Bulangizi Bwabubuke—Ino Bwaamba Nzi Kuli Ndinywe Kumugama?
Bulangizi Bwabubuke—Ino Bwaamba Nzi Kuli Ndinywe Kumugama?
“Ulafumbatula ijanza lyako, ulakutya kusukama kwabaumi boonse.” —Intembauzyo 145:16.
1-3. Mbulangizi nzi bamwi mbobajisi bwakumbele? Amupe cikozyanyo.
CHRISTOPHER uujisi myaka iili 9 amupati wakwe abaacisyanyina abacizyi babausyi kubikkilizya abeeninyina bobilo, bakaunkide mumulimo wa Bunakristo wakuŋanda aŋanda mafwumofwumo kufwaafwi adolopo lya Manchester ku England. Magazini yesu ya Awake yakapandulula cakacitika. “Masyikati bakaunka kunkomwe yalwizi iili afwaafwi, kubusena bwakulikatalusya akusobanina ku Blackpool. Boonse kabali 6 bakali akati kabantu bali 12 bakafwa mpoonya aawo muntenda yamumugwagwa, yalo yakapandululwa amapulisa kuti yakali ntenda iitaambiki.”
2 Imangolezya kabutanasika buzuba bwakacitika ntenda eeyo, mukwasyi woonse wakaunkide ku Ciiyo Cabbuku Cambungano, kwalo makani aajatikizya lufwu nkwaakabandikwa. Bausyi bakaamba kuti “Christopher wakali mwana uyeeya kapati. Buzuba oobo wakaamba cakusalazya kujatikizya nyika impya abulangizi bwakwe bwakumbele. Aboobo, imubandi wesu nowakazumanana, Christopher cakutayeeyelwa wakaamba kuti: ‘Bubotu bwakuba Kamboni wa Jehova mbwakuti, nokuba kuti lufwu lulacisa, tulizyi kuti buzuba bumwi tuyoobonana alimwi anyika.’ Kunyina uli woonse wakaliko wakazyiba kuti majwi aayo anooyeeyegwa boobu.” *
3 Mumyaka yakuma 1940, Kamboni waku Austria wazina lya Franz wakaziba kuti ulajaigwa amuncini ngobakosozya bantu mitwe akaambo kakukaka kuleka kusyomeka muli Jehova. Franz wakalembela banyina kali ku Berlin nkubakamwaangide. Wakati: “Kweelana ambondizi, ikuti nindakazumina kuba sikalumamba, nindakacita cibi ciyandika lufwu. Eeci cakali kukonzya kuba cintu cibyaabi kapati kulindime. Nindatakaba abulangizi bwakubusyigwa. . . . Pele lino, nomuyandwa Baama, bakwesu alimwi anobacizyi moonse, sunu ndaambilwa citiindicitikile, mutayoowi ndaambilwa kuti nkujaigwa. Ndiyoojaigwa juunza mafwumofwumo. Ndilaa nguzu kuzwa kuli Leza, mbubonya mbobakabede Banakristo bakasimpe kaindi. . . . Ikuti mwazumanana kusyomeka kusikila kulufwu, tuyoobonana alimwi twaakubusyigwa. . . . Atukabonane alimwi.” *
4. Mbuti zyakuluula zyaambwa waawa mbozyitujatikizya, alimwi ncinzi citobela ncotuyoolanga-langa?
4 Bulangizi bwabubuke cakali cintu cipati kuli Christopher a Franz. Bwakali bwini-bwini kuli mbabo. Masimpe zibalo eezi zilatunjila mumoyo. Kutegwa tukomezye luyando lwesu akulumba Jehova alimwi akuyumya bulangizi bwesu bwabubuke, atulange-lange bubuke ncobuyoocitikila alimwi aceeci mbocikonzya kutujatikizya swebo kutugama.
Cilengaano Cabubuke Bwaanyika
5, 6. Ino cilengaano cakalembwa amwaapostolo Johane ku Ciyubunuzyo 20:12, 13 ciyubununa nzi?
5 Mucilengano cazintu ziyoocitika mu Myaka iili Cuulu ya Bulelo bwa Kristo Jesu, imwaapostolo Johane wakabona bubuke bwaanyika kabutola busena. Wakaamba kuti: “Mpawo ndakabona bafu boonse, bapati abaniini. . . . Nkabela lwizi lwakabweedezya bafu bali mulindulo, alwalo lufu acikalilo cabafu zyoonse zyakabweedezya bafu bali mulinzizyo.” (Ciyubunuzyo 20:12, 13) Kunyina makani aciimo ncomujisi—kufwumbwa naa muli “bapati” naa “baniini”—boonse aabo bali mu Cikalilo cabafwu (Sheol), icuumbwe muzikkilwa bantu, boonse bayoobusyigwa. Aabo boonse bakafwida mulwizi bayoopilukila kubuumi kuciindi eeco. Eeci cintu cibotu iciyoocitika ncibeela camakanze aa Jehova.
6 Kulela kwa Kristo kwacuulu camyaka kuyootalika aakwaangwa kwa Saatani akufwusilwa mumulindi uutagoli. Mbwaanga Saatani tanikujisi nguzu ciindi eeco cabulelo, kunyina umwi wabaabo bakafwutuka kumapenzi mapati uuyoonyonganizyigwa a Saatani. (Ciyubunuzyo 20:1-3) Myaaka iili cuulu ilakonzya kulibonya kuti nciindi cilamfwu kuli ndinywe, pele kuli Jehova ili “mbuli buzuba bomwe.”—2 Petro 3:8.
7. Ino lubeta mu Bweendelezi bwa Kristo bwa Myaka iili Cuulu lunooyeeme aanzi?
7 Kweelana acilengaano, Bweendelezi bwa Kristo bwa Myaka iili Cuulu buyooba ciindi calubeta. Imwaapostolo Johane wakalemba kuti: “Ndakabona bafu, bapati abaniini, kabaimvwi kumbele lyacuuno eeco, eelyo mabbuku akavununwa. Alimwi kwakali alimbi bbuku lyakavununwa, eeli lyakali bbuku lyabuumi. Bafu bakabetekwa mbubonya mbuli mbukwakalembedwe mumabbuku, kweendelana amilimo yabo. . . . Nkabela boonse bakabetekwa kweendelana amilimo yabo njibakacita.” (Ciyubunuzyo 20:12, 13, BT) Amubone kuti lubeta oolu taluyeeme amicito njaakacita katanafwa muntu. (Ba-Roma 6:7) Muciindi caboobo ciya buyo mbuli zili “mumabbuku” ayoojalulwa. Micito yamuntu naamana kwiiya zili mumabbuku ziziyootondezya naa zina lyakwe lyakalembwa ‘mubbuku lyabuumi.’
“Bubuke Bwakubuumi” naa “Bubuke Bwakulubeta”
8. Nzintu nzi zyobilo zilangilwa kuti ziyoocitika kuli baabo bayoobusigwa?
8 Kumatalikilo mucilengaano ca Johane, Jesu upandululwa kuti nguujisi “zijaluzyo zyalufu azya-Gehena.” (Ciyubunuzyo 1:18) Ulabeleka kali “Mwami wabuumi,” wakapegwa nguzu a Jehova zyakubeteka “baumi abakafwa.” (Incito 3:15; 2 Timoteo 4:1) Ino uyoozicita buti eezi? Kwiinda mukubusya baabo bafwide. Jesu wakaambila nkamu njaakali kuyiisya kuti: “Mutagambwi aliyeeyi nkani, nkaambo ciindi ciyoosika ncobati kamvwe ijwi lyakwe boonse abali muzyuumbwe.” Mpoonya wakayungizya kati: “Abo abakacita kabotu bayoobusigwa kubuumi, abaabo abakacita bubi bayoobusigwa kukubetekwa.” (Johane 5:28-30) Aboobo, ino basankwa abamakaintu basyomeka bakaindi balindila nzi kumbele?
9. (a) Cakutadooneka ncinzi banji ncobayooyiya baakubusyigwa? (b) Mmulimo nzi mupati wakuyiisya uyoocitwa?
9 Ciindi aaba bantu bansiku basyomeka baakubusigwa, bayooziba kuti zisyomezyo zyobakali kusyoma zyazuzikizyigwa. Bayooyandisya kuziba Lunyungu lwamwanakazi wa Leza, lwaambwa mubusinsimi bwamu Bbaibbele bwakutaanguna ku Matalikilo 3:15. Bayookondwa kumvwa kuti Mesiya wakasyomezyegwa, nkokuti Jesu, wakasyomeka kusikila kulufwu akupa buumi bwakwe kacili cinunuzyo. (Matayo 20:28) Aabo baya kubatambula kubuumi bayookkomana kubagwasya kumvwisya kuti bubambe bwacinunuzyo eeci ncitondezyo caluzyalo lwa Jehova aluse. Aabo babusigwa baakuzyiba Bwami bwa Leza ncobucita mukuzuzikizya makanze a Jehova anyika, kakunyina akudooneka bayoomutembaula Jehova. Bayooba acoolwe cakutondezya kusyomeka kwabo kuli Usyi wabo siluyando wakujulu alimwi aku Mwanaakwe. Uli woonse unooliko kuciindi eeco uyookondwa kutola lubazu mumulimo mupati wakuyiisya bantu banji bayoozwa kunamaumbwe, balo alimwi buyooyandika kuzumina bubambe bwa Leza bwacinunuzyo.
10, 11. (a) Ino Cuulu ca Myaka ciyoopa zyoolwe zili buti kuli boonse munyika? (b) Ino mbuti eeci mboceelede kutujatikizya?
10 Abrahamu aakubusyigwa, uyooumbulizyigwa abukkale bunooli mubweendelezi bwa “munzi” ngwaakali kulangila. (Ba-Hebrayo 11:10) Elo kaka Jobu wamumazuba aansiku uusyomeka uyookondwa kuzyiba kuti buumi bwakwe mbwaakajisi bwakayumya babelesi ba Jehova bamwi ibakayaanya masunko akaambo kalusyomo lwabo! Daniele uyooyandisisya kuzyiba kuzuzikizyigwa kwabusinsimi mbwaakasololelwa kulemba.
11 Masimpe, aabo bayooba abuumi munyika iluleme impya, kube kwiinda mukubusyigwa buya naa kufwutuka mapenzi mapati, bayooba azyakwiiya zinji zijatikizya makanze a Jehova kunyika akubantu. Bulangizi bwakupona kukabe kutamani alimwi akutembaula Jehova kuciindi coonse, masimpe kuyoopa kuti pulogilamu yakuyiisya mu Cuulu ca Myaka ikkomanisye kapati. Nokuba boobo, muntu aumwi ncanoocita notwiiya zili mumabbuku nceciyooyandika kapati. Sena tuyoozibelesya nzyotuyooiya? Sena tuyoozinzibala kuyeeya akubelesya makani ayandika akonzya kutuyumya kumukazya Saatani kukusoleka kwakwe kwamamanino kwakuyanda kutugusya kukasimpe?
12. Ncinzi ciyoogwasya umwi aumwi kuba alubazu lukkwenyi mumulimo wakuyiisya alimwi akucinca nyika kuba paradaiso?
12 Ncotuteelede kuluba nzilongezyo zibotu ziyooboola akaambo kampindu yacipaizyo cacinunuzyo ca Kristo. Aabo bayoobusyigwa tabanikuciswi naa kulemana ikuliko mazuba aano. (Isaya 33:24) Mibili ili kabotu alimwi abuumi bulondokede ziyoopa kuti bantu bakakkale munyika mpya kabatola lubazu lukkwenyi mumulimo wakuyiisya nzila zyabuumi kuzyuulu zyabaabo bayoobusyigwa. Aabo bayookkala munyika bayootola lubazu mumulimo mupati uutanacitwa anyika, iwakucinca nyika yoonse kuba paradaiso kutegwa Jehova atembaulwe.
13, 14. Mukusunka kwamamanino ino ncinzi ncayoogusilwa Saatani , alimwi ncinzi cilangilwa kucitikila umwi aumwi wesu kumugama?
13 Saatani aakugusyigwa kuzwa mumulindi uutagoli kutegwa asunke kamamanino, uyoosola kuyunga bantu alimwi. Kweelana a Ciyubunuzyo 20:7-9, ‘masi aenedwe’ oonse naa bantu bali mubweendelezi bubi bwa Saatani bayoobetekwa kwiinda mukunyonyoonwa: ‘Mulilo uyoozwa kujulu, akubaumpa.’ Kuli baabo bayoobusigwa mu Cuulu ca Myaka, lunyonyooko oolu luyoopandulula kubukila kukunyonyoonwa. Mukwiindana, bantu basyomeka bayoobusyigwa bayoopegwa cipego cabuumi butamani. Masimpe kubusyigwa kwabo kuyooba ‘kubusigwa kubuumi.’—Johane 5:29.
14 Mbuti bulangizi bwabubuke mbobukonzya kutuumbulizya lino? Ee, ino ncinzi ncotunga twacita kutegwa tusinizye kuti tuyootambula mpindu kumbele?
Ziiyo Nzyotukonzya Kwiiya Lino
15. Mbuti lusyomo lwabubuke mbolukonzya kutugwasya lino?
15 Mulakonzya kuti mwakasweekelwa muyandwa wanu mulufwu caino-ino alimwi ambweni muli mukuliyumya kutegwa mukkalikane. Bulangizi bwabubuke bulamugwasya kukkazika moyo akumupa nguzu eezyo bamwi nzyobatajisi akaambo kakutazyiba kasimpe. Paulo wakabaumbulizya boobu bana Tesalonika: “Tulayanda kuti mukaswiililisye makani aaboona, kuti mutafwi buusu mbuli bamwi abatajisi ncobalangila.” (1 Ba-Tesalonika 4:13) Sena mulakonzya kulibona munyika impya, kamulangilila kubusyigwa kwabantu? Ikuti naa mboobo, amujane luumbulizyo lino kwiinda mukuzinzibala kuyeeya bulangizi bwakuyooswaangana abayandwa banu alimwi.
16. Mbuti mbomuyoolimvwa bubuke bwaakucitika?
16 Mulakonzya kuti lino mulipengede akaambo kakuzanga kwa Adamu, ambweni mulaciswa-ciswa. Mutalekeli mapenzi aaya kumupa kuluba bubambe bumugeme bwakuyoobuka alimwi kamujisi buumi bubotu alimwi anguzu munyika mpya. Mpoonya mwaakujalula meso akubona bantu bajisi luyandisyisyo alimwi bakkomenyi kabamutambula, tamukalubi kumulumba Leza akaambo kaluzyalo lwakwe.
17, 18. Nziiyo nzi zyobilo nzyotweelede kuyeeya?
17 Kwaciindi cino, amulange ziiyo zyobilo nzyotweelede kuyeeya. Cimwi ncakuyanda kubelekela Jehova lino camoyo woonse. Mukwiiya Simalelo wesu Kristo Jesu, buumi bwesu bwakulyaaba butondezya luyando lwesu kuli Jehova akuli basimukoboma. Ikuti naa kukazyigwa kwatupa kuti tutabi alwaanguluko, tulasala kuzumanana kuyuma mulusyomo kufwumbwa naa twasikilwa masukusyo aali buti. Ikuti basikukazya kabakanza kutujaya, bulangizi bwabubuke bulatuumbulizya akutuyumya kuzumanana kusyomeka kuli Jehova aku Bwami bwakwe. Masimpe, busungu bwesu mumulimo wakukambauka Bwami akugwasya bantu kuba basikwiiya bulatupa bulangizi azilongezyo zitamani Jehova nzyaayoboda baabo baluleme.
18 Ciiyo cabili cijatikizya masunko aboola akaambo kakutalondoka kwesu. Luzibo lwesu lwabulangizi bwabubuke alimwi akulumba Jehova akaambo kaluzyalo lwakwe zilatuyumya kutegwa tuzumanane kusyomeka. Imwaapostolo Johane wakacenjezya kuti: “Mutayandi nyika, neziba zintu zyamunyika. Kuti muntu wayanda nyika, luyando lwa-Taata taluli mulinguwe. Nkaambo zintu zyoonse zili munyika, niziba zisusi zyanyama niziba zisusi zyameso nikuba kulisumpula kwabuumi, tazili zya-Taata, pe, nzyenyika. Alimwi nyika ilamana, azisusi zyayo, pele oyo uucita makanze aa-Taata ulakalilila kukabe kutamani.” (1 Johane 2:15-17) Kuyunga kwanyika azintu zyakumubili takukayandiki kapati kulindiswe ikuti twakweelanya ‘abuumi bwini-bwini.’ (1 Timoteo 6:17-19) Ikuti twasunkwa kucita zyakutalilemeka, tuyookaka canguzu. Ikuti twafwa kaitanasika Amagedoni, ikuzumanana abukkale bwakutalilemeka butamukkomanisyi Jehova kulakonzya kupa kuti tube muciimo cabaabo batajisi bulangizi bwabubuke.
19. Ncoolwe nzi cipati ncotuteelede kuluba?
19 Ikapati tatweelede kuluba coolwe cipati cakukkomanisya moyo wa Jehova lino alimwi kukabe kutamani. (Tusimpi 27:11) Kusyomeka kwesu kusikila kulufwu naa kusikila kumamanino aabweende bwazintu oobu bubyaabi kutondezya Jehova kulubazu nkotubede mumakani abweendelezi. Kuyooba kukkomana kapati kukkala munyika ya Paradaiso kwiinda mukufwutuka mapenzi mapati naa kwiinda mukubusigwa kwamaleele.
Kutupa Nzyotulombozya
20, 21. Ncinzi ciyootugwasya kuzumanana kusyomeka nokuba kuti tulijisi mibuzyo yataingulwa kujatikizya bubuke? Amupandulule.
20 Mubandi wesu wabubuke tiwaingula mibuzyo yoonse njotujisi. Mbuti Jehova mbwayoocita kuli baabo bakali kwetene kabatanafwa? (Luka 20:34, 35) Sena bubuke buyoocitikila kubusena nkobakafwida bantu? Sena bayoobusyigwa bayoobusyilwa kufwaafwi amikwasyi yabo? Mibuzyo minji iijatikizya bubuke tainaingulwa. Nokuba boobo, tweelede kwaabikkila maano majwi a Jeremiya aakuti: “Jehova mubotu kuliyooyo uumulangila, kumuntu uumuyandaula. Ncibotu kuti muntu aumune akulindila lufutuko lwa-Jehova.” (Malilo 3:25, 26) Muciindi cakwe Jehova, mibuzyo yoonse iyooingulwa kweelana ambotuyanda. Nkaambo nzi ncotunga twacisyoma eeci?
21 Ikuzinzibala kuyeeya majwi akasololelwa amuuya sintembauzyo ngaakaimba kujatikizya Jehova, wakati: “Ulafumbatula ijanza lyako, ulakutya kusukama kwabaumi boonse.” (Intembauzyo 145:16) Notuyaabukomena, nzyotulombozya zilacinca. Nzyotwakali kuyanda notwakali baniini tazyicili nzyotuyanda mazuba aano. Mbotububona buumi bulijatikizyidwe azintu zitucitikila, kubikkilizya anzyotulangila. Aboobo, kufwumbwa naa nzintu nzi zibotu nzyotuyoolombozya munyika mpya, Jehova uyootupa.
22. Nkaambo nzi ncotujisi kaambo kabotu kakutembauda Jehova?
22 Cintu cipati kuli aumwi wesu lino nkusyomeka. “Kumakani aababanzi, cintu ciyandwa nceeci, kuti muntu asyomeke.” (1 Ba-Korinto 4:2) Tuli bantu babulemu kumakani mabotu a Bwami bwa Leza. Busungu bwesu mukukambauka makani aaya mabotu kuli boonse mbotujana kutugwasya kuba munzila isololela kubuumi. Lyoonse kamuyeeya kaambo kakuti “Bantu boonse buyo balasikilwa ziindi zyalufu azyamapenzi.” (Mukambausi 9:11) Mukucesya kulibilika kutayandiki kuli koonse kuboola akaambo kazicitika mubuumi, amujatisye kuba abulangizi bubotu bwabubuke. Amusyome kuti, ikuti kakuboneka kuti muyoofwa kabutanatalika Bweendelezi bwa Kristo bwa Cuulu ca Myaka, mulakonzya kuumbulizyigwa mukuzyiba kuti bubuke buyooba ncobeni. Muciindi Jehova ncabikkide, muyooinduluka majwi Jobu ngaakaambila Mulengi kuti: “Noyoondiita njoovuwa.” Aatembaulwe Jehova walo uuyanda kuyoobusya baabo ibali mumizeezo yakwe!—Jobu 14:15.
Bupanduluzi buyungizidwe
^ munc. 2 Amubone Awake! yamu July 8, 1988, apeeji 10, yakamwaigwa a Bakamboni ba Jehova.
^ munc. 3 Jehovah’s Witnesses—Proclaimers of God’s Kingdom, apeeji 662, lyakamwaigwa a Bakamboni ba Jehova.
Sena Muciyeeyede?
• Ino ncinzi ciyoopa kuti bantu babetekwe mu Myaka iili Cuulu?
• Nkaambo nzi bamwi ‘ncobayoobusyilwa kubuumi’ kakuli bamwi ‘bayoobukila kukubetekwa’?
• Mbuti bulangizi bwabubuke mbobukonzya kutuumbulizya lino?
• Mbuti majwi aajanika ku Intembauzyo 145:16 mbwaakonzya kutugwasya kumvwisya mibuzyo yataingulwa iijatikizya bubuke?
[Mibuzyo yaciiyo]
[Zifwanikiso izili apeeji 27]
Mbuti lusyomo mububuke mbolukonzya kutugwasya lino?