Ibbaibbele Lilakonzya Kumugwasya Kuti Mukonzye Kukkomana

NOKUBA kuti talili bbuku lyabusilisi, Ibbaibbele lilaamba ziccilila kukulimvwa kuli boobo, naa kuli kabotu naa kutali kabotu, kulakonzya kumujatikizya muntu mumizeezo akumubili. Ibbaibbele lyaamba kuti: “Moyo uukondwa musamu mubotu, pele muuya uutyokede ulayuminizya mubili.” Alimwi tubala kuti: “Na wawizuka mubuzuba bwamapenzi, inguzu zyako zyaceya.” (Tusimpi 17:22; 24:10) Kukatazyigwa mumizeezo kulakonzya kutumana nguzu, cakunga tulakonzya kutyolooka alimwi akuba bantu batakonzyi kuyanda kucinca naa kuyanda kugwasyigwa.

Kutyompwa akwalo kulakonzya kumunyonganya muntu kumuuya. Bantu ibalimvwa kumana mulimo, kanji balimvwa kuti taku naaceya nobakonzya kuba acilongwe cibotu a Leza alimwi akukkomaninwa anguwe. Simone waambwa mucibalo cainda, wakadooneka kuti “naa wakali muntu Leza ngwaakali kukonzya kukkomanina.” Pele notulanga mu Jwi lya Leza, Ibbaibbele, tujana kuti Leza ulababikkila maano aabo basola canguzu kumukkomanisya.

Leza Ulalanganya

Ibbaibbele litwaambila kuti “Jehova uli afwaafwi kubawizukide mumoyo, ulafutula batete myuuya.” Leza tasampauli “moyo uupengede,” pele usyomezya ‘kuubusya muuya wamuntu uubombede akukatalusya moyo wayooyo uupengede.’—Intembauzyo 34:18; 51:17; Isaya 57:15.

 Ciindi cimwi Jesu Mwana wa Leza, wakacibona kuba camaano kupanduluda basikwiiya bakwe kuti Leza ulabona bubotu mubabelesi bakwe. Kwiinda mukubelesya cikozyanyo, Jesu wakati Leza ulazyiba katiiti kafwa, calo bantu banji ncobakonzya kubona kuti ncintu citayandiki. Alimwi waamba kuti Leza ulizyi tubeela twamuntu nituba tuniini, nuuba mweelwe wamasusu. Jesu wakamaniizya cikozyanyo cakwe kwiinda mukwaamba kuti: “Nkaambo kaako mutayoowi, mulayandika kwiinda tuyuni tunji.” (Matayo 10:29-31) * Jesu wakatondezya kuti kufwumbwa bantu mbobakonzya kulibona, ibantu bajisi lusyomo balayandika mumeso aa Leza. Aboobo mwaapositolo Petro utuyeekezya kuti “Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.”—Incito 10:34, 35.

Amuzyilange Zintu Munzila Iili Kabotu

Ijwi lya Leza lituyumyayumya kuzyilanga munzila iili kabotu zintu caboola kumakani aambotulibona tobeni. Imwaapositolo Paulu kwiinda mukusololelwa amuuya uusalala wakalemba kuti: “Kuluzyalo ndundapegwa, ndaambila boonse buyo bali kulindinywe, kuti muntu ataliyeeyi cakulisumpula kwiinda mbukweelede, pele aliyeeye cakuumuna, mbubonya mbuli mweelwe walusyomo ngwaabilwa muntu umwi aumwi kwa-Leza.”—Ba-Roma 12:3.

Aboobo, takuyandiki kuciindilizya kulibikkila maano kusika aciimo cakuti limwi cazwa munzila; naa kulekelalyo kulibikkila maano. Muciindi caboobo, makanze eesu ngakuyanda kulibona munzila yeelede, yalo yeelede kutugwasya kuzyiba mpotukonzya ampotulezya. Mukaintu Munakristo wakacaamba boobu: “Tandili muntu mubi; alimwi tandili muntu wiinda bantu kubota. Kuli mpondili mubotu alimwi ampondili mubi, alimwi abamwi oobo mbobabede.”

Masimpe, kuba akuyeeya kuli boobu, tacili cuubauba. Inga cayanda kusoleka canguzu kuleka kulimvwa kuli boobu kutako mweezyo kwalo ikwali mumizeezo kwamyaka minji. Nekuba boobo, kwiinda mulugwasyo lwa Leza tulakonzya kucinca buumi alimwi ambotuzyilanga zintu mubuumi. Mboobu Jwi lya Leza mboli tuyumyayumya kucita. Tubala kuti: “Muleelede kuleka ziyanza zyanu zyaciindi abuntu bwanu bukulukulu bubisizidwe azisusi zibi zyalweeno, muleelede kubukuluka mumuuya wakuyeeya kwanu, akulisamika buntu bupya bulengulwidwe mucinkozya ca-Leza cabululami acabusalali bwinibwini.”—Ba-Efeso 4:22-24.

Kwiinda mukusoleka canguzu “kulisamika buntu bupya bulengulwidwe,” nkokuti mbotulimvwa mumoyo naa mumizeezo, tulakonzya kucinca buntu bwesu kuzwa kuli boobo butako mweezyo akuba abuntu buli kabotu. Lena waambwa mucibalo cainda, wakabona kwaamba kuti ccita buya kuti wakuleka kuyeeya kutali kabotu kwakuyeeya kuti taku muntu uukonzya kumuyanda naa kumugwasya, buyo-buyo taku cakali kukonzya kumucinca mbuli mbwaakali kulimvwa. Ino ndulayo nzi lugwasya lujanwa mu Bbaibbele lwakamugwasya Lena, Simone, alimwi abamwi kuti bakonzye kucinca kuli boobu?

 Njiisyo zya Bbaibbele Ziyungizya Kukkomana

“Bika makani aako oonse mumaanza aa-Jehova, lino ulakutabilila.” (Intembauzyo 55:22) Cakutaanguna, mupailo ulakonzya kutugwasya kuti tukonzye kukkomana ncobeni. Simone ulati: “Kufwumbwa ndatyompwa, ndilanga kuli Jehova akulomba kuti andigwasye. Taku nindakali mubukkale mondatakali kukonzya kutambula nguzu zyakwe abusolozi bwakwe.” Sintembauzyo natukulwaizya kubikka mapenzi eesu mumaanza aa Jehova, mubwini utuyeekezya kuti Jehova tatubikkili buyo maano, pele aumwi muntu kumugama ulamubona kuba muntu weelela lugwasyo lwakwe. Buzuba bumwi masiku mubuzuba bwa Pobwe lya Kwiindilila mu 33 C.E., basikwiiya ba Jesu bakakopana kuyeeya makani Jesu ngaakaamba aakuti kwakaceede buyo mazuba masyoonto kuti ajokele kujulu. Jesu wakabakulwaizya kuti kabapaila kuli Taateesu, alimwi wakayungizya kuti: “Amukumbile, muyoopegwa, kuti kukondwa kwanu kuzyulile.”—Johane 16:23, 24.

“Kupa kuletela cileleko cipati kwiinda kutambula.” (Milimo 20:35, Ci) Kweelana a Jesu mbwaakayiisya, kupa nkaambo kapati kapa kuti muntu akkomane ncobeni mubuumi. Kubelesya kasimpe aaka kamu Bbaibbele kulatugwasya kubikkila maano bamwi nzyobayandika muciindi cakwiile kulibikkila buyo maano tobeni. Notugwasya bamwi alimwi twabona mbobalumba, tulakkomana. Lena ulazumina kuti kubandika makani mabotu kubantu ciindi aciindi aazwa mu Bbaibbele, kulamugwasya munzila zyobilo. Ulati: “Cakutaanguna, kulandipa kukkomana akukkutila ooko Jesu nkwaakaamba.” “Cabili, ndilatambula makani mabotu aazwa kubantu alo aandipa kukkomana.” Kwiinda mukulipa camoyo woonse, cakutadooneka tuya kukubona kusyomeka kwamajwi aabbuku lya Tusimpi 11:25 ooko Bbaibbele nkoliti: ‘Ooyo uutilaila camoyo woonse ulatilaililwa alakwe.’

“Mazuba oonse aamuntu uupengede alakataazya, pele uukondwa mumoyo uli apobwe lyoonse.” (Tusimpi 15:15) Toonse tulijisi lwaanguluko lwakulisalila mbuli mbotweelede kulibona alimwi abukkale bwesu. Tulakonzya kuba mbuli muntu uulanga zintu munzila iitali kabotu akutalika kukopana, kwataba boobo tulakonzya kusala kuyeeya munzila iili kabotu, kulimvwa kuba ‘amoyo uukondwa’ akukkomana mbuli kuti tuli apobwe. Simone wakati: “Ndilasola canguzu kulanga zintu munzila iili kabotu. Ndijisi bubi caboola kumakani aakuliyiisya ciiyo alimwi amumulimo, alimwi akwalo kupaila, ndilapaila cakutaleka. Alimwi ndilasola kuba akati kabantu balanga zintu munzila iili kabotu, alimwi ndilasola kubagwasya kuyeeya.” Kuba amoyo uuli boobu kupa kukkomana nconzyo, kayi Bbaibbele litukulwaizya kuti: “Amubotelwe muli-Jehova nyoonse nobalulami, amusekelele nyoonse nemululememyoyo.”—Intembauzyo 32:11.

“Mulongwe ulayanda mweenzinyina ciindi coonse, pele munyina uzyalilwa kugwasya muziindi zyamapenzi.” (Tusimpi 17:17, BT) Kwaambila mulongwe twaambo tuli mumoyo, naa kwaambila muntu uusyomeka uukonzya kutulaya, kulakonzya kutugwasya kuleka kulimvwa kutali  kabotu kakutana katazya cakuzwa munzila. Kwaambaula abantu kulakonzya kutugwasya kubona zintu munzila iili kabotu. Simone uyungizya kuti: “Ikwaamba mbondilimvwa kulandigwasya kapati. Cilayandika kwaambila muntu mbuli mbomulimvwa. Ikapati kucaamba kutegwa cuumwe muwo, nceciyandika.” Kucita boobu kuya kumugwasya kubona bwini bwabbuku lya Tusimpi lyaamba kuti: “Kulibilika kwamuntu kumucita kuti abe mbuli kuti uyumwide mukuli mumoyo wakwe, pele jwi bbotu limucita kuti akondwe.”—Tusimpi 12:25, BT.

Ncomukonzya Kucita

Twalanga-langa buyo zisyoonto akati kazintu zinji zitaliboteli alimwi anjiisyo zigwasya zizwa mu Bbaibbele zikonzya kutugwasya kumana cilengwa cakulanga zintu munzila iitali kabotu, alimwi akukonzya kukkomana nconzyo. Ikuti kamuli akati kabaabo bali mupenzi eeli, tumukulwaizya kulilanga-langa cakusitikila Jwi lya Leza, Bbaibbele. Amusole kubona mbomukonzya kubona zintu munzila iili kabotu alimwi acilongwe canu a Leza. Tusyoma kuti kwiinda mubusolozi bwa Jwi lya Leza, muya kukonzya kukkomana ncobeni muzintu zyoonse nzyomucita.

Bupanduluzi buyungizidwe

[Cifwanikiso icili apeeji 7]

Kupona kweelana anjiisyo zyamu Bbaibbele kuletela lukkomano