Jehova Ngomugwasyi Wesu

“Lugwasyo lwangu lulazwa kuli-Jehova. Ngonguwe iwakalenga ijulu anyika.”—INTEMBAUZYO 121:2.

1, 2. (a) Ino nkaambo nzi ncokukonzya kwaambwa kuti toonse tuyandika lugwasyo zimwi ziindi? (b) Ino Jehova Mmugwasyi uuli buti?

NGUNI akati kesu uutayandiki kugwasyigwa? Masimpe ngakuti toonse tuyandika lugwasyo zimwi ziindi kutegwa tutazundwi apenzi lipati, kutegwa tuliyumye notwasweekelwa muyandwa wesu alimwi anotusunkwa kapati. Nobayanda lugwasyo, bantu kanji-kanji baunka kumweenzinyina uubabikkila maano. Ikwaambila mweenzinyoko uuli boobu mapenzi kulakonzya kwaawubya-ubya. Pele kuli mpakonzya kugolela muntuma kulugwasyo ndwakonzya kupa. Kunze lyaboobo, bamwi inga kabatalibambide kumugwasya nomuyandika lugwasyo.

² Nokuba boobo, nkwali Mugwasyi uujisi nguzu ziteeli alimwi azibelesyo. Kuyungizya waawo, ulatusyomezya kuti kunyina nayootulekelezya pe. Ngonguwe wakaambwa asintembauzyo walo calusyomo kapati wakati: “Lugwasyo lwangu lulazwa kuli-Jehova.” (Intembauzyo 121:2) Nkaambo nzi sintembauzyo ooyu ncaakali kusyoma kuti Jehova ulakonzya kumugwasya? Ikutegwa twiingule mubuzyo ooyu, atulange-lange Intembauzyo 121. Ikucita boobo kuyootugwasya kubona kaambo aswebo ncotukonzya kumusyoma Jehova kali Mugwasyi wesu.

Ikuzwa Lugwasyo Luteeli

3. Ino nkuumalundu aali sintembauzyo nkwaakali kulanga, alimwi ino nkaambo nzi?

³ Sintembauzyo wakatalika kwiinda mukwaamba kuti, mbwaanga Jehova wakalenga zintu zyoonse, tulijisi twaambo tusinizyide aayeeme lusyomo naakati: “Ndatambya meso aangu kuzilundu. Lugwasyo lwangu lulazwa kuli? Lugwasyo lwangu lulazwa kuli-Jehova. Ngonguwe iwakalenga ijulu anyika.” (Intembauzyo 121:1, 2) Sintembauzyo wakali kwaamba malundu aalibedelede. Imajwi aaya naakalembwa, itempele lya Jehova lyakayakidwe ku Jerusalemu. Imunzi ooyo iwakali atala lyamalundu aaku Juda, bwakali busena bwacikozyanyo bwa Jehova bwakukkala. (Intembauzyo 135:21) Sintembauzyo weelede kuti wakalanga kuzilundu zyaku Jerusalemu ooko itempele lya Jehova nkolyakayakidwe, calusyomo kalanga kuli Jehova kuti amugwasye. Ino nkaambo nzi sintembauzyo ncaakali masimpe kuti Jehova ulakonzya kumugwasya? Nkaambo Ngonguwe “iwakalenga ijulu anyika.” Munzila imwi, sintembauzyo wakali kwaamba kuti, ‘Masimpe kunyina cikonzya kumukasya Mulengi singuzuzyoonse kundigwasya mebo!’—Isaya 40:26.

4. Ino mbuti sintembauzyo mbwaakatondezya kuti Jehova lyoonse ulipakamene kuzintu nzyobayandika bantu bakwe, alimwi ino nkaambo nzi ncokaumbulizya kaambo aaka?

 ⁴ Kuzwa waawo, sintembauzyo wakapandulula kuti Jehova lyoonse ulabikkila maano kuzintu nzyobayandika babelesi bakwe naakati: “Takoozumizya cituta cako kusunzululwa. Oyo uukubamba takooguna. Ncobeni oyo uubamba Israyeli taguni, taoni pe.” (Intembauzyo 121:3, 4) Tacikonzyeki kuli Leza kuzumizya baabo ibamusyoma “kusunzululwa” naa kuwa cakunga tabacikonzyi kubuka alimwi. (Tusimpi 24:16) Nkaambo nzi? Nkaambo Jehova uli mbuli mweembezi uupakamene mukukwabilila mbelele zyakwe. Elo kaka kaambo aaka kalaumbulizya! Kunyina naaceya nayooleka kubalanganya bantu bakwe kuzintu nzyobayandika. Masiku asikati ulabalanganya.

5. Nkaambo nzi Jehova ncaambwa kuti uli ‘kujanza lyalulyo’?

⁵ Kasyomede kuti Jehova Mmukwabilizi wabantu bakwe uusyomeka, sintembauzyo wakalemba kuti: “Jehova nguukubamba. Jehova ncenzule cako kujanza lyako lyalulyo. Izuba talikooyookuuma isikati, nuuba mwezi masiku.” (Intembauzyo 121:5, 6) Kumuntu weenda amaulu ku Middle East, busena bujisi cimvwule bulakonzya kumupa lukwabililo luyandika kuzuba lipya kapati. Jehova uli mbuli cimvwule kubantu bakwe, ulabakwabilila kuzwa kumapenzi aatalikomeneni aakonzya kubanyonganya aali mbuli zuba lipya kapati. Amubone kuti Jehova waambwa kuti uli ‘kujanza lyalulyo.’ Munkondo zyansiku, ijanza lyalulyo lyasilumamba tiilyakali kukwabililwa kapati antobo eeyo yakali kujanza lyalumwensyi. Mulongwe usyomeka wakali kukonzya kupa lukwabililo kwiinda mukwiima akulwana kali kululyo lwasilumamba. Mbuli mulongwe uuli boobu, Jehova cakusyomeka ulabakwabilila bakombi bakwe, lyoonse kalibambide kubagwasya.

6, 7. (a) Ino mbuti sintembauzyo mbwatusyomezya kuti Jehova takaleki kugwasya bantu bakwe? (b) Nkaambo nzi ncotweelede kuba alusyomo ndwaakajisi sintembauzyo?

⁶ Sena Jehova kuli nayooleka kubagwasya bantu bakwe? Eeco tacikonzyi kucitika pe. Sintembauzyo wakamanizya kati: “Jehova ulakuvuna kububi boonse. Jehova ulavuna buumi bwako. Jehova ulakubamba mukweendeenda kwako, ciindi ecino alyoonse mane kukabe kutamani.” (Intembauzyo 121:7, 8) Mukapango 5 sintembauzyo wakaamba kuti: “Jehova nguukubamba,” ikutondezya kuti uzicita lino. Mutupango ootu sintembauzyo wakalemba kuti: ‘Jehova uyoobamba buumi bwako,’ nkokuti kumbele. Aboobo bakombi bakasimpe basyomezyegwa kuti lugwasyo lwa Jehova luyoozumanana akumbele. Kufwumbwa nkobakonzya kuunka alimwi kufwumbwa mapenzi aakonzya kubasikila, ijanza lyakwe linooli ambabo lyoonse.—Tusimpi 12:21.

⁷ Masimpe kuti mulembi wa Intembauzyo 121 wakalisinizyide kuti Mulengi singuzuzyoonse ulabalanganya babelesi bakwe camoyo mubombe mbuli wamweembezi uulanganya alimwi mbuli mulindizi uupakamene. Tulijisi lusyomo luli mbuli lwasintembauzyo, nkaambo Jehova tacinci pe. (Malaki 3:6) Sena eeci caamba kuti lyoonse tunookwabililwa kumubili? Peepe, pele kufwumbwa buyo kuti twazumanana kulanga kulinguwe kali Mugwasyi wesu, uya kutukwabilila kuzintu zyoonse zikonzya kutunyonganya kumuuya. Cileelela kubuzya kuti: ‘Ino mbuti Jehova mbwatugwasya?’ Atulange-lange nzila zyone mbwatugwasya. Mucibalo eeci, tulalanga-langa mbwaakabagwasya babelesi bakwe kuciindi cansiku. Mucibalo citobela, tulabandika mbwagwasya bantu bakwe mazubaano.

Lugwasyo Kuzwa Kubangelo

8. Ino nkaambo nzi ncocitagambyi kuti bangelo balijisi luyandisyisyo muzintu zicitika kubabelesi ba Leza aano anyika?

⁸ Jehova ulijisi myaanda-myaanda yatuulunzuma twabangelo bacita nzyabaambila. (Daniele 7:9, 10) Aaba bana bamuuya basyomeka bacita kuyanda kwakwe. (Intembauzyo 103:20) Balizyi kuti Jehova ulabayanda kapati bakombi bakwe akuti uyanda kubagwasya. Tacigambyi kuti bangelo balijisi luyandisyisyo kuzintu zicitika kubabelesi ba Leza aano anyika. (Luka 15:10) Mmasimpe kuti bangelo beelede kukkomana ikubelesyegwa a Jehova kugwasya bantu. Ino muunzila nzi Jehova mwaakabelesya bangelo kugwasya babelesi bakwe lyansiku?

9. Amupe cikozyanyo citondezya mbuli bangelo mbobakapegwa nguzu a Leza zyakuti bakwabilile bantu basyomeka.

 ⁹ Bangelo bakapegwa nguzu kuzwa kuli Leza zyakukwabilila akuvwuna bantu basyomeka. Bangelo bobile bakagwasya Loti abana bakwe basimbi kufwutuka lunyonyooko lwakali mu Sodoma a Gomora. (Matalikilo 19:1, 15-17) Mungelo omwe wakajaya basikalumamba bana Asuri bali 185,000 ibakali kuyanda kunyonyoona munzi wa Jerusalemu. (2 Bami 19:35) Daniele naakawaalwa mumulindi wabasyuumbwa, Jehova ‘wakatuma angelo wakwe, ooyo wakajala milomo yabasyuumbwa.’ (Daniele 6:21, 22) Mungelo wakaangununa mwaapostolo Petro muntolongo. (Incito 12:6-11) Ibbaibbele lilaamba zikozyanyo zinji zyalukwabililo lwakacitwa abangelo, ikuzuzikizya caambwa ku Intembauzyo 34:7 kuti: “Baangelo ba-Jehova balibazyungulukide bamuyoowa, kuti babavune.”

10. Ino mbuti Jehova mbwaakabelesya mungelo kukulwaizya musinsimi Daniele?

¹⁰ Muziindi zimwi, Jehova wakali kubelesya bangelo kukulwaizya akuyumya bantu basyomeka. Icikozyanyo cikonzya kutunjila mumoyo cilajanika kubbuku lya Daniele caandaano 10. Aciindi eeco, Daniele ambweni wakali aamyaka iitandila ku 100. Musinsimi wakalityompedwe kapati, ambweni akaambo kakuti Jerusalemu lyakali tongo alimwi akumuka kuyakululwa kwatempele. Alimwi wakanyongana naakabona cilengaano ciyoosya. (Daniele 10:2, 3, 8) Leza muluyando wakatuma mungelo kuti akamukulwaizye. Ziindi zinji mungelo wakayeezya Daniele kuti wakali “muntu uuyandwa loko” kuli Leza. Ino ncinzi cakatobela? Musinsimi mudaala wakaambila mungelo kuti: “Wandipa inguzu.”—Daniele 10:11, 19.

11. Ino ncikozyanyo nzi comwe citondezya mbuli bangelo mbobakabelesyegwa kusololela mulimo wakukambauka makani mabotu?

¹¹ Alimwi Jehova wakabelesya bangelo kusololela mulimo wakukambauka makani mabotu. Mungelo wakasololela Filipo kukambauka zya Kristo kumuzibe waku Etiopiya, walo wakabbapatizyigwa. (Incito 8:26, 27, 36, 38) Kwiinde buyo mazuba masyoonto, kwakaba kuyanda kwa Leza kuti makani mabotu akambaukwe kuli Bamasi batapaludwe. Mucilengaano, imungelo wakalibonya kuli Korneliyo, muntu uuyoowa Leza alimwi wakamulailila kuti aite mwaapostolo Petro. Basikutumwa kuzwa kuli Korneliyo nobakamujana Petro, bakati: “Korneliyo . . . wakalaililwa angelo uusalala kuti akwiitile kuŋanda yakwe, aswiilile makani kulinduwe.” Petro wakazumina, alimwi Bamasi batapaludwe bakusaanguna bakaba akati kambungano ya Bunakristo. (Incito 10:22, 44-48) Amuyeeye buyo mbomunga mwalimvwa kuzyiba kuti mungelo wamugwasya kujana muntu uuyandika kugwasya!

Lugwasyo Kwiinda Mumuuya Uusalala

12, 13. (a) Ino nkaambo nzi baapostolo ba Jesu ncobakajisi kaambo kabotu kakusyoma kuti muuya uusalala wakali kukonzya kubagwasya? (b) Muunzila nzi muuya uusalala mbuwakabapa nguzu Banakristo bamumwaanda wamyaka wakusaanguna?

¹² Kakusyeede ciindi cisyoonto kuti afwe, Jesu wakasyomezya baapostolo bakwe kuti takabasiyi buyo kakunyina lugwasyo. Bausyi bakali kuyoobapa “Mugwasyi, Muuya Uusalala.” (Johane 14:26) Baapostolo bakalijisi kaambo kabotu ncobakeelede kusyoma kuti muuya uusalala ulakonzya kubagwasya. Kayi Magwalo aakasololelwa amuuya alizwide zitondezyo zyambuli Jehova mbwaakabelesya muuya uusalala, inguzu zitalikomeneni ikugwasya bantu bakwe.

¹³ Muziindi zinji, muuya uusalala wakabelesyegwa kupa nguzu kubantu kuti bacite kuyanda kwa Jehova. Muuya uusalala wakabapa nguzu Babetesi kutegwa bafwutule bana Israyeli. (Babetesi 3:9, 10; 6:34) Nguwenya muuya ooyu nguwakagwasya Banakristo bamumwaanda wamyaka  wakusaanguna kuzumanana kukambauka cabusungu nokuba kuti kwakali kukazyigwa kwiindene-indene. (Incito 1:8; 4:31) Ikuzwidilila kwabo mukukambauka bwakali bumboni buzula bwakubeleka kwamuuya uusalala. Ino ncinzi ciinda waawa cakali kunga catondezya kuti “bantu buyo abatakaiya” balakonzya kumwaya mulumbe wa Bwami munyika yoonse?—Incito 4:13; Ba-Kolose 1:23.

14. Ino Jehova wali kuubelesya buti muuya wakwe uusalala kuti bantu bakwe bamvwisye makani?

¹⁴ Jehova alimwi wakabelesya muuya wakwe uusalala kuti agwasye bantu bakwe kumvwisya makani. Ikwiinda mulugwasyo lwamuuya wa Leza, Josefa wakacikonzya kupandulula ziloto zya Farao zyabusinsimi. (Matalikilo 41:16, 38, 39) Ikwiinda mumuuya wakwe, makanze aa Jehova akayubununwa kubantu balibombya, pele alisisidwe kuli baabo balisumpula. (Matayo 11:25) Aboobo, kujatikizya zintu Jehova nzyapa “abo bamuyanda,” imwaapostolo Paulo wakati: “Pele kulindiswe Leza waayubunuzya Muuya wakwe.” (1 Ba-Korinto 2:7-10) Lyalikke kwiinda mumuuya uusalala, muntu nakonzya kumvwisya luyando lwa Leza.

Lugwasyo Kuzwa ku Jwi lya Leza

15, 16. Ino Joshua wakaambilwa kucita nzi kutegwa acite cabusongo?

¹⁵ Majwi aa Jehova aakasololelwa amuuya “alikondede kukufundisya” alimwi apa babelesi ba Leza kuti ‘balibambe, bazulile kukumana milimo mibotu yoonse.’ (2 Timoteo 3:16, 17) Ibbaibbele lilijisi zitondezyo zinji zikozyanyo zyabantu ba Leza lyansiku mbubakali kugwasyigwa kwiinda muzibeela zya Jwi lyakwe lyakalembedwe kale.

¹⁶ Magwalo akagwasya mukupa busolozi buluzi kubakombi ba Leza. Ciindi Joshua naakapegwa mukuli wakusololela bana Israyeli, wakaambilwa kuti: “Eli ibbuku lyamulao [lyakalembwa a Musa] talyeelede kutantamuka kumulomo wako, pe, uleelede kubika miyeeyo yako kulindilyo lyoonse buyo, isikati amasiku, kuti ubambe kabotu makani oonse aalembedwe mumo, nkaambo kucita obo nkokukonzya kubotya inzila yako akukuletela coolwe.” Amubone kuti Leza tanaakasyomezya Joshua kuti ulamupa busongo munzila yamaleele. Muciindi caboobo, Joshua wakeelede kubala akuzinzibala kuyeeya “ibbuku lyamulao,” eelyo wakali kukonzya kucita zintu cabusongo.—Joshua 1:8; Intembauzyo 1:1-3.

17. Ino mbuti Daniele alimwi a Mwami Josiya mbobakagwasyigwa a Magwalo aakaliko?

¹⁷ Jehova wakabelesya Ijwi lyakwe lilembedwe kuyubununa luyando lwakwe amakanze aakwe. Mucikozyanyo, Daniele wakazyiba kuzwa kumabbuku ngaakalemba Jeremiya bulamfwu bwaciindi Jerusalemu noyakali kunooli tongo. (Jeremiya 25:11; Daniele 9:2) Amuyeeye alimwi cakacitika mubweendelezi bwa Mwami Josiya waku Juda. Aciindi eeco, bantu bakali zandukide kuli Jehova alimwi kulibonya kuti bami bakaalilwa kulemba mabbuku aa Mulawo aabageme akwaatobela. (Deuteronomo 17:18-20) Pele eelyo tempele nolyakali kuyakululwa, “ibbuku lyamulao” lilangilwa kuti lyakalembwa a Musa kumugama, lyakajanika. Ambweni eeli ndebbuku lyakusaanguna kulembwa, ilyakamanizyigwa kulembwa myaka iili 800 musyule kusikila iciindi eeco. Naakamvwa makani aakabalwa mukati, Josiya wakazyiba mbuli bantu mbobakamubisizya Jehova, alimwi mwami wakabweza ntaamu kucita cakalembedwe mubbuku. (2 Bami 22:8; 23:1-7) Cilasalala kuti bantu ba Leza lyansiku bakagwasyigwa a Jwi lya Leza lyakaliko.

Lugwasyo Kuzwa Kubasyomima

18. Nkaambo nzi ncotwaamba kuti Jehova nguugwasya eelyo mukombi wakwe wakasimpe nagwasya uumwi?

¹⁸ Lugwasyo Jehova ndwatupa kanji-kanji luzwa kubasyomima. Mubwini, Leza nguupa lugwasyo ikuti umwi wabakombi bakwe bakasimpe wagwasya mweenzinyina. Nkaambo nzi ncotwaambila boobo? Kuli twaambo tobile. Kakusaanguna, muuya wa Leza uusalala ulijatikizyidwe. Ooyo muuya ulazyala micelo, kubikkilizya aluyando abubotu kuli baabo bayanda kweendelezyegwa anguwo. (Ba-Galatiya 5:22, 23) Aboobo, ikuti umwi wababelesi ba Leza wayanda kugwasya mweenzinyina, eeci ncitondezyo cakuti muuya wa Jehova ulabeleka. Kabili, twakalengwa mucikozyanyo ca Leza. (Matalikilo 1:26) Eeci citondezya kuti tulijisi nguzu zyakutondezya bube bwakwe, ikubikkilizya aluse lwakwe alimwi  aluzyalo. Aboobo kufwumbwa ciindi mubelesi wa Jehova nagwasya uumwi, nkokuti Nkolwazwa kwini lugwasyo nkuuli yooyo uuli acikozyanyo cili mukutondezyegwa.

19. Ikweelana acaamba Bbaibbele, ino mbuti Jehova mbwaakapa bantu lugwasyo kwiinda mubasyominyina?

¹⁹ Muziindi zya Bbaibbele, mbuti Jehova mbwaakapa bantu lugwasyo kwiinda mubasyominyina? Kanji-kanji Jehova wakali kucita kuti omwe wababelesi bakwe ape lulayo kuluumwi mbubwena mbuli Jeremiya mbwaakapa lulayo lufwutula kuli Baruki. (Jeremiya 45:1-5) Muziindi zimwi, bakombi bakasimpe bakali kukulwaizyigwa kupa ziyandika zyakumubili kubasyominyina, mbubonya mbuli Banakristo baku Makedoniya abaku Akaya mbobakayandisyisya kugwasya bakwesu bakabulide ku Jerusalemu. Imwaapostolo Paulo wakaamba kuti buuya buli boobu “buyoocitya kuti bantu balumbe Leza.”—2 Ba-Korinto 9:11.

20, 21. Ino muubukkale buli buti mwaapostolo Paulo mwaakayumizyigwa abakwesu baku Roma?

²⁰ Izibalo zikulwaizya kapati nzyeezyo zyababelesi ba Jehova mbuli mbobakasolekesya kuyumizyanya alimwi akukulwaizyanya. Amulange-lange cikozyanyo cijatikizya mwaapostolo Paulo. Naakali kuunka ku Roma kali mwaange, Paulo wakainda mumugwagwa waku Roma wakali kwiitwa kuti Appian Way. Cibeela camamanino calweendo cakajisi buyumuyumu nkaambo basilweendo bakali kuyandika kwiinda mubusena bwamantolo naa bukkalila maanzi lyoonse. * Bakwesu mumbungano yaku Roma bakalizyi kuti Paulo ulaboola. Ino bakacita nzi? Sena bakalindila kabakkede kabotu mumaanda aabo mumunzi kusikila Paulo wasika bamane nobakaboola kuzyoomwaanzya?

²¹ Mulembi wa Bbaibbele Luka, iwakali a Paulo mulweendo oolo, ulatwaambila cakacitika: “Akwalo oko [ku Roma] babunyina nobakatumvwa, bakazootucinga, mane basika ku-Ibbuwa lya–Apiyo aku-maanda Otatwe.” Sena inga mwaceezyeezya eeci? Mbobakazyi kuti Paulo ulaboola,  bakwesu bakeenda kuzwa ku Roma kuyoomucinga. Bamwi bakwesu bakali kulindila ku Musika waku Apiyo, busena bwakulyookezezya bwakadumide bujisi musinzo wamakkilomita aatandila ku 74 kunze aa Roma. Bamwi bakali kulindila abusena buuzilwa bukoko, busena bwakulyookezezya bwamusinzo wamakkilomita aasika ku 58 kuzwa mumunzi. Ino Paulo wakalimvwa buti? Luka waamba kuti: “Paulo ababone buyo, walumba Leza, wakalika moyo.” (Incito 28:15) Amuyeeye buyo, ikubona buyo bakwesu bakalisungula kweenda musinzo ooyo mulamfwu cakamuyumya alimwi akumuumbulizya Paulo! Alimwi ino nguni Paulo ngwaakalumba kulugwasyo oolu? Wakalumba ooyo uulupa, Jehova Leza.

22. Ino lugwalo lwamwaka wa 2005 ndwakuti nzi, alimwi ino ncinzi citiibandikwe mucibalo citobela?

²² Cakutadooneka, nzyaakacita Leza izilembedwe mu Bbaibbele zilatondezya kuti Jehova mmugwasyi. Mmugwasyi uutakonzyi kweelana amuntu uumbi. Cakweelela, Bakamboni ba Jehova babelesyede majwi aaku Intembauzyo 121:2 kuba lugwalo lwamwaka wa 2005 aakuti: “Lugwasyo lwangu lulazwa kuli-Jehova.” Pele ino mbuti Jehova mbwatugwasya mazubaano? Eeci cilabandikwa mucibalo citobela.

Bupanduluzi buyungizidwe

Sena Muciyeeyede?

Ino muunzila nzi Jehova mbwaakapa lugwasyo—

• kwiinda mubangelo?

• kwiinda mumuuya wakwe uusalala?

• kwiinda mu Jwi lyakwe lyakasololelwa amuuya?

• kwiinda mubasyomima?

[Mibuzyo yaciiyo]

Majwi aakwelelezya sikubala aali apeeji 10]

Lugwalo lwamwaka wa 2005 ndwakuti: “Lugwasyo lwangu lulazwa kuli-Jehova.”—Intembauzyo 121:2.

[Cifwanikiso icili apeeji 12]

Paulo wakalumba Leza kulugwasyo ndwaakatambula kubakwesu baku Roma