Jehova Ulabakwabilila Aabo Ibasyoma Mulinguwe
Jehova Ulabakwabilila Aabo Ibasyoma Mulinguwe
“Luyando lutazungaani akasimpe kako, eezi zindikwabilile.”—INTEMBAUZYO 40:11, BT.
1. Ncinzi Mwami Davida ncaakalomba kuli Jehova alimwi ino mbuti eeco ncaakalomba mbocipegwa lino?
MWAMI DAVIDA wa Israyeli yansiku ‘wakalindila Jehova’ alimwi wakakulwaizyigwa kwaamba kuti Jehova ‘kacenjekede kutwi, wakaswiilila kukwiila kwakwe.’ (Intembauzyo 40:1) Kwa ziindi zinji wakalibonena Jehova mbwaakabakwabilila aabo ibakali kumuyanda. Aboobo, Davida ncaakali kukonzya kulomba kuti Jehova amukwabilile lyoonse. (Intembauzyo 40:11) Kabalilwa akati kabaalumi abanakazi aabo ibasyomezyedwe “buumi bwiinda buciza,” Davida aciindi cino uli mumizeezo ya Jehova kali umwi wabaabo bayootambula bulumbu oobo. (Ba-Hebrayo 11:32-35) Aboobo, wasyomezyegwa kuti uyoopona alimwi kumbele. Izina lyakwe lililembedwe mu “bbuku lyakwiibalusya” lya Jehova.—Malaki 3:16.
2. Ino mbuti Magwalo mbwaatugwasya kumvwisya ncocaamba ikukwabililwa a Jehova?
2 Nokuba kuti aabo basyomeka ibaambwa mubbuku lya Ba-Hebrayo caandaano 11 bakapona Jesu Kristo katanapona anyika, bakapona kweelana anzyaakayiisya Jesu naakaamba kuti: “Oyo uuyandisya buumi bwakwe ulabusweekelwa, awalo uusulide buumi bwakwe ansi ano, uyoobuyobola kubuumi ubutamani.” (Johane 12:25) Aboobo, ikukwabililwa a Jehova tacaambi kuti muntu tanikupenzyegwi pe. Caamba kuti muntu ulikwabilidwe munzila yakumuuya kucita kuti azumanane kuba ampuwo mbotu a Leza.
3. Mbumboni nzi mbotujisi butondezya kuti Kristo Jesu wakali kwabilidwe a Jehova alimwi ino ncinzi cakatobela?
3 Jesu mwini wakapenzyegwa calunya alimwi akusampaulwa mane basinkondonyina bakazwidilila kumujaya mulufwu lwamasampu alimwi lwaluciso. Pele eeci tacaambi kuti Leza wakaalilwa kuzuzikizya cisyomezyo cakwe cakukwabilila Mesiya. (Isaya 42:1-6) Ikubuka kwa Jesu mubuzuba bwatatu kuzwa naakafwa lufwu lwamasampu kutondezya kuti Jehova wakamvwa kukwiila kwakwe—mbubwenya buyo Jehova mbwaakamvwa kukwiila kwa Davida. Jehova wakamuvwiila Jesu kwiinda mukumupa nguzu zyakuzumanana kusyomeka. (Matayo 26:39) Mbwaanga wakali kwabilidwe munzila eeyi, Jesu wakajana buumi butafwi kujulu alimwi atuulunzuma twabantu ibajisi lusyomo mucinunuzyo abalo balangila kuyoopona mane kukabe kutamani.
4. Ncisyomezyo nzi ncobapedwe Banakristo bananikidwe alimwi aba “mbelele zimwi”?
4 Tulakonzya kuba alusyomo lwakuti Jehova ulilibambilide alimwi ulakonzya kubakwabilila babelesi bakwe lino mbubwenya mbwaakacita kumazuba aa Davida alimwi a Jesu. (Jakobo 1:17) Ibanyina ba Jesu basyeede basyoonto ibaciliko anyika balakonzya kuba alusyomo mucisyomezyo ca Jehova cakuti: “Tuyookona zileleko zitanyonyooki, zitasofwaali, zitabundaali . . . nzyamubambilide kujulu. Anguzu zyakwe Leza unoomukwabilide nomusyoma kuti mukatambule lufutuko luyooyubununwa kumamanino aaciindi.” (1 Pita 1:4, 5, Ci) “Mbelele zimwi,” eezo zijisi bulangizi bwakupona anyika azyalo zilakonzya kusyoma Leza acisyomezyo cakwe ncaakaamba kwiinda muli sintembauzyo kuti: “Amuyandisye Jehova nyoonse nobasalali bakwe! Nkaambo Jehova ulabamba basyomeka.”—Johane 10:16; Intembauzyo 31:23.
Bakwabilidwe Kumuuya
5, 6. (a) Ino mbuti bantu ba Leza mbobakwabililwa mazuba aano? (b) Ncilongwe cili buti ibananike ncobajisi a Jehova alimwi ino aabo ibalangila kuyoopona anyika bajisi cilongwe cili buti anguwe?
5 Mazuba aano, Jehova wabikka bubambe bwakukwabilila bantu bakwe kumuuya. Nokuba kuti tabacingilili kukupenzyegwa naa kubuyumuyumu alimwi antenda zicitika mubuumi, cakusyomeka ulabapa lugwasyo alimwi ulabakulwaizya kutegwa cilongwe cabo anguwe cikwabililwe. Intalisyo aawo aayeeme cilongwe eeci ndusyomo lwabo mububambe bwaluyando mbwabikkide Leza bwacinunuzyo. Bamwi akati ka Banakristo aaba basyomeka bakananikwa amuuya wa Leza kutegwa bakabe basikulelanyina a Kristo kujulu. Bakaambwa kuti baliluleme mbobali bana ba Leza bakumuuya alimwi balakonzya kulyaamba kuti: “Nguwenya Taateesu iwakatufutula kuzwa kunguzu zyamudima akutunjizya mu-Bwami bwa-Mwanaakwe uuyandwa. Mumwanaakwe oyo mutujene lununuko abulekelelo bwazibi.”—Ba-Kolose 1:13, 14.
6 Tuulunzuma twa Banakristo basyomeka abambi abalo balakonzya kugwasyigwa abubambe bwa Leza bwacinunuzyo. Tubala kuti: “Mwana a-Muntu takazide kumaninwa milimo pe, pele kuti amanine bamwi milimo, akwaaba buumi bwakwe kuti cibe cinunuzyo cakununuzya banji.” (Marko 10:45) Aabo Banakristo balangila kuyooba “abulubulo bulemu bwabana ba-Leza” kuciindi ceelede. (Ba-Roma 8:21) Kwalino, balacibikkila maanu cilongwe cabo a Leza alimwi camoyo woonse balasoleka kuyumya cilongwe eeco.
7. Nkwiinda munzi mazuba aano Jehova mwakwabilila bukkale bwakumuuya bwabantu bakwe?
7 Imwi yanzila oomo Jehova mbwakwabilila bukkale bwakumuuya bwabantu bakwe nkwiinda mukubikka bubambe bwalwiiyo luyaabuyaambele. Eeci cibagwasya kujana luzibo lwini-lwini lwakasimpe. Jehova alimwi ulapa busolozi buzumanana kwiinda mu Jwi lyakwe, mbunga yakwe alimwi amuuya wakwe uusalala. Kwiinda mubusolozi bwa “muzike musyomesi uucenjede,” bantu ba Leza nyika yoonse mboizulwa bali mbuli mukwasyi. Iciinga camuzike cilalanganya ziyandika zyakumuuya alimwi nokuyandika mane azyakumubili zyamukwasyi wababelesi ba Jehova—kufwumbwa kucisi nkobazwa naa ibukkale mobabede.—Matayo 24:45.
8. Ndusyomo luli buti Jehova ndwajisi kuli baabo ibamusyoma alimwi lubasyomezya nzi?
8 Mbubwenya Jehova mbwaatakamukwabilila Jesu kukulwanwa abasinkondonyina, abalo Banakristo tabakwabilili munzila eeyo mazuba aano. Pele eeci tacaambi kuti Leza takondedwe peepe! Muciindi caboobo, utondezya kuti ulijisi lusyomo lwakuti bayoozumanana kuba kulubazu lwakwe mukaambo kajatikizya uujisi nguzu zyakweendelezya mububumbo boonse. (Jobu 1:8-12; Tusimpi 27:11) Jehova kunyina nayoobalekelezya aabo ibamusyoma, “nkaambo Jehova ulayandisya bululami, tasii basalali bakwe. Baluleme bayoobambwa lyoonse.”—Intembauzyo 37:28.
Bakwabilidwe a Luyando Lutazungaani Alimwi Akasimpe
9, 10. (a) Ino mbuti kasimpe ka Jehova mbokabakwabilila bantu bakwe? (b) Ino mbuti Ibbaibbele mbolitondezya kuti Jehova ulabakwabilila aabo basyomeka kwiinda muluyando lwakwe lutazungaani?
9 Mumupailo wakwe uulembedwe ku Intembauzyo 40, Davida wakalomba kuti akwabililwe aluyando lutazungaani alimwi akasimpe ka Jehova. Kasimpe ka Jehova alimwi akuyanda bululami bwakwe kumupa kwaamba kabotu-kabotu zyeelelo zyakwe mbozibede. Aabo ibapona kweelana azyeelelo eezyi munzila imwi balikwabilidwe kubuumba, buyoofwu alimwi amapenzi aacitikila baabo ibaunduluzya zyeelelo. Mucikozyanyo, tulakonzya kulikwabilila alimwi abayandwa besu kumapenzi aaletela buumba ikuti naa katutanywi misamu iikola alimwi akunywa kapati bukoko, katutaciti buvwuule alimwi katutaponi buumi bwakulwana-lwana. Alimwi nokuba baabo, ibazwa munzila yakasimpe ya Jehova—mbuli bwakacita Davida ziindi zimwi—bajisi bulangizi bwakuti Leza ucili “ciyubilo” kuli basikucita zibi ibeempwa. Bantu bali boobu balakonzya kukondwa kapati akuti: “Ulandivuna kumapenzi.” (Intembauzyo 32:7) Eeyi ninzila mbotu kapati yaluyando lwa Leza lutazungaani!
10 Acimbi cikozyanyo caluyando lwa Leza lutazungaani ncakuti Leza ulabacenjezya babelesi bakwe kuti bazumanane kulyaandaanya anyika mbyaabi, yalo njayoonyonyoona ino-ino. Tubala kuti: “Mutayandi nyika, neziba zintu zyamunyika. Kuti muntu wayanda nyika, luyando lwa-Taata taluli mulinguwe. Nkaambo zintu zyoonse zili munyika, niziba zisusi zyanyama niziba zisusi zyameso nikuba kulisumpula kwabuumi, tazili zya-Taata, pe, nzyenyika.” Kwiinda mukuswiilila kucenjezya ooku alimwi akukutobela, masimpe tulakonzya kukwabilila buumi bwesu mane kusikila kutamani mbwaanga lugwalo lulazumanana ategwa: “Alimwi nyika ilamana, azisusi zyayo, pele oyo uucita makanze aa-Taata ulakalilila kukabe kutamani.”—1 Johane 2:15-17.
Bakwabilidwe a Maanu, Kumvwisya Zintu a Busongo
11, 12. Amupandulule mbuli maanu, kumvwisya zintu alimwi abusongo mbozitukwabilila.
11 Kuli baabo bayanda kukkomaninwa a Leza, mwana wa Davida, Solomoni wakasololelwa kulemba kuti: “Maanu alakukwabilila, kumvwisya zintu kulakusinkilizya.” Alimwi wakakulwaizya kuti: “Koba musongo . . . Utasowi busongo, buyookukwabilila, ubuyandisye, buyookubamba.”—Tusimpi 2:11; 4:5, 6, BT.
12 Tulabelesya maanu ikuti katuzinzibala kuyeeya nzyotwiiya mu Jwi lya Leza. Kucita boobo kutugwasya kumvwisya zintu kucita kuti tucikonzye kubikka ambele zintu ziyandika kapati. Eeci cilayandika, mbwaanga ibunji bwesu tulizyi—ambweni akaambo kakuti zyakatucitikila—kuti mapenzi alaboola eelyo bantu acaali naa kwiinda mukutaziba nobabikka ambele zintu zitagwasyi kapati. Nyika ya Saatani ilatoongelezya ambono zyakumubili, ikuba muntu uujisi mpuwo alimwi anguzu, kakuli walo Jehova utukulwaizya kubikkila maanu kuzintu zyakumuuya ziyandika kapati. Ikubikkila maanu kumbono zyakumubili, ikuba ampuwo alimwi anguzu kulakonzya kupa mikwasyi kwaandaana, zilongwe kumana alimwi ambaakani zyakumuuya kumana. Aboobo, imuntu ulakonzya kwiile kuba abuumba ibwaambwa mumajwi aa Jesu aakuti: “Nimpindunzi njajana muntu anooli wavuba nyika yoonse nekuboobo wasweekelwa buumi bwakwe?” (Marko 8:36) Busongo bupa kuti tuswiilile lulayo lwa Jesu lwakuti: “Amusaangune kuyandaula Bwami bwa-Leza abululami bwakwe, elyo zintu ezi zyoonse mulaziyungizizigwa azyalo.”—Matayo 6:33.
Ibubi Bwakuba Simuyanda Twakwe
13, 14. Ino caamba nzi kuba simuyanda twakwe alimwi ino nkaambo nzi ncocitali kabotu ikuba muntu uuli boobo?
13 Bantu bakazyalwa abube bwakuyandisya buyo zyabo. Pele ikuti muntu wabikkila kapati maanu kuzintu zyakwe mwini mubuumi, ciletela mapenzi. Aboobo, ikukwabilila cilongwe cesu anguwe, Jehova utulailila kutaba bantu bayandisya twesu. Eeci caamba kuba muntu uuyandisya buyo bubotu bwakwe. Sena eeci tacipandululi mbobabede bantu banji mazuba aano? Aboobo, Ibbaibbele lisinsima kuti “kumazuba aakumamanino” aabukkale oobu bubyaabi bwa Saatani, “bantu bayooba basikuliyanda,” naa bayooba basimuyanda twabo.—2 Timoteo 3:1, 2.
14 Banakristo balizyi mbociyandika ikutobela malailile aamu Bbaibbele aakubikkila maanu bamwi, kubayanda mboliyanda omwini. (Luka 10:27; Ba-Filipi 2:4) Bantu banji balakonzya kuyeeya kuti eeci tacikonzyeki, pele cilayandika kapati ikuti katuyanda kuba azikwati zili kabotu, mikwasyi iikkomene alimwi azilongwe zibotu. Aboobo, mubelesi wa Jehova mwini-mwini tayelede kuzundwa abube bwakuzyalwa ambubo bwakuliyanda akutazibikkila maanu zintu ziyandika kapati. Ciyandika kapati mmulimo uujatikizya Jehova Leza ngwakomba.
15, 16. (a) Ino kuba muntu uuyandisya twakwe kulakonzya kusololela kunzi alimwi ino mbaani bakacita boobo? (b) Mubwini, ncinzi ncacita muntu nabeteka beenzinyina?
15 Ikuba muntu uuyandisya twakwe kulakonzya kupa kulibona kuba muntu uululeme kwiinda bamwi calo eeco cikonzya kupa muntu kutamvwa zyaamba beenzinyina, uulipa kamikami. Ibbaibbele cakweelela lyaamba kuti: “Yebo omuntu nobani, oobeteka bamwi, tojisi cilitamizyo. Sena tozi kuti mumakani aayo ngobeteka umwi ayebo ulalizula omwini, nkaambo ulacita mbubonya?” (Baloma 2:1; 14:4, 10, Ci) Basololi bacikombelo kumazuba a Jesu bakali kulibona kuti mbantu baluleme cakuti mane bakali kumujanina mulandu Jesu alimwi abasikwiiya bakwe. Kwiinda mukucita boobo, bakali kulibikka kuba babetesi. Akaambo kakuti kunyina nobakali kukonzya kubona zilubyo zyabo, mubwini bakali kulibeteka beni.
16 Judase, sikutobela Jesu walo wakazi kumubukila, wakalibikka kuba mubetesi uubeteka bamwi. Nobakali ku Betaniya ciindi Mariya mucizyi wa Lazaro naakananika Jesu mafwuta aanunkila, Judase wakakazya citaambiki. Wakatondezya bukali bwakwe kwiinda mukwaamba kuti: “Ino mafuta aya aba anzi naataulwa mpondo izili kumi, kuti mali apegwe bacete?” Pele cibalo cilazumanana ategwa: “Obuya mbwaakaamba tokwakali kuti uyeeya bacete, pele kuti wali mubbi, mbwaali ngonguwe uuyobola nkomo yamali, wakali kugwisya aabikwa mumo.” (Johane 12:1-6) Tutabi mbuli bwakaba Judase naa basololi bacikombelo balo bakali kubeteka bamwi anukuti balalibeteka beni.
17. Amutondezye ntenda iijanika mukulisumpula naa mukulisyoma cakwiindilila.
17 Cilausisya kuti Banakristo bamwi bakusaanguna nokuba kuti tiibakali babbi mbuli Judase, bakatalika kulisumpula. Kujatikizya mbabo, Jakobo wakalemba kuti: “Mulalikankaizizya kulisumpula kwanu.” Mpoonya wakazumanana ategwa: “Kulikankaizya kuli bobuya koonse nkubi.” (Jakobo 4:16) Ikulisumpula kujatikizya nzyotwacita naa mikuli njotujisi mumulimo wa Jehova kuletela buyo manyongwe. (Tusimpi 14:16) Tulayeeya cakacitikila mwaapostolo Petro walo wakalisumpula kapati aciindi cimwi kati: “Nikuba kuti boonse bakusiye mebo nsikookusiya pe. . . . Nikuba kuti ndifwe anduwe, nsikookutama.” Mubwini, kunyina ncotujisi iceelede kutupa kulisumpula. Zyoonse nzyotujisi tulizijisi akaambo kaluzyalo lwa Jehova. Ikuyeeya kaambo aaka kuyootugwasya ikutalisumpula.—Mateyo 26:33-35, 69-75, Ci.
18. Ino Jehova ulimvwa buti kujatikizya kulisumpula?
18 Twaambilwa kuti: “Kulisumpula kulazulwida lunyonyooko, akamikami kali kunembo lyakuwa.” Nkaambo nzi? Jehova wiingula kuti: “Kulisumpula akamikami . . . zyoonse ndizisulide.” (Tusimpi 8:13; 16:18) Anu nkakaambo Jehova ncaakakalede kapati kujatikizya “moyo uusumpwidwe wamwami wa-Asuri . . . bulemu bwakulikankaizya kwameso aakwe”! (Isaya 10:12) Jehova wakamusubula akaambo kakulisumpula kwakwe. Ino-ino nyika ya Saatani antoomwe abasololi bayo ibalisumpula akulikankaizya ibabonwa abatabonwi, abalo bayoosubulwa. Tutabi aciimo cakulisumpula mbuli cijisi basinkondonyina a Jehova!
19. Muunzila nzi bantu ba Leza mobali bantu bali acoolwe pele ibalicesya?
19 Banakristo beni-beni balijisi twaambo tumvwika ntobeelede kulibonena kuti mbantu bali acoolwe ikuba babelesi ba Jehova. (Jeremiya 9:24) Pele alimwi balijisi twaambo tumvwika tweelede kubapa kulicesya. Nkaambo nzi? Nkaambo “boonse ba[ka]bisya akulela kubulemu bwa-Leza.” (Ba-Roma 3:23) Aboobo, ikutegwa tukwabilile bukkale bwesu mbotuli babelesi ba Jehova, tweelede kwiiya ciimo ncaakajisi mwaapostolo Paulo walo wakaamba kuti: “Kristo Jesu wakaboola ansi ano kuzoofutula bacitazibi,” mpoonya wakayungizya ategwa: “Lino mebo ndi sizibi kwiinda boonse.”—1 Timoteo 1:15.
20. Ino mbuti Jehova mbwakwabilila bantu bakwe lino alimwi ino uyoobakwabilila buti kumbele?
20 Mbwaanga bantu ba Jehova cakulisungula balabikka zintu zyabo beni mubusena bwabili kutegwa babikke zintu zya Leza ambele, tulakonzya kuba alusyomo lwakuti Jehova uyoozumanana kubakwabilila kumuuya. Alimwi tulakonzya kuba alusyomo lwakuti mapenzi mapati aakutalika, Jehova uyoobakwabilila bantu bakwe ikutali buyo kumuuya pele akumubili. Baakunjila munyika ya Leza mpya, bayoompolola akuti: “Amubone! Ngooyu Leza wesu. Twali kumulindila kuti atufutule. Ngooyu Jehova. Twali kumulindila. Atukondwe akusekelela mulufutuko lwakwe.”—Isaya 25:9.
Sena Mulayeeya?
• Ino Mwami Davida alimwi a Jesu Kristo bakakwabililwa buti?
• Ino bantu ba Jehova mazuba aano bakwabililwa buti?
• Nkaambo nzi ncotuteelede kulikankaizya?
• Nkaambo nzi ncotukonzya kulibona kuti tuli acoolwe pele katuli bantu balicesya?
[Mibuzyo yaciiyo]
[Zifwanikiso izili apeeji 19]
Ino Jehova wakamukwabilila buti Davida alimwi a Jesu?
[Zifwanikiso izili apeeji 21]
Muunzila nzi bantu ba Leza mbobakwabilidwe kumuuya mazuba aano?
[Zifwanikiso izili apeeji 22]
Nokuba kuti tulijisi coolwe cilibedelede cakubelekela Jehova, lyoonse tweelede kulicesya