Amulisyome Ijwi Lya Jehova

“Ndasyoma ijwi lyako.”—Intembauzyo 119:42.

1. Ncinzi ncomuzyi kujatikizya mulembi wa Intembauzyo 119 alimwi abube mbwaakajisi?

IJWI lya Jehova lyakali kuyandwa kapati amulembi wa Intembauzyo 119. Ulangilwa kuti wakali Hezekiya Mwana wa Mwami iwakali kukkala ku Juda. Majwi aamulembi walwiimbo oolu ilwakasololelwa amuuya uusalala aleendelana abube mbwaakajisi Hezekiya, ooyo “wakakakatila kuli-Jehova” naakali kulela kali mwami wa Juda. (2 Bami 18:3-7) Ikaambo komwe kamasimpe nkakuti: Imulembi wakalibikkilide maano kuzintu zyakumuuya.—Matayo 5:3.

2. Nkaambo nzi kapati kali ku Intembauzyo 119, alimwi ino mbuti nyimbo eeyi mboilembedwe?

² Ikaambo kapati kali ku Intembauzyo 119 kajatikizya mboliyandika jwi lya Leza, antela mulumbe. * Ambweni kutegwa lwiimbo oolu kaluyeeyegwa lyoonse, wakalulemba cakutobelana kweelana amabala aa Cihebrayo. Tupango twanyimbo eeyi ituli 176 twakalembwa cakutobelana ikweelana ambwaatobelene mabala mu Cihebrayo. Mu Cihebrayo citaanzi, acimwi cibeela ca Intembauzyo izili 22 cijisi tupango tuli 8 itutalika abbala likozyenye. Intembauzyo eeyi yaamba jwi lya Leza, mulawo, ziyeekezyo, nzila, milumbe, milazyo alimwi ambeta. Mucibalo eeci acitobela, Intembauzyo 119 ilabandikwa kweelana abusanduluzi buluzi bwamagwalo aamu Bbaibbele aa Cihebrayo. Ikuzinzibala kuyeeya azintu zyakacitikila babelesi ba Jehova kaindi alimwi asunu kweelede kutugwasya kulumvwisya lwiimbo oolu lwakasololelwa amuuya alimwi akuyungizya kulumba kwesu kujatikizya Jwi lyakwe lilembedwe, Ibbaibbele.

Ikuti Twalitobela Jwi lya Leza Tunookkomene

3. Amupandulule alimwi akupa cikozyanyo kujatikizya ncocaamba kuba muntu uululeme.

³ Lukkomano lwini-lwini luyeeme akweenda kwesu mumulawo wa Leza. (Intembauzyo 119:1-8) Ikuti twacita oobu, Jehova uyootubona kuba “baluleme munzila” zyesu. (Intembauzyo 119:1) Ikuba baluleme tacaambi kuti tulilondokede pe, pele citondezya kuti tulasolekesya kucita kuyanda kwa Jehova Leza. Nowa wakali “muntu uululeme, katajisi kampenda, akati kabasaanyina” mbwaanga “wakali kweenda a-Leza” wakasimpe. Mwaalumi uusyomeka ooyo alimwi amukwasyi wakwe bakafwutuka lya Zambangulwe akaambo kakuti wakapona bukkale mbwayanda Jehova. (Matalikilo 6:9; 1 Petro 3:20) Mbubwenya buyo, ikufwutuka kwesu nyika eeyi yaakunyonyoonwa kuyeeme ‘akwaacita loko malailile aa Leza,’ akucita kuyanda kwakwe.—Intembauzyo 119:4.

4. Mpaali ayeeme lukkomano alimwi akuzwidilila kwesu?

⁴ Jehova takatulekelezyi pe ikuti ‘twamulumba amoyo uululeme alimwi akuzumanana kubamba milazyo yakwe.’ (Intembauzyo 119:7, 8) Leza tanaakamulekelezya musololi muna Israyeli Joshua, iwakatobela lulayo ‘lwakubala bbuku lyamulawo isikati amasiku, kuti abambe kabotu  makani oonse aalembedwe mumo.’ Eeci cakamupa kuzwidilila alimwi akumugwasya kucita zintu camaano. (Joshua 1:8) Kali afwaafwi kufwa, Joshua wakacili kumutembaula Leza alimwi wakakonzya kuyeezya bana Israyeli kuti: “Mulizi camyoyo yanu yoonse acamiyeeyo yanu yoonse kuti taakwe cintu niciba comwe icakawida ansi akati kazintu zibotu zyoonse Jehova Leza wanu nzyakaamba aandinywe.” (Joshua 23:14) Mbuli Joshua alimwi amulembi wa Intembauzyo 119, tulakonzya kujana lukkomano alimwi akuzwidilila kwiinda mukutembaula Jehova alimwi akusyoma zili mujwi lyakwe.

Ijwi lya Jehova Litupa Kusalala

5. (a) Amupandulule mbocikonzyeka kuzumanana kusalala kumuuya. (b) Ndugwasyo nzi luliko kumuntu uucili mwana wacita cibi cipati?

⁵ Tulakonzya kuba bantu basalala kumuuya ikuti twalibamba kweelana ajwi lya Leza. (Intembauzyo 119:9-16) Eeci ceelede kuba boobu nokuba kuti bazyali besu tabali cikozyanyo cibotu. Nokuba kuti bausyi Hezekiya bakali kukomba mituni, Hezekiya ‘wakasalazya inzila yakwe,’ ambweni kukuyungwa abantu batakali kukomba Leza. Ncinzi ciyandika ikuti muntu uucili mwana uubelekela Leza wacita cibi cipati? Ikweempwa, mupailo, lugwasyo kuzwa kubazyali alimwi alugwasyo lwaluyando kubaalu Banakristo ibabikkila maano kulakonzya kumugwasya kuba mbuli Hezekiya alimwi ‘akusalazya inzila yakwe akuzumanana kwiibamba.’—Jakobo 5:13-15.

6. Mbanakazi bali ‘ibakasalazya nzila yabo akulibamba kweelana ajwi lya Leza’?

⁶ Nokuba kuti ba Rahabu alimwi a Rute bakapona kaindi Intembauzyo 119 kaitanalembwa, ‘bakasalazya inzila zyabo.’ Rahabu wakali sikuvwuula muna Kanana, pele akaambo kalusyomo lwakwe wakazoozyibwa kuti mmukombi wa Jehova. (Ba-Hebrayo 11:30, 31) Rute muna Moabu wakasiya baleza bakwe, wakatalika kubelekela Jehova alimwi akuutobela Mulawo ngwaakapa bana Israyeli. (Rute 1:14-17; 4:9-13) Banakazi aaba bobile ibatakali bana Israyeli bakazumanana ‘kulibamba mbubonya mbuli bwaamba jwi lya Leza,’ aboobo bakaba acoolwe citaliboteli cakuba bamakaapanyina ba Jesu Kristo.—Matayo 1:1, 4-6.

7. Mbuti Daniele abakubusi bamwi botatwe bana Hebrayo mbobakaba cikozyanyo cibotu mukubona kuti bazumanana kusalala kumuuya?

⁷ “Miyeeyo yamoyo wamuntu mibi lyoonse kuzwa kubwanike bwakwe,” pele bana-bana balakonzya kutobela bukkale bubotu, nomuba munyika mbyaabi eeyi yeendelezyegwa a Saatani. (Matalikilo 8:21; 1 Johane 5:19) Kabali baange mubuzike ku Babuloni, Daniele alimwi abakubusi bamwi botatwe bana Hebrayo bakazumanana ‘kulibamba kweelana ajwi lya Leza.’ Mucikozyanyo, bakakaka kulisofwaazya “azilyo zinono zyamwami.” (Daniele 1:6-10) Bana Babuloni bakali kulya banyama batasalali, ibakakasyidwe mu Mulawo wa Musa. (Levitiko 11:1-31; 20:24-26) Talili lyoonse nobakali kugwisya bulowa mubanyama mbobakali kujaya alimwi ikulya nyama yatagwisyigwa bulowa nkobakali kucita kwakali kutyola mulawo wa Leza kujatikizya bulowa. (Matalikilo 9:3, 4) Anu nkakaambo kaako bana Hebrayo bone ncobakazikaka zilyo zinono zyamwami. Bakubusi banaleza  aaba bakazumanana kusalala kumuuya aboobo bakaba cikozyanyo cibotu.

Ijwi lya Leza Litugwasya Kusyomeka

8. Mbube nzi alimwi aluzibo ndotuyandika kutegwa tucikonzye kuumvwisya alimwi akuutobela mulawo wa Leza?

⁸ Kuyandisisya jwi lya Leza nkaambo kayandika kapati mukutugwasya kuzumanana kusyomeka kuli Jehova. (Intembauzyo 119:17-24) Ikuti katuli mbuli sintembauzyo wakasololelwa amuuya, tuyooyandisisya kumvwisya “zintu zigambya” izili mumulawo wa Leza. Lyoonse ‘tunoosukamina imbeta zya Jehova’ alimwi akutondezya ‘kubotelwa amilumbe yakwe.’ (Intembauzyo 119:18, 20, 24) Ikuti naa twakalyaaba lino-lino kuli Jehova, sena ‘tulayandisisya mukupa wamuuya wajwi uutavwelwi cintu’? (1 Petro 2:1, 2) Tweelede kuziteelelesya njiisyo zyamu Bbaibbele zyantalisyo kutegwa tucikonzye kuumvwisya alimwi akuutobela mulawo wa Leza.

9. Ino tweelede kucita buti nokuli kukazyanya akati kamulawo wa Leza alimwi anzyobayanda bantu?

⁹ Tulakonzya katuyandisya ziyeekezyo zya Leza, pele ino kuti “bami” batalika kutusampaula akaambo katwaambo tumwi? (Intembauzyo 119:23, 24) Sunu, beendelezi kanji-kanji balasolekesya kutusinikizya kubona milawo yabantu kuba iiyandika kapati kwiinda mulawo wa Leza. Nokuli kukazyanya akati kazintu nzyobayanda bantu alimwi aziyanda Leza, ncinzi ncotuyoocita? Ikuyandisisya jwi lya Leza kuyootugwasya kuzumanana kuba bantu basyomeka kuli Jehova. Mbubwenya mbuli baapostolo ba Jesu Kristo ibakapenzyegwa, tuyooamba kuti: “Tuleelede kumvwa Leza kwiinda bantu.”—Incito 5:29.

10, 11. Amupe cikozyanyo kupandulula mbotukonzya kuzumanana kusyomeka kuli Jehova notuli mubukkale bukatazya kapati.

¹⁰ Tulakonzya kuzumanana kusyomeka kuli Jehova nomuba mubukkale bukatazya kapati. (Intembauzyo 119:25-32) Ikuti naa katuyanda kuzwidilila katuli bantu basyomeka kuli Leza, tweelede kuyandisisya kuyiisyigwa alimwi akupaila camoyo woonse kulomba malailile aakwe. Alimwi tweelede kusala “inzila yabusyomeki.”—Intembauzyo 119:26, 30.

¹¹ Hezekiya, uulangilwa kuti ngowakalemba Intembauzyo 119, wakasala “inzila yabusyomeki.” Wakacita oobo nokuba kuti wakali kupona akati kabakombi bakubeja alimwi weelede kuti wakali kusampaulwa abasinkuta yamwami. Cakutadooneka, ‘moyo wakwe wakaliwizukide nkaambo kabuusu’ akaambo kabukkale oobo. (Intembauzyo 119:28) Pele Hezekiya wakali kusyoma Leza, wakali mwami mubotu alimwi wakacita “ziluleme mumeso aa-Jehova.” (2 Bami 18:1-5) Kwiinda mukusyoma Leza, aswebo tulakonzya kuliyumya notuli mumasunko alimwi akuzumanana kusyomeka kuli Leza.—Jakobo 1:5-8.

Ijwi lya Jehova Litupa Busicamba

12. Mbuti mbotunga twabelesya lugwalo lwa Intembauzyo 119:36, 37 kutegwa tugwasyigwe?

¹² Ikutobela busolozi bwa jwi lya Leza kutupa  busicamba ibuyandika kutegwa tuliyumye mumasukusyo ngotujana mubuumi. (Intembauzyo 119:33-40) Cakulibombya tulayandaula malailile aa Jehova kutegwa tubambe mulawo wakwe “camoyo woonse.” (Intembauzyo 119:33, 34) Mbubwenya mbuli sintembauzyo, tulamulomba Leza kuti: “Boozya moyo wangu kumilumbe yako, kuti uteemuzyi imbono,” nkokuti imbono zyabumpelenge. (Intembauzyo 119:36) Mbuli mwaapostolo Paulo, “tuyanda kuti tululame, tubule akampenda” muzintu zyoonse. (Ba-Hebrayo 13:18) Ikuti naa sikutulemba mulimo kayanda kuti tucite cimwi cintu citaluleme, tuba basicamba kukakatila kubusolozi bwa Leza, alimwi Jehova ulakulongezya lyoonse kucita boobo. Alimwi ulatugwasya kweendelezya kulombozya koonse kubyaabi. Aboobo atupaile kuti: “Gwisya meso aangu kukulangilila zyabuyo.” (Intembauzyo 119:37) Tatweelede naaceya pe kuzikkomanina zintu zyabuyo nzyasulide Leza. (Intembauzyo 97:10) Zintu zyobile mupailo ooyu nzyouyootugwasya kutantamuka, nkulangilila naa kubala zintu zibusya muzeezo wakoonana alimwi amicito iijatikizya mizimo.—1 Ba-Korinto 6:9, 10; Ciyubunuzyo 21:8.

13. Mbuti basikwiiya ba Jesu bakapenzyegwa mbobakaba abusicamba bwakali kuyandika kutegwa bakambauke cakaanzambwene?

¹³ Luzibo lwini-lwini lwa jwi lya Leza lutupa busicamba bwakukambauka cakutayoowa. (Intembauzyo 119:41-48) Alimwi tuyandika kuba basicamba kutegwa tucikonzye ‘kuvwuwa basikutusampaula.’ (Intembauzyo 119:42) Zimwi ziindi tulakonzya kuba mbuli basikwiiya ba Jesu bakapenzyegwa, ibakapaila kuti: “Jehova, . . . ugwasye bazike bako, baambe makani aako akaanzambwene kanji.” Ino ncinzi cakatobela? “Boonse bakazuzigwa Muuya Uusalala, nkabela bakatalika kwaamba makani aa-Leza akaanzambwene.” Mbubwenya buyo Mwami Wakoonse ulatupa busicamba kuti twaambe jwi lyakwe cabusicamba.—Incito 4:24-31.

14. Ncinzi citugwasya kukambauka cabusicamba mbuli mbwaakacita Paulo?

¹⁴ Tuyooba abusicamba buyandika kutegwa tupe bumboni kakunyina kuyoowa kusampuka ikuti naa katulikkomanina “ijwi lyalusinizyo” alimwi ‘akubamba mulawo wa Leza lyoonse.’ (Intembauzyo 119:43, 44) Ikuliiya cabusungu Jwi lya Leza lilembedwe kutugwasya kuba balibambilide ‘kuluula imbeta zyakwe kubusyu bwabami.’ (Intembauzyo 119:46) Alimwi mupailo amuuya wa Jehova ziyootugwasya kwaamba zintu zyeelede munzila mbotu. (Matayo 10:16-20; Ba-Kolose 4:6) Paulo wakaamba cabusicamba imbeta zya Leza kubeendelezi bamumwaanda wamyaka wakusaanguna. Mucikozyanyo, wakamukambaukila Mweendelezi muna Roma Felike, ooyo “wakamumvwa aalusyomo lwa-Kristo.” (Incito 24:24, 25) Alimwi Paulo wakapa bumboni ku Mweendelezi Festo a Mwami Agripa. (Incito 25:22–26:32) Kwiinda mukugwasyigwa a Jehova, aswebo tulakonzya kuba bakamboni basicamba, kakunyina ‘kuba ansoni kumakani mabotu.’—Ba-Roma 1:16.

Ijwi lya Leza Lilatuumbulizya

15. Mbuti Jwi lya Leza mbolikonzya kutuumbulizya ciindi bantu bamwi nobatusampaula?

¹⁵ Ijwi lya Jehova lilapa luumbulizyo lwini-lwini. (Intembauzyo 119:49-56) Kulaba ziindi notuyandika kapati kuumbulizyigwa. Nokuba kuti tulaamba cabusicamba katuli Bakamboni ba Jehova, “basikamikami” nkokuti aabo ibalisumpula kuli Leza, zimwi ziindi ‘balatusampaula loko.’ (Intembauzyo 119:51) Nokuba boobo, ciindi notupaila tulakonzya kuyeeya zintu zikulwaizya zyaambidwe mu Jwi lya Leza, aboobo inga ‘twaumbulizyigwa.’ (Intembauzyo 119:52) Eelyo notuli mukumulomba, tulakonzya kuyeeya mulawo naa njiisyo yamu Magwalo imwi yuumbulizya alimwi iitupa busicamba buyandika mubukkale bukatazyide.

16. Ncinzi babelesi ba Leza ncobatacita nokuba kuti bali kupenzyegwa?

¹⁶ Basikamikami ibakali kusampaula sintembauzyo bakali bana Israyeli, iciinga cabantu ibakalyaabide kuli Leza. Taalikomeneni kaka masampu aaya! Pele ikwiindana ambabo, katukanzide ikutaleya kumulawo wa Leza. (Intembauzyo 119:51) Nobakali kupenzyegwa abana Nazi alimwi anobakali mumapenzi aamwi aakozyenyi kwamyaka minji yoonse eeyi, izyuulu-zyuulu zyababelesi ba Leza bali kukaka kuleya kumilawo alimwi anjiisyo zijanika mu Jwi lya Leza. (Johane 15:18-21) Alimwi tacili cintu cikatazya kumuswiilila Jehova akaambo kakuti milawo yakwe ili mbuli  nyimbo zyuumbulizya kulindiswe.—Intembauzyo 119:54; 1 Johane 5:3.

Amutondezye Kulumba Nkaambo ka Jwi lya Jehova

17. Ikulumba jwi lya Leza kutukulwaizya kucita nzi?

¹⁷ Tulatondezya kulumba nkaambo ka jwi lya Leza kwiinda mukutobela ncolyaamba mubuumi bwesu. (Intembauzyo 119:57-64) Sintembauzyo ‘wakasyomezya kubamba majwi aa Jehova’ alimwi ‘akaandabwe kabusiku wakali kubuka kuti amulumbe Leza akaambo kambeta zyakwe ziluleme.’ Ikuti twabuka masiku, cilakonzya kuba coolwe citaliboteli kapati kulindiswe cakutondezya kulumba kwesu kuli Leza mumupailo! (Intembauzyo 119:57, 62) Ikulibikkila maano kapati jwi lya Leza kutukulwaizya kuyandaula njiisyo zyakwe alimwi kutupa kuba ‘beenzinyina bakkomene babaabo boonse ibayoowa Jehova,’ nkokuti ibantu bayoowa kumubisizya Leza. (Intembauzyo 119:63, 64) Kunyina balongwe babotu mbotukonzya kujana anyika kwiinda baaba.

18. Mbuti Jehova mbwaingula mipailo yesu ciindi ‘notuli mutukole twabasizibi’?

¹⁸ Notupaila camoyo woonse alimwi akulomba cakulibombya kuli Jehova kuti atuyiisye, nkokuti tuli ‘mukukumbila luse lwakwe’ katuyanda kuba acilongwe anguwe. Ikapati tweelede kupaila ciindi ‘notuli mutukole twabasizibi.’ (Intembauzyo 119:58, 61) Jehova ulakonzya kutunyonyoona tukole twabasizibi itutujisi alimwi akutwaangulula kutegwa tuzumanane mumulimo wakukambauka Bwami alimwi awakugwasya bantu kuba basikwiiya. (Matayo 24:14; 28:19, 20) Eeci catondezyegwa cakwiinduluka-induluka mumasi oomo mulimo wesu moulesyedwe.

Amube Alusyomo mu Jwi lya Leza

19, 20. Mbuti mbocinga catubotela kuwida mumapenzi?

¹⁹ Lusyomo muli Leza alimwi ajwi lyakwe kutugwasya kutazungaana notuli mumapenzi alimwi kutupa kuzumanana kucita kuyanda kwakwe. (Intembauzyo 119:65-72) Nokuba kuti basikamikami ‘bakamulengelela zyakubeja,’ sintembauzyo wakaimba kuti: “Cakandibotela kuwida mumapenzi.” (Intembauzyo 119:66, 69, 71) Mbuti mbocinga camubotela mubelesi wa Jehova uuli woonse kuwida mumapenzi?

²⁰ Notuli mumapenzi, tulapaila camoyo woonse kuli Jehova, aboobo eeco citupa kuba balongwe bakwe. Tulakonzya kujana ciindi cinji cakwiiya Jwi lya Leza lilembedwe alimwi tulakonzya kusolekesya kutobela nzyotubala. Eeci cipa kuba abuumi bukkomanisya. Pele ino kuti akaambo kamapenzi twalilemeka munzila iitondezya bube bumwi butali kabotu, mbuli kutakkazyika moyo alimwi akulisumpula? Kwiinda mumupailo uupegwa camoyo woonse alimwi alugwasyo lwa Jwi lya Leza amuuya wakwe, tulakonzya kukazya tumpenda tuli boobo akuyaambele ‘mukulisamika buntu bupya.’ (Ba-Kolose 3:9-14) Kuyungizya waawo, tulayuma kulusyomo notuliyumya mumapenzi. (1 Petro 1:6, 7) Paulo wakagwasyigwa kapati kumapenzi ngaakajana akaambo kakuti akamupa kumusyoma kapati Jehova. (2 Ba-Korinto 1:8-10) Sena tulekela mapenzi kutugwasya kuba abube bubotu?

Amusyome Jehova Lyoonse

21. Ncinzi cicitika Leza nabapa kufwa nsoni basikamikami?

²¹ Ijwi lya Leza lilatupa kaambo kabotu ncotweelede kumusyoma Jehova. (Intembauzyo 119:73-80) Ikuti katumusyoma ncobeni Mulengi wesu, kunyina kaambo kaya kutupa kuba ansoni. Pele akaambo kazintu nzyobacita bamwi, tuyandika luumbulizyo alimwi tulakonzya kuyeeya kupaila kuti: “Basikamikami bausigwe insoni.” (Intembauzyo 119:76-78) Jehova nabapa kufwa nsoni bantu bali boobo, imilimo yabo mibyaabi ilayubununwa alimwi izina lyakwe lisalala lilasalazyigwa. Tulakonzya kuba masimpe kuti basikupenzya bantu ba Leza mubwini kunyina mpindu njobajana pe. Mucikozyanyo, kunyina nobacikonzya alimwi tabakacikonzyi kubamanisya Bakamboni ba Jehova, ibasyoma muli Leza amyoyo yabo yoonse.—Tusimpi 3:5, 6.

22. Mmunzila nzi sintembauzyo mwaakali mbuli “inkomo yayuminina abusi”?

 ²² Ijwi lya Leza liyumya lusyomo lwesu mulinguwe notupenzyegwa. (Intembauzyo 119:81-88) Akaambo kakuti basikamikami bakali kumupenzya, sintembauzyo wakalimvwa mbuli “inkomo yayuminina abusi.” (Intembauzyo 119:83, 86) Ikaindi, inkomo zibambidwe acipaya zyakali kubelesyegwa kubikkila maanzi, waini alimwi azimwi buyo. Eelyo nozyatakali kubelesyegwa, inkomo eezyi zyakali kunyana nozyaanzikwa mukaanda ikazwide busi. Sena kuli ciindi buyumuyumu antela kupenzyegwa nokumupa kulimvwa mbuli “inkomo yayuminina abusi”? Ikuti kacili boobo, amusyome muli Jehova akupaila kuti: “Undiponye, mbubonya mbuli luzyalo lwako, kuti mbambe milumbe yamulomo wako.”—Intembauzyo 119:88.

23. Mmakani nzi ngotwaiya mukulanga-langa Intembauzyo 119:1-88, alimwi ncinzi ncotukonzya kulibuzya mbotulangila kwiiya zili ku Intembauzyo 119:89-176?

²³ Nzyotwalangalanga mucisela ca Intembauzyo 119 zitondezya kuti Jehova ulatondezya luse kubabelesi bakwe akaambo kakuti balalisyoma ijwi lyakwe alimwi balayandisya imbeta zyakwe, ziyeekezyo, milumbe alimwi amilawo yakwe. (Intembauzyo 119:16, 47, 64, 70, 77, 88) Ulikkomene kuti aabo ibalyaabide kulinguwe balalibamba kweelana acaamba ijwi lyakwe. (Intembauzyo 119:9, 17, 41, 42) Mbomulangila kuciiyo cacibeela casyaala cantembauzyo eeyi iikulwaizya kapati, mulakonzya kulibuzya kuti, ‘Sena ncobeni ndilekela jwi lya Jehova kumunikila nzila yangu?’

Bupanduluzi buyungizidwe

Ino Inga Mwaingula Buti?

• Ino lukkomano lwini-lwini luyeeme aali?

• Mbuti jwi lya Jehova mbolitupa kusalala kumuuya?

• Muunzila zili buti ijwi lya Leza molitupa busicamba alimwi aluumbulizyo?

• Nkaambo nzi ncotweelede kuba alusyomo muli Jehova alimwi ajwi lyakwe?

[Mibuzyo yaciiyo]

[Zifwanikiso izili apeeji 4]

Rute, Rahabu alimwi abana Hebrayo bakubusi ibakali mubuzike ku Babuloni ‘bakalibamba mbubonya mbuli ijwi lya Leza’

[Cifwanikiso icili apeeji 5]

Paulo cabusicamba ‘wakakanana imbeta zya Leza kubusyu bwabami’