Kufwutulwa, Ikutali Akaambo Kamilimo Ilikke, Pele Akaambo Kaluzyalo

“Mwakafutulwa . . . mukusyoma. Tiimwakafutulwa . . . kutali camilimo yanu, aboobo muntu atalikankaizyi pe.”—BAEFESO 2:8, 9, Ci.

1. Ino Banakristo baindene buti abantu boonse caboola kumilimo njacita aumwi alimwi ino nkaambo nzi?

BANTU mazuba aano balalisumpula kapati akaambo kamilimo njobacita alimwi kanji-kanji balilibambilide kulidunda kujatikizya milimo eeyo. Banakristo tabusyi mbobabede oobo. Kunyina nobalidunda akaambo kamilimo njobacita noiba yeeyo iijatikizya bukombi bwakasimpe. Nokuba kuti balakkomana kumvwa milimo njobacita bantu ba Jehova boonse, kunyina nobalidunda kujatikizya milimo aumwi njacita. Balizyi kuti mumulimo wa Jehova, ikuba amakanze mabotu nceciyandika kapati kwiinda nzyakonzya kucita umwi aumwi. Kufwumbwa uyoopegwa cipego cabuumi butamani, unoopedwe mbubo ikutali akaambo kamilimo njaakacita pele kwiinda mulusyomo alimwi aluzyalo lwa Leza.—Luka 17:10; Johane 3:16.

2, 3. Ncinzi Paulo ncaakalikankaizizya alimwi nkaambo nzi?

² Imwaapostolo Paulo waalikazyi kabotu kaambo aaka. Naakamana kupaila ziindi zyotatwe kutegwa ajane kukatalukwa ku “bumvwa  mumubili,” wakatambula bwiinguzi kuzwa kuli Jehova bwakuti: “Luse lwangu lulikkwene, nkaambo nguzu zyangu zilalondoka mubuteteete.” Kutondezya kuti wakazumina kusala kwa Jehova, cakulibombya Paulo wakati: “Aboobo ndalikankaizya abuteteete bwangu cakukondwa, kuti nguzu zya Kilisito zibe alindime.” Ikulibombya kwa Paulo nkotweelede kwiiya.—2 Bakolinti 12:7-9, Ci.

³ Nokuba kuti Paulo wakali munkutwe kapati mukucita milimo ya Bunakristo, wakalizyi kuti kuzwidilila kwakwe tiikwakali akaambo kaluzibo lwakwe mwini. Cakulibombya wakati: “Mubantu ba Leza ndime muniini kwiindilila, nikuba boobo Leza wakandipa mulimo wakukambaukila bamasi Makani Mabotu aalubono lutaambiki Leza ndwatupede muli Kilisito.” (Baefeso 3:8, Ci) Kunyina naakali kulisumpula naa kulilulamika aawa pe. “Leza ulabakazya basikulisumpula, pele batete-myoyo ulabapa luzyalo.” (Jakobo 4:6; 1 Petro 5:5) Sena tulacitobela cikozyanyo ca Paulo, cakulibombya ikulibona kuti tuli baniini kwiinda bakwesu?

“Kuyeeya Kuti Mweenzuma Mubotu Kwiinda Ndime”

4. Nkaambo nzi zimwi ziindi ncotukonzya kwaalilwa ikubona bamwi kuti mbabotu kwiinda tuswe?

⁴ Imwaapostolo Paulo wakalaya Banakristo kuti: “Mutaciti cintu niciba comwe cabbivwe nanka cakulisumpula, pele umwi aumwi akati kanu alibombye mumoyo, akuyeeya kuti mweenzuma mubotu kwiinda ndime.” (Ba-Filipi 2:3) Eeci cilakonzya kuba cintu ciyumu, ikapati kuti katuli amikuli imwi. Ibuyumuyumu bulakonzya kuba ambweni akaambo kakuti twakakomezyegwa munzila imwi amuuya wakuzundana ooyo uudumide munyika mazuba aano. Ambweni notwakali kukomena twakayiisyigwa kuzundana abasazima kuŋanda naa ambotwakali kwiiya limwi kucikolo. Ambweni twakali kukulwaizyigwa lyoonse ikusoleka kuba muntu wiinda kapati muzisobano kucikolo naa sikwiiya uucibwene kapati. Masimpe, ikusoleka kwesu mumulimo uuli woonse kulayandika kapati. Nokuba boobo, Banakristo tabaciti oobo kabajisi muzeezo wakuyanda kuba ampuwo, pele bayanda kugwasyigwa amulimo ooyo alimwi akugwasya bamwi. Nokuba boobo, lyoonse ikuyandisya kulumbaizyigwa kuti nguuinda bamwi kulakonzya kuleta ntenda. Munzila nzi?

5. Ikuti walekelwa, ino muuya wakuyanda kuba ambele ulakonzya kusololela kunzi?

⁵ Ikuti naa walekelwa, imuuya wakuyanda kuba ambele ulakonzya kupa muntu kubula bulemu alimwi akuba sicimpangwe. Ulakonzya kuba muntu uunyonokela bamwi akaambo kazintu nzyobakonzya kucita alimwi amikuli njobajisi. Tusimpi 28:22 yaamba kuti: “Syacivulamwangu ulafwamba kujana imbono, pele tezi kuti kubula kulamusikila.” Ulakonzya mane kwiintila kuyanda mikuli imwi eeyo njateelede kupegwa. Ikutegwa alilulamike akaambo kamilimo yakwe, ulakonzya kutalika maŋunuŋunu akukazya bamwi—tumpenda ooto Banakristo ntobateelede kucita. (Jakobo 3:14-16) Balacita oobo kabazyi kuti batalika kuba aciimo cakuyanda kuba ambele lyoonse.

6. Ino Bbaibbele litucenjezya buti kujatikizya muuya wakuyanda kuba ambele lyoonse?

⁶ Aboobo, Ibbaibbele likulwaizya Banakristo kuti: “Tutabi basikambotwembotwe, tutakalazyanyi, tutabi abbivwe umwi amweenzinyina.” (Ba-Galatiya 5:26) Imwaapostolo Johane wakaamba zya Munakristonyina iwakaba amuuya uuli boobu. Johane wakaamba kuti: “Ndakalemba kaniini kumbungano, pele Diotrefe oyo uuyanda kuba mupati akati kabo, tatutambuli. Elyo, na ndasika, nzooyeeya milimo yakwe njacita, naamba majwi mabi kulindiswe.” Eelo kaka ncibi Munakristo kucita boobo!—3 Johane 9, 10.

7. Ncinzi Munakristo ncateelede kucita kumilimo mazuba aano ibantu nkobayandisya kuzundana?

⁷ Masimpe, tacikonzyeki ikulangila kuti Munakristo inga walekela limwi milimo yoonse iijatikizya kuba ambele. Mucikozyanyo, imulimo wakwe ulakonzya kujatikizya kuzundana mumakwebo abantu bamwi naa basimakwebo ibabamba zintu naa ibacita makwebo aakozyenye. Pele nomuba mubukkale buli boobu, Munakristo uyooyanda kucita makwebo akwe munzila iitondezya bulemu, luyando akubikkila bamwi  maanu. Uyookaka nzila zitali zyabunakristo akutaba muntu uujisi buyo mpuwo yakuba ambele alimwi uunyina luse. Takabi amuzeezo wakuti ikuba ambele lyoonse—kufwumbwa milimo njacita—ncecintu ciyandika kapati mubuumi. Ikuti naa Munakristo kayandika kuba amuuya uuli boobu kumilimo yakumubili, caboola kumakani aabukombi nkokuti weelede kwiinda aawo!

“Kutabi Kukweelezyanya Amilimo Yaumwi Pe”

8, 9. (a) Nkaambo nzi baalu Banakristo ncobatakwe kaambo kakuzundanina? (b) Nkaambo nzi lugwalo lwa 1 Petro 4:10 ncolubajatikizya babelesi ba Leza boonse?

⁸ Imuuya Banakristo ngobeelede kuba anguwo mubukombi bwabo ulapandululwa mumajwi aaya aakasololelwa amuuya: “Kufumbwa muntu ayeeye milimo yakwe mbwiibede. Naa mmibotu, ulakonzya kulisumpula nkaambo kamilimo yakwe eeyo, kutabi kukweelezyanya amilimo yaumwi pe.” (Bagalatiya 6:4, Ci) Baalu mumbungano, mbobazyi kuti tabali mumuzundano abeenzinyina, balabelekela antoomwe mukabunga. Balakkomana alugwasyo ndwapa aumwi kububotu bwambungano. Kwiinda mukucita boobo tabanjili mumuzundano uunyonganya alimwi balapa cikozyanyo cibotu calukamantano kuli boonse bali mumbungano.

⁹ Akaambo kakwiindana kwamyaka yakuzyalwa, luzibo, naa nzyakonzya kucita muntu, bamwi baalu balakonzya kabali bankutwe kwiinda bamwi naa balakonzya kabajisi bupampu kwiinda bamwi. Akaambo kaceeco, baalu balijisi mikuli iisiyene-siyene mumbunga ya Jehova. Muciindi cakweelanya, balalubikkila maanu lulayo lwakuti: “Kufumbwa zipego zya-Muuya nzimutambwide, amugwasyanye anzizyo, nkaambo mbubonya obu mbubeelede abo baabilwa luzyalo lwa-Leza lubeleka muziyanza ziyanza.” (1 Petro 4:10) Mubwini, cibalo eeci cilabajatikizya babelesi ba Jehova boonse, mbwaanga munzila imwi boonse bakatambula cipego caluzibo lwini-lwini alimwi boonse bali acoolwe cakutola lubazu mumulimo wa Bunakristo.

10. Muunzila nzi ilikke mulimo wesu uusetekene moukonzya kuzuminwa a Jehova?

¹⁰ Mulimo wesu uusetekene ulamukkomanisya Jehova lilikke noucitwa caluyando alimwi akulyaaba ikutali akaambo kakuyanda kulisumpula kwiinda bamwi. Aboobo cilayandika kapati ikuulanga kabotu mulimo ngotucita mukugwasyilizya bukombi bwakasimpe. Nokuba kuti kunyina uukonzya kuziba nzyayeeya umwi, Jehova ‘ulalingula myoyo yabantu.’ (Tusimpi 24:12; 1 Samuele 16:7) Aboobo, tucita kabotu ciindi aciindi kulibuzya kuti: ‘Ino ndijisi makanze nzi mukubelekela Jehova?’—Intembauzyo 24:3, 4; Matayo 5:8.

Kuubona Kabotu Mulimo Wesu

11. Mmibuzyo nzi kujatikizya nzyotucita mumulimo yeelede kulangwa-langwa?

¹¹ Ikuti naa makanze ngaayandika kapati ikutegwa tukkomaninwe a Jehova, mbuti mbotweelede kwiibikkila maanu milimo iicitwa calusyomo? Kufwumbwa buyo kuti katucita mulimo wesu amuzeezo uuli kabotu, sena masimpe cilayandika ikuziba nzyotucita naa nzinji buti? Eeyi  mmibuzyo iili kabotu, mbwaanga tatuyandi kubikkila maanu kapati kumyeelwe kwiinda nzyotucita mumulimo wa Jehova.

12, 13. (a) Ntwaambo nzi tumwi tutupa kulemba lipooti yamulimo wamumuunda? (b) Ntwaambo nzi tutupa kukkomana notulanga-langa lipooti yanyika yoonse yamulimo wesu wakukambauka?

¹² Amumvwe ibbuku litegwa Bakamantene Mukucita Kuyanda Kwa Jehova mbolyaamba: “Basikutobela Jesu Kristo bakusaanguna bakali kuyandisya kumvwa makani aakuyaambele kwamulimo wakukambauka. (Marko 6:30) Ibbuku lyamu Bbaibbele lya Incito litwaambila kuti kwakali bantu batandila ku 120 imuuya uusalala nowakatilwa ali basikwiiya lya Pentekoste. Mukaindi kasyoonto, imweelwe wabasikwiiya wakayaambele kuzwa ku 3,000 kusika ku 5,000. . . . (Milimo 1:15; 2:5-11, 41, 47; 4:4; 6:7, Ci) Makani aakuyaambele ooku ayelede kuti akabakulwaizya kapati basikwiiya.” Akaambo katwaambo ntomunya ootu, Bakamboni ba Jehova mazuba aano balasoleka kuyobola myeelwe iiluzi yamilimo njobacita nyika yoonse mukuzuzikizya majwi a Jesu akuti: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Matayo 24:14) Malipooti aamusyobo ooyu alatondezya mulimo wini uucitwa nyika yoonse. Alatondezya ooko kuyandika lugwasyo alimwi amabbuku akuti manji buti aayandika kutegwa mulimo wakukambauka uyaambele.

¹³ Aboobo, ikupa lipooti yamulimo wakukambauka kulatugwasya kuzumanana amulimo ngotwakapegwa wakukambauka makani mabotu aa Bwami munzila iili kabotu. Kunze lyaboobo, sena tatukulwaizyigwi notumvwa mulimo bakwesu ngobacita kumasena ambi munyika? Makani aamba zyakuyaambele nyika yoonse alatukkomanisya akutukulwaizya kuyaambele mumulimo wesu alimwi asinizya kuti Jehova ulatulongezya. Alimwi cilakkomanisya kaka kuzyiba kuti lipooti yesu ilibikkilizyidwe mulipooti yanyika yoonse! Lipooti yesu ninsyoonto twayeelanya alipooti yanyika yoonse, pele Jehova ulabikkila maanu kumulimo ngotucita. (Marko 12:42, 43) Amuzyibe kuti, ikuti kakunyina lipooti yanu, ilipooti yanyika yoonse inga kaitazulide pe.

14. Kunze lyakukambauka akuyiisya, ncinzi cibikkilizyidwe mukumukomba kwesu Jehova?

¹⁴ Masimpe, ibunji bwamilimo Kamboni aumwi njacita mukuzuzikizya mukuli ngwajisi mbwaali mubelesi wa Jehova uulyaabide taibonwi mulipooti yakwe. Mucikozyanyo, ilipooti talibikkilizyi ciiyo ca Bbaibbele cesu tobeni, kujanika akutola lubazu mumiswaangano  ya Bunakristo, milimo yambungano, kugwasya basyomima mobayandika lugwasyo, mali ngotusanga kumulimo wa Bwami uucitwa nyika yoonse azimwi buyo. Aboobo, nokuba kuti lipooti yamulimo wamumuunda ilayandika kapati, ikutugwasya kuzumanana katuli basungu mukukambauka alimwi akutatolwaala, tweelede kwiibona munzila mbotu. Tatweelede kuyeeya kuti tuleelela naa kuti tulizumizidwe kuyootambula buumi butamani akaambo kalipooti yesu mbotu yamulimo wamumuunda.

“Bankutwe Mukucita Milimo Yoonse Mibotu”

15. Nokuba kuti milimo ilikke tiikonzyi kutufwutula, nkaambo nzi ncoiyandika?

¹⁵ Cakutadooneka, nokuba kuti milimo ilikke tiikonzyi kutufwutula, ilayandika. Nkakaambo kaako Banakristo baambwa kuti “bantu bakwe bankutwe mukucita milimo yoonse mibotu” alimwi ncobakulwaizyigwa ‘kuyeeyana, kubusyanya-busyanya mukuyandana akucita milimo mibotu.’ (Taitasi 2:14, Ci; Ba-Hebrayo 10:24) Cakusalazya, aumwi wabasikulemba Bbaibbele, Jakobo wakati: “Mbubonya mbuli mubili uunyina muuya mbuufwide, alwalo lusyomo lunyina milimo lulifwide.”—Jemusi 2:26, Ci.

16. Ncinzi ciyandika kapati kwiinda milimo, pele ncinzi ncotweelede kucenjelela?

¹⁶ Nokuba kuti milimo mibotu inga ilayandika, makanze ngotujisi notucita milimo eeyo alayandika kapati kwiinda. Aboobo cilayandika kapati kuti katulanga-langa makanze ngotujisi ciindi aciindi. Mbwaanga taakwe muntu uukonzya kuziba nzyobayeeya bamwi, tweelede kukucenjelela kubeteka bamwi. Tubuzyigwa kuti: “Ani nduweni oopa kaambo kumubelesi wa Mwami?” Ibwiinguzi bulalimvwisya bwakuti: “Mwami wakwe alikke nguukonzya kuziba kuti naa wacita kabotu naa wakakilwa.” (Baloma 14:4, Ci) Jehova, Mwami waboonse alimwi a Mubetesi ngwabikkide, Kristo Jesu, uyootubeteka ikutali kumilimo yesu ilikke pele amakanze eesu, zyoolwe nzyotujisi, luyando ndotujisi alimwi akulyaaba kwesu. Alikke Jehova a Kristo Jesu mbabakonzya kubeteka munzila iiluzi naa twacita kweelana ancobakulwaizyigwa Banakristo kucita kweelana amajwi aamwaapostolo Paulo akuti: “Kolisungwaazya kukonda Leza, mbuli simulimo uutakwe cintu cimuusya insoni, uupandulula makani aalusinizyo mbukweelede.”—2 Timoteo 2:15; 2 Petro 1:10; 3:14.

17. Notusoleka kulisungwaazya, nkaambo nzi ncotweelede kulubikkila maanu lugwalo lwa Jakobo 3:17?

¹⁷ Jehova talangili kuti tucite zintu nzyotutakonzyi pe. Kweelana a Jakobo 3:17, “busongo buzwa kujulu,” akati kazintu zimwi “bulibombede, [Ci].” Sena inga tacibi camaanu alimwi cilumbaizyika ikuti naa twamwiiya Jehova mumakani aaya? Nkokuti, tatweelede kulibikkila mbaakani nzyotutakonzyi kucita alimwi akuzuzikizya naa kubikkila bakwesu.

18. Ncinzi ncotukonzya kulangila eelyo notulanga milimo yesu alimwi aluzyalo lwa Jehova munzila iili kabotu?

¹⁸ Kufwumbwa buyo kuti katwiilanga munzila mbotu milimo yesu yalusyomo alimwi aluzyalo lwa Jehova, tuyoozumanana katukkomene calo cili ncecizibyo cababelesi ba Jehova beni-beni. (Isaya 65:13, 14) Tulakonzya kukkomana kuti Jehova ulabalongezya bantu bakwe boonse, kunyina makani abunji bwamulimo ngotukonzya kucita lwesu. Twazumanana “kukomba akukukombelezya cakulumba,” tuyoomulomba Leza kutugwasya kusungwaala. Mpoonya, cakutadooneka, “luumuno lwa-Leza lwiinda miyeeyo yoonse yabantu luyooyaminina myoyo [yesu] amiyeeyo [yesu] muli-Kristo Jesu.” (Ba-Filipi 4:4-7) Inzya, tulakonzya kujana luumbulizyo alimwi akukulwaizyigwa kwiinda mukuziba kuti tulakonzya kufwutulwa ikutali kumilimo ilikke pele kwiinda muluzyalo lwa Jehova!

Sena Mulakonzya Kupandulula Kaambo Banakristo

• ncobatalisumpwidi kujatikizya milimo njobacita?

• ncobatayandili kuba amuuya wakuzundana?

• ncobapeda lipooti yamulimo wabo wamumuunda wa Bunakristo?

• ncobatabetekeli Banakristonyina?

[Mibuzyo yaciiyo]

[Cifwanikiso icili apeeji 27]

Baalu balakkomana amilimo aumwi njakonzya kucita kububotu bwambungano