Makani Mabotu Kubantu Bamisyobo Yoonse
Makani Mabotu Kubantu Bamisyobo Yoonse
“Muyooba bakamboni bangu . . . kusikila kumamanino aanyika.”—INCITO 1:8.
1. Mbotuli bamayi ba Bbaibbele, makani nzi ngotubikkila maano, alimwi nkaambo nzi?
BAMAYI bacibwene balabikkila maano ikutali buyo kuzintu nzyobaambila basicikolo, pele alimwi anzila nzyobabelesya nobabaambila. Mbotuli bamayi bakasimpe kamu Bbaibbele, tulacita mbubonya. Tulabikkila maano kumulumbe ngotukambauka alimwi anzila nzyotubelesya. Mulumbe wesu, nkokuti makani mabotu aa Bwami bwa Leza taucinci pe, pele zimwi ziindi tulacinca nzila nzyotubelesya kutegwa zyeendelane abukkale. Nkaambo nzi? Nkaambo kakuti tuyanda kusikila bantu banji.
2. Nguni ngotwiiya eelyo notucinca-cinca nzila nzyotubelesya notukambauka?
2 Kwiinda mukucinca-cinca nzila nzyotubelesya mubukambausi bwesu, twiiya babelesi ba Leza bakaindi. Mucikozyanyo, amulange cikozyanyo camwaapostolo Paulo. Wakati: “Kuba-Juda ndibede mbuli mu-Juda . . . Kulibaabo bali kunsi ku-Mulao ndibede mbubabede . . . Kulibakompeme ndibede mbuli mukompesi ndemwini, kuti nkabavube bakompeme. Kubantu boonse bali buti ndibede mbubabede balo, kuti nkasinizye kufutula bamwi.” (1 Ba-Korinto 9:19-23) Ikucinca-cinca nzila nkwaakacita Paulo cakamugwasya kapati kuti azwidilile. Aswebo tulakonzya kuzwidilila ikuti naa katubikkila maano kuzintu nzyayandika muntu alimwi ambwalimvwa.
Kusikila ‘Kumagolelo Oonse Aanyika’
3. (a) Ndipenzi nzi ndyotujana mumulimo wesu wakukambauka? (b) Mbuti majwi aali kuli Isaya 45:22 mbwaali mukuzuzikizyigwa sunu?
3 Ipenzi pati ndyobajisi aabo bakambauka makani mabotu nkukomena kwacilawo, nkokuti “munyika yoonse.” (Matayo 24:14) Mumwaanda wamyaka wainda, babelesi ba Jehova banji bakabeleka canguzu muzilawo zipya kumwaya makani mabotu. Ino ncinzi cakacitika? Ikuvwula kulamya kwazilawo munyika yoonse kwakacitika. Kumatalikilo kwamwaanda wamyaka wa 20, imulimo wakukambauka wakali kucitwa buyo mumasi masyoonto, pele sunu Bakamboni ba Jehova mbasungu mumasi aali 235. Masimpe, makani mabotu aa Bwami ali mukukambaukwa nokuba “[k]umagolelo oonse aanyika.”—Isaya 45:22.
4, 5. (a) Mbaani ibatola lubazu lupati mukumwaya makani mabotu? (b) Ncinzi maofesi aamitabi aamwi ncaakaamba kujatikizya baabo ibazwa kumasi aambi ibabelekela mucilawo camutabi?
4 Ino ntwaambo nzi tupa kuti kube kuyaambele kuli boobu? Ntunji kapati. Bamisyinali bayiisyigwa kucikolo ca Watchtower Bible School of Gilead alimwi abaabo caino-ino aawa ibakamanizya Cikolo Cakwiiya Mulimo ibainda ku 20,000 bagwasya kapati. Kuyungizya waawo, kuli Bakamboni banji aabo kwiinda mukubelesya mali aabo bakalongela kumasi kuyandika basikumwaya ba Bwami banji. Banakristo balyaabide aabo, nkokuti baalumi abakaintu, bana abapati, ibali balikke a bakwetene, bajisi lubazu lupati mukukambauka mulumbe wa Bwami munyika mbwiizulwa. (Intembauzyo 110:3; Ba-Roma 10:18) Elo kaka balalumbwa kapati! Amubone maofesi aamitabi aamwi ncaakalemba kujatikizya baabo ibabeleka muzilawo imubulide kapati basikumwaya mucilawo camutabi.
5 “Bakamboni aaba bayandwa mbabali kumpela mukukambauka kumasena aali kule kapati, kugwasya kutalisya mbungano zipya alimwi akugwasya mukuyaambele kumuuya kubakwesu abacizyi banyenzi.” (Ecuador) “Ikuti myaanda myaanda yabakwesu bazwa kumasi aambi ibabeleka okuno bazwa, imbungano zilakonzya kuyaansi. Ncilongezyo cipati kuba abalo.” (Dominican Republic) “Mumbungano zyesu zinji, ibanji mbacizyi, zimwi ziindi 70 pacenti buya kuvwula. (Intembauzyo 68:11) Ibunji bwabacizyi aaba bacili bapya mukasimpe, pele bacizyi bapainiya ibatakwetwe bakazwa kumasi aambi bapa lugwasyo lupati kwiinda mukuyiisya bapya aaba. Bacizyi aaba bazwa kumasi aambi masimpe ncipego citaliboteli kulindiswe!” (An Eastern European land) Sena kuli nomwakasola kuyeeya kuyoobelekela kucisi cimbi? *—Incito 16:9, 10.
“Bantu Bali Ikumi Bazwa Kumisyobo Yoonse”
6. Mbuti lugwalo lwa Zekariya 8:23 mbolutondezya penzi lyakusikila bantu bakanana misyobo iindene-indene mumulimo wesu wabukambausi?
6 Ipenzi limbi pati nkuvwula kwamisyobo iikananwa munyika. Ijwi lya Leza lyakasinsima kuti: “Mumazuba ayo bantu bali ikumi bazwa kumisyobo yoonse akumyaambo yoonse bayoojata cikobela camuntu mu-Juda, bayooti, Atweende anywebo, nkaambo twamvwa kuti Leza mpali akati kanu.” (Zekariya 8:23) Mukuzuzikizyigwa kwabusinsimi oobu mazubaano, bantu bali kkumi baiminina ibankamu mpati, yakasinsimwa ku Ciyubunuzyo 7:9. Nokuba boobo, amubone kuti kweelana abusinsimi bwa Zekariya, “bantu bali ikumi” bayoozwa ikutali buyo kumasi oonse pele alimwi a “kumisyobo yoonse.” Sena twakubona kuzuzikizyigwa kwakaambo aaka kayandika kapati kabusinsimi? Inzya twakubona.
7. Myeelwe nzi iitondezya kuti bantu bazwa “kumisyobo yoonse” bali mukukambaukilwa makani mabotu?
7 Amubone myeelwe imwi. Myaka iili 50 yainda, mabbuku eesu akali kusimbwa mumyaambo iili 90. Mazubaano, mweelwe ooyu wayungizyigwa kwiinda ku 400. “Muzike musyomesi uucenjede” wabeleka kusikila mpagolela mukumwaya mabbuku nokuba kuli bamwi aabo mwaambo wabo uukananwa buyo abantu basyoonto. (Matayo 24:45) Mucikozyanyo, mabbuku aabandika Bbaibbele lino alajanika mumwaambo waci Greenlandic (ukananwa abantu bali 47,000), Palauan (ukananwa abantu bali 15,000) alimwi awaci Yapese (ukananwa abantu batasiki ku 7,000).
“Mulyango Mupati” Uusololela Kuzyoolwe Zipya
8, 9. Nzintu nzi zyasololela kukujaluka kwa “mulyango mupati” kulindiswe, alimwi mbuti zyuulu zyuulu zya Bakamboni mbobali mukucita kutegwa bagwasye?
8 Pele mazubaano tatuyandiki buya kuunka kumasi aambi kutegwa tubakambaukile makani mabotu bantu bazwa kumyaambo yoonse. Mumyaka yalino-lino, ikuboola kwatuulunzuma twabantu bamumasi aambi alimwi abazangalisi mumasi aasumpukide kwapa kuti kube masena manji aakkala bantu bakanana myaambo minji yakule. Mucikozyanyo, mu Paris mucisi ca France, kulakananwa myaambo iindene-indene iisika ku 100. Mu Toronto ku Canada, ili 125; alimwi mu London ku England, imyaambo yakumasi aambi iinda ku 300 ilakananwa. Ikujanika ooku kwabantu bazwa kumasi aambi muzilawo zinji zyambungano kujalula “mulyango mupati” uusololela kuzyoolwe zipya zyakutola makani mabotu kubantu bazwa kumasi oonse.—1 Ba-Korinto 16:9.
9 Zyuulu zyuulu zya Bakamboni bali mukulilwana penzi eeli lyakukambaukila bantu bazwa kumasi oonse kwiinda mukwiiya mwaambo umbi. Bunji bwabo, nciyumu; pele ikusolekesya kwabo kulalongezyegwa alukkomano lujanika kwiinda mukugwasya bantu bazwa kumasi aambi alimwi abazangalisi kwiiya kasimpe kajanika mu Jwi lya Leza. Mumwaka walino-lino, ibatandila ku 40 pasenti yabaabo ibakabbapatizyigwa kumuswaangano wacooko mucisi cimwi cili ku Europe nkoili Kumbo bakazwa kucisi cimbi.
10. Mbuti mbomwali kukabelesya kabbuku kakuti Good News for People of All Nations? (Amubone kabbokesi kakuti “Zibeela zili Mukabbuku ka Good News for People of All Nations,” apeeji 32.)
10 Masimpe, bunji bwesu tatuli mubukkale bukonzya kutupa kwiiya mwaambo wakucisi cimbi. Nokuba boobo, tulakonzya kutola lubazu mukugwasya bantu bazwa kumasi aambi kwiinda mukukabelesya kabotu kabbuku kakazwa lino-lino kakuti Good News for People of All Nations, * ikajisi mulumbe wamu Bbaibbele uujila mumoyo mumyaambo minji iindene-indene. (Johane 4:37) Sena muli mukukabelesya kabbuku aaka mumulimo?
Bantu Nobatabikkili Maano
11. Ndipenzi nzi limbi lijanika muzilawo zimwi?
11 Saatani mbwazumanana kuyunga bantu anyika, kuli penzi limbi lijanika kanji-kanji, ndyakuti bantu tababikkili maano muzilawo zimwi. Masimpe, bukkale oobu tabutugambyi mbwaanga Jesu wakaambila limwi kuti bukkale oobu buya kuba. Kaamba mazuba ngotupona, wakati: “Bantu banji bazooya buleka luyandisyo lwabo.” (Matayo 24:12) Inzya, bantu banji bacileka kusyoma Leza alimwi tabalitobeli Bbaibbele. (2 Petro 3:3, 4) Aboobo, mumasena aamwi aamunyika, mbasyoonto kapati bantu ibaba basikwiiya ba Kristo bapya. Pele eeci tacaambi kuti ikubeleka canguzu nkobacita bakwesu abacizyi Banakristo ibakambauka cakusyomeka muzilawo oomo bantu mobatabikkili maano nkwabuyo. (Ba-Hebrayo 6:10) Nkaambo nzi? Amulange makani aatobela.
12. Makanze nzi obile aatupa kutola lubazu mumulimo wesu wakukambauka?
12 Makani Mabotu aa Matayo aamba makanze mapati obile aamulimo wesu wakukambauka. Makanze aakusaanguna ngakuti tuyanda ‘kugwasya bantu bamisyobo yoonse kuba basikwiiya.’ (Matayo 28:19) Makanze aabili ngakuti mulumbe wa Bwami upa “bumboni.” (Mateyo 24:14, Ci) Makanze oonse alayandika kapati, pele aabili alayandika munzila iilibedelede. Ino nkaambo nzi?
13, 14. (a) Ncibeela nzi cipati cacitondezyo cakubako kwa Kristo? (b) Ncinzi ncotweelede kuyeeya lyoonse ikapati notukambaukila mucilawo bantu banji mobatabikkili maano kumakani mabotu?
13 Mulembi wa Bbaibbele Matayo wakalemba kuti baapostolo bakabuzya Jesu kuti: “Ncinzi cizooba citondezyo cakuboola kwako acamamanino aaciindi?” (Matayo 24:3) Mukwiingula, Jesu wakati icitondezyo cimwi icakali kuyoolibonya kapati cacitondezyo eeco, mmulimo wakukambauka munyika yoonse. Sena wakali kwaamba mulimo wakugwasya bantu kuba basikwiiya? Peepe. Wakati: “Makani Mabotu aabwami bwa Leza ayookambaukwa munyika yoonse, kuti bukabe bumboni kumisyobo yoonse.” (Mateyo 24:14, Ci) Aboobo Jesu wakatondezya kuti mulimo wakukambauka Bwami kuugama uyooba cibeela cipati cacitondezyo.
14 Nkokuti notukambauka makani mabotu aa Bwami, tulayeeya kuti nokuba kuti lyoonse tatuzwidilili mukugwasya bantu kuba basikwiiya, tulazwidilila mukupa “bumboni.” Tacikwe makani naa bantu balautambula naa pe, balizyi ncotucita alimwi tulatola lubazu mukuzuzikizya businsimi bwa Jesu. (Isaya 52:7; Ciyubunuzyo 14:6, 7) Kamboni mwana-mwana uukkala ku Europe nkoili Kumbo, wazina lya Jordy wakati: “Ikuzyiba kuti ndili mukubelesyegwa a Jehova kutola lubazu mukuzuzikizya Matayo 24:14, cilandikkomanisya kapati.” (2 Ba-Korinto 2:15-17) Cakutadooneka mbomulimvwa andinywe.
Eelyo Mulumbe Wesu Noutatambulwi
15. (a) Ino Jesu wakabacenjezya kujatikizya nzi basikumutobela? (b) Ncinzi citugwasya kukambauka nokuba kuti tulakazyigwa, alimwi ino ncinzi citugwasya kucita boobo?
15 Ikukazyigwa kapati ndipenzi alimbi mukukambauka makani mabotu aa Bwami. Jesu wakabacenjezya basikumutobela kuti: “Muzoosulwa kumisyobo yoonse nkaambo kazina lyangu.” (Matayo 24:9) Mbubwenya mbuli Banakristo bakusaanguna, basikutobela Jesu mazubaano balasulwa, kukazyigwa alimwi akupenzyegwa. (Incito 5:17, 18, 40; 2 Timoteo 3:12; Ciyubunuzyo 12:12, 17) Mumasi aambi, mulimo wabo lino ulilesyedwe amfwulumende. Nokuba boobo, akaambo kakuti bayanda kumumvwida Leza, Banakristo beni-beni mumasi aayo balazumanana kukambauka makani mabotu aa Bwami. (Amosi 3:8; Incito 5:29; 1 Petro 2:21) Ino ncinzi cibagwasya balo, kubikkilizya a Banakristo boonse bambi munyika yoonse kucita boobo? Jehova ulabapa nguzu kwiinda mumuuya wakwe uusalala.—Zekariya 4:6; Ba-Efeso 3:16; 2 Timoteo 4:17.
16. Mbuti Jesu mbwaakatondezya mbouswaangene mulimo wakukambauka alimwi amuuya wa Leza?
16 Jesu wakakankaizya kuswaangana kupati kuliko akati kamuuya wa Leza alimwi amulimo wakukambauka naakaambila basikumutobela kuti: “Muyootambula nguzu, wasika alindinywe Muuya Uusalala, muyooba bakamboni bangu . . . kusikila kumamanino aanyika.” (Incito 1:8; Ciyubunuzyo 22:17) Mbozitobelene zintu mulugwalo oolu kulayandika kapati. Cakusaanguna, basikwiiya bakatambula muuya uusalala, kumane boobo bakautalika mulimo wakukambauka munyika yoonse. Nkwiinda buyo mukugwasyigwa amuuya wa Leza nobakali kuyooba anguzu kuti bazumanane kupa “bumboni kumisyobo yoonse.” (Mateyo 24:13, 14, Ci; Isaya 61:1, 2) Aboobo cakweelela, Jesu wakaamba muuya uusalala kuti “Mugwasyi.” (Johane 15:26) Wakaamba kuti muuya wa Leza wakali kuyoobayiisya akubasololela basikwiiya bakwe.—Johane 14:16, 26; 16:13.
17. Mbuti muuya uusalala mboutugwasya notwakazyigwa kapati?
17 Ino muunzila nzi mboutugwasya muuya wa Leza mazubaano nokuli kukazyigwa kapati mukukambauka makani mabotu? Muuya uusalala ulatuyumya, alimwi ulabalwana aabo ibatupenzya. Ikutegwa twaapandulule makani aaya, amulange cakacitika mubuumi bwa Mwami Saulo.
Ikulwanwa Amuuya wa Leza
18. (a) Ino nkucinca kuli buti kubyaabi kwakamucitikila Saulo? (b) Ninzila nzi nzyaakabelesya Saulo ikupenzya Davida?
18 Kumatalikilo Saulo wakali kabotu kali mwami mutaanzi wa Israyeli, pele kumbele wakamuzangila Jehova. (1 Samuele 10:1, 24; 11:14, 15; 15:17-23) Aboobo, muuya wa Leza wakaleka kumugwasilizya mwami. Saulo wakakalala kapati akutondezya kunyema kwakwe kwiinda mukulwana Davida, ooyo wakananikwa kuba mwami alimwi kuciindi eeco iwakali kugwasyigwa amuuya wa Leza. (1 Samuele 16:1, 13, 14) Davida wakalibonya kutakatazya buya kujaya. Kayi cilikke ncaakajisi nkalumbu kakuli Saulo wakajisi sumo. Aboobo bumwi buzuba Davida naakali kuuma kalumbu, “Saulo wakaliwaala elyo isumo, wakati, Mujayile kubulambo Davida. Pele Davida [wakasotokela] kumbi ziindi zyobile.” (1 Samuele 18:10, 11) Kuzwa waawo Saulo wakamuswiilila mwanaakwe Jonatani, mulongwe wa Davida, alimwi akukonka kuti: “Ncobeni mbuli Jehova mbali-wo, [Davida] takoofwa pe.” Pele alimwi Saulo “wakasoleka kuyasa Davida asumo kuti amusyanikizye kubulambo.” Nokuba boobo, Davida “wakacija kuzwa kuli-Saulo, isumo lyakwe lyakayasa kubulambo buyo.” Davida wakacija, pele Saulo wakamutobela. Aciindi eeco cikatazyide, muuya wa Leza wakatalika kumulwana Saulo. Munzila nzi?—1 Samuele 19:6, 10.
19. Mbuti muuya wa Leza mbuwakamukwabilila Davida?
19 Davida wakaccijila kumusinsimi Samuele, pele Saulo wakatuma bantu bakwe kuyoomujata Davida. Pele nobakasika kubusena nkwaakayubide Davida, “Muuya wa-Leza wakabasikila abo batumwa ba-Saulo, mpawo bakasinsima abalo.” Bakanjilwa kapati amuuya wa Leza cakuti bakalubila limwi makanze aalweendo lwabo. Kwaaziindi zyobile Saulo wakatuma bantu kuti bamulete Davida, pele ncimunya buyo cakacitika kwaziindi zyobile. Kumamanino, Mwami Saulo kumugama wakaunka kuli Davida, pele awalo tanaakali kukonzya kuulwana muuya wa Leza. Alimwi buya muuya uusalala wakalimujisi “buzuba boonse isikati amasiku”—ikupa Davida ciindi cakuti accije.—1 Samuele 19:20-24.
20. Nciiyo nzi ncotukonzya kwiiya kucibalo caamba Saulo mbwaakapenzya Davida?
20 Cibalo eeci cijatikizya Saulo a Davida cijisi ciiyo ciyumya-yumya: Basikupenzya babelesi ba Leza tabakonzyi kuzwidilila nobalwanwa amuuya wa Leza. (Intembauzyo 46:11; 125:2) Jehova wakakanzide kuti Davida uyooba mwami wa Israyeli. Kunyina muntu wakali kunga waacinca makanze aaya. Mumazuba eesu, Jehova ukanzide kuti ‘Makani Mabotu aa Bwami akambaukwe.’ Kunyina uukonzya kulesya kuti eeci citacitiki.—Incito 5:40, 42.
21. (a) Mbuti basikukazya bamwi mazubaano mbobacita? (b) Ino ncinzi ncotukonzya kusyoma?
21 Beendelezi babukombi alimwi abankamu zyatwaambo twacisi bamwi babelesya bubeji noiba nkondo buya ikusola kutusinkila. Pele, mbubwenya Jehova mbwaakakwabilila Davida kwiinda mumuuya, uyoobakwabilila bantu Bakwe mazubaano. (Malaki 3:6) Aboobo mbuli Davida, tulaamba calusyomo kuti: “Leza ngunsyoma cakutayoowa. Ino bantususu bandicitenzi?” (Intembauzyo 56:11; 121:1-8; Ba-Roma 8:31) Kwiinda mukugwasyigwa a Jehova, atuzumanane kuliyumya mumapenzi oonse mbotuzumanana kubeleka mumulimo ngotupedwe a Leza wakukambauka makani mabotu aa Bwami kubantu bamisyobo yoonse.
Bupanduluzi buyungizidwe
^ munc. 5 Amubone kabbokesi kakuti “Ikulimvwa Kukkutila Kapati,” apeeji 28.
^ munc. 10 Kakamwaigwa a Bakamboni ba Jehova.
Sena Inga Mwayeeya?
• Nkaambo nzi ncotucinca-cinca nzila zyesu zyabukambausi?
• Ino mulyango nzi mupati iwajalulwa uusololela kuzyoolwe zipya?
• Ino ncinzi ncotuzuzikizya mumulimo wesu wakukambauka nomuba mumasena bantu mobatabikkili maano?
• Nkaambo nzi ncokutakonzyi kuba sikukazya naba omwe uukonzya kulesya mulimo wakukambauka makani mabotu aa Bwami?
[Mibuzyo yaciiyo]
Kabbokesi kali apeeji 28]
Ikulimvwa Kukkutila Kapati
“Ibakkomene alimwi ibabeleka calukamantano mumulimo wa Jehova.” Majwi aayo apandulula mukwasyi iwakalonga kuzwa ku Spain akuunka ku Bolivia. Mwana musankwa wamumukwasyi ooyu wakaunkide nkuko kutegwa akagwasye kakamu kakali kuyandika lugwasyo. Lukkomano ndwaakajana lwakabakkomanisya kapati bazyali bakwe cakunga cakutasowa ciindi mukwasyi woonse, kubikkilizya abalombe bone bajisi myaka iili akati ka 14 kusikila ku 25, bakaunka kwaakubelekela nkuko. Botatwe akati kabasankwa aaba lino bacita bupainiya, alimwi ooyu umwi iwakajalula nzila lino-lino aawa wakajanika ku Cikolo Cakwiiya Mulimo.
Angelica, uuli amyaka iili 30 uuzwa ku Canada, ooyo uubelekela ku Europe nkoili Kujwe wakati: “Kuli mapenzi manji aaliko, pele mebo ndilajana kukkutila kwiinda mukugwasya bantu mumulimo. Alimwi ndilajatikizyigwa kapati mumizeezo amajwi aakulumba kuzwa kuli Bakamboni banji banyenzi aabo kanji-kanji ibandilumba akaambo kakuboola kuzoobagwasya.”
Basimbi bobilo ibanabokwabo ibali amyaka iitandila ku 30 ibazwa ku United States, aabo ibabelekela ku Dominican Republic bakati: “Kwakali zilengwa zinji ziindene-indene nzyotwakeelede kuzyiba. Pele twakazumanana mumulimo wesu, alimwi ziiyo zyesu zya Bbaibbele izili ciloba zilajanika kumiswaangano.” Bacizyi aaba bobile bakagwasya kapati mukubamba kakamu kabasikumwaya ba Bwami mudolopo imutakwe mbungano.
Laura, imucizyi ulaamyaka iitandila ku 30, wali kubeleka kucisi cimbi kwamyaka iinda kuli yone. Mboobu mbwaamba: “Cakuliyandila ndipona buumi buuba-uba. Eeci cilabagwasya basikumwaya kubona kuti ikupona buumi buuba-uba ncintu cakuliyandila alimwi cicitwa cakulibatamika, ikutali akaambo kabucete. Ikucikonzya kubagwasya bamwi, ikapati ibakubusi, candiletela lukkomano lunji oolo lumana buyumu-yumu boonse bwakubelekela mucilawo cakucisi cimbi. Tandikaleki mulimo wangu kuno kutegwa ndicite cintu cimbi mubuumi bwangu, alimwi ndiyoozumanana kufwumbwa buyo kuti Jehova kacizumizya.”
Kabbokesi/[Cifwanikiso icili apeeji 32]
Zibeela Zili Mukabbuku ka Good News for People of All Nations
Ikabbuku ka Good News for People of All Nations kajisi mulumbe uli apeeji lyomwe mumyaambo iili 96 iindene-indene. Imulumbe uugaminide muntu ngomuyaana. Aboobo eelyo siŋanda nabala mulumbe, umvwa mbuli kuti ndinywe nomuli mukwaambaula anguwe.
Civwumbyo mocili mukati kuli maapu yanyika yoonse. Amubelesye maapu eeyi kuba nzila yakutalisya mubandi asiŋanda. Ambweni mulakonzya kumutondezya cisi nkomukkala alimwi akutondezya kuti mulayanda kuzyiba nkwazwa awalo. Munzila eeyi, mulakonzya kumupa kwaambaula alimwi akupa kuti mubandi ube wabulongwe alimwi uukkomanisya.
Imakani mataanzi aakabbuku aaka ajisi ntaamu zinji nzyotweelede kubweza ikutegwa tubagwasye kabotu aabo ibabandika mwaambo ngotutamvwi. Amuzibale ntaamu eezi cakusitikila akubona kuti mwazibelesya ncobeni.
Mucibeela cazili mukati takundandamikidwe buyo myaambo pele alimwi azitondezyo ziiminina myaambo eeyo mumuzila ngoona. Cibeela eeci cimugwasya kuzyiba zizyibyo zyamyaambo iisimbidwe mumatulakiti eesu alimwi amabbuku aambi mumyaambo iimbi iindene-indene.
[Cifwanikiso icili apeeji 32]
Sena mulakabelesya kabbuku aaka mumulimo?