Ijwi Lya Leza Alimunikile Inzila Yanu
Ijwi Lya Leza Alimunikile Inzila Yanu
“Ijwi lyako . . . lilamunikila inzila yangu.”—INTEMBAUZYO 119:105.
1, 2. Muubukkale buli buti ijwi lya Jehova muliyoomunikila inzila yesu?
IJWI lya Jehova liyoomunikila inzila yesu ikuti naa twalizumizya. Ikutegwa tugwasyigwe amumuni wakumuuya ooyo, tweelede kuba basikwiiya basungu ba Jwi lya Leza lilembedwe alimwi akutobela lulayo ndolipa. Lilikke twacita boobo notukonzya kuzuminizya majwi aasintembauzyo aakuti: “Ijwi lyako ndilampi kuzituta zyangu, lilamunikila inzila yangu.”—Intembauzyo 119:105.
2 Lino atulange-lange Intembauzyo 119:89-176. Elo kaka taalivwulili makani aajanika mutupango ootu, itubambidwe muzibeela zili 11! Tupango ootu tulakonzya kutugwasya kuzumanana munzila iitola kubuumi butamani.—Matayo 7:13, 14.
Nkaambo nzi Ncotweelede Kuyandisya Jwi lya Leza?
3. Mbuti Intembauzyo 119:89, 90 mboitondezya kuti tulakonzya kulisyoma jwi lya Leza?
3 Kuyandisya jwi lya Jehova kupa kukkalikana kumuuya. (Intembauzyo 119:89-96) Sintembauzyo wakaimba kuti: “Lyoonse, O Jehova, ijwi lyako lilijatilide kujulu. . . . Nduwe wakasitikizya nyika, lino ilikede mbwa.” (Intembauzyo 119:89, 90) Kwiinda mujwi lya Leza—“milao [yakwe] yamajulu”—zintu zyamujulu zileenda cabulondo munzila zyazyo alimwi nyika yakabambwa kuti ikkale kukabe kutamani. (Jobu 38:31-33; Intembauzyo 104:5) Tulakonzya kuzisyoma zyoonse nzyaamba Jehova mujwi lyakwe; nzyaamba Leza ‘ziyoozuzikizyigwa’ ncobeni kweelana amakanze aakwe.—Isaya 55:8-11.
4. Ino kuyandisya jwi lya Leza kubagwasya buti babelesi bakwe ibali mumapenzi?
4 Ikuti sintembauzyo ‘naatakali kubotelwa mulawo wa Leza, naakafwa mumapenzi aakwe.’ (Intembauzyo 119:92) Tanaakali kupenzyegwa abamuzwakule; bakali bana Israyeli basikutyola mulawo ibakamusulide. (Levitiko 19:17) Pele eeci tiicakamutyompya pe, nkaambo wakali kuuyanda mulawo wa Leza iwakali kumuyumya. Ku Korinto, mwaapostolo Paulo wakalijana mu “matambo aakubabunyina babeji,” ambweni kubikkilizya a “baapostolo bapati cakwiinda” ibakali kumuyandawida kaambo. (2 Ba-Korinto 11:5, 12-14, 26) Pele Paulo wakakwabililwa kumuuya akaambo kakuti wakali kuliyandisya jwi lya Leza. Mbwaanga tulaliyandisya Jwi lya Jehova lilembedwe alimwi akutobela nzyolyaamba, tulabayanda bakwesu. (1 Johane 3:15) Notusulaikwa buti kubantu bamunyika eeyi, eeci tacitupi kwaaluba malailile aa Leza. Tulazumanana kucita kuyanda kwakwe calukamantano abakwesu, mbotulangila kupona kukabe kutamani katubelekela Jehova mulimo uukkomanisya.—Intembauzyo 119:93.
5. Mbuti Mwami Asa mbwaakayandaula Jehova?
5 Katutondezya mbotulyaabide kuli Jehova, tulakonzya kupaila kuti: “Ndi wako, undifutule; nkaambo ndayandaula milumbe yako.” (Intembauzyo 119:94) Mwami Asa wakayandaula Leza alimwi wakalugwisya luleyo loonse mucisi ca Juda. Kumuswaangano mupati wakacitwa mumwaka wakkumi amusanu wabweendelezi bwa Asa (mwaka wa 963 B.C.E.), bana Juda “bakatanga cizuminano kuyandaula Jehova.” Leza “wakajanwa kulimbabo” alimwi “wakabapa luumuno koonse koonse.” (2 Makani 15:10-15) Cikozyanyo eeci ceelede kukulwaizya kufwumbwa muntu iwakaleya kumbungano ya Bunakristo kuti atalike alimwi kumuyandaula Leza. Uyoobalongezya akubakwabilila boonse aabo ibatalika alimwi kuswaangana lyoonse abantu bakwe.
6. Ncinzi ciyootukwabilila kutegwa tutanyonyoonwi kumuuya?
6 Ijwi lya Jehova lilatupa busongo ibukonzya kutukwabilila kukunyonganizyigwa kumuuya. (Intembauzyo 119:97-104) Milawo ya Leza ulatusongwaazya kwiinda basinkondoma. Ikutobela ziyeekezyo zyakwe kutupa luzibo alimwi ‘ikubamba imbeta zyakwe kutupa kuba abusongo kwiinda bapati.’ (Intembauzyo 119:98-100) Ikuti naa majwi aa Jehova kaali ‘mabotu mucanka kwiinda buci mumulomo wesu,’ tuyoosulaika akutantamuka “inzila imbi zyoonse.” (Intembauzyo 119:103, 104) Ikucita boobo kuyootukwabilila kukunyonyoonwa kumuuya notuyaanya bantu balisumpula, bayoosya alimwi batakombi Leza mumazuba aaya aakumamanino.—2 Timoteo 3:1-5.
Ilampi Kuzituta Zyesu
7, 8. Ikutegwa tutobele caambwa ku Intembauzyo 119:105, ncinzi ncotweelede kucita?
7 Ijwi lya Leza nkokuzwa mumuni wakumuuya uusyomeka lyoonse. (Intembauzyo 119:105-112) Kufwumbwa naa tuli Banakristo bananike antela ibeenzinyina ba “mbelele zimwi,” twaamba kuti: “Ijwi lyako ndilampi kuzituta zyangu, lilamunikila inzila yangu.” (Johane 10:16; Intembauzyo 119:105) Ijwi lya Leza lili mbuli ilampi limunikila inzila yesu, kutegwa tutalebwi alimwi akuwa kumuuya. (Tusimpi 6:23) Pele, aumwi kumugama weelede kulekela jwi lya Jehova kuba mbuli lampi kuzituta zyesu.
8 Tweelede kuba bantu batazungaani mbuli mulembi wa Intembauzyo 119. Wakakanzide kutaleya kumbeta zya Leza. Wakati: “Ndakakonkezya, alimwi ndaimika, kuti mbambe imbeta zyako [Jehova] ziluleme.” (Intembauzyo 119:106) Tatweelede kuubya-ubya kucita ciiyo ca Bbaibbele lyoonse alimwi akutola lubazu mumiswaangano ya Bunakristo.
9, 10. Ino tuzyi buti kuti bantu balyaabide kuli Jehova balakonzya ‘kuleya kumalailile aakwe,’ pele ino mbuti eeci mbocinga ceelebwa?
9 Sintembauzyo ‘tanaakasowa malailile aa Leza,’ pele eeco cilakonzya kucitika kumuntu uulyaabide kuli Jehova. (Intembauzyo 119:110) Mwami Solomoni wakaleya, nokuba kuti wakali cibeela camusyobo uulyaabide kuli Jehova alimwi kumatalikilo wakatobela busongo mbwaakapegwa a Leza. “Nekubaboobo banakazi beenzu bakamuwisya muzibi” kwiinda mukumoongelezya kukomba baleza bakubeja.—Nehemiya 13:26; 1 Bami 11:1-6.
10 “Sikuteya,” Saatani ulateya tukole tunji. (Intembauzyo 91:3) Mucikozyanyo, imuntu umwi wakali mukombi ulakonzya kutoongelezya kuti tuleye munzila yamumuni wakumuuya kutegwa tunjile mumudima wabasiluleyo. Akati ka Banakristo ku Tuataira, kwakali “oyo mwanakazi Jezebele,” kulangilwa kuti kakali kabunga kabamakaintu ibakali kuyiisya bamwi kukomba mituni akucita bwaamu. Jesu tanaakalekelela zibi zili boobu, aswebo tatweelede kuzilekelela. (Ciyubunuzyo 2:18-22; Juda 3, 4) Aboobo atupailile lugwasyo lwa Jehova kutegwa tutaleyi kumbeta zyakwe pele tuzumanane mumumuni uuzwa kuli Leza.—Intembauzyo 119:111, 112.
Ikugwasyigwa a Jwi lya Leza
11. Kweelana a Intembauzyo 119:119, ino Leza ubabona buti basizibi?
11 Ikuti katutaleyi kumalaile aakwe, Leza uyootugwasya. (Intembauzyo 119:113-120) Tatubayandi bantu “basimyoyoyobile,” mbubwenya Jesu mbwabakazya bantu mazuba aano balyaamba kuba Banakristo bamana bakasaala buyo. (Intembauzyo 119:113; Ciyubunuzyo 3:16) Akaambo kakuti tubelekela Jehova camoyo woonse, ngonguwe ‘mayubilo eesu’ alimwi uyootugwasya. ‘Uyoobasowa boonse bapambuka kumbeta zyakwe’ kwiinda mukutalika lweeno abubeji. (Intembauzyo 119:114, 117, 118; Tusimpi 3:32) Basizibi aabo ubabona kuti “mankwisila,” nkokuti tombe ligwisyigwa kumabwe mayandisi mbuli nsiliva alimwi angolida. (Intembauzyo 119:119; Tusimpi 17:3) Tweelede kuziyanda ziyeezyo zya Leza lyoonse, nkaambo mubwini tatuyandi kusangana abasizibi amulwi watombe liyoonyonyoonwa!
12. Nkaambo nzi kuyoowa Jehova ncokuyandika kapati?
12 Sintembauzyo wakati: “Mubili wangu ulakankama kubusyu bwako [Jehova].” (Intembauzyo 119:120) Ikuba abuyoofwu bweelede kuli Leza, ibulibonya kwiinda mukutantamuka zintu nzyasulide, kulayandika kapati ikutegwa atugwasye mbotuli babelesi bakwe. Ikuba abuyoofwu bweelede kuli Jehova kwakapa Jobu kupona bukkale bubotu. (Jobu 1:1; 23:15) Ikuyoowa Leza kulakonzya kutugwasya kuzumanana mubukkale mbwakkomanina Leza kunyina makani azintu zikonzya kutucitikila. Pele kukakatila kuyanda kuti katupaila camoyo woonse mulusyomo.—Jakobo 5:15.
Amupaile Calusyomo
13-15. (a) Nkaambo nzi ncotukonzya kusyoma kuti mipailo yesu iyooingulwa? (b) Ncinzi cikonzya kucitika ikuti katutazyi ncotweelede kwaamba mumupailo? (c) Amupandulule mbuli Intembauzyo 119:121-128 mboikonzya kweendelana “amitongelo [yesu] iitaambiki” mumipailo.
13 Tulakonzya kupaila katusyomede kuti Leza uyootugwasya. (Intembauzyo 119:121-128) Mbubwenya mbuli sintembauzyo, tulijisi lusyomo kuti mipailo yesu iyooingulwa. Nkaambo nzi? Nkaambo kakuti tuliiyanda milawo ya Leza “kwiinda ingolida, ii, kwiinda ingolida loko.” Kuyungizya waawo, ‘milumbe ya Leza’ twiibona kuba mibotu.—Intembauzyo 119:127, 128.
14 Jehova ulakumvwa kulomba kwesu nkaambo tulapaila calusyomo alimwi tulabikkila maano kutobela malailile aakwe. (Intembauzyo 65:2) Pele ino kuti naa zimwi ziindi katuba amapenzi aataambiki cakunga tatuzyi ncotukonzya kwaamba mumupailo? Nocili boobo “Muuya mwini ulatukombelezezya amitongelo iitaambiki.” (Ba-Roma 8:26, 27) Aziindi zili boobo, Leza ulaazumina majwi aajanika mu Jwi lyakwe kaali mipailo yiiminina nzyotuyandika.
15 Magwalo alijisi mipailo minji alimwi atwaambo tukonzya kweendelana “amitongelo [yesu] iitaambiki.” Mucikozyanyo, amulange Intembauzyo 119:121-128. Mbwaapandulwidwe makani aawa kulakonzya kweendelana abukkale bwesu. Mucikozyanyo, ikuti katubayoowa basikutupenzya, tulakonzya kulomba lugwasyo lwa Leza mbuli mbwaakacita sintembauzyo. (Kapango 121-123) Atwaambe kuti tuyanda kusala kujatikizya cimwi cintu cipati. Tulakonzya kupaila kuti muuya wa Jehova utugwasye kwiibaluka alimwi akuzibelesya ziyeekezyo zyakwe. (Kapango 124, 125) Nokuba kuti tulizisulide “inzila zyoonse zibi,” tweelede kumulomba Leza kuti atugwasye kutegwa tutazundwi amusunko uunga watupa kutyola mulawo wakwe. (Kapango 126-128) Ikuti katulibala Bbaibbele abuzuba, makani aagwasya aali boobo tulakonzya kwaayeeya ciindi notukombelezya Jehova mumupailo.
Ikugwasyigwa a Ziyeekezyo zya Jehova
16, 17. (a) Nkaambo nzi ncotuyandika ziyeekezyo zya Leza, alimwi mbuti mbotweelede kuzibona? (b) Mbuti bamwi mbobakonzya kutuyeeyela, pele ino ncinzi ciyandika kapati?
16 Ikutegwa Leza ayiswiilile mipailo yesu akuti atukkomanine, tweelede kutobela ziyeekezyo zyakwe. (Intembauzyo 119:129-136) Mbwaanga tulaluba, tuyandika ziyeekezyo zya Jehova zibotu izitwiibalusya malailile alimwi amilawo yakwe. Masimpe, tulalumba kapati akaambo kamumuni wakumuuya ngotujana lyoonse notuteelelesya majwi aa Leza. (Intembauzyo 119:129, 130) Alimwi tulalumba akaambo kakuti Jehova ‘wamunika busyu bwakwe kulindiswe’ ikutondezya kuzuminizya, nokuba kuti ‘meso eesu akunka milonga yamisozi’ nkaambo bamwi balautyola mulawo wakwe.—Intembauzyo 119:135, 136; Myeelwe 6:25.
17 Tulakonzya kuba masimpe kuti Leza uyoozumanana kutukkomanina ikuti naa katuzitobela ziyeekezyo zyakwe. (Intembauzyo 119:137-144) Mbotuli babelesi ba Jehova, tulizyi kuti ulijisi nguzu zyakutwiibalusya ziyeekezyo zyakwe ziluleme akutupa kazili milawo njotweelede kutobela. (Intembauzyo 119:138) Mbwaanga sintembauzyo wakaitobela milawo ya Leza, nkaambo nzi ncaakaambila kuti: “Mebo ndi muniini, ndisampukide”? (Intembauzyo 119:141) Kulibonya kuti aawa wakali kwaamba mbobakali kumubona basinkondonyina. Ikuti naa twazumanana cakutazungaana mukwiiminina bululami, ibamwi balakonzya kutusampaula. Pele, iciyandika kapati ncakuti Jehova ulatukkomanina akaambo kakuti tulazitobela ziyeekezyo zyakwe ziluleme.
Baliibide Alimwi Bali Muluumuno
18, 19. Ncinzi cicitika notutobela ziyeekezyo zya Leza?
18 Ikutobela ziyeekezyo zya Leza kutupa kuzumanana kuba balongwe bakwe. (Intembauzyo 119:145-152) Akaambo kakuti tulazibikkila maano ziyeekezyo zya Jehova, tulaangulukide kumulomba mumupailo camoyo woonse alimwi tulakonzya kulangila kuti uyootuswiilila. Tulakonzya kubuka “kubucedo” akoongolola kulomba lugwasyo lwakwe. Elo taciliboteli kaka ciindi eeci cakupaila! (Intembauzyo 119:145-147) Alimwi Leza uli afwaafwi andiswe akaambo kakuti tulakutantamuka kutalilemeka alimwi ijwi lyakwe tulibona kuti nkakasimpe, mbubwenya Jesu mbwaakali kulibona. (Intembauzyo 119:150, 151; Johane 17:17) Icilongwe cesu a Jehova cilatugwasya munyika eeyi iizwide mapenzi alimwi ciyootuyumya lyankondo yakwe mpati ya Harmagedoni.—Ciyubunuzyo 7:9, 14; 16:13-16.
19 Akaambo kakuti tulalilemeka kapati jwi lya Leza, luliibo ndotujisi ndwini-lwini. (Intembauzyo 119:153-160) Ikwiindana abasizibi, swebo ‘tiitwapambuka kumalailile aa Jehova.’ Tulaziyanda imbeta zya Leza aboobo tuliliibide muluzyalo lwakwe. (Intembauzyo 119:157-159) Ziyeekezyo zya Jehova zilatuyeezya kutegwa katuyeeya nzyayanda kulindiswe mubukkale bugaminide. Kulubazu lumwi, imbeta zya Leza, mmalailile buya, alimwi tulizyi kuti Mulengi wesu ulijisi nguzu zyakutusololela. Mbwaanga tulizyi kuti ‘mitwe yamajwi aakwe ndusinizyo’ alimwi akuti tatukonzyi kweenzya ntaamu zyesu lwesu tobeni, tulaatobela malailile aa Leza.—Intembauzyo 119:160; Jeremiya 10:23.
20. Nkaambo nzi ncotujisi “luumuno lunji”?
20 Ikuyanda mulawo wa Jehova kutuletela luumuno lunji. (Intembauzyo 119:161-168) Ikupenzyegwa kunyina nokumana “luumuno lwa-Leza” ilutakonzyi kweelanisyigwa kucintu cili coonse. (Ba-Filipi 4:6, 7) Tulazibikkila maano kapati imbeta zya Jehova cakunga tulamulumba lyoonse, nkokuti “ziindi zili musanu azibili abuzuba.” (Intembauzyo 119:161-164) Sintembauzyo wakaimba kuti: “Abo bayandisya mulao wako balijisi luumuno lunji; tabajisi cibalebya.” (Intembauzyo 119:165) Ikuti umwi aumwi wesu kumugama katuuyanda alimwi akuubamba mulawo wa Jehova, tatukatyompezyegwi kumuuya anzyobacita bamwi antela kujatikizya kaambo kambi kali koonse.
21. Nzikozyanyo nzi zyamu Magwalo zitondezya kuti tatweelede kulebwa nokubuka mapenzi mumbungano?
21 Bantu banji baambidwe mu Bbaibbele kunyina nobakalekela cintu cili coonse kuzumanana kubalebya. Mucikozyanyo, mwaalumi Munakristo wazina lya Gayo kunyina naakalebwa pe, pele ‘wakazumanana kweenda mulusinizyo’ nokuba kuti Diotrefe tanaakali kulilemeka munzila yabunaleza. (3 Johane 1-3, 9, 10) Paulo wakakulwaizya banakazi Banakristo ba Euodiya a Suntuke “kuti babe aluyanzano lomwe mu-Mwami,” nkaambo kulibonya kuti kwakali mapenzi amwi akati kabo. Kulibonya kuti bakagwasyigwa kulimana penzi ndyobakajisi alimwi bakazumanana kumubelekela Jehova cakusyomeka. (Ba-Filipi 4:2, 3) Aboobo tatweelede kutyompwa ikuti kwabuka mapenzi aamwi mumbungano. Atubikkile buyo maano akutobela malailile aa Jehova, katuyeeyede kuti ‘inzila zyesu zyoonse zili kubusyu bwakwe.’ (Intembauzyo 119:168; Tusimpi 15:3) Aboobo kunyina cintu ciyoozumanana kutumanina “luumuno lunji” ndotujisi.
22. (a) Ikuti katumumvwida Leza, ncoolwe nzi ncotuyooba ancico? (b) Mbuti mbotweelede kubabona aabo ibakaleya kuzwa mumbungano ya Bunakristo?
22 Ikuti katumumvwida Jehova lyoonse, tuyooba acoolwe cakuzumanana kumutembaula. (Intembauzyo 119:169-176) Kwiinda mukutobela malailile aa Leza, tatuliibi kumuuya, pele ‘milomo yesu ilazumanana kuba kasensa kantembauzyo zya Jehova.’ (Intembauzyo 119:169-171, 174) Eeci ncoolwe citalikomeneni ncotukonzya kuba ancico mumazuba aano aakumamanino. Sintembauzyo wakali kuyanda kuzumanana kupona akutembaula Jehova, pele munzila imwi iitayubunwidwe, ‘wakaleyauka mbuli mbelele isweekede.’ (Intembauzyo 119:175, 176) Bamwi ibakaleya kuzwa mumbungano ya Bunakristo balakonzya kabacimuyanda Leza alimwi kabayanda kumutembaula. Aboobo atucite kusikila mpotugolela kubagwasya kutegwa balujane alimwi luumuno lwakumuuya akuba alukkomano lujanika mukutembaula Jehova antoomwe abantu bakwe.—Ba-Hebrayo 13:15; 1 Petro 5:6, 7.
Mumuni Uutamani Kunzila Yesu
23, 24. Nimpindu nzi nzyomwajana ku Intembauzyo 119?
23 Intembauzyo 119 ilakonzya kutugwasya mumbazu ziindene-indene. Mucikozyanyo, ilakonzya kutugwasya kusyoma cakumaninina muli Leza, nkaambo itondezya kuti lukkomano lwini-lwini lulaboola kwiinda ‘mukweenda mumulawo wa Jehova.’ (Intembauzyo 119:1) Sintembauzyo utuyeezya kuti ‘mitwe yamakani aa Leza ndusinizyo.’ (Intembauzyo 119:160) Eeci masimpe ceelede kuyungizya kulumba nkotujisi ku Jwi lya Leza lyoonse lilembedwe. Ikuzinzibala kuyeeya zili ku Intembauzyo 119 kweelede kutukulwaizya kwiiya Magwalo cabusungu. Sintembauzyo wakalomba Leza kuti: ‘Undiyiisye milazyo yako, undiyiisye milumbe yako, undiyiisye mbeta zyako.’ (Intembauzyo 119:12, 68, 135) Alimwi wakakombelezya kuti: “Undiiyisye kumvwa akuziba kabotu, nkaambo ndizumide milazyo yako.” (Intembauzyo 119:66) Mbotweelede kupaila oobo aswebo.
24 Kuyiisya kwa Jehova kupa kuti cikonzyeke kuba acilongwe cini-cini anguwe. Sintembauzyo cakwiinduluka-induluka wakalyaamba kuti mulanda wa Leza. Mubwini, waamba Jehova kabelesya majwi aanjila mumoyo aakuti: “Ndi wako.” (Intembauzyo 119:17, 65, 94, 122, 125; Ba-Roma 14:8) Elo kaka ncoolwe kumubelekela alimwi akumutembaula Jehova katuli umwi wa Bakamboni bakwe! (Intembauzyo 119:7) Sena muli mukumubelekela Leza cakukondwa kamuli basikwaambilizya Bwami? Ikuti naa mulacita oobo, amusyome kuti Jehova uyoozumanana kumugwasya alimwi akumulongezya mumulimo ooyu uutaliboteli ikuti lyoonse kamulisyoma jwi lyakwe akulilekela kuti limunikile inzila yanu.
Ino Inga Mwaingula Buti?
• Nkaambo nzi ncotweelede kuliyandisya jwi lya Leza?
• Mbuti mbotugwasyigwa a jwi lya Leza?
• Muunzila nzi motugwasyigwa aziyeekezyo zya Jehova?
• Nkaambo nzi bantu ba Jehova ncobaliibide alimwi ancobali muluumuno?
[Mibuzyo yaciiyo]
[Cifwanikiso icili apeeji 9]
Ijwi lya Leza nkokuzwa mumuni wakumuuya
[Cifwanikiso icili apeeji 10]
Ikuti katuziyanda ziyeekezyo zya Jehova, takooyootubona kuti tuli “mankwisila”
[Zifwanikiso izili apeeji 11]
Ikuti katulibala Ibbaibbele abuzuba, zibalo zigwasya tunooziyeeya cakufwambaana notupaila