Mbwaabajatikizya Bantu–Jesu Nyika Yoonse
Mbwaabajatikizya Bantu–Jesu Nyika Yoonse
“ZYOONSE ziluulwa mu Makani Mabotu kujatikizya zyakaamba Jesu ciindi naakali mubuleya anaatakali kubuleya, naakazyaamba mumawoola obile. Pele nokuba kuti zintu nzyakaamba zyakali zisyoonto boobo, zyakali kukulwaizya kapati cakuti tulakonzya kwaamba kuti kunyina umbi wabajatikizya kapati bantu mbuli nguwe,” oobu mbwaakalemba sikusandulula Bbaibbele Edgar Goodspeed.
Ciindi Jesu Kristo naakamanizya mulimo wakwe anyika mumwaka wa 33 C.E., basikumutobela bakali kubalilwa kubaalumi abanakazi batandila ku 120. (Inc. 1:15) Sunu, bantu bainda kuzyuulu zyobile zyatuulunzuma balyaamba kuti Mbanakristo. Myanda-myanda yatuulunzuma atumwi twabantu bazyi kuti Jesu wakali musinsimi. Masimpe injiisyo zyakwe zyabajatikizya kapati bantu.
Nobaba basololi batali Banakristo balazuminizya kuti Jesu wabajatikizya kapati bantu nyika yoonse. Mucikozyanyo, mufundisi waci Juda Hyman Enelow wakalemba kuti: “Jesu waba muntu uzizilwe kapati, uyiigwa kapati alimwi wabujatikizya kapati bukkale bwabukombi bwabantu.” Alimwi Enelow wakati: “Nguni ukonzya kweeleka mbwabajatikizya bantu Jesu? Luyando ndwakulwaizya, luumbulizyo ndwapa, milimo mibotu njatalisya, bulangizi alimwi alukkomano ndwakulwaizya—muli zyeezi zyoonse kunyina wasika aciimo cakwe mubukkale bwabantu. Akati kabantu bajisi mpuwo alimwi basimilimo mibotu bakaponede, kunyina naba omwe wasika ali Jesu mukweendelezya bantu. Waba muntu uukondelezya kapati mubukkale bwabantu.” Alimwi musololi waba Hindu Mohandas K. Gandhi wakati: “Kunyina uumbi ngwezyi kunze lya Jesu wabajatikizya kapati bantu. Masimpe, kunyina cilubide a Bunakristo.” Pele, wakayaambele akuti: “Penzi lili kulindinywe Nobanakristo. Kunyina nomupona kweendelana anjiisyo zyanu.”
Kuzwa kaindi Bunakristo bwanyika bulijisi mpuwo yakutapona kweendelana anjiisyo zya Jesu. Sikuluula makani aakaindi aa Bunakristo, Cecil John Cadoux wakaamba kuti: “ikuyaambele asyoonto-syoonto mubukkale bumwi bwakutalilemeka mu Cikombelo coonse” kwakalibonya “kubasololi ba Bunakristo kumatalikilo kwini . . . mu 140 A.D.” Alimwi wakaamba kuti: “Ooku kuyaansi mukutazumizya bukkale bwakutalilemeka kwakapa kuti bantu batalike kutobela ziyanza zyamunyika.”
Bukkale oobu bwakayaambele kapati mumwaanda wamyaka wane, ciindi Mweendelezi wa Roma Constantine naakaba Munakristo. Cadoux wakalemba kuti: “Basikwiiya makani aakaindi balibonena alimwi zimwi ziindi balausa nobabona Cikombelo mbocakalekelela kutalilemeka kwiinda mukuzuminana a Constantine.” Kwamyaanda yamyaka kuzwa ciindi eeci, bantu balyaamba kuti Mbanakristo bacita micito iiletela nsoni yalo isampuzya zina lya Kristo.
Aboobo, mibuzyo iiyandika kapati njakuti: Ncinzi cini ncaakayiisya Jesu? Alimwi ino njiisyo zyakwe zyeelede kutujatikizya buti swebo?
[Cifwanikiso icili apeeji 3]
“Kunyina uumbi ngwezyi kunze lya Jesu wabajatikizya kapati bantu.”—Mohandas K. Gandhi
[Cifwanikiso icili apeeji 3]
“Kunyina naba omwe wasika aali Jesu mukweendelezya bantu.”—Edgar Goodspeed
[Kulumba]
Culver Pictures