‘Bali Acoolwe Aabo Babikkila Maano Kuzintu zya Kumuuya’

TUYUNI notubuka mafwumina, ziindi zinji tulalila kwaciindi cili mbocibede, kwamana boobo tulauluka kwaakulangaula cakulya. Kumangolezya tulajoka mpotoona akulila-lila kwakaindi twamana toona. Muziindi zimwi zyamwaka tulakwatana, tulatula mayi, alimwi tulakomezya bana akuulusya. Abamwi banyama mbobapona oobu.

Pele swebo tobantu tabusyi mbotupona oobu. Masimpe tulalya, tuloona, alimwi tulazyalana, pele bunji bwesu tatukkutili azintu eezyi. Tulayanda kuzyiba ncotuponena. Tulayandisya kuzyiba ncotuliko anyika. Alimwi tulayanda kuzyiba zyakumpela. Ooku kuyandisya kuzyiba twaambo tuli boobu, kutondezya bube muntu mbwajisi, nkokuti ibube bwakuyandisya kuzyiba zintu zyakumuuya.

Twakalengwa Mucinkozya ca Leza

Ibbaibbele lilapandulula kuyandisyisya zintu zyakumuuya kwamuntu kwalo kuli mubulowa noliti: “Leza wakalenga muntu mucinkozya cakwe. Wakamulenga mucinkozya ca-Leza. Wakabalenga baalumi abanakazi.” (Matalikilo 1:27) Akaambo kakulengwa “mucinkozya ca-Leza,” caamba kuti nokuba kuti cibi akutalondoka kwakatunyonganya, tulakonzya kutondezya bube bumwi bwa Leza. (Ba-Roma 5:12) Mucikozyanyo, tulakonzya kucita milimo iindenyi-indenyi. Alimwi tulijisi busongo, tulakonzya kucita cabululami, alimwi akukonzya kutondezya luyando cakulyaaba kuli umwi amweenzyinyina. Kunze lyaboobo, tulakonzya kuyeeya zintu zyakacitika kaindi, akulibambila zyakumpela.—Tusimpi 4:7; Mukambausi 3:1, 11; Mika 6:8; Johane 13:34; 1 Johane 4:8.

Luyandisyo lwesu lwazintu zyakumuuya lulalibonya kapati kuluyando ndotujisi lwakuzyalwa andulo lwakuyanda kukomba Leza. Ccita kuti cilongwe cesu ncotujisi a Mulengi wesu kacili ciyumu, ibuyo-buyo tatukonzyi kulujana lukkomano  lwini-lwini alimwi lutamani. Jesu wakati: ‘Bali acoolwe aabo babikkila maano kuzintu zyakumuuya.’ (Matayo 5:3) Aboobo tweelede kucenjela kucita luyando oolo kwiinda mukasimpe kakumuuya—nkokuti twaambo twini-twini twaamba Leza mbwabede, zyeelelo zyakwe, alimwi amakanze ngajisi kubantu. Ino nkuli nkotukonzya kukajana kasimpe kakumuuya? Tulakonzya kukajana mu Bbaibbele.

“Majwi Aako Ngamasimpe”

Mwaapositolo Paulu wakalemba kuti: “Magwalo aya oonse akazwa kuli-Leza, alikondede kukufundisya akukulaya, akukuolola.” (2 Timoteo 3:16) Majwi aa Paulu aleendelana amajwi aa Jesu ngaakaamba mumupailo kuli Leza aakuti: “Majwi aako ngamasimpe.” Mazuba aano tulizyi kuti Jwi lyaambwa ndi Bbaibbele. Inga caba camaano kulanga-langa nzyotusyoma mu Bbaibbele kutegwa tubone naa nzyotusyoma zileendelana azyeezyo zili mulindilyo.—Joni 17:17, Ci.

Kwiinda mukweelanya nzyotusyoma mu Jwi lya Leza, twiiya bantu baku Bereya bakabona kwaamba kuti kuyiisya kwa Paulu kuleendelana azyakali mu Magwalo. Muciindi cakubatongooka bana Bereya, Luka wakabalumbaizya akaambo kamuuya wabo mubotu. Wakalemba kuti: “Bakatambula makani emyoyo ilibambide kabotu, balalingaula Magwalo mazuba oonse, kubona kuti na zintu ezi mbozibede.” (Incito 17:11) Twalanga kwiindana kwanjiisyo zyazikombelo alimwi amumakani aakulilemeka kuvwulide mazuba aano, cilayandika kuccilila cikozyanyo cabana Bereya basungu.

Aimwi nzila yakukonzya kuzyiba kasimpe kakumuuya, nkubona mbokabajatikizya bantu mubuumi. (Matayo 7:17) Mucikozyanyo, ikupona kweelana akasimpe kamu Bbaibbele kweelede kupa muntu kuba mulumi uuli kabotu, swaabo uuli kabotu, mukaintu uuli kabotu, naa mutumbu uuli kabotu, calo cikonzya kutola ampela lukkomano lwamumukwasyi alimwi akukkutila kwaumwi aumwi. Jesu wakati: “Bali acoolwe abaswiilila makani aa-Leza akwaacita.”—Luka 11:28.

Majwi aa Jesu atuyeekezya majwi aba Swaabo bakujulu ngobakaamba kwaambila Isilayeli wansiku kuti: “Ndime Jehova Leza wako. Ndime uukwiiyisya kuti ugwasigwe. Ndime uukweenzya munzila njoelede kutola. Nicakabota niwakaswiilila milazyo yangu! Lino luumuno lwako nilwakaba mbuli mulonga, abululami bwako nibwakaba mbuli mayuwe aalwizi.” (Isaya 48:17, 18) Boonse aabo bayanda bubotu abululami, beelede kukulwaizyigwa amajwi aaya aaluzyalo.

Bamwi Bantu Balabotelwa ‘Kumvwa’

Leza wakabakombelezya bana Isilayeli akaambo kakuti bakali kunyonganizyigwa akubeja kwazikombelo. (Intembauzyo 106:35-40) Andiswe mbweena tweelede kucenjela kutwaambo twakubeja. Kujatikizya Banakristo balidunda, Paulu wakalemba kuti: “Ciindi cilasika ncobati kaleke kuzumina kufundisya kwinikwini, eno bayoogama kulijanina bafundisi bali mbuli kuyanda kwamyoyo yabo beni, kuti babotelwe kubamvwa. Bayoosinka matwi aabo kumakani menimeni.”—2 Timoteo 4:3, 4.

Basololi bazikombelo balabaunina bantu kwiinda mukulekela milimo mibi yalo iilibonya mbuli kuti mibotu, mbuli koonana kucitwa abantu batakwetenyi, koonana kwabasankwa, alimwi abucakolwa. Ibbaibbele lilasalazya kwaamba kuti aabo bazumizya zintu  zili boobu alimwi abaabo bazyicita, “tabakooyootambula bwami bwa Leza.”—1 Bakolinti 6:9, 10, Ci; Ba-Roma 1:24-32.

Cakutadooneka, kuyandika busicamba kutegwa muntu akonzye kupona kweelana azyeelelo zyamu Bbaibbele, ikapati nokuli basikukazya, pele inga cakonzyeka. Ibamwi Bakamboni ba Jehova bakali basimisamu iikola, bacakolwa, basimamambi, basinkondo, babbi, alimwi abasikubeja. Nokuba boobo bakabikkila maano ku Jwi lya Leza alimwi kwiinda mumuuya uusalala, bakacinca buumi bwabo ‘akukonzya kweenda munzila iikkomanisya Jehova.’ (Ba-Kolose 1:9, 10; 1 Ba-Korinto 6:11) Mbwaanga bakakonzya kuba aluumuno a Leza, akwalo kuliiba kwamumizeezo kwakakonzyeka, mbweena mbotulaabone kumpela ooku, bakaba abulangizi bwini-bwini.

Bulangizi bwa Bwami

Bulangizi bwa Bbaibbele bwakuba aluumuno lutamani kubantu babombe myoyo, buya kuzuzikizyigwa kwiinda mu Bwami bwa Leza. Mumupailo wakwe wacikozyanyo, Jesu wakati: “Abuze Bwami bwako, alucitwe luyando lwako, ansi ano mbubonya mbuli kujulu.” (Matayo 6:10) Masimpe, Bwami bwa Leza bolikke mbobukonzya kucita luyando lwa Leza ansi ano. Nkaambo nzi? Nkaambo kakuti Bwami bwakujulu, imfwulumende iili mumaanza aa Jesu Kristo, nenzila ya Leza yakutondezyela kweelela Kwakwe kwakuba muleli wanyika yoonse.—Intembauzyo 2:7-12; Daniele 7:13, 14.

Mbwali Mwami wa Bwami bwakujulu, Jesu Kristo uya kubaangulula bantu babombe myoyo kumapenzi oonse, kubikkilizya acibi ca Adamu amapenzi ngocileta, nkokuti kuciswa akufwa. Ibbuku lya Ciyubunuzyo 21:3, 4, lilati: “Amubone, bukalo bwa-Leza mpobuli akati kabantu, uzookala akati kabo. . . . Nkabela [Jehova Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”

Luumuno lutamani luya kuba munyika yoonse. Nkaambo nzi ncotukonzya kwaasyoma makani aayo? Ikaambo kalapandululwa kubbuku lya Isaya 11:9 ilyaamba kuti: “[Ibalelwa ba Bwami tabakacisi muntu] nikuba kunyonyoona moonse mucilundu cangu cisalala, nkaambo nyika iyoozula luzibo lwa-Jehova mbubonya mbuli maanzi mbwaazuzya lwizi.” Inzya muntu aumwi anyika uya kuba aluzyibo lwini-lwini  lwa Leza akulibombya kulinguwe. Hena bulangizi oobo tabumukkomanisyi? Ikuti naa bulamukkomanisya, ecino nceciindi cakutalika kuba a “luzibo lwa-Jehova.”

Hena Inga Mwaswiilila ku Mulumbe wa Bwami?

Kwiinda mu Bwami bwakwe, Leza uya kwiimana milimo yoonse ya Saatani, eelyo aakumana uya kubayiisya bantu nzila Zyakwe zyabululami. Aboobo, tacilamyi kuti Bwami ncecintu Jesu ncaakali kubikka ampela mukuyiisya kwakwe. Wakati: “Ndileelede kwiikambaukila minzi imwi Makani Mabotu aa-Bwami bwa-Leza, nkaambo nkonkuko nkwendakatuminwa.” (Luka 4:43) Kristo wakabalailila basikwiiya bakwe kukambauka mulumbe ngweena ooyu kubantu. (Matayo 28:19, 20) Wakasinsima kuti: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.” (Matayo 24:14) Mamanino aambwa alaafwiifwi kusika. Elo cilayandika kapati kaka kubaambila babombe myoyo mulumbe ooyu uupa buumi!

Albert iwaambwa mucibalo cainda, wakaumvwa mulumbe wa Bwami ciindi mukaintu wakwe abana bakwe nibakatalika kwiiya Bbaibbele a Bakamboni ba Jehova. Kumatalikilo Albert wakali kudooneka. Limwi wakasika nkwaita musololi wacikombelo kuti azikuswaye mukaintu amwanaakwe musankwa kutegwa aambe mbobali basikubeja Bakamboni. Pele musololi tanaakayanda kwaanjila makani aaya. Aboobo Albert wakayeeya kuti akkalile munsi-munsi nobaiya Bbaibbele kutegwa amvwe mbobabeja. Bamane buyo kwiiya ciiyo comwe, wakabasangana muciiyo kayandisya kwiiya nzinji. Kumane wakapandulula cakamupa kuti acince. Wakati: “Eeci ncencico ncindakali kulangaula lyoonse.”

Mukuya kwaciindi, Albert wakatalika kuya ampela kumuuya, aboobo taku naakadululula naa kuusa pe. Ikasimpe kamu Bbaibbele kakamugwasya kujana ncaakali kulangaula mubuumi—nkokuti nzila yakumana kutalulama kuliko munyika alimwi wakazyiba abulangizi bwakumpela. Kasimpe kamu Bbaibbele kakamupa kuti abe akuliiba kwamumizeezo. Hena mulakkutila kumuuya? Hena inga tamukonzyi kutola ciindi cili mbocibede kubala mibuzyo iili akabbokesi kali apeeji 6? Ikuti kamuyanda atumwi twaambo, Bakamboni ba Jehova balilibambide kumugwasya.

Kabbokesi/[Zifwanikiso izili apeeji 6]

Hena Mulakkuta Zintu Zyaku Muuya Nzyomulya?

Hena mulakkuta makani aakumuuya ngomujana? Mwalombwa kuti mubale mibuzyo eeyi iiccilila, eelyo mucconge eeyo

njomukonzya kwiingula.

□ Ino Leza nguni, alimwi nguni zina lyakwe?

□ Ino Jesu Kristo nguni? Ino nkaambo nzi ncaakeelede kuti afwe? Mbuti lufwu lwakwe mbolukonzya kumugwasya?

□ Hena Diabulosi nkwali? Ikuti naa mboobo, ino wakazyila kuli?

□ Ino ncinzi cicitika kulindiswe twafwa?

□ Makanze nzi Leza ngajisi kujatikizya nyika abantu?

□ Ino Bwami bwa Leza ninzi?

□ Ino nzyeelelo nzi zya Leza caboola kumakani aakulilemeka?

□ Ino mulimo nzi swaabo bana alimwi abanyina ngobajisi mumukwasyi Leza ngwaakabapa? Ino ninjiisyo nzi zyamu Bbaibbele zipa kuti kakuba kukkomana mumukwasyi?

Ikuti kakuli mpomudooneka kubwiinguzi bwanu, mulakonzya kulembela naa kulomba broshuwa yakuti Ncinzi Leza Ncayanda Kulindiswe? Yakalembwa a Bakamboni ba Jehova mumilaka iitandila ku 300. Broshuwa eeyi ilijisi ziiyo zisika ku 16 alimwi makani aali mumo, ngamu Bbaibbele. Kuli bwiinguzi bwamu Magwalo kumibuzyo yoonse eeyi yabuzyigwa.

[Zifwanikiso izili apeeji 4]

Ikwiindana abanyama, bantu balayandisya zintu zyakumuuya

[Cifwanikiso icili apeeji 5]

“Bayoogama kulijanina bafundisi bali mbuli kuyanda kwamyoyo yabo beni, kuti babotelwe kubamvwa.”—2 Timoteo 4:3

[Cifwanikiso icili apeeji 7]

Kuliiba kwamumizeezo kuya kuletwa kwiinda mu Bwami bwa Leza bwabu Mesiya