Ibana Balamutembaula Jehova
Ibana Balamutembaula Jehova
“Amutembaule Jehova ansi, . . . Bakubusi abakamwale.”—INTEMBAUZYO 148:7, 12.
1, 2. (a) Ino nkukasigwa kutyani ibana banji nkobazyi? (b) Ino nkaambo nzi bana ncobateelede kukaka kuswiilila zintu nzyobakasigwa abazyali babo?
IBANA ziindi zinji balizizyi kapati zintu nzyobatanazumizigwa kucita. Ibanji balakonzya kumwaambila kakunyina kuwayawaya imyaka njobeelede kuba anjiyo kutegwa bazumizigwe kukosola mugwagwa balikke naa ciindi ncobeelede kuunka kukoona mangolezya antela nobeelede kutalika kweenzya mootokala. Ziindi zimwi, bana balakonzya kuyeeya kuti zintu zinji nzyobalomba kuti bacite baingulwa buyo amajwi ngamunya aakuti, “Kolindila mane ukakomene.”
2 Nywebo nobana mulizyi kuti bazyali banu balizyi kaambo ncobamukasyila zintu zimwi, ambweni nkaambo kakuti bayanda kumukwabilila. Masimpe mulizyi kuti Jehova ulakkomana nomubaswiilila bazyali banu. (Ba-Kolose 3:20) Pele sena mulimvwa kuti kukasigwa zintu zimwi cipandulula kuti tamuneelela kukkomana mubuumi? Sena zintu ziyandika zyoonse zilikasidwe kusikila mukakomene? Tabusyi mbozibede zintu oobo. Kuli mulimo uuli mukucitwa lino uuyandika kapati kwiinda zintu nzyomukonzya kulindila buya. Sena nywebo nobana mulazumizyigwa kutola lubazu mumulimo ooyu? Tamuzumizyidwe buyo pe, pele mutambidwe buya a Leza lwakwe Mupati Kampatila!
3. Ino Jehova utamba bana kuti babe acoolwe cakutyani, alimwi mmibuzyo nzi njotutiilange-lange?
3 Ino mulimo nzi ngotuli mukwaamba? Amulange majwi aali mulugwalo lwamutwe wacibalo eeci aakuti: “Amutembaule Jehova ansi, . . . Bakubusi abakamwale, bacembele abanikenike!” (Intembauzyo 148:7, 12) Icoolwe eeci mulakonzya kucibelesya: Mulakonzya kutembaula Jehova. Mbomuli bana, sena mulikkomene kutola lubazu mumulimo ooyu? Ibanji balikkomene. Ikutegwa tubone mbociyandika kulimvwa boobo, atulange-lange mibuzyo yotatwe. Wakusaanguna ngwakuti, nkaambo nzi ncomweelede kumutembaula Jehova? Wabili, mbuti mbomukonzya kumutembaula cakumaniina? Watatu, ndilili nocili ciindi cibotu cakutalika kutembaula Jehova?
Nkaambo nzi Ncomweelede Kumutembaula Jehova?
4, 5. (a) Kweelana a Intembauzyo 148, ino tuli mubukkale buli buti bukondelezya? (b) Ino mbuti zilenge zitaambauli nokuba kuyeeya mbozitembaula Jehova?
4 Ikaambo kapati kakutembauda Jehova nkakuti ngo Mulengi. Intembauzyo 148 ilatugwasya kubikkila maano kukaambo aaka. Amuyeeyele buyo kuti: Ikuti naa mwasika ankamu mpati yabantu ibali mukwiimba caantoomwe lwiimbo lubotu lutekenya mubili, ino inga mwalimvwa buti? Ino kuti majwi aali mulwiimbo kaali majwi ngomuzyi kuti ngamasimpe, kalujisi twaambo ntomuzyi kuti tulayandika kapati, kalukkomanisya alimwi akukulwaizya? Sena inga mwalombozya kwiiya majwi kutegwa mwiimbile antoomwe? Bunji bwesu inga twacita oobo. Intembauzyo 148 itondezya kuti muli mubukkale bukozyene, pele bwalo bulainda aawa kubota. Intembauzyo eeyi ipandulula nkamu mpati, yoonse kaitembaula Jehova caantoomwe. Pele nomubala intembauzyo, mulakonzya kubona cintu ceenzu. Ino ncinzi eeco?
5 Bunji bwazintu zitembaula izipanduludwe ku Intembauzyo 148 tazyaambauli naa kuyeeya. Mucikozyanyo, tubala kujatikizya zuba, mwezi, nyenyezi, caanda, muwo, malundu atulundu kazitembaula Jehova. Ino mbuti zintu eezi zitaponi mbozikonzya kutembaula Jehova? (Tupango 3, 8, 9) Zilacita mbubwenya mbuli bucita masamu, zilenge zyamulwizi alimwi abanyama. (Tupango 7, 9, 10) Sena kuli nomwakalangilide kale kubbila kwazuba kukondelezya naa kulangilila mwezi nuuzyuka akweenda kujulu lizwide nyenyezi antela kusekelela banyama basobana ambweni kukankamuka akaambo kabuyale bwanyika bubotu kapati? Nkokuti ‘mwakamvwa’ lwiimbo lwakutembaula kuzwa kuzilenge. Zyoonse nzyaakalenga Jehova zituyeezya kuti ngo Mulengi singuzuzyoonse, akuti kunyina uujisi nguzu zili boobo, musongo kwiinda alimwi uujisi luyando ncobeni kujulu aansi.—Ba-Roma 1:20; Ciyubunuzyo 4:11.
6, 7. (a) Ino Intembauzyo 148 ipandulula zilenge nzi zijisi busongo kuti zilamutembaula Jehova? (b) Ino nkaambo nzi ncotukonzya kukulwaizyigwa kutembaula Jehova? Amupe cikozyanyo.
6 Intembauzyo 148 alimwi ipandulula kuti bangelo abantu balamutembaula Jehova. Mukapango 2, tujana kuti “makamu” aakujulu aa Jehova, ibangelo, balamutembaula Leza. Mukapango 11, bantu basinguzu alimwi bajisi bweendelezi mbuli bami ababetesi balaitwa kuti batole lubazu mukutembaula. Ikuti bangelo basinguzu kabakukkomanina kutembaula Jehova, nkokuti kunyina muntu weelede kulisumpula kwaamba kuti takonzyi kutembaula Jehova. Eelyo mutupango 12 a 13, nywebo nobana andinywe mulatambwa kuti mutole lubazu mukutembaula Jehova. Sena mulimvwa kuti mulayanda kucita boobo?
7 Amulange-lange cikozyanyo eeci. Ikuti kamujisi mweenzinyoko uujisi luzibo mucintu cimwi, ambweni mmuuzisobano, kupanga zintu naa munyimbo, sena inga kamutabaambili bamukwasyi wanu naa beenzyinyoko bambi kujatikizya nguwe? Cakutadooneka inga kamubaambila. Ikwiiya kujatikizya zintu zyoonse Jehova nzyaacita kulakonzya kutujatikizya mbubwenya buyo. Mucikozyanyo, Intembauzyo 19:1, 2 yaamba kuti julu lizwide nyenyezi ‘lilaamba.’ Pele swebo notuyeeya kujatikizya zintu zigambya Jehova nzyaacita, cilakonzya kutwaalila kuumuna buyo kakunyina kwaambila bamwi kujatikizya Leza.
8, 9. Ino ntwaambo nzi tupa kuti Jehova kayanda kuti katumutembaula?
8 Akamwi kaambo kapati kakumutembauda Jehova nkakuti mbwayanda kuti tucite. Nkaambo nzi? Sena nkaambo kakuti ulayandisya kutembaulwa abantu? Peepe. Swebo tobantu ziindi zimwi tulayanda kutembaulwa, pele Jehova walo ulisumpukide kapati kwiinda ndiswe. (Isaya 55:8) Kunyina nzyatazyi kabotu naa bube pe. (Isaya 45:5) Pele uyanda kuti katumutembaula alimwi ulakkomana ikuti twacita oobo. Nkaambo nzi? Amulange-lange twaambo tobilo. Kakusaanguna, ulizyi kuti tuleelede kumutembaula. Wakatubamba katuli bantu bayandika zyakumuuya, nkokuti kuyanda kukomba. (Matayo 5:3) Ikuzuzikizya lubazu oolu kulamukkomanisya Jehova, mbubwenya mbocikkomanisya bazyali banu nobamubona kamulya cakulya ncobazyi kuti cilamupa busani.—Johane 4:34.
9 Kabili, Jehova ulizyi kuti bantu bamwi baleelede kutumvwa katumutembaula. Mwaapostolo Paulo wakamulembela boobu mukubusi Timoteo: “Kolibonena omwini akufundisya kwako. Koujisi azintu ezi, utaleki pe, nkaambo wanoocita bobuya, inga ulalifutula omwini, abalo bakumvwa ulabafutula.” (1 Timoteo 4:16) Ee, nomuyiisya bamwi kujatikizya Jehova Leza akumutembaula, abalo balakonzya kumuzyiba Jehova. Iluzibo oolu lulakonzya kubaletela lufwutuko lutamani.—Johane 17:3.
10. Nkaambo nzi ncotukulwaizyigwa kutembaula Leza?
10 Pele kuli kaambo akambi kakumutembauda Jehova. Amuyeeye cikozyanyo cijatikizya mweenzinyoko uujisi luzibo. Ikuti mwamvwa bamwi kabamubejelezya akumuvwiya, sena tamukonzyi kuyuma-yuma kumutembaula? Jehova uli mukubejelezyegwa kapati munyika eeyi. (Johane 8:44; Ciyubunuzyo 12:9) Aboobo, aabo ibamuyanda balakulwaizyigwa kwaamba zyamasimpe kujatikizya nguwe, ikululamika makani oonse aakubeja. Sena andinywe inga mwayanda kutondezya luyando alimwi akulumba Jehova akutondezya kuti mulamuyanda kuti kali Muleli wanu muciindi casinkondonyina mupati Saatani? Mulakonzya kucita zyoonse eezyi kwiinda mukumutembaula Jehova. Eelyo mubuzyo utobela ngwakuti, mbuti mbomukonzya kumutembaula?
Bana Bamwi Mbobakamutembaula Jehova
11. Ino nzikozyanyo nzi zyamu Bbaibbele zitondezya kuti ibana bacita kabotu caboola kumakani aakutembaula Jehova?
11 Ibbaibbele litondezya kuti bana ziindi zinji bacita kabotu caboola kumakani aakutembaula Jehova. Mucikozyanyo, kwakali musimbi muna Israyeli wakali mubuzike abana Asuri. Cabusicamba wakakambauka kuli bamuka simalelo wakwe kujatikizya musinsimi wa Jehova Elisha. Imajwi ngaakaamba akapa kuti kucitike maleele, alimwi kwakacitwa bumboni bubotu. (2 Bami 5:1-17) Awalo Jesu wakakambauka cabusicamba kacili mwana. Akati kazintu zyoonse zyakacitika kacili mwana zyalo zyakeelede kulembwa mu Magwalo, Jehova wakasala kuti kulembwe buyo zyeezyo zyakacitika Jesu naakajisi myaka iili 12, cabusicamba naakababuzya mibuzyo bamayi babukombi kutempele yaku Jerusalemu akubagambya mbwaakali kuzimvwisya nzila zya Jehova.—Luka 2:46-49.
12, 13. (a) Ino ncinzi Jesu ncaakacita mutempele kakuceede mazuba masyoonto kuti ajaigwe, alimwi ino bantu bakajatikizyigwa buti okuya? (b) Ino Jesu wakalimvwa buti kukutembaula kwabana?
12 Kakomenede kale, Jesu alimwi wakakulwaizya bana kutembaula Jehova. Mucikozyanyo, kakuceede mazuba masyoonto buyo kuti ajaigwe, Jesu wakakkala kwaciindi cili mbocibede mutempele ku Jerusalemu. Ibbaibbele lyaamba kuti wakacita ‘maleele.’ Wakabatanda aabo ibakali kucita busena oobu busetekene kuba cikkalilo cababbi. Alimwi wakaponya boofwu abalema. Bantu boonse kubusena oobu, ikapati basololi babukombi bakeelede kukulwaizyigwa kutembaula Jehova alimwi a Mwanaakwe, Mesiya. Pele cuusisya ncakuti bantu banji ciindi eeco kunyina nobakamutembaula pe. Bakalizyi kuti Jesu wakatumidwe a Leza, pele bakali kuyoowa basololi babukombi. Nokuba boobo, nkamu yomwe yabantu yakaamba cabusicamba. Sena mulibazyi bantu aaba? Ibbaibbele lyaamba kuti: “Lino bapaizi basimutwe abalembi nibakabona malele ngaakacita, abana boongolola muntempele bati, Hosana ku-Mwana a-Davida, bakakalala, bamwaambila bati, Sa teewamvwa aba ncibaamba?”—Matayo 21:15, 16; Johane 12:42.
13 Bapaizi aaba bakali kuyeeya kuti Jesu ulabaumuzya bana bakali kumutembaula. Sena wakabaumuzya? Peepe! Jesu wakabaingula bapaizi kuti: “Ii. Sa tamubalide kuti, kuzwa kumilomo yatwana atunyonka wakalondola lutembaulo?” Kakunyina kudooneka, Jesu alimwi a Bawisi bakakukkomanina kutembaula kwabana basankwa. Ibana aaba bakali kucita cintu boonse bapati ncobakeelede kuti kabacita. Mumizeezo yabo yabukubusi, zyoonse zintu zyakali antangalala. Bakamubona mulombwana ooyu kacita milimo iigambya, kaambaula cabusicamba alusyomo alimwi akutondezya luyando lwini-lwini kuli Leza akubantu bakwe. Mbwaakali kulyaamba wakali nguwe ncobeni, kuti ngo “Mwana a-Davida” Mesiya wakasyomezyegwa. Bakalongezyegwa akaambo kalusyomo lwabo, kayi bana aaba bakaba acoolwe citaliboteli cakuzuzikizya businsimi.—Intembauzyo 8:2.
14. Ino mbuti zipego nzyobajisi bana mbozikonzya kugwasya mukutembaula Leza?
14 Ino ncinzi ncotukonzya kwiiya kuzwa kuzikozyanyo eezi? Ncakuti bana balakonzya kucita kabotu mumakani aakutembaula Jehova. Balijisi coolwe cakukonzya kukazyiba kabotu kasimpe akutondezya lusyomo lwabo cakusinizya alimwi cabusungu. Alimwi balijisi cipego cilembedwe kubbuku lya Tusimpi 20:29 kuti: “Bulemu bwabakubusi ninguzu zyabo.” Inzya, nywebo nobana mulijisi nguzu, icintu ciyandika kapati mukutembaula Jehova. Ino mbuti mbomukonzya kucibelesya kapati cipego eeci?
Ino Mbuti Mbomukonzya Kumutembaula Jehova?
15. Ikutegwa mumutembaule Jehova cabusungu, ino nkukulwaila kuli buti kuyandika?
15 Ikutembaula Jehova cabusungu kutalikila mumoyo. Tamukonzyi kumutembaula Jehova cabusungu ikuti naa bantu bamusungilizya buya. Kamuyeeya kuti, mulazyo mupati ngwakuti: “Yanda Leza Jehova wako amoyo wako woonse, amoya wako woonse, amumiyeeyo yako yoonse.” (Matayo 22:37) Sena mwamuzyiba Jehova kwiinda mukwiiya Jwi lyakwe? Iceelede kutobela akaambo kakwiiya ooku nkumuyanda Jehova. Inzila yeelede yakutondezyela luyando oolu nkumutembaula. Ikuti naa makanze aanu alikabotu alimwi mapati, nkokuti mulilibambide kumutembaula Jehova cabusungu.
16, 17. Ino kulilemeka kujisi mulimo nzi mukutembaula Jehova? Amupe cikozyanyo.
16 Lino kamutanalanga-langa ncomuya kwaamba, amulange-lange mbomuyoocita. Nikwali kuti ulya musimbi muna Israyeli iwakali kupona kuciindi ca Elisha wakalijisi cimpangwe, kubula bulemu naa kutasyomeka, sena muyeeya kuti basimalelo bakwe bana Asuri nobakaamvwa majwi aakwe aajatikizya musinsimi wa Jehova? Tacilangilwi eeci pe. Mbubwenya buyo, bantu balalangilwa kucinca ikuti naa babona kuti mulijisi bulemu, mulasyomeka alimwi akulilemeka kabotu. (Ba-Roma 2:21) Amulange-lange cikozyanyo eeci.
17 Mwana musimbi wakajisi myaka yakuzyalwa iili 11 waku Portugal wakasungilizyigwa kutola lubazu mukusekelela buzuba bwakulyookezya bwakali kukazyanya amanjezeezya aakwe aakayiisyigwa Bbaibbele. Wakapandulula cabulemu kubayi bakwe ikaambo kakamupa kukaka, pele bayi bakwe bakamufwubaazya. Mukuya kwamazuba, ibayi bakwe cakwiinduluka-induluka bakali kusoleka kumufwubaazya akumugunya akaambo kacikombelo cakwe. Nokuba boobo, musimbi ooyu wakazumanana kubalemeka. Nokwakainda myaka iili mbwiibede, mucizi ooyu wakatalika kubeleka mulimo wabupainiya bwaciindi coonse. Kumuswaangano wacooko, wakali kulangilila bantu bakali kubbapatizyigwa akumuzyiba umwi wabaabo. Muntu ooyu wakali mwiiyi wakali kumuyiisya kucikolo! Nibakamana kukumbatilana kumwi misozi kayeenda, mukaintu ooyu wakaambila musimbi ooyu kuti, kunyina naakakuluba kulilemeka kwasicikolo wakwe. Wakaswaigwa amucizi umwi Kamboni, eelyo mwiiyi ooyu wakapandulula zyakulilemeka kwasicikolo ngwaakali kuyiisya. Aboobo ciiyo ca Bbaibbele cakatalisyigwa, eelyo mukaintu ooyu wakazumina kasimpe kamu Bbaibbele. Ee, kulilemeka kwanu kulakonzya kuba nzila mbotu yakutembauda Jehova!
18. Ino ncinzi mwana ncakonzya kucita ikuti naa ulawayawaya kutalisya mubandi waamba zya Bbaibbele a Jehova Leza?
18 Sena ziindi zimwi cilamuyumina kutalisya mibandi iijatikizya lusyomo lwanu kucikolo? Tamuli molikke nomuli mubukkale buli boobu. Pele mulakonzya kupa kuti bamwi bamubuzye kujatikizya lusyomo lwanu. Mucikozyanyo, ikuti naa balazumizya, sena tamukonzyi kutoleezya mabbuku aamba zya Bbaibbele akwaabala ciindi cacikoboko naa ziindi zimbi zizumizyidwe kucita boobo? Basicikolonyoko balakonzya kumubuzya ncomubala? Kwiinda mukwiingula akubaambila cintu cikondelezya mucibalo naa mubbuku ndyomujisi, mulakonzya kujana kuti mubandi watalika kamutayeeyeli. Mutalubi kubuzya mibuzyo, amubabuzye basicikolonyoko nzyobasyoma. Amuswiilile cakubatama, akubaambila nzyomwakaiya mu Bbaibbele. Kweelana ambuli cakacitika cili apeeji 29 mbocitondezya, bana banji balamutembaula Leza kucikolo. Eeci cilabaletela lukkomano kapati alimwi akubagwasya kumuzyiba Jehova.
19. Ino mbuti bana mbobakonzya kuba basungu mumulimo wakuŋanda aŋanda?
19 Mulimo wakuŋanda aŋanda ninzila imwi iibeleka kapati yakutembaula Jehova. Ikuti naa tamunatalika kucita boobo, sena mulimo ooyu tamukonzyi kuucita kuba mbaakani yanu? Ikuti naa mwakatalika kale kutola lubazu, sena taakwe mbaakani azimbi nzyomukonzya kulibikkila? Mucikozyanyo, muciindi cakwiide kwaamba majwi ngamunya kufwumbwa aŋanda mpomwasika, amujane nzila zimbi zisumpukide, amubuzye bazyali banu naa ibambi bajisi luzibo kuti bamupe nzila zimbi. Amwiiye mbomukonzya kulibelesya kapati Bbaibbele, kucita kabotu nyendo zyakupilukila alimwi akutalisya ciiyo ca Bbaibbele. (1 Timoteo 4:15) Mbomuya butembaula Jehova munzila eezi, muyooba basungu alimwi munooukkomanina mulimo wanu.
Ino Ndilili Nomweelede Kutalika Kutembaula Jehova?
20. Ino nkaambo nzi bakubusi ncobateelede kuyeeya kuti bacili bana cakuti tabakonzyi kutembaula Jehova?
20 Akati kamibuzyo yotatwe iibandikwa mucibalo eeci, ibwiinguzi bwayooyu mbobutakatazyi. Amubone bwiinguzi bwa Bbaibbele bugaminina bwakuti: “Koyeeya Mulengi wako mumazuba aabulombe bwako.” (Mukambausi 12:1) Ee, iciindi cakutalika kutembaula Jehova ndilino. Ncuuba-uba kwaamba kuti: “Ndicili mwana kutalika kutembaula Jehova. Tandijisi luzibo. Ndileelede kulindila mane ndikakomene.” Tamulindinywe nomwasaanguna kulimvwa boobu pe. Mucikozyanyo, mukubusi Jeremiya wakaambila Jehova kuti: “Akaka Mwami Jehova! Mebo nsikonzyi kukambauka, nkaambo ncili mwanikenike.” Jehova wakamusyomezya kuti tanaakeelede kuyoowa pe. (Jeremiya 1:6, 7) Mbubwenya buyo, taakwe ncotweelede kuyoowa notutembaula Jehova. Kunyina penzi likonzya kutusikila Jehova ndyatakonzyi kumana.—Intembauzyo 118:6.
21, 22. Ino nkaambo nzi bana basikutembaula Jehova ncobakozyanisyigwa kumume, alimwi nkaambo nzi cikozyanyo eeci ncocikulwaizya?
21 Aboobo twamukulwaizya nobana kuti: Mutawayiwayi kutembaula Jehova. Lino nomucili bana, nceciindi cibotu kapati cakutola lubazu mumulimo uuyandika kapati uuli mukucitwa munyika sunu. Ikuti naa mwacita oobo, muyooba akati kamukwasyi wakujulu aanyika uuyandika iwabaabo batembaula Jehova. Jehova uyanda kuti mube mumukwasyi ooyu. Amubone majwi aaya aakasololelwa amuuya sintembauzyo ngaakaambila Jehova: “Basilumamba bako banooyoolyaabide ncobeni mubuzuba bwankondo, mbubonya mbuli mume wakutulundu-lundu mbobayooboola, mbobayooboola bakubusi bako kulinduwe mbobuyoongwengwemukila buyo.”—Intembauzyo 110:3, BT.
22 Mume uumweka nowamunikwa amumuni cifwumofwumo ulibonya kubota kapati, sena tabusi? Ulakatalusya, ulamweka alimwi taubaliki. Oobu Jehova mbwamubona nywebo nobana nomumutembaula cakusyomeka mumazuba aaya aakumamanino. Cilasalala kuti ikusala kwanu kubelekela Jehova kulamukkomanisya walo. (Tusimpi 27:11) Aboobo, kwiinda munzila njomukonzya, nywebo nobana amumutembaule Jehova!
Ino Inga Mwaingula Buti?
• Ino ntwaambo nzi tuyandika twakutembauda Jehova?
• Ino nzikozyanyo nzi zyamu Bbaibbele zitondezya kuti bana balakonzya kuba basungu mukutembaula Jehova?
• Ino mbuti bana mbobakonzya kumutembaula Jehova sunu?
• Ino ndilili bana nobakonzya kutalika kumutembaula Jehova, alimwi nkaambo nzi?
[Mibuzyo yaciiyo]
[Zifwanikiso izili apeeji 18]
Ikuti mweenzinyoko kajisi luzibo, sena tamukonzyi kunoomwaamba kuli bamwi?
[Cifwanikiso icili apeeji 21]
Ikuti kamuyanda kuyaambele mumulimo, amubabuzye inzila zimbi Bakamboni bajisi luzibo