Ino Jesu Kristo—Umujatikizya Buti Nywebo?

KWEELANA anzyotwalanga-langa mucibalo camana, sena inga kwaba kudooneka kwakuti njiisyo zya Jesu zyabajatikizya kapati bantu nyika yoonse? Nokuba boobo, mubuzyo uuyandika kapati ngwakuti: “Ino njiisyo zya Jesu zindijatikizya buti mebo lwangu?”

Injiisyo zya Jesu zyakabikkilizya twaambo tunji-tunji. Ziiyo ziyandika kapati zili mumo zilakonzya kujatikizya buumi bwanu boonse. Atulange-lange ncaakayiisya Jesu kujatikizya kubikka kumbele zintu ziyandika kapati mubuumi, kuba acilongwe a Leza, kuba acilongwe cibotu abamwi, kumana mapenzi alimwi akulikasya kumicito yabujayi.

Amubikke Kumbele Zintu Ziyandika Kapati Mubuumi

Munyika eeyi bantu mobajisi bubi, ipa kuti tubulilwe ciindi anguzu zyakulanganya zintu zyakumuuya. Amulange-lange makani ajatikizya mwaalumi ujisi myaka iili kuma 20 ngotulaambe kuti Jerry. Nokuba kuti Jerry  ulaikkomanina mibandi yakumuuya alimwi ulaziyandisya nzyaiya muli njiyo, ulaamba cakuusa kuti: “Nkuti buyo ndinyina ciindi cakutola lubazu mulinjiyo cakusitikila. Mumvwiki ndilabeleka mazuba aali cisambomwe. Munsondo mbobuzuba bulikke mbonditabeleki. Ciindi nondimanizya kulanganya zintu zyondeelede kucita, ndijana buyo kuti ndilikatede kapati.” Ikuti mwalijana mupenzi lili boobu, mulakonzya kugwasyigwa anzyaakayiisya Jesu mu Mulumbe waa Cilundu.

Jesu wakaambila nkamu yakabungane kuzoomuswiilila kuti: “Mutalibiliki kubuumi bwanu, kuti, Tukalyenzi? Tukanywenzi? nikuba kumibili yanu kuti, Tukasamenzi? Sa buumi tabwiindi zilyo, awalo mubili sa tuuindi zyakusama? Amulange bayuni bakujulu, nkaambo tababyali, tabatebuli, tabayoboli mumatala, nekubaboobo Usowanu uuli kujulu ulabasanina. Sa inywe tamuyandiki kwiinda mbabo? . . . Nkaambo kako mutalibiliki cakwaamba kuti, Tukalyenzi? Tukanywenzi? Tukasamenzi? Nkaambo nzeezi zyoonse nzibayandaula bamasi, alimwi Usowanu uuli kujulu ulizi kuti zintu ezi zyoonse zilayandwa kulindinywe. Pele amusaangune kuyandaula Bwami bwa-Leza abululami bwakwe, elyo zintu ezi zyoonse mulaziyungizizigwa azyalo.” (Matayo 6:25-33) Ncinzi ncotwiiya aawa?

Jesu tanaakali kwaamba kuti tweelede kuleka kubikkila maano kuzintu zyotuyandika kumubili azyamukwasyi wesu. Ibbaibbele lyaamba kuti: “Na muntu tabambi basazinyina, kwaambisya bamuŋanda yakwe, wati oyo ulisowede lusyomo lwakwe, ulaindilila akuliyooyo uutazumina.” (1 Timoteo 5:8) Nokuba boobo, Jesu wakasyomezya kuti ikuti twabikka zintu ziyandika kapati mubusena bwakusaanguna akubikka zintu zyakumuuya kumbele, Leza uyoobona kuti zintu zimwi nzyotuyandika twazijana. Ciiyo ciliko aawa ncakuzibikka mubusena bweelede zintu. Ikutobela lulayo oolu kuletela lukkomano, nkaambo “bali acoolwe bacete mumuuya.”—Matayo 5:3.

Amube Acilongwe a Leza

Aabo babikkila maano kuzintu zyakumuuya balizyi mbociyandika kuba acilongwe cibotu a Leza. Mbuti mbotutalisya cilongwe cibotu amuntu uuli woonse? Tulacita oobo kwiinda mukumuzyiba kabotu muntu ooyo, tee kayi? Tweelede kuba aciindi cakuzyiba mbwazibona zintu, mbwayeeya, nzyakonzya kucita, nzyaakacita, nzyayanda alimwi anzyatayandi. Ncimwi buyo caboola akukuba acilongwe a Leza. Luzibo lwakwe lwini-lwini lulayandika. Ciindi naakali kupailila basikwiiya bakwe kuli Leza, Jesu wakati: “Mboobu buumi ubutamani, kuti bazibe nduwe, Leza mwini-mwini, ooli olikke, ayooyo ngookatuma, nguwenya Jesu Kristo.” (Johane 17:3) Inzya, ikuba acilongwe cini-cini a Leza kuyandika kuti tumuzyibe walo. Ikwalo nkotukonzya kujana luzyibo luli boobu, mu Jwi lyakasololelwa a Leza, Ibbaibbele. (2 Timoteo 3:16) Tweelede kulibikkila ciindi cakwiiya Magwalo.

Pele, luzyibo lulikke taluzulide pe. Mumupailo nguwenya ooyo, Jesu wakati: “Abalo [basikwiiya bakwe] babamba ijwi lyako.” (Johane 17:6) Tatweelede buyo kujana luzyibo lwa Leza pele alimwi tweelede kucita kweendelana andulo. Sena kuli ciinda aawa mukuba acilongwe a Leza? Sena tulakonzya kulangila cilongwe cesu aumwi kuyuma ikuti katucita zintu acaali munzila iteendelani azyeelelo zyakwe alimwi anzyayanda? Aboobo, mbwazibona zintu Leza anjiisyo zyakwe, zyeelede kutusololela muzintu zyoonse nzyotucita mubuumi.  Amulange-lange njiisyo zyakwe zyobile mbozibeleka muzilongwe zyesu abantuma.

Amube Acilongwe Cibotu Abamwi

Kuciindi cimwi Jesu wakaluula kaano kafwaafwi kutegwa ayiisye ciiyo ciyandika kapati kujatikizya zilongwe akati kabantu. Wakaamba zya mwami wakali kuyanda kumana cikwelete ababelesi bakwe. Pele, umwi wabo, wakajisi cikwelete cipati alimwi tanaakajisi nzila yakucibbadela. Simalelo wakwe wakalailila kuti mwaalumi ooyu, mukaintu wakwe abana bakwe basambalwe kutegwa kubbadelwe cikwelete. Sikukweleta wakafugama akulomba kuti: “Mwami undikazikile moyo, nzookuliya oonse.” Naakamufwida luse, mwami wakamulekelela cikwelete ncaakajisi. Pele muzike uulya naakazwa kuli mwami wakajana muzikenyina wakajisi cikwelete cisyoonto kuli nguwe, eelyo wakamwaambila kuti amubbadele. Nokuba kuti muzikenyina ooyu wakamulomba kuti amumvwide luse, muzike uulya mutaanzi wakamubikka muntolongo kusikila mane akaliye oonse. Ciindi mwami naakamvwa makani aaya, wakabijilwa. Mwami wakamubuzya kuti: “Sa teewakeelede . . . kufwida luzyalo muzikenyoko, mbuli ndime mbundakafwida nduwe luzyalo?” Aboobo muzike uulya uutalekeleli wakabikkwa muntolongo kusikila leelyo naakali kuyoobbadala oonse ngaakakweletede. Kutegwa ayiisye ciiyo kuzwa kukaano aaka, Jesu wakati: “Mbubonya obo alakwe Taata uuli kujulu mbwazoomucitila nywebo kuti tamulekeleli nyoonse bakwanu camumyoyo yanu.”—Matayo 18:23-35.

Mbwaanga tatulondokede, tulijisi milandu minji. Kunyina notukonzya kumubbadela Leza cikwelete cipati ncotujisi kulinguwe akaambo kakumubisyizya. Ncotukonzya kucita buyo nkumulomba kuti atulekelele. Pele Jehova Leza ulilibambilide kutulekelela kufwumbwa kuti twabalekelela bakwesu zibi nzyobatucitila. Ma! Taciliboteli ciiyo eeci. Jesu wakayiisya basikumutobela kupaila kuti: “Utulekelele milandu yesu, mbubonya mbuli mbutubalekelede aswe bali amilandu kulindiswe.”—Matayo 6:12.

Amumanizye Cileta Penzi

Caboola kukumvwisya mbwabede muntu, Jesu wakalicibwene. Lulayo lwakwe lwakumana mapenzi lwakali kujatikizya kumana cileta penzi. Amubone zikozyanyo eezyi zyobile zitobela.

Jesu wakati: “Mwamvwa bantu bakalekale mbubakaambilwa kuti, Utajayi, umwi aumwi uujaya uleelede kubetekwa. Pele mebo ndamwaambila kuti, Umwi aumwi uukalalila munyina uleelede kubetekwa.” (Matayo 5:21, 22) Awa Jesu wakatondezya kuti ikuzwa penzi lyabujayi nkokuyandika kapati ikwiinda mucito wini wabujayi. Lili mumuzeezo uukomena mumoyo wamujayi. Ikuti bantu nobatali kulekela kucimwa naa bukali kuzumanana kuba mumyoyo yabo, bujayi bwakuyeeyela limwi nobwataliko. Elo kaka kutila bulowa nokweelebwa ikuti lulayo oolu nolwali kubelesyegwa!

Amubone Jesu mbwayubununa matalikilo aapenzi limbi liletela buusu kapati. Wakaambila nkamu kuti: “Mwakamvwa mbukwakaambwa kuti, Utaciti bumambi. Pele mebo ndamwaambila kuti umwi aumwi uulangilila mwanakazi cakumusukama ulimucitide kale bumambi mumoyo wakwe. Nkabela kuti liso lyako lyalulyo lyakulebya, uligwisye, ulisowe.” (Matayo 5:27-29) Jesu wakayiisya kuti penzi ndipati kapati kwiinda mucito wini wakutalilemeka. Penzi litalikila mukulombozya kutalilemeka. Ikuti muntu wakaka kuzumanana kulombozya zintu zitaluzi alimwi ‘akuzigwisya’ mumizeezo yakwe, eeci ciyoopa kuti alimanizye penzi lilangilwa lyakutalilemeka.

“Bwedezya Ipanga Lyako Mucikanda Calyo”

Imasiku Jesu naakaabwa akwaangwa, umwi wabasikwiiya bakwe wakasomona ipanga lyakwe kuti amucingilile. Jesu wakamulailila kuti: “Bwedezya ipanga lyako mucikanda calyo,  nkaambo boonse babweza ipanga bazoovwinyaunwa kupanga.” (Matayo 26:52) Nibwakaca, Jesu wakaambila Ponto Pilato kuti: “Bwami bwangu tabuli bwaansi ano, bwami bwangu nobwali bwaansi ano, bazike bangu nobandilwanina, kuti entatolwa ba-Juda. Pe, bwami bwangu tabuli bwakokuno.” (Johane 18:36) Sena njiisyo eeyi tiigwasyi?

Ino Banakristo bakusaanguna bakali kuzibona buti nzyakayiisya Jesu kujatikizya kutalwana? Ibbuku litegwa The Early Christian Attitude to War lyaamba kuti: “Mbwaanga [njiisyo zya Jesu] zyakakasya luuni akucisa bamwi kuti takuli kwamumulawo, icakasalazyigwa [ncakuti] kutola lubazu munkondo takuluzi . . . Banakristo bakusaanguna bakatobela ncakaamba Jesu, alimwi bakazimvwisya njiisyo zyakwe zijatikizya kubomba moyo akutalwana. Bakeendelanya cikombelo cabo aluumuno; bakaikakila limwi nkondo akaambo kakutila bulowa nkuyakajisi.” Elo kaka bukkale bwabantu nobwali indene ikuti boonse aabo balyaamba kuti Mbanakristo nobali kutobela njiisyo eeyi!

Mulakonzya Kugwasyigwa Anjiisyo zya Jesu Zyoonse

Injiisyo zya Jesu nzyotwalanga-langa nzibotu, tazikatazyi alimwi zilagwasya. Bantu balakonzya kugwasyigwa kwiinda mukuzizyiba njiisyo zyakwe alimwi akuzibelesya. *

Bakamboni ba Jehova ooko nkomukkala bayookkomana kumugwasya kubona mbomukonzya kugwasyigwa anjiisyo zyabusongo zyatakalina aambidwe amuntu naba ni. Twamutamba kuti mubabone naa kulembela kukkeyala iili apeeji 2 ya magazini eeyi.

Bupanduluzi buyungizidwe

[Cifwanikiso icili apeeji 5]

“Usowanu uuli kujulu ulabasanina”

[Cifwanikiso icili apeeji 7]

Injiisyo zya Jesu zilakonzya kumugwasya mubuumi bwanu