Bayiisyidwe Kupa Bumboni Cakulomya
Bayiisyidwe Kupa Bumboni Cakulomya
“Muyooba bakamboni bangu mu Jelusalemu amu Judiya moonse, alimwi amu Samaliya, mane akumagolelo aanyika koonse.”—MILIMO 1:8, Ci.
1, 2. Mmulimo nzi ngwaakajisi Petro alimwi ino nguni wakamupede?
“JESU wa-Nazareta . . . wakatulailila kuti tukambaukile bantu, tulungulule kuti ngonguwe uwakabikwa Leza kuti abe mubetesi wabaumi abafwide.” (Incito 10:38, 42) Kwiinda mumajwi aayo, imwaapostolo Petro wakapanduluda Korneliyo amukwasyi wakwe imulimo ngwaakatambwide iwakuba mukambausi wamakani mabotu.
2 Ino ndilili Jesu naakapa mulimo ooyo? Kuboneka kuti Petro wakali kuyeeya nzyakaamba Jesu naakabusyigwa katanatanta kujulu. Aciindi eeco, Jesu wakaambila basikwiiya bakwe basyomeka kuti: “Muyooba bakamboni bangu mu Jelusalemu amu Judiya moonse, alimwi amu Samaliya, mane akumagolelo aanyika koonse.” (Milimo 1:8, Ci) Pele kwaciindi cili mbocibede katanaamba eezyo, Petro wakalizyi kuti mbwaakali sikwiiya wa Jesu, wakeelede kwaambila bamwi lusyomo ndwaakajisi muli Jesu.
Myaka Yotatwe Yakwiiya
3. Mmaleele nzi ngaakacita Jesu alimwi ino wakabatamba kutyani ba Petro a Andreya?
3 Myezi ili mboibede kuzwa naakabbapatizyigwa mu 29 C.E., Jesu wakakambauka kubusena Petro amunyina Andreya nkobakali kubelekela kabali bazubi banswi mu Lwizi lwa Galilaya. Bakabeleka masiku oonse, pele kakunyina kujaya nswi. Pele, Jesu wakabaambila kuti: “Katuya akati kaziba kuti mukawaale tunyandi twanu kutegwa mujaye nswi zinji.” Nobakacita nzyakaamba Jesu, “bakajaya nswi zinji kapati, mane tunyandi twabo twakatizapuke.” Naakabona maleele, Petro wakayoowa kapati, pele Jesu wakamukulwaizya kati: “Utayoowi, nkaambo kuzwa sunu uyooba muzubi wabantu.”—Luka 5:4-10, Ci.
4. (a) Ino Jesu wakabagwasya buti basikwiiya bakwe kukambauka? (b) Ino mulimo wabasikwiiya ba Jesu wakali kuyooindana buti angwaakacita walo?
4 Mpoonya awo, Petro a Andreya—kubikkilizya a Jakobo alimwi a Johane, bana ba Zebedayo—bakasiya mato aabo akumutobela Jesu. Kwamyaka iitandila kwiitatu, bakali kumutobela Jesu munyendo zyakwe zyakukambauka alimwi bakayiisyigwa kuba bakambausi bamakani mabotu. (Matayo 10:7; Marko 1:16, 18, 20, 38; Luka 4:43; 10:9) Kumamanino aciindi eeco, mu Nisani 14, 33 C.E., Jesu wakabaambila kuti: “Oyo uundisyoma, uyoocita milimo iili mbuli njencita, mane do akiicite mipati iinda eyi.” (Johane 14:12) Basikwiiya ba Jesu bakali kuyoolomya kupa bumboni mbuli mbwaakacita Jesu, pele nkuti buyo mulimo wabo wakali kunooli mupati. Bakazoozyiba kuti balo abasikwiiya ibakali kuyootobela munsi banikuyoopa bumboni kubantu “bamisyobo yoonse,” mane “kumamanino aaciindi.”—Matayo 28:19, 20.
5. Muunzila nzi motukonzya kugwasyigwa alwiiyo Jesu ndwaakapa basikumutobela?
5 Tupona ‘kuciindi cakumamanino.’ (Matayo 24:3) Kwiindana abasikwiiya bakusaanguna, kunyina notukonzya kumutobela Jesu akumulangilila kakambauka kubantu. Pele tulakonzya kugwasyigwa alwiiyo lwakwe kwiinda mukubala mu Bbaibbele kujatikizya mbwaakali kukambauka alimwi amalailile ngaakapa basikumutobela. (Luka 10:1-11) Kunze lyaboobo, cibalo eeci cilabandika cimwi cintu ciyandika kapati Jesu ncaakatondezya basikwiiya bakwe—kuubona kabotu mulimo wakukambauka.
Kubabikkila Maano Bantu
6, 7. Mbube buli buti bwa Jesu bwakapa kuti azwidilile mumulimo alimwi ino mbuti mbotukonzya kumwiiya munzila eeyi?
6 Nkaambo nzi Jesu ncaakali kuzwidilila boobo mukukambauka? Cipati cakamupa kuzwidilila ncakuti wakali kubayandisya alimwi akubabikkila maano bantu. Sintembauzyo wakasinsima kuti Jesu wakali ‘kuyoobafwida luzyalo bacete abatengwana.’ (Intembauzyo 72:13) Cakutadooneka wakabuzuzikizya businsimi oobo. Ibbaibbele litwaambila boobu kujatikizya ciindi cimwi: “Nkabela naakabona makamu aabantu wakabafwida luzyalo, nkaambo kakuti bakalikatede akumwaika mbuli imbelele zitakwe mweembezi.” (Matayo 9:36) Nobaba basikucita zibi zitaambiki bakabona mbwaakali kubabikkila maano mane bakaboola kulinguwe.—Matayo 9:9-13; Luka 7:36-38; 19:1-10.
7 Andiswe mazubaano tuyoozwidilila ikuti katuboneka kuti tulababikkila maano bantu. Kamutanaunka mumulimo, amuyeeye ibantu mbobayandika kwaamvwa makani ngomubatolela. Amuyeeye mapenzi ngobajisi aayo aakonzya kumanizyigwa buyo a Bwami. Amulangile zibotu kumuntu uuli woonse mbwaanga tamuzyi naa mbaani bayooutambula mulumbe ngomujisi. Ambweni muntu ngomuyoojana wali kupailila muntu uli mbuli ndinywe kuti aboole amugwasye!
Kukulwaizyigwa a Luyando
8. Mukwiiya Jesu, ncinzi cibakulwaizya basikumutobela kukambauka makani mabotu?
8 Imakani mabotu ngaakakambauka Jesu akali kujatikizya kuzuzikizyigwa kwamakanze aa Jehova, kusalazyigwa kwazina Lyakwe alimwi akululama kwabweendelezi bwakwe—itwaambo tuyandika kapati tujatikizya bantu boonse. (Matayo 6:9, 10) Akaambo kakuti wakali kubayanda Bausyi, Jesu wakakulwaizyigwa kuzumanana kusyomeka mane do kumamanino akupa bumboni kujatikizya Bwami bwakwe bwalo buyoomanizya twaambo ooto. (Johane 14:31) Akaambo kakuti basikumutobela Jesu mazubaano abalo balakulwaizyigwa aluyando, mbankutwe mukutola lubazu mumulimo. Imwaapostolo Johane wakati: “Oku nkokuyanda Leza, kuti twabamba milazyo yakwe,” kubikkilizya amalailile aakukambauka makani mabotu akugwasya bamwi kuba basikwiiya.—1 Johane 5:3; Matayo 28:19, 20.
9, 10. Kunze lya luyando lwa Leza, nduyando luli lumbi lutukulwaizya kulomya kupa bumboni?
9 Jesu wakaambila basikumutobela kuti: “Mwanoondiyanda, kamubamba milao yangu. Oyo uujisi milao yangu, akwiibamba nguundiyanda.” (Johane 14:15, 21) Aboobo, ikuyanda Jesu kweelede kutukulwaizya kukambauka kasimpe akutobela zintu zimwi Jesu nzyaakalailila. Aciindi cimwi naakaboneka Jesu kuzwa naakabusyigwa, wakakulwaizya Petro kuti: “Sanina tubelele twangu. . . . Embela mbelele zyangu. . . . Sanina mbelele zyangu.” Ncinzi ceelede kumukulwaizya Petro kucita oobo? Jesu wakapa bwiinguzi naakabuzya Petro cakwiinduluka-induluka kati: “Sena ulandiyandisya? . . . Sena ulandiyandisya? . . . Sena ulandiyanda?” Inzya, luyando ndwaakajisi Petro kuli Jesu lwakali kuyoomukulwaizya kukambauka, ikujana “tubelele” twa Jesu mane akuba mweembezi wantuto wakumuuya.—Johane 21:15-17.
10 Mazubaano, kunyina notumubona Jesu mbuli mbwaakamubwene Petro. Pele tulamvwisya ncocaamba ncaakatucitila Jesu. Myoyo yesu ilakulwaizyigwa aluyando oolo lwakamupa ‘kumvwida bantu boonse lufwu.’ (Ba-Hebrayo 2:9; Johane 15:13) Tulimvwa mbwaakalimvwa Paulo naakalemba kuti: “Kuyanda Kristo nkokutusinikizya . . . Wakabafwida boonse kuti abo bapona bataciliponene beni pele baponene [nguwe].” (2 Ba-Korinto 5:14, 15) Tulatondezya kuti tulabikkila maano kuluyando Jesu ndwajisi kulindiswe akuti tulamuyanda andiswe kwiinda mukuucita cabunkutwe mulimo wakupa bumboni cakulomya. (1 Johane 2:3-5) Tatuyandi kuubya-ubya mulimo wakukambauka alimwi akubona cituuzyo ca Jesu kuba cintu cinyina mpindu.—Ba-Hebrayo 10:29.
Mutalekeli Cintu Kumunyonganya Kuli Zyeezyo Ziyandika Kapati
11, 12. Mmakanze nzi Jesu ngaakaboolela anyika alimwi wakatondezya buti kuti ngomulimo ngwaakali kubikkila maano?
11 Jesu naakabuzyigwa a Pontiyo Pilato wakati: “Ncendakazyalilwa, ncendakasikila ansi ano, kuti nkalungulule bwini.” (Johane 18:37) Jesu kunyina naakalekela cili coonse kumunyonganya kwaamba kasimpe. Kulinguwe ooko kwakali kuyanda kwa Leza.
12 Saatani masimpe wakamusunka Jesu kumakani aaya. Kuzwa naakabbapatizyigwa Jesu, Saatani wakamusyomezya kuti wakali kuyoomucita kuti abe mupati nyika yoonse, ikumupa “zisi zyoonse zyanyika abulemu bwazyo.” (Matayo 4:8, 9) Kumbele, ba Juda bakali kuyanda kumubikka kuba mwami. (Johane 6:15) Ibamwi balakonzya kuyeeyela bubotu bwakali kuyooba ikuti Jesu naakazumina kuba mwami, ambweni inga bayeeya kuti naakaba mwami muntunsi, Jesu wakali kuyoobagwasya kapati bantu. Pele Jesu wakaukaka muzeezo uli boobo. Ncaakali kuyandisya kapati nkwaamba kasimpe.
13, 14. (a) Ncinzi cakakakilwa kumunyonganya Jesu mumulimo wakwe? (b) Nokuba kuti Jesu wakali mucete, nzinzi nzyaakacita?
13 Kunze lyaboobo, Jesu kunyina naakanyonganizyigwa akuyandaula lubono. Aboobo, kunyina naakaba muvwubi mubuumi bwakwe. Alimwi wakanyina aŋanda iimugeme. Aciindi cimwi wakati: “Bamwaaba balijisi malyango, abalo bayuni bamujulu balijisi ziteente, pele Mwana a-Muntu taakwe nkooneka mutwe wakwe.” (Matayo 8:20) Jesu naakafwa, cilikke ncotubala cakali kuulwa muulo waatala ncaakajisi cakali cisani calo eeco basikalumamba bana Roma ncobakawaalila cisolo. (Johane 19:23, 24) Sena nkokwaamba kuti Jesu kunyina naakazwidilila mubuumi bwakwe? Peepe!
14 Jesu wakacita zintu zinji kapati kwiinda nzyakonzya kucita muntu muvwubi siluzyalo uuli woonse uuyandisya kugwasya bantu. Paulo wakati: “Mulizi mbulubede luzyalo lwa-Mwami wesu Jesu Kristo, nkaambo walo wakali muvubi, nekubaboobo wakaba mucete nkaambo kandinywe, kuti bucete bwakwe bumuletele buvubi nywebo.” (2 Ba-Korinto 8:9; Ba-Filipi 2:5-8) Nokuba kuti wakali mucete, Jesu wakapa kuti cikonzyeke kubantu balibombya ikuba abuumi butamani kabalondokede. Elo tulamulumba kaka! Alimwi tulikkomene kapati abulumbu mbwaakapegwa akaambo kakuti wakabikkila maano kukucita makanze aa Leza.—Intembauzyo 40:8; Incito 2:32, 33, 36.
15. Ncinzi cili ampindu kapati kwiinda lubono?
15 Banakristo mazubaano ibasoleka kwiiya Jesu abalo tabazumini kunyonganizyigwa akuyandaula lubono. (1 Timoteo 6:9, 10) Balizyi kuti buvwubi bulakonzya kupa kuti kabapona kabotu, pele alimwi balizyi kuti lubono kunyina noluya kubapa buumi butamani kumbele. Munakristo nafwa, lubono lwakumubili talucijisi mpindu kulinguwe mbubwenya mbuli cisani ca Jesu mbocakanyina mpindu kulinguwe naakafwa. (Mukambausi 2:10, 11, 17-19; 7:12) Munakristo nafwa, cilikke ncajisi icili ampindu ncilongwe cakwe a Jehova alimwi a Jesu Kristo.—Matayo 6:19-21; Luka 16:9.
Kutatyompwa a Kukazyigwa
16. Ino mbuti Jesu mbwaakakubona kukazyigwa?
16 Kukazyigwa kunyina nokwakamunyonganya Jesu kwaamba kasimpe. Nokuba kuti wakalizyi kuti mulimo wakwe waanyika wakali kuyoomana alufwu lwacituuzyo kunyina naakatyompwa pe. Kaamba Jesu, Paulo wakati: “Nkaambo kalukondo ndwaakabikilwa kunembo, [wakaliyumya acisamu cakupenzyezya, NW], wakaubaula buusu, eno sunu ulikede kululyo lwacuuno ca-Leza.” (Ba-Hebrayo 12:2) Amubone kuti Jesu “wakaubaula buusu.” Kunyina naakabikkila maano kuli nzyobakali kumuyeeyela basinkondonyina. Wakabikkilide maano kukucita makanze aa Leza.
17. Ncinzi ncotukonzya kwiiya kukuliyumya kwa Jesu?
17 Kabelesya ciiyo ncotwiiya mukuliyumya kwa Jesu, Paulo ukulwaizya Banakristo kuti: “Kamwiilizya nguwe uwakazyandamana mukukazyanya kuli bobuya kwabantu abamubisizya, kuti mutabombibombi nokuba kulengaala mumyoyo yanu.” (Ba-Hebrayo 12:3) Masimpe, cilakonzya kutyompya ikuti muntu kakazyigwa naa kafwubaazyigwa lyoonse. Cilakonzya kuminya ikunookazya zintu zikondelezya zyanyika, ambweni calo cikonzya kutupa kukazyigwa abasazima balo batukulwaizya kuti tube bantu bajisi mpuwo. Nokuba boobo, mbuli Jesu tulangila kuli Jehova kuti atugwasye mbotuya buzyandamana kubikka Bwami mubusena bwakusaanguna mubuumi bwesu.—Matayo 6:33; Ba-Roma 15:13; 1 Ba-Korinto 2:4.
18. Nciiyo nzi cibotu ncotukonzya kwiiya kumajwi Jesu ngaakaambila Petro?
18 Ikukaka kwa Jesu kunyonganizyigwa kwakatondezyegwa naakatalika kwaambila basikwiiya bakwe zyalufwu lwakwe lwakali kulangilwa. Petro wakakulwaizya Jesu kati “Leza akufwide luzyalo, mwami” akumusyomezya kuti “cintu eci tacizoobi kulinduwe.” Jesu wakakaka kuswiilila majwi ali woonse akali kuyoomutyompya kucita kuyanda kwa Jehova. Wakamufwutatila Petro akumwaambila kuti: “Swena oko kusule lyangu, Saatani. Uli cilebyo kulindime, nkaambo kakuti tozi makani aa-Leza, ulizi makani aabantu alike.” (Matayo 16:21-23) Andiswe mbubwenya atuzumanane kukazya miyeeyo yabantu. Pele lyoonse atusololelwe amiyeeyo ya Leza.
Bwami Buyooleta Zilongezyo Zini-Zini
19. Nokuba kuti wakali sikucita maleele, ncinzi cakali kuyandika kapati mumulimo wa Jesu?
19 Jesu wakacita maleele manji kutegwa atondezye kuti ngowakali Mesiya. Mane wakabusya bafwide. Makamu aabantu akakkomana amilimo eeyo, pele Jesu tanaakaboola anyika kuzyi kucita buyo milimo iisumpula bukkale bwabantu. Wakaboolela kuzyi kwaamba kasimpe. Wakalizyi kuti kufwumbwa lugwasyo lwakumubili ndwaakapa lwakali lwakaindi buyo kasyoonto. Nobaba baabo bakabusyigwa bakali kuyoofwa alimwi. Kolikke kwiinda mukwaamba kasimpe naakali kukonzya kugwasya bamwi kujana buumi butamani.—Luka 18:28-30.
20, 21. Mbuti Banakristo mbobazuzikizya mbazu zyoonse zyobilo mukucita milimo mibotu?
20 Mazubaano, bamwi bantu balasoleka kwiiya milimo ya Jesu mibotu kwiinda mukuyaka zibbadela naa kucita milimo imwi iigwasya bapengede munyika. Zimwi ziindi balacita oobo cakuliimya kapati alimwi eeci ncibotu; pele kufwumbwa lugwasyo ndobapa ndwakaindi buyo kasyoonto. Bolikke Bwami mbobuyooleta lugwasyo lutamani. Aboobo, Bakamboni ba Jehova balabikkila maano, mbuli bwakacita Jesu, kukwaamba zyabwini kujatikizya Bwami oobo.
21 Masimpe, Banakristo beni-beni balacita milimo mibotu. Paulo wakalemba kuti: “Nitujisi ciindi cibotu, atucitile bantu boonse milimo mibotu, pele kwaambisya kulibaabo baciinga calusyomo.” (Ba-Galatiya 6:10) Muziindi zikatazya naa umwi nali mupenzi, tatweelede kuwayawaya ‘kucita milimo mibotu’ kuli basimukoboma naa kubakwesu Banakristo. Nokuba boobo, tulazumanana kubikkila maano kuzintu zyeelede—ikwaamba kasimpe.
Amwiiye Cikozyanyo ca Jesu
22. Nkaambo nzi Banakristo ncobakambaukila basimukobonyina?
22 Paulo wakalemba kuti: “Maawe kulindime nintakambauka Makani Mabotu.” (1 Ba-Korinto 9:16) Tanaakali mulenga kukwaamba makani mabotu nkaambo ikukambauka makani aaya wakali kukubona kuti mbuumi kulinguwe akuli baabo bamuswiilila. (1 Timoteo 4:16) Andiswe mulimo wesu mbotuubona. Tuyanda kugwasya basimukoboma. Tuyanda kutondezya luyando ndotujisi kuli Jehova. Tuyanda kutondezya luyando ndotujisi kuli Jesu alimwi akumulumba kuluyando ndwajisi kulindiswe. Aboobo, tulakambauka makani mabotu alimwi tatuceendi “muzisusi zyanyama pele mumakanze aa-Leza.”—1 Petro 4:1, 2.
23, 24. (a) Nciiyo nzi ncotwiiya kumaleele akujaya nswi? (b) Mbaani mazubaano ibalomya kupa bumboni?
23 Mbuli Jesu, kunyina notunyonganizyigwa mumulimo wesu ibamwi nobatufwubaazya naa ikukaka mulumbe wesu cabukali. Kuli ciiyo ncotwiiya kumaleele Jesu ngaakacita naakaita Petro a Andreya kuti bamutobele. Twabona kuti ikuti twamumvwida Jesu, alimwi munzila yamaambilambali ikuti twawaala tunyandi twesu nomuba mumeenda muboneka mbuli kuti munyina nswi, ikuzuba kwesu kulakonzya kutujanya zinji. Bazubi Banakristo banji bazuba nswi zinji nobabeleka kwamyaka iili mbwiibede mumeenda mwali kuboneka mbuli kuti munyina nswi. Ibamwi bacikonzya ikulongela kooko nswi nkozili zinji kapati alimwi bazuba nswi zinji. Kufwumbwa ncotucita, tatukaleki kuwaala tunyandi twesu mumeenda. Tulizyi kuti Jesu tanaamba kuti mulimo wakukambauka wamanizyigwa mucibeela cili coonse anyika.—Matayo 24:14.
24 Tuulunzuma twiinda kucisambomwi twa Bakamboni ba Jehova bajisi bubi mumasi aainda ku 230. Ngazi Yamulindizi ya February 1, 2005 inoojisi lipooti yaamwaka yanyika yoonse yamulimo ngobakacita mumwaka wamulimo wa 2004. Eeyo lipooti iyootondezya zilongezyo zya Jehova zinji kapati mumulimo wakukambauka. Kuciindi ciciceede mubukkale oobu, atuzumanane ikutobela majwi aa Paulo aakulwaizya aakuti: “Ukambauke Makani lyoonse.” (2 Timoteo 4:2) Atuzumanane ikulomya kupa bumboni kusikila Jehova akaambe kuti mulimo wamanizyigwa.
Sena Inga Mwaingula?
• Mbuti mbotukonzya kugwasyigwa alwiiyo Jesu ndwaakapa basikwiiya bakwe?
• Ino Jesu wakali kubabona buti bantu mbaakali kukambaukila?
• Ncinzi citukulwaizya kulomya kupa bumboni?
• Muunzila nzi motukonzya kuzumanana kubikkila maano kukucita kuyanda kwa Leza mbubwenya bwakacita Jesu?
[Mibuzyo yaciiyo]
Kutalikila mwaka uno, Lipooti Yamwaka Yamulimo ya Bakamboni ba Jehova ya Nyika yoonse tiinoojaniki mu Ngazi Yamulindizi ya January 1. Muciindi caboobo inooli mumagazini ya February 1.
[Cifwanikiso icili apeeji 25]
Cipati ncaakaboolela anyika Jesu nkwaamba kasimpe
[Zifwanikiso izili apeeji 26]
Bakamboni ba Jehova balabikkila maano kukulomya kupa bumboni