Ikuyandaula “Ingale Injandisi Loko” Mazubaano
Ikuyandaula “Ingale Injandisi Loko” Mazubaano
“Makani Mabotu aa-Bwami azookambaukwa munyika yoonse kuti abe citondezyo kumisyobo yoonse.”—MATAYO 24:14.
1, 2. (a) Mbuti iba Juda muciindi ca Jesu mbobakalimvwa kujatikizya Bwami bwa Leza? (b) Ncinzi Jesu ncaakacita kutegwa agwasye bantu kumvwisya Bwami, alimwi ncinzi cakatobela?
BWAMI bwa Leza ngaakali makani mapati kuba Juda ciindi Jesu naakaboola anyika. (Matayo 3:1, 2; 4:23-25; Johane 1:49) Nokuba boobo, kukusaanguna banji tiibakalizi mbobwakali kuyooyendelezya alimwi anguzu zyabweendelezi mbozyakali kuyooba; tiibakalizi kuti yakali kuyooba mfwulumende yakujulu. (Johane 3:1-5) Nobaba bamwi bakazyi kuba basikumutobela Jesu tiibakamvwisya kabotu Bwami bwa Leza ncobwakali kwaamba naa ncobakeelede kucita kutegwa bapegwe zilongezyo zyakuba basikulelanyina ba Kristo.—Matayo 20:20-22; Luka 19:11; Incito 1:6.
2 Nokwakainda ciindi, Jesu cakukkazyika moyo wakayiisya basikwiiya bakwe ziiyo zinji kubikkilizya acikozyanyo cangale njandisi loko yakalangwa-langwa mucibalo cainda, kabaambila mbociyandika kusolekesya kuyandaula Bwami bwakujulu. (Matayo 6:33; 13:45, 46; Luka 13:23, 24) Eeci ceelede kuti cakabakulwaizya kapati nkaambo bakazumanana kuba basicamba mukwaamba makani mabotu aa Bwami mucisi coonse, calo ibbuku lya Incito ncolicitila bumboni bunji.—Incito 1:8; Kolose 1:23.
3. Kweelena amazuba eesu, ncinzi Jesu ncaakaamba kujatikizya Bwami?
3 Ino mbuti mazubaano? Zilongezyo zyaparadaiso yaanyika mubweendelezi bwabwami zilakambaukwa kubantu banji. Mubusinsimi bwakwe buyandika kapati bujatikizya “mamanino aaciindi,” Jesu lwakwe wakati: “Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Matayo 24:3, 14; Marko 13:10) Alimwi wakapandulula kuti mulimo ooyu mupati weelede kucitwa nokuba kuti kuli mampindamangobe naa makatazyo, nokuba kupenzyegwa buya. Nokuba boobo, wakapa cisyomezyo eeci: “Oyo uuliyumya kusikila kumamanino uzoofutuka.” (Matayo 24:9-13) Eezi zyoonse ziyanda muuya wakulyaaba mbuli wakatondezyegwa amusambazi wamucikozyanyo ca Jesu. Sena kuli bantu mazubaano batondezya lusyomo alimwi abusungu buli boobu mukuyandaula Bwami?
Lukkomano lwa Kuziba Kasimpe
4. Ino kasimpe ka Bwami kabajatikizya buti bantu mazubaano?
4 Musambazi wamucikozyanyo ca Jesu wakakkomana naakajana ncaakabona kuti ‘ningale injandisi loko.’ Lukkomano oolo lwakamupa kucita nzyaakali kukonzya kutegwa ajane ngale eeyo. (Ba-Hebrayo 12:1) Mazubaano, kasimpe kujatikizya Leza alimwi a Bwami bwakwe zyabakwelelezya akubakulwaizya bantu. Eeci cituyeezya kaambo kamwi ka Mukwesu A. H. Macmillan wakalemba kujatikizya mbwaakali kuyandaula Leza alimwi amakanze aakwe kubantu mubbuku lyakwe lyakuti Faith on the March. Wakati: “Ncondajana bantu banji bacicijana amwaka. Alimwi mbantu bali mbuli ndinywe andime, nkaambo bazwa kuzisi zyoonse, mumisyobo yoonse, mubukkale alimwi mbamisela yoonse. Kasimpe takasali. Kalakwelelezya bantu bamisyobo yoonse.”
5. Zinzi zyakacitika zibotu zilibonya mulipooti yamulimo yamu 2004?
5 Kasimpe kamajwi aayo kalalibonya amwaka ciindi myaanda yazyuulu zili mbozibede zyabantu babombemyoyo nobakulwaizyigwa amakani mabotu aa Bwami bwa Leza, nobaaba buumi bwabo kuli Jehova alimwi akucita kuyanda kwakwe. Mwaka wamulimo wamu 2004, wakatalika mu September 2003 kusikila mu August 2004, awalo ulijatikizyidwe. Mumyezi eeyo iili 12, bantu bali 262,416 caantangalala bakatondezya kulyaaba kwabo kuli Jehova kwiinda mukubbapatizyigwa mumeenda. Eeci cakatola busena mumasi aali 235, oomo Bakamboni ba Jehova mobeendelezya ziiyo zya Bbaibbele zyaaŋanda zili 6,085,387 amvwiki kutegwa bagwasye bantu bazwa kuzisi zyoonse akumisyobo yoonse akumikowa yoonse akumyaambo yoonse, kwiiya kasimpe kazwa mu Jwi lya Leza.—Ciyubunuzyo 7:9.
6. Ino ncinzi cipa kuti kube kuyungizyika kuzumanana kwamyaka iili mbwiibede?
6 Ncinzi cakapa kuti zyoonse eezi zicitike? Kakunyina akudooneka Jehova nguukwelelezya bantu beelela kuli nguwe. (Johane 6:65; Incito 13:48) Nokuba boobo, citeelede kutolwa aansi mmuuya wakutaliyanda alimwi akusolekesya kwabaabo ibalyaabide kuyandaula Bwami. Naakali amyaka iili 79, Mukwesu Macmillan wakalemba kuti: “Kuzwa ciindi cakusaanguna nindakayiya kujatikizya zisyomezyo zyakaambwa kuli baabo baciswa alimwi abantu bafwide, bulangizi bwangu mumulumbe wakayubununwa mu Bbaibbele tiibwakamana. Kuciindi eeco ndakali kuyandisya kuziba zinji kujatikizya Bbaibbele ncoliyiisya kutegwa ndicikonzye kugwasya bamwi bali mbuli ndime bayandaula luzibo kujatikizya Leza Singuzuzyoonse, Jehova alimwi amakanze aakwe kubantu.”
7. Ncakuluula cili buti citondezya lukkomano alimwi akuyandisya kwabaabo bajana kasimpe kamu Bbaibbele?
7 Muuya ooyo wakuyandisya ulalibonya akati kababelesi ba Jehova mazubaano. Amubone cikozyanyo ca Daniela waku Austria, Vienna. Wakaamba kuti: “Kuzwa kubwana, Leza ngowali mulongwe wangu mubotu. Lyoonse ndakali kuyandisya kuziba zina lyakwe nkaambo ndakali kuyeeya kuti ‘Leza’ taponi. Pele ndakalindila kusikila nindakali amyaka iili 17, Bakamboni ba Jehova nibakasika kuŋanda yangu. Bakapandulula zyoonse nzyondakali kuyanda kuziba kujatikizya Leza. Aboobo ndakakajana kasimpe alimwi kakali kukkomanisya! Ndakali kkomenyi cakuti ndakatalika kukambauka kumuntu uli woonse.” Kukkomana nkwaakajisi kwakamupa kusekwa abeenzinyina kucikolo. Daniela wakazumanana kati, “Ndakali kubona kuti businsimi bwamu Bbaibbele buli mukuzuzikizyigwa, akaambo kakuti ndakayiya kuti Jesu wakaamba kuti basikumutobela bakwe bayoosulwa alimwi akupenzyegwa akaambo kazina lyakwe. Ndakali kkomene alimwi akugambwa.” Tiikwakainda ciindi cilamfwu Daniela wakaaba buumi bwakwe kuli Jehova, wakabbapatizyigwa alimwi wakatalika kuyandaula mbwakonzya kuzuzikizya mbaakani yakwe yakuba mumulimo wabumisyinali. Naakamana kukwatwa, Daniela antoomwe amulumi wakwe Helmut bakatalika kukambauka akati kabantu bamu Afulika, kuba Chinese, kuba Filipino alimwi abantu baku India ku Vienna. Daniela a Helmut mbaamamisyinali kumusanza lwaambo kwa Afulika.
Tabajoki Munsi
8. Ninzila nzi igwasya yomwe banji mobatondezya luyando lwabo kuli Leza alimwi akusyomeka ku Bwami?
8 Masimpe, mulimo wabumisyinali ngomulimo umwi bantu ba Jehova mazubaano ngobatondezyela luyando lwabo kuli Leza alimwi akusyomeka ku Bwami bwakwe. Mbuli musambazi mucikozyanyo ca Jesu, aabo bali mumulimo ooyu balilisungude kweenda kumasena aali kulamfwu akaambo ka Bwami. Masimpe ngakuti, aaba bamisyinali tabaunki kukuyandaula makani mabotu a Bwami; baatola buya kubantu bakkala muminzi iili kulamfwu, kubayiisya alimwi akubagwasya kuba basikwiiya ba Jesu Kristo. (Matayo 28:19, 20) Mumasi manji, balaliyumya mumakatazyo manji. Pele kuliyumya kwabo kulalongezyegwa kapati.
9, 10. Zyakuluula nzi nzyobajisi bamamisyinali mumasena aakulamfwu mbuli ku Central African Republic?
9 Cikozyanyo comwe ncaku Central African Republic, kwalo mwaka wamana bantu bakajanika ku Ciibalusyo calufwu lwa Kristo bakali 16,184, kwiinda ziindi zili ciloba amweelwe wabasikumwaya ba Bwami bamucisi eeco. Mbwaanga zibeela zinji zyamucisi eeco zinyina magesi, bantu kanji-kanji milimo yabo baicitila anze mucimvwiide cacisamu. Aboobo cileelela kuli bamisyinali kucita mulimo wabo anze abalo, kweendelezya ziiyo zya Bbaibbele anze mucimvwiide cacisamu. Takuli buyo kuti nkaambo anze alasalala akutontola, pele kuli abumwi bubotu buliko. Bantu balalilumbaizya Bbaibbele, alimwi kubandika makani aajatikizya zyacikombelo kulidumide mbuli kubandika makani aazisobana naa mbokwaca. Kanji-kanji bayinda munzila balabona citola busena, eelyo abalo balaliwaalila muciiyo.
10 Aboobo, misyinali omwe naakali kweendelezya ciiyo ca Bbaibbele anze, musankwa umwi wakali kukkala kutala kwanzila wakaboola akwaamba kuti akaambo kakuti tanakaswaigwa, wakali kuyanda kuti misyinali akamuswaye kutegwa akayiye anguwe Bbaibbele. Masimpe ngakuti, misyinali wakakkomana kucita mbwaakaambilwa alimwi musankwa ooyo wayaambele cakufwambaana. Mucisi eeco, ba silikani kanji-kanji balaakubaimika Bakamboni mumugwagwa, ikutali kuti babape mulandu, pele kubabuzya zyamamagazini mapya aa Ngazi Yamulindizi a Awake!, naa kubalumba akaambo kamagazini imwi njobakakkomanina.
11. Nokuba kuti kuli masunko, mbuti bamisyinali babeleka kwaciindi cilamfwu mbobalimvwa kujatikizya mulimo wabo?
11 Ibunji bwabaabo bakatalika mulimo wabumisyinali myaka iili 40 naa 50 yainda bacibeleka cakusyomeka mumulimo wamumuunda. Elo kaka ncikozyanyo cibotu kuli ndiswe toonse cakusyomeka akuzumanana! Kwamyaka 42 yainda, banabukwetene bamwi bakabeleka antoomwe kabali bamisyinali muzisi zyotatwe ziindene-indene. Mulumi waamba kuti: “Kwali mapenzi. Mucikozyanyo, twakali kuciswa bulwazi bwantuntumaanzi kwamyaka iili 35. Pesi, kunyina nitutyompwa akaambo kakusala kwesu kwakuba bamisyinali.” Mukaintu wakwe wakayungizya kuti: “Lyoonse kwali zintu zinji nzyotulumba kapati. Mulimo wamumuunda watupa lukkomano alimwi ncuubauba kutalisya ziiyo zya Bbaibbele. Notubona basikwiiya nobaboola kumiswaangano alimwi akuzibana aumwi, cili mbuli mukwasyi uuli antoomwe ciindi coonse.”
‘Zintu Zyoonse Baziyeeya Mbuli Zintu Zyabuyo’
12. Mbuti muntu mbwatondezya kuti ulazikkomanina kapati zintu ziyandika zya Bwami?
12 Musambazi naakajana ngale njandisi loko, “wakainka, wakaulisya zyoonse nzyaakajisi, wiiula.” (Matayo 13:46) Ikulisungula kuleka zintu nzyobabona kuti zilayandika, mbube bwabaabo bazikkomanina zintu ziyandika zya Bwami. Mbwali umwi iwakajisi bulangizi bwakuba a Kristo mubulemu bwa Bwami, imwaapostolo Paulo wakaamba kuti: “Zintu zyoonse ndaziyeeya mbuli zintu zyabuyo nkaambo kacintu eci ciinda loko kubota cakuziba Jesu Kristo Mwami wangu. Nkaambo kanguwe nkindakalekela zintu zyoonse, ndaziyeeya kuti masifwisifwi buyo mukuyanda kuti njane Kristo.”—Ba-Filipi 3:8.
13. Mbuti muntu omwe mucisi ca Czech Republic mbwaakatondezya luyando lwakwe ku Bwami?
13 Munzila njiyona eeyi, banji mazubaano balalisungula kucinca mubuumi bwabo kutegwa bajane zilongezyo zya Bwami. Mucikozyanyo, mu October 2003, mupati wacikolo umwi wamyaka yakuzyalwa iili 60 kucikolo caku Czech Republic wakajana ibbuku libelesyegwa kwiiya Bbaibbele lya Luzibo Lutola Kubuumi Butamani. Nakamana kulibala, cakufwaambana wakayandaula Bakamboni ba Jehova mucilawo mwakali kukkala kutegwa abe aciiyo ca Bbaibbele. Wakayaambele kumuuya alimwi wakatalika kujanika kumiswaangano yoonse. Aboobo, ino mbuti muzeezo wakwe wakuyanda kuba mweendelezi wadolopo alimwi akusoleka kuyandaula ziyandika kutegwa akasalwe kuba umwi wabasikubamba milawo? Wakasala kunjila mulimo uumbi—kali sikwaambilizya Bwami. Wakaamba kuti: “Ndakali kukonzya kumwaya mabbuku apandulula Bbaibbele kuli basicikolo bangu.” Wakatondezya kulyaaba kwakwe kuli Jehova kwiinda mukubbapatizyigwa mumeenda amuswaangano wacooko mu July 2004.
14. (a) Ino makani mabotu aa Bwami akulwaizya tuulunzuma twabantu kucita nzi? (b) Mmibuzyo nzi iipa kuyeeya umwi aumwi wesu njakonzya kulibuzya?
14 Tuulunzuma twabantu nyika yoonse baatambula makani mabotu aa Bwami munzila njeena. Bakazwa munyika mbyaabi, bakasamununa buntu bwakaindi, bakabasiya balongwe babo bakaindi alimwi bakacileka kuyandaula zintu zyamunyika. (Johane 15:19; Ba-Efeso 4:22-24; Jakobo 4:4; 1 Johane 2:15-17) Ino nkaambo nzi ncobacitila zyoonse eezyi? Nkaambo balazibikkila maano zilongezyo zya Bwami bwa Leza kwiinda zyoonse nzyobakonzya kujana mubukkale bwasunu. Sena mbomulimvwa andinywe kujatikizya makani mabotu aa Bwami? Sena mulakulwaizyigwa ikucinca kutegwa bukkale bwanu, nzyomuyandisya alimwi ambaakani zyanu zyeendelane anzyayanda Jehova? Ikucita boobo kuyoomuletela zilongezyo zinji lino alimwi akumbele.
Ibutebuzi Buya Kumamanino
15. Ncinzi cakasinsimwa kuti ciyoocitwa abantu ba Leza kumazuba aakumamanino?
15 Sintembauzyo wakalemba kuti: “Bantu bako [banooyoolyaabide ncobeni, BT] . . . mubuzuba bwalumamba lwako.” Akati kabaabo ibalyaabide kuli “balombe . . . bali mbuli malosi aalume” alimwi a “nkamu impati” ‘yabanakazi bakanana makani mabotu.’ (Intembauzyo 68:11; 110:3) Ino ncinzi cacitika akaambo kabunkutwe alimwi akulyaaba kwabantu ba Jehova—ibaalumi abanakazi, bana abapati—kumazubaano aakumamanino?
16. Amupe cikozyanyo mbuli babelesi ba Leza mbobasoleka ikugwasya bamwi kwiiya makani aa Bwami.
16 Imupainiya naa sikwaambilizya Bwami waciindi coonse ku India wakalilibilikide kujatikizya bantu bainda kutuulunzuma tobilo basinke matwi bamucisi eeco mbobakali kuyoogwasyigwa kwiiya makani aa Bwami. (Isaya 35:5) Wakasala kunjila cikolo kutegwa aiye mwaambo wakutambaika. Ooko wakacikonzya kwaambila basinke matwi banji zyabulangizi bwa Bwami alimwi nkamu zyaziiyo zya Bbaibbele zyakatalisyigwa. Mumvwiki buyo zisyoonto, ibantu bainda kukkumi abobile bakatalika kuboola kumiswaangano ku Ŋanda ya Bwami. Nokwakainda ciindi, kupobwe lyabwiinga, imupainiya ooyu wakayaanya mulombwana musinke matwi wakazwa ku Calcutta walo wakajisi mibuzyo minji alimwi wakali kuyandisya kapati ikuzyiba zinji kujatikizya Jehova. Nokuba boobo, kwakali penzi limwi. Imulombwana ooyo wakali kulangilwa kupiluka ku Calcutta, imunzi uulampa makkilomita aali 1,600 kuzwa kooko, kuyootalika cikolo alimwi kwakanyina Bakamboni ibakazyi mwaambo wakutambaika. Cakusolekesya, wakabakombelezya bausyi kuti bamuzumizye kuya kucikolo cili ku Bangalore kutegwa akazumanane kwiiya Bbaibbele. Wakayaambele kumuuya alimwi nokwainda mwaka omwe, wakaaba buumi bwakwe kuli Jehova. Awalo wakayiisya Bbaibbele bantu basinke matwi bali mbobabede kubikkilizya amweenzinyina ngocakali kukomena limwi. Ofesi lyamutabi ku India lino lilalibambila kuti bapainiya batalike kwiiya mwaambo wakutambaika kutegwa bakagwasyilizye mumulimo ooyo.
17. Amwaambe cimukulwaizya kapati kujatikizya lipooti yamwaka wamulimo wa 2004 iili amapeeji 21 kusika ku 24.
17 Apeeji 21 kusika ku 24 mumagazini iino, mulajana lipooti yanyika yoonse yamulimo wamumuunda wa Bakamboni ba Jehova wamwaka wamulimo wa 2004. Amwiilange-lange kwakaindi kali mbokabede, mulibonene ibumboni bwakuti bantu ba Jehova nyika yoonse mbasungu kukuyandaula “ingale injandisi loko” mazubaano.
Amuzumanane ‘Kuyandaula Bwami Kusaanguna’
18. Makani nzi Jesu ngaatakabikkilizya mucikozyanyo camusambazi sikuyandaula ngale, alimwi nkaambo nzi?
18 Ikuti twacilanga-langa alimwi cikozyanyo ca Jesu camusambazi uuyandaula ngale, tujana kuti Jesu tanaakaamba cili coonse kujatikizya musambazi mbwaakali kuyoojana nzyayandika mubuumi naakamana kuulisya zyoonse nzyaakajisi. Masimpe, ibamwi inga babuzya kuti: ‘Mbuti musambazi mbwaakali kuyoojana cakulya, zyakusama alimwi aakoona nkaambo lino wakanyina cili coonse cakaceede? Ino yakali kuyoomugwasya nzi ingale mbotu eeyo?’ Eeyo mibuzyo mibotu naa yabonwa munzila yakumubili. Pele sena Jesu tanaakakulwaizya basikwiiya bakwe kuti: “Amusaangune kuyandaula Bwami bwa-Leza abululami bwakwe, elyo zintu ezi zyoonse mulaziyungizizigwa azyalo”? (Matayo 6:31-33) Ikaambo kapati mucikozyanyo eeco kakali kutondezya mbociyandika kulyaaba cakumaninina kuli Leza alimwi akusungwaalila Bwami. Sena kuli ncotukonzya kwiiya aawa swebo?
19. Nciiyo nzi cipati ncotunga twaiya kucikozyanyo ca Jesu cangale njandisi?
19 Kufwumbwa naa twaazyiba lino makani mabotu aakondelezya, antela twali kuyandaula Bwami akwaambila bamwi kujatikizya zilongezyo kwaciindi cilamfwu, tweelede kuzumanana kubikkila maano ku Bwami. Ecino nciindi cikatazya, pele tulijisi twaambo tubotu tutupa kuba alusyomo lwakuti nzyotuyandaula nkozili ncobeni alimwi tazikonzyi kweezyanisyigwa acintu cili coonse—mbuli ingale musambazi njaakajana. Zintu zicitika munyika alimwi abusinsimi bwamu Bbaibbele zipa bumboni bumvwika bwakuti tupona ‘kuciindi camamanino.’ (Matayo 24:3) Mbubwenya mbuli musambazi sikuyandaula ngale, atusungwaalile Bwami bwa Leza akukondwa kuba acoolwe cakwaambilizya makani mabotu.—Intembauzyo 9:1, 2.
Sena Muciyeeyede?
• Kwamyaka minji yainda, ino ncinzi cipa kuti kube kuyungizyigwa akati kabakombi bakasimpe?
• Mmuuya uli buti uulibonya kuli baabo babeleka kabali bamisyinali?
• Nkucinca kuli buti bamwi nkobacita akaambo kamakani mabotu aa Bwami?
• Nciiyo nzi ncotukozya kwiiya kuzwa kucikozyanyo ca Jesu cangale njandisi?
[Mibuzyo yaciiyo]
[Cifwanikiso icili apeeji 26]
Mbuli musambazi, bamisyinali mazubaano balilongezyedwe kapati
[Cifwanikiso icili apeeji 27]
‘Bantu bako bayoolyaaba cakuliyandila’