Majwi Mabi Nkaambo nzi Ncaacisa?

“Zizwa kuli inkondo? Azwa kuli maambani akati kanu?”—JAKOBO 4:1.

SIKULEMBA Bbaibbele Jakobo tanaakali kugamika mubuzyo ooyu kuli basikalumba bana Roma balo kuciindi eeco ibakali kulwana nkondo zyakuzunda; alimwi tanaakali kusola kujana makanze ngobakajisi baalumi bajayi munkondo yamumwaanda wamyaka wakusanga C.E. Ncaakali kuyeeya Jakobo, mmazwanga aakali kujatikizya bantu basyoonto nobaba bobile. Nkaambo nzi? Nkaambo nkakuti, mbubwenya mbuli nkondo, mazwanga ajatikizya bantu basyoonto nobaba bobile ngaluciso. Amulange-lange zibalo eezyi zyamu Bbaibbele.

Bana basankwa basyanene waciindi Jakobo bakamusula kapati munyina Josefa cakuti bakamuuzya mubuzike. (Matalikilo 37:4-28) Nokwakainda ciindi, Mwami wa Israyeli Saulo wakasola kujaya Davida. Nkaambo nzi? Nkaambo wakafwida munyono Davida. (1 Samuele 18:7-11; 23:14, 15) Mumwaanda wamyaka wakusanguna, bamakaintu bobile Banakristo, Euodiya a Suntuke bakanyonganya luumuno lwambungano yoonse akaambo kakuzwangana kwabo.—Ba-Filipi 4:2.

Muziindi zyainda ino-ino, bantu bali kumanya kuzwangana kwabo kwiinda mukulwana mulicabo, kababelesya mapanga antobolo. Ziindi zinji umwi wabasikulwana aaba wali kujayigwa antela kulemanina limwi. Mazubaano, aabo ibalwana kanji-kanji babelesya majwi mabi acisizya moyo. Nokuba kuti inga kunyina bulowa butilwa, majwi mabi alacisizya moyo alimwi alabisya zina. Bunji bwaziindi bantu banyina mulandu mbabapenga “munkondo” eezyi.

Amulange-lange cakacitika ciindi mupaizi wacikombelo ca Anglican naakapa mulandu mupaizinyina wakutaabelesya kabotu mali acikombelo. Kukazyanya kwabo kwakazibwa kubuleya, eelyo cikombelo ncobakali kubelekela cakaandaana. Basimbungano bamwi bakakaka kujanika kumiswaagano ciindi mupaizi ngobatakali kuyanda naakali kweendelezya muswaangano. Kusulana kwabasimbungano kwakayindila kapati cakuti tiibakali kwaambauzyana ciindi nobakali kukomba mucikombelo. Ciindi mupaizi wakapegwa mulandu kusaanguna naakapa mulandu mweenzinyina wakoonana kutaluzi, kuzwangana kwabo kwakayindila kuyaambele.

 Bbishopu mupati waku Canterbury wakabaambila kuti balilingule bapaizi aaba bobile, kaamba kuti kuzwangana kwabo yakali “kkansa” alimwi wakali “mucito uusampuzya zina lya Mwami Wesu.” Mu 1997 umwi wabapaizi aaba wakazumina kuleka mulimo. Ooyu umwi wakazumanana kukkala acuuno cakwe kusikila naakakkwanya myaka yakuzyalwa mpobalekela milimo boonse. Nokuba boobo, wakazumanana kabeleka mane mpoceela, wakacileka mubuzuba naakakkwanya myaka yakuzyalwa iili 70, mu August 7, 2001. Muteende utegwa The Church of England Newspaper wakaamba kuti buzuba naakacileka mulimo bwakali buzuba bwapobwe lya “Musaante” Victricius. Ino “Musaante” Victricius wakali ni? Wakali bbishopu wamumwaanda wamyaka wane uluulwa kuti wakaumwa kapati akaambo kakuti wakakaka kulwana kali sikalumamba. Imuteende ooyu nowakalanga-langa kwiindana mumizeezo akati kamupaizi wakazwa akucileka mulimo alimwi “Amusaante” Victricius wakaamba kuti: “Ikukaka kulwana amupaizinyina tiicakali ciimo camupaizi ooyu [wakatileke mulimo wakwe].”

Abaya bapaizi nobatakalicisa lwabo bene akucisa bambi ikuti nobakabelesya lulayo luli ku Ba-Roma 12:17, 18 lwakuti: “Mutabeenzyi bubi bamweenzya bubi. Amulabilile ziimbo zibotu mumeso aabantu boonse. Anooli kwakonzeka, nkukuti mbuli mbumukonzya nubeni, amukalane abantu boonse caluumuno.”

Ino nywebo nomwakacita buti? Ikuti muntu umwi wamubisizya, sena kucimwa kumupa kutalika kubelesya majwi mabi? Antela sena mulaleka kubelesya majwi mabi akuzumanana kamulibambide kubamba luumuno amuntu ooyo? Ikuti mwabisizya umwi, sena mulaleka kumwaambauzya muntu ooyo kamuyeeya kuti mukuya kwaciindi uyakuliluba penzi eelyo? Antela sena mulafwambaana kulilekelela? Kufwumbwa naa ndinywe mulomba kulekelelwa naa mwalombwa kulekelela umwi, kusola kubamba luumuno kuyakupa kuti mube abuumi buli kabotu. Lulayo lwamu Bbaibbele lulakonzya kutugwasya kubamba twaambo twaliko kwaciindi cilamfwu, mbuli mbokutondezyedwe mucibalo citobela.