bakasala kuzangila Leza, eelyo bakaulya mucelo. Ino eeci ncibakacita cakatondezya nzi? Akaambo kakukaka kutobela zintu nzyaakali kukasya Leza, bakalitondezya cantangalala kuti balo abana babo bakali kukonzya kupona kabotu kuti balibikkila zyeelelo zyabo zyakuziba cibotu acibi. Ino bantu bazwidilila buti mukusoleka kucita mbuli Leza kwiinda mukulibikkila zyeelelo zyabo?

Kwiindana Kwamizeezo

Nibakamana kulanga-langa kuyiisya kwabantu balaampuwo bayeeya kapati bali kupona mumyaanda yamyaka, ibbuku lya Encyclopædia Britannica lyakati, ikuzwa kuciindi casyaabusongo Mugiliki Socrates kusikila mumwaanda wamyaka wa 20, balikukazyanya lyoonse akaambo “kakuyanda kuzyiba bupanduluzi bwini bwabubotu alimwi aceelelo cabubotu abubi.”

Mucikozyanyo, ba Sophists kakali kabunga kalaampuwo kabamayi bana Giliki bamumwaanda wamyaka wasanu B.C.E. Bakali kuyiisya kuti zyeelelo zyakuziba cibotu acibi zyakali kuzyibwa kweelana akuyeeya kwabantu banji. Umwi mwiiyi wakaamba kuti: “Kufwumbwa cintu cilibonya kuti cililuzi alimwi cili kabotu mudolopo limwi alimwi, cililuzi alimwi cili kabotu kudolopo eelyo, ikuti bantu bali mumo kabacibona kuti cililuzi.” Kweelana azyeelelo eezi, ibanji balakonzya kuyeeya kuti micito imwi yakutasyomeka ili kabotu akaambo kakuti banji mucilawo mobakkala naa “mudolopo” balalangilwa kucita oobo.

Immanuel Kant syaabusongo wakazibidwe kapati mumwaanda wamyaka wa 18  wakatondezya muzeezo wiimpene. Imagazini iitegwa Issues in Ethics yakati: “Immanuel Kant abamwi bali mbuli nguwe . . . bakacisiya kumuntu amuntu kuti alisalile.” Kweelana abusongo bwa Kant ikuti naa muntu katanyonganyi zyeelelo zyabamwi, cili kuli nguwe kucita kufumbwa ncayanda. Tayelede kutobela muzeezo wabanji kuti umusololele muzyeelelo zyakwe.

Sena Kutobela Mizeezo Yabanji Kulagwasya?

Bantu bamwi balakonzya kuyeeya kuti ikusyomeka mbufwubafwuba. Pele muzeezo wabantu banji tuugwasyi pe. Mucikonzyanyo, ikuti naa mwakali kukkala mubusena bantu banji mobasyoma kuti kwaaba bana kabali cituuzyo kuli buyo kabotu, mbuli mbubakali kupona bamwi kaindi, sena eeci cakali kuyoopa kuti cilengwa eeci cibote? (2 Bami 16:3) Ino kuti naa mwaazyalilwa kubusena bantu nkobabona kuti kulya bantu cili buyo kabotu? Sena eeci inga catondezya kuti kulya nyama yamuntu cili buyo kabotu? Ikuti banabunji balacicita cilengwa eeco tacaambi kuti inga ncibotu. Ikaindi Ibbaibbele lyakacenjezya zyakakole aka nilyakati: “Utatobeli buleya kukucita zibi.”—Kulonga 23:2.

Jesu Kristo wakaamba kaambo akamwi katupa kuti katucenjela notutobela banabunji mukusala cibotu acibi. Wakamubikka antangalala Saatani kuti ngo “mwami wenyika.” (Johane 14:30; Luka 4:6) Saatani ubelesya bulelo bwakwe kweena “bantu boonse baansi.” (Ciyubunuzyo 12:9) Aboobo kuti mwabikka zyeelelo zyanu kujatikizya cibotu acibi kweelana ambobayeeya banabunji, mulakonzya kukulanga mbwakulanga kulilemeka Saatani alimwi eeco ciyakumupa kunjila mumapenzi.

Sena Inga Mwakusyoma Kusala Kwanu?

Sena muntu umwi aumwi weelede kulisalila cibotu acibi? Ibbaibbele lyaamba kuti: “Utaccilili maanu aako omwini.” (Tusimpi 3:5, BT) Ino nkaambo nzi? Nkaambo bantu boonse baakona mizeezo iinyongene yalo iikonzya kunyonganya kusala kwabo. Ciindi Adamu a Eva nibakazangila Leza bakaiya zyeelelo zya Saatani sikubeja mulyato alimwi akumusala kuba swaabo wakumuuya. Bamane bakatambukizya banababo moyo walweeno wakuziba cibotu, pele kabajisi muzeezo wakucita cibi.—Matalikilo 6:5; Ba-Roma 5:12; 7:21-24.

Bbuku lya Encyclopædia Britannica, nolyaamba makani aakulilemeka lilati: “Tacigambyi pe ikuti bantu nokuba kuti balizyi ncobeelede kucita, pele balazumanana kucita cibakkomanisya balo. Ikugwasya bantu bali boobo ikutegwa babone ncobeelede kucitila cintu cibotu lyali penzi kapati mumilawo yamu Masi aasumpukide.” Ibbaibbele mukululamika lyaamba boobu: “Moyo wamuntu uleena kwiinda zintu zyoonse, ulijisi bulwazi bukaka kupona, taakwe uukonzya kuzibisya mbuubede.” (Jeremiya 17:9) Sena inga mwamusyoma muntu uzyibidwe kuti uleena alimwi uujisi bulwazi butaponi?

Masimpe, nobaba baabo batasyomi muli Leza balalilemeka kabotu alimwi balaitobela milawo yabukkale bubotu. Kanji-kanji njiisyo  zibotu zijanika mumilawo yabo zitondezya zyeelelo zyabukkale bubotu zili mu Bbaibbele. Nokuba kuti bantu aaba balakaka kuti Leza nkwali, imizeezo yabo ilatondezya kuti bakakona bube bwa Leza bwalo mbobakonzya kwiiya. Eeci citondezya mbulyaamba Bbaibbele kuti, imuntu wakalengwa “mucinkozya ca-Leza.” (Matalikilo 1:27; Incito 17:26-28) Mwaapostolo Paulo wakati: “Aba balatondezya mulimo wa-Mulao uulembedwe mumyoyo yabo.”—Ba-Roma 2:15.

Masimpe ngakuti, imuntu inga kazyi kucita cibotu; pele uyandika kuba aluyandisisyo lwakucita cibotu. Ino umwi inga wacikonzya buti kuzumanana kucita ciluzi? Mbwaanga nzyotucita zizwa mumoyo, kuba aluyando ku Mulembi wa Bbaibbile, Jehova Leza cilakonzya kugwasya muntu kuzumanana kumubelekela.—Intembauzyo 25:4, 5.

Kuba Anguzu Zyakucita Cibotu

Intaamu yakutaanguna nomwiiya kuyanda Leza nkuzyiba milazyo yakwe mboigwasya. Mwaapostolo Johane waamba kuti: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.” (1 Johane 5:3) Mucikozyanyo, Ibbaibbele ilijisi injiisyo iigwasya iikonzya kugwasya bana kwiindanya cibotu acibi nibasala naa beelede kunywa zyakunywa zikola, kubelesya misamu iikola naa kutola lubazu mukoonana kabatana kwata naa kukwatwa. Ibbaibbele lilakonzya kugwasya banabukwetene kubona mbobakonzya kumana mapenzi naa kutamvwana kuliko akati kabo alimwi lilapa busololi kubazyali kujatikizya mbobakozya kukomezya bana babo. * Kuti zyatobelwa zyeelelo zyakulilemeka zyamu Bbaibbele, ibana abapati boonse balakonzya kugwasyigwa, kufwumbwa naa bali mubukkale buli buti, naa bajisi lwiiyo luli buti alimwi naa bali azilengwa zili buti.

Mbweena mbuli cakulya cijisi busani bubotu mbocipa nguzu zyakubeleka, ikubala Jwi lya Leza akwalo kumupa nguzu zyakuti kamupona kweelana azyeelelo zyakwe. Jesu wakakozyanisya majwi aa Leza kunsima yabuumi. (Matayo 4:4) Alimwi wakati: “Icakulya cangu nkucita luyando lwayooyo uwakandituma.” (Johane 4:34) Kulya cakulya cakumuuya cizwa mujwi lya Leza cakamugwasya Jesu kuliyumya mumasunko alimwi akusala kabotu.—Luka 4:1-13.

Nomwatalika-talika inga calibonya kukatazya kulya cakulya cakumuuya cizwa mu Jwi lya Leza alimwi akutobela zyeelelo zyakwe. Pele kuti mwayeeya nomwakacili bana, kuli zyakulya zimwi nzimwatakali kuyanda, pele zyakali kuyandika kapati. Kutegwa mukomene kamuli anguzu, mwakatalika kuzikkomanina zyakulya zili boobo. Ncimwi buyo, akwalo kuba aluyandisisyo lwakutobela zyeelelo zya Leza kulakonzya kumutolela ciindi. Kuti mwazumanana muyookomena kamujisi luyandisisyo alimwi muyakuyuma kumuuya. (Intembauzyo 34:8; 2 Timoteo 3:15-17) Muyooba alusyomo muli Jehova alimwi ciyakumupa “kucita kabotu.”—Intembauzyo 37:3.

Mubwini abuzuba tulasala zyakucita mubuumi, izipati azisyoonto. Aboobo Ibbaibbele limukulwaizya kuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.” (Tusimpi 3:5, 6) Kusyoma Jehova takukamugwasyi buyo ono pe, pele kuyoomupa acoolwe cakuba abuumi butamani akaambo kakuti kusyoma muli Jehova Leza kusololela kubuumi.—Matayo 7:13, 14.

Bupanduluzi buyungizidwe

Majwi aakwelelezya sikubala aali apeeji 5]

Muzeezo wabanabunji ulakonzya kweendelezyegwa amyuuya iitabonwi

[Zifwanikiso izili apeeji 4]

Kuzwa kaindi, basyaabusongo bali kukazyanya kujatikizya cibotu acibi

SOCRATES

KANT

CONFUCIUS

[Kulumba]

Kant: Kuzwa mubbuku litegwa The Historian’s History of the World; Socrates: Kuzwa mubbuku litegwa A General History for Colleges and High Schools; Confucius: Sung Kyun Kwan University, Seoul, Korea