Impindu Zijanwa Akaambo Kakubamba Luumuno

EDWARD wakali kulangilwa kufwa, alimwi Bill wakali musulide. Myaka iili makumi obile musule, kusala kwa Edward kwakapa kuti Bill azwe mulimo, eelyo eeci cakapa kuti aaba ibakali balongwe baandaane. Lino Edward wakasola kulilekelela kutegwa afwe muluumuno. Pele, walo Bill, wakakaka kumuswiilila.

Kakwiindide myaka iitandila ku 30 ciindi lufwu lwa Bill nolwakalondelela, Bill wakapandulula cakamupa kutamulekelela. Mboobu mbwakaamba: “Edward tanaakeelede kucita obuya kumulongwe wakwe ngwayandisya kapati. Nokuba kuti kwaliindide myaka iili makumi obile, tiindakali kuyanda kuyanzana anguwe alimwi. . . . Ndiza ndakalilubizyide, pele oobo mbondakalimvwa.” *

Mazwanga akati kabantu talili lyoonse naaba amamanino mabi ali boobo pe, pele bunji bwaziindi apa kuti bantu bacaale kabalimvwa bubi antela kumvwa moyo kucisa. Amuyeeye buyo muntu uuli muciimo ca Edward. Eelyo nayeeya kuti kusala kwakwe nkokwaatalisya penzi, muntu uuli boobo inga kapona kumwi kajisi manjezeezya amukataazya alimwi akulimvwa kusweekelwa kapati.  Nokuba boobo, ulamvwa moyo kucisa eelyo nayeeya mweenzinyina ngwabisizya mbwaanga waile kucimana cilongwe mbuli cintu cinyina mpindu.

Kulubazu lumwi, umwi ujisi muzeezo mbuli wa Bill, inga ulibona kuti walo unyina mulandu eelyo inga kacimidwe kapati. Mukuyeeya kwakwe, mweenzinyina tanaakacita kabotu alimwi ambweni wakatalisya penzi acaali. Bunji bwaziindi, ciindi nokuli kutamvwana akati kabantu bobile, umwi aumwi inga uyeeya kuti walo uliluzi eelyo mweenzinyina nguujisi mulandu. Aboobo bantu ibakali balongwe balakonzya kuzwangana.

Ciindi nobalwana nkondo yabo njakaumuumu, nkukuti umwi abona kuti mweenzinyina ulaboola kumbele, ulaleya akwiinda nzila imbi alimwi tababikkilani maano ciindi nobaswaangana munkamu. Balalangana alaale cakusulana. Ciindi nobaambaula, balavwiila cabukali nokuba kubelesya matusi alo ayasa mbuli cipeni.

Pele, nokuba kuti balibonya kube tabeendelani, kuli twaambo tumwi ntobazuminana. Boonse inga kabazumina kuti bali amapenzi mapati alimwi akuti kumanya cilongwe ncintu cuusisya. Boonse bobile balangilwa kuti balamvwa moyo kucisa kwalo kuyaabwiindila, alimwi balizyi kuti cimwi cintu ceelede kucitwa kutegwa kulimvwa bubi ooku kumane. Pele ino nguni utiisaangune kubweza ntaamu yakubambulula cilongwe alimwi akubamba luumuno? Kunyina ulibambide.

Myaka iili zyuulu zyobile yainda, baapostolo ba Jesu Kristo ziindi zimwi bakali kukazyanya cabukali. (Marko 10:35-41; Luka 9:46; 22:24) Nobakamana kuzwangana aciindi cimwi, Jesu wakabuzya kuti: “Ino mwali kukazyanya nzi munzila?” Kabafwide nsoni, kunyina naaba omwe wakaingula. (Maako 9:33, 34, Ci) Injiisyo zya Jesu zyaabagwasya kubamba twaambo twabo. Lulayo lwakwe, alimwi alwabasikwiiya bakwe bamwi, lwazumanana kugwasya bantu kumana mazwanga alimwi akubambulula zilongwe. Nkooko lino atubone mbobacikonzya kucita oobo.

Amusole Kubamba Luumuno

“Nseyandi kwaambaula amuntu ulya pe. Nseyandi kumubona amwainda.” Ikuti kuli nomwakaambide majwi ali boobo kujatikizya muntu umwi, mweelede kubweza ntaamu, mbuli mbokutondezyedwe mucibalo citobela camu Bbaibbele.

Jesu wakayiisya kuti: “Nkaambo kaako kuti koli mukutuula cipo cako acipaililo, nkabela awo waibulukwa kuti munyoko ulijisi kaambo kulindiwe, usie cipo cako nkukonya oko kunembo lyacipaililo, uye, ukasaangune kuyanzana amunyoko.” (Matayo 5:23, 24) Alimwi wakaamba kuti: “Kuti munyoko wakubisizya, uye umwaanze alike.” (Matayo 18:15) Kufwumbwa naa ndinywe mwabisizya umwi antela umwi wamubisizya, majwi a Jesu akankayizya kaambo kakuti muyandika kwaabandika makani aayo cakufwambaana amuntu ooyo. Mweelede kucita oobo ‘amoyo uubombede.’ (Ba-Galatiya 6:1) Makanze aamubandi ooyo, teensi akuti nywebo mulibotye-botye kwiinda mukululamika micito njimwakacita naa kuti mumusinikizye sinkondonyoko kuti alilekelele, pele ngakuti mubambe luumuno. Sena oolu lulayo lwamu Bbaibbele lulagwasya?

Enerst ngukapitawu mu ofesi mpati. * Kwamyaka minji mulimo wakwe wali kujatikizya kulanganya makani aalangilwa kukalazya abantu basiyene-siyene alimwi akubona kuti ulabeleka ambabo kabotu-kabotu. Walibonena mbocili cuuba-uba bantu kutalisya mazwanga akati kabo. Wakati: “Ziindi zimwi tandimvwani abantu bamwi. Pele eeci nocicitika, ndilakkala ansi amuntu ooyo akubandika penzi eelyo. Amubagame. Amubandike camulomo mpande, kamujisi mbaakani yakubamba luumuno. Eeci cilagwasya lyoonse.”

 Alicia uujisi balongwe bazwa mubukkale busiyene-siyene waamba kuti: “Ziindi zimwi inga ndaamba cintu cimwi, kumane ndilabona kuti ambweni kuli ngondanyemya. Ndilaunka kumuntu ooyo akulilekelela kulinguwe. Inga ndalilekelela ziindi zinji nokuba kuti takuyandiki kucita oobo nkaambo nokuba kuti tiindamunyemya, ndilakatalukwa ndacita oobo. Nondeenda ndilizyi kuti kunyina ngonditamvwani awalo.”

Kugusya Zisinkilizyo

Nokuba boobo, nzila iisololela kukubamba luumuno nokuli mazwanga ajatikizya bantu bobile kanji-kanji ilijisi zisinkilizyo. Sena kuli nomwakaambide kuti: “Nkaambo nzi ncondeelede kutalika ndime kubamba luumuno? Walo ngowakalitalisya penzi.” Antela sena kuli nomwakaunkide kukumana kaambo amuntu umwi eelyo mwaakumvwa muntu ooyo nkwaingula kuti: “kunyina ncondinga ndaambaula andiwe”? Bantu bamwi inga baamba boobo akaambo kakucisa kwamoyo nkobamvwide. Tusimpi 18:19 yaamba kuti: “Uugwasigwa munyina uli mbuli munzi muyumu, pele kukazyanya kuli mbuli impanda zyangazi.” Aboobo tweelede kubikkila maano mbwalimvwa umwi. Ikuti wakaka, amuleke kwiinde kaindi kasyoonto mpoonya amusole alimwi. Ndiza “munzi muyumu” inga kaujukide alimwi “impanda” inga zyagusyigwa kumulyango kutegwa muyanzane.

Acimbi cisinkilizyo kukubamba luumuno nkuyoowa kusampuka. Bantu bamwi, kulilekelela nokuba kwaambaula asinkondonyina bakubona kuti nkusampuka. Cililuzi kuyoowa kusampuka, pele sena kukaka kubamba luumuno nkokusumpula muntu naa nkokumusampuzya? Sena mubwini ooku kuyoowa kusampuka tacili citondezyo cakulisumpula?

Sikulemba Bbaibbele Jakobo utondezya kuti muuya wakukazyanya kuli mbouswaangene akulisumpula. Amane kwaamba “inkondo” alimwi “amaambani” zyalo Banakristo bamwi nzyobalwana mulicabo, wazumanana kwaamba kuti: “Leza ulabakazya basikulisumpula, pele batete-myoyo ulabapa luzyalo.” (Jakobo 4:1-3, 6) Ino mbuti kulisumpula mbokusinkila kubamba luumuno?

Kulisumpula kuleena bantu, kubapa kuyeeya kuti balo bali kabotu kwiinda bamwi. Aabo balisumpula bayeeya kuti balaangulukide kubeteka bamwi ikuti baliluzi naa pe. Munzila nzi? Ciindi kutamvwana nokutalika, kanji-kanji babona baabo mbobatamvwani ambabo kuba bantu batalangilwi kucinca. Kulisumpula kupa bantu bamwi kubona aabo mbobaimpana ambabo kuti kunyina mbobabede aboobo tabeelede kulilekelela kuli mbabo. Aboobo, aabo balisumpula lwabo beni kanji-kanji balekela mazwanga kuzumanana muciindi cakwaamana kabotu.

Mbubwenya mbuli cisinkilizyo mbocisinkila mootokala mumugwagwa, kulisumpula ziindi zinji nkokulesya ntaamu zisololela kuluumuno. Aboobo ikuti kamukaka kubamba luumuno amuntu, ambweni cili boobo akaambo kakulisumpula. Mbuti mbomunga mwaleka kulisumpula? Kwiinda mukulibombya.

Amulibombye

Kulibombya kulakulwaizyigwa kapati mu Bbaibbele. “Kulibombya akuyoowa Jehova kulaleta buvubi abulemu abuumi.” (Tusimpi 22:4) Ku Intembauzyo 138:6, tubala mbwababona Leza bantu balibombya alimwi abalisumpula kuti: “Jehova ulisumpukide, nekubaboobo ulibabwene abaniini, pele basikamikami ulibezi nibacili kule.”

Bantu banji beelanya kulibombya akukompama. Oobu kube mbobayeeya baleli bazisi. Nokuba kuti masi oonse alatobela kuyanda kwabo, basololi batwaambo twacisi banyina camba cakulibombya kuti bazumine kulubizya kwabo. Kumvwa buyo muleli nkwaamba kuti, “ndakalubizya” mmakani afwambaana kumwayigwa muli sikapepele. Ciindi umwi iwakali wabalupati-pati mufwulumende naakalilekelela akaambo kakujatikizyigwa mumucito wakaleta ntenda, majwi aakwe akaba ngomutwe wamakani.

Kulibombya mbube bwakulicesya naa kulifwinsya, ibube bwakutalisumpula. Aboobo kulibombya caamba mbwalibona muntu kutali mbobamuyeeyela bamwi. Muntu nazumina kulubizya kwakwe cakulibombya akulomba kulekelelwa camoyo woonse tacimupi kusampuka, muciindi caboobo cimupa kuba ampuwo mbotu. Ibbaibbele lyaamba kuti: “Lunyonyooko kalutana kusika, moyo wamuntu ulalisumpula; pele kulibombya kulazulwida bulemu.”—Tusimpi 18:12.

 Kujatikizya basitwaambo twacisi batalilekeleli nobalubizya, mwiiyi umwi wakaamba kuti: “Mukubula coolwe baboneka kube bayeeya kuti ikuzumina kulubizya kuli boobo ncitondezyo cakukompama. Bantu bakompeme alimwi balibilika kunyina nobaamba kuti, ‘Amundijatile.’ Bantu basicamba mbabatasampuki nobaamba kuti, ‘Ndakalubizya.’” Oobu mbocibede akuli baabo batali basitwaambo twacisi. Ikuti mwasoleka kapati kulibombya muciindi cakulisumpula, ikubamba luumuno nomujatikizyidwe mukutamvwana kulalangilwa kuzwidilila. Amulange-lange mukwasyi umwi mbowakakabona kuba kamasimpe kaambo aaka.

Kutamvwana kwakapa kuti kube kuzwangana akati ka Julie amusyoonto wakwe musankwa William. Eeci cakapa kuti William acimwe kapati cakuti wakaleka akumuswaya Julie amulumaakwe, Joseph. Mane limwi wakazipilusya zipego zyoonse nzyaakamupede Julie a Joseph musyule. Mukuya kwamazuba, kucimwa nkukwakanjila mubusena bwa cilongwe ncobakajisi babunyina aaba.

Nokuba boobo, Joseph wakasola kubelesya lulayo luli ku Matayo 5:23, 24. Wakamusikila mulamu wakwe amoyo mubombe alimwi wakamutumina magwalo amugeme mwalo mwaakalilekelela akaambo kakumubisizya. Wakakulwaizya mukaintu wakwe kuti amulekelele munyina. Kumbele, William wakabona kuti Julie a Joseph bakali kulombozya ncobeni kubamba luumuno, eelyo wakajosya moyo. William amukaakwe bakaswaangana a Julie a Joseph; boonse bakalilekelela, bakagwambatilana, alimwi akubukulusya cilongwe cabo.

Ikuti naa mulombozya kumana kaambo nkomujisi amuntu umwi, cakukazikka moyo amubelesye njiisyo zyamu Bbaibbele alimwi akusola kubamba luumuno amuntu ooyo. Jehova uyoomugwasya. Eeco ncaakaamba Leza kubana Israyeli bansiku ciyoomucitikila ncobeni: “Nicakabota niwakaswiilila milazyo yangu! Lino luumuno lwako nilwakaba mbuli mulonga.”—Isaya 48:18.

Bupanduluzi buyungizidwe

[Zifwanikiso izili apeeji 7]

Kulilekelela ziindi zinji kulabukulusya zilongwe zibotu